1-2. Was is ti pest aat fer ti Piipel leese un xtutiire? Mach een ferklaychung.

 IWERLEE tich tas tuu wilst een haus khaafe. Foer tayn ëntxlus mache, was wilst tuu peopachte? Ploos een pilt fon te foner sayt weyer kenuuch? Nee. Sicher wilst tuu tat hin keen un tas haus siin. Tuu khanst tas haus in te auswënich sayt kuke un aach rin keen un ti tsimere siin un yeete ek unersuuche. Es weyer aach kuut te proyëkt fom haus noo kuke, fer siin wii tas kepaut waar. Sicher teest tuu yeete kleenichkheet unersuuche.

² Meyer khene tas selwiche mache wën mer ti Piipel leese un xtutiire. Eene xrayper saat tas ti Piipel is wii een “hooch un kroos kepay woo aach tiife funtamente hot”. Soo, wii khene mer kuut lërne was in te Piipel xteet? Wëns tuu tëne ploos xnel triwer leest, im xtant lërnst tuu ploos ti haupste inlërnunge — “ti haupste funtamente fon Kot sayn hayliche wërter”. (Hep. 5:12) Soo wiis tuu must im haus rin keen fer mee kleenichkheete iwer tëm lërne, must tuu aach ti Piipel xtutiire fer peser ferxteen was se saat. Een kuut itee is xtutiire wii ti tinge in te Piipel naner ferpunt sin. Fersuuch ferxteen net ploos was tuu klaapst, awer aach warom tuu too traan klaapst.

3. Was hot te aphostel Phaul ti priiter uf kemuut se mache un warom? (Ëfeser 3:14-19)

³ Fer ti kanse teele fon Kot sayn Wort ferxteen, sin etliche tinge woos tuu must tiifer xtutiire. Te aphostel Phaul hot ti kriste uf kemuut ti Piipel flaysich xtutiire fer kenau ferxteen “wii prayt, lang, hooch un tiif ti woerheet is”. Soo khente se ufm klaape noch peser “kewortselt un fest kextelt” wëre. (Lees Ëfeser 3:14-19.) b  Meyer mise tas selwiche mache. Wole mer siin wii mer khene Kot sayn Wort tiif xtutiire un soo, tas peser ferxteen.

4. Was khene mer mache fer uns tichter pay Kot xafe? Kep payxpiile.

⁴ Wii kriste, wole mer net ploos ti haupste inlërnunge fon te Piipel ferxteen. Meyer wole “soo kaar ti tiife sache fon Kot” lërne, un meyer kriin tas hin mit te hilef fon Kot sayn hayliche kayst. (1 Kor. 2:9, 10) Was mënst tuu een tiif unersuuchung mache woo tich tichter pay Yeehoowa xaft? Tuu khanst, tsum payxpiil, unersuuche wii Yeehoowa liip fer sayn tiiner in te friirixe tsayte ketsaycht hot un wii es pewayst tas eyer tich aach liipt. Tuu khanst aach xtutiire wii Yeehoowa wolt hon tas ti israeliiter tëm aan peete teete un tas ferklayche mit te aat wii eyer wil hon tas mer tëm hayt aan peete. Orer im xtant khanst tuu een xtuutyum mache iwer ti profetsiie woo Yeesus erfiilt hot torich sayn aarwayt un leepe too uf te eyert.

5. Iwer was fer sache teest tuu kërn een tiif xtuutyum mache?

⁵ Etliche woo liipe tiife unersuuchunge mache, hon kesaat was fer tiife sache teete se kërn in te Piipel xtutiire. Tuu khanst etliche fon tiise sache fine im khaste “ Itee fon piiplixe sache fer een tiif xtuutyum”. Es khan tich fiil frooheet pringe tiise sache xtutiire mit tëm Índice das Publicações da Torre de Vigia orer te Guia de Pesquisa para Testemunhas de Jeová. Ti Piipel tiif xtutiire khan tich helfe tayn klaape ferxtërke un “Kot sayn khëntnis fine”. (Xpr. 2:4, 5) Wole mer yets xpreche iwer etliche tiife woerheete woos tuu xtutiire khanst.

6. (a) Was fer is ti unerxiit tswixich een plaan un een tsiil? (b) Warom khene mer saan tas Yeehoowa sayn tsiil fer ti mënxe un ti eyert “eewich” is? (Ëfeser 3:11)

⁶ Kuk mool, tsum payxpiil, was ti Piipel iwer Kot sayn tsiil saat. Een plaan un een tsiil sin net tas selwiche. Meyer khene een plaan ferklayche mit een xtroos woo tich nëmt tsum plats woos tuu keen wilst. Awer wën etwas ti xtroos tsu macht, khanst tuu net pis tas plats hin khome. Im keeche teel, khene mer een tsiil ferklayche mit tëm plats woo mer hin keen wole. Meyer wise kenau woo mer hin keen wole, awer meyer khene unerxiitliche xtroose nëme woo uns pis tat hin  nëme. Wën een xtroos tsu is, khene mer een aner raus suuche. Es is aarich kuut tas Yeehoowa sayn “eewiche tsiil” xrit noo xrit in te Piipel pekhant kemacht hot. (Ëfe. 3:11) Fer sayn tsiil erfiile, khan Yeehoowa unerxiitliche aate penutse un es funtsyoniirt imer, wayl “Yeehoowa macht tas ales fer sayn opjetiiw tiint”. (Xpr. 16:4) Un te resultaat fon was Yeehoowa macht, halt fer imer. Was fer is Yeehoowa sayn tsiil? Un wii meecht eyer sich aan kephast hon fer tas erfiile?

7. Noo te repelyoon fon te eyerste mënxe, wii hot Kot sich aan kephast fer sayn tsiil erfiile? (Matheus 25:34)

⁷ Kot hot fer ti eyerste mënxe kesaat was sayn tsiil fer tëne waar. Tee hot kesaat: “Tuut khiner kriin, un wërt fiil un macht ti Eyert fol, un tuut se aych iwernëme, un tuut (…) yeete lepeentich kriatuer woo sich uf te Eyert weekelt uner aych hale.” (Xee. 1:28) Wii Aatam un Ewa sich repeliirt hon un ti sint tsu te kans mënxheet keprung hon, es hot Yeehoowa net um kehal sayn tsiil erfiile. Tee hot sich aan kephast un keënert ti aat wii eyer tas erfiile teet. Tee hot klaych ëntxlist een Raych im himel in xtele woo teet sayn orixinaale tsiil fer ti mënxe un ti eyert erfiile. (Lees Matheus 25:34.) c In sayn pextimt tsayt, hot Yeehoowa weeche liip sayn eyerste kepoerne Soon tsu te eyert kexikt fer ti layt iwer tas Raych in lërne un fer sayn leepe ap kepe fer uns fon te sint un fom toot rete. Tan hot Kot Yeesus fom toot uf keruuft fer noch mool im himel leepe un Kheenich fon Kot sayn Raych wëre. Awer meyer khene noch mee iwer Kot sayn tsiil lërne.

8. (a) Was is tas theema fon te Piipel? (b) Tëm noo Ëfeser 1:8-11, was noch tuut Yeehoowa mache? (Kuk tas pilt am aanfang fom piichelche.)

⁸ Tas haupste theema fon te Piipel is tas Yeehoowa sayn naame ferhaylicht wërt wën eyer sayn tsiil fer ti eyert erfiilt torich tas Raych, woo unich Kristus is. Yeehoowa sayn tsiil khan net keënert wëre. Tee hot ferxproch tas ti tinge pasiire tuun kraat wii eyer kesaat hot. (Isa. 46:10, 11, noote; Hep. 6:17, 18) Ti eyert wërt tsu een paratiis kemacht un tat, tuun Aatam un Ewa sayn perfekte un kerechte nookhomer “fer imer leepe”. (Psal. 22:26) Awer tas is net ales. Yeehoowa hot noch een aner tsiil: al sayn tiiner im himel un uf te eyert eenich lose. Tan al im Uniwërsum tuun Yeehoowa wii sayn Soweraan troy aan heere. (Lees Ëfeser 1:8-11.) d Tuut es tich net ferwunere ti wunerlich aat wii Yeehoowa sayn tsiil erfiilt?

9. Wën mer ti Piipel leese, wii wayt khene mer im futuer siin?

⁹ Tenk mool noo aan te profetsii woo Yeehoowa kemacht hot im Eetem kaate, woo in Xeenesis 3:15 xteet. e Es hat se tuun mit ewënte woo Sayn tsiil erfiile teete; awer tii teete tausente yoore xpeeter pasiire. Tsum payxpiil: Kot hat fer Apraham kesaat tas noo fiile xeneratsyoone, teet eene fon sayn nookhomer Kristus wëre. (Xee. 22:15-18) Tan in 33 N.K., wii ti profetsii foer raus kesaat hat, hot Yeesus een wee in sayn feerst kriit. (Aph. 3:13-15) Ti letst ewënt fon tiise profetsii — ti fertrikung fon Satanaas sayn khop — tuut mee wii 1.000 yoore im futuer pasiire. (Apo. 20:7-10) Un ti Piipel  xprecht noch fiil mee iwer was pasiire tuut soo lang wii ti fayntxaft tswixich Yeehoowa sayn Orkanisatsyoon un Satanaas sayn welt tsum ën khomt.

10. (a) Was fer ewënte tuun klaych pasiire? (b) Wii khene mer unser ketanke un hërts foer perayte? (Kuk ti noote.)

¹⁰ Tenk iwer tiise wunerliche ewënte woo ti Piipel foer raus saat. Eyerst, tuun ti natsyoone “friit un sicherheet” aus xpreche. (1 The. 5:2, 3) Tan tuut ti kroos tripulatsyoon pletslich aan fange, wën ti natsyoone al ti falxe relichyoone atakiire. (Apo. 17:16) Noo heyer, tuut te “Mënxe Soon (…) uf te wolke fom himel khome mit macht un kroos hërlichkheet” un khan sin tas mer unkeweenliche pewaysunge too tefun siin. (Mat. 24:30) Tan tuut Yeesus ti layt richte un ti xeef fon te kaprite aus naner mache. (Mat. 25:31-33, 46) Torich tiise tsayt, tuut Satanaas wayter sich keeche Yeehoowa xtele. Wayl Satanaas Kot sayn folek fiil hast, tuut eyer een krup natsyoone — in te Piipel kenënt wii Kook fom lant fon Makook — uf hetse Kot sayn folek atakiire. (Ese. 38:2, 10, 11) In een momënt torich ti kroos tripulatsyoon, wëre ti kesalpte woo noch uf te eyert sin, tsum himel kenom fer mit Yeesus un sayn himlixe militeer te Armaxeton kriich khëmpfe; tiise kriich is te letst ewënt fon te kroos tripulatsyoon. f (Mat. 24:31; Apo. 16:14, 16) Tan tuut Yeesus sayn Tausent Yoore Rechiirung iwer ti eyert aan fange. (Apo. 20:6)

11. Wii xpiirst tuu tich wëns tuu tenkst tas tuu fer imer leepe khanst? (Kuk aach tas pilt.)

¹¹ Yets tenk aan te tsayt noo ti 1.000 yoore. Ti Piipel saat tas unser Kriatoer hot “soo kaar eewichkheet in [unser] hërts ketuun”. (Ekl. 3:11) Tenk aan was tas fer tich un tayn fraayntxaft mit Yeehoowa petayt. Tas puuch Achegue-se a Jeová (sayt 319) saat was interesantes too triwer: “Wën mer xon hunerte, tausente, milyoone orer soo kaar pilyoone yoore keleept hon, tuun mer fiil mee iwer Yeehoowa wise wii hayt. Awer meyer tuun wayter xpiire tas es kept noch fiile wunerliche tinge woo mer iwer tëm lërne khene. (…) Meyer khene uns kaar net iwerleye wii xeen un interesant tas leepe im Paratiis wërt. Un tas pestes is tas mer uns imer  tichter pay Yeehoowa xafe tuun.” Pis tiise tsayt khomt, soo lang wii mer Kot sayn Wort xtutiire, was noch khene mer unersuuche?

12. Wii khene mer “siin” was im himel pasiirt? Kep een payxpiil.

¹² Ti Piipel kept uns etliche kleenichkheete iwer wii tas is foer Yeehoowa sayn presens in te “hooche pletse” im himel sin. (Isa. 33:5) Ti Piipel xprecht wunerliche tinge iwer Yeehoowa un tas himlixe teel fon sayn Orkanisatsyoon. (Isa. 6:1-4; Tan. 7:9, 10; Apo. 4:1-6) Tsum payxpiil, meyer khene leese iwer ti wunerliche tinge woo Esekyël kesiin hot wii ‘te himel uf kang is un tee aan kefang hot wisyoone fon Kot kriin’. (Ese. 1:1)

13. Wii xpiirst tuu tich iwer was Yeesus fom himel aus am mache is? (Hepreeyer 4:14-16)

¹³ Tenk aach aan was Yeesus, fom himel aus, tsu uns am mache is wii unser Kheenich un mitlaytiche Hooche Priister. Torich tëm, khene mer im kepeet “ticht [aan Kot sayn] troon fon unfertiint kuutheet khome” un soo, hilef un parmhërtslichkheet “in te richtich tsayt” ferlange. (Lees Hepreeyer 4:14-16.) g Meyer sole net lose noch net mool eene taach rom keen oone se tenke aan was Yeehoowa un Yeesus fom himel fer uns xon kemacht hon. Tëne sayn liip sol unser hërts tiif aan krayfe un uns uf muute flaysich in Kot sayn aanpeetung sin. (2 Kor. 5:14, 15)

14. Was is eene fon te peste tinge woo mer mache khene fer se tsayche wii kroos unser petanklichkheet tsu Kot un Yeesus is? (Kuk aach ti pilter.)

¹⁴ Eene fon te peste aate wii mer tsayche  khene wii kroos unser petanklichkheet tsu Yeehoowa un sayn Soon is, is uns aan xtrenge fer ti layt helfe Yeehoowa sayn Tsayer un Yeesus sayn tisipele wëre. (Mat. 28:19, 20) Tas is was te aphostel Phaul kemacht hot weeche sayn petanklichkheet tsu Kot un Kristus. Tee wust tas Yeehoowa sayn wile is tas “ale sorte layt keret kepe un een kenau khëntnis fon te woerheet kriin”. (1 Tim. 2:3, 4) Tee hot sich aan kextrengt in te preetich aarwayt fer ti kreeste numer layt woos meechlich waar helfe, “fer in ale meechliche aate, etliche se rete”. (1 Kor. 9:22, 23)

15. Tëm noo Psalm 1:2, was pringt uns frooheet?

¹⁵ Te xrayper fom Psalm 1 hot een froo persoon pexrip wii yemant woo sich “mit Yeehoowa sayn kesets [frayt]” un woo “taach un nacht too triwer noo tenkt”. (Psal. 1:1-3, noote) Een Piipel iwersetser hot iwer tiise wersikel kesaat: “Ti persoon sol soo een kroos wunx hon noo Kot sayn oryentiirunge, tas se tuut tëne suuche, xtutiire un een lang tsayt too triwer noo tenke.” Tee hot aach kesaat tas “wën een taach rom keet un ti persoon net ti Piipel kelees hot, tas is eene taach woo ferloer kep is”. Tuu khanst frooheet in tayn Piipel xtuutyum fine wëns tuu ferxteest al sayn interesante kleenichkheete un mërkst wii se naner ferpunt sin. Kot sayn Wort tiif xtutiire khan uns wërklich froo lose!

16. Iwer was tuun mer im neekste artikel xpreche?

¹⁶ Ti xeene woerheete woo Yeehoowa uns torich sayn Wort in lërnt, sin net tsu xweyer fer se ferxteen. Im neekste artikel, xpreche mer iwer eene fon te tiifste woerheete: Yeehoowa sayn kroos kaystliche thempel. Te aphostel Phaul hot tiise thempel pexrip in sayn priif fer ti hepreeyxe kriste. Meyer winxe tas tiise sache unersuuche tich fiil frooheet pringt!