1-2. Omuano omusemba wokulesa nokukonḓonona Ombeibela oouṋe? Yandja otjihorera.

 NGATU tje ove wa tanda okuranda ondjuwo. Ove otjo vanga okumuna tjike ngunda au hi ya twa po ondando ndjo? Hapo otjo vanga okumuna otjiperendero tji matji raisa ondjuwo komurungu uriri? Otjiperi kutja otjovanga okuyenda omuini kondjuwo ndjo okukeikondoroka, okuhita nokutara momatuwo ayehe, na wina okutara omuano auhe mu ya tungwa. Ove mape ya otjovanga okumuna ondunge yondungiro yondjuwo kokutja u tjiwe omuano mu ya tungwa. Otjiperi kutja, ove mo vanga okumuna omiano avihe ondjuwo ndjo mu ya tungwa ngunda au hi ya randa.

² Eṱe wina matu yenene okutjita nao indu tji matu lese nokukonḓonona Ombeibela. Umwe wovakonḓonone vOmbeibela wa sasaneka ombuze yOmbeibela ku na “ondjuwo onene nonde ndji nozongunḓe ozonamasa.” Ku nao, hapo eṱe matu yenene okutjiwa vi avihe mbi vi ri mOmbeibela? Indu tji wa hakahana okuilesa, ove mape ya o rihongo “ovirihongwa ovitenga vyombuze yaNdjambi.” (Hebr. 5:12) Otja tji mo hepa “okuhita” mondjuwo kutja u i tjiwe nawa, otji mo hepa okukonḓonona Ombeibela kutja u i zuve nawa. Omuano umwe omusembasemba wokukonḓonona Ombeibela okumuna omuano orupa rumwe rwayo mu ri hitasana na rarwe. Kondja okuzuva nawa oviṋa mbi u kambura mo, nu wina kondja okutjiwa kutja ongwaye tji u kambure mu vyo.

3. Otjikeṋa omuapostele Paulus tja raera Ovakriste ovakwao okutjita, nu omena raye? (Ovaefese 3:​14-19)

³ Kutja tu zuve otupa atuhe twEmbo ra Mukuru nawa, pe noviṋa tjiva mbi matu hepa okukonḓonona oukoto. Omuapostele Paulus wa tunduuza Ovakriste ovakwao okukonḓonona  Embo ra Mukuru kokutja ve ‘zuve nawa ouparanga noure noutonga noukoto’ wouatjiri. Nu owo otji mave ‘ṋangananisa omize vyawo nokuzikama’ mongamburiro. (Lesa Ovaefese 3:​14-19.) Eṱe wina matu hepa okutjita nao. Ngatu katare omuano mu matu yenene okukonḓonona Embo ra Mukuru nawa kutja tu mune omaheero wa ro okuura.

4. Ovikeṋa mbi matu yenene okutjita kutja tu tumbuke popezu na Jehova? Yandja ovihorera.

⁴ Otjovakriste eṱe katu nokuvanga okutjiwa ovirihongwa ovitenga vyOmbeibela uriri. Nombatero yombepo ya Mukuru, eṱe tu nonḓero okurihonga “nangarire imbi oviundikwa ovikoto tjinene vyaNdjambi.” (1 Kor. 2:​9, 10) Ove mo yenene okutjita omakonḓononeno woye omuini nondando yokutumbuka popezu na Jehova. Otjotjihorera, ove yenene okukonḓonona omuano ma raisa orusuvero kovakarere ve voruveze orukuru nomuano me raisa kutja eye wina we ku suvera. Ove wina mo yenene okukonḓonona omuano Jehova maa vanga Ovaisrael okurikotamena ku ye, nosasaneke nomuano eye me vanga kutja tu rikotamene ku ye nai. Poo ove mape ya o konḓonona oukoto omaprofetero Jesus nga yenenisa mehupo re na motjiungura tje tjokuzuvarisa.

5. Hapo pe nepu ndi mo vanga okukonḓonona momakonḓononeno woye omuini wOmbeibela?

⁵ Ovahongwa tjiva vOmbeibela va purwa kutja ovikeṋa mbi ve vanga okukonḓonona oukoto ku wo oveni mEmbo ra Mukuru. Omaziriro wawo tjiva ye ri mokawongo nga “ Omapu ngu mo yenene okurikonḓononena omuini.” Ove mo yenene okukara nondjoroka onyingi mokukonḓonona omapu ohamukwao na ingo nombatero yo-Watch Tower Publications Index poo Okambo komakonḓononeno kOvahongonone va Jehova. Tji wa tjiti omakonḓononeno wOmbeibela omakoto maye yenene okukurisa ongamburiro yoye nu maye ku vatere “okukara nondjiviro yaNdjambi.” (Omiano 2:​4, 5) Eṱe nai matu kahungirira kouatjiri tjiva oukoto wOmbeibela mbu matu yenene okukonḓonona nawa.

6. (a) Sasaneka kutja ongwaye ondando ya Jehova aruhe tji i toṋa? (b) Ongwaye tji matu tja ondando ya Jehova kovandu na kehi o ya “aruhe”? (Ovaefese 3:11)

⁶ Otjotjihorera, ngatu tare ku imbi Ombeibela mbi hungira ohunga nondando ya Mukuru. Jehova ke ri tjimuna ovandu mbe toora ondjira kaaṋi okuvetwara koruveze ku mave vanga okukavaza. Indu tji pe notjipwite mondjira ndjo, mape ya ave ha kavaza koṋa ku mave vanga okuyenda. Posi ya ondando ya Jehova i ri tjimuna oruveze oruini ku matu vanga okukavaza. Eye ma tjiwa rukuru oruveze ku ma i, posi ya mape ya a toora ozondjira zarwe poo omiano pekepeke okukavaza ngo. Ouṋingandu, Jehova wa vandurura kouṱiṱiṱiṱi imbi mbye “rivangera okuza ko nga aruhe” mOmbeibela. (Ef. 3:11) Jehova ma yenene okutoorora omiano pekepeke okuyenenisa ondando ye mena rokutja avihe eye “mbya ungura vi nomaheyero wavyo.” (Omiano 16:4) Nu imbi avihe Jehova mbya ungura mavi karerere nga aruhe. Ondando ya Jehova oiṋe nu ovikwaye mbya rundurura kokutja me i yenenise?

7. Kombunda yaindu ovandu ovatenga tji ve mu pirukira, Jehova wa rundurura vi ondando ye kutja i yenenisiwe? (Mateus 25:34)

⁷ Mukuru wa raera ovandu ovatenga ohunga nondando ndjaari na yo kovandu. Owo aave ‘sokukwatasana okutakavara nokuurisa ehi nokukara nouvara kombanda yovinamuinyo avihe’ mbi ri kombanda yehi. (Gen. 1:28) Indu Adam na Eva tji va pirukira Mukuru nave tjiti kutja ouvi u ye movandu, iho katji tjaerere ondando ya Jehova kutja ai ha yenenisiwa. Eye wa rundurura omuano mu ma yenene okuyenenisa ondando ndjo. Nu tjimanga, eye we rimanena okutwa po Ouhona meyuru mbu mau yenenisa ondando ndja ri na yo kovandu na kombanda yehi. (Lesa Mateus 25:34.) Moruveze eye ndwa toorora, Jehova wa hinda Omuna we omukwatwaerike kouye okuyekuhonga ovandu ohunga nOuhona wa Mukuru nokuyandja omuinyo we okutuyama kouvi nonḓiro. Okuzambo Jesus wa pendurwa na yaruka keyuru okukanana otjombara yOuhona wa Mukuru. Posi ya pe novingi okurihonga ohunga nondando ya Mukuru.

8. (a) Ombuze yOmbeibela onanḓengu ooiṋe? (b) Otja kOvaefese 1:​8-11, ovikeṋa vyarwe Jehova mbi ma kayenenisa? (Tara kotjiperendero tjokombanda yokambo nga.)

⁸ Ombuze onanḓengu mOmbeibela oyokutja ena ra Jehova mari yapurwa otja tji ma yenenisa ondando ye kehi okupitira mOuhona we mbu mau nanwa i Kristus. Ondando ya Jehova kamaai rundururwa. Eye wa kwizika kutja oviṋa avihe mavi tjitwa otja pa hungira. (Jes. 46:​10, 11; Hebr. 6:​17, 18) Ouye mau rire oparadisa mu mamu tura ozondekurona za Adam na Eva ohomonena mu ‘mave ṋingapara nga aruhe.’ (Eps. 22:26) Posi ya imbyo kaviṋa aviyerike Jehova mbi ma kayenenisa. Eye wina ma wanisa ovakarere ve avehe meyuru na kombanda yehi. Nu okuzambo avehe mave kara nonḓuviro ku Jehova otjOmunane wawo. (Lesa Ovaefese 1:​8-11.) Hapo ove ko nokutjaterwa i yomuano omuwa Jehova me yenenisa ondando ye?

9. Okulesa Ombeibela ku tu vatera okumuna oruyaveze kokure pu pe ṱa pi?

⁹ Tara komaprofetero Jehova nga hungira motjikunino tja Eden, otja tji ya tjangwa mu Genesis 3:15. b Oyo aaye hungire ohunga noviṋa mbi mavi kayenenisa ondando ye. Posi ya ovitjitwa mbyo aavi sokukatjitwa ozombura ozengi kombunda yanao. Ovitjitwa  mbyo avi kamburire mo ongwatero yondekurona ya Abraham, ngu ri Kristus. (Gen. 22:​15-18) Okuzambo mombura ndji 33 O.Z., Jesus wa vetwa motjipanḓe otja tji pa hunganekwa. (Oviung. 3:​13-15) Omaprofetero wokutja ‘orukwato’ maru kanyainya otjiuru tja Satan maye kayenenisiwa mozombura eyovi na kombunda yanao okuza ku nai. (Omavan. 20:​7-10) Nu Ombeibela i vandurura ovingi ohunga novita mbi mavi katjitwa pokati komananeno wa Satan notjira tja Jehova.

10. (a) Ovikeṋa mbi mavi ya moruyaveze rwopopezu? (b) Matu yenene vi okurongerisa omeripura nomitima vyetu? (Lesa omambo wokehi.)

¹⁰ Ripura novitjitwa ovihimise imbi Ombeibela mbi ya hunganeka. Rutenga, oviwaṋa mavi tja: “Ku norusuvero [‘orusuvo,’ EEP] nohange.” (1 Tes. 5:​2, 3) “Ndino,” ondatumisire ondirise mai utu indu oviwaṋa tji mavi wire ozongamburiro azehe zoposyo. (Omavan. 17:16) Kombunda ya nao, mape ya ape kara otjiraisiro ‘tjOmuna wOmundu ama yende movikamba vyeyuru nomasa omanene nouvara.’ (Mat. 24:30) Jesus ma pangura ovandu nu e ve haṋa movimbumba vivari tjimuna omurise tje haṋa ozonḓu kozongombo. (Mat. 25:​31-33, 46) Moruveze ndwo, Satan ma kayenda komurungu okupirukira Jehova. Mena rokutja eye wa tonda ovakarere va Mukuru tjinene, Satan ma kaworonganisa oviwaṋa Ombeibela mbi isana kutja Gog wehi ra Magog okuwira ovakarere va Jehova. (Esek. 38:​2, 10, 11) Moruveze kaaṋi ndwo, ovatwirisiwa mba sewa ko mave twarewa keyuru okukawana na Kristus notjimbumba tje tjovita tjeyuru. Owo mave karwa ovita vya Armagedon, ovyo mbi ri omaandero wondatumisire ondirise. c (Mat. 24:31; Omavan. 16:​14, 16) Okuzambo ozombura eyovi zomananeno wa Kristus kombanda yehi otji maze utu.—Omavan. 20:6.

11. Okukahupa nga aruhe ku nomaheero waye kove? (Wina tara kotjiperendero.)

¹¹ Nambano ripurira koruyaveze rwoye okukapita ozombura eyovi. Ombeibela mai tja Omuute wetu wa twa mo “omakayendero woruveze ndu maru ya momutima womundu.” (Omuzuv. 3:11) Ripura uriri kutja iho  matji hee ye tjike kove noupanga woye ku na Jehova. Embo ndi Draw close to Jehovah pomukuma 319, ri hungira kepu enanambango ndi: “Kombunda yokuhupa ozombura omasere, omayovi, omangete, nandarire omatau, eṱe matu katjiwa ovingi ohunga na Jehova Mukuru kombanda yaindu tji tu tjiwa nai. Nungwari eṱe tu noumune wokutja matu kerihonga ovingi ovihimangongo ohunga na ye. . . . Eṱe kamaatu yenene okuripurira komuano ehupo moparadisa mu mari karira ewa. Nu otjiṋa otjiwa tjinene matu katumbuka popezu na Jehova aruhe.” Nu nai, otja tji matu kayenda komurungu okukonḓonona Embo ra Mukuru, ovikwaye vyarwe mbi matu yenene okukonḓonona?

12. Matu yenene vi okuṱumununa omeho wetu momayuru? Yandja otjihorera.

¹² Embo ra Mukuru ri vandurura kutja Jehova “u honapara kombanda yoviṋa avihe.” (Jes. 33:5) Ombeibela i vandurura oviṋa ovihimise ohunga na Jehova norupa rwotjira tje tjomeyuru. (Jes. 6:​1-4; Dan. 7:​9, 10; Omavan. 4:​1-6) Otjotjihorera, eṱe matu yenene okulesa ohunga noviṋa ovihimise Esekiel mbya muna indu tja muna ‘eyuru tji ra paturuka neye tja muna otjirimunikise tja Ndjambi.’—Esek. 1:1.

13. Ove u noumune uṋe ohunga na imbi Jesus mbye tjita meyuru, otja kOvaheberi 4:​14-16?

¹³ Wina ripura ohunga notjiungura tja Jesus meyuru otjOmbara yetu nu Omupristeri otjiuru omunatjari. Okupitira mu ye eṱe matu yenene okuya “kotjihavero tjouhona tjaNdjambi tjotjari” mongumbiro nokuningira otjari nombatero “moruveze orusemba.” (Lesa Ovaheberi 4:​14-16.) Eṱe matu hepa okuripura eyuva arihe ohunga na imbi Jehova na Jesus mbi ve tu tjitira na wina imbi mbi ve tu tjitira nai okuza meyuru. Orusuvero rwawo ku eṱe maru sokutuṱuna kourekoto womitima  vyetu na ru tu hingi okurikotamena ku Jehova nonḓero aihe.—2 Kor. 5:​14, 15.

14. Omuano uṋe umwe omusemba mu matu yenene okuraisa ondangi ku Jehova na Jesus? (Wina tara koviperendero.)

¹⁴ Omuano umwe omusembasemba okuraisa ondangi ku Mukuru wetu nOmuna we, omokukondja okuvatera varwe okurira ovahongonone va Jehova nokutja ve rire ovahongewa va Jesus. (Mat. 28:​19, 20) Iho ootjiṋa omuapostele Paulus tja tjita okuraisa ondangi ku Mukuru na Kristus. Eye aa tjiwa kutja ombango ya Jehova oyokutja “ovandu avehe ve ṋingapare nu ve vaze kondjiviro youatjiri.” (1 Tim. 2:​3, 4) Eye wa ungura oukukutu motjiungura tje tjokuzuvarisa okuvatera ovandu ovengi ‘kokutja ma yame nangarire tjivatjiva.’—1 Kor. 9:​22, 23.

15. Otja kEpsalme 1:​2, otjikeṋa tji matji tjiti kutja tu rire ovaṋingandu?

¹⁵ Omutjange wEpsalme etenga wa tja, omuṋingandu “ingwi ngu muna ondjoroka mokuṱakamisa omatwako waMuhona, nu ngu rizemburuka na wo omutenya nouṱuku.” (Eps. 1:​1-3) Omutoroke umwe wOmbeibela wa tja nai ohunga nomazeva ngo kutja omundu “ngwa suvera omirari vya Mukuru tjinene eye u konḓonona vyo, u rihonga vyo, nu u kara noruveze oruingi okuripura ohunga na vyo.” Eye wina wa tja “indu eyuva ndo tji ra kapita nokuhinokulesa Ombeibela, eyuva ndo ra moroka.” Ove mo yenene okumuna ondjoroka momakonḓononeno wOmbeibela mokuraisa onḓero moviṋa ovingi ovinanḓengu nokumuna omuano oviṋa avihe mu vi hitasana. Tjiri mo kara nenyando mokukonḓonona ouparanga noukoto wEmbo ra Mukuru.

16. Morupa ndu maru kongorere ko matu kahungirira ku ye?

¹⁶ Kauzeu okuzuva ouatjiri Jehova mbwe tu honga mEmbo re. Morupa ndu maru kongorere ko, matu katara kouatjiri oukoto ohunga nondyero yomerikotameneno wouatjiri kombanda yehi, Paulus nga tjanga morutuu rwe kOvakriste Ovaheberi. Omakonḓononeno ngo nga ye ku etere ondjoroka onene.