1-2. Anni i kakastan nga kuammu nu bibbigan anna gigiammuammu i Biblia? Iyilustra.

 IMAJINAMMU nga kayà mu nga gatangan i tadday nga balay. Anni i kayà mu nga masingan? I picture laman kari na arubang na balay? Siguradu nga kayà mu nga masingan mismu ta personal i balay tapenu malevu mu yatun, makatallukka tatun, anna masingammu i kuarto ira anna i ngamin nga parte natun. Baka kayà mu lagu paga nga masingan i plano onu blueprint na balay tapenu masingammu nu kunnasi nga nepataddag yatun. Siguradu nga kayà mu nga masingan i ngamin nga detalye natun nga balay nige mu nga gatangan.

² Kunnatun gapa i kuattam kada bibbigan anna gigiammuattam i Biblia. Kagian na tadday nga iskolar na Biblia nga i mensahe na Biblia ay megitta ta “alalawa anna atatannang nga building nga araralam i fundasion na.” Anni gafu i kuammu tapenu mabbalikka tu familiar ta naddian na Biblia? Nu basta bibbigammu laman yatun, awayya na tu i primeru ira nga informasion laman i magigiammum, nga tumukoy ta “ollu ira nga gigiammuan meyannung ta uvovug na Dios.” (Heb. 5:12) Kagitta nari na balay, makasta nu gitta na “tullukka” gapa ta Biblia tapenu masingammu i makasta ira nga detalye natun. Anni gafu i makasta tu kuammu tapenu magigiammum i Biblia? Innammu nu kunnasi nga konektadu i mensahe natun maski nu nadduruma i parte na. Ikagumammu nga alippawatan ari laman nu anni i kinakurug ira nga kuru-kurugammu, nu ari, nu ngatta kuru-kurugammu danatun.

3. Anni i nipagaram ni apostol Pablo nga kuan na wawwaragi na, anna ngatta? (Efeso 3:14-19)

³ Tapenu maparalam i pakalippawa tam ta Uvovug na Dios,  mawag nga gigiammuattam i aralam ira nga kinakurug ta Biblia. Pinagaram ni apostol Pablo i wawwaragi na ira nga mallallappo ta paggigiammu ta Uvovug na Dios tapenu ‘malippawa da i kadakal, kapaddu, katannang, anna karalam’ na kinakurug. Nu kunnatun gare i kuadda, mas nga “mapagamu anna mapakaladda” i pangurug da. (Bibbigan i Efeso 3:14-19.) Mawag gapa tu kunnatun i kuattam. Innattam nu kunnasi tam nga gigiammuan i Uvovug na Dios tapenu mas malippawa tam i ngamin nga kayà kagian natun.

4. Anni i makua tam tapenu mas maddukko kani Jehova? Mangiyawa tu angngarigan.

⁴ Bilang Cristiano, ari ittam laman nga kontentu nga malippawa tam i primeru ira nga ituttuddu na Biblia. Kayà tam nga gigiammuan “maski paga i kononaggan nga uray na Dios.” Makua tam yatun ta uffun na masanto nga espiritu. (1 Cor. 2:9, 10) Ngatta kammu purueban i map-personal study project tapenu mas maddukko ka kani Jehova? Angngarigan na, awayyam nga gigiammuan nu kunnasi na nga nipasingan i pangiddu na ta aripan na ira ta nappasa anna nu kunnasi ipasingan natun nga iddukan naka gapa. Puedem gapa nga gigiammuan i unnug ni Jehova para ta paddayaw na Israel anna nu anni i nadduman natun ta unnug na paddayaw tam sangawe. Baka puedem gapa nga gigiammuan i detalye ira na profesiya nga natuppal kani Jesus ta tiempo nga nattolay yayya anna namministerio taw ta davvun.

5. Anni nga topiko i kayà mu nga i-personal study project?

⁵ Napakkiavutan i malappo ira nga maggigiammu tu Biblia nu anni ira nga monag nga gannug i kayà da nga gigiammuan ta Uvovug na Dios. Masingan ta kahon nga “ Topiko ira Para ta Personal Study Project” i karuan ta tabbag da. Magayayya ka nu gigiammuammu i kunnatun ira nga topiko anna nu usammu i Watch Tower Publications Index onu i Tulong sa Pag-aaral ng mga Saksi ni Jehova. Nu gigiammuammu i monag ira nga kinakurug ta Biblia, malladda i pangurug mu anna “malegammu i pakannammu meyannung ta Dios.” (Prov. 2:4, 5) Ammuattam i karuan ta aralam nga kinakurug ta Biblia nga awayya tam gigiammuan.

6. (a) Anni i nadduman na plano ta gakkag? (b) Ngatta makagi tam nga “mannanayun” i gakkag ni Jehova para ta totolay anna ta davvun? (Efeso 3:11)

⁶ Ikonsidera i kagian na Biblia meyannung ta gakkag na Dios. Dakal i nadduman na plano ta gakkag. I plano ay megitta ta tadday nga espesipiko nga ruta nga mangipange nikaw ta kayà mu nga angngayan. Ngem nu gavva nga egga i harang tatun nga ruta, baka ari ka nga makadde ta destinasiommu. I gakkag gapa ay megitta ta tadday nga destinasion nga kayà mu nga angngayan. Ammum nu sitaw yatun nga destinasiommu, ngem awan tu espesipiko nga ruta nga pinilim. Puede nga maski sitaw ka nga maddalan, basta makadde ka tatun. Pia ngana laman ta sinisinu nga ipakannammu ni Jehova ta Biblia i mannanayun nga gakkag na. (Innan i study note na Efeso 3:11 nga “walang-hanggang layunin” ta nwtsty-TG.) Maski anni gafu nga dalan i pilian ni Jehova tapenu madde i gakkag na, kanayun nga matuppal yatun megafu ta ‘kingngua na i ngamin nga mekunnay ta gakkag na.’ (Prov. 16:4) Magadde ta mannanayun i resulta na ngamin nga kukukuan ni Jehova. Anni kari i gakkag ni Jehova, anna anni kari ira i inuli na tapenu matuppal yatun?

7. Turi ta narrebelde i ollu ira nga totolay, kunnasi nga inuli ni Jehova i plano na tapenu matuppal lagapa i gakkag na? (Mateo 25:34)

⁷ Kunnaw i kinagi na Dios nga gakkag na ta ollu ira nga totolay: “Maggaka kamu tapenu umaru kamu, pannuan nu i davvun anna tangngallan nu yatun, anna immagurayan nu . . . i kada sigga-matolay nga ayam” ta davvun. (Gen. 1:28) Turi ta narrebelde si Adan anna si Eva, nabbalin tu minakkaliwa i ngamin nga totolay. Ngem ari lagapa nga inuli ni Jehova i gakkag na. Inuli na laman nu kunnasi na nga ituppal yatun. Insigida nga niplano ni Jehova nga mangipataddag tu Pappatulan ta langi nga mangituppal ta orihinal nga gakkag na para ta totolay anna ta davvun. (Bibbigan i Mateo 25:34.) Turi ta zimittal i mepangngo nga tiempo, zinog ni Jehova i kaka nga Ana na ta davvun tapenu tudduan i totolay meyannung ta Pappatulan anna tapenu ipaliag ittam ta liwa anna patay. Tapus napaginnolay si Jesus ta langi tapenu mammaguray bilang Patul na Pappatulan na Dios. Ngem egga paga i mawag tu pannonopattam tu mapia meyannung ta gakkag na Dios.

8. (a) Anni i tema na Biblia? (b) Base ta Efeso 1:8-11, anni i pinakagakkag ni Jehova? (Innan i letratu ta vungun.)

⁸ I pinakatema na Biblia ay meyannung ta pamakasanto ta ngagan ni Jehova. Makua na yatun sonu matuppal na i gakkag na para ta davvun gukaban na Pappatulan na nga imagurayan ni Cristo. Ari vuluvuga nga moli i gakkag ni Jehova. Nipromesa na nga tuppalan na i ngamin nga kinagi na. (Isa. 46:10, 11, ftn. ira; Heb. 6:17, 18) Duttal saw i tiempo nga mabbalin tu paraiso i davvun anna ‘magayayya nga mattolay tu mannanayun’ tatun i perfekto anna matunung nga gaka-gaka ni Adan anna Eva. (Sal. 22:26, NW) Ngem ari laman tu yatun i gakkag ni Jehova. I pinakagakkag na ay pattaraddayan i ngamin nga aripan na ta langi anna ta davvun. Tatun nga tiempo, makimoray ngana ta nisa i ngamin nga matalo bilang Mammagureda. (Bibbigan i Efeso 1:8-11.) Ari ka kari nga mappabbaw ta makakkasta nga pangituppal ni Jehova ta gakkag na?

9. Nu mabbibbig ittam tu Biblia, adde sonu anni nga tiempo i masingattam?

⁹ Pannonopan i profesiya nga kinagi ni Jehova ta hardin na Eden nga mabibbig ta Genesis 3:15. b Tumukoy yatun ta mesimmu ira nga  manuppal ta gakkag na, ngem mappasa labbi i rinivu nga dagun nige nga mesimmu yatun. Tadday tatun i keyana na gaka ni Abraham nga paggafuan saw na Cristo. (Gen. 22:15-18) Tapus, gitta na neprofesiya, nabigaran si Jesus ta tumang turi ta 33 C.E. (King. 3:13-15) I ultimu nga mesimmu tatun nga profesiya ay i kamammo na ulu ni Satanas. Ngem maturu tu 1,000 paga nga dagun i innaggattam nige nga mesimmu yatun. (Nep. 20:7-10) Mabibbig tam gapa ta Biblia i aru nga mesimmu adde ta grabe ngana i pakka-lussu-lussaw na sistema ni Satanas anna na organisasion ni Jehova.

10. (a) Anni ira i aranni ngana nga mesimmu? (b) Kunnasi tam nga meprepara i nono anna i futu tam? (Innan i footnote.)

¹⁰ Pannonopammu i kappabbaw ira nga mesimmu nga neprofesiya ta Biblia. Ollu, iproklama noka na nasa-nasion i “imammo anna seguridad!” (1 Tes. 5:2, 3, NW) Tatun ngana saw nga “gavva” nga mamegafu i dakal nga ziga sonu atakeyan na nasa-nasion i ngamin nga falsu nga relihion. (Nep. 17:16) Kabalin natun, awayya na tu egga i kappabbaw nga ‘pappasingan na sigga-pakapangngua anna sigga-dayaw nga Ana na Tolay nga egga ta kunam ira.’ (Mat. 24:30) Sentensian saw ni Jesus i ngamin nga totolay. Passirinan na saw i karneru ta kanzing ira. (Mat. 25:31-33, 46) Ngem ari lagapa saw nga mappaffu si Satanas. Megafu ta lussaw na, paguyuan na i alyansa na nasa-nasion nga agalan na Biblia tu Gog na davvun na Magog tapenu bweltan i totolay ni Jehova. (Eze. 38:2, 10, 11) Durante tatun nga tiempo, maammung ta langi i nabattang ira nga nazelugan tapenu mevulu kani Cristo anna ta nelangitan nga armada na ta pakillaban ta gerra na Armagedon. Yatun ngana saw i ultimu na dakal nga ziga. c (Mat. 24:31; Nep. 16:14, 16) Tapus mamegafu ngana saw i Tanga-rivu Dagun nga Pammaguray ni Cristo ta interu davvun.—Nep. 20:6.

11. Anni i efekto ta niko na iddanamam nga mattolay tu mannanayun? (Innan gapa i letratu.)

¹¹ Pannonopammu labbi gapa nu anni saw i  mesimmu pappasa na 1,000 nga dagun. Kagian na Biblia nga ‘nipay paga lagu na Dios i mannanayun nga tiempo ta futu tam.’ (Ecl. 3:11) Nonopammu nu anni i efekto na yatun ta nikaw anna ta relasiommu kani Jehova. Kunnaw i mabibbig ta pahina 319 na libru nga Maging Malapít kay Jehova nga mas mamaginteres ta nittam: “Sonu nakapattolay ittam ngana tu ginatu, rinivu, minillion, onu binillion paga lagu nga daga-ragun, mas aru ngana saw i ammu tam meyannung kani Jehova nga Dios anne ta ammu tam sangawe. Ngem matageno tam lapa saw nga napakaru paga nga kappabbaw nga gannug i puede tam nga gigiammuan. . . . Ari tam nga maimajin nu kunnasi kakasta anna kakaru na kappagayayya ira nga makua tam ta paraiso. I kakastan tatun ay maddukko ittam laman saw nga maddukko kani Jehova.” Ngem anni paga i awayya tam nga gigiammuan ta Uvovug na Dios sangawe?

12. Anni i kayà na kagian nga tumangag ittam ta langa-langi? Mangiyawa tu angngarigan.

¹² Makka-ideya ittam ta Uvovug na Dios meyannung ta presensia ni Jehova “ta katannangan.” (Isa. 33:5) Egga i mammuattam tu kappabbaw ira tu gannug ta Biblia meyannung kani Jehova anna ta nelangitan nga parte na organisasion na. (Isa. 6:1-4; Dan. 7:9, 10; Nep. 4:1-6) Angngarigan na, mabibbig tam i meyannung ta kappabbaw ira nga nasingan ni Ezekiel turi ta “navvuka i langa-langi anna nakasingan [yayya] tu sirmata ira na Dios.”—Eze. 1:1.

13. Anni i appresiammu ta papel ni Jesus ta langa-langi nga mabibbig ta Hebreo 4:14-16?

¹³ Pannonopammu gapa i papel ni Jesus ta langa-langi bilang i mammaguray nga Patul anna i minakkipattageno nga Atannang nga Pari. Megafu ta nisa, awayya tam i umaranni ta “trono na Dios nga minaggallallo” gukaban na pakimallo anna kiddawan i allo anna uffun  “ta tiempo na pagawag tam.” (Bibbigan i Hebreo 4:14-16.) Ari tam nakuan ipamavulun tu mappasa i tangaggaw nga kattam man laman nga pinannonopan i kingngua anna i kukukuan ni Jehova anna ni Jesus para ta nittam. Appresiattam nakuan i pangaya da ta nittam anna paguyuan ittam nakuan natun nga mallallappo ta passerbi tam.​—2 Cor. 5:14, 15.

14. Anni i tadday ta kakastan nga makua tam tapenu mepasingattam nga kuruga appresiattam si Jehova anna si Jesus? (Innan gapa i letratu ira.)

¹⁴ I tadday ta kakastan nga makua tam tapenu mepasingattam nga kuruga appresiattam i Dios tam anna i Ana na ay gukaban na pangikaguman nga uffunan i tanakuan nga mabbalin tu Saksi ni Jehova anna disipulo ni Jesus. (Mat. 28:19, 20) Kunnatun i kingngua ni apostol Pablo megafu ta pappabalo na ta Dios anna kani Cristo. Ammu na nga uray ni Jehova nga “mapaliag ngamin i totolay anna kannammuad-da i kurug.” (1 Tim. 2:3, 4) Nallallappo yayya ta ministerio na tapenu mas aru i moffunan na, aber laman nu ‘mapaliag na i karuan nira ta adde na awayya na.’—1 Cor. 9:22, 23.

15. Segun ta Salmo 1:2, anni i mamagayayya ta nittam?

¹⁵ Dineskriba na salmista nga i tolay nga magayayya anna mapia i nattuppalan na ay ‘magayayya nga mamarulo ta Dob na YAFU’ anna “aggaw-gabi patalattappan na yaw ta napafutu.” (Sal. 1:1-3) Kinomentuan na translator na Biblia nga si Joseph Rotherham ta libru na nga Studies in the Psalms i meyannung tatun nga teksto. Kinagi na nga i tadday nga tolay ay mawag nga “kakayà na i pangigiya na Dios yatutta alegan na yatun, gigiammuan na yatun, anna iddan na tu tiempo tapenu pakanonopan yatun.” Kinagi na paga nga “nu mappasa i tadday nga aggaw nga ari nga nabbibbig tu Biblia i tadday, nasayang yatun nga aggaw.” Makayakammu i paggigiammu tu Biblia nu gigiammuammu i napakaru ira nga detalye natun anna nu sifutammu nu kunnasi nga konektadu ngamin danatun. Kappagayayya gafu talaga nu paralammattam i paggigiammu tam ta Uvovug na Dios!

16. Anni i gigiammuattam ta tumunug nga artikulo?

¹⁶ Posible nga malippawa tam i makakkasta ira nga kinakurug nga ituttuddu nittam ni Jehova ta Uvovug na. Ta tumunug nga artikulo, gigiammuattam i tadday ta mas aralam paga ira nga kinakurug nga dineskriba ni Pablo ta tura na ta Hebreo ira nga Cristiano—i daka-dakal nga espiritual nga templo ni Jehova. Paray nakuan ta mapagayayya naka na paggigiammum tatun.