1-2. Ɔdi wɛ ɔwɛ olɔhi fiyɛ duu ō bi le jé amāŋ klɔcɛ ku Ubáyibu a? Jé ocabɔ mafu.

 GBƐLA ku a yɔ i ya ōmiya ō lá ɔlɛ. Ɔdi nɛ a géē dɔka ō má ipu ɔlɛ a gbɔbu ɛɛ ku a lá ɔlɛ a? Ifoto ku iyɔbu ku ɔlɛ a foofunu nɛɛ? Ó lɛ aafu ŋ, a géē dɔka ō má ɔlɛ a eyī caa o ya ɛɛ ku a yɛ eyiyɛcɛ ku ɔlɛ a, gā eyeeye ku ainu a, mla ō leyi yɛ ɛjɛɛji ɔdā nōo yɔ ipu ɔlɛ a lɔɔlɔhi. Ó kóō géē lɔhi fiyɛ ku a leyi yɛ ōmiya ku ɛgɛ néē bi le gwo ɔlɛ a. Ó lɛ aafu ŋ, a géē dɔka ō leyi yɛ ɛjɛɛji ɔdā doodu nōo tɛɛma kwu ɔlɛ ɔɔma nɛ a gáā lá a lɔɔlɔhi.

² Alɔ lɔfu ya ɔdā ekponu nyā eko nɛ alɔ yɔ i jé amāŋ klɔcɛ ku Ubáyíbu a. Ɔcɛ o jé Ubáyíbu nɛɛnɛhi éyi ka “ka Ubáyíbu lɛbɛɛka ɔlɛ nɛɛnɛhi néē gwo nōo lico nɛhi, nɛ ikpiinu ku nu lipu nɛhi a.” Abɔ ó le lɛ a, ɛgɛnyá nɛ alɔ gáā jé ɛjɛɛji ɛlā nōo yɔ ipu Ubáyíbu a gla a? Ɔdaŋ ku a jé ɔ fiya fiya, a géē nwu “ɔdā aflɛ́yí nēé nwū aá kú ɛlɔ̄ɔwɔicō ā” foofunu. (Uhíb. 5:12) Amáŋ ɛgɛ nɛ a cɛgbá ō gā ipu ɔlɛ a o ya ɛɛ ku a jé ɛjɛɛji ɔdā doodu lɛyikwu ɔ a, a cɛgbá ō jé Ubáyíbu lipu lipu o ya ɛɛ ku a jɛyi ku ɛjɛɛji ɛlā nōo yɔ ipu nu a. Ɔwɛ olɔhi fiyɛ duu ō bi le jé Ubáyíbu wɛ ō ceyitikwu má ɛgɛ nɛ ɛlā néē ka ɛga éyi, tɛɛma kwu ɛlā nōo yɔ ɛga ɔhá a. Ceyitikwu ku a jɛyi ku ɔdā nɛ a kpɔtuce a mla ɔdā nōo ya ɛɛ nɛ a kpɔtuce ka ɛlā ɔɔma wɛ ɔkwɛyi a.

3. Ɔdi nɛ ɔyikpo Upɔlu ta Ācɛ O Yɛce Ukraist ɔtu kwu ɔtu kéē ya a, ɔdi kē ya a? (Ācɛ Ɛ́fēsɔsi 3:14-19)

³ O ya ɛɛ ku alɔ jɛyi ku ɛjɛɛji aɛlā nōo yɔ ipu Ɛlā Ɔwɔico a,  ó lɛ aɛlā ōhī nɛ alɔ cɛgbá ō klɔcɛ lipu lipu. Upɔlu ta Ācɛ O Yɛce Ukraist ɔtu kwu ɔtu kéē klɔcɛ ku Ɛlā ku Ɔwɔico lipu lipu o ya ɛɛ kéē jɛyi ku ɛlā ɔkwɛyi a, amāŋ ō “jɛ́ɛyí kú ɛ́gɛ́nɛ̄ ihɔtū nɛ̄ɛ̄nɛ̄hi nɛ̄ Ohɔ́nyɛtá yá tu [uwa] ā lɔwá, līkpō, licō klla lipú nwuné lɛ ā.” Ō ya ɔɔma géē ya kéē lɛ ɔtu okpoce olɔfu néē “gáā mɔ̄ɔ̄tá ipú ɔdā dúú” ŋ. (Jé Ācɛ Ɛ́fēsɔsi 3:14-19.) Alɔ cɛgbá ō ya lɛ a duu. Alɔ leyi yɛ ɛgɛ nɛ alɔ lɔfu klɔcɛ ku Ɛlā ku Ɔwɔico lipu lipu o ya ɛɛ ku alɔ jɛyi ku ɛjɛɛji ɛlā nōo yɔ ipu nu a.

4. Ɔdi nɛ alɔ lɔfu ya o ya ɛɛ ku alɔ tubla Ujehofa ajaajɛ a? Je ocabɔ mafu.

⁴ Abɔ alɔ wɛ Ācɛ O Yɛce Ukraist a, alɔ i dɔka ō jɛyi ku aɛlā ɔkwɛyi ligii ligii nōo yɔ ipu Ubáyíbu a foofunu ŋ. Mla otabɔ ku alelekwu ihɔ ku Ɔwɔico, alɔ le tutu ō nwu “ɛjɛ̄ɛ̄jī ɔdā dóódu, ó kōō wɛ ɛlá nɛ̄ Ɔwɔicō gbo tayínū ā.” (1 Ukɔ́r. 2:9, 10) A lɔfu ya oklɔcɛ ŋma lɛ ō jila ɛlā má lipu lipu oŋma lɛ ō bi ɔtu ku a dɔka ō tubla Ujehofa ajaajɛ. Ocabɔ mafu, a lɔfu jila ɛlā má lɛyikwu ɛgɛ nɛ ó mafu ihɔtu lɛ ācɛ nōo gba ɔ ɛ̄gbā ɛpleeko ku ikee a, mla ɛgɛ nɛ ɔɔma mafu ka ó yihɔtu ku uwɔ duu a. A klla lɔfu klɔcɛ lɛyikwu ɛgɛ nɛ Ujehofa dɔka ku ācɛ Isrɛlu kéē gba ɔ ɛ̄gbā a, cɛɛ a lɛ ɔɔma miya mla ɛgɛ nɛ ó dɔka ku alɔ gba ɔ ɛ̄gbā babanya a. Amāŋ a lɔfu klɔcɛ lipu lipu lɛyikwu aakacɛ nɛ Ujisɔsi ya jila eko nɛ ó yɔ i yuklɔ ku ɔna ō ta ku nu ipu ɛcɛ nyā a.

5. Ó lɛ ikpɛyi ɛlā duuma nɛ a lɛ ōmiya ō klɔcɛ lipu lipu lɛyikwu ɔ?

⁵ Ācɛ ōhī nōo gē dɔka ō jila ɛlā má lɔɔlɔhi a, ka aɛlā ōhī néē géē dɔka ō klɔcɛ lɛyikwu ɔ lipu lipu a. A lɔfu má aɛlā ōhī néē ka a ipu ikpati nyā nōo kahinii: “ Aɛlā Nɛ A Lɔfu Ya Oklɔcɛ Lɛyikwu Ɔ.” A lɔfu lɛ eeye nɛhi ō klɔcɛ lɛyikwu aɛlā nyā mla otabɔ ku Watch Tower Publications Index amāŋ Research Guide for Jehovah’s Witnesses. Ō ya oklɔcɛ ku Ubáyíbu lipu lipu lɔfu ta uwɔ abɔ ku ɔtu okpoce ku uwɔ kóō lɔfu, klla lɔfu ta uwɔ abɔ “ká ā lɛ odée jé lɛyíkwu Ɔwɔicō.” (Aíit. 2:4, 5) Babanya, alɔ géē kɛla lɛyikwu aɛlā ɔkwɛyi olipu ku Ubáyíbu nɛ alɔ lɔfu klɔcɛ lɔɔlɔhi a.

6. (a) Lɛ ɔ teyi peee ɔdā nōo ya ɛɛ nɛ ɔdā nɛ Ujehofa bi ɔtu ō ya a gē nyɔ mɛɛlɛ eko doodu a? (b) Ɔdiya nɛ alɔ lɔfu ka ka ɔdā nɛ Ujehofa bi ɔtu ō ya lɛ alɛɛcɛ mɛmla ɛcɛ a i yɔ ‘piyoo’ a? (Ācɛ Ɛ́fēsɔsi 3:11)

⁶ Alɔ leyi yɛ ocabɔ ku ɛlā nɛ Ubáyíbu ka lɛyikwu ɔdā nɛ Ɔwɔico bi ɔtu ō ya a. Ujehofa i lɛbɛɛka alɛɛcɛ nōo gē fu ɔwɛ ekponu ō bi uwa gā ɛga néē dɔka ō nyɔ piii a ŋ. Ɔdaŋ ka ɔdā duu lɛ ɔwɛ ɔɔma gwu, é gáā lɔfu yɛ faajɛ ɛga néē yɔ i nyɔ a gla ŋ. Amáŋ ó lɛ ɛgɔɔma mla Ujehofa ŋ. Ɔdā nɛ Ujehofa bi ɔtu ō ya a, lɛbɛɛka ɛga ɔɔma abɔyi nu a. Ó lɛ ɛga nɛ ó gáā nyɔ piii a miya ɛ, amáŋ ó lɔfu yɛ ɔwɛ duuma gā abɔɔ gla. Alɔ gweeye nɛɛnɛhi ka ɛmɛɛma, Ujehofa yɔ i mafu ɔdā nɛ ó bi ɔtu ō ya a lɛ alɔ o bu ipu Ubáyíbu. (Āfi. 3:11) Ujehofa lɔfu fu ɔwɛ duuma ō ya ɔdā nɛ ó bi ɔtu ō ya a. Ó kē i nyɔ mɛɛlɛ lɛ a eko doodu ohigbu ka ó lɛ “ɛ́gɛ́nɛ̄ aɔ́dā dóódu nōo yá ā géē ŋmɛ́yí tá lɛ ā miya táajɛ gbɔbū ɛɛ́.” (Aíit. 16:4) Ɔdā nōo kē i bɛɛcɛ ŋma ɔdā nɛ Ujehofa gē ya a géē yɔ piyoo. Ɔdi nɛ Ujehofa bi ɔtu ō ya a? Opiyabɔ ōhī nyá nɛ ó kē ya o ya ɛɛ kóō lɛ ɔdā nɛ ó bi ɔtu a ya jila piii a?

7. Igbihi nɛ alɛɛcɛ aflɛyi a lɛ ikpɛyi olɔfu ya ta Ujehofa a, opiyabɔ nyá nɛ Ujehofa ya o ya ɛɛ kóō lɛ ɔdā nɛ ó bi ɔtu a ya a? (Umátiyu 25:34)

⁷ Ɔwɔico da ācɛ aflɛyi nɛ ó ya a ɔdā nɛ ó bi ɔtu lɛyikwu uwa a. Ó da uwa kahinii: “Aá ma ayí alɛwa kú aá nyīla tū ipú ɛcɛ. Cɛ́ɛ́ kú aá mīyɛ ɛcɛ tābɔ̄. Aá kóō lɛ íkwu īkpɛ̄yí . . . ɛjɛ̄ɛ̄jī aɛ́bɛ́ kú ipú ɛcɛ ā.” (Ohút. 1:28) Eko nɛ Adam mla Iifu ya ikpɛyi olɔfu nōo ya ku alɛɛcɛ kéē gbɔɔ ō biya íne a, Ujehofa i cɛ lɛ ɔɔma ci ɔ ŋma ō ya ɔdā nɛ ó bi ɔtu ō ya a ŋ. Boobu, ó le miya ō lɛ Ajɔɔcɛ kwaajɛ ɔkpanco nōo géē ya ɔdā nɛ ó bi ɔtu piii lɛ alɛɛcɛ mɛmla ɛcɛ a. (Jé Umátiyu 25:34.) Abɔ eko nɛ Ujehofa miya taajɛ a le ya a, o bu ipu ihɔtu ó lɛ Ɔyinɔnyilɔ ekponu ku nu tɛhɔ wa ipu ɛcɛ nyā kóō gáā nwu ācɛ ɛlā lɛyikwu Ajɔɔcɛ a, mla ō lɛ oyeeyi ku nu gwɛɛya o ya ɛɛ kóō lɛ alɔ nyata ŋma íne ō biya mla ikwū. Ujehofa kē lɛ Ujisɔsi heyi ŋma ɔlekwu gā ɔkpanco o ya ɛɛ kóō kwu piya Ɔcɛ́ ku Ajɔɔcɛ Ku Ɔwɔico. Amáŋ alɔ klla lɛ ɔdā alɛwa ō nwu lɛyikwu ɔdā nɛ Ɔwɔico bi ɔtu ō ya a.

8. (a) Ɔdi wɛ ɔcɛla okpɔcii nōo yɔ ipu Ubáyíbu a? (b) Ɛgɛ nɛ ɔkpá ku Ācɛ Ɛ́fēsɔsi 1:8-11 ka a, ɔdi wɛ ɔdā ɔhá nɛ Ujehofa gáā ya a? (Má ifoto nōo yɔ iyɔbu ku Ɔda Ō Gbaajɛ a.)

⁸ Ɔdā nōo wɛ ɔcɛla okpɔcii nōo yɔ ipu Ubáyíbu a, wɛ ka Ujehofa géē ya ku iyē ku nu kóō le tiihɔ abɔ ó géē ya ɔdā nɛ ó bi ɔtu lɛyikwu ɛcɛ nyā, o bu ipu Ajɔɔcɛ ku nu nɛ Ujisɔsi wɛ Ɔcɛ́ a. Ɔdā nɛ Ujehofa bi ɔtu ō ya a i gáā piyabɔ gboogboo ŋ. Ó lɛ okonu ce ɛ ka ɛjɛɛji ɔdā doodu géē ya ɛgɛ nɛ ó ka yiili a. (Ayis. 46:10, 11; Uhíb. 6:17, 18) Ɛcɛ a géē je piya uparadais ɛga nɛ ayi ku Adam nōo je jila iye a géē ‘jɔɔnyɛ oyeeyi ipu nu piyoo a.’ (Aíjē 22:26) Amáŋ ó wɛ ɔdā nɛ Ujehofa gáā ya foofunu a yɔ abɔɔ a ŋ. Ó géē lɛ ɛjɛɛji ācɛ nōo gē gba ɔ ɛ̄gbā nōo yɔ ɔkpanco mɛmla ɛcɛ a piyatɔha. Cɛɛ ɛjɛɛji ācɛ nōo yɔ ɔkpanco mɛmla ɛcɛ a géē lɛyitaajɛ lɛ Ɔcɛ́ ō lé ku Ujehofa. (Jé Ācɛ Ɛ́fēsɔsi 1:8-11.) Ó hɛ uwɔ idaago ɔwɛ ɛnɛɛnɛ nɛ Ujehofa bi yɔ i je ya ɔdā nɛ ó bi ɔtu a jila a ŋ?

9. Ɛgɛnyá nōo jé Ubáyíbu lɔfu ta alɔ abɔ jé odee lɛyikwu ɛcɔbu a?

⁹ Leyi yɛ akacɛ nɛ Ujehofa ka taajɛ ipu iga ku Idɛn nōo yɔ ipu ɔkpá ku Ohútu 3:15 a. b Akacɛ ɔɔma kɛla lɛyikwu ɔdā nōo géē ya nōo géē ya ɔdā nɛ ó bi ɔtu ō ya a jila a. Amáŋ, akacɛ nyā wɛ ɔdā nōo géē ya igbihi nɛ ihayi utanja alɛwa le gla. Ocabɔ mafu, Ɔwɔico da  Ebraham ka igbihi ayaayi alɛwa, ɔcɛ éyi ŋma ipɔɔma ku nu géē je piya Ukraist. (Ohút. 22:15-18) Ipu ihayi ku 33 Eko Ku Ukraist, é lɛ Ujisɔsi ya owe klla kwu ɔ ŋmo ɛgɛ nɛ akacɛ a ka taajɛ ka ɛgwa géē kwu ɔ ainu amiyɛ ikpo a. (Ācot. 3:13-15) Akacɛ amoomɛ nōo ka ka ɔyi ɔnyā a géē ca ɛgwa a ikpɛyi taajɛ a, géē ya ihayi nōo fiyɛ utanja éyi ɛcɔbu. (Mafú 20:7-10) Ubáyíbu klla mafu aɔdā alɛwa lɛyikwu ɔdā nōo géē ya abɔ iwɔtu amāŋ icɔnu nōo yɔ ɔtahɛ ku ɛcɛ ku Usetan mla ɔwa ku Ujehofa yɔ i wa oŋmɛyi a.

10. (a) Ɔdi gáā ya ɛcɔbu nōó gboji gɛ ŋ ma? (b) Ɛgɛnyá nɛ alɔ kē lɔfu tutu taajɛ ku ɔdā nōo géē ya a? (Má ɛlā néē ta ɛhaajɛ a.)

¹⁰ Gbɛla lɛyikwu ɔdā nɛhi nɛ Ubáyíbu ka taajɛ ka ó géē ya a. Aflɛyi, é géē ya ɛlā ō ka tɛɛcɛ éyi nōo kahinii: “Ɔdā dóódu í je unwalu lɛ alɔ gɛ ŋ́, alɔ kē bá ɛbɔ́!” (1 Utes. 5:2, 3) “Cɛ́ɛ́ igbɛ ékpónú,” owe nɛhi a géē gbɔɔ eko néē géē ca ɛjɛɛji ɛ̄gbā ō gba ku ɛkɛmgbɛ taajɛ a. (Mafú 17:16) Igbihi ɔɔma, é géē má ɔdā o hidaago nɛhi éyi, “é géē má Ɔyínɔ̄nyīlɔ kú Ɔ̄cɛ gē yɔ̄ ī wā ɛyí ojuja kú ɔkpáncō mla ɔfú, mɛ́mla ɛgahi kú nū ā.” (Umát. 24:30) Ujisɔsi géē kɛpɔ tu alɛɛcɛ, klla géē kpo aala ŋma ipu aɛwu a. (Umát. 25:31-33, 46) Ɛpleeko ɔɔma, Usetan géē gɔbu yɔ i bɛyikwu Ujehofa. Ohigbu ka ó gē wɔtu ācɛ ɔlɛ Ɔwɔico nɛɛnɛhi a, ó géē lɛ abɔ kwu opiyatɔha ku aéwo nɛ Ubáyíbu hi ka Ugɔgu ku Umagogɔ a kéē bɛyikwu ācɛ ɔlɛ Ujehofa. (Isík. 38:2, 10, 11) Ɛpleeko ɔɔma, é géē lɛ ācɛ ohile néē lɛ anɔ tu uwa ɛyi nōo yɔ ipu ɛcɛ a kpo gā ɔkpanco kéē nyɔ gáā ba Ukraist mɛmla alelekwu otɛhɔ nōo yɔ ɔkpanco a iye, o ya ɛɛ kéē kpo ɛfú ku Amagɛdɔn nōo géē wɛ oŋmɛyi ku owe nɛhi a. c (Umát. 24:31; Mafú 16:14, 16) Oŋma ɔɔma, Ɔcɛ́ ō lé ku Ukraist Ihayi Ula Ɛpa Ce Ofu Igwo ikpɛyi ku ɛcɛ nyā a géē gbɔɔ.—Mafú 20:6.

11. Ɔdi nɛ eyiyoce kóō lā oyeeyi opiyoo a wɛ gā uwɔ a? (Má ifoto a.)

¹¹ Gbɛla lipu lipu tu ɛgɛ nɛ igbihi ku ihayi ula ɛpa ce ofu igwo a gáā lɛ a. Ubáyíbu da alɔ ka Ujehofa nōo Ya Ɛjɛɛji Odee a “kwú ɛlá kú ɔdā ō yɔ̄ piyóó í tá ipú ɔtū kú alɛɛcɛ.”  (Ɔ̄cok. 3:11) Gbɛla tu ɔdā nɛ ɛyi ku ɛlā nyā a wɛ gā uwɔ mla ɛma nɛ a lɛ mla Ujehofa a. Ɔkpá ku Draw Close to Jehovah, upeji 319, ka ɛnɛɛnɛ ɛlā nyā kahinii: “Igbihi nɛ alɔ le lā ihayi uhundrɛdi, utanja, umiliyɔn, amāŋ ubiliyɔn alɛwa a, alɔ géē wa i jé ɔdā alɛwa lɛyikwu Ujehofa nōo wɛ Ɔwɔico a fiyɛ ɛ̄nɛ̄ alɔ jé babanya a. Naana kpɔ a, alɔ klla géē wa i má ka ó lɛ aɔdā ohidaago alɛwa nɛ alɔ klla géē cɛgbá ō nwu lɛyikwu ɔ kpɔ. . . . Alɔ i kóō gáā ka ɛgɛ nɛ oyeeyi gáā lɔɔnyɛ nɛhi lɛ ipu uparadais a gla ŋ. Ɔdā nōo klla géē lɔhi fiyɛ duu a wɛ ka eko doodu alɔ géē yɔ i tubla Ujehofa ajaajɛ.” Amáŋ babanya abɔ alɔ gɔbu yɔ i klɔcɛ ku Ɛlā ku Ɔwɔico a, ɔdā ɔhá nyá nɛ alɔ lɔfu klɔcɛ lɛyikwu ɔ lipu lipu a?

12. Ɛgɛnyá nɛ alɔ lɔfu jé odee lɛyikwu ɔkpanco gla a? Je ocabɔ mafu.

¹² Ɛlā ku Ɔwɔico kɛla ligii lɛyikwu ɔdā nōó wɛ ō yɔ iyɔbu ku Ujehofa “ɔkpáncō” a. (Ayis. 33:5) Ubáyíbu kɛla lɛyikwu ɔdā ohidaago alɛwa lɛyikwu Ujehofa mla ɔwa ku nu nōo yɔ ɔkpanco a. (Ayis. 6:1-4; Udán. 7:9, 10; Mafú 4:1-6) Ocabɔ mafu, alɔ lɔfu jé ɛlā lɛyikwu ɛbɛ ohidaago nɛ Isikɛlu má a. Ó kahinii: “Ɔkpáncō kwú nwūla tū um eyī, n kē lɛ ɛbɛ má ŋmá ɛgiyí Ɔwɔicō.”—Isík. 1:1.

13. Ɛgɛ nɛ ɔkpá ku Ācɛ Uhíbru 4:14-16 ka a, ɛgɛnyá nɛ ɔtu yɔ i ya uwɔ lɛyikwu ɔdā nɛ Ujisɔsi yɔ i ya ŋma ɔkpanco a?

¹³ Alɔ klla lɔfu gbɛla tu ɔdā nɛ Ujisɔsi yɔ i ya lɛ alɔ ŋma ɔkpanco abɔ ó wɛ Ɔcɛ́ mla Otrɛyi Nɛhi Ku Ācɛ O gwɛɛya ku alɔ nōo lɛ eyinyinyi nɛhi a. O bu ipu Ujisɔsi, alɔ lɔfu “gā ɛgiyí Ɔwɔicō ō gbonɛnɛ” o bu ipu ɔkɔ ō gba, o ya ɛɛ ku alɔ ba ɔ ɛba kóō má eyinyinyi alɔ klla ta alɔ abɔ “eko nɛ̄ alɔ cɛgbá otábɔ̄.” (Jé Ācɛ Uhíbru 4:14-16.) Ɛ̄cī doodu alɔ cɛgbá ō gbɛla tu ɔdā nɛ Ujehofa mla Ujisɔsi ya lɛ alɔ ɛ, mla ɔdā néē yɔ i ya lɛ alɔ ŋma ɔkpanco babanya  a. Ihɔtu néē mafu lɛ alɔ a cika ō lɛ abɔ kwu alɔ ɔtu ō lɛ ɔtu caca ipu ɛ̄gbā ō gba ku alɔ lɛ Ujehofa.—2 Ukɔ́r. 5:14, 15.

14. Ɔdi wɛ odee nɛ alɔ lɔfu ya o ya ɛɛ ku alɔ mafu ku ɔdā nɛ Ujehofa mla Ujisɔsi ya lɛ alɔ a jɛ alɔ eyī a? (Má ifoto a.)

¹⁴ Ɔwɛ éyi nɛ alɔ gáā mafu ku ɔdā nɛ Ɔwɔico mla Ujisɔsi ya lɛ alɔ a jɛ alɔ eyī a, wɛ ō ceyitikwu ta ācɛ ɔhá abɔ kéē wa gáā gba Ujehofa ɛ̄gbā. (Umát. 28:19, 20) Ɔdā nɛ ɔyikpo Upɔlu ya kóō mafu ka ɔdā nɛ Ɔwɔico mla Ujisɔsi ya a jɛ ɔ eyī a yɔ abɔɔ a. Ó jé ka ɔdā nōo wɛ ɔtu ku Ujehofa a, wɛ ka “odúúdú ācɛ kéē lɛ ɛlā ɔkwɛyi ā jé, cɛ́ɛ́ kóō géē lɛ uwa nyatá.” (1 Utím. 2:3, 4) Ohigbu ɛnyā, ó ceyitikwu ō yuklɔ lɔfu lɔfu ipu uklɔ ku ɔna ō ta ku nu o ya ɛɛ kóō ta ācɛ alɛwa abɔ, cɛɛ kóō “lɛ ācɛ ōhī kú uwá nyatá bū ɔwɛ dúúmā nōo tɔ́ɔtɛ́ ā.”—1 Ukɔ́r. 9:22, 23.

15. Ɛgɛ nɛ ɔkpá ku Aíjē Kú Ɛ̄gbā 1:2 ka a, ɔdi lɔfu cɛ lɛ alɔ lɛ eeye a?

¹⁵ Ɔcɛ nōo ta ɔkpá ku Aíjē Kú Ɛ̄gbā aflɛyi a, kɛla lɛyikwu ɔcɛ nōo gē lɛ eeye klla gē ya lɔhi a kahinii: “Ɛlā nɛ̄ íne kū Óndú ā gē nwū ɔ̄cɛ ā, he ɔ̄ ɔtū fíyɛ́ á,” ó klla “gē gbɛlá kwu ɔ́ otú mɛ́mla ɔlɛ́ɛnɔ.” (Aíjē 1:1-3) Ɔcɛ o cɔwɔ ku Ubáyíbu éyi nōo lé ka u Joseph Rotherham a kɛla lɛyikwu ɔgba ku Ubáyíbu nyā ka “ɔcɛ cika ō dɔka ku Ɔwɔico kóō bi ɔ jé ɔwɛ oŋma lɛ ō dɔka, klɔcɛ klla le eko taajɛ lɔɔlɔhi ō gbɛla lɛyikwu ɛlā nɛ ó jé a.” Ó klla ka kpɔ kahinii: “Ɔdaŋ nɛ ɛ̄cī éyi le gla nɛ ɔcɛ i jé Ubáyíbu ŋ, ayika ɛ̄cī ɔɔma le bonu.” A lɔfu lɛ eeye oŋma lɛ ō klɔcɛ ku Ubáyíbu lɔɔlɔhi mla ō má ɛgɛ nɛ ɛjɛɛji aɛlā nōo yɔ ipu nu a tɛɛma kwu iyi uwa a. Ó wɛ ɔdā eeye nɛhi ō klɔcɛ lipu lipu lɛyikwu ɛjɛɛji aɛlā nōo yɔ ipu Ubáyíbu a!

16. Ɔdi nɛ alɔ gáā kɛla lɛyikwu ɔ ipu ikpɛyi ɛlā ɔhá a?

¹⁶ Aɛnɛɛnɛ ɛlā ɔkwɛyi nɛ Ujehofa gē nwu alɔ nōo yɔ ipu Ɛlā ku nu a, i lɔnɔ nɛɛnɛhi fiyɛ alɔ ɔfu ō jɛyi nu ŋ. Ipu ikpɛyi ɛlā ɔhá a, alɔ géē kɛla lɛyikwu ɛlā ɔkwɛyi olipu nɛhi éyi—agblihɔ nɛhi ku Ujehofa nɛ Upɔlu kɛla lɛyikwu ɔ ipu ɔkpá nɛ ó ta gē lɛ Ācɛ O Yɛce Ukraist nōo yɔ Uhibru a. Ō klɔcɛ ikpɛyi ɛlā ɔɔma a kóō cɛ gā uwɔ lɛ eeye.