1-2. Nʋmɔʋ kɩbaŋʋ ŋgʋ yɔɔ ɖɩpɩzɩɣ ɖɩtɩŋna nɛ ɖɩkalɩ Bibl nɛ ɖɩkpɛlɩkɩ-kʋ? Ha kɩɖaʋ nakʋyʋ.

 MAƔZƖ se ŋwɛɛ nɛ ŋpɔzʋʋ ña-tɩ se ɛzɩ ŋya ɖɩɣa nakɛyɛ yaa ŋtaayabɩ-kɛ. Ɛbɛ ŋkaɣ sɔɔlʋʋ se ŋna pʋcɔ nɛ ŋkpaɣ lɩmaɣzɩyɛ? Foto ŋgʋ kɩwɩlɩɣ ɖɩɣa ŋga kɛ-ɛsɩndaa kiŋ yɔ ki-ɖeke ŋsɔɔlaa se ŋna? Pɩtʋʋ fɛyɩ se ŋkaɣ wobu nɛ ŋcɔɔ ɖɩɣa ŋga nɛ ŋta nɛ ŋna kɔ-hɔɔlɩŋ tɩŋa, nɛ ŋkaɣ sʋʋ kuduyuŋ tɩŋa taa nɛ ŋna ɩ-wɛtʋ. Halɩ pɩtɩla, ŋkaɣ sɔɔlʋʋ se ŋcɔnɩ ɖɩɣa ŋga ka-anjaʋ nɛ ŋna ɛzɩma pama-kɛ yɔ. Toovenim taa lɛ, ŋkaɣ sɔɔlʋʋ se ŋna ɖɩɣa ŋga kɔ-hɔɔlɩŋ tɩŋa tete, mbʋ pʋyɔɔ yɔ kakaɣ pɩsʋʋ ña-ñɩŋga.

² Ðɩpɩzɩɣ nɛ ɖɩla mbʋ ɖɔɖɔ alɩwaatʋ ndʋ ɖɩkalɩɣ Bibl nɛ ɖɩkpɛlɩkɩɣ-kʋ yɔ. Bibl taa tazɩyʋ nɔɔyʋ kpaɣ Bibl nɛ ɛmaɣzɩnɩ «kuduyuu sɔsɔʋ ŋgʋ kɩkʋyɩ kpem nɛ pohuyaa nɛ pilimi pʋcɔ nɛ pasɩɩ ki-tigiɖe yɔ.» Ye mbʋ, ɛzɩma ŋpɩzɩɣ ŋla nɛ ŋtɩlɩ tɔm ndʋ payɩ tɩwɛ Bibl taa yɔ camɩyɛ? Ye ŋkalɩɣ-kʋ lɛɛ lɛɛ yɔ, pɩtɩla Bibl taa kajalaɣ wɩlɩtʋ ɖeke ŋkaɣ tɩlʋʋ, pʋ-tɔbʋʋ se «Ɛsɔ tɔm kiɖeɖetu kajalaɣ tɔm.» (Ebr. 5:12) Ɛlɛ ɛzɩ ŋsʋʋ ɖɩɣa taa se ŋna kɔ-hɔɔlɩŋ tɩŋa yɔ, pɩwɛɛ se ŋkpɛlɩkɩ Bibl nɛ ŋnɩɩ kɩ-taa camɩyɛ nɛ pɩkɩlɩ. Nʋmɔʋ kɩbaŋʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩkpɛlɩkɩ Bibl yɔ, ŋgʋ lɛ se ɖɩñɩnɩ nɛ ɖɩna nɔɔ kʋɖʋmaɣ ŋga kɛwɛ Bibl hɔɔlɩŋ ndɩ ndɩ hɛkʋ taa yɔ. Ñaɣ pana nɛ ŋnɩɩ toovenim tɔm ndʋ tɩ-yɔɔ ŋtisiɣ yɔ tɩ-taa, ñaɣ pana ɖɔɖɔ nɛ ŋnɩɩ mbʋ pʋyɔɔ ŋtisiɣ tɩ-yɔɔ yɔ pɩ-taa.

3. Ɛbɛ apostoloo Pɔɔlɩ seɣti e-koobiya Krɩstʋ mba se pala, nɛ ɛbɛ yɔɔ? (Efɛɛzɩ mba 3:​14-19)

 ³ Pɩsa nɛ ɖɩnɩɩ Ɛsɔtɔm hɔɔlɩŋ tɩŋa taa camɩyɛ lɛ, pɩpɔzʋʋ se ɖɩkpɛlɩkɩ Bibl taa toovenim tɔm ndʋ tɩwɛ cukaŋ yɔ. Apostoloo Pɔɔlɩ seɣti e-koobiya Krɩstʋ ñɩma se pɛkpɛlɩkɩ Ɛsɔtɔm camɩyɛ nɛ pɩsa nɛ panɩɩ toovenim ‘walanzɩ nɛ pɩ-ɖaɣlɩkɩŋ nɛ pɩ-kʋkʋyɩŋ nɛ pi-cukaŋ taa camɩyɛ.’ Ðɩnɛ ɛlɛ pe-tisuu kaɣ ‘kam lila nɛ pɩcɛyɩsɩ camɩyɛ.’ (Kalɩ Efɛɛzɩ mba 3:​14-19.) Pɩwɛɛ se ɖa ɖɔɖɔ ɖɩla mbʋ. Iyele nɛ ɖɩna ɛzɩma ɖɩpɩzɩɣ nɛ ɖɩkpɛlɩkɩ Ɛsɔtɔm camɩyɛ nɛ ɖɩnɩɩ tɩ-taa tete yɔ.

4. Ɛbɛ ɖɩpɩzɩɣ ɖɩla nɛ ɖɩñɔtɩnɩ Yehowa nɛ pɩkɩlɩ? Ha kɩɖaŋ nɩɩyɩ.

⁴ Ða Krɩstʋ ñɩma, ɖɩtɩsɔɔlɩ se ɖɩnɩɩ Bibl taa kajalaɣ wɩlɩtʋ taa ɖeke. Ðɩsɔɔlaa siŋŋ se Ɛsɔ fezuu kiɖeɖeu ɛsɩnɩ-ɖʋ nɛ ɖɩkpɛlɩkɩ «Ɛsɔ wondu ndʋ tɩwɛ cukaŋ yɔ» nɛ ɖɩnɩɩ tɩ-taa. (1 Kɔr. 2:​9, 10) Ŋpɩzɩɣ nɛ ŋla ɖʋtʋ nɛ ŋkpɛlɩkɩ tɔm cukaŋ ñɩndʋ nɛ pɩsa nɛ ŋñɔtɩnɩ Yehowa nɛ pɩkɩlɩ. Ŋpɩzɩɣ nɛ ŋkpɛlɩkɩ ɛzɩma ɛlɩzɩ ɛ-sɔɔlɩm nɛ ɛwɩlɩ ɛ-sɛyaa caanaʋ taa yɔ pɩ-tɔm nɛ ɛzɩma pɩwɩlɩɣ se ɛsɔɔlɩ ña ɖɔɖɔ yɔ. Ŋpɩzɩɣ nɛ ŋtazɩ nɛ ŋna ɛzɩma Yehowa kaasɔɔlaa se caanaʋ taa Izrayɛɛlɩ mba ɩsɛɛ-ɩ yɔ nɛ ŋkpaɣ-tʋ nɛ ŋmaɣzɩnɩ ɛzɩma ɛsɔɔlaa se ɖa Krɩstʋ mba ɖɩsɛɛ-ɩ sɔnɔ yɔ. Yaa pɩtɩla yɔ, ŋpɩzɩɣ nɛ ŋtazɩ natʋ tɔm ndʋ tɩlaba nɛ titukuuni Yesu wezuu caɣʋ nɛ ɛ-Ɛsɔ sɛtʋ tʋmɩyɛ alɩwaatʋ ndʋ ɛɛwɛ tɛtʋ yɔɔ yɔ tɩ-taa nɛ pilimi.

5. Tɔm ndʋ taa ŋsɔɔlaa se ŋtazɩ nɛ pɩkɩlɩ ña-tɩ yɔɔ kpɛlɩkʋʋ alɩwaatʋ taa?

⁵ Pɔpɔzɩ mba patazɩɣ Bibl taa tete yɔ pa-taa nabɛyɛ se pana se Ɛsɔtɔm taa, tɔm cukaŋ ñɩndʋ ndʋ tɩ-taa pɔsɔɔlaa se patazɩ. Tɔm ndʋ pocosaa yɔ tɩ-taa natʋyʋ wɛ aɖakaɣ ŋga kɔtɔŋ se « Tɔm ndʋ tɩ-taa ɖɩpɩzɩɣ nɛ ɖɩtazɩ ɖa-tɩ yɔɔ kpɛlɩkʋʋ alɩwaatʋ taa yɔ» ka-taa. Index des publications des Témoins de Jéhovah yaa Guide de Recherches des Témoins de Jéhovah pɩzɩɣ nɛ pɩsɩnɩ-ŋ nɛ ŋkpɛlɩkɩ tɔm ndʋ, nɛ kpɛlɩkʋʋ mbʋ pɩhaɣ-ŋ taa leleŋ siŋŋ. Ye ŋkpɛlɩkɩɣ Bibl taa tɔm cukaŋ ñɩndʋ yɔ, pɩpɩzɩɣ nɛ pɩcɛyɩsɩ ñe-tisuu nɛ pɩsɩɣnɩ-ŋ nɛ ŋtɩlɩ Ɛsɔ. (Adu. 2:​4, 5) Lɛɛlɛɛyɔ, iyele nɛ ɖɩna Bibl taa  toovenim tɔm cukaŋ ñɩndʋ ndʋ ɖɩpɩzɩɣ nɛ ɖɩkpɛlɩkɩ camɩyɛ yɔ tɩ-taa natʋyʋ.

6. (a) Tʋkaɣ ŋga wɛ ɖʋtʋ nɛ tamaɣ pɛ-hɛkʋ taa? (b) Ɛbɛ yɔɔ ɖɩpɩzɩɣ nɛ ɖɩyɔɔdɩ se tamaɣ ŋga Yehowa labɩ tɛtʋ nɛ ɛyaa pɔ-yɔɔ yɔ, kɛkɛ «tamtam tamaɣ»? (Efɛɛzɩ mba 3:11)

⁶ Iyele nɛ ɖɩna tɔm ndʋ Bibl yɔɔdʋʋ pɩlɩɩnɩ Ɛsɔ tamaɣ yɔɔ yɔ. Tʋkaɣ nakɛyɛ wɛ ɖʋtʋ nɛ tamaɣ pɛ-hɛkʋ taa. Ðɩpɩzɩɣ nɛ ɖɩkpaɣ ɖʋtʋ nɛ ɖɩmaɣzɩnɩ habɩyɛ nɖɩ ɛyʋ nɔɔyʋ lɩzɩɣ se ɛtɩŋɩɣ nɛ ewolo lone naɖɩyɛ taa yɔ. Ɛlɛ ye nabʋyʋ ɛɖɩɣ habɩyɛ nɖɩ yɔ, ɛyʋ ɛnʋ ɛɛpɩzɩɣ nɛ ɛtalɩ lone nɖɩ ɖɩ-taa ɛcaɣ wobu yɔ. Piyele nɛ tamaɣ yɔ, ɖɩpɩzɩɣ nɛ ɖɩkpaɣ-kɛ nɛ ɖɩmaɣzɩnɩ lone nɖɩ ɖɩ-taa ɛyʋ nɔɔyʋ caɣ wobu yɔ. Ðɩsɩm ɖenɖe ɖeyi ɖeyi ɖɩsɔɔlaa se ɖiwolo yɔ, ɛlɛ habɛɛ ndɩ ndɩ pɩzɩɣ nɛ awolo lone nɖɩ ɖɩ-taa. Ye nabʋyʋ ɛɖɩɣ habɩyɛ naɖɩyɛ yɔ, ɖɩkpakɩɣ lɛɛɖɛ. Taa leleŋ tɔm lɛ se Yehowa kuli ‘ɛ-tamtam tamaɣ’ yɔɔ Bibl taa pazɩ pazɩ. (Efɛz. 3:11) Yehowa pɩzɩɣ nɛ ɛtɩŋnɩ nʋmɔŋ ndɩ ndɩ yɔɔ nɛ eyele nɛ ɛ-tamaɣ la, nɛ paa ɛzɩmtaa lɛ ndʋ ɛyɔɔdʋʋ yɔ tɩlakɩ, mbʋ pʋyɔɔ yɔ ɛlakɩ «se pɩtɩŋa pɩɖʋ nesi ɛ-tamaɣ.» (Adu. 16:4) Nɛ mbʋ pɩlɩɣ mbʋ Yehowa lakɩ yɔ pɩ-taa yɔ, pɩkaɣ wɛʋ tam. Yehowa tamaɣ lɛ ŋga? Nɛ nʋmɔŋ weyi yɔɔ ɛtɩŋnaa se eyele nɛ kala?

7. Kajalaɣ ɛyaa mba Yehowa lɩzaa yɔ palabɩ kɩwɛɛkɩm lɛ, nʋmɔʋ lɛɛkʋ ŋgʋ yɔɔ ɛtɩŋnaa se eyele nɛ ɛ-tamaɣ la? (Maatiyee 25:34)

⁷ Ɛsɔ kaaheyi kajalaɣ ɛyaa mba ɛlɩzaa yɔ tamaɣ ŋga ɛɛwɛnɩ pɔ-yɔɔ yɔ. Eeheyi-wɛ se: «Ɩlʋlɩ nɛ ɩɖɔɔ, isu tɛtʋ yɔɔ nɛ ɩwɛɛnɩ ɖoŋ tɩ-yɔɔ, ɩwɛɛnɩ ɖoŋ . . . mbʋ payɩ pɩwɛ wezuu» tɛtʋ yɔɔ yɔ pɩ-yɔɔ. (Kiɖe 1:28) Paa Aɖam nɛ Ɛva pakaɖɩnɩ Yehowa nɛ peyele nɛ kɩdɛkɛdɩm sʋʋ kedeŋa yɔɔ yɔ, pɩtɩɖɩɣ-ɩ nʋmɔʋ se eyele nɛ ɛ-tamaɣ la. Ɛtɩŋnɩ nʋmɔʋ lɛɛkʋ yɔɔ se eyele nɛ kala. Ɛcaŋaa nɛ ɛkpaɣ lɩmaɣzɩyɛ se ɛsɩɣ Kewiyaɣ nakɛyɛ ɛsɔdaa nɛ keyele nɛ tamaɣ ŋga ɛɛwɛnɩ ɛyaa nɛ tɛtʋ yɔɔ yɔ kala. (Kalɩ Maatiyee 25:34.) Alɩwaatʋ ndʋ Yehowa ɖʋwa yɔ tɩtalaa lɛ, sɔɔlɩm tuyi-i nɛ etiyi ɛ-pɩyalʋ tɛtʋ yɔɔ se ɛwɩlɩ ɛyaa Kewiyaɣ tɔm nɛ ɛcɛlɩ e-wezuu se pɩya ɖa-ñʋʋ kɩdɛkɛdɩm nɛ sɩm pe-nesi tɛɛ. Pʋwayɩ lɛ efezi Yesu nɛ ɛlɛ kpa ɛsɔdaa nɛ ɛpɩsɩ Ɛsɔ Kewiyaɣ Wiyaʋ. Ɛlɛ Ɛsɔ tamaɣ tɔm sakɩyɛ wɛɛ se ɖɩpɩzɩɣ nɛ ɖɩtasɩ-tʋ kpɛlɩkʋʋ.

8. (a) Ɛzɩma ɖɩpɩzɩɣ nɛ ɖikpeɣli Bibl taa tɔm tobi? (b) Ɛzɩ Efɛɛzɩ mba 1:​8-11 yɔɔdʋʋ yɔ, ɛbɛ Yehowa kaɣ labʋ? (Cɔnɩ takayaɣ huyuu yɔɔ kɩlɛmʋʋ.)

⁸ Tɔm ndʋ tɩwɛ Bibl taa yɔ ɖɩpɩzɩɣ nɛ ɖikpeɣli-tʋ ɛzʋnɔ: Yehowa kaɣ ñalʋʋ ɛ-hɩɖɛ yɔɔ, ɛkaɣ tɩŋnʋʋ e-Kewiyaɣ yɔɔ nɛ eyele nɛ tamaɣ ŋga ɛwɛnɩ tɛtʋ yɔɔ yɔ kala. Nɛ Krɩstʋ kɛnɩ Kewiyaɣ ŋga ka-ñʋʋdʋ. Yehowa tamaɣ ɛɛkaɣ lɛɣzʋʋ kpa. Ɛlabɩ tamaɣ se pɩtɩŋa payɩ pɩkaɣ labʋ ɛzɩ ɛyɔɔdʋʋ yɔ. (Iza. 46:​10, 11, pɩ-tɛm tɔm; Ebr. 6:​17, 18) Alɩwaatʋ talɩɣ lɛ, tɛtʋ kaɣ pɩsʋʋ paradisuu nɛ Aɖam nɛ Ɛva pa-lʋlʋʋ taa ñɩma mba pɛwɛ siɣsiɣ yɔ, pakaɣ talʋʋ pilim nɛ panɩɩ «wezuu leleŋ tam» kɩ-taa. (Keɣ. 22:26) Ɛlɛ pɩtɩkɛ pi-ɖeke Yehowa kaɣ labʋ. Tamaɣ ŋga ɛwɛna yɔ, ka-kaɖʋwa sɔsɔɔ lɛ se eyele nɛ nɔɔ kʋɖʋmaɣ wɛɛ ɛ-sɛyaa mba pɛwɛ ɛsɔdaa yɔ nɛ mba pɛwɛ tɛtʋ yɔɔ yɔ pɛ-hɛkʋ taa. Pʋwayɩ lɛ, mba payɩ pakaɣ wɛʋ siɣsiɣ yɔ pakaɣ luzuu pa-tɩ ɛ-tɛɛ nɛ ɛkɛ pe-Wiyaʋ. (Kalɩ Efɛɛzɩ mba 1:​8-11.) Nʋmɔʋ kɩbaŋʋ ŋgʋ kɩ-yɔɔ Yehowa tɩŋɩɣna nɛ eyeki se ɛ-tamaɣ ɛla yɔ kɩwɛ piti kpem.

9. Ðɩɩkalɩɣ Bibl lɛ, cee wayɩ alɩwaatʋ ndʋ yɔɔ ɖɩpɩzɩɣ nɛ ɖɩmaɣzɩ?

⁹ Iyele nɛ ɖɩna natʋ tɔm ndʋ Yehowa yɔɔdɩ Edɛɛnɩ kaɖaɣ taa nɛ pama-tʋ Kiɖe Tɛɛ Tɔm 3:15 taa yɔ. b Tɩyɔɔdʋʋ lakasɩ nzɩ sɩkaɣ yebu nɛ  ɛ-tamaɣ la yɔ sɩ-tɔm; ɛlɛ lakasɩ nzɩ, sɩkaɣ labʋ pɩnzɩ kudokiŋ sakɩyɛ wayɩ. Sɩ-taa nasɩyɩ yɔ: pɩnzɩ sakɩyɛ wayɩ Abraham lʋlʋʋ taa tʋ nɔɔyʋ kaɣ pɩsʋʋ Krɩstʋ. (Kiɖe 22:​15-18) Nɛ ɛzɩ Masɩ kaayɔɔdʋʋ yɔ, pañasɩ Yesu naakiɖe pɩnaɣ 33 taa. (Tʋma 3:​13-15) Natʋ tɔm ndʋ, tɩ-kɛdɛzaɣ hɔɔlʋʋ yɔ: pakaɣ tɔyɩtʋʋ Sataŋ ñʋʋ; nɛ kʋkʋ ñakaɣ labʋ cee wayɩ pɩnzɩ 1000 kewiyitu tɔɔʋ wayɩ. (Natʋ 20:​7-10) Bibl tasɩɣ yɔɔdʋʋ tɔm sakɩyɛ; tɔm ndʋ titukuuni mbʋ pɩkaɣ labʋ alɩwaatʋ ndʋ koyindiye nɖɩ ɖɩwɛ Sataŋ ɛjaɖɛ nɛ Yehowa ɛgbɛyɛ pɛ-hɛkʋ taa yɔ ɖɩkaɣ kpaʋ ɖoŋ siŋŋ yɔ.

10. (a) Pɩkazɩ pazɩ lɛ, lakasɩ nzɩ kaɣ labʋ? (b) Ɛzɩma ɖɩpɩzɩɣ nɛ ɖɩñɔɔzɩ ɖa-maɣzɩm nɛ ɖa-laŋɩyɛ? (Kalɩ pɩ-tɛɛ tɔm.)

¹⁰ Maɣzɩ lakasɩ sɔsɔsɩ nzɩ Bibl kaayɔɔdaa se sɩkaɣ labʋ yɔ sɩ-yɔɔ nɛ ŋna. Kajalaɣ lɛ, ajɛɛ kaɣ yɔɔdʋʋ se: «Laŋhɛzɩyɛ nɛ pɛɛyɛ!» (1 Tes. 5:​2, 3) Nɛ kʋñɔŋ sɔsɔʋ kaɣ paɣzʋʋ «tuda» alɩwaatʋ ndʋ ajɛɛ kʋyʋʋ cɛtɩm Ɛsɔ sɛtʋ agbaa kpeekpe yɔɔ yɔ. (Natʋ 17:16) Pʋwayɩ lɛ, piti lakasɩ nasɩyɩ kaɣ labʋ nɛ ɛyaa na «ɛyʋ Pɩyalʋ ɛwɛɛ nɛ ɛkɔŋ ɛsɔdaa mɩndʋ yɔɔ nɛ ɖoŋ nɛ samtʋ sɔsɔtʋ.» (Mat. 24:30) Yesu kaɣ ɛyaa tɔm hʋnʋʋ nɛ ɛtayɩ heŋ nɛ pʋŋ pɛ-hɛkʋ taa. (Mat. 25:​31-33, 46) Ɛlɛ Sataŋ ñaakaɣ caɣʋ yem. Paɖɩyɛ kaɣ-ɩ tuyuu nɛ eseɣti ajɛɛ kɩgbɛndʋʋ ŋgʋ Bibl yaɣ se Gɔɔgɩ, weyi ɛlɩnɩ Maagɔɔgɩ ɛjaɖɛ taa yɔ nɛ kɩkʋyɩ Yehowa sɛyaa siɣsiɣ tɩnaa yɔɔ. (Ezek. 38:​2, 10, 11) Alɩwaatʋ natʋyʋ talɩɣ lɛ, patam numwaa mba pɩkazaa yɔ pakaɣ kpaʋ ɛsɔdaa nɛ pɛkpɛndɩ Yesu nɛ ɛsɔdaa yoyaa yɔɔ nɛ pala Armaagedɔɔ you; you ŋgʋ kɩkɛnɩ kʋñɔŋ sɔsɔʋ kɛdɛzaɣ hɔɔlʋʋ. c (Mat. 24:31; Natʋ 16:​14, 16) Ðɩnɛ ɛlɛ, Krɩstʋ Pɩnzɩ 1000 kewiyitu tɔɔʋ kaɣ paɣzʋʋ.—Natʋ 20:6.

11. Ɛzɩma tɩyɛ wezuu maatɛŋ lidaʋ tukuuni-ŋ? (Cɔnɩ ɖɔɖɔ kɩlɛmʋʋ.)

¹¹ Lɛɛlɛɛyɔ maɣzɩ mbʋ pɩkaɣ labʋ pɩnzɩ 1000 kewiyitu tɔɔʋ wayɩ yɔ pɩ-yɔɔ. Bibl yɔɔdʋʋ se ɖa-Lɩzɩyʋ ɖʋ «tamtam wɛʋ [ɖa-laŋa] taa.» (Ekl. 3:11) Maɣzɩ ɛzɩma pitukuuni-ŋ yɔ nɛ ɛzɩma pitukuuni ɖɔɖɔ ña nɛ Yehowa mɩ-taabalɩyɛ yɔ pɩ-yɔɔ nɛ ŋna. Pɔyɔɔdɩ tɔm kɩbandʋ tʋnɛ Approchez-vous de  Jéhovah takayaɣ hɔɔlʋʋ 319 yɔɔ: «Ðɩcakɩ wezuu pɩnzɩ mɩnɩŋ sakɩyɛ, yaa kudokiŋ sakɩyɛ, yaa miiliyɔɔwaa sakɩyɛ nɛ halɩ miiliyaarɩwaa sakɩyɛ lɛ, ɖɩkaɣ tɩlʋʋ tɔm sakɩyɛ Ɛsɔ Yehowa yɔɔ nɛ pɩkpaɖɩ ndʋ ɖɩsɩm lɛɛlɛɛyɔ yɔ. Paa mbʋ yɔ ɖɩkaɣ ɖiɣzinuu se tɔm sakɩyɛ tasɩ wɛʋ se ɖɩkpɛlɩkɩɣ ɛ-yɔɔ. . . . Halɩ ɖɩɩpɩzɩɣ nɛ ɖɩmaɣzɩ ɛzɩma wezuu caɣʋ kaɣ wɛʋ kajʋka nɛ leleŋ paradisuu taa yɔ pɩ-yɔɔ. Nɛ mbʋ pɩkaɣ labʋ leleŋ nɛ pɩkɩlɩ yɔ, mbʋ lɛ se paa ɛzɩmtaa lɛ ɖɩwɛɣ nɛ ɖɩñɔtʋʋnɩ Yehowa nɛ pɩkɩlɩɣ.» Pʋcɔ nɛ pɩtalɩ mbʋ lɛ, ɖɩɩkpɛlɩkɩɣ Ɛsɔtɔm lɛ, ɛbɛ taa ɖɔɖɔ ɖɩpɩzɩɣ nɛ ɖɩtazɩ?

12. Ɛzɩma ɖɩpɩzɩɣ ɖɩla nɛ ɖa-lɩmaɣza wɛɛ mbʋ piɖiɣni labʋ ɛsɔdaa yɔ pɩ-yɔɔ? Ha kɩɖaʋ nakʋyʋ.

¹² Ɛsɔtɔm wɩlɩɣ-ɖʋ ɛzɩma pɩɖɔŋ Yehowa cɔlɔ «ɖooo hayo» yɔ, pɩ-hɔɔlʋʋ nakʋyʋ pazɩ yem. (Iza. 33:5) Bibl heyiɣ-ɖʋ Yehowa nɛ ɛ-ɛgbɛyɛ hɔɔlʋʋ ŋgʋ kɩwɛ ɛsɔdaa yɔ pɔ-tɔm. (Iza. 6:​1-4; Dan. 7:​9, 10; Natʋ 4:​1-6) Kɩɖaʋ nakʋyʋ yɔ: ɖɩpɩzɩɣ nɛ ɖɩkalɩ piti lakasɩ nzɩ Ezekɩyɛɛlɩ nawa alɩwaatʋ ndʋ «ɛsɔdaa tʋlaa nɛ [ɛpaɣzɩ] naʋ Ɛsɔ tɛ natʋ» yɔ sɩ-tɔm.—Ezek. 1:1.

13. Ɛzɩ Ebree mba 4:​14-16 yɔɔdʋʋ yɔ ŋmaɣzɩɣ tʋmɩyɛ nɖɩ Yesu wɛɛ nɛ ɛlakɩ ɛsɔdaa yɔ ɖɩ-yɔɔ lɛ, ɛzɩma pɩlakɩ-ŋ?

¹³ Maɣzɩ ɖɔɖɔ tʋmɩyɛ nɖɩ Yesu wɛɛ nɛ ɛlakɩ ɛsɔdaa yɔ ɖɩ-yɔɔ; ɛkɛ ɖe-Wiyaʋ nɛ Cɔjɔ Kɩlɩm weyi ɛnaɣ ɖa-pʋtɔdɩyɛ yɔ. Ðɩpɩzɩɣ nɛ ɖɩtɩŋnɩ ɛ-yɔɔ adɩma taa nɛ ɖɩñɔtɩnɩ Ɛsɔ «lootiye kewiyaɣ kpelaɣ» nɛ ɖɩpɔzɩ Ɛsɔ se ɛna ɖa-pʋtɔdɩyɛ nɛ ɛsɩnɩ-ɖʋ «alɩwaatʋ kɩbandʋ yɔɔ.» (Kalɩ Ebree mba 4:​14-16.) Ðitaayele nɛ evemiye naɖɩyɛ ɖɛɛ nɛ ɖɩtɩmaɣzɩ mbʋ Yehowa nɛ Yesu palabɩ-ɖʋ nɛ mbʋ peɖiɣni-ɖʋ labʋ nɛ ɛsɔdaa yɔ pɩ-yɔɔ. Pɩwɛɛ se sɔɔlɩm mbʋ pɛwɛnɩ ɖɔ-yɔɔ yɔ pitukuni ɖa-laŋa siŋŋ nɛ piseɣti-ɖʋ nɛ ɖɩwɛɛ kpekpeka ɖɛ-Ɛsɔ sɛtʋ taa.—2 Kɔr. 5:​14, 15.

14. Mbʋ ɖɩpɩzɩɣ ɖɩla nɛ ɖɩwɩlɩ ɖɛ-ɛsɩmɩyɛ Yehowa nɛ Yesu yɔ pɩ-taa nabʋyʋ lɛ we? (Cɔnɩ ɖɔɖɔ kɩlɛmɩŋ.)

 ¹⁴ Nʋmɔŋ kɩbaŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ ɖɛ-ɛsɩmɩyɛ ɖɛ-Ɛsɔ nɛ ɛ-Pɩyalʋ yɔ, ɩ-taa nakʋyʋ lɛ se ɖɩñaɣ pana nɛ ɖɩsɩnɩ ɛyaa nɛ papɩsɩ Yehowa Aseɣɖe Tɩnaa nɛ Yesu wayɩ tɩŋɩyaa. (Mat. 28:​19, 20) Mbʋ apostoloo Pɔɔlɩ laba nɛ ɛwɩlɩnɩ ɛ-ɛsɩmɩyɛ Ɛsɔ nɛ Krɩstʋ. Ɛɛnawa se Yehowa sɔɔlɩm lɛ se «ɛyaa ndɩ ndɩ ihiɣ ñʋʋ yabʋ nɛ pɛwɛɛnɩ toovenim tɛ sɩmtʋ siŋŋ.» (1 Tim. 2:​3, 4) Ɛñaɣ pana ɛ-tɔm susuu taa nɛ ɛla mbʋ payɩ ɛpɩzɩɣ yɔ se ɛsɩnɩ ɛyaa sakɩyɛ nɛ ‘ye pɩsaŋ kɔyɔ, ɛya pa-taa nabɛyɛ ñʋʋ.’—1 Kɔr. 9:​22, 23.

15. Ɛzɩ Keɣa 1:2 yɔɔdʋʋ yɔ, ɛbɛ kaɣ yebu nɛ ɖɩwɛɛ koboyaɣ taa?

¹⁵ Keɣa maɖʋ yɔɔdɩ ɛyʋ weyi «ɛnɩɣ leleŋ Yehowa paɣtʋ taa, nɛ ɛmaɣzɩɣ Ɛ-paɣtʋ yɔɔ wɩsɩ nɛ ɖoo» yɔ ɛ-tɔm se ɛkɛ koboyaɣ tʋ nɛ pɩɖɔŋnɩ-ɩ camɩyɛ. (Keɣ. 1:​1-3; pɩ-tɛɛ tɔm) Bibl ɖɛzɩyʋ Joseph Rotherham yɔɔdɩ mayaɣ ŋga kɔ-tɔm ɛ-takayaɣ nakɛyɛ taa (Studies in the Psalms). Ɛyɔɔdaa se pɩwɛɛ se ɛyʋ «ɛsɔɔlɩ lɔŋ weyi Ɛsɔ tasɩɣ yɔ siŋŋ nɛ ɛñɩnɩ lɔŋ ɛnɩ, ɛkpɛlɩkɩ-ɩ nɛ ɛkpakɩɣ alɩwaatʋ sakɩyɛ nɛ ɛmaɣzɩɣ ɩ-yɔɔ.» Ɛsɔzaa se: «Ye evemiye kʋɖʋmɖɩyɛ ɛɖɛwa nɛ ɛyʋ ɛtɩkalɩ Bibl yɔ, elesi evemiye nɖɩ yem.» Ye ŋkaŋ ña-lɩmaɣza paa Bibl taa tɔm ndʋ lɛ tɩ-yɔɔ camɩyɛ nɛ ŋnaɣ ɛzɩma tɩlabɩ nɔɔ kʋɖʋmaɣ nɛ kɩ-taa tɔm lɛɛtʋ yɔ, ŋpɩzɩɣ nɛ ŋhiɣ taa leleŋ Bibl kpɛlɩkʋʋ taa. Ye ɛyʋ ɛtazɩɣ Ɛsɔtɔm taa camɩyɛ yɔ, pɩhaɣ-ɩ taa leleŋ siŋŋ.

16. Ɛbɛ tɔm ɖɩkaɣ yɔɔdʋʋ tɔm ñʋʋ ŋgʋ kɩkɔŋ yɔ kɩ-taa?

¹⁶ Toovenim tɔm kɩbandʋ ndʋ Yehowa wɩlɩɣ-ɖʋ ɛ-Tɔm taa yɔ, tɩ-taa nɩʋ tɩkɩlɩ-ɖʋ kaɖɛ. Tɔm ñʋʋ ŋgʋ kɩkɔŋ yɔ kɩ-taa, ɖɩkaɣ tazʋʋ toovenim tɔm cukaŋ ñɩndʋ natʋyʋ taa, ndʋ lɛ Yehowa tɛ fezuu taa templo sɔsɔʋ ŋgʋ kɩ-tɔm Pɔɔlɩ yɔɔdɩ Ebree mba takayaɣ taa yɔ. Tɛtɛ nɛ tɔm ndʋ tɩ-kpɛlɩkʋʋ ha-ŋ taa leleŋ siŋŋ.