1-2. Webhi o ukexilu wabeta kota wa kutanga ni kudilonga o Bibidya? Ta kifika.

 XINGANEKA kwila wamesena kusumba inzo. Ihi i wejimesena kumona ande dya ku isumba? O kwila wejixikina kumona ngo o foto ilondekesa o mbandu ya kanga ya inzo? Se phata eye wejimesena kuya bhwala o inzo, ni kuyitala yene yoso kikale moxi mba bhukanga. Eye nange kate mwene wejimesena kutonginina o madukumendu alondekesa kyebhi kyatungu o inzo. Ni kidi kyoso, wejimesena kutala o inzo yoso ande dya ku isumba.

² Tutena we kubhanga kima kyadifu ni kiki kyoso kitutanga ni kudilonga o Bibidya. Sayi musoneki wasokesa o njimbu ya Bibidya ni “sabhalalu ya dikota, yalebha kyavulu, a itungu bhu madisesa akolo kyambote.” Kyenyiki, ihi itutena kubhanga phala kwijiya kyambote o Bibidya? Se utanga o Bibidya ni lusolo lwoso, wanda tena ngo kudilonga tu ima twofele—kifwa ‘o ima yadyanga ya mak’â Nzambi.’ (Jih. 5:12) Kala kibhanga o muthu ande dya kusumba o inzo, udyanga hanji ku itonginina kyambote, kyene we kimoxi eye watokala kudilonga kyambote o Bibidya phala kutendela o milongi yalamu. Ukexilu umoxi wambote wakudilonga, o kumona kyebhi o njimbu itusanga mu mbandu imoxi ya Bibidya, yalungu ni njimbu itusanga mu jimbandu jamukwa. Sota kutendela yebhi o ima i uxikina, ni mukonda dyahi uxikina mu ima yeniyi.

3. Ihi yatendelesa poxolo Phawulu ku Jikidistá ni mukonda dyahi? (Efezu 3:​14-19)

³ Phala tutene kutendela kyambote o Mak’a Nzambi, twabhingi kudilonga o ima yazongo yala mu Bibidya. Poxolo Phawulu  watendelesa o jiphange na dilonge kyambote o Mak’a Nzambi phala atene ‘kwijiya kyambote kyebhi kikala o kuzanza, o kukula, o kulebha ni kuzonga,’ kwa kidi. Mu kubhanga kiki, ene ejitena ‘ku kola’ mu kixikanu kya. (Tanga Efezu 3:​14-19.) Etu we kyene kitwatokala kubhanga. Kindala twandamona kyebhi kitutena kudilonga o milongi yazongo ya Mak’a Nzambi phala kukatula mbote mu yoso yalamu.

4. Ihi itutena kubhanga phala kuzukama kwa Jihova? Bhana phangu.

⁴ Kuma tu Jikidistá, ki twamesena kutendela ngo o ima yofele yala mu Bibidya. Ni kikwatekesu kya nzumbi ikola ya Jihova, tukala ni hanji ya kudilonga “katé mwene o ima ya zongo ya Nzambi.” (1 Ko. 2:​9, 10) Ihi i uxinganeka se uxinda o mbambe ya kutokwesa phala kuzukama dingi kwa Jihova? Mu kifika, utena kutokwesa phala kwijiya kyebhi Jihova kya londekesa henda ku jiselevende je m’ukulu, ni kyebhi kiki kilondekesa kwila mwene wakuzolo we. Utena we kutokwesa kyebhi kyasokejekele o ubhezelu wa Jihova mu izuwa ya akwa Izalayele, ni kyebhi Jihova kyamesena kwila tumubheza we lelu. Mba phe nange utena kudilonga dingi kyambote o ikanenu yakumbidila Jezú kyoso kyexile mu ixi.

5. O kwila sayi kima ki wamesena kudilonga ni kutokwesa dingi kyambote mu Mak’a Nzambi?

⁵ Sayi jiphange awabhela kutokwesa o milongi ya Bibidya, azwela yalungu ni ima yawabhela kudilonga dingi kyambote. Sayi ima yatumbula ene utena kuyisanga mu kaxa ni dyambu,““ Jindunge Phala Kudilonga Ubheka.” Eye utena kutokwesa ni kikwatekesu kya Kadivulu ka Kutokwesa Phala o Jimbangi ja Jihova. Wandamona kwila o falamenda yiyi yanda ku kukwatekesa kukatula dingi mbote. O kudilonga o Bibidya mu ukexilu yu, kwanda kukwatekesa kukolesa o kixikanu kye ni “ku d’ijiya kyambote ni Nzambi.” (Jisa. 2:​4, 5) Kindala tumone milongi yazongo ya Bibidya i utena kutokwesa.

6. (a) Bhana phangu ilondekesa se mukonda dyahi o vondadi ya Jihova ithangana yoso iditunda kyambote? (b) Mukonda dyahi tutena kuzwela kwila o vondadi ya Jihova phala athu ni ixi “inangenena”? (Efezu 3:11)

⁶ Mu kifika, tala izwela o Bibidya yalungu  ni vondadi ya Nzambi. Jihova kadifu ni athu kyoso kyasola njila mba kikoka kya ambata kate bhu kididi kyamesena, alembwa kubhixilaku se kumoneka kima kixita o njila. O vondadi ya Jihova tutena ku isokesa ni kididi kwamesena kubhixila o muthu. Jihova wejiya kyambote kwebhi kwandaya, maji utena kusola jinjila ma maukexilu ka difu phala kubhixilaku. Etu tusakidila kyavulu Jihova mu kutujimbulwila bhofele bhofele o “vondadi yê inangenena” itusanga mu Bibidya. (Efe. 3:11) Jihova utena kusola kukumbidila o vondadi ye mu maukexilu ka difu, anga uditunda kyambote ithangana yoso mukonda mwene ‘ubhangesa kwila ima yoso itunda kala kyamukala mu vondadi ye.’ (Jisa. 16:4) Yoso ibhanga Jihova inangenena kate ku hadya ni hadya. Maji yebhi phe o vondadi ya Nzambi ni ima yebhi yalungulula phala o vondadi ye idikumbidile?

7. Kyoso Adá ni Eva kya bhukumuka, ihi yabhange Jihova yalungu ni vondadi ye? (Matesu 25:34)

⁷ Nzambi watangela ku dikaza dya dyanga yebhi yexile o vondadi ye phala ene. Nzambi wa atangela, wixi: ‘Vwalenu, mu sokoloke, mu izalese ixi yoso, mu i tolole; mu tumine . . . ima yoso ya mwenyu yendela ku mavu.’ (Dim. 1:28) Kyoso Adá ni Eva kyabhukumuka athu oso akituka akwa ituxi, maji kiki ki kyejifidisa Jihova kukumbidila o vondadi ye. Mwene walungulula ngo o ukexilu wejikumbila o vondadi yiyi. Mu kithangana kyenyokyo, Jihova waxindi kutumbika Utuminu ku dyulu phala kukumbidila o vondadi ye phala o athu ni ixi, kala kyamesenene tunde kudimatekenu. (Tanga Matesu 25:34.) Mu kithangana kyaxindile, Jihova mu henda ye watumikisa o Mon’e wadyanga, mu ixi. Mu kubhanga kiki, Jezú wejitena kulonga o athu yalungu ni Utuminu ni kubhana o mwenyu we phala kutukula ku kituxi ni kalunga. Mu kusuluka, Jihova wafukununa Jezú phala kuvutuka ku dyulu ni kukituka Sobha ya Utuminu wa Nzambi. Maji kwala dingi ima yavulu i utena kuxinganeka yalungu ni vondadi ya Jihova.

8. (a) Yebhi o njimbu ya Bibidya? (b) Kala kilondekesa Efezu 1:​8-11, yebhi o vondadi ya Jihova yabeta kota? (Tala ofoto yakapa.)

⁸ O njimbu ya betakota ya Bibidya ya kwila, o dijina dya Jihova anda dizelesa. Kiki kyandabhita kyoso Jihova kyandaya ni kukumbidila o vondadi ye phala o ixi bhukaxi ka Utuminu, wala bhu maku a Kidistu. O vondadi ya Jihova ka tena ku ilungulula. Jihova wakanena kwila ima yoso yandabhita kala kyazwela mwene. (Iza. 46:​10, 11; Jih. 6:​17, 18) Mu kusuluka, o ixi yanda kituka palayizu, anga o ana a Adá anda kala athu ayuka, ni kutunga mwenyomo ‘kate ku hadya ni hadya.’ (Jisá. 22:26) Maji kiki ki kyene ngo kyamesena Jihova phala etu. O vondadi ye yabeta kota ya kwila o jiselevende je joso, kikale ku dyulu mba mu ixi, amubheza ni muxima umoxi. Kyenyiki athu oso andakala fiyele mu kubelesela Jihova kala Nguvulu ya Ngongo yoso. (Tanga Efezu 1:​8-11.) Kyebhi ki udivwa mu kumona o ukexilu wa Jihova kukumbidila o vondadi ye?

9. Ima yebhi yalungu ni hadya itutena kumona mukudilonga o Bibidya?

⁹ Tala o kikanenu kyabhange Jihova mu njaludim ya Edene, kala kilondekesa Dimatekenu 3:15. b Kyene kyexile muzwela yalungu ni ima yeji kumbidila o vondadi ye. Maji o ima yiyi yeji dikumbidila ngo mu kubhita jimidi jamivu kupholo. Mu kifika, Jihova watangela Mbalahamu kwila, mu kubhita miji yavulu,  muthu umoxi watokala ku mbutu ye mwene weji kala o Kidistu. (Dim. 22:​15-18) Bhenyobho, ku muvu wa 33 K.K., Jezú amunumata ku kasende kala kya kikanene mu Bibidya. (Ika. 3:​13-15) O mbandu yasukina ya kikanenu kiki, kifwa, o kithangana kya kubula o mutwe wa Satanaji, kyanda dikumbidila ngo ku disukilu dya 1.000 ya mivu ya utuminu wa Kidistu. (Dij. 20:​7-10) O Bibidya izwela dingi ima yamukwa yavulu yanda bhita mu kithangana kiki kya unguma bhukaxi ka Satanaji ni kilunga kya Jihova.

10. (a) Kwakambe ngo bhofele, ihi yanda bhita? (b) Kyebhi kitutena kupelepalala o muxima wetu ni kilunji? (Tala o nota.)

¹⁰ Xinganeka mu ima yiyi yakanena o Bibidya. Kyadyanga o ifuxi yandabhana o ngolokela ya kwila, “kwatululuka, kwabatama!” (1 Te. 5:​2, 3) Bhenyobho anda “tukumuka,” o hadi yadikota yamateka kyoso o ifuxi kyanda lungulukila o jingeleja ja makutu. (Dij. 17:16) Mu kusuluka, kyoso o ‘Mon’a muthu kyanda kwiza ku matuta, ni kutena ni fuma yoso,’ nange twandamona ima ya madiwanu nuka twayimwene. (Mat. 24:30) Jezú wanda fundisa o athu, mu kusondolola o jimbudi ku jihombo. (Mat. 25:​31-33, 46) Maji ne kiki, Satanaji kanda bhwila. Kuma wazembe kyavulu o mundu wa Nzambi, mwene wandafwinyisa kibuka kya ifuxi ya jixi, a kixana mu Bibidya kala Ngongo dya ixi ya Mangongo, phala kulungulukila o mundu wa Nzambi. (Ize. 38:​2, 10, 11) Mu kithangana kyenyiki hanji, o Jikidistá a undu asubhukaku, anda kwa ambata ku dyulu. Kwenyoko kumoxi ni Jezú ni kifuxi kye, andabhanga mbandu mu ita ya Alumajedone, o disukilu dya hadi ya dikota. c (Mat. 24:31; Dij. 16:​14, 16) Kyandabhita o ima yoso yiyi, o Utuminu wa Midi ya Mivu wa Kidistu wandamateka kutumina mu ixi.—Dij. 20:6.

11. Kyebhi ki udivwa mukuxinganeka kwila wanda kala ni mwenyu wakalelaku? (Tala we ofoto.)

¹¹ Kindala xinganeka bhofele kyebhi kyandakala o ima kyoso kyanda bhita o midi ya mivu. O Bibidya yamba kwila o Mubhangi wetu kate mwene ‘wate o hanji ya mwenyu wa kalelaku ku mixima yetu.’ (Ndo. 3:11) Xinganeka  ihi ilombolola o izwelu yiyi phala eye ni ku ukamba we ni Jihova. O divulu Achegue-se a Jeová, mu mbandu 319, dizwela kiki: “Kyoso kitwandabhita jihama, jimidi, kate mwene mazunda ni mazunda a mivu, twandakwijiya ima yavulu yalungu ni Jihova o itwejiya lelu ndenge. Maji ne kiki, kwandakala hanji ima yavulu yakatunda phala kudilonga. . . . O mwenyu wa kalelaku wandawabha kyavulu, kate kikwala izwelu itena ku ujimbulula. O kima kyabeta dingi kota, kyanda kala hanji o kuzukama jinga kwa Jihova.” Maji kate kibhixila o kithangana kiki, ihi dingi itutena kusota mu kudilonga o Bibidya?

12. Kyebhi kitutena kwijiya o ima yalungu ni dyulu? Bhana phangu.

¹² O Bibidya izwela bhofele yalungu ni kukala bhu pholo ya Jihova mba “ku matala.” (Iza. 33:5) O Bibidya izwela ima yakatunda yalungu ni Jihova, ni mbandu ya kilunga kye ku dyulu. (Iza. 6:​1-4; Dan. 7:​9, 10; Dij. 4:​1-6) Mu kifika, tutena kutanga yalungu ni ima yasoneka polofeta Izekiyele, kyoso ‘mawulu a jikuka mwene hé umona isumwa ya Nzambi.’—Ize. 1:1.

13. Kala kyojimbulule mu Jihebelewu 4:​14-16, kyebhi ki udivwa mu kwijiya o ima yamubhanga Jezú ku dyulu?

¹³ Xinganeka we mu ima yamubhanga Jezú ku dyulu kala Sobha, ni Mukunji wetu Wadikota wa henda. Bhukaxi ka mwene, tutena kuzukama ku “kyandu kya ngalasa ya Nzambi” mu musambu, ni kubhinga o muloloki wa ituxi yetu ni kikwatekesu mu “kithangana kyatokala.” (Tanga Jihebelewu 4:​14-16.) Kana kubhita kizuwa se kuxinganeka mu yoso yabhange kya Jihova ni Jezú, ni yamubhanga kindala tunde ku dyulu, phala o mbote yetu. O henda yatukwatela ene, yatokala kututula ku muxima ni kutuswinisa kubhanga yoso itutena mu sidivisu ya Jihova.—2 Ko. 5:​14, 15.

14. Kima kyebhi kimoxi kitutena kubhanga phala kulondekesa kwila tubhana valolo mu yoso yamubhanga Jihova ni Jezú? (Tala we ojitofo.)

 ¹⁴ Ukexilu umoxi utulondekesa o kisakidilu kyetu mu yoso yene mubhanga Jihova ni Jezú, o kubhanga yoso itutena mu kukwatekesa akwetu kukituka Jimbangi ja Jihova ni maxibulu a Jezú. (Mat. 28:​19, 20) Kiki kyene kyabhange poxolo Phawulu phala kulondekesa o kisakidilu kye kwa Jihova ni kwa Jezú. Mwene wejidile kwila Jihova wamesena kwila “athu a maukexilu oso abhuluke, anga eza mu kwijiya o kidi.” (1 Ti. 2:​3, 4) Mwene wabhange yoso mu ukunji mu kukwatekesa athu avulu ‘phala mu maukexilu oso, kubhulula-ku amoxi.’ —1 Ko. 9:​22, 23.

15. Kala kilondekesa Jisálamu 1:​2, kima kyebhi kyanda tusangulukisa?

¹⁵ O mukwa Jisálamu wajimbulula kyambote kyebhi ki kala o muthu udilonga o mak’a Nzambi. Mwene wambe kwila o muthu yu wazediwa, mukonda “o ngalasa yê u i sanga mu ngonge ya Jihova” ni kwila o “ngonge yê yene ya banza mu mwanya ni mu usuku.” (Jisá. 1:​1-3) Mu kuzwela yalungu ni jivelusu jiji, o mukwa kulungulula o Bibidya, o ngana Joseph Rotherham, wasoneka mu divulu dye dya Kudilonga o Jisálamu, mu dimi dya Kingileji, kwila o “muthu watokala ku wabhela o itendelesu ya Nzambi ni kwila watokala ku isota, kudilonga yu, ni kubhita kitangana mu ku ixinganeka.” Mwene wajimbulula dingi kwila, se o muthu “ubhita kizuwa se kutanga o Bibidya, kilombolola kwila o kizuwa kyokyo kyadiboto ngo.” Eye utena kuwabhela kudilonga o Bibidya mukusota kwijiya o ima yakatunda, ni kumona kyebhi yene yoso yatakajana. O kutonginina o milongi yoso ya Mak’a Nzambi kima kitubhekela kisangusangu kyavulu!

16. Ihi itwanda dilonga mu milongi yakayela?

¹⁶ O kidi kyene mutulonga Jihova mu Maka me, ki kyabhonzo kyavulu phala ku kitendela. Mu milongi yakayela, twandadilonga mbandu imoxi ya kidi kiki kya zongo —o tembulu yadikota ya Jihova mu nzumbi, yajimbulula poxolo Phawulu mu mukanda we ku akwa Jihebelewu. Eye wanda wabhela kudilonga o maka enya.