1-2. Ni nzira yahi mbuya ey’erisomeramo n’eriyegheseryamo e Biblia? Iha eky’erileberyako.

 THATHERA akasasani wukathwamu nga wunaghule enyumba. Ni byahi ebya wanganza eritsuka erilhangira wuthe wathwamu? Mbwino ky’ekisasani ekikakanganaya enyumba ku yisosire embere hasa? Ahathe erithika-thika iwukendianza eriyihikira okwa nyumba nuku wuthimbe kuyo, wingire omwakathi erilebya obuli kisenge, n’erilebya obuli sonda yayu. Kandi nibya iwangananza erilebya epulani yayo eriminya ngoku yihimbirwe. Omo kwenene, iwukendyanza eriminya obuli kindu ekihambire okwa yikayabya nyumba yawu eyo.

² Thwangana kolha ekiri ng’ekyo thukasoma n’eriyeghesya e Biblia. Omusomi mughuma we Biblia akalinganisaya omwatsi we Biblia “ng’enyumba nene, nyiri kandi eyihimbire okwa musingyi owaghumire.” Neryo kwesi, thwangaminya thuthi ndeke ebyosi ebiri omwa Biblia? Wamakwama kyasomayo omw’iharabana, iwangana minya emyatsi y’omusingyi misa—“emyatsi y’erimbere y’ebinywe bya Nyamuhanga.” (Ebr. 5:12) Omwakanya k’ekyo, ng’enyumba, “ingiramo” wuminye ndeke ebihambire kuyo. Enzira eyuwene kutsibu ey’erighiramo e Biblia ly’erilebya ebitsweka by’emyatsi yayo muthina-muthina nga bihambene bithi. Isiwasubulira okw’iyitheghererya ekwenene eyo wikirirye lisa aliwe n’ekikaleka iw’ikiriryayo.

3. Omukwenda Paulo mwabwira balikyabo Abakristayo athi bakoleki, kandi busana naki? (Abanya Efeso 3:14-19)

³ Erithoka eriyitheghererya ndeke obuli sonda y’Ekinywe kya Nyamuhanga, thutholere ithw’igha buuli ekwenene ye Biblia. Omukwenda Paulo mwahabulha Abakristayo balikyabo athi batholere ibigha Ekinywe kya Nyamuhanga n’omuhwa nuku ‘baminye ndeke obunene, n’obughali, n’obuuli, n’obuuli bw’endatha, n’obuuli bw’eyikwa’ bw’ekwenene. Neryo bang’ongere ‘erihanda  emirihi n’erisika’ omw’ikirirya lyabo. (Soma Abanya Efeso 3:14-19.) Thutholere ithwakolha ikyan’ekyo. Leka thulebaye ngoku thwanga minya ndeke Ekinywe kya Nyamuhanga erithoka erilhangira ekisasani kyakyo ekyosi.

4. Thwanga kolhaki eriyithunda hakuhi na Yehova? Iha eby’erileberyako.

⁴ Ithwe ng’Abakristayo sithulisubulira okw’iyitheghererya emyatsi y’omusingyi misa ye Biblia. Busana n’obuwathikya b’omulimu abuyirire wa Yehova Nyamuhanga, thwanzire kutsibu erigha “emyatsi ya Nyamuhanga ey’omwakathi.” (1 Kor. 2:9, 10, NWT) Busana naki iwuthatsuka endegheka y’eriyeghesya eyikendi kuthunda hakuhi-kuhi na Yehova? Ng’eky’erileberyako, wangana sekulya nuku wuminye ndeke Nyamuhanga nga mwakangania athi abaghombe biwe abakera b’olhwanzo kandi ekyo nga kikakanganaya kithi ngoku nawu akwanzire. Iwangana lebya ndeke emitheghekere ya Yehova y’eriramya omwa Israeli kandi nga yikahambangana yithi n’emitheghekere y’Ekikristayo munabwire. Kutse obundi iwangan’igha buuli okwa maminyereri agho Yesu aberereraya omwa ngebe yiwe n’omw’ithulira liwe okwa kihugho.

5. Mbwino hane omwatsi ogho wanganza erisekulyako omwa ndegheka yawu y’eriyeghesya?

⁵ Abangyi b’okwa bigha be Biblia ab’omuhwa mubabulibwa nga ni yindi myatsi yahi ey’omwakathi eyo banzire erigha omwa Kinywe kya Nyamuhanga. Ebighuma by’okwa ebyo basubiraya bine omwa kasanduku “ Emyatsi Busana n’Endegheka y’Eriyeghesya.” Wangana bana etseme nene omw’iyeghesya okwa myatsi ng’eyo erilhabira omwa buwathikya bwe Watch Tower Publications Index kutse Obusondoli obw’Erisekulya Omwa Bitabu eby’Abema ba Yehova. Erigha e Biblia ya buuli lyangana ghumya erikirirya lyawu n’erikuwathikya eribana “eriminya lya Nyamuhanga.” (Emi. 2:4, 5) Lino thuhire omuwatho okwa kwenene ndebe ye Biblia ey’omwakathi eyo thwangaminya.

6. (a) Ni mbaghane yahi eyiri ahakathi-kathi k’epulani n’eriyisunza? (b) Busana naki kyanganabuwa indi eriyisunza lya Yehova busana n’abandu n’ekihugho ni rya “kera na kera”? (Abanya Efeso 3:11)

⁶ Ng’eky’erileberyako, thulebaye ebye Biblia yikabugha ebihambire okw’iyisunza lya Nyamuhanga. Hali embaghane nene  ahakathi-kathi k’epulani n’eriyisunza. Epulani yiri ng’enzira eya wukathwamu erilhabamu eyanga kukolya eyo wukaghenda. Aliwe, epulani yangana ghana erikukolya eyo wukaghenda omwa nzira mwamabya ekikakukakiraya. Eriyisunza lyangana linganisibwa n’omwanya wonyine-nyine ogho wukaghendamo. Thunasi eyonyine-nyine eyo thukaya, aliwe thwangana kolesya esyonzira muthina-muthina. Enzira nguma yamabyamo ekikakiryo, ithwangana lhaba omwa yindi. Eky’obutseme, Yehova abiribya inianemubisulha omwa Biblia ‘mw’eriyisunza liwe erya kera na kera.’ (Efe. 3:11) Omwa nzira nguma kutse eyindi, abiribya inianemusingura kundi “abirihangika obuli kindu busana n’eritheghekania” kutse eriyisunza liwe. (Emi. 16:4) Kandi ebikalhwiririra omwa bya Yehova abirikolha bikendi syabyaho kera na kera. Eriyisunza lya Yehova ly’eryahi, kandi ni mbinduka syahi esyo abirikolha nuku aberererayelyo?

7. Abandu b’erimbere babere babiriyisamambulha, Yehova mwahindulha athi enzira eyo angaberereryemo eriyisunza liwe? (Matayo 25:34)

⁷ Nyamuhanga mwabwira abandu biwe b’erimbere b’eriyisunza liwe busana nabu. Babya ‘b’eributha n’erikanyirira, erisulya ekihugho, erighondyakyo; erithabalha obuli kindu ekiriho’ okwa kihugho. (Enz. 1:28) Omughulhu Adamu na Eva bayisamambulha, erileka ekibi kingire omw’ihiika ly’abandu, eriyisunza lya Yehova mulithimana. Mwahindulha enzira eyo lyangaberereremo. Aho n’aho, mwathwamu erihira Obwami omwa lhubulha obwangaberererye eriyisunza liwe ery’erimbere busana n’abandu n’ekihugho. (Soma Matayo 25:34.) Okwa buthuku bwiwe obutholere, omwa lhwanzo Yehova mwathuma Mughalha wiwe akambere okwa kihugho erikangirirya abandu ebihambire okwa Bwami n’erihayo engebe yiwe erithuthongolya okwa kibi n’olhuholho. Neryo Yesu mwalhubukibwa n’erisuba elhubulha eriyathabalha ng’Omwami ow’Obwami bwa Nyamuhanga. Aliwe hakine ebindi eby’erighaniryako ebihambire okw’iyisunza lya Nyamuhanga.

8. (a) Omwatsi mukulhu we Biblia w’owahi? (b) Ngoku kiri omwa Abanya Efeso 1:8-11, eriyisunza likulhu erya Yehova ly’eryahi? (Lebaya ekisasani ky’okwa kidipa.)

⁸ Omwatsi mukulhu we Biblia ali athi erina lya Yehova likendi syayirwa mwa libuyirire anemuberererya eriyisunza liwe busana n’ekihugho erilhabira omo Bwami bwiwe ahisi sya Kristo. Eriyisunza lya Yehova siryanga hindulhwa. Abiribugha athi buthekwa-buthekwa likendi syabererera. (Isa. 46:10, 11; Ebr. 6:17, 18) Endambi yikendi syahika ekihugho ikyahindulhwamo paradiso omo ab’olhubutho lhwa Adamu na Eva abahikene kandi abathunganene bakendi ‘syakotha.’ (Esy. 22:26) Aliwe, ebi si byo bisa ebyo Yehova akendi syaberererya. Eriyisunza liwe likulhu n’ihira ebihangikwa biwe ebyosi eby’amenge eby’elhubulha n’eby’okwa kihugho omo bughuma. Neryo abosi abaliho bakendi syamughondera buthaleghulha ng’Omuthabali wabo. (Soma Abanya Efeso 1:8-11.) Mbwino siwathatsemera enzira eyuwenenga eyo Yehova akaberererayamo eriyisunza liwe?

9. Erilhabira omw’isoma e Biblia, thwangana lhangira obuthuku obukasa okwa lhulengo lhungahi?

⁹ Thalengekania oko buminyereri obo Yehova ahulha omw’irima lye Edeni, obuli omwa Enzuko 3:15. b Mubwakania okwa bindu ebyanga berererye eriyisunza liwe aliwe ihamabirilhaba esyongumi sy’emyaka. Ebi mwamuli eributhwa ly’ab’olhubutho lhwa Abrahamu, akalhandirira akangakolirye okw’ibuthwa lya  Kristo. (Enz. 22:15-18) Neryo, omwa 33 E.K., Yesu mwabbandwa okwa kasinziro, ngoku kyalhaghulhawa. (Emib. 3:13-15) Hakine emyaka eyilhabire omu 1,000 ekindu ky’erighunzerera eky’okwa buminyereri obo, eribbanda omuthwe wa Sitani, imukyabererera. (Erib. 20:7-10) Kandi e Biblia yikabisulha bingyi ebihambire oko bikendi syabya obuyighu obuli ahakathi-kathi k’omughulhu mubi wa Sitani n’ekithunga kya Yehova bukahika okwa ngunzerero.

10. (a) Ni byahi eby’obuthuku obukasa ebikisiya ibyabya? (b) Thwanga thegheka thuthi obulengekania n’emithima yethu? (Lebaya omwatsi ahikwa.)

¹⁰ Thalengekania okwa bindu bino ebikendi syasuka-sukania ekihugho ebya Biblia yikalhaghulha. Eky’erimbere, ebihanda bikendi syaranga “obuholho n’eriyisyandira.” (1 Tes. 5:2, 3) “Neryo-neryo,” obulighe bunene bukendi syatsuka omughulhu ebihanda bikendi syabambira amadini wosi w’amabehi. (Erib. 17:16) Enyuma waho, ihanganasyabya ekindu ekithe kya buli kiro erilhangirika ‘ly’Omughalha w’omundu akasa oko bithu by’ekyanya n’obuthoki bunene n’olhukengerwa lhunene.’ (Mt. 24:30) Yesu akendi syatswera abandu, erighabulha esyombuli okwa syombene-hene. (Mt. 25:31-33, 46) Nomwabine, Sitani syendi syayitheka buyira. Omwa kinigha, akendi syahongererya ebihanda ebiyiyungire haghuma ebya Biblia yikahulhamo Gogi owe kihugho ekya Magogi eribambira abaramya ba Yehova ab’okwenene. (Eze. 38:2, 10, 11) Okwa buthuku bulebe, emisighalira y’abahakabibwa bakendi syahindanibwa haghuma elhubulha eriyiyunga oku Kristo n’amahe wiwe w’elhubulha erilhwa olhuhi lhwe Harmagedoni, engunzerero y’obulighe bunene. c (Mt. 24:31; Erib. 16:14, 16) Neryo erithabalha lya Kristo ery’emyaka Rukumi okwa kihugho iryatsuka.—Erib. 20:6.

11. Amaha w’engebe y’erikotha akakuhambako athi? (Lebaya n’ekisasani.)

¹¹ Lino lengekanaya buuli okwa buthuku obukasa. E Biblia yikabugha yithi Omuhangiki wethu ‘abirihira erikotha omo mithima yethu.’ (Omu. 3:11) Lengekanaya ekyo  nga kikakuhambako kithi n’obughuma bwawu na Yehova. Ekitabu Draw Close to Jehovah, olhupapura 319, kikathuhiramo erianzisibwa omw’ibugha kithi: “Enyuma w’eribyaho habw’ebikumi, esyongumi, esyomiliyoni, nibya n’esyobbiliyoni sy’emyaka, thukendisyongera eriminya bingyi ebihambire oku Yehova Nyamuhanga kwilhaba lino. Aliwe thukendi syabya ithukinayowa thuthi hakine ebibuya bingyi kutsibu ebya thutholere ithw’igha. . . . Nibya sithwangathoka erithera akasasani engebe y’erikotha nga yikendi syatsemesya bungahi. Kandi ibbwa ekikatsemesaya kutsibu, mughulhu wosi thukendi syabya ithunemuyithunda hakuhi na Yehova.” Ebyo bine aho, thunemulholha embere erigha Ekinywe kya Nyamuhanga, ni bindi byahi ebya thwangaminya ndeke?

12. Thwanga samalira thuthi endatha omwa lhubulha? Iha eky’erileberyako.

¹² Ekinywe kya Nyamuhanga kyabirithathukangania bike ebihambire okw’ibyaho lya Yehova “endatha.” (Isa. 33:5) E Biblia yikabisulha ebindu ebikaswekaya ebihambire oku Yehova n’ekitsweka ky’okwa kithunga kiwe ky’elhubulha. (Isa. 6:1-4; Dan. 7:9, 10; Erib. 4:1-6) Ngahathya, thwangana soma okwa bindu ebikaswekaya ebya Ezekieli alhangira omughulhu ‘olhubulha lhwakingukalha, mwalhangira esyonzoli sya Nyamuhanga.’—Eze. 1:1.

13. Ni byahi ebya wukasima ebihambire okwa lhukwamirwa lhwa Yesu omwa lhubulha, ngoku kisoborerwe omwa Abaebrania 4:14-16?

¹³ Kandi lengekanaya okwa lhukwamirwa lhwa Yesu omwa lhubulha ng’Omwami wethu oyunemuthabalha kandi Omuhereri Mukulhu oyukakwira abandu b’obulighe. Erilhabira omw’iyo, thwanganahika okwa “kithumbi ky’obwami kya Nyamuhanga, ahali olhukogho” omwa musabe n’erisaba obughanyiri n’obuwathikya “oko mughulhu w’obwagha” kutse owatholere. (Soma Abaebrania 4:14-16.) Ambi isithwalhabaya ekiro na kighuma isithuthaghanirya  okwa ebyo Yehova na Yesu babirithukolera n’ebya banemuthukolera ibane elhubulha. Olhwanzo olhwa bathuwithire lhutholere ilhwahamba okwa mithima yethu kwa kutsibu kandi ilhwaleka ithwabya n’omuhwa omwa mubiiri wethu n’omw’iramya.—2 Kor. 5:14, 15.

14. Ni kindu kyahi kighuma eky’okwa bindu ebyuwene kutsibu ekya thwanga kolha erikangania nga thukasima bungahi Yehova na Yesu? (Lebaya n’ebisasani.)

¹⁴ Enguma y’okwa syonzira esyuwene esya thukakanganirayamo nga thukasima bungahi Nyamuhanga wethu na Mughalha wiwe ly’erilengaho eriwathikya abangyi eribya Bema ba Yehova n’eribya bigha ba Yesu. (Mt. 28:19, 20) Eki kya Paulo akolha erikangania kw’akasima Nyamuhanga na Kristo. Abya inianasi ngoku erisonda lya Yehova liri lithi “anzire abandu abosi balhamibawe, n’eriminya ndeke omwatsi w’ekwenene.” (1 Tim. 2:3, 4) Mwakolha kutsibu omw’ithulira liwe eriwathikya abangyi ngoku angathoka nuku ‘omo syonzira syosi asunge abandu ba kubo.’—1 Kor. 9:22, 23.

15. Ngoku kiri omwa Esyonyimbo 1:2, ni kyahi ekikendi thutsemesya?

¹⁵ Omwa nzira eyitholere, omuhandiki w’esyonyimbo mwasoborera athi omundu oyutsemire, kandi oyukathoka, y’omundu oyo “emighambo y’Omwami Mukulhu ni butseme bwiwe” kandi “ak’igha emighambo yiwe omo musibo n’omo kiro.” (Esy. 1:1-3) Akakania okw’isako eri omwa kitabu Studies in the Psalms, omuhinduli we Biblia Joseph Rotherham, mwabugha athi omundu atholere “iniatsemera obusondoli bwa Nyamuhanga, iniabusondekania, iniabw’igha, n’eribera eribulengekaniako.” Akongerako athi omusomi we Biblia “amalhabya ekiro isyathasomayo, ekiro ekyo ikikendibya ikyamakwira bbule.” Wangana tsemera eriyeghesya e Biblia omw’iyirisya ebyosi eby’obughuli ebirimo ngoku wangathoka n’erilhangira nga bihambene bithi. Ka ni ky’obutseme eriminya ndeke obuli sonda y’Ekinywe kya Nyamuhanga!

16. Thukendi syakania okuki omo mwatsi owakakwamako?

¹⁶ Ekwenene mbuyanga eya Yehova akathukangiriraya omwa Kinywe kiwe siyikalire eriyitheghererya. Omo mwatsi owakakwamako, thukendi syakania okwa nguma y’okwa kwenene y’omwakathi—ehekalu nene ya Yehova ey’obunyakirimu, eyo Paulo akanayako omwa baruha yiwe okw’Abakristayo Abaebrania. Ambi eriminya ndeke mwatsi oyo iryakulethera etseme nene.