1-2. Ɔɔ nɛi sɔviɔɔ le diomndaŋ veeloo o Baabuiyo niŋ a ndu pɛɛkoo? Chɔmndɔ tamaseliiyo.

 Ŋ DIMIWƆ maa a cho kɛɛsiaa le chiɛiyo piondɔɔ. Yɛɛ ŋ cho yɛ tosa tuupa ma tosa kɛɛsiaa koŋ? Baa fotuei chiɛi koŋ tofaa wa pa letuu? Sako. O kpeekpei niŋ, a cho kindiŋ o nɛi o nɛi niŋ le ma kuɛ o chiɛi koŋ, ma kela leniŋ, ma luɛi o lumuila ndɔlaŋ niŋ, vɛlɛ ma tofa nyɛ o nyɛ nyɛkɛndɛi le halikpeŋ ma che maa ŋ cho wallo. Nduyɛ naapum, ma nyuna le yau nda tuuliaa chiɛi koŋ lechoo wo, le chɔɔ mɛɛ nda taŋgul ndu yɛ. A tonya, a yeema ma mɛɛndiaŋ chiɛi koŋ nyɛkɛndɛi, tuupa ma pendu ndu.

² Ŋ nɔ miŋ tosa nyɛ pilɛ koŋ kpe te ŋ wa pɛ diomndaŋ veeloo o Baabuiyo niŋ vɛlɛ a ndu pɛɛkoo. Mi wana pilɛ poonyiaa a Baabuiyo okɔɔ wo, tuu ndu a “chiɛi bɛndu bɛndu nda taŋgul o vilɛi vilɛi o chiiyii luɛi lɛŋ di ve choo wo.” Lelaŋ, vɛɛ naŋ tiu yɛ ba miŋ sina nyɛ o nyɛ cho o Baabuiyo niŋ? Te ŋ chue teleŋndo le diomndaŋ veeloo nyɛkɛndɛi le, “sɔɔŋ taseŋ nda pɛɛku waŋnda a Mɛlɛka okɔɔ woŋ” kinɛi naŋ cho sina ni. (Hibu. 5:12) Kɛ, mɛɛ waŋndo chua nuaa teleŋndo le luɛiyɔɔ o chiɛi bɛndu bɛndoo niŋ le ndu mɛɛndaŋndo yɛ, lende naa bɛɛ nɔ ni miŋ chua teleŋndo le Baabuiyo pɛɛkoo nyɛkɛndɛi, le chɔɔ sɔɔŋ yɛ yɛŋ cho leniŋndoŋ, le halikpeŋ miŋ bii ndu bila. Nɛi sɔvɛ sɔvɛ naŋ pɛɛku Baabuiyo wo cho kindiŋndo le chɔɔ mɛɛ sɔɔŋ yɛ yɛŋ cho leniŋndoŋ chɛlaŋ vellaa velle yɛ ni. Kindiŋ ko le tonyala ŋ laalaŋ ndaŋ biyɔɔ bila le, kɛ kindiŋ ma sina le sabu ŋ laalaŋ ndaŋ ndo.

3. Yɛɛ kiilanɔɔ Pɔɔl ndoo dɛɛniaa yɛ puaapiliaa a ndepiliaa nduaa le ma tosa, nduyɛ le yɛɛ? (Ɛfisiaŋnda 3:​14-19)

³ Le miŋ bii Diom Mɛlɛkaa bila nyɛkɛndɛi, ŋ nɔ miŋ pɛɛku  tonyala yiŋgoloŋnda cho leniŋndaŋ. Mi kiilanɔɔ Pɔɔl dɛɛniaa puaapiliaa a ndepiliaa nduaa le ma pɛɛku Diom Mɛlɛkaa nyɛkɛndɛi, le halikpeŋ ma “sina pɛŋgu mɛɛ kpɛ tonyaa toŋgu yɛ, mɛɛ o bandu yɛ, mɛɛ o hel lɛ, a mɛɛ o yiŋgila yɛ.” Hei wa nda mala mi laalaŋ ndaa ndoo “luɛi puundoŋ, nduyɛ mbo chal o chiyii kala kalɛi choo.” (Nuawɔ Ɛfisiaŋnda 3:​14-19.) Naa bɛɛ nɔ miŋ tosa nyɛ pilɛ koŋ kpe. Ŋ nɔ miŋ chua teleŋndo le Diom Mɛlɛkaa pɛɛkoo nyɛkɛndɛi, le halikpeŋ miŋ bii sɔɔŋ cho leniŋndoŋ bila.

4. Yɛɛ naŋ nɔ yɛ miŋ tosa le miŋ sɔɔŋguu Chɛhowa ikɛi kpɛɛluŋ? Chɔmndɔ tamaseliilaŋ.

⁴ Naa Kilisiɔŋnda, ŋ nɔ ko iyeema le tonyala taselaŋ pɛɛkoo o Baabuiyo niŋ te. A mala nyina diandaa Mɛlɛkaa, ŋ nɔ yeemɛi le miŋ pɛɛku “sɔɔŋ cho ŋ viaŋnaŋ a Mɛlɛka okɔɔ woŋ.” (1 Kɔliŋ. 2:​9, 10) Te o bɛnda pɛ, a tosa yaasiaa yiŋgoloŋndo a sɔɔŋ ŋpum okɔɔ, le halikpeŋ ma sɔɔŋguu Chɛhowa ikɛi kpɛɛluŋ. Le tamaseliiyo, naapum a yaasiaa a mɛɛ o chɔm buɛiyaa nduaa o paandoo niŋ kaalaa yɛ okɔɔ, vɛlɛ a mɛɛ o kaala num yɛ. A yaasiaa vɛlɛ a kɛɛsiaa o tosa le mi Isɔluɛiya piɛi ndu wo okɔɔ, vɛlɛ a mɛɛ kɛɛsiaa koŋ velaŋ a kunda leKilisiɔŋndo hau yɛ. Ɔɔ naapum a tosa yaasiaa a huuluŋ Chiisu peelu teleŋ o wa o chieeŋndo choo, nduyɛ mbo wa wali pollo tosaa wo.

5. Baa nyɛ cho num pa o kɔl o ŋ yeema ma tosa pɛɛku yiŋgoloŋndo a ndu okɔɔ wo?

⁵ Ma nyuna wanaa chua teleŋndo le Baabuiyo pɛɛkoo wa, le ma chɔm sɔɔŋ yiŋgoloŋ nda yeema ma saaluŋ leniŋndoŋ. Sɔɔŋ nda dimi woŋ cho o kɔfoo hoo niŋ, “ Sɔɔŋ Lebolloŋ le Pɛɛkɔŋ Ipilayaa Tosaa.” A mala yauwo hoo, Watch Tower Publications Index ɔɔ Yau Yaasiaa Ŋsɔɔ le Seiyaa Chɛhowaa, a tiuba ma wa a kɔl kɛndɛ tau le sɔɔŋ muŋ pɛɛkoo. Yaasiaa yiŋgoloŋndo tosaa o Baabuiyo niŋ tiuba mbo kindi laalaŋ numndo poŋ, nduyɛ ma “sina vɛlɛ a ndu Mɛlɛka okɔɔ.” (Pulɔ. 2:​4, 5) Ŋ tofaŋndɔ niko tonyala yiŋgoloŋndaŋ latiŋ o Baabuiyo niŋ, la naŋ tiuba miŋ pɛɛku nyɛkɛndɛi a laŋ okɔɔ laŋ.

6. (a) Chɔmndɔ le sabu Chɛhowa sɔla batiuwaa teleŋ o teleŋndo. (b) Le yɛɛ naŋ dimi yɛ maa paandu pa Chɛhowa kɛɛsiaa tuu o nɔ le waŋnda chieeya vɛlɛ a lɛŋndeŋ ndo ni? (Ɛfisiaŋnda 3:11)

⁶ Ŋ tofaŋndɔ nyɛ Baabuiyo dimi a tuu Mɛlɛkaa okɔɔ wo. O cho maa ŋwaŋndachiee le. Le tamaseliiyo, te waŋndo yeema pɛ le kɔlaŋ inɛ, kɛ mi nɛi o chua le kɔlaŋ o fondaŋ koŋ ndo wa o kindaa, naapum mi keŋ tosa o fuuluu loŋ te. O baa pilɔɔ choo, Chɛhowa chii niŋ tuu nyɛ o nɔ le tosaa wo. Lelaŋ, o yɔŋ bɛɛ mi nyɛ cheleŋ yɔŋnuŋ, mbo tosa kɛɛsiaala cheleŋ le mi tuu ndɔ koŋ peeluŋ. O kpeekpei niŋ, ŋ cho bɔɔ a kɔl kɛndɛ kanifuule, Chɛhowa chɔm naa nyɛ o kɛɛsiaa paandu pa le tosaa wo o Baabuiyo niŋ. (Ɛfi. 3:11) Teleŋ o teleŋ, mbo soliŋ nɛila cheleŋ kpeku le halikpeŋ mbo sɔla batiuwaa kanifuule, ‘nyɛ o nyɛ o tosa, le sabu ndɔɔ peeloo o tosa ndu ni.’ (Pulɔ. 16:4) Nduyɛ mi sɔɔŋ o tosa woŋ wa lefafɛɛŋ. Tuu kuɛɛ Chɛhowa nɔ yɛ, nduyɛ yɛlɛmiaala kuɛɛ o tosa yɛ niŋ le tuu ndɔɔ peeloo?

7. Mɛɛ Adam nda Ifi tosa nilakalulaŋ, yɛɛ Chɛhowa tosa yɛ le tuu ndɔɔ peeloo? (Maatiu 25:34)

⁷ Mi Mɛlɛka dimul wanaa tasiaa o toosiaa wa a sabu ndoo nɔ le nda wo okɔɔ. Mbo dimul nda maa, a ‘violu chuauwa, ma kui, nduyɛ ma pɛ cha o lɛŋndeŋ choo, vɛlɛ mi . . . nyaa yoomaa kɛ kɛ o lɛŋndeŋ choo wa nda o ba bɛngu.’ (Chɛ. 1:28) Mɛɛ Adam nda Ifi tosal ndu nilakalulaŋ, mi hakioo huŋ le ŋwaŋndachiee kpou. Kɛ tuu ndɔɔ siŋgaŋ te. Mbo siŋga mɛɛ o wa ndu peelu yɛ. Haupa, mbo kɛɛsiaa le Masaleŋ kilaa o choo choo niŋ, le mi tuu tase ndoo nɔ le waŋnda chieeya, a le lɛŋndeŋ ndo peeluŋ. (Nuawɔ Maatiu 25:34.) Mɛɛ teleŋ bɛnda ndu o hɔllo fuuluu, mbo yɔŋ Po ndɔ kaalaa o lɛŋndeŋ choo le mbo huŋ pɛɛku waŋnda a Masale ndɔleŋ okɔɔ, vɛlɛ mbo yɔŋgu yoomu ndɔɔ le naa baŋaa o chɛle hakioo a piɔmndo niŋ. Okoŋ kɔɔli, mi Chɛhowa miŋgi Chiisu yoomu le mbo kɔ wa Masaa le Masale ndɔleŋ o choo choo niŋ. Kɛ sɔɔŋ cheleŋ cho tau ŋ naŋ nɔ miŋ yiyaŋ a tuu Mɛlɛkaa okɔɔ woŋ.

8. (a) Ɔɔ Yooŋgu kpeekpei cho o Baabuiyo niŋndo? (b) A mɛɛ Ɛfisiaŋnda 1:​8-11 dimi yɛ, tuu cheleŋ kuɛɛ Chɛhowa nɔ yɛ? (Tofa fotueiyo o kɔɔ.)

⁸ Yooŋgu kpeekpei cho o Baabuiyo niŋndo cho ni maa, Chɛhowa cho diola ndɔlaŋ dindi, teleŋ o cho tuu ndɔɔ peelu le lɛŋndeŋ ndo, sanaa a Masale Kiliti cho wa Masaa le leŋ ndo. Kposoŋ bɛɛ tuu Chɛhowaa singaŋ te. O mɛi lediom maa nyɛ o nyɛ cho yɔŋnɔŋ mɛɛ o dimi yɛ. (Aisaya 46:​10, 11; Hibu. 6:​17, 18) Te teleŋ tiŋ hiou pɛ, lɛŋndeŋ le cho simnɔŋ kpele hɛnɛkiɔɔ, nduyɛ chuauwaa mamaa Adam nda Ifi wa cho simnɔŋ walaŋ vɛlɛ ma “wa a kɔl kɛndɛ le fɛɛŋ a fɛɛŋ.” (Sam 22:26) Kɛ Chɛhowa nɔ vɛlɛ tuu kɛndɛ cheleŋ. O tuu le mi maalikɛiya a wanaa cho ndu piɛiyo o lɛŋndeŋ choo wa wa o diompilɔɔ niŋ. A teleŋ koŋ, wana o wana cho Kpuluŋgumayɛi nduɛi toolu, nduyɛ ma chɔm ndu lo lechoo wo. (Nuawɔ Ɛfisiaŋnda 1:​8-11.) Baa a cho a kɔl kɛndɛ le mɛɛ Chɛhowa cho nɛi sɔviɔɔ hoo soliŋndo kpeku le tuu ndɔɔ peeloo yɛ le?

9. Yɛɛ Baabuiyo chɔm yɛ naa a chilaŋ okɔɔ?

⁹ Ŋ tofaŋndɔ huului Chɛhowa dimi o kpeloo Idɛŋ niŋ, mi i wa o Chɛnɛsee 3:15 niŋnde. b Mi huuluei hei chɔm sɔɔŋ wa tosaŋ le tuu Chɛhowaa peeloo woŋ. Kɛ wɔsilaŋ la wa fɛŋ hiouwɔɔ o waalaŋ niŋ malaŋ ndoo peeluŋ. Sɔɔŋ muŋ ipilɛ cho ni maa, Ebilaham ndoo nɔ mbo velu chuauwa. Nduyɛ o pulale ndɔleŋ choo Kiliti wa violɔŋ ni. (Chɛ. 22:​15-18) Okoŋ kɔɔli, a wɔsi 33 Boondii Chiisu Ve, mi kɛuwo lɔwa  Chiisu tɔɔndii kɔɔliei. (Walta. 3:​13-15) Nyɛ mɛɛlaa dimiŋ o huului keŋ niŋ le Setana bolleŋ piɔlɔɔ wo, cho peeluŋ o chilaŋ niŋ te wɔsila 1,000 laŋ la chuu pɛ. (Sɔɔŋ. 20:​7-10) Nduyɛ Baabuiyo chɔɔlu naa tɛɛsial a nyɛ yɔŋnuŋ niŋndo okɔɔ, te yaamɔɔle cho chieeŋ Setanaa tɛɛŋ a kɔɔna Chɛhowaa wo huŋ mɛɛlu pɛ.

10. (a) Sɔɔŋ kuɛɛ cho yɛ suŋ hunɔɔ yɔŋnɔŋ mi Baabuiyo suaa a muŋ okɔɔ? (b) Vɛɛ naŋ bɛɛndiaa yɛ yiyaŋnda naalaŋ a kɔlta naalaŋ? (Tofa tɛɛsiaa amatou.)

¹⁰ Yiyaŋndɔ a mɛɛ sɔɔŋ Baabuiyo soo muŋ okɔɔ woŋ yɔŋnuŋ niŋ yɛ. I tasei, waŋnda cho wa dimioo aa, “Kɔl nyuloo cho niŋ ba o ba fee. Mbɔ wana yɔŋnuŋ niŋ isiooŋ fuu!” (1 Tɛsa. 5:​2, 3) Nduyɛ “nyɛpalaa bɛndoo” cho kandɔŋ o lepilɛ niŋ kpe, te lɛŋnde chiŋalaŋ pɛ piɛiyii lachoowɛi kpou. (Sɔɔŋ. 17:16) Okoŋ kɔɔli, naapum tamasilaŋ la cho chɔmnɔŋ “le sinaa maa Po wana pɔnɔɔ chɛŋ hunɔɔ, . . . o yumbu yumboo niŋ o choo choo niŋ a kpaayaa vɛlɛ a naŋɔɔ bɛndoo.” (Maa. 24:30) Chiisu cho hunɔɔ waŋnda chieeya kɔɔsa, mbo soli saa chuiŋnda tɛɛŋ. (Maa. 25:​31-33, 46) A teleŋ koŋ, Setana cho wa kindiŋndo kpeekpei le Chɛhowa simullo. Nduyɛ le mɛɛ o tul wanaa Chɛhowaa yɛleŋ yɛ, o cho lɛŋii chuuŋgiaŋ diompilɛ mi Baabuiyo veelu ndi aa Kɔɔki o lɛŋnde Makɔɔki leŋ niŋnde nyindɔɔ, le wanaa Mɛlɛkaa chiŋalaŋndo. (Isi. 38:​2, 10, 11) Te teleŋ tiŋ hiou pɛ, Kilisiɔŋaa pɔyaŋaa cho wɔ wa o chieeŋndo choo wa cho lakɔ choo choo, le ma wa a Kiliti vɛlɛ a puaa kpaayaa bɛnduaa o choo choo niŋ le chɔu Amakɛdɔŋndo. Nyɛ mɛɛlaa yɔŋnuŋ niŋ a teleŋ nyɛpalaa bɛndoo wo cho koŋ ni. c (Maa. 24:31; Sɔɔŋ. 16:​14, 16) Okoŋ kɔɔli, Chiisu cho kandɔɔ Masaleŋ o lɛŋndeŋ choo le wɔsilaŋ 1,000.—Sɔɔŋ. 20:6.

11. Yɛɛ tiindaŋ naŋ nɔ le waa yoomu lefafɛɛŋ ndo sim yɛ le num? (Tofa vɛlɛ fotueiyo.)

¹¹ Kindiŋ ma yiyaŋ a nyɛ yɔŋnuŋ niŋ o chilaŋ niŋndo okɔɔ, te wɔsila waa pilɛlaŋ la chuu pɛ. Baabuiyo dimi maa, mi Wana Naa Toosiaa ‘duau naa o lakɔl, le waa yoomu lefafɛɛŋ.’ (Ikili. 3:11) Yiyaŋndɔ a nyɛ keŋ sim le num vɛlɛ a chaŋyɛi numnde a Chɛhowa wo okɔɔ. Mi yauwo hoo, Draw Close to Jehovah, (Sɔɔŋguu Chɛhowa Ikɛi Kpɛɛluŋ) peele 319 leŋ le  dimi suɛi kɛndɛ kɛndɛi a hei okɔɔ aa: “Te ŋ chii pɛ wɔsilaŋ o kɛmɛlaŋ niŋ, o waalaŋ niŋ, o miiliɔŋndaŋ niŋ, a o biiliɔŋndaŋ niŋ, ŋ cho sina tau a Chɛhowa okɔɔ, mbo hiou mɛɛ naŋ sina a ndu okɔɔ suŋ suŋ yɛ. A koŋ kpou, ŋ cho wa chɔɔ teleŋ o teleŋ maa, sɔɔŋ cho tau ŋ naŋ nɔ miŋ pɛɛku a ndu okɔɔ woŋ. . . . Kposoŋ bɛɛ ŋ tiuba miŋ chii yiyaŋ a sɔɔŋ kɛndɛŋ wa niŋ o chieeŋ sɛnɛiyo niŋndoŋ okɔɔ kpou le. I hiou kpou ve, teleŋ o teleŋ, ŋ cho wa Chɛhowa sɔɔŋguuwo ikɛi kpɛɛluŋ.” Kɛ haaa mi teleŋ koŋ fuuluu, te ŋ wa pɛ hiouwɔɔ lachi a Diom Mɛlɛkaa pɛɛkoo nyɛkɛndɛi, yɛɛ cheleŋ naŋ cho yɛ saalɔŋ?

12. Yɛɛ mala yɛ naa miŋ che nyɛ cho yɔŋnɔŋndo o choo choo niŋndo? Chɔmndɔ tamaseliiyo.

¹² Diom Mɛlɛkaa chɔm naa nyɛɛmbɔ a mɛɛ sɔɔŋ cho yɔŋnɔŋndo o “choo choo” niŋ yɛ okɔɔ. (Aisaya 33:5) O chɔm naa vɛlɛ sɔɔŋ kɔndɔfilloŋ a Chɛhowa vɛlɛ a kumbui kɔɔna ndɔ cho o choo choo niŋndo okɔɔ. (Aisaya 6:​1-4; Daan. 7:​9, 10; Sɔɔŋ. 4:​1-6) Le tamaseliiyo, ŋ tiuba miŋ veelu diomndaŋ a sɔɔŋ kɔndɔfiliŋ Isikiaa che woŋ okɔɔ. Mbo cha mi ‘halaa kumbiŋ, nduyɛ mi Chɛhowa chɔm ndu yilaŋndoŋ.’—Isi. 1:​1-3.

13. A mɛɛ Hibuluiya 4:​14-16 tɛɛsiaa yɛ, yɛɛ pilaŋ yɛ num kɔllo a foofo Chiisu nɔ o choo choo niŋndo okɔɔ?

¹³ Yiyaŋndɔ a foofo sɔvɛ Chiisu nɔ o choo choo niŋndo okɔɔ. Ndu cho Masa naa ni, nduyɛ ndu cho vɛlɛ Wana Bɛndu Wanaa Soliaa Lasala tuiinuŋ naa inyiɛɛyo ni. O ndu niŋ naŋ “sɔɔŋguu kpeŋgbei Mɛlɛka tosal waŋnda kɛndɛiyo ikɛi” ni, sanaa a piɛileŋ le mbo tuiinuŋ naa inyiɛɛ, vɛlɛ mbo mala naa “a teleŋ bɛnda wo.” (Nuawɔ Hibuluiya 4:​14-16.) Lepaa o lepaa, maa ŋ waŋnuŋ yiyaŋndo a nyɛ Chɛhowa nda Chiisu tosa le naa wo, vɛlɛ a nyɛ nda cho tosaa suŋ suŋ le naa o choo choo niŋndo. Maa  kaala nda nɔ le naa wo pilaŋ naa kɔllo, vɛlɛ mbo nyindu naa le miŋ nɔ dialuŋ fulaŋ o wali nda ke naa wo niŋ, nduyɛ miŋ piɛi Chɛhowa a kɔllo kpou.—2 Kɔliŋ. 5:​14, 15.

14. Ɔɔ nɛi sɔviɔɔ opilɛ o naŋ chɔm balika melaa le Chɛhowa nda Chiisu wo? (Tofa vɛlɛ fotueilaŋ.)

¹⁴ Nɛi sɔviɔɔ opilɛ o naŋ chɔm balika melaa le Mɛlɛka nda Po ndɔɔ wo cho kindiŋndo o nɛi o nɛi niŋ, le acheleŋnda malaa ma simnuŋ Seiyaa Chɛhowaa, vɛlɛ a buɛiyaa Chiisuaa ni. (Maa. 28:​19, 20) Nyɛ waa nuaa kiilanɔɔ Pɔɔl tosa ni. Mbo chɔm balika melaa le Mɛlɛka nda Chiisu. Ndoo sina maa, hɛnaŋ Mɛlɛkaa cho ni, le “mi waŋnda kpou sina kɔl kalu kpeekpei cho a tonyaa okɔɔ wo, nduyɛ ma sɔla pioŋɔɔ.” (1 Timo. 2:​3, 4) Mbo tosa wallo kalaŋ o yooŋgu kɛndɔɔ dimioo niŋ, le halikpeŋ mbo mala apum “ma sɔla pioŋɔɔ.”—1 Kɔliŋ. 9:​22, 23.

15. A mɛɛ Sam 1:2 dimi yɛ, yɛɛ naŋ nɔ yɛ miŋ tosa le miŋ wa a kɔl kɛndɛ?

¹⁵ Mi wana poonyiaa Sam bolleŋ lepilɛ wo tɛɛsiaa maa, kɔl kɛndɔɔ cho le wanaa ‘hɛnaŋ pɛɛkula Chɛhowalaŋ chuaa,’ nduyɛ ma ‘yiyaŋ lechoo idii a ichɔl’ la. (Sam 1:​1-3) Mi wana hiviaa Baabui pilɛ diolaŋ Choosɛ Lotɛham, poonyiaa a bolle Baabuileŋ ndeŋ okɔɔ o yau ndɔ pilɛ niŋ maa, “wana veelu diomndaŋ o Baabuiyo niŋndo nɔ mbo hɛnaŋ a sɔɔŋ cho leniŋndoŋ, mbo yaasiaa muŋ, mbo pɛɛku muŋ, nduyɛ mbo chua teleŋndo tau le yiyaŋndo a muŋ okɔɔ.” Mbo chɔɔlu dimi maa, te waŋndo “niilu pɛ kpɛŋ mbo veelu diomndaŋ o Baabuiyo niŋ te, mɛɛ o tɛɛmbuu paaleleŋ fondo fuu.” A tiuba ma tuei Baabuiyo pɛɛkoo yeela, te a chua pɛ teleŋndo le yaasiaa tosaa a sɔɔŋ cho leniŋndoŋ okɔɔ, vɛlɛ ma che mɛɛ ŋ chiɛɛliaŋ vellaa velle yɛ. A tonya, ŋ cho wa a kɔl kɛndɛ tau te ŋ chua pɛ teleŋndo le Diom Mɛlɛkaa pɛɛkoo nyɛkɛndɛi.

16. Yɛɛ naŋ cho yɛ pɛɛku o buŋgɛi cho lachi ve niŋ?

¹⁶ Tonyala sɔvɛla Chɛhowa pɛɛku naa o Diom ndɔɔ niŋndaŋ la kindu bila biyɔɔ tau le. O buŋgɛi cho lachi ve niŋ, ŋ cho pɛɛku a tonyalaŋ ndaŋ opilɛ okɔɔ. Ndu cho ni, chiɛi bɛndu Mɛlɛka wana chi a lehɔl te wo. Mi Pɔɔl suaa a chiɛiyo hoo okɔɔ o yau o poonyial Hibuluiya wo niŋ. Maa pɛɛkoo a chiɛiyo hoo okɔɔ tosa ma wa a kɔl kɛndɛ fɔ!