1-2. Nkedi musinke zongwa zokuresa nokulironga Bibeli? Gava sihonena.

 GAZARA tupu asi ove kuna kutokora nsene asi kuvhura o rande embo. Yisinke ono hara kumona komeho o ture po etokoro? Ove kuna hara tupu kumona efano lyembo omu a li moneka komeho ndi? Tuna si huguvara asi ove no hara kuza yipo o ka mone nzugo ozo, yipo o ka tare omu za fana ponze nokuhwilira monda o ka tarurure nawa nonkondwa damo ntani nokukatara nayinye eyi yahamena konzugo ozo. Yosili, ove ngo hara kutarurura nawa-nawa nkenye mauzera gembo olyo ono hara kuranda.

² Ose kuvhura kurugana yokulifana apa atu resa nokulironga Bibeli. Mulirongi gumwe goBibeli kwa uyunga asi “Bibeli kwa fana ngwendi etungo lyenene lyere ntani eli va tungira petateko eli lyaza konhiinhi. Nye ngapi omu natu diva nawa-nawa eyi ya kara moBibeli? Nsene o genderera kuziresa, ove kuvhura ngo lironge tupu ‘yininke yokuhova eyi wa lirongere moNonkango daKarunga.’ (Heb. 5:12) Nye ngwendi moomu tupu wa hepa kuza monda zonzugo, yipo o ka dive yininke yoyinzi kuhamena nzugo ozo, ove wa hepa kulironga Bibeli yipo o zi kwate nawa egano momunene. Nkedi zongwa po omu no vhura kulironga Bibeli, kuna kara pokudimburura omu yininke eyi za uyunga Bibeli moruha rongandi, ya likwatakana noyininke yimwe yapeke. Hetekera ko kukwata egano mausili aga wa pura, ntani hetekera ko hena kukwata egano konda zeyi wa ga pulira.

3. Yisinke ga tumangedere mupositoli Paurusa Vakriste vakwawo va rugane ntani morwasinke? (Vaefeso 3:​14-19)

³ Pwa kara yininke yimwe eyi twa hepa kulironga momunene mokuninka asi tu kwate egano mauzera gomoNonkango daKarunga.  Mupositoli Paurusa kwa korangedere vapuli vakwawo va lironge unene Nonkango daKarunga yipo va “vhure kukwata nawa-nawa egano unene noure nomusika ntani nontjima-ntjima zoyininke yokuhamena kousili” yipo va vhure ‘kusimbama nokukora’ mepuro. (Resa Vaefeso 3:​14-19.) Nose twa hepa kurugana yokulifana. Tu zeni tu ka tare omu natu vhura kulironga nawa Nonkango daKarunga, yipo tu vhure kukwata egano momunene eyi adi tanta.

4. Yisinke natu rugana yipo tuhedere unene pepi Jehova? Gava yihonena.

⁴ NgoVakriste, ayo kapi tupu ya tu gwanena po kukwata egano marongo gokuhova gomoBibeli. Nevatero lyompepo zokupongoka zaKarunga, ose tuna hara kulironga “nampili magazaro gaKarunga gokonhiinhi.” (1 Kol. 2:​9, 10) Ove kuvhura o rugane epaparo lyenene nositambo sokukuhedesera pepi naJehova. Pasihonena, ove kuvhura o rugane epaparo kuhamena omu Jehova ga likidire eharo kovakareli vendi ava va parukire mosiruwo sanare ntani nomu yininke oyo ayi likida asi ga ku hara. Ove kuvhura hena o lironge kuhamena omu Jehova ga harerere Vaisraeli va mu karere ntani nokuyihetakanesa nomu ana tu harere tu mu karere ngesi. Ndi nampo kuvhura o lironge momunene kuhamena mauporofete aga ga sikisire mo Jesus ntani nosirugana sendi apa gaya kere pevhu.

5. Kosili sirongwa ono hara kulironga momunene ndi?

⁵ Vamwe ava va hara kurugana epaparo lyenene, kwa tumbwire yininke yongandi eyi va here kulironga momunene moNonkango daKarunga. Yininke yimwe eyi va uyungire, kuvhura kuyigwana mokakende “ Yirongwa eyi no lironga pelirongo lyanyamoge lyoBibeli.” Ove kuvhura kugwana ruhafo rorunene pokulironga yirongwa yangoso pokuruganesa Watch Tower Publications Index ndi Buke zepaparo zoNombangi daJehova. Kulironga Bibeli momunene kuvhura kunkondopeka epuro lyoge ntani kuvhura kukuvatera “ngo ragope mokulironga yokuhamena kwaKarunga.” (Yis. 2:​4, 5) Ngesi tu zeni tu ka zogere mausili gamwe gomoBibeli gokonhiinhi, aga twa hepa kulironga momunene.

6. (a) Gava sihonena sina kulikida eyi sitambo saJehova asi sikire mo nkenye apa. (b) Morwasinke natu uyungira asi sitambo saJehova kovantu nekevhu “sanarunye”?

⁶ Pasihonena, tu zeni tu ka tarurure eyi azi uyunga Bibeli kuhamena sitambo saKarunga. Jehova kapi ga fana ngwendi vantu ava ava horowora nzira zongandi ezi nava vhura kuruganesa ezi nazi va twara kevango eli vana hara kuza. Nye nsene asi yuma yongandi yi kondera nzira ozo, awo kuvhura va dire kukasika kevango eli vana hara kuza. Mokulisiga, sitambo saJehova kwa fana ngwendi evango olyo. Age ga tokora nare oku ana kuza nawa-nawa. Nye age kuvhura kuruganesa nonzira dokulisiga-siga yipo a ka sike kevango olyo. Ayo kuhafesa kweyi Jehova ga horowora nakauke-nakauke ‘sitambo sendi sanarunye’ moBibeli. Jehova kuvhura kuruganesa nonkedi dokulisiga-siga yipo a sikisemo sitambo sendi. Ntani age kumutompoka nkenye apa morwa nkenye esi ga rugana “sa kara nositambo saso.” (Yis. 16:4) Ntani yitundwamo yoyininke eyi a rugana Jehova, ngayi karerera narunye nanarunye. Sitambo musinke ga kara naso Jehova ntani malitjindjo musinke ga tura po moku si sikisa mo?

7. Ngapi omu Jehova ga tjindjire monkedi omu nga sikisa mo sitambo sendi konyima zapa vantu wokuhova va zonene? (Mateusa 25:34)

⁷ Karunga kwa tanterere vantu wokuhova kuhamena sitambo sendi kwawo. Age kwava tanterere asi ‘livhareni mu livhukise nokuzwida evhu, ntani nokupangera yinamwenyo nayinye eyi ya kara pevhu.’ (Gen. 1:28) Apa Adamu naEva va rwanesere Jehova, awo kwa ninkisire nzo zi kundame epata lyovantu, nye eyi kapi ya hagekesere Jehova mokusikisa mo sitambo sendi. Age kwa rundurwire monkedi omu navhura kusisikisa mo. Konyima tupu zapa va mu rwanesere, Jehova kwa tokomenene kutulisa po Uhompa meguru ou ngau ya sikisa mo sitambo sendi sene-sene kovantu ntani kevhu. (Resa Mateusa 25:34.) Jehova kwa tumine Mbeli zendi pevhu posiruwo esi ga tulire po, yipo a ya ronge vantu kuhamena Uhompa ntani nokuyagava eparu lyendi yipo a ya tu zowore kononzo nokonomfa. Makura Jesus yipo va mu vhumbwire a tengure meguru, yipo a ka pangere ngaHompa goUhompa waKarunga. Nye yininke yinzi yokuvhura kulironga kuhamena sitambo saKarunga.

8. (a) Kupi za demenena Bibeli? (b) Kuliza noVaefeso 1:​8-11, yisinke hena ngaka sikisa mo Jehova? (Tara efano lyopontunda.)

⁸ Sitambo sosinene po soBibeli kuna kara asi edina lyaJehova ngava li hungameke, ngomu nga sikisa mo sitambo sendi kevhu kupitira moUhompa wendi ou ana kupangera Kristusa. Sitambo saJehova kapi nga si litjindja. Age kwa tumbwidira asi nayinye ngayi horoka kuliza nomu gayi uyunga. (Jes. 46:​10, 11; Heb. 6:​17, 18) Ntaantani tupu evhu ngali kare paradisa, omu ruvharo rwaEva naAdamu ngaru ka sikilira mo ntani ngaru ka hungama, nokukahafera eparu “narunye-narunye.” (Epis. 22:26) Nye eyi kapisi yiyo yelike tupu nga sikisa mo Jehova. Sitambo sendi sokuhulilira kuna kara sokukaninka yisitwa yendi nayinye yemeguru neyi yepevhu yi ka kare mouumwe, makura vantu navenye ngava ka limburukwe Jehova ngomupangeli gwawo. (Resa Vaefeso 1:​8-11.) Ngoso ayo kapi yina kukutetukisa monkedi omu Jehova a sikisa mo sitambo sendi ndi?

9. Yininke musinke yokomeho ngatu diva nsene tu resa Bibeli?

⁹ Tuzogereni kuhamena uporofete ou ga uyungire Jehova mosikunino saEdeni ou va tjanga mwaGenesis 3:15. b Awo kwa tembe koyihorokwa eyi ngayi vhura kusikisamo sitambo sendi.  Nye nampili ngoso, yihorokwa oyo kwaya horokere konyima zonomvhura Eyovi. Pasihonena, Karunga kwa tanterere Abirahamu asi konyima zomaruvharo gomanzi, ruvharo rwendi rumwe ngaru ya kara Kristusa. (Gen. 22:​15-18) Ano momvhura 33mosiruwo sovapositoli, Jesus kwa mu remekere kosinsinsina sendi ngwendi moomu tupu va yi pumbire. Sihorokwa sokuhulilira souporofete ou kuna kara asi ruvharo ngaru myona mutwe gwaSatana. Eyi ngayi ka horoka komeho ure wonomvhura dokupitakana po-1 000. (Ehor. 20:​7-10) Ntani Bibeli kulikida yoyinzi kuhamena eyi ngayi vhura kuhoroka ngomu unkore ou wakara pokatji kouzuni waSatana ntani nombunga zaJehova, ngau sika kehagero.

10. (a) Yihorokwa musinke yokomeho yina kara pepi? (b) Ngapi omu natu wapaika nondunge detu nonomutjima detu? (Tara nonkango dokonhi.)

¹⁰ Gazadara ko koyihorokwa eyi yina kukwama ko yokutukukisa eyi za pumba Bibeli. Pomuhowo nomuhoko ngadi divisa asi: “Mbili nompora!” (1 Tes. 5:​2, 3) Makura udigu wounene ngau tameka “poopo” ngoso apa nomuhoko ngadi homokera maukarelikarunga nagenye goyipempa. (Ehor. 17:16) Konyima zoyo, makura “MunwaMuntu ngava mu mona, age ta wiza pomaremo geguru nononkondo dendi nouyerere wendi.” (Mat. 24:30) Jesus nga pangura vantu pokuhangura nonzwi koyikombo. (Mat. 25:​31-33, 46) Nye posiruwo oso, Satana nga twikira kurwanesa Jehova. Mokumona asi age kwa nyenga unene vantu vaJehova, age nga ninkisa yirongo eyi azi tumbura Bibeli asi Gogo zaMagogo yipo yi homokere vakareli vaJehova. (Hes. 38:​2, 10, 11) Posiruwo soudigu wounene komeho tupu zaHarumagedoni, vagwavekwa ava vana kara simpe pevhu ngava va pongaika yipo va ze meguru va ka lipakerere naKristusa ntani kumwe novakwayita vendi vemeguru va ya rwe yita yaHarumagedoni, ruha rokuhulilira roudigu wounene. c (Mat. 24:31; Ehor. 16:​14, 16) Makura noMvhura Eyovi dEpangero lyaKristusa dokupangera pevhu ngadi tameka.—Ehor. 20:6.

11. Yisinke ali tanta koge ehuguvaro lyokukaparuka narunye? (Tara hena efano.)

¹¹ Gazadara ko kweyi ngayi vhura kuhoroka konyima zonoMvhura Eyovi. Bibeli kwa uyunga kuhamena Musiti gwetu asi ‘age kwa tu  pa eharo lyokukaparuka narunye.’ (Muud. 3:​11, NW.) Gazadara ko eyi ayi tanta koge oyo ntani kelikwatakano lyoge naJehova. Buke Draw Close to Jehovah pepenuno 319, kwa uyunga nonkango donongwa edi asi: “Konyima zapa ngatu ka paruka nomvhura mafere, mayovi, mamiliyona ndi nampili mabiliyona, ose ngatu ka diva unene Jehova kupitakana omu twa mu diva ngesi. Nye nampili ngoso, simpe ngatu ka lizuvha asi yininke yinzi yoyiwa yokukalironga. . . . Eparu moparadisa ngali ka wapa unene ntani sininke sosiwa po unene kuna kara sokukahedera unene pepi Jehova.” Yisinke hena twa hepa kurugana ngomu tuna kutwikira kulironga Nonkango daKarunga?

12. Monkedi musinke natu kankuka tu tare keguru? Gava sihonena.

¹² Nonkango daKarunga kututantera omu mwa fana meguru omu ga kara Jehova. (Jes. 33:5) Bibeli kwa likida yininke yokutetukisa kuhamena Jehova nombunga zendi zemeguru. (Jes. 6:​1-4; Ndan. 7:​9, 10; Ehor. 4:​1-6) Pasihonena, ose kuvhura kuresa yininke yokutetukisa eyi ga mwene Hesekiyeli. Age kwa mwene “eguru kwa zegurukire makura [ta] mono emoneko lyaKarunga.”—Hes. 1:1.

13. Ngapi ono kulizuvha kweyi ana kuturuganena Jesus kutundilira meguru, ngomu va yi faturura moVahebeli 4:​14-16?

¹³ Gazadara ko hena eyi ana kuturuganena Jesus meguru ngaHompa gwetu ntani noMupristeli gomunene gonkenda. Kupitira mwendi, ose kuvhura kuhedere “sipundi saKarunga ogu ga kara nonkenda zonene” kupitira mekanderero nokuhundira egusiropo ntani a tu vatere ‘paapa tuna hepere evatero.’ (Resa Vahebeli 4:​14-16.) Twa hepa kugazadara ko nkenye ezuva kuhamena eyi ga tu ruganena Jehova naJesus ntani eyi vana kuturuganena ngesi kutundilira meguru. Eharo eli ava tu likida ngano li tu tumangede tu kare noupampi ngomu tuna kukarera Jehova.—2 Kol. 5:​14, 15.

14. Sininke musinke sosiwa esi natu rugana mokulikida rupandu kweyi a tu ruganene Jehova naJesus? (Tara mafano.)

 ¹⁴ Nkedi zimwe zomulyo po omu natu likida rupandu kwaKarunga naMunendi kuna kara pokuhetekera ko kuvatera wopeke va kare Nombangi daJehova nokukara varongwa vaJesus. (Mat. 28:​19, 20) Eyi yiyo ga rugene mupositoli Paurusa morwa ga kere norupandu kwaKarunga naKristusa. Age ga yi divire asi mpango zaJehova kuna kara asi “vantu navenye va va parure ntani va kare nediwo lyousili.” (1 Tim. 2:​3, 4) Age nga rugana unene mokuzuvhisa yipo a “vatere po nampili vamwe.”—1 Kol. 9:​22, 23.

15. Kuliza nEpisarome 1:​2, yisinke nayi tu retera ruhafo?

¹⁵ Mutjangi gepisarome lyokuhova kwa fatwilire muntu goruhafo ogu ayi tompoka asi age kwa “tokomena kuresa Veta zaHOMPA, oku ta zi konakona mutenya nomasiku.” (Epis. 1:​1-3) Mutoroki gumwe goBibeli gedina Joseph Rotherham kwa kumbwilire ko konovelise edi pokuuyunga asi muntu ga hepa “kuhara unene mavyukiso gaKarunga pokugapapara nokugalironga ntani nokulitulira po siruwo sokuteda ko komavyukiso ogo.” Age hena kwa uyungire asi: “Nsene muntu a pitisa po ezuva ga hana kuresa Bibeli, age ngoso kuna hepeke ezuva olyo.” Ove kuvhura o hafere kulironga Bibeli nsene o konakona mauzera gomanzi gokulisiga-siga nokumona omu ga liza kumwe. Ayo kuhafesa sili mokulironga momunene Nonkango daKarunga!

16. Yisinke ngatu ka zogera mosirongwa sokukwama ko?

¹⁶ Usili ou atu rongo Jehova moNonkango dendi kapisi udigu mokuukwata egano. Mosirongwa sokukwama ko ngatu ka lironga usili umwe wokonhiinhi, awo kuna kara ntembeli zaJehova zopampepo ezi ga fatwilire Paurusa mombilive ezi ga tjangerere Vakriste woVahebeli. Ngano sirongwa oso nga si ku retere ruhafo rorunene apa ngo si lironga.