1-2. Ino ninshila nshi ibotu mbweenga twabelenga akwiiya Maswi akwe Lesa? Amwaambe cakubonenaako.

 AMUYEEYE ayi mulisuni kuula ŋanda. Ino nshiinshi nsheenga mwasuna kubona kamutana kuula ŋanda iyo? Sa inga mwasuna kubona cikope citotondesha lubasu lomwibo lwa ŋanda iyo? Ncakutatoonsha kwaamba ayi inga mwasuna kuya mukwiibona mboibete pansengwe, mukati, kunjila mushipinda akubona mbasu shimwi shoonse sha ŋanda iyo. Alimwi mpashi inga mwabandika amuntu umwi ucishi kabotu ŋanda iyo mboyakayakwa. Ncakwiila, inga mwasuna kushiba kabotu ŋanda njomusuni kuula mboibete.

² Ishi nsheenga twaciita ndyetutobelenga akwiiya Baibo. Muntu umwi wakeeya makani amu Baibo wakaamba ayi Baibo “ili anga ni ŋanda inene alimwi ilaamfu yakayakwa palwiimbi luyumu.” Aboobo ino nshiinshi nsheenga twaciita kwaamba ayi twaashibe kabotu makani ali mu Baibo? Na kamubelenga Baibo calubilo, inga mweeyabo ‘shiiyo shitaanshi shamu maswi asalalite akwe Lesa.’ (Ebu. 5:12) Sombi bweenka mbweenga mwasuna kushiba kabotu ŋanda njomusuni kuula, mulayandika kwiiya Maswi akwe Lesa cakubikila maano kwaamba ayi mwaanyumfwishishe kabotu. Nshila ibotu mbweenga mweeya Maswi akwe Lesa, nkubona makani ngomutobelenga mbwatokweendelana amakani ngomushi kale. Amweeleshe kunyumfwishisha makani ngomushoma, acimupa kushoma makani ayo.

3. Ino nciinshi mutumwi Paulo ncaakayuminisha bashominyina kucita alimwi ino nceebonshi? (Bene Efeso 3:​14-19)

³ Kwaamba ayi tunyumfwishishe kabotu makani ali mu Baibo, kuli makani amwi ngotweelete kwiiya cakubikila maano. Mutumwi  Paulo wakayuminisha bashominyina kwiiya Maswi akwe Lesa cakubikila maano kwaamba ayi bacikoonshe “kunyumfwishisha bufwiifwi, bulaamfu, kuya mwiculu alimwi akuya panshi kwa cancine.” Kucita boobo kwakalinga kusa mukubacafwa ‘kushimpa miyanda’ mulushomo. (Amubelenge Bene Efeso 3:​14-19.) Aswebo mbotweelete kunoocita. Amuleke tubandike mbweenga tweeya Maswi akwe Lesa cakubikila maano kwaamba ayi twaanyumfwishishe kabotu.

4. Ino nshiinshi nsheenga twaciita kwaamba ayi tuyumye bushicibusa bwesu a Yehova? Amwaambe shakubonenaako.

⁴ Mbuli Beneklistu, tatusuni kweelabo pakwiiya makani amu Baibo oobu kunyumfwisha. Sombi tulisuni kwiiya a “shisisitwe shakwe Lesa,” kwiinda mulucafwo lwa mushimu usalashi. (1 Koli. 2:​9, 10) Inga mweeya makani amwi amu Baibo ateshi oobu kunyumfwisha kwaamba ayi muyumye bushicibusa bwanu a Yehova. Kucakubonenaako, inga mweeya cakubikila maano mbwaakatondesha lusuno ku basebenshi bakwe bakale kale alimwi amakani ayo mbwaatondesha ayi amwebo alimusuni. Alimwi inga mweeya Yehova mbwaakalinga kusuni ayi bene Isilaeli banoomulambila akubona mbwaasuni ayi tunoomulambila pacecino ciindi. Na mpashi inga mweeya cakubikila maano bushinshimi Yesu mbwakakumanisha ndyaakalinga kusebensa ncito yakushimikila pacishi.

5. Sa kuli makani ngeenga mwasuna kwiiya cakubikila maano?

⁵ Bamwi beeya Maswi akwe Lesa cakubikila maano, bakaamba makani amwi ateshi oobu kunyumfwisha ngeenga basuna kwiiya mu Baibo. Inga mwacana shimwi nshobakaamba mu kabokosi kacite mutwi utokwaamba ayi “ Makani Ngeenga Mweeya Paciiyo Capalwaanu.” Inga mwasangalala abuumbi kwiiya makani aya na kamusebensesha Watch Tower Publications Index na libuku lyamu Chitonga lyaamba ayi Bbuku Ligwasya Kuvwuntauzya lya Bakamboni ba Jehova. Kwiiya Baibo cakubikila maano inga kwayumya lushomo lwanu akumucafwa kuba “alushibo loonse lwa pali Lesa.” (Tus. 2:​4, 5) Amuleke ano tubandike pamakani amwi amu Baibo ateshi oobu kunyumfwisha ngeenga tweeya cakubikila maano.

6. (a) Ino nceebonshi Yehova lyoonse alakumanisha kuyanda kwakwe? (b) Ino nceebonshi nceenga twaambila ayi luyaando Lesa ndwaakalengela bantu acishi ‘ndwamuyayaya’? (Bene Efeso 3:11)

⁶ Kucakubonenaako, amuyeeye Baibo nshoyaamba pa luyaando lwakwe Lesa. Lyoonse Lesa alakumanisha kuyanda kwakwe. Ino nceebonshi? Nceebo cakwaamba ayi na Yehova wasalawo kucita cintu cimwi, taacinkibo manungo munshila yomwi ya mbweenga wakumanisha cintu ico. Muciindi cakucita boobo, alaalula mbweenga wakumanisha kuyanda kwakwe na kaciyandika. Yehova watolelela kuyubulula ‘luyaando lwakwe lwamuyayaya’ luli mu Baibo, paniini paniini. (Efe. 3:11) Yehova inga wasebensesha nshila shipusenepusene kwaamba ayi akumanishe kuyanda kwakwe, alimwi lyoonse alaswitilila mukwiinga ‘wakabamba shintu shoonse kwaamba ayi akumanishe kuyanda kwakwe.’ (Tus. 16:4) Alimwi shiswaamo mushintu shoonse Yehova nshaacita, shilaakutolelela kubaako kwamuyayaya. Ino nduyaando nshi Yehova ndwaacite, alimwi ino nshiinshi nshakaalula kwaamba ayi akumanishe luyaando ulo?

7. Ino nshiinshi Yehova nshaakacita kwaamba ayi akumanishe luyaando lwakwe, pesule lyakwaamba ayi Adamu a Efa bamupondokela? (Mateyo 25:34)

⁷ Lesa wakalwiita bantu bakutaanguna luyaando ndwaakabalengela. Wakabalwiita ayi “amushalane mufule, akususha cishi ca panshi. Amweendeleshe . . . sheenda panshi shoonse.” (Mata. 1:28) Adamu a Efa ndyebakapondoka akupa kwaamba ayi bantu bapyane bubi, luyaando lwakwe Yehova talukwe kwaaluka. Wakaalula mbwaakalinga kusa mukukumanisha luyaando lwakwe. Peenkapo wakabika Bwaami kwiculu ubo bwakalinga kusa mukukumanisha luyaando lwakwe lwa pakutaanguna ndwaakalengela bantu acishi capanshi. (Amubelenge Mateyo 25:34.) Paciindi ceelete, ceebo ca lusuno Yehova wakatuma Mwanaakwe wakashalwabo eenka kusa pacishi mukwiisha bantu pa Bwaami bwakwe Lesa, akwaaba buumi bwakwe mbuli cilubula kwaamba ayi atulubule kububi alufu. Lyalo Yesu wakabushikwa akuboolela kwiculu mukweendelesha mu Bwaami bwakwe Lesa. Sombi kuli ashimwi shiinji nsheenga tweeya pa luyaando lwakwe Lesa.

8. (a) Ino nga makani nshi ayandika abuumbi aambwa mu Baibo? (b) Kweelana a Bene Efeso 1:​8-11, ino nduyaando nshi lunene Yehova ndwaacite? (Amubone cikope cili papeeji yakutaanguna.)

⁸ Makani ayandika abuumbi aambwa mu Baibo nkusalashikwa kwa liina lyakwe Yehova paciindi ndyeshi akakumanishe luyaando ndwaakalengela cishi. Alimwi alaakucita boobo kwiinda mukusebensesha Bwaami bwakwe ubo bweendeleshekwa a Klistu. Taakuwo weenga waalula luyaando lwakwe Lesa. Wakatushomesha ayi shoonse shilaakuswitilila kweelana ambwaakaamba. (Isa. 46:​10, 11; Ebu. 6:​17, 18) Cishi cilaakuba paladaiso umo bamulunyungu lwakwe Adamu a Efa baluleme mweshi bakabe bamaninite, ‘akusangalala abuumi kwamuyayaya.’ (Kulu. 22:26) Sombi kuli ashimwi Yehova nsheshi akakumanishe. Luyaando lunene ndwaacite ndwaakwaamba ayi baanjelo boonse alimwi abantu bakabe bacatene. Lyalo baanjelo boonse alimwi abantu balaakunonyumfwila Yehova mbuli Mweendeleshi wabo. (Amubelenge Bene Efeso 1:​8-11.) Sa kushiba Yehova mbwaakumanisha luyaando lwakwe munshila ili kabotu kwamusangalasha?

9. Ino kubelenga Baibo inga kwatucafwa kushiba nshi sheshi shikacitike kunembo?

⁹ Amuyeeye pabushinshimi Yehova mbwaakaamba mumunda wa Edeni, mbotucana palilembo lya Matalikilo 3:15. b Bwakalinga kwaamba pashintu shakalinga kusa mukukumanisha luyaando lwakwe. Sombi shintu isho shakalinga  kusa mukucitika pesule lya myaaka iinji. Kucakubonenaako, Lesa wakalwiita Abulaamu ayi pesule lya mashalane aanji, womwi wamulunyungu lwakwe wakalinga kusa mukuba Klistu. (Mata. 22:​15-18) Lyalo mu 33 C.E., Yesu wakalumwa kukashindi kweelana abushinshimi mbobwakaambila limwi. (Milimo 3:​13-15) Kucicaalite myaaka iindilila 1,000 kuswa pacecino ciindi, kwaamba ayi lubasu lwa bushinshimi ubu lwaamba ayi “lunyungu” lulaakulyata Satana kumutwi, lukakumanishikwe. (Ciyu. 20:​7-10) Alimwi Baibo ilaamba shiinji sheshi shikacitike na kukacaale paniini kwaamba ayi Yehova anyonyoole cishi cino citokweendeleshekwa a Satana.

10. (a) Ino nshiinshi sheshi shikacitike conoono? (b) Ino inga twacita buyani kwaamba ayi tulibambile sheshi shikacitike? (Amubone makani amweela.)

¹⁰ Amuyeeye pashintu ishi shitana kucitikaawo kale Baibo nshoyakaambila limwi. Cakutaanguna, shishi shilaakwaambilisha ayi kuli “luumuno akuliiba!” (1 Tesa. 5:​2, 3, NWT) Lyalo na shishi shikalwane bupailishi bwakubeca boonse, ‘peenkapo’ mapensho anene alaakutalika. (Ciyu. 17:16) Kuswawaawo, mpashi kulaakucitika shitondesho shiloondesha sheshi shikatondeshe “Mwanaamuntu keesa mu makumbi ankusu alimwi abulemu bukankamika.” (Mate. 24:30) Yesu alaakoombolosha bantu akupansaanya mbelele a mpongo. (Mate. 25:​31-33, 46) Paciindi ici, Satana alaakutolelela kulwana bantu bakwe Yehova. Mukwiinga alibapatite abuumbi bantu bakwe Lesa, alaakupa kwaamba ayi Gogi wakucishi ca Magogi, nkokwaamba ayi kucatana pomwi kwashishi, shilwane bantu bakwe Yehova. (Esek. 38:​2, 10, 11) Lyalo paciindi cimwi, bananikitwe bacaliteewo balaakutolwa kwiculu kwaamba ayi babe pomwi a Klistu abashilumamba bakwe bali kwiculu, akulwana nkondo ya Amagedoni iyo yeshi ikabe ngomamanino amapensho anene. c (Mate. 24:31; Ciyu. 16:​14, 16) Lyalo Buleelo Bwakwe Klistu bwa Myaaka 1,000 bulaakutalika pacishi.—Ciyu. 20:6.

11. Ino kushiba ayi Yehova wakabika abuumi butamaani mumyoyo yesu kulaakumupa kucita nshi? (Amubone acikope.)

¹¹ Ano amuyeeye sheshi shikacitike pesule lya myaaka 1,000. Baibo ilaamba ayi Mulengi wesu “wakabika abuumi butamaani mumyoyo [yesu].” (Shiku. 3:11) Ino ici cilaakukuma  buyani buumi abushicibusa bwanu a Yehova? Papeeji 319 mulibuku lyamu Chitonga lyaamba ayi Amubaa Acilongwe a Jehova, pali maswi asangalasha aamba ayi: “Pesule lya kukala kwamyaaka iindilila 100, 1,000, 1 miliyoni nabi iindilila 1 biliyoni, tulaakushiba shiinji pali Yehova Lesa kwiinda anshotucishi pacecino ciindi. Sombi tulaakunoolinyumfwa ayi kuli ashimwi shiinji nsheenga tweeya pali nguwe. . . . Ncakutatoonsha kwaamba ayi buumi mu paladaiso bulaakubota alimwi bulaakunosangalasha. Alimwi cintu ciyandika abuumbi ncakwaamba ayi tulaakutolelela kuyumya bushicibusa bwesu a Yehova.” Ndyetutolindila ciindi ico, ino nshiinshi shimwi nsheenga tweeya ndyetutokwiiya Maswi akwe Lesa cakubikila maano?

12. Ino nshiinshi nsheenga twaciita kwaamba ayi tuyeeye shitoocitika kwiculu? Amwaambe cakubonenaako.

¹² Maswi akwe Lesa alatulwiitakobo shiniini shicitika ‘kwiculu’ Yehova nkwaabete. (Isa. 33:5) Baibo ilaamba shintu shikankamika pali Yehova apa libunga lyakwe lyakwiculu. (Isa. 6:​1-4; Danye. 7:​9, 10; Ciyu. 4:​1-6) Kucakubonenaako, inga twabelenga makani aamba pashintu shikankamika Esekelo nshaakabona ‘liculu ndyelyakacaluka akutalika kubona shili anga nshiloto shakaswa kuli Lesa.’—Esek. 1:1.

13. Kweelana a Bene Ebulu 4:​14-16, ino mulalinyumfwa buyani pashintu Yesu nshaatomucitila kwiculu?

¹³ Alimwi amuyeeye Yesu nshaatotucitila kwiculu mbuli Mwaami wesu alimwi Mupailishi Munene utunyumfwila nkuumbu. Kwiinda mulinguwe, inga twashika “kucuuna cakwe Lesa ca bwaami uko kuli luse” mumupailo, akusenga ayi atunyumfwile nkuumbu akutucafwa “paciindi ceelete.” (Amubelenge Bene Ebulu 4:​14-16.) Bushiku abushiku tulayandika kunooyeeya Yehova a Yesu nshobakatucitila anshobatootucitila pacecino ciindi kwiculu. Lusuno ndobatutondesha lulyeelete kutucafwa kushiba ayi balitusuni abuumbi akutuyuminisha kusebensa  cankusu ndyetutolambila Yehova.—2 Koli. 5:​14, 15.

14. Ino ni nshila nshi yomwi ibotu abuumbi mbweenga twatondesha kulumba kuli Yehova a Yesu? (Amubone ashikope.)

¹⁴ Nshila yomwi ibotu abuumbi mbweenga twatondesha kulumba kuli Lesa a Mwanaakwe, nkweelesha kucafwa bantu kwaamba ayi babe Bakamboni Bakwe akuba bashikwiiya bakwe Yesu. (Mate. 28:​19, 20) Ici mutumwi Paulo ncaakacita ceebo cakulumba Lesa a Klistu panshobakamucitila. Wakalinga kucishi ayi kuyanda kwakwe Yehova nkwakwaamba ayi “bantu boonse bakapulushikwe akwishiba shalushinisho.” (1 Timo. 2:​3, 4) Wakasebensa cankusu muncito yakushimikila kucafwa bantu baanji ‘kwaamba ayi na kacikonsheka apulusheko bamwi.’—1 Koli. 9:​22, 23.

15. Kweelana a Kulumbaisha 1:​2, ino nciinshi ceshi cikatupe kusangalala?

¹⁵ Shikulumbaisha wakaamba ayi muntu usangalete alimwi uswitilila ngu muntu ‘usangalala mu milawo yakwe Yehova,’ alimwi ‘uyeeyaamo mashiku amalumwi.’ (Kulu. 1:​1-3) Musansulushi wa Baibo umwi wakaamba pamavesi aya ayi muntu alyeelete “kusuna butanjilishi bwakwe Lesa abuumbi cakwaamba ayi kaabuyandoola, kubwiiya akutola ciindi cilaamfu kukutumana kuyeeyawo.” Wakeelikaawo akwaamba ayi “na bushiku bweendabo muntu kwakubula kubelenga Baibo, ingayi bwanyonyookabo.” Inga kamusangalala kwiiya Maswi akwe Lesa na kamwiiya cakubikila maano makani oonse aliimo akubona mbwatokweendelana amakani ngomushi kale. Ncintu cisangalasha abuumbi kwiiya Maswi akwe Lesa cakubikila maano akwaanyumfwishisha kabotu!

16. Ino tulaakwiiya nshi mumutwi utokonkelaawo?

¹⁶ Inga twacikonsha kunyumfwisha makani Yehova ngaatwiisha mu Maswi akwe. Mumutwi utokonkelaawo, tulaakwiiya makani amwi amu Baibo ateshi oobu kunyumfwisha aamba pa tempele inene yakwe Yehova yakumushimu, iyo mutumwi Paulo njaakasansulula munkalata njaakalembela Beneklistu bene Ebulu. Amuleke kwaamba ayi kwiiya makani aya cakubikila maano, kukamusangalashe abuumbi.