1-2. Liꞈ hpu gʼaw leh hkʼa dehꞈ dawˇ nyi ve daꞈ jaˇ ve teˇ hkʼaˇ lehˬ aˬ htoꞈ ma le? Tawˇ pa haˉ kʼoˆ maˍ laˇ sheˍ.

 Tawˇ pa haˉ te kʼo, nawˬ yehˬ teˇ yehˬ vuiˬ tuˬ dawˇ ve kʼo, yehˬ oˇ ve maˇ vuiˬ sheˍ htaˇ nawˬ aˬ htoꞈ ma htaꞈ awˉ lawˉ nyi gaˇ ve le? Nawˬ yehˬ oˇ ve teˇ yehˬ awˬ han htaꞈ ceh mawˬ leh, vuiˬ tuˬ dawˇ cheˆ ve laˇ? Nawˬ chi hkʼe maˇ te taˬ. Nawˬ yehˬ oˇ ve teˇ yehˬ htaꞈ hkʼa dehꞈ nyi sheˍ ve yoˬ hehˉ. Yehˬ awˬ baˬ hpawˇ awˬ hkʼaw hpawˇ, teˇ bawehˇ le le leh, teˇ kaˬ le le kaꞈ hkʼa dehꞈ nyi sheˍ ve yoˬ. Yehˬ chi ve teˇ yehˬ hkʼaˬ hkʼe te taˍ ve shiˍ ve chaw htaꞈ kaꞈ nawˬ na nyi sheˍ ve yoˬ hehˉ. Chi ve hkʼa shuˍ shuˍ, yehˬ chi ve teˇ yehˬ htaꞈ kaꞈ nawˬ hkʼa dehꞈ nyi sheˍ ve yoˬ.

² Ngaˬ hui Liꞈ hpu gʼaw htaˇ leh Liꞈ hpu henˇ htaˇ chi ve hkʼa shuˍ te gʼa ve yoˬ. Liꞈ hpu hpawˇ chaˬ nyi paˍ teˇ gʼaˇ Liꞈ hpu lehˬ “yehˬ lonˉ mvuh jaˇ ve leh yeˬ jaˇ ve” htaꞈ tehˆ taˍ ve yoˬ. Leh ngaˬ hui Liꞈ hpu hkʼaw hkʼaˬ hkʼe te hkʼa dehꞈ shiˍ gʼa tuˬ le? Nawˬ Liꞈ hpu haˆ haˆ gʼaw ve kʼo, “Gʼuiˬ sha ve tawˇ hkawˇ awˬ lawn lonˉ ma teˇ hpaˍ” htaꞈ ceh shiˍ gʼa ve yoˬ. (Heˍbrehˇ 5:12) Chi htaꞈ pa taw, nawˬ yehˬ hkʼaw lo hkʼa dehꞈ nyi ve hkʼa shuˍ, nawˬ hkʼa dehꞈ na gʼa tuˬ Liꞈ hpu henˇ htaˇ hkʼa dehꞈ gʼa chaˬ nyi ve yoˬ. Daꞈ jaˇ ve awˬ hkʼaˇ teˇ hkʼaˇ lehˬ, Liꞈ hpu hkʼaw ve awˬ lawn teˇ hpaˍ hkʼaˬ hkʼe te caˉ daꞈ ve, leh nawˬ yonˍ ve awˬ tehˬ ve htaꞈ na gʼa ve ceh maˇ heˆ ve tehꞈ hkʼa dehꞈ chaˬ nyi sheˍ. Aˬ htoꞈ ma pa taw, nawˬ chi hkʼe yonˍ ve htaꞈ kaꞈ gʼa na gʼa cawˇ ve yoˬ.

3. Tcuh yaˇ Pawˇluꞈ Hkriꞈ yaˇ aˬ htoꞈ ma te tuˬ awˬ gʼaˇ piˇ ve le? Leh aˬ htoꞈ ma te yawˇ chi hkʼe te tuˬ kʼoˆ piˇ ve le? (Eˇfeˇsuꞈ 3:14-19)

³ Liꞈ hpu hkʼaw awˬ tehˬ ve htaꞈ nawˬ hkʼa dehꞈ na gʼa tuˬ, Liꞈ hpu hkʼaw tcuhˉ kuiˬ naˉ jaˇ ve awˬ lawn htaꞈ ngaˬ hui gʼa henˇ cawˇ ve yoˬ. Tcuh yaˇ Pawˇluꞈ yawˇ ve awˬ co˗e htaˇ ve Hkriꞈ yaˇ htaꞈ ‘hkʼaˬ ma kʼehˬ ve, hkʼaˬ ma zuhˬ ve, hkʼaˬ ma mvuh ve, leh hkʼaˬ ma naˉ ve htaꞈ hkʼa dehꞈ shiˍ hpehꞈ tuˬ’ Liꞈ hpu hkʼaw hkʼa dehꞈ henˇ tehꞈ awˬ gʼaˇ piˇ ve yoˬ. Leh yawˇ hui yonˍ hkʼaˇ hpawˇ “nyi ma awˬ hkʼaw lo chehˇ yeˬ” gʼa ve yoˬ. (Eˇfeˇsuꞈ 3:14-19 gʼaw sheˍ.) Ngaˬ hui kaꞈ chi ve hkʼa shuˍ shuˍ gʼa te ve yoˬ. Liꞈ hpu hkʼaw ngaˬ hui hkʼa dehꞈ na gʼa tuˬ henˇ ve, hpfuhˆ  nyi ve, leh hkʼaˬ hkʼe te hkʼa tawˍ lehˆ mawˬ gʼa tuˬ kaꞈ teˇ geh henˇ tuˬ yoˬ.

4. Ngaˬ hui Yaˬhoˉvaˬ geh hkʼa dehꞈ meuˆ daꞈ tuˬ aˬ htoꞈ ma gʼa te cawˇ ve le? Tawˇ pa haˉ kʼoˆ maˍ laˇ sheˍ.

⁴ Ngaˬ hui Liꞈ hpu hkʼaw awˬ lawn lonˉ ma htaꞈ shiˍ ve ceh nyi hkʼaˇ maˇ suh cawˇ. Yaꞈ hkʼaˇ, ngaˬ hui “Gʼuiˬ sha ve naˉ jaˇ ve awˬ ceuˬ” henˇ gaˇ ve yoˬ. Chi hkʼe henˇ htaˇ ngaˬ hui na gʼa tuˬ, Gʼuiˬ sha ve daꞈ kehˬ ve awˬ ha hpu ga laˇ gʼa ve yoˬ. (1 Kawˇrenˍhtuˆ 2:9, 10) Nawˬ chi hkʼe te ve kʼo, nawˬ Yaˬhoˉvaˬ geh meuˆ daꞈ ve awˬ ceuˬ htaꞈ caˉ daꞈ ve a shu yawˇ hkʼaˇ yawˇ Liꞈ hpu henˇ gaˇ˗aw laˇ? Tawˇ pa haˉ te kʼo, Yaˬhoˉvaˬ oˇ htaˇ teˇ co˗e yawˇ ve kanˉ te ve chaw htaꞈ haꞈ ve tehꞈ hkʼaˬ hkʼe hpeuꞈ maw piˇ ve, leh Yaˬhoˉvaˬ nawˬ htaꞈ haꞈ ve tehꞈ hkʼaˬ hkʼe hpeuꞈ maw laˇ ve, hpfuhˆ nyi gaˇ ve yoˬ hehˉ. Iˉsaˍreˍlaˆ chaw Yaˬhoˉvaˬ htaꞈ oˉ kʼoˍ pui ve htaꞈ caˉ daꞈ ve yawˇ hkʼaˬ hkʼe gu teh piˇ ve htaꞈ nawˬ hpfuhˆ nyi gaˇ ve yoˬ hehˉ. Leh awˬ ceuˬ chi ve teˇ hpaˍ chi beuꞈ teˇ co˗e Hkriꞈ yaˇ oˉ kʼoˍ pui ve htaꞈ caˉ daꞈ ve htaꞈ tehˆ daꞈ gʼa ve yoˬ. Yeˍsuˆ miˬ guiˬ hkʼoˆ lo chehˇ htaˇ, tcuh kaˍ paˍ ve tawˇ hkawˇ yawˇ htaꞈ caˉ daꞈ ve awˬ tehˬ hkʼaˬ hkʼe hpehꞈ la ve htaꞈ kaꞈ nawˬ hpfuhˆ nyi gaˇ ve yoˬ hehˉ.

5. A shu yawˇ hkʼaˇ yawˇ Liꞈ hpu henˇ htaˇ Liꞈ hpu hkʼaw nawˬ hpfuhˆ nyi gaˇ ve aˬ htoꞈ ma awˬ lawn cawˬ ve le?

⁵ Awˬ viˉ awˬ nyi teˇ hpaˍ a shu yawˇ hkʼaˇ yawˇ Liꞈ hpu henˇ ve, kaiˬ ve chaw htaꞈ Liꞈ hpu hkʼaw tcuhˉ kuiˬ naˉ ve awˬ lawn, aˬ htoꞈ ma ve awˬ ceuˬ henˇ gaˇ ve le tehꞈ yawˇ hui htaꞈ na nyi piˇ ve yoˬ. Yawˇ hui awˇ ceˍ awˇ fa hkʼaw kʼoˆ taˍ ve htaꞈ “ Nawˬ a shu yawˇ hkʼaˇ yawˇ Liꞈ hpu henˇ gʼa ve awˬ lawn” nawˬ awˬ lawn lonˉ ma teˇ hpaˍ hpaˍ htaꞈ mawˬ tuˬ yoˬ. Yaˬhoˉvaˬ ve Shaˉhkiˆhkanˍ ve chaw hpfuhˆ nyi tuˬ laꞈ caˉ yehˇ htaˇ, awˬ lawn chi ve teˇ hpaˍ htaꞈ henˇ leh hpfuhˆ nyi ve nawˬ ha lehˬ tuˬ yoˬ. Tcuhˉ kuiˬ naˉ ve htaꞈ henˇ leh hpfuhˆ nyi ve kʼo, yonˍ hkʼaˇ yonˍ yeˬ tuˬ te laˇ leh nawˬ “Gʼuiˬ sha awˬ lawn shiˍ maˇ la tuˬ” kaꞈ te laˇ ve yoˬ. (Tawˇ naˉ ve 2:4, 5) Liꞈ hpu hkʼaw tcuhˉ kuiˬ naˉ ve htaꞈ henˇ leh hpfuhˆ nyi gʼa tuˬ, teˇ lawn lawn htaꞈ teˇ geh nyi sheˍ.

6. (a) Awˬ hkʼaˇ gu teh ve leh dawˇ teh taˍ ve hkʼaˬ hkʼe peun daꞈ ve le? (b) Yaˬhoˉvaˬ ve a loˍ miˬ guiˬ leh chaw yaˇ htaꞈ caˉ daꞈ ve yawˇ ve a loˍ “biˇ la tuˬ” aˬ htoꞈ ma te ngaˬ hui kʼoˆ gʼa ve le? (Eˇfeˇsuꞈ 3:11)

⁶ Yaˬhoˉvaˬ ve a loˍ htaꞈ caˉ daꞈ ve Liꞈ hpu hkʼaw hkʼaˬ hkʼe kʼoˆ taˍ ve htaꞈ teˇ geh nyi sheˍ. Awˬ hkʼaˇ  gu teh ve leh dawˇ teh taˍ ve hkʼaˬ hkʼe peun daꞈ ve htaꞈ awˉ lawˉ teˇ geh henˇ tuˬ yoˬ. Ngaˬ hui awˬ hkʼaˇ gu teh˗oˬ ve kʼo, ngaˬ hui yaꞈ kʼaw hkʼaˬ ve teˇ caˆ htaꞈ kʼai tuˬ shiˍ˗oˬ ve tehꞈ kʼoˆ gaˇ ve yoˬ. Yaꞈ hkʼaˇ, ngaˬ hui kʼai gaˇ ve yaꞈ kʼaw htaꞈ tawˍ laˇ ve awˬ ceuˬ cawˬ ve kʼo, kʼai maˇ gʼa ve yoˬ. Leh ngaˬ hui dawˇ teh taˍ ve awˬ ceuˬ cawˬ ve kʼo, dawˇ taˍ kuiˬ awˬ ti lo gaˬ tuˬ, ngaˬ hui yaꞈ kʼaw hkʼaˬ ve teˇ caˆ htaꞈ kʼai tuˬ hteˇ˗ehˬ kʼoˆ piˇ tuˬ maˇ loˍ. Ngaˬ hui kʼai gaˇ ve yaꞈ kʼaw htaꞈ tawˍ laˇ ve awˬ ceuˬ cawˬ ve kʼo, dawˇ taˍ kuiˬ awˬ ti lo gaˬ tuˬ, ngaˬ hui awˬ nu ve yaꞈ kʼaw htaꞈ kʼai ve yoˬ. Yaˬhoˉvaˬ dawˇ teh taˍ ve awˬ ceuˬ aˬ htoꞈ ma cawˬ ve hpeuꞈ maw laˇ ve, ngaˬ hui gʼa shiˍ leh Liꞈ hpu hkʼaw Gʼuiˬ sha yawˇ “dawˇ law taˍ ve” htaꞈ kʼoˆ laˇ ve ngaˬ hui gʼa shiˍ ve ha lehˬ jaˇ. (Eˇfeˇsuꞈ 3:11) Yaˬhoˉvaˬ awˬ hkʼaˇ hkʼaˬ hkʼe yehˇ ve htawˇ maˇ kʼoˆ, Yaˬhoˉvaˬ yawˇ dawˇ teh taˍ ve leh yawˇ ve a loˍ hkʼaˬ htaˆ kaꞈ awˬ tehˬ hpehꞈ la ve yoˬ. Awˬ lawn chi Gʼuiˬ sha “hkʼa te taˍ ve kanˉ hkʼa peu˗eˬ” hpehꞈ la tcuh tuˬ yoˬ. (Tawˇ naˉ ve 16:4) Gʼuiˬ sha te taˍ ve awˬ ceuˬ co co taiˍ taiˍ yeˬ chehˇ tuˬ yoˬ. Yaˬhoˉvaˬ ve a loˍ aˬ htoꞈ ma le? Yaˬhoˉvaˬ ve a loˍ awˬ tehˬ hpehꞈ la tuˬ yawˇ aˬ htoꞈ ma pa ve le?

7. Chaw yaˇ awˉ lawˉ teˇ ca Yaˬhoˉvaˬ htaꞈ hpfuhˆ peuˬ hkʼawꞈ nawˉ yawˇ ve a loˍ awˬ tehˬ biˇ la gʼa tuˬ hkʼaˬ hkʼe te ve le? (Maꞈhtehˍ 25:34)

⁷ Yaˬhoˉvaˬ ve a loˍ aˬ htoꞈ ma cawˬ ve yawˇ chaw yaˇ awˉ lawˉ teˇ ca htaꞈ kʼoˆ piˇ ve yoˬ. Yaˬhoˉvaˬ yawˇ hui htaꞈ kʼoˆ piˇ ve, ‘yaˇ maˇ maˇ cawˬ la piˇ˗oˆ. Chaw yaˇ teˇ hpaˍ miˬ guiˬ hkʼoˆ biˇ la piˇ˗oˆ. Leh haiˬ ve to nuˇ to shaˆ hkʼa peu˗eˬ ve awˬ hkʼoˆ htaꞈ uˉ peunˍ chehˇ˗oˆ.’ (Awˬ hkuiˉ puiˍ 1:28) Yaꞈ hkʼaˇ, Aˍdanˍ leh Eˇvaꞈ Gʼuiˬ sha htaꞈ hpfuhˆ ve pa taw, miˬ guiˬ hkʼoˆ lo ve chaw yaˇ teˇ gʼaˇ le le venˇ baˆ yaˇ hpehꞈ la ve yoˬ. Chi hkʼe hpehꞈ ve htawˇ Yaˬhoˉvaˬ ve a loˍ maˇ mehˉ kʼai. Yaˬhoˉvaˬ ve a loˍ awˬ tehˬ biˇ la tuˬ yawˇ te tuˬ yoˬ. Chaw yaˇ awˉ lawˉ teˇ ca Yaˬhoˉvaˬ htaꞈ hpfuhˆ peuˬ hkʼawꞈ nawˉ, yawˇ awˉ lawˉ htaˇ dawˇ teh taˍ ve hkʼe, chaw yaˇ leh miˬ guiˬ htaꞈ caˉ daꞈ ve yawˇ ve a loˍ awˬ tehˬ hpehꞈ la tuˬ, mvuhˇ naw ma hkʼoˆ yawˇ ve mvuhˇ miˬ teh tuˬ dawˇ teh taˍ ve yoˬ. (Maꞈhtehˍ 25:34 gʼaw sheˍ.) Yaˬhoˉvaˬ tinˍ taˍ ve awˬ yanˇ gaˬ ve kʼo, yawˇ haꞈ jaˇ ve Yaˇ paˍ miˬ guiˬ hkʼoˆ lo peu laˇ leh ngaˬ hui venˇ baˆ leh suh ve htaꞈ ponˬ tuˬ, Gʼuiˬ sha ve mvuhˇ miˬ htaꞈ caˉ daꞈ ve chaw yaˇ htaꞈ maˍ piˇ leh, yawˇ ve a shaꞈ kaꞈ tanˇ laˇ ve yoˬ. Peuˬ hkʼawꞈ nawˉ Yeˍsuˆ kʼawꞈ teꞈ tu la leh Gʼuiˬ sha ve mvuhˇ miˬ hkʼaw Jawˇ mawˇ te tuˬ mvuhˇ naw ma hkʼoˆ taˆ˗e ve yoˬ. Yaꞈ hkʼaˇ, Yaˬhoˉvaˬ ve a loˍ htaꞈ caˉ daꞈ ve ngaˬ hui henˇ tuˬ laiˉ ceuˬ cawˬ sheˍ ve yoˬ.

8. (a) Liꞈ hpu hkʼaw a yeˇ uiˍ ve awˬ lawn aˬ htoꞈ ma le? (b) Eˇfeˇsuꞈ liꞈ 1:8-11 hkʼaw kʼoˆ taˍ ve hkʼe, Yaˬhoˉvaˬ ve a loˍ daꞈ jaˇ ve aˬ htoꞈ ma le? (Awˬ han htaꞈ nyi sheˍ.)

⁸ Liꞈ hpu hkʼaw a yeˇ uiˍ ve awˬ lawn lehˬ, Yaˬhoˉvaˬ yawˇ ve awˬ meh htaꞈ yawˆ yan tuˬ hkʼaˬ htaˆ kaꞈ te ve yoˬ. Yawˇ chi hkʼe te ve lehˬ Yeˍsuˆ uˉ peunˍ ve mvuhˇ miˬ htaꞈ cuˇ leh miˬ guiˬ htaꞈ caˉ daꞈ ve, Gʼuiˬ sha ve a loˍ biˇ tuˬ te ve yoˬ. Yaˬhoˉvaˬ ve a loˍ lehˬ maˇ pa jaw. Yawˇ dawˇ taˍ ve teˇ ceuˬ le le awˬ tehˬ hpehꞈ la tuˬ yoˬ tehꞈ ka tiꞈ te taˍ laˇ ve yoˬ. (Iˉsaˍyaˆ 46:10, 11; Heˍbrehˇ 6:17, 18) Tinˍ taˍ ve awˬ yanˇ gaˬ htaˇ, na yuˬ ve chaw biˇ ve chaw hpehꞈ tuˬ yoˬ. Chi ve lehˬ Aˍdanˍ leh Eˇvaꞈ ve awˬ yaˇ awˬ duˬ miˬ guiˬ hkʼoˆ lo daꞈ jaˇ ve hko hpehꞈ tuˬ te leh “co co taiˍ taiˍ” a shaꞈ gʼa tuˬ yoˬ. (Chiˇ mvuh ve 22:26) Yaꞈ hkʼaˇ, Yaˬhoˉvaˬ ve a loˍ biˇ la tuˬ chi hkʼe ceh tiˉ maˇ heˆ. Yawˇ ve a loˍ biˇ la tuˬ daꞈ jaˇ ve lehˬ, yawˇ ve kanˉ te ve chaw mvuhˇ naw ma hkʼoˆ leh miˬ guiˬ hkʼoˆ ve chaw teˇ moˍ tiˉ hpehꞈ tuˬ te piˇ tuˬ yoˬ. Yawˇ hui hkʼa peu˗eˬ Yaˬhoˉvaˬ htaꞈ ka tiꞈ yeˬ leh uˉ peunˍ shehˍ hpaˇ uiˍ jaˇ mvuhˇ jaˇ ve yawˇ ve kanˇ paˆ awˬ hawˉ lo chehˇ tuˬ yoˬ. (Eˇfeˇsuꞈ 1:8-11 gʼaw sheˍ.) Yaˬhoˉvaˬ yawˇ ve a loˍ htaꞈ biˇ la tuˬ te ve daꞈ jaˇ ve awˬ hkʼaˇ htaꞈ gʼa mawˬ htaˇ, nawˬ ha lehˬ jaˇ ve maˇ heˆ laˇ?

9. Liꞈ hpu gʼaw ve lehˬ awˬ gʼuˇ suhˍ hpawˇ ve htaꞈ hkʼaˬ hkʼe dawˇ mawˬ tuˬ te laˇ ve le?

⁹ Awˬ hkuiˉ puiˍ liꞈ 3:15 b hkʼaw Eˍdenˍ hko htaꞈ caˉ daꞈ ve, Yaˬhoˉvaˬ tcuh kaˍ paˍ ve tawˇ hkawˇ kʼoˆ taˍ ve htaꞈ dawˇ nyi sheˍ. Awˬ tawn chi ve hkʼaw Yaˬhoˉvaˬ ve a loˍ awˬ tehˬ biˇ la tuˬ awˬ heˆ teˇ hpaˍ htaꞈ kʼoˆ taˍ ve yoˬ. Awˬ heˆ chi ve teˇ hpaˍ hpehꞈ la  tuˬ awˬ yanˇ laiˉ hinˉ hkʼawꞈ gʼa yehˇ ve yoˬ. Tawˇ pa haˉ te kʼo, Aˍbraˍhanˍ ve awˬ yaˇ awˬ duˬ htaꞈ te leh teˇ co˗e peuˬ teˇ co˗e, Yeˍsuˆ Hkriꞈ ve awˬ co˗e hkʼa gaˬ caˉ daꞈ taˍ ve yoˬ. (Awˬ hkuiˉ puiˍ 22:15-18) Leh 33 hkʼawꞈ C.E. htaˇ, tcuh kaˍ paˍ ve tawˇ hkawˇ kʼoˆ taˍ ve hkʼe, Yeˍsuˆ ve hkui mehˍ cu htaꞈ naˬ tuˬ te piˇ ve yoˬ. (Tcuh yaˇ 3:13-15) Leh tcuh kaˍ paˍ ve tawˇ hkawˇ awˬ leh meuˇ hpehꞈ la tuˬ ve teˇ ceuˬ lehˬ, Saˍtanˍ ve oˉ kʼoˍ htaꞈ dawˆ nehˆ tuˬ yoˬ. Chi ve lehˬ, 1,000 hkʼawꞈ peuˬ hkʼawꞈ nawˉ awˬ tehˬ hpehꞈ la tuˬ yoˬ. (Hpeuꞈ maˍ ve 20:7-10) Chi hkʼoˆ kaꞈ, Liꞈ hpu hkʼaw kʼawꞈ kʼoˆ sheˍ ve, Saˍtanˍ leh Saˍtanˍ hpawˇ chehˇ ve chaw lehˬ, Yaˬhoˉvaˬ ve kanˉ hkʼaˇ htaꞈ canˇ paˍ te daꞈ leh awˬ leh meuˇ gaˬ htaˇ awˬ heˆ laiˉ ceuˬ tawˆ la tuˬ yoˬ.

10. (a) Maˇ maw ve awˬ yanˇ aˬ htoꞈ ma hpehꞈ la tuˬ le? (b) Ngaˬ hui hkʼaˬ hkʼe te hkʼa dehꞈ gu hehnˇ taˍ gʼa tuˬ le? (Awˬ maiˉ htaꞈ nyi sheˍ.)

¹⁰ Miˬ guiˬ hkʼoˆ lo chaw yaˇ hkʼa peu˗eˬ htaꞈ heuˆ la kuiˬ cawˬ ve dawˇ nyi sheˍ. Liꞈ hpu hkʼaw awˬ gʼuˇ suhˍ htaˇ kaꞈ kʼoˆ laˇ taˍ ve, maˇ maw ve awˬ yanˇ hkʼaw ‘mvuhˇ miˬ gawˬ la peuˬ leh teꞈ chiˉ dawˇ haˍ tuˬ maˇ cawˬ’ tehꞈ mvuhˇ miˬ teˇ hpaˍ kʼoˆ laˇ tuˬ yoˬ. (1 Hteˇsaˍlawˇniˆ 5:2, 3) Leh peuˬ hkʼawꞈ nawˉ “teˇ cawˬ haˉ” mvuhˇ miˬ teˇ hpaˍ maˇ heˆ heˆ ve bon liˇ hkʼa peu˗eˬ htaꞈ te luˬ tuˬ yoˬ. Leh tuꞈ jaˇ hkanˍ jaˇ ve oˇ htaˇ tanˬ tuˬ yoˬ. (Hpeuꞈ maˍ ve 17:16) Peuˬ hkʼawꞈ nawˉ “chaw yaˇ ve Yaˇ hpu lehˬ, uiˍ ve awˬ meꞈ awˬ hponˇ leh kanˇ paˆ cawˬ ve awˬ hkʼaw lo, mvuhˇ naw ma ve moˬ htaꞈ ciˇ yaꞈ la” tuˬ yoˬ. (Maꞈhtehˍ 24:30) Chi ve lehˬ Yeˍsuˆ chaw yaˇ htaꞈ yawˬ hawˉ paˍ aˉ cheꞈ leh yawˬ htaꞈ pehˬ daꞈ ve hkʼa shuˍ te tuˬ yoˬ. (Maꞈhtehˍ 25:31-33, 46) Oˇ ve teˇ yanˇ Saˍtanˍ taꞈ˗iˉ maˇ chehˇ taˬ. Yawˇ Yaˬhoˉvaˬ htaꞈ gʼaˇ hteꞈ tawˍ daꞈ tuˬ yoˬ. Leh yawˇ Yaˬhoˉvaˬ ve kanˉ te ve chaw htaꞈ nyi bawˬ jaˇ. Yawˇ mvuhˇ miˬ teˇ hpaˍ htaꞈ pawnˇ daꞈ tuˬ dawˇ pawnˍ piˇ ve yoˬ. Chi ve lehˬ Gʼuiˬ sha ve chaw htaꞈ te luˬ tuˬ Liꞈ hpu hkʼaw Gawˇgaˆ leh Maˍgawˇgaˆ tehꞈ kʼoˆ ve yoˬ. (Yeˍsaˍkeˍlaˆ 38:2, 10, 11) Awˬ yanˇ teˇ yanˇ htaˇ, miˬ guiˬ hkʼoˆ lo leuˆ yuˬ taˍ ve leuˉ taˍ ve chaw, Yeˍsuˆ leh mvuhˇ naw ma tcuh yaˇ awˬ moˍ lonˉ geh pawnˇ daꞈ˗e tuˬ, mvuhˇ naw ma hkʼoˆ taˆ˗e ve yoˬ. Leh yawˇ hui Aˍmaˍgeˍdonˍ hkʼaw maꞈ bawˆ tuˬ yoˬ. Chi ve lehˬ, tuꞈ jaˇ hkanˍ jaˇ ve awˬ leh meuˇ teˇ pawˆ hpehꞈ ve yoˬ. c (Maꞈhtehˍ 24:31; Hpeuꞈ maˍ ve 16:14, 16) Chi hkʼoˆ kaꞈ, Yeˍsuˆ uˉ peunˍ ve 1,000 hkʼawꞈ ve awˬ yanˇ kaꞈ tanˬ tuˬ yoˬ.—Hpeuꞈ maˍ ve 20:6.

11. Co co taiˍ taiˍ ve a shaꞈ gʼa tuˬ dawˇ law kuiˬ nawˬ awˬ pon tcuhˉ kuiˬ hkʼaˬ hkʼe cawˬ ve le? (Awˬ han htaꞈ nyi sheˍ.)

¹¹ Chi teˇ hkui 1,000 hkʼawꞈ ve awˬ yanˇ htaꞈ dawˇ nyi sheˍ. Liꞈ hpu hkʼaw kʼoˆ ve Yaˬhoˉvaˬ lehˬ, “laˬ tuˬ ve  awˬ yanˇ awˬ hkʼaw lo hkʼaˬ hkʼe hpehꞈ la tuˬ ve htaꞈ shiˍ gaˇ ve nyi ma yawˇ ngaˬ hui htaꞈ piˇ laˇ taˍ peuˬ ve yoˬ.” (Cuˇ yiˍ piˇ ve 3:11) Awˬ lawn chi nawˬ awˬ pon tcuhˉ kuiˬ hkʼaˬ hkʼe cawˬ ve, leh nawˬ Yaˬhoˉvaˬ geh meuˆ daꞈ ve htaꞈ kaꞈ tcuhˉ kuiˬ hkʼaˬ hkʼe cawˬ ve le? Yaˬhoˉvaˬ geh meuˆ daꞈ˗o liꞈ kʼoˆ liꞈ mehˆ hpfuhˇ 319 hkʼaw kʼoˆ ve, “Ngaˬ hui laiˉ ha hkʼawꞈ, laiˉ hinˉ hkʼawꞈ, maˇ heˆ leh laiˉ lanˬ hkʼawꞈ, a shaꞈ gʼa teꞈ chehˇ ve kʼo, chi teˇ hkui aꞈ kehˉ ngaˬ hui Yaˬhoˉvaˬ htaꞈ hkʼa dehꞈ shiˍ daꞈ tuˬ yoˬ. Chi teˇ hkui ngaˬ hui Yaˬhoˉvaˬ htaꞈ caˉ daꞈ ve maˇ shiˍ sheˍ ve nyi ma pfuhˇ lawꞈ lawꞈ ve laiˉ lawn htaꞈ gʼa kʼawꞈ shiˍ tuˬ yoˬ. . . Miˬ guiˬ awˬ suhˉ hkʼaw co co taiˍ taiˍ ve a shaꞈ daꞈ jaˇ leh a yeˇ uiˍ jaˇ ve lehˬ, ngaˬ hui Yaˬhoˉvaˬ geh hkʼaˬ htaˆ kaꞈ gʼa meuˆ daꞈ tuˬ yoˬ.” Ngaˬ hui aˬ htoꞈ ma ve awˬ lawn htaꞈ henˇ leh hpfuhˆ nyi gʼa sheˍ ve teˇ geh nyi sheˍ.

12. Mvuhˇ naw ma lo ngaˬ hui hkʼaˬ hkʼe te chiˇ nyi gʼa tuˬ le? Tawˇ pa haˉ kʼoˆ maˍ laˇ sheˍ.

¹² “Uiˍ jaˇ mvuh jaˇ ve” Yaˬhoˉvaˬ ve awˬ nyi htaꞈ caˉ daꞈ ve Liꞈ hpu hkʼaw hkʼa dehꞈ maˇ gʼa kʼoˆ laˇ taˍ. (Iˉsaˍyaˆ 33:5) Yaꞈ hkʼaˇ, Yaˬhoˉvaˬ leh mvuhˇ naw ma hkʼoˆ yawˇ ve kanˉ hkʼaˇ htaꞈ caˉ daꞈ ve, nyi ma pfuhˆ lawꞈ lawꞈ ve awˬ lawn ngaˬ hui shiˍ tuˬ Liꞈ hpu hkʼaw maˍ laˇ taˍ ve yoˬ. (Iˉsaˍyaˆ 6:1-4; Daˍyeˍlaˆ 7:9, 10; Hpeuꞈ maˍ ve 4:1-6) Oˇ htaˇ Yeˍsaˍkeˍlaˆ lehˬ ‘mvuhˇ naw ma hpaw leh awˬ ha hkʼaw yawˇ Gʼuiˬ sha ve kanˇ paˆ laiˉ ceuˬ htaꞈ’ gʼa mawˬ ve htaꞈ caˉ daꞈ ve ngaˬ hui gʼa gʼaw ve yoˬ.—Yeˍsaˍkeˍlaˆ 1:1.

13. Heˍbrehˇ liꞈ 4:14-16 hkʼaw kʼoˆ taˍ ve hkʼe, mvuhˇ naw ma hkʼoˆ Yeˍsuˆ ve awˬ vuiˬ htaꞈ nawˬ hkʼaˬ hkʼe dawˇ ve le?

¹³ Chi hkʼoˆ kaꞈ, mvuhˇ naw ma hkʼoˆ Yeˍsuˆ ve awˬ vuiˬ htaꞈ kaꞈ dawˇ nyi sheˍ. Chi teˇ hkui Yeˍsuˆ lehˬ ngaˬ hui ve Jawˇ mawˇ leh ha kʼaˉ puiˉ jaˇ ve Paw hkuˇ lonˉ kaꞈ hpehꞈ ve yoˬ. “Ngaˬ hui ha kʼaˉ ve teˇ ceuˬ htaꞈ kaꞈ loˍ ve awˬ yanˇ awˬ hkʼaw lo ga laˇ tuˬ” ve htaꞈ gʼa tuˬ ‘Gʼuiˬ sha awˬ bon uiˍ ve kʼaw jaw awˬ paˇ lo ngaˬ hui’ jiˆ kʼai leh bon lawˬ gʼa ve yoˬ. (Heˍbrehˇ 4:14-16 gʼaw sheˍ.) Yaˬhoˉvaˬ leh Yeˍsuˆ ngaˬ hui awˬ pon aˬ htoꞈ ma te laˇ ve htaꞈ teˇ nyi le le hkʼa dehꞈ dawˇ nyi leh, chi teˇ hkui ngaˬ hui awˬ pon aˬ htoꞈ ma te chehˇ ve htaꞈ kaꞈ hkʼa dehꞈ dawˇ nyi sheˍ. Yaˬhoˉvaˬ leh Yeˍsuˆ ngaˬ hui htaꞈ haꞈ jaˇ ve gʼa shiˍ htaˇ, chi  ve ngaˬ hui yawˇ ve kanˉ te gaˇ tuˬ te laˇ leh kaiˬ ve hkʼaw yawˇ htaꞈ oˉ kʼoˍ pui gaˇ tuˬ kaꞈ te laˇ ve yoˬ.—2 Kawˇrenˍhtuˆ 5:14, 15.

14. Yaˬhoˉvaˬ leh Yeˍsuˆ htaꞈ awˬ bon uiˍ jaˇ tehꞈ hpehꞈ maw piˇ tuˬ ngaˬ hui te gʼa ve daꞈ jaˇ ve teˇ hkʼaˇ lehˬ aˬ htoꞈ ma le? (Awˬ han htaꞈ nyi sheˍ.)

¹⁴ Yaˬhoˉvaˬ leh Yeˍsuˆ htaꞈ awˬ bon uiˍ jaˇ tehꞈ hpeuꞈ maw piˇ ve a yeˇ uiˍ jaˇ ve teˇ ceuˬ lehˬ, awˬ nu ve chaw Yaˬhoˉvaˬ ve Shaˉhkiˆhkanˍ ve chaw hpehꞈ la tuˬ leh Yeˍsuˆ ve awˬ laꞈ gʼawˇ hpehꞈ la tuˬ ngaˬ hui coˇ caˇ leh ga piˇ ve yoˬ. (Maꞈhtehˍ 28:19, 20) Pawˇluꞈ kaꞈ chi hkʼa shuˍ shuˍ te ve yoˬ. Yaˬhoˉvaˬ loˍ ve awˬ ceuˬ htaꞈ yawˇ shiˍ ve pa taw, “chaw hkʼa peu˗eˬ htaiˍ hkʼawꞈ ve htaꞈ gʼa tuˬ ve awˬ hkʼoˆ kaꞈ hteˇ ve cawˇ ve htaꞈ shiˍ la tuˬ” yawˇ te gaˇ ve yoˬ. (1 Tiˆmoˉseˍ 2:3, 4) Pawˇluꞈ chaw maˇ maˇ htaꞈ ha lehˬ ve bon hkawˇ maˍ piˇ ve yoˬ. Yawˇ chi hkʼe te ve lehˬ, “hkʼaˬ hkʼe te leh chaw teˇ hpaˍ hpaˍ htaiˍ hkʼawꞈ ve htaꞈ gʼa tuˬ” te ve yoˬ.—1 Kawˇrenˍhtuˆ 9:22, 23.

15. Chiˇ mvuh ve liꞈ 1:2 hkʼaw kʼoˆ taˍ ve hkʼe, ngaˬ hui ha lehˬ tuˬ te laˇ gʼa ve aˬ htoꞈ ma cawˬ ve le?

¹⁵ Chiˇ mvuh ve liꞈ bvuhꞈ paˍ kʼoˆ maˍ laˇ ve, ha lehˬ ve chaw lehˬ teˇ ceuˬ le le te gʼa ve chaw hpehꞈ leh “Gʼuiˬ sha ve awˬ liˇ tawˇ hkawˇ htaꞈ na yuˬ leh, mvuhˇ lawꞈ kʼaw mvuhˇ hpeuꞈ henˇ yuˬ tcuhˉ taˍ ve yoˬ.” (Chiˇ mvuh ve 1:1-3) Liꞈ hpu yuˬ tawˆ paˍ Yoˇsehꞈ Raˆhteuˬfawˍ Liꞈ hpu awˬ tawn chi htaꞈ caˉ daꞈ ve kʼoˆ maˍ laˇ ve, “chaw yaˇ Gʼuiˬ sha beˆ maˍ laˇ ve htaꞈ gʼa gaˇ ve pa taw, hpfuhˆ nyi ve, henˇve, leh beˆ maˍ laˇ ve htaꞈ caˉ daꞈ ve, awˬ yanˇ yehˇ leh hkʼa dehꞈ dawˇ nyi ve yoˬ.” Yawˇ kʼawꞈ kʼoˆ sheˍ ve, “chaw yaˇ hkʼaˬ ve teˇ nyi Liꞈ hpu maˇ gʼa gʼaw ve kʼo, oˇ ve teˇ nyi hkʼaw awˬ bon maˇ gʼa ve yoˬ.” Nawˬ kaꞈ Liꞈ hpu henˇ ve htaꞈ ha lehˬ gʼa ve lehˬ, Liꞈ hpu henˇ taˍ ve htaꞈ te gʼa ve hkʼe hkʼa dehꞈ hpfuhˆ nyi leh Liꞈ hpu hkʼaw awˬ lawn teˇ hpaˍ hkʼaˬ hkʼe caˉ daꞈ taˍ ve htaꞈ kaꞈ hpfuhˆ nyi gʼa ve yoˬ. Liꞈ hpu hkʼaw hkʼa dehꞈ shiˍ ve lehˬ ha lehˬ tuˬ te laˇ ve yoˬ.

16. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

¹⁶ Liꞈ hpu hkʼaw awˬ tehˬ ve awˬ lawn Yaˬhoˉvaˬ ngaˬ hui htaꞈ maˍ laˇ ve lehˬ, na gʼa tuˬ haˍ jaˇ ve maˇ heˆ. Awˬ tehˬ ve htaꞈ caˉ daꞈ ve tcuhˉ kuiˬ naˉ jaˇ ve teˇ lawn lehˬ, co ha hpawˇ ve Yaˬhoˉvaˬ ve bon yehˇ lonˉ htaꞈ caˉ daꞈ ve, gʼuˇ suhˍ teˇ lawn hkʼaw teˇ geh henˇ tuˬ yoˬ. Chi ve lehˬ, Pawˇluꞈ Heˍbrehˇ chaw Hkriꞈ yaˇ htaꞈ liꞈ bvuhꞈ piˇ ve hkʼaw kʼoˆ taˍ ve yoˬ. Awˬ lawn chi htaꞈ caˉ daꞈ ve nawˬ henˇ htaˇ ha lehˬ ve cawˬ piˇ sheˍ.