1-2. Le i muswelo’ka muyampe wa kutanga Bible ne kwifunda’ye? Leta kimfwa.

 LANGA’PO bidi ukimba kukwata butyibi bwa kupota njibo. Le i bika byokasaka kumona kumeso kwa kukwata butyibi? Lelo i enka foto’tu ya mwikadile njibo kumeso? Na bubine ukasaka kwimwena njibo abe mwine mwa kwiitadila momu ne momu, kutwela munda mwanda wa kutala mwikadile byumba byonso, ne kumona moibaile. Ubwanya kukimba enka ne kubandaula mobaūbakile njibo’ya. Bine, ukakimba kuyuka kanda ne kanda katala njibo yokimba kupota.

² Bino ye byotubwanya ne kulonga kitatyi kyotutanga Bible ne kwifunda’ye. Mufundi umo wa Bible udingakanya musapu wa mu Bible na “njibo mikatampe milumbuluke ya biteba bilampe ne na kyalwilo kitwele panshi bininge.” Le penepo, i muswelo’ka otubwanya kuyuka senene myanda idi mu Bible? Shi utanga’tu bukidibukidi, ubwanya kuyuka’mo’tu enka myanda ya kyalwilo—ko kunena’mba “bintu bya kyalwilo bya binenwa bikola bya Leza.” (Bah. 5:12) Inoko, pamo enka bwa muntu ukimba kupota njibo, twela “munda” ubandaule kanda ne kanda na katentekeji. Muswelo muyampe wa kwifunda Bible i wa kubandaula mukwatañenine bipindi palapala bya musapu udi’mo. Longa bukomko bwa kwivwanija bubine bwine boitabije ne kine kyowibwitabijije.

3. Le mutumibwa Polo wākankamikile banababo bene Kidishitu balonge bika, ne mwanda waka? (Bene Efisesa 3:​14-19)

³ Pa kwivwanija senene Kinenwa kya Leza mu bula ne mu bunkimbwa, tufwaninwe kwifunda bubine bwa mushike budi’mo. Mutumibwa Polo wākankamikile banababo bene Kidishitu befunde Kinenwa kya Leza na kininga, mwanda wa bevwanije “ne pa mfulo mwikadile bunkimbwa ne bulampe ne bula bwa mūlu ne bula bwa munshi” bwa bubine. Mu uno  muswelo, bādi ba kwikadila’ko “bāle miji kadi bashimatyije” mu lwitabijo. (Tanga Bene Efisesa 3:​14-19.) Netu ye byotufwaninwe kulonga. Nanshi tubandaulei’ko muswelo otubwanya kwifunda Kinenwa kya Leza na katentekeji amba twivwanije ne pa mfulo musapu udi’mo.

4. Le i bika byotubwanya kulonga pa kufwena kudi Yehova? Leta bimfwa.

⁴ Batwe bene Kidishitu, ketusangelangapo’tu enka kwivwanija bubine bwa kūlukūlu bwa mu Bible. Na bukwashi bwa mushipiditu wa Leza, twikalanga na kipyupyu kya kwifunda ‘enka ne bintu bya mushike bya Leza.’ (1 Ko. 2:​9, 10) Le wabulwapo kushilula mu kifundwa kyobe kya pa kasuku na kwifunda myanda ikakufwenya bininge pabwipi na Yehova? Kimfwa, ubwanya kushilula kwifunda na katentekeji myanda ya mwālombwedile Yehova buswe ku bengidi bandi ba pa kala, ne kumona moikukulupijija amba ukusenswe ne abe. Ubwanya kubandaula mpangiko ya butōtyi yobātūdile’ko bene Isalela kudi Yehova ne kwiidingakanya na mpangiko yatūdile’ko bene Kidishitu dyalelo. Nansha kadi ubwanya kwifunda na mushike bupolofeto bwāfikidije Yesu mu būmi bwandi ne mu mwingilo wandi wa pano pa ntanda.

5. Le kudi mwanda kampanda obwanya kwitungila kitungo kya kulongela’po bukimbi mu kifundwa kya pa kasuku?

⁵ Bantu bamo befundanga Bible na kininga baipangwilwe pa bintu bya mushike byobasaka kwifunda mu Kinenwa kya Leza. Bilondololwa bimobimo byobaletele bidi mu kapango “ Myanda ya Kwifunda mu Kifundwa kya pa Kasuku.” Ubwanya kutana nsangaji mu kwifunda ino myanda na kwingidija dibuku Index nansha Dibuku dya Bukimbi dya Batumoni ba Yehova. Kwifunda Bible na mushike kubwanya kukomeja lwitabijo lobe ne kukukwasha utane “buyuki bwa Leza.” (Nki. 2:​4, 5) Shi ke pano, tutalei’ko bubine kampanda bwa mushike bwa mu Bible botubwanya kwifunda.

6. (a) Le i kwishila’ka kudi pa bukata bwa kintu kilangwa kulongwa ne mpango? (b) I bika bilombola’mba mpango ya Yehova pa muntu ne ntanda i ya “nyeke”? (Bene Efisesa 3:11)

⁶ Tubandaulei’ko kimfwa byobya binena Bible pa mpango ya Leza. Kudi kwishila  kukatampe pa bukata bwa kukimba kulonga bintu na mpango. Kukimba kulonga bintu kudi pamo bwa dishinda dikutwala ku kifuko kokimba kufika. Ino shi ubatana bijika mwishinda ubwanya kukomenwa kukafika’ko. Inoko mpango i kifuko kine kokimba kukafika. Uyukile senene kwine kosaka kukafudija lwendo lobe, inoko ubwanya kwingidija mashinda palapala pa kukafika’ko. Shi dishinda kampanda dibaikala na bikoleja, ubwanya kusela dishinda dikwabo. Tufwija’ko Yehova mwanda i mwitusokwele bityebitye yandi “mpango ya nyeke” mu Bible. (Ef. 3:11) Nansha shi bikale namani, Yehova ukafikidija nyeke mpango yandi, ke-pantu i mulonge “bintu byonso mwanda wa mpango yandi.” (Nki. 16:4) Kadi byonso bilupuka ku bilonga Yehova bikalādila nyeke. Le mpango ya Yehova i ya namani, ne i bujadiki’ka bwaalongele mwanda wa kwiifikidija?

7. Le pātombokele bantu babajinji, Yehova wājadikile namani muswelo wa kufikidija mpango yandi? (Mateo 25:34)

⁷ Leza wāsapwidile bantu babajinji mpango yaādi nayo pobadi. Wēbasapwidile amba: “Butulai mwivudijei, muyuje ntanda ne kwiinekenya, kadi bikalai . . . bipangwa byonso byūmi” pa ntanda. (Ngo. 1:28) Ba Adama ne Eva pobātombokele, bālengeje bubi butwele mu muzo wa muntu, inoko kebāshintyilepo mpango ya Yehova. Yehova wājadikile muswelo wa kwiifikidija. Kiponka na ponka, wākwete butyibi bwa kutūla’ko Bulopwe momwa mūlu, bwine bukafikidija mpango yandi mibajinjibajinji itala bantu ne ntanda. (Tanga Mateo 25:34.) Pa kitatyi kyaātungile, Yehova wātumine pa mwanda wa buswe wandi Mwana umbedi pano pa ntanda, amba afundije bantu myanda ya Bulopwe ne kupāna būmi bwandi mwanda wa kwitukūla ku bubi ne lufu. Kupwa Yehova wāsangula Yesu wājokela mūlu mwanda wa kuludika bu Mulopwe wa Bulopwe bwa Leza. Inoko kudi bintu bivule bya kwifunda pa mpango ya Leza.

8. (a) Le i mwanda’ka mukatampe wisambila’po Bible? (b) Le mungya Bene Efisesa 1:​8-11, i mpango’ka mikatampe idi na Yehova? (Tala kifwatulo pa kibalu.)

⁸ Mwanda mukatampe wisambila’po Bible i wa amba, dijina dya Leza dikabingijibwa kitatyi kyakafikidija mpango yandi itala ntanda, kupityila ku Bulopwe bwandi buludikwa na Kidishitu. Mpango ya Yehova keibwanyapo kushinta. I mulaye amba ukafikidija bintu byonso enka mwaebilaile. (Isa. 46:​10, 11, kunshi kwa dyani.; Bah. 6:​17, 18) Mu kine kitatyi’kya, ntanda ikekala ke paladisa mwine mukekala lutundu lwa Adama ne Eva lwa bantu babwaninine, boloke, kadi ‘bōmi nyeke.’ (Ñim. 22:26) Inoko mpango ya Yehova keimaninepo’nka papo. Mpango yandi mikatampe i ya kulungila mu bumo bipangwa byandi byonso bya ñeni bya momwa mūlu ne pano pa ntanda. Ebiya bino bipangwa byonso byūmi bikamukōkelelela bu Mubikadi wabyo. (Tanga Bene Efisesa 1:​8-11.) Lelo kutulumukilepo pa uno muswelo muyampe ufukidija Yehova mpango yandi?

9. Le kutanga Bible kubwanya kwitukwasha namani tumone bintu bya kumeso?

⁹ Tubandaulei’ko bupolofeto bwānenene Yehova mu budimi bwa Edena, budi mu Ngalwilo 3:15. b Bwādi bwisambila pa binkumenkume bikafikidija mpango yandi, inoko bikalongeka myaka tununu ne tununu pa kupita’po. Mu bino binkumenkume mwādi mubadilwa kumweka kwa lutundu lwa Abalahama, musuku wādi wa kutwala ku kubutulwa  kwa Kidishitu. (Ngo. 22:​15-18) Ebiya mu mwaka wa 33 Y.M., Yesu wāsanshijibwa ku kapondo, monka mobyālailwe. (Bil. 3:​13-15) Na pano, kukishele myaka 1000 ne kupita pa kusaka’mba kipindi kya mfulo kya buno bupolofeto kya kusonsakanibwa kwa mutwe wa Satana kifikidile. (Kus. 20:​7-10) Kadi Bible witusokwela’ko myanda mikwabo pa byobya bikalongeka kitatyi kikanana lwana ludi pa bukata bwa ngikadilo ya bintu ya Satana ne bulongolodi bwa Yehova.

10. (a) Le i binkumenkume’ka bya kumeso bisa kulongeka panopano? (b) Lelo i muswelo’ka otubwanya kuteakanya ñeni yetu ne mutyima? (Tala kunshi kwa dyani.)

¹⁰ Langulukila pa binkumenkume bya kutendelwa bilaile Bible. Kibajinji, mizo ikēla lubila lwa “ndoe ne mutyima-ntenke!” (1 Ts. 5:​2, 3) “Mu kitulumukila,” kyamalwa kikatampe kikashilula kitatyi kikatamba mizo bulwi mitōtelo yonso ya bubela. (Kus. 17:16) Kupwa papo, kubwanya kukekala kumweka kwa mu kingelengele kwa “Mwanā muntu wiya pa makumbi a mūlu na bukomo ne ntumbo mikatampe.” (Mat. 24:30) Yesu ukatyibila bantu mambo na kusansanya mikōko ne bambuji. (Mat. 25:​31-33, 46) Nansha nankyo, Satana ukendelela kulwa na Yehova ne mu kine kitatyi’kya. Byashikilwe bantu ba Yehova, ukatonona mizo mīkutyile mu bumo mine itela Bible bu Koka wa ntanda ya Makoka, itambe bulwi bantu ba Yehova. (Ezk. 38:​2, 10, 11) Kufika kitatyi kampanda, bashingwe māni bashele’ko bakabungakanibwa momwa mūlu pamo na Kidishitu ne bibumbo byandi bya momwa mūlu, mwanda wa kulwa divita dya Amakedona, mfulo ya kyamalwa kikatampe. c (Mat. 24:31; Kus. 16:​14, 16) Ebiya Umbikalo wa Myaka Kanunu wa Kidishitu pano pa ntanda ukashilula.—Kus. 20:6.

11. Le kyepelo kya kwikala na būmi bwa nyeke kishintulula bika kodi? (Tala ne kifwatulo.)

¹¹ Shi ke pano, tompa kulangulukila bininge pa būmi bwa kumeso. Bible unena’mba Umpangi wetu “i mutūle’nka ne kitatyi kya nyeke ne nyeke mu mutyima [wetu].” (Mus. 3:11) Langulukila pa mobishintwila kodi ne pa kipwano kyobe na Yehova. Dibuku Fwena Kudi  Yehova, pa paje 319, dinena bino binenwa bisangaja bya amba: “Abe wikele’tu, myaka tutwa pa, myaka tununu pa, kwadi tununu ke midiyo, yadi midiyo ke midiyala, bine ketukabulwe’po kuyuka bivule padi Yehova Leza kutabuka byotuyukile dyalelo. Nansha nankyo, tukamona’mba kukidi’nka bintu bivule bitendelwa bya kwifunda. . . . Būmi bwa nyeke bukekala na bintu bivule kadi bishileshile byoketubwanyapo kufwatakanya—mu ino mpalo mubadilwa ne ya kufwena nyeke pabwipi na Yehova.” Pano’ko bidi potukyendelela kwifunda Kinenwa kya Leza, le i bintu’ka bikwabo byotubwanya kwifunda?

12. Le i muswelo’ka otubwanya kwela meso mu madiulu? Leta kimfwa.

¹² Kinenwa kya Leza kitusokwela’ko myanda mityetye pa mwikadile Yehova “momwa mūlu mulampe.” (Isa. 33:5) Bible witusokwela’ko bintu bya kutendelwa padi Yehova ne pa kipindi kya momwa mūlu kya bulongolodi bwandi. (Isa. 6:​1-4; Dan. 7:​9, 10; Kus. 4:​1-6) Kimfwa, tubwanya kutanga myanda ya bintu bilenga nzuba byāmwene Ezekyele ‘pāshitukile madiulu, wamona bimonwa bya Leza.’—Ezk. 1:1.

13. Le kukwatañana na Bahebelu 4:​14-16, i bika bikusangaja pa mwingilo wa Yesu wa momwa mūlu?

¹³ Kadi langulukila ne pa mwingilo wa Yesu wa momwa mūlu wa bu Mulopwe wetu ubikele ne wa bu Kitobo Mukatampe wa lusa. Kupityila kwadi, tubwanya kufwena “ku lupona [lwa Leza] lwa kanye ka ku buntu bitupu” mu milombelo, ne kumulomba etufwile lusa ne kwitukwasha “pa kitatyi kifwaninwe.” (Tanga Bahebelu 4:​14-16.) Nanshi ketwakapityijai difuku pampikwa kulangulukila pa byobya bitulongēle ba Yehova ne Yesu, ne pa byobetulongela pano tamba momwa mūlu. Buswe bwabo bufwaninwe kutenga mityima yetu bininge  ne kwitulengeja tupyasakene kutōta Yehova.—2 Ko. 5:​14, 15.

14. Le i kintu’ka kimo kiyampe kyotubwanya kulonga mwanda wa kulombola’mba tufwijanga’ko bininge ba Yehova ne Yesu? (Tala ne bifwatulo.)

¹⁴ Muswelo umo bidi muyampe otubwanya kulombola’mba tufwijanga’ko Leza ne wandi Mwana, i na kulonga bukomo bwa kukwasha bantu bakwabo bekale Batumoni ba Yehova ne bana ba bwanga ba Yesu. (Mat. 28:​19, 20) Bino byo byālongele mutumibwa Polo mwanda wa kufwija’ko Leza ne Kidishitu. Wāyukile amba kiswa-mutyima kya Yehova i kya amba “bantu ba miswelo yonso bapande ne kwikala na buyuki bwinebwine bwa bubine.” (1 Tm. 2:​3, 4) Wāingile bininge mwingilo wandi mwanda wa kukwasha bantu bavule, amba amone “kupandija’mo bamo mu miswelo yonso.”—1 Ko. 9:​22, 23.

15. Le kukwatañana na Ñimbo ya Mitōto 1:​2, i bika biketuletela nsangaji?

¹⁵ Kaimba wa mitōto wādi na bubinga bwa kunenena’mba muntu wa nsangaji ne wa bintu byendeka biyampe mu būmi, i yewa “uloelelwe bijila bya Yehova” ne “ulangulukila pa bijila Byandi.” (Ñim. 1:​1-3; kunshi kwa dyani.) Joseph Rotherham, mwalamuni umo wa Bible unena pangala pa kino kisonekwa mu dibuku dyandi Bwifundi bwa Ñimbo ya Mitōto dya mu Angele amba, muntu ufwaninwe “kusangela bininge buludiki bwa Leza amba ebukimbe, efunde’bo, ne kwitūdila’ko kitatyi kifwaninwe kya kulangulukila’po.” Kadi ubweja’ko amba, mutangi wa Bible ufwaninwe “kumona difuku dyonso dyapityija pampikwa kutanga Bible bu difuku dyaasupakanya.” Ubwanya kutana nsangaji mu kwifunda Bible na kuta mutyima ku myanda yonso isangaja idi’mo, ne kumona muswelo oikwatañene. Bine, bisangaja’po kashā kwifunda na mushike Kinenwa kya Leza!

16. Lelo i bika byotukesambila’po mu kishinte kilonda’ko?

¹⁶ Bubine bulumbuluke bwitufundija Yehova mu Kinenwa kyandi ke bukomopo kwivwana. Mu kishinte kilonda’ko, tukabandaula’mo bubine bumo bwa mushike—tempelo mikatampe ya Yehova ya ku mushipiditu, mine yēsambīle’po Polo mu mukanda waātumīne bene Kidishitu Bahebelu. Tulomba mutane nsangaji mikatampe mu kwifunda uno mwanda.