1-2. Jila muka yamwaza yakutangilamo Mbimbiliya nakulinangulayo? Hanenu chakutalilaho.

 ACHISHINGANYEKENU muli nakusaka kulanda zuvo. Chuma muka namusaka kumona shimbu kanda mulande zuvo kana? Kutala namusaka kumitalisa kaha fwato yakusolola kumeso ayo tahi? Twafwelela ngwetu namusaka kulimwenayo enu vavene nakwingila mukachi nakumona tupete twayo nakutohwa chayo. Munahase nawa kufwila kutachikiza jila vayitungilamo. Chikupu vene, namusaka kutachikiza kanawa eli limbo lyenu muli nakusaka kwalukila.

² Omu mukiko tunahase kulinga nge tuli nakutanga Mbimbiliya nakulinangulayo. Muka-kusoneka umwe afwanyishile Mbimbiliya “kuzuvo yayisuku yize vatungila hachihela chize vakunamisa chikuma.” Jino vyuma muka twatela kulinga mangana twivwishise kanawa Mbimbiliya? Nge namuyitanga mulumbushi, munahase kulinangula kaha muchano waheluhelu uze wapwa “vyuma vyamaputukilo vyavihande vyajila vyaKalunga.” (Hepe. 5:12) Oloze mwatela kwingila “mukachi” ngana muze namwingila muzuvo nakuyikekesa. Jila yamwaza yakulinangwilamo Mbimbiliya shina kumona omwo mijimbu yatwamamo yalikwatasana. Kanda kukumina kaha hakutachikiza vyuma mwafwelelako, oloze mwatela kutachikiza nawa ovyo vyamilingisa muvifwelele.

3. Uno kaposetolo Paulu akolezezele vandumbwenyi valinge ika, kaha mwomwo ika? (Wavaka-Efwesu 3:​14-19)

³ Hakusaka twivwishise chikuma Mazu aKalunga, twatela kulinangulanga  muchano wakujiminyina watwamamo. Kaposetolo Paulu akolezezele vandumbwenyi valinangulenga chikuma Mazu aKalunga mangana “[vamone] kanawa [muchano] muwihi, namuusuku, namukujindama helu, namukukunama.” Kaha kulinga ngocho chavakafwile ‘vajike miji nakuzama’ mulufwelelo. (Tangenu Wavaka-Efwesu 3:​14-19.) Omu mukiko twatela kulinganga nayetu. Tutalenu omwo tunahase kulinangula kanawa Mazu aKalunga mangana tuwevwishise chikuma.

4. Vyuma muka twatela kulinga mangana tupandame chikuma kuli Yehova? Hanenu vyakutalilaho.

⁴ Etu vaka-Kulishitu katwasaka kukumina kaha hakulinangula muchano wamuMbimbiliya wamaputukiloko. Tweji kufwilanga kulinangula “[navyuma] vyakujiminyina vyaKalunga” hakutukafwa nashipilitu yenyi yajila. (Koli. 1, 2:​9, 10) Munahase kulitomena kulinga chilongesa chauka mangana chimikafwe mupandame chikuma kuli Yehova. Chakutalilaho, munahase kukekesa omwo Yehova asolwelelele vangamba jenyi vakushikulu zangi nomwo nawa chuma kana chasolola nge nayenu amizanga. Munahase kukekesa vyuma alongesele Yehova muIsalele kutalisa kukumulemesa nomwo vyuma kana vyalifwana najila vaka-Kulishitu vali nakumulemeselamo makumbi ano. Chipwe munahase kulinangula upolofweto uze Yesu ateselemo omu apwile hano hamavu.

5. Kutala kuliko chihande chimwe muli nakusaka kuhehwojola hachilongesa chenu chauka tahi?

⁵ Vaka-kulinangula Mbimbiliya vamwe vakwipangweji vavalwezele vahanjike vyuma vyakujiminyina navasaka kukekesa muMazu aKalunga. Vyuma vimwe vahanjikile vanavisoneka mulipwata lyakwamba ngwavo “ Vihande Vyakujiminyina Munahase Kulinangula haChilongesa chaUka.” Munahase kulivwisa kuwaha kulinangula vihande kana hakuzachisa chinoma chaWatch Tower Publications Index chipwe Chinoma Chakukafwa Vinjiho jaYehova Kuhehwojola. Kulinangula vyuma vyakujiminyina vyamuMbimbiliya navimikafwa muzamise lufwelelo lwenu “nakupwa nachinyingi chakumutachikiza Kalunga.” (Vishi. 2:​4, 5) Tutalenu jino hamuchano umwe wakujiminyina wamuMbimbiliya uze tunahase kulinangula.

6. (a) Uno kunoneka kulinga vyuma chalihandunwina halihi nakujina kulinga vyuma? (b) Mwomwo ika natwambila ngwetu vyuma ajinyine Yehova hali vatu vyapwa ‘vyamyaka namyaka’?

⁶ Chakutalilaho, achishinganyekenu havyuma yahanjika Mbimbiliya kutalisa kuvyuma ajina Kalunga. Kunonekela chimweza kulinga chuma chalihandununa nakujina kulinga chuma. Kunoneka chuma tunahase kuchifwanyisa kukusakula jila mwatela kuya mangana muhete okwo muli nakusaka kuya. Oloze kunahase kupwa chuma chimwe chize chinahase kujika mujila, kaha kamweshi kuhasa kuheta kuchihela muli nakusaka kuyako. Kaha nawa tunahase kufwanyisa kujina kulinga chuma kuchihela chize tuli nakusaka kuya. Tunatachikiza kanawa kuchihela tuli nakusaka kuya, oloze tunahase kuzachisa jijila jakulisezaseza mangana tuhete kuchihela kana. Shikaho twasakwilila Yehova hakutusolwela chindende chindende “kujina chenyi chamyaka namyaka” muMbimbiliya. (Efwe. 3:11) Yehova eji kufukilanga muvyuma vyosena ajina mwomwo “nalongesa vyuma vyosena mangana atesemo kujina chenyi.” (Vishi. 16:4) Kaha vyuma eji kutesangamo vyapwa vyakwilila haya myaka. Vyuma muka ajina Yehova kaha vyuma muka nalumunangako mangana avitesemo?

7. Hanyima yakulikanga chavatu vatete Yehova alumwineko vyuma muka mangana atesemo vyuma ajinyine? (Mateu 25:34)

⁷ Kalunga alwezele vatu vatete vyuma ajinyine hali vakiko. Avalwezele ngwenyi, “Semenunga muvule chikuma, muzalise hamavu nakuwalamanga, kaha pwenunga nawata. . . [ha]vyuma vyakuyoya vyosena vyakutambuka” hano hamavu. (Kupu. 1:28) Omu Alama naEve valikangile nakwingisa shili muli vatu, Yehova kalitwaminyinyine kutesamo vyuma ajinyineko. Oloze alumwineko jila yakuviteselamo. Omu vatu vatete valikangile, hahaze vene ahakileko Wangana mwilu uze naukatesamo vyuma ajinyine hakavanga kutalisa kuvatu nakumavu. (Tangenu Mateu 25:34.) Yehova atumine Mwanenyi watwatwa halwola atongwele kwiza hano hamavu nakunangula vatu vyaWangana nakuhana kuyoya chenyi kupwa wana wandando yakutusokola kushili nakukufwa. Kutwala muze Yesu asangukile nakuya mwilu nakuyula hakupwa Mwangana waWangana waKalunga. Chipwe ngocho kuli vyuma vyavivulu vize twatela kuhunananaho kutalisa kuvyuma ajina Kalunga.

8. (a) Uno chihande muka chachinene vahanjika muMbimbiliya? (b) Ngana muze valumbununa hali Wavaka-Efwesu 1:​8-11, chuma muka chikwavo ajina kutesamo Yehova? (Talenu muvwimbimbi wahalipapilo lyahelu.)

⁸ Chihande chachinene vahanjika muMbimbiliya shina chomwo lijina lyaYehova navakalitohwesa hakutesamo vyuma ajina kutalisa kumavu kuhichila muWangana wenyi uze vayula kuli Kulishitu. Vyuma ajina Yehova kavyalumukako. Atushika ngwenyi mwakatesamo vyuma vyosena vize ajina. (Isa. 46:​10, 11; Hepe. 6:​17, 18) Mukuhita chalwola, mavu navakawalumuna kupwa palachise muze vana vaAlama naEve vakukupuka kaha nawa vakwoloka navakalivwisa “kuwaha kuyoya haya myaka yosena.” (Samu 22:26) Kuli nawa vyuma vyeka mwakatesamo Yehova. Chuma chikwavo ajina kulinga shina kulingisa vangelo mwilu navatu hamavu vakapwe vakulinunga hamwe. Kufumaho, vosena navakaliluula kuli Yehova kupwa Mwata wavo. (Tangenu Wavaka-Efwesu 1:​8-11.) Tunafwelela munevu kuwaha hakumona jila yamwaza Yehova eji kuteselangamo vyuma ajina.

9. Uno kutanga Mbimbiliya nachitukafwa ngachilihi tutachikize vyuma navikasoloka kulutwe?

⁹ Achishinganyekenu haupolofweto uze vahanjikile mumilemba yaEtene, uze vasoneka  hali Kuputuka 3:15. b Upolofweto kana wavulukile vyuma navikasoloka vize navikatesamo vyuma ajinyine Yehova, kaha upolofweto kana waputukile kutesamo omu hahichile myaka yayivulu. Chakutalilaho Kalunga alwezele Apalahama ngwenyi, omu namukahita myaka yayivulu nakukasemuka muka-tanga yenyi umwe uze mwakapwa Kulishitu. (Kupu. 22:​15-18) Kaha mu 33 C.E., Yesu vamutotele kukakukunya ngana muze vahanjikilile chimweza. (Vili. 3:​13-15) Kunasale myaka yakuzomboka 1,000 numba chuma chamakumishilo kuupolofweto kana chakuchika mutwe waSatana chikatesemo. (Kuso. 20:​7-10) Mbimbiliya yasolola vyuma vyavivulu vize navikasoloka omu nayikakuma kole yakaye kaSatana naliuka lyaYehova.

10. (a) Vyuma muka navisoloka kalinwomu? (b) Tunahase kulizanga ngachilihi muvishinganyeka namumuchima? (Talenu kwinyikila chamwishi.)

¹⁰ Achishinganyekenu havyuma vyakwivwisa woma navisoloka kulutwe vize Mbimbiliya yahanjikilile chimweza. Chatete, vaka-mafuchi navakavilika mutambi “[wa]kuunda namukingo.” (Teso. 1, 5:​2, 3) Kaha luyando lwalunene luze nalukaputuka omu vaka-mafuchi navakafumbukila kwitava chamakuli, nalukeza ‘mukukasumuna.’ (Kuso. 17:16) Hanyima yachuma kana, nakukapwa chuma chakukomwesa chakusolola “Mwanamutu ali nakwiza hamavwi amwilu nangolo naupahu waunene.” (Mateu 24:30) Yesu mwakasopesa vatu nakuhandununa mikoko kuvapembe. (Mateu 25:​31-33, 46) Halwola kana, Satana keshi kukatwama kaha mbombomaneko. Hakuwana nge ahunga chikuma vatu jaKalunga, ngocho mwakalingisa Ngonge wakulifuchi lyaMangonge, kulumbununa mafuchi aze nawakalifutula, akalukuke vaka-kulemesa Yehova vamuchano. (Ezeke. 38:​2, 10, 11) Kutwala muze, vasalaho vawavisa navakavakungulwila mwilu vakalinunge hamwe naKulishitu nalizavu lyenyi lyavaka-kwasa jita vangolo mangana vakalwe jita yaAlamangetone, yize nayikapwa chikukulwishi chaluyando lwalunene. c (Mateu 24:31; Kuso. 16:​14, 16) Kaha Chiyulo chaKulishitu chaMyaka 1,000 nachikaputuka.—Kuso. 20:6.

11. Uno lutalililo lwakukayoya haya myaka lwalumbununa ika kuli yenu? (Talenu nawa muvwimbimbi.)

 ¹¹ Achishinganyekenu jino havyuma navikasoloka hanyima yamyaka 1,000. Mbimbiliya yatulweza ngwayo Tengi yetu “nahake kuyoya chahaya myaka yosena mumichima [yetu].” (Kwambu. 3:11) Achishinganyekenu omwo echi kuyoya kana chalumbununa kuli yenu nahausoko wenu naYehova. Mukanda waPandama Kuli Yehova halifwo 319, wahanjika chishina chino chamwaza ngwawo: “Hanyima yakukatwama myaka yayivulu, natukatachikiza vyavivulu hali Yehova Kalunga kuzomboka hali evi tunejiva oholyapwa. Oloze natukevwanga lika ngwetu kuli vyuma vyavivulu vize kanda tulinangule. . . . Kuyoya chahaya myaka nachikapwa chakukupuka nakwivwisa kuwaha, kaha natukapandamanga lika kuli Yehova.” Uno vyuma muka vikwavo twatela kukekesa oholyapwa omu tuli nakutwalaho lika kulinangula Mazu aKalunga?

12. Tunahase kumona ngachilihi mwilu? Hanenu chakutalilaho.

¹² Mazu aKalunga atulweza omwo chapwa kupwako chaYehova “mwilu.” (Isa. 33:5) Mbimbiliya yasolola vyuma vyakukomwesa kutalisa kuli Yehova nachihanda chaliuka lyenyi chamwilu. (Isa. 6:​1-4; Ndanye. 7:​9, 10; Kuso. 4:​1-6) Chakutalilaho, tunahase kulinangula vyuma vyakukomwesa vize amwene Ezekele omu ‘mwilu mwasokolokele, nakumona vyakumumwenesa vyakuli Kalunga.’—Ezeke. 1:1.

13. Uno muli nakwivwa ngachilihi hamilimo ali nakuzata Yesu mwilu, kweseka nomu vanasolola hali WavaHepeleu 4:​14-16?

¹³ Shinganyekenu nawa hamulimo atwama nawo Yesu mwilu hakupwa Mwangana wetu, kaha nawa Kapilishitu Wakulitulaho muka-kutetela. Tunahase kupandama “kulitanda lyaKalunga lyalikoji lyalinene” hakulomba kuhichila muli ikiye, nakulomba nawa vatutetele nakutukafwa “halwola lwakutamo.” (Tangenu  WavaHepeleu 4:​14-16.) Shikaho, hakumbi hakumbi twatela kushinganyekanga havyuma vize Yehova naYesu vatulingila navize vali nakutulingila mwilu. Zangi yavo yatela kutukwata kumichima nakutukunyula tupwenga natwima yakuzachila Yehova.—Koli. 2, 5:​14, 15.

14. Chuma muka chamwaza twatela kulinga chize nachisolola nge twasakwilila Yehova naYesu? (Talenu nawa mivwimbimbi.)

¹⁴ Jila yimwe yamwaza yakusakwilila Kalunga ketu naMwanenyi shina kukafwa vakwetu vapwenga Vinjiho jaYehova nakupwa tumbaji twaYesu. (Mateu 28:​19, 20) Omu mukiko alingile nakaposetolo Paulu hakusaka kusakwilila Kalunga naKulishitu. Atachikijile ngwenyi Yehova ajina ngwenyi “vatu vosena vavalwile, ngwenyi, vapwenga nachinyingi chakwoloka chakutachikiza muchano.” (Chimo. 1, 2:​3, 4) Akilikichile hakwambulila vatu vavavulu “mangana numba chipwa tuhu ngachilihi, [ahase] kulwilako vamwe.”—Koli. 1, 9:​22, 23.

15. Kweseka namukanda waSamu 1:​2, vyuma muka navitulingisa tuwahilile?

¹⁵ Muka-kwimba jisamu avulukile ngwenyi, mutu wakuwahilila kaha nawa wakufukila, shina uze “evwila kuwaha jishimbi jaYehova” uze nawa eji “kujishinganyekanga musana naufuku.” (Samu 1:​1-3) Muka-kwalumuna Mbimbiliya umwe ahanjikile kutalisa kujivesi kana ngwenyi, mutu atela “kuzanga chikuma jishimbi jaKalunga nakujitondatonda, nakulinangulajo nakujishinganyekanga chikuma.” Ambile nawa ngwenyi, “kachi nge likumbi nalilitokela chakuzeneka kutanga Mbimbiliya, kaha likumbi kana linalyenyeka.” Munahase kulivwisa kuwaha kulinangula Mbimbiliya hakwivwishisa vyuma vyakujiminyina nakumona omwo vyuma kana vyalikwatasana. Chikupu vene, chapwa hichuma chamwaza kulinangula vyuma vyakujiminyina vyamuMazu aKalunga.

16. Vyuma muka natushimutwila muchihande chinakavangizaho?

¹⁶ Muchano wamwenemwene uze Yehova eji kutunangulanga muMazu enyi kawapwa waukalu kuwivwishisako. Muchihande chinakavangizaho, natushimutwila hamuchano umwe wakujiminyina. Muchano kana shina tembele yaYehova yayinene yakushipilitu, yize Paulu alumbunwine mumukanda uze asonekelele vaka-Kulishitu vavaHepeleu. Shikaho, livwisenu kuwaha chikuma kulinangula chihande kana.