1-2. Njilanyi yayiwahi yakutañilamu Bayibolu nikuyidiza? Shimunenu chakutalilahu.

 FWIKIJENU munakukeña kulanda itala. Chumanyi chimukukeña kumona henohu kanda mudilandi? Komana mukukeña hohu kumona mwevulu wachidinakumwekana odu itala hanji? Chakadi nikujina, mukukeña enu aweni kuya nakudimona kulonda muhitañani nakumona chidinakumwekana hanji, mwiñili mukachi nakutala chidi tupeka nikutalatala chiwahi chididi dejima. Hadaha mukukeña kumona pulani yanodu itala chiyidi kulonda mwiluki chadituñiliwu. Chakadi nikujina, mukukeña kwiluka yuma yejima yinakundami kunodu itala dimunakukeña kulanda.

² Dichitwatela kwila nihampinji yitunakutaña Bayibolu nikuyidiza. Nsoneki waBayibolu wumu wahosheli nindi “Bayibolu yidi neyi itala deneni, dadilehi nankashi nawa datuñilawu hachikuku chakunama.” Hanu dinu tunateli kwiluka ñahi chiwahi yuma yejima yekala muBayibolu? Neyi muyitañaña lufuchi-lufuchi, mukwiluka hohu yuma yantesha, dikwila nawu “yuma yakutachikilahu yansañu yajila yaNzambi.” (Heb. 5:12) Ilaña neyi chochimunateli kwiñila mwitala kulonda mudiluki chiwahi odu itala, dichimwatela ‘nikudiza Bayibolu’ nakanañachima kulonda mwiluki chiwahi yuma yekalamu. Njila yayiwahi yakudizilamu Bayibolu hikumona chibalu chimu chansañu chichinanuñañani nachibalu chikwawu. Fwilenuña kutiyishisha chalala chimwakuhwelela nimuloña waweni waleteshaña muchikuhweleli.

3. Kapostolu Pawulu wakonkomweneni akwawu akaKristu kwiladi, nawa muloñadi? (AEfwesesa 3:​14-19)

³ Hakwila tutiyishishi chalala chejima chaMwizu daNzambi, twatela kudiza chalala chamuBayibolu chakunama. Kapostolu  Pawulu wakonkomweneni amanakwindi niahela akaKristu kudiza chikupu Izu daNzambi kulonda “[atiyishishi] chikupu mwatalisha wihi, kuleha, chiiminu nikukunama” kwachalala. Chikufumamu, ‘akushimata nikutuñewa’ muchikuhwelelu chawu. (Tañenu AEfwesesa 3:​14-19.) Ninetu dichitwatela kwila. Tutalenu chitunateli kusandujola Mwizu daNzambi kulonda twiluki chikupu nsañu yekalamu.

4. Yumanyi yitwatela kwila hakwila tuswini kwakwihi naYehova? Shimunenu yakutalilahu.

⁴ Etu akaKristu, hitwakeñaña hohu kwiluka nsañu yakutachikilahu yamuBayiboluku. Nawukwashu waspiritu yajila yaNzambi, twafwilaña kwiluka “[niyuma] yakunama yaNzambi.” (1 Kor. 2:​9, 10) Kwila mushaku ntanjikilu yakutachika kudiza nkawenu kulonda musweji kuswina kwakwihi naYehova nehi? Chakutalilahu, munateli kusandujola kulonda mwiluki chayimwekesheleliyi ambuñindi akunyima kukeña nichamwekeshaña chumichi nawu ninenu wayikeña. Munateli cheñi kwiluka njila yakeñeleñayi Yehova nindi aIsarela adifukwileñamu kudi yena nakuyesekeja nanjila yakeñañayi nindi akaKristu adifukwileñamu makonu. Indi kwiji munateli kudiza hansañu yakunama yawuprofwetu washikijiliyi Yesu muchihandilu chindi chahanu hamaseki nimumudimu windi.

5. Kudihu nsañu yimukukeña kusandujolahu chikupu hakudiza nkawenu?

⁵ Antu amakwawu akeña kusandujola nankashi nsañu yamuBayibolu, ayihwili neyi kudihu yuma yakunama yinateli kukeñawu kudiza nkawawu Mwizu daNzambi. Ñakwilu jikwawu jakwiliwu jidi muchikasha chidi namutu nawu “ Nyitu Yimunateli Kusandujolahu haKudiza Nkawenu.” Munateli kudiluñisha chikupu kudiza haniyi nyitu kuhitila mukuzatisha Chitwa chaKukwasha aYinsahu jaYehova haKusandujola Nsañu. Kudiza chikupu nsañu yamuBayibolu kunateli kukolesha chikupu chikuhwelelu chenu nawa kukuyikwasha ‘kumwiluka Nzambi.’ (Yish. 2:​4, 5) Ichi dinu tuhanjekenu hachalala chikwawu chamuBayibolu chakunama chitwatela kusandujolahu.

6. (a) Lumbululenu chaleteshaña Yehova ashikijeña nkeñelu yindi mpinji yejima? (b) Muloñadi wutukuhoshela netu chuma chakeñañayi Yehova kwilila antu niiseki ‘chahaya nyaaka’? (AEfwesesa 3:11)

⁶ Chakutalilahu, talenu chahosha Bayibolu hankeñelu yaNzambi. Yehova wekala wanyi neyi antu atondaña njila yatela kuzatishawu kulonda ashiki kunakuyawu. Ilaña neyi munjila mudi mukoleku, hiyakutwesha kushika kunakuyawuku. Kwambukaku, nkeñelu yaYehova tunateli kuyesekeja neluña dadeni kunakuyawu. Wafuukula dehi iluña datela kuyayi, nawa nateli kuzatisha njila jamboka-mboka hakwila ashiki kwenoku. Kafwampi, Yehova natwalekihu kumwekesha “[nkeñelu] yindi yahaya nyaaka” muBayibolu. (Efwe. 3:11.) Yehova nateli kuzatisha njila jamboka-mboka hakwila ashikiji nkeñelu yindi, nawa dichelañayi mpinji yejima muloña “nakojeji yuma yejima kuzatika muloña wankeñelu yindi.” (Yish. 16:4) Nawa yuma yafumaña muyuma yelañayi Yehova yikatwalekahu haya nyaaka. Chumanyi chakeñañayi Yehova kwila, nawa yumanyi yinahimpiyi hakwila eli chumichi?

7. Hanyima yakwila antu atachi anadikañi dehi, Yehova wahimpili ñahi njila yakushikijilamu nkeñelu yindi? (Matewu 25:34)

⁷ Nzambi walejeli antu atachi chuma chakeñeleñayi nindi eli. Ateleleli ‘kusemununa kulonda avuli, kwinzesha iseki nawa adiidimeña, ekali nawanta . . . hayileñaleña yejima yayumi’ hamaseki. (Kutach. 1:28) Chelili aAdama naEva adikañi, nakuletesha nshidi kwiñila mudi antu ejima, chumichi hichamukañesheli Yehova kushikija nkeñelu yindiku. Wahimpili njila mwatela kushikijilayi nkeñelu yindi. Hohenohu, wafuukwilihu kushaku Wanta wamwiwulu wakashikija yuma yafuukwiliyi dehi hakusambila kuyilila antu niiseki. (Tañenu Matewu 25:34.) Hampinji yindi yatoñolayi, Yehova watemesheli Mwanindi wawedi hamaseki nakudizisha antu haWanta nikuhana wumi windi kulonda atukuuli kunshidi nikufwa. Kuhiñahu, Yesu amusañwili nakufunta mwiwulu nakuyuula hamu neyi Mwanta waWanta waNzambi. Ilana kudi yuma yayivulu yitwatela kwiluka kutalisha hankeñelu yaNzambi.

8. (a) Nsañwinyi yayeni yahoshañahu Bayibolu? (b) Kwesekeja nachinalumbululiwu haAEfwesesa 1:​8-11, chumanyi chacheni chafwilañayi Yehova kwila? (Talenu mwevulu wudi hakava.)

⁸ Nsañu yayeni yahoshañahu Bayibolu yidi yakwila nawu ijina daYehova akadijilika hampinji yakashikijañayi chuma chafuukwilayi iseki kuhitila muWanta windi wakayuulañawu kudi Kristu. Kwosi wunateli kuhimpa nkeñelu yaYehovaku. Washiika nindi yuma yejima yakamwekana kwesekeja nachahoshayi. (Isa. 46:​10, 11, tth.; Heb. 6:​17, 18) Mukuhita kwampinji, iseki akadibalumuna kwikala paradisa mwakashakamaña anyana kaAdama naEva awanina nawa aloña owu “[akadiluñishaña] nawumi haya nyaaka.” (Mas. 22:26) Ilaña, kudi chuma chikwawu chabadika chafwilañayi Yehova kwila. Chuma chacheni chafwilañayi kwila hikunuñañesha ambuñindi ejima mwiwulu nihamaseki. Nkumininaku, ejima akahandaña akamwovwahilaña Yehova hamu neyi Nyuuli yawu wabadika. (Tañenu AEfwesesa 1:​8-11.) Komana chayihayamishaña wanyi hakwiluka njila yayiwahi yazatishañayi Yehova hakushikija nkeñelu yindi?

9. Hampinji yitunakutaña Bayibolu, yumanyi yitwatela kufwikija yakamwekana kumbidi?

⁹ Talenu wuprofwetu washimwiniyi Yehova mwitempa daEdeni, neyi chasonekawu haKutachika 3:15. b Washimwini yuma yakamwekana  yakashikija nkeñelu yindi, hela chochu, iyi yuma yakamwekana hanyima yakuhitahu makombakaji ayaaka. Iyi yuma yashimwiniyi nindi yakamwekana mwabombeleli kuvwalika kwamwana kaAbarahama, wakekala ndonda yachisaka mwakavwalikila Kristu. (Kutach. 22:​15-18) Kuhiñahu, mu 33 C.E., Yesu amusumini kukatutu, neyi chashimwineñahu dehi. (Yilw. 3:​13-15) Chuma chakukumishaku chakamwekana chaniwu wuprofwetu, chakumuchika Satana kumutu, chakamwekana hanyima yayaaka 1,000 yinashaliku. (Chim. 20:​7-10) Nawa Bayibolu yashimuna yuma yayivulu yakamwekana hakenza nakumana wulumbu wekala hakachi kakaayi kaSatana nakuloñesha kwaYehova.

10. (a) Yumanyi yakumbidi yikukeña kumwekana katataka? (b) Tunateli kudiloñeshela ñahi chadimu muyitoñojoka nimumuchima wetu? (Talenu tumazu twaheshina.)

¹⁰ Toñojokenu haniyi yuma yinakumwekana yinakukankisha iseki yashimwineñahu dehi Bayibolu. Chatachi, nyuza yakabidika nawu “kuwunda nikukiñewa!” (1 Tes. 5:​2, 3) “Hohenohu,” lukadi lwasweja lwakatachika hampinji yakalukuka nyuza kudifukula kwejima kwakutwamba. (Chim. 17:16) Hanyima yachumichi, kwakamwekana chuma chakuhayamisha chakamwekeshaña “Mwana kamuntu nakwinza hamavu amwiwulu nañovu nikulema kwasweja.” (Mat. 24:30) Yesu wakasompesha antu, wakaambula anyikoku nawampembi. (Mat. 25:​31-33, 46) Hela chochu, Satana wakaduñumika hohu wanyi. Chineli wahela nankashi antu jaNzambi, wakasañumuna nyuza yakadibomba hamu yatenaña Bayibolu nawu Gogi wakwituña daMagogi kulonda akalukuki akakudifukula aYehova alala. (Ezek. 38:​2, 10, 11) Hampinji yimu, awayishewa akashalahu akayipompesha mwiwulu nakudibomba hamu naKristu ninjita yindi yamwiwulu kulonda akazuñi njita yaAmagedoni, njita yakamanisha lukadi lwasweja. c (Mat. 24:31; Chim. 16:​14, 16) Kufumahu dinu, dihakatachika kuyuula Chiyuulu chaKristu chaYaaka Ikombakaji hanu hamaseki.—Chim. 20:6.

11. Kuchiñeja kwakushakama haya nyaaka kwakayikwasha kwiluka yumanyi? (Talenu cheñi mwevulu.)

 ¹¹ Ichi toñojokenu hayuma yakamwekana hanyima yayaaka 1,000. Bayibolu yahoshaña nawu Nleñi yetu washa “nimuchima wakufwila kushakama haya nyaaka mudi [etu].” (Mukwa. 3:11) Toñojokenu hanawa mazu chayikundamawu enu niwubwambu wenu naYehova. Mukanda waDraw Close to Jehovah, ifu 319, washimuna iyi nsañu yakuzañalesha nawu: “Hanyima yakushakama yaaka nkulakaji, makombakaji, mamiliyoni hela mabiliyoni, twakeluka yuma yayivulu hadi Yehova Nzambi kubadika chitweluka chayinu mpinji. Ilaña twakatwalekahu kutiya netu kudi yuma yikwawu yayiwahi yayivulu yitwatela kudiza hadi yena. . . . Twakekala namuzañalu chikupu kushakama haya nyaaka nanyaaka, nawa kuswina kwakwihi naYehova dichuma chakasweja kuwaha mpinji yejima.” Chayinu mpinji, hampinji yitunatwalekihu kudiza Izu daNzambi, yumanyi yikwawu yitwatela kusandujolahu?

12. Tunateli kubanjila ñahi mumawulu? Shimunenu chakutalilahu.

¹² Izu daNzambi datulejaña yuma yamwekeshaña “mwiwulu mwamweni” mwashakamayi Yehova. (Isa. 33:5) Bayibolu yasololaña yuma yakuhayamisha kutalisha hadi Yehova nikuloñesha kwindi kwamwiwulu. (Isa. 6:​1-4; Dan. 7:​9, 10; Chim. 4:​1-6) Chakutalilahu, tunateli kutaña hayuma yakuhayamisha yamweniyi Ezekeli helili “mawulu [enzunuki nawa atachiki] kumona yimwenu yaNzambi.”—Ezek. 1:1.

13. Kwesekeja nachinalumbululiwu haAHeberu 4:​14-16, mwatiyaña ñahi hamudimu wazatañayi Yesu mumawulu?

¹³ Toñojokenu cheñi hamudimu wukwetiyi Yesu mumawulu hamu neyi Mwanta wetu wunakuyuula nawa Kapristu Muneni wukweti wushona. Kuhitila mudi yena, tunateli kuswina kwakwihi “netanda daNzambi daluwi lwasweja” mukulomba nakumulomba netu atutiyili luwi nawa atukwashi “hampinji yatelela.”  (Tañenu AHeberu 4:​14-16.) Dichi mpinji yejima tutoñojokeña hayuma yatwililawu kudi Yehova niYesu niyinakutwililawu chayinu mpinji mwiwulu. Kukeña kwatumwekeshelañawu kutushiki hamuchima chikupu nawa kutusañumuni hampinji yitunakumukalakela Yehova.—2 Kor. 5:​14, 15.

14. Chumanyi chimu chitwatela kwila hakwila tumwekeshi kusakilila kudi Yehova niYesu? (Talenu cheñi nyevulu.)

¹⁴ Njila yimu yitwamwekeshelañamu kusakilila kudi Nzambi yetu niMwanindi, hikuzata nañovu kukwasha antu kwikala aYinsahu jaYehova nikwikala atumbanji twaYesu. (Mat. 28:​19, 20) Ichi dichuma cheliliyi kapostolu Pawulu hakwila amwekeshi kusakilila kudi Nzambi niKristu. Welukili nindi Yehova wakeñaña nindi “antu ejima ayamwini nawa eluki chalala chikupu.” (1 Tim. 2:​3, 4) Wazatili nañovu mumudimu windi wakushimwina kukwasha antu amavulu kwesekeja nahakuminini ñovu jindi “kulonda neyi chinatwesheki, amwiniku antu amakwawu.”—1 Kor. 9:​22, 23.

15. Kwesekeja naIsamu 1:​2, chumanyi chatela kutuzañalesha?

¹⁵ Nsoneki yesamu datachi walumbulwili chekala muntu wukweti muzañalu nindi, himuntu “watiyaña kuwaha nanshimbi jaYehova” nawa “watoñojokañahu chikupu hanshimbi Jindi mwaana niwufuku.” (Mas. 1:​1-3; tth.) Mukakubalumuna Bayibolu wumu wejina daJoseph Rotherham, wahosheli kutalisha hanawa mavasi nindi muntu watela “kukeña wunlomboli waYehova kuhitila mukuwukeñakeña, kuwudiza nikwikala nampinji yeneni yakutoñojokahu.” Wabombelelihu nindi muntu watañaña Bayibolu watela “kwanukaña nindi neyi ifuku dihita chakadi kutañahu Bayibolu, dikwila nawu odu ifuku dinakisiki.” Munateli kutiya kuwaha kudiza Bayibolu neyi muzataña nañovu kulonda mwiluki yuma yalema yekalamu nikumona chiyanuñañana hamu yejima. Wenowu muzañalu wutunateli kutiya neyi tusandujolaña yuma yejima yekala Mwizu daNzambi!

16. Yumanyi yitwakahanjekahu muchibaaba chinalondelihu?

¹⁶ Chalala chasweja kuwaha chatudizishañayi Yehova Mwizu dindi hichakala nankashi chakwila tukukañanya kuchitiyishishaku. Muchibaaba chinalondelihu twakahanjeka hachalala chimu chakunama, tembeli yeneni yakuspiritu yaYehova, yalumbulwiliyi Pawulu mumukanda windi watemesheleliyi akaKristu aHeberu. Dichi, lekenu kusandujola haniyi nsañu kwakayizañaleshi chikupu.