1-2. Bible chhiar leh zir dân kawng ṭha ber chu eng nge ni? Entîrna pe rawh.

 IN THAR pakhat lei tum angah han inmitthla teh. I lei hmain engte nge hmuh hmasak i duh ang? A thlalâk en mai chu i duh tâwk ang em? Mahni ngeiin va en a, a chhûng zawng zawng va fan kual chu i duh zâwk ngei ang. In sak a nih dân a ri ruangte en dik i duh hial mai thei. Ni e, i chênna tûr in chu hmuh kim vek i duh ngei ang.

² Bible kan chhiara kan zir hunah pawh chutiang chuan kan ti thei a. Bible lama mi thiam pakhat chuan Bible-a thute hi ban sâng takte leh lungphûm nghet tak nei in zau tak nên a khaikhin a ni. A nih leh, engtin nge Bible chu kan hriat chian theih ang. I chhiar liam puat a nih chuan “Pathian thu bul ber A AW B” te ang chi thutak bul puite chauh i hre thei ang. (Heb. 5:12) I in lei tûr a chhûng i en kim vek angin, Bible chu chipchiar takin zir ang che. Bible zir dân kawng ṭha tak pakhat chu a chhûng thute inzawm dân hriat hi a ni. Chuvângin eng thutakte nge i rin tih chauh ni lovin, chûng thutakte i rin nachhan pawh hriatthiam tum ang che.

3. Tirhkoh Paula’n a Kristian unaute chu eng ti tûrin nge a fuih a, engvângin nge? (Ephesi 3:14-19)

³ Pathian thu chipchiar taka hriat kan duh chuan ngun takin kan zir tûr a ni. Tirhkoh Paula chuan a Kristian unaute chu thutak ‘zauzia te, seizia te, sânzia te, thûkzia te an hriat chian theih nân’ Pathian thu taima taka zir tûrin  a fuih a. Chutianga an tih chuan an rinnaah “zung kai leh nghah chhan” neiin an awm thei ang. (Ephesi 3:14-19 chhiar rawh.) Keini pawhin chutianga kan tih a ngai a. Tûnah, Pathian thu awmziate fiah leh zuala hre tûrin i lo bih chiang ang u.

4. Jehova hnaih lehzual tûrin eng nge kan tih theih? Entîrna pe rawh.

⁴ Kristiante kan nih angin Bible zirtîrnate a pâwnlâng chauhva hriat chu kan duh tâwk lo va. Pathian thlarau thianghlim ṭanpuinain “Pathian thuril pawh” zir kan duh a ni. (1 Kor. 2:9, 10) Engvângin nge Jehova hnaih lehzualtîr theitu thute chu mi mal inzirnaa i hman loh vang? Entîr nân, hmân laia a chhiahhlawhte a hmangaihzia a lantîr dânte leh chûngte chuan nang pawh a hmangaih che tih a târ lan dân i zir thei a. Chu bâkah, Jehova’n Israelte tâna biakna chungchânga ruahmanna a siamte leh tûn laia Kristiante tâna ruahmanna a siamte chu i khaikhin thei bawk. A nih loh leh, Isua’n leia rawng a bâwl chhûnga Bible hrilh lâwkna a thlen famkimtîrnate chu ngun takin i zir thei bawk.

5. Mi mal inzirnaah zir duh bîk i nei em?

⁵ Bible zirlai taima takte hnênah mi mal taka zir an duh Bible thu rilte chu an zâwt a. An chhânna ṭhenkhat chu “ Mi Mal Inzirna Atâna Thupuite,” tih bâwmah târ lan a ni. Chûng thupuite zir tûra Jehova Thuhretute Tâna Zir Bingna Hmanrua i hman chuan i hlâwkpui hle ang. Bible thute thûk taka zirna chuan i rinna a tinghetin ‘Pathian hriatna chhar chhuak’ tûrin a ṭanpui ang che. (Thuf. 2:4, 5) Bible thutak thûk taka kan zir theihte chu i lo enho vang u.

6. (a) Ruahmanna leh thiltum inan lohna chu eng nge ni? (b) Mihringte leh leilung tâna Jehova thiltum chu “chatuan” atân a ni tih engvângin nge kan sawi theih? (Ephesi 3:11)

⁶ Entîr nân, Bible-in Pathian thiltum chungchâng a sawi hi han ngaihtuah teh. Ruahmanna neih leh thiltum neih chu thil inang lo a ni a. Ruahmanna chu i tum ram thleng tûra i zawh tûr kawng thlan lâwk nên a inang a. Mahse, kawng laka dâltu a awm chuan ruahmanna chu a hlawhchham thei a ni. Thiltum erawh chuan tum ram chauh min ngaihtuahtîr a. Kan thlen duhna hmun chu kan hria a; mahse, kan kawng zawh tûr erawh thlansa a ni lo. A ṭûl anga siamrem theih a ni. Jehova’n Bible-a “a chatuan remruat,” a nih loh leh a thiltum chu zawi zawia min hrilh avângin a lâwmawm hle. (Eph. 3:10-11) Ani chuan ‘thil zawng zawng hi chhan nei ṭheuhva a siam’ avângin a hlawh chham ngai lo. (Thuf. 16:4) A thiltih rah chhuahte chuan chatuan a daih ang. Jehova thiltum chu eng nge ni a, chumi ti hlawhtling tûrin eng insiamremnate nge a neih tawh?

7. Mihring hmasa berte hel hnuah a thiltum tihlawhtling tûrin engtin nge Jehova a insiamrem? (Matthaia 25:34)

⁷ Pathianin mihring hmasa berte hnênah an tâna a thiltum chu a hrilh a. An hnênah “chi tam tak thlaha lo pungin, leilung hi luah khat ula, in thu thuin awmtîr rawh u,” tiin a hrilh a ni. (Gen. 1:28) Adama leh Evi te an hel a, mihring chhûngkuaa sual a lo luh pawh khân, Pathian thiltum chu a hlawhchham chuang lo va. A tihhlawhtlin dân kawng chu a siamrem mai a ni. Helna a chhuah veleh, mihringte leh leilung atâna a tîra a thiltum chu tihlawhtlingtu tûr vâna Lalram chu din tûrin ruahmanna a siam ta a. (Matthaia 25:34 chhiar rawh.) A hun ruatah Jehova’n a Fapa piang hmasa ber chu Lalram chungchâng mite zirtîr tûr leh sual leh thihna ata min chhan chhuah nâna a nun pe tûrin leiah a rawn tîr a. A hnuah Isua chu vâna Pathian Lalrama Lal nia rorêl tûrin kaihthawh a ni. Mahse, Pathian thiltum chungchâng zir tûr tam tak a la awm a ni.

8. (a) Bible thupui ber chu eng nge ni? (b) Ephesi 1:8-11-nain a sawi angin Jehova thiltum ber chu eng nge ni? (A kâwma milem en rawh.)

⁸ Bible thupui ber chu Krista rorêlna hnuaia a Lalram hmanga he leilung atâna a thiltumte a tihhlawhtlin hunah Jehova hming tihthianghlim a ni ang tih hi a ni a. Jehova thiltum chu tihdanglam theih a ni lo. A tihlawhtling ngei dâwn tih min tiam a ni. (Is. 46:10, 11; Heb. 6:17, 18) Rei lo têah, he lei hi paradis-ah chantîrin, chutah chuan Evi leh Adama thlah mi fel ṭha famkimte chu “kumkhuain” an nung ang. (Sâm 22:26) Chu bâkah, Jehova thiltumah chuan chu aia tam a tel a ni. A thiltum ber chu lei leh vâna finna nei a thilsiam zawng zawngte inpumkhattîr hi a ni a. Tichuan, chûng thilsiam zawng zawngte chuan Jehova chu an rorêltu atân pawmin a thu an âwih tawh ang. (Ephesi 1:8-11 chhiar rawh) Jehova’n a thiltum a tihhlawhtin dân ropui tak chu mak i ti hle lo maw?

9. Bible chhiarna hmangin eng chena thuiin nge nakin hun kan thlîr theih?

⁹ Genesis 3:15-a chhinchhiah Eden huana Jehova sawi hrilh lâwkna hi han ngaihtuah teh. b Chutah chuan kum sâng têl a liam hnua a thiltum thlen famkimtîrtu tûr thilthlengte a tel a. (Gen. 22:15-18) Chu thilthlengah chuan Krista lo pianna tûr Abrahama thlah kal zêl chungchâng a tel a ni. (Tirh. 3:13-15) Tichuan, C.E. 33-ah Isua chu hrilh lâwk ang ngeiin a keartui tihthitlin a ni a.  Chu hrilh lâwknaa thleng hnuhnûng ber tûr Setana lû tihthitlinna chu tûn aṭanga kum sângkhat aia tam a rei hnuah chauh a thleng famkim ang. (Thup. 20:7-10) Chu bâkah, Bible chuan Setana khawvêl leh Jehova inawpna pâwl inkâra inhmêlmâkna a sosân zêl ruala thilthleng tûrte pawh a târ lang bawk.

10. (a) Nakin lawkah eng thilte nge thleng ang? (b) Engtin nge kan rilru leh thinlung kan inbuatsaih theih? (Footnote en rawh.)

¹⁰ Bible hrilh lâwk hêng thilthleng tûr mak takte hi han ngaihtuah teh. A hmasain hnamte chuan “muanna leh himna “ thu an puang ang. (1 Thes. 5:2, 3) Hrehawm nasa tak chu hnamte’n sakhaw dik lo zawng zawng an beih hunah ‘chawplehchilhin’ a inṭan ang. (Thup. 17:16) Chumi hnuah ‘Mihring Fapa chu thiltihtheihna leh ropuina nasa tak nên vân chhûm chunga lo kal’ chu kan hmu pawh a ni mai thei. (Mt. 24:30) Tichuan, Isua’n kêl leh berâmte chu hlîrin mihringte chungah rorêlna thu a puang ang. Mahse, Setana chu a awm hle hle lo vang a. A thinrim êm avângin ani chuan Bible-in Magoga rama Goga tia a sawi hnam insuih khâwm chu Jehova mite bei tûrin a chêttîr ang. (Ezek. 38:2, 10, 11) Chumi hnu engtik hunah emaw chuan hriak thih la bângte chu hrehawm nasa tak vawrh tâwp Armageddon indonaa Krista leh a vân lam sipaite zawm tûrin vâna lâk khâwm an ni ang. c (Mt. 24:31; Thup. 16:14, 16) Tichuan, Krista Kum Sâng Rorêlna chu leiah a inṭan tawh ang—Thup. 20:6.

11. Chatuan nun beiseina chuan i tân eng awmzia nge a neih theih? (Milem en bawk rawh.)

¹¹ Nakin hun chu thui lehzualin han ngaihtuah teh. Bible chuan min siamtuin “mihring rilruah chuan chatuan a dah,” tiin a sawi a. (Thur. 3:11) Chu chuan Jehova nêna i inlaichînna a nghawng dân tûr chu han ngaihtuah teh. Draw Close to Jehovah tih lehkhabu phêk 319-na chuan ngaihvenawm takin heti hian a sawi a ni: “Kum za têl, sâng têl, nuai têl, maktaduai têl kan nun hnu chuan  Jehova chungchâng chu tûna kan hriat aia nasain kan hre tawh ang. Mahse, zir belh tûr thil ropui tam tak pawh a la awm cheu dâwn a ni. Chatuana nunna chu ngaihtuah phâk bâkin a nuam ang a. Thil manhla ber tûr chu Jehova kan hnaih reng thei tûr hi a ni,” tiin. Mahse, Pathian Thu kan zir zawm zêl rual hian eng thil dangte nge kan la zir belh theih?

12. Engtin nge vân lam chu kan thlîr theih? Entîrna pe rawh.

¹² Bible chuan Jehova awmna ‘chung lam’ chungchâng tlêm azâwng min hrilh a. (Is. 33:5) Jehova leh vân lama a inawpna pâwl chungchânga thil ropui takte a târ lang a ni. (Is. 6:1-4; Dan. 7:9, 10; Thup. 4:1-6) Entîr nân, Ezekiela’n “vân a lo inhawng a, Pathian inlârna” a hmuh laia thil ropui tak a hmuhte chu kan chhiar thei a ni.—Ezek. 1:1.

13. Hebrai 4:14-16-naa târ lan angin, vân lama Isua chanvo chungchângah eng nge i ngaihhlut?

¹³ Rorêl mêk Lalber leh khawngaihna nei tak Puithiam Lalber vâna Isua chanvo pawh ngaihtuah bawk ang che. Amah kal tlangin Pathian “khawngaihna lalṭhutphah” chu puih “kan ngaih huna” ṭawngtaia panin khawngaihna leh ṭanpuina kan dîl thei a ni. (Hebrai 4:14-16 chhiar rawh.) Vân aṭanga Jehova leh Isua’n kan tâna an tih tawhte leh an la tih tûrte ngaihtuah lovin,  nî i liamtîr lovang u. Min hmangaihna chuan kan thinlung a khawihin ṭhahnemngai taka rawngbâwlnaah leh biaknaa tel tûrin min chêttir tûr a ni.—2 Kor. 5:14, 15.

14. Jehova leh Isua chunga kan lâwmzia kan lantîr theih dân kawng ṭha ber pakhat chu eng nge ni? (Milem en bawk rawh.)

¹⁴ Kan Pathian leh a Fapa chunga kan lâwmzia kan lantîr theih dân kawng ṭha ber pakhat chu mi dangte Jehova Thuhretu ni tûr leh Isua zirtîr ni tûra ṭanpui hi a ni a. (Mt. 28:19, 20) Pathian leh Krista chunga a lâwm êm avângin tirhkoh Paula’n chutiang chuan a ti a ni. Jehova’n “mi zawng zawng chhandama awmah leh thutak hriaah a duh,” tih a hria a. (1 Tim. 2:3, 4) ‘Ṭhenkhatte tal a chhandam theih nân’ mi a tam thei ang berte ṭanpui tûrin rawngbâwlnaah ṭhahnemngai takin a tel a ni.—1 Kor. 9:22, 23.

15. Sâm 1:2-a sawi angin, engin nge hlimna min pe ang?

¹⁵ Fakna hla phuahtu chuan inâwm takin mi hlim tak leh hlawhtling tak “lâwmna chu LALPA dânah a ni zâwk a; A dân thu chu a chhûn a zânin a ngaihtuah ṭhîn,” tiin a sawi a. (Sâm 1:1-3) Bible letlingtu Joseph Rotherham-a chuan Studies in the Psalms tih lehkhabu-ah “chûng Bible chângte chungchângah tu emaw chuan Pathian kaihhruaina chu a zawngin, a zirin, chûngte chu a ngaihtuah reng tûr a ni,” tiin a sawi. Ani chuan tu emawin Bible chhiar lova nî a liamtîr chuan chu chu hun khawhralna a ni,” tiin a sawi bawk. Pathian Thu zau taka chhuina chu a va hlimawm tak em!

16. A dawta thuziakah eng chungchâng nge kan sawiho vang?

¹⁶ Jehova’n a Thu-a thutak hlu tak min zirtîrte chu kan hriatthiam theih loh khawpa har a ni lo. A dawta thuziakah thutak ril takte zînga pakhat tirhkoh Paula’n Hebrai Kristiante hnêna a lehkhathawna a ziah tel Jehova thlarau lam biak in ropui tak chungchâng ka sawiho vang. Chumi chungchâng zir chianna chuan hlimna nasa tak thlen che rawh se.