1-2. Baibul ba duahia bona ba stadilaia namonamo dalana be dahaka?

 BEMA oi na o uramu ruma ta ba hoia, abi hidi do so karaia neganai oi be o uramu dahaka ba itadia guna? Ruma vairana kahana laulauna mo bo itaiamu, a? Lasi. Oi na bo laomu una ruma bo rakaia heḡeḡemu bona lalonai daiutu iboudiai bo itadiamu bona una ruma kahana ibounai bo itaia namonamomu. Una ruma e haginia tauna danu bo hereva heniamu. Momokani, oi na bo uramu ba hoia rumana ba itaia namonamo.

² Una heḡereḡerena, Baibul o duahiamu bona o stadilaiamu neganai, ena kaha ibounai ba haeroa namonamo. Baibul e herevalaia tauna ta ese Baibul ena hereva na bildin badana bona lata hereana ta ida e haheḡereḡerea. Una dainai, Baibul ena hereva ibounai be ede baita dibaia namonamo toma? Bema Baibul bo duahia haraḡa-haraḡamu, reana “Dirava ena hereva badidia” mo bo dibamu. (Heb. 5:12) To ruma ai bo vareaimu bona kahana ibounai bo itaia namonamomu heḡereḡerena, Baibul ba lalopararalaia totona kahana ibounai ba stadilaia namonamo. Unu ba kara toma dalana ta na, ba tahua edena dala ai Baibul ena hereva ta ta na e heduru hehenimu. Danu namona na ba laloparara oi o abi daemu ḡaudia be dahaka bona dahaka dainai o abidia daemu.

3. Aposetolo Paulo ese Kristen taudia e hagoadadia dahaka bae kara, bona dahaka dainai? (Efeso 3:​14-19)

³ Dirava ena Hereva baita lalopararalaia namonamo totona, namona na ena hereva dobudia baita stadilaidia. Aposetolo  Paulo ese Kristen tadikaka taihu e hagoadadia Dirava ena Hereva bae stadilaia namonamo, unu amo “lababana bona rohana bona harana-latana bona dobuna” bae lalopararalaia namonamo. Bena edia abidadama ai bae “gini tutuka-tutuka” bona bae “goada momokani.” (Efeso 3:​14-19 ba duahidia.) Ita danu unu baita kara toma. Mani Dirava ena Hereva baita stadilaia namonamo daladia aita herevalai.

4. Dahaka baita kara eda hetura karana Iehova ida baita hagoadaia?

⁴ Ita na Kristen tauda dainai, Baibul ena hereva badadia mo baita diba na dia heḡereḡere. To namona na Dirava ena lauma ese baine duruda, “Dirava ena dobu ḡaudia” danu baita lalopararalaidia. (1 Kor. 2:​9, 10) Reana sibomu emu stadi projek ta ba karaia, unu amo emu hetura karana Iehova ida ba hagoadaia. Heḡereḡere, idaunegai Iehova ese ena hesiai taudia e lalokau henidia dalana baita itaiamu neganai, una ese e hamomokaniamu oi danu e lalokau henimumu. Danu, Israel taudia ese Iehova e tomadiho heniava dalana bona hari iseda negai Kristen tomadiho dalana ba haheḡereḡeredia. Eiava reana Iesu ena mauri bona haroro ḡaukara ai e ḡuḡuru peroveta herevadia ba stadilaidia.

5. Sibomu emu stadi projek ai edena topik o uramu ba stadilaia?

⁵ Baibul e stadilaia namonamomu taudia haida e nanadaidia idia be ededia dobu ḡaudia e uramu bae stadilai, bona idia haida edia haere na ina maua “ Emu Stadi Projek ai Ba Tahu Topik Haida” ai e hedinarai. Unu topik istadilaidia karana ba moalelaia totona, Watch Tower Publications Index eiava Research Guide for Jehovah’s Witnesses ba ḡaukaralaidia diba. Baibul bo stadilaia dobumu neganai, emu abidadama na be goadamu bona be durumumu ‘Dirava bo dibaiamu.’ (Her. 2:​4, 5) Mani Baibul ena hereva momokani dobudia haida aita herevalai.

6. (a) Plen bona ura edia idau be dahaka? (b) Dahaka dainai ta gwaumu Iehova ena ura na baine mia hanaihanai? (Efeso 3:​11, NWT)

⁶ Mani Baibul ese Dirava ena ura e herevalaia dalana aita laloa. Ini hereva plen bona  ura edia idau be dahaka? Plen na vaitani dala tamona o abia hidimu bona o badinaiamu ela bona o ura heniamu gabuna o davariamu. To, bema una o abia hidi dalana na ḡau ta ese be kouamu, emu plen na be dikamu. To ura na baita lao henia gabuna ida baita haheḡereḡerea diba. Ita ta lao heniamu gabuna na mai dibada, to ilao henina daladia na idauidau. Bema ḡau ta ese dala ta be koumu, ita ese dala ma ta baita abia hidi dibamu. Ta moalemu, badina Baibul ai Iehova ese ena “mia hanaihanai urana” na taina ruana e hahedinaraia. (Efe. 3:​11, NWT) Bona Iehova na dala idauidau ai “ḡau iboudiai e kara, ena ura baine haḡuḡurua.” (Her. 16:​4, NWT) Bona ia ese e kara ḡaudia amo bae vara ḡaudia na bae mia hanaihanai. Iehova ena ura be dahaka, bona una ura baine haḡuḡurua totona ia be dahaka e kara?

7. Adam bona Heva e gwau-edeede murinai, Iehova be dahaka e kara ena ura baine haḡuḡurua? (Mataio 25:34)

⁷ Dirava ese tau bona hahine ginigunadia ediai ena ura e gwauraia hedinarai. Ia ese e hamaorodia, eto: “Besemui ba havaradia, ba hutuma; tanobada ba hahonua bona . . . mauri ḡaudia tanobada ai e loamu iboudiai ba biagudia.” (Gen. 1:28) Adam bona Heva e gwau-edeede neganai, idia ese kara dika na besedia ediai e heni hanai, to una ese Iehova na se koua ena ura baine haḡuḡurua. A Iehova ese una ihaḡuḡuruna dalana hari e haidaua. Maoromaoro, guba ai Basileia ta ihaginina lalohadaina e karaia, unu amo taunimanima bona tanobada daidiai e ura baine karaia ḡauna baine haḡuḡurua. (Mataio 25:34 ba duahia.) Bona Iehova ese e abia hidi negana ai, ia na mai lalokauna ida Natuna roboana e siaia tanobada ema, taunimanima na una Basileia baine hahedibalaidia bona ena mauri baine heni unu amo kara dika bona mase amo baine ruhada. Bena Iehova ese Iesu na mase amo e hatorea isi lou bona King ai e halaoa, ena Basileia baine lohiaia totona. To, Dirava ena ura ihaerona amo ḡau ma haida baita dibamu.

8. (a) Baibul ena hereva badana be dahaka? (b) Efeso 1:​8-11 heḡereḡerena, Iehova be ma dahaka danu be haḡuḡurumu? (Rau 1 laulauna ba itaia.)

⁸ Baibul ena hereva badana na Iehova ese ladana baine hahelaḡaia, una na Keriso ese Dirava ena Basileia amo tanobada ai Iena ura baine haḡuḡurua neganai baine vara. Iehova ena ura na basine idau diba. Bona ia na e gwauhamata ia e gwaurai ḡaudia iboudiai na bae ḡuḡuru. (Isa. 46:​10, 11; Heb. 6:​17, 18) Vaira negai, tanobada na paradaiso ai be laomu, bona Adam bona Heva besedia haida, Dirava e badinaiamu kara maoromaoro taudia, na unuseniai be ḡoevadaemu bona mai moaledia ida be ‘mauri hanaihanaimu.’ (Sal. 22:26) To, Iehova na dia una mo be haḡuḡuruamu. Ia ese guba ai bona tanobada ai ena hesiai taudia iboudiai na lalotamona ai baine hanohodia. Bena ia na edia King dainai, idia iboudiai na ia sibona mo be badinaiamu. (Efeso 1:​8-11 ba duahidia.) Momokani, Iehova ese ena ura e haḡuḡuruamu dalana na hoa ḡauna, ani?

9. Baibul ese vaira negana be ede e herevalaia toma?

⁹ Mani Genese 3:15 ai Iehova ese Eden umana ai e gwauraia peroveta herevana aita laloa. b Una peroveta herevana ese Iehova ena ura ihaḡuḡuruna ai bae vara ḡaudia e herevalai, to unu na laḡani tausen momo muridiai e vara. Heḡereḡere, una peroveta herevana ai e gwauraia hahine garana, Mesia, na Abraham ena bese amo e vara. (Gen. 22:​15-18) Bena  laḡani 33 C.E. ai, peroveta herevana heḡereḡerena Iesu aena geduna e tutua. (Apos. 3:​13-15) To una peroveta herevana dokona ai, hahine garana ese Satana kwarana baine huaria, una na hari amo ela laḡani 1,000 murinai be ḡuḡurumu. (Apok. 20:​7-10) Mani Baibul ai Satana ena orea bona Iehova ena orea ediai be varamu ḡaudia aita herevalai.

10. (a) Kahirakahira vaira negai be dahaka be varamu? (b) Edena dala ai laloda bona kudouda baita haheḡaeḡaedia? (Futnout ba itaia.)

¹⁰ Baibul na e peroveta vaira negai ḡau badadia haida be varamu. Ginigunana na, gavamani ese “maino bona noho namo” be herevalaiamu. (1 Tes. 5:​2, 3, NWT) Bena haraḡa herea hisihisi bada hereana be matamamu, una negai gavamani ese tomadiho koikoi iboudiai be haorediamu. (Apok. 17:16) Una murinai, “Taunimanima Natuna bae itaia, ori latanai bainema, mai siahu-badana bona mai hairaina ida.” (Mat. 24:30) Iesu ese taunimanima be hahemaoro henidiamu, ia ese mamoe bona nani be hapararadiamu. (Mat. 25:​31-33, 46) To, Satana na dounu Iehova ena taunimanima be daḡedaḡe henidiamu. Ia na be badu dikadikamu dainai, tanobada idoinai gavamanidia iboudiai—Baibul ese e gwauraia Gog Magog tanona tauna—be haḡanidiamu Iehova e tomadiho heniamu taudia bae tuari henidia. (Esek. 38:​2, 10, 11) Una negai, tanobada ai horoa taudia oredia na guba be laomu bena Keriso mai ena guba tuari oreana ida be heboumu bona Aramagedono ai be tuarimu; hisihisi bada hereana vada be dokomu. c (Mat. 24:31; Apok. 16:​14, 16) Bena Keriso ese laḡani 1,000 lalonai tanobada baine lohiaia negana be matamamu.—Apok. 20:6.

11. Vaira negai baita mauri hanaihanaimu dainai dahaka hahenamo baita moalelaimu? (Laulau danu ba itaia.)

¹¹ Mani laḡani 1,000 murinai baine vara ḡauna aita laloa. Baibul na e gwaumu, ita e karada Diravana ese “mauri hanaihanai urana” na ita kudouda ai e atoa. (Koh. 3:​11, NWT) Una dainai oiemu hetura karana Iehova ida be duruamu dalana mani a laloa. Buka ladana Draw Close to Jehovah ena rau 319 ai, na ini e  gwau toma: “Laḡani hanred, tausen, milion bona bilion baita maurimu murinai, Iehova Dirava na baita dibaia namonamomu, dia hari heḡereḡerena. To ita laloda na dounu be uramu ḡau namodia momo herea baita diba. . . . Paradaiso ai na ḡau namodia momo herea baita moalelaiamu. Bona hereadaena na, eda hetura karana Iehova ida na be goadamu.” To hari, Baibul ta stadilaiamu lalonai, ma dahaka ese baine duruda Iehova baita dibaia namonamo?

12. Baita gaga dae guba baita itaia anina be dahaka?

¹² Baibul ese Iehova ena noho gabuna na taina e gwauraia hedinarai, eto “ia na atai ai e nohomu.” (Isa. 33:5) Bona unuseniai e varamu ḡaudia bona iena guba oreana e herevalaidia. (Isa. 6:​1-4; Dan. 7:​9, 10; Apok. 4:​1-6) Heḡereḡere, Esekiel na “guba e parara; bena Dirava [e] mata hanailaia” neganai e ita ḡaudia na ita ese Baibul ai baita duahidia diba.—Esek. 1:1.

13. Heberu 4:​14-16 heḡereḡerena, Iesu ese guba ai ita daidai e karamu ḡaudia be ede o lalodia tomamu?

¹³ Mani eda King bona Hahelaḡa Tauna Badana Iesu ese guba ai ita daidai e karamu ḡaudia aita lalodia. Iesu ladana ai ita na ḡuriḡuri amo Dirava ena “hebogahisi teronona baita raka henia kahi” diba, bona nega maorona ai baita noia baine bogada hisi bona baine duruda. (Heberu 4:​14-16, ba duahidia.) Una dainai, dina ta ta ai ita ese Iehova bona Iesu ese guba amo ita daidai vada e kara bona e karamu ḡaudia baita lalodia. Namona na idia edia lalokau ese ita kudouda baine hamarerea unu amo eda hesiai ḡaukara baita goadalaia.—2 Kor. 5:​14, 15.

14. Edena dala ai Iehova bona Iesu ediai eda tenkiu karana baita hahedinaraia? (Laulau danu ba itadia.)

¹⁴ Iehova bona Iesu baita tenkiu henidia dalana ta na, ma haida baita durudia Iehova  ena Witnes bona Iesu ena hahediba taudia ai baela. (Mat. 28:​19, 20) Aposetolo Paulo na unu e kara toma. Ia na dibana Iehova ena ura na “taunimanima iboudiai bae mauri bona hereva momokani bae diba.” (1 Tim. 2:​3, 4) Una dainai Paulo ese haroro ḡaukara na e goadalaia, dala idauidau ai taunimanima momo baine “veridia mauri totona.”—1 Kor. 9:​22, 23.   

15. Salamo 1:2 heḡereḡerena, dahaka ese ita be hamoaledamu?

¹⁵ Salamo itorena tauna na e gwa, ‘Iehova ena taravatu e moalelaiamu’ bona “ena taravatu e laloa boimu, e laloa ranimu” tauna na e moalemu bona e karamu ḡaudia iboudiai anidia na e varamu. (Sal. 1:​1-3.) Baibul transleita ta ese una siri na ini e herevalaia toma, “Dirava ena hahekau e laloa badamu tauna na be uramu ena hereva baine tahua, baine stadilaia, bona nega baine ato baine laloa dobu.” Ia na ma e gwa, “bema ta na dina ta ai Baibul basine duahiamu, ia na una dina ai ḡau badana ta e reaia.” Oi ese Baibul istadilaina karana ba moalelaia totona, ena hereva iboudiai ba haerodia namonamo, bena bo itaiamu ena hereva ta ta na e heduru hehenimu. Momokani, Dirava ena Hereva ibounai istadilaina na mai moalena.

16. Atikol gabena ai dahaka baita herevalaimu?

¹⁶ Iehova ena hereva momokanidia Baibul ai na baita lalopararalaidia diba. Atikol gabena ai, ita ese hereva momokani dobuna ta baita herevalaiamu, una na Iehova ena lauma dubu badana, una na Paulo ese Heberu Kristen taudia e tore henidia neganai e herevalaia. Una topik istadilaina na bo moalelaiamu.