1-2. Makalelo apama omuhudhera Bibiliya baavi? Owoge yotajhiha.

 KUBUWELA wihina onafuna ogule nyumba. Were ohowela woona nyumbaya wahinathi ogula? Obe weere orumedha woona fotu ya nyumbaya, yonihaga osogolove ya nyumbaya baahi? Mwebaribareene weere ofuna ofiya vili nyumbaya teto weere ohowela woona makalelo dhili kwartudha ni dhipaddi dhatedhene dha nyumbaya. Teto weere ofuna onona makalelo nyumbaya emagiwiwa ni were ofuna onona kadda epaddi ya nyumba ele wahinathi ogula. Mwebaribareene we weere ohowela woona dhipaddi dhatedhene dha nyumba ele wahinathi ogula.

² Iyo podi werana emodhave namwilerigi ni naamuhudheraga Bibiliya. Namaleba dhaala ohumuliganiha Bibiliya ni “perediyu yinlubale ni yothabwa otaama etibeliwe pamadhene.” Kivano, ethu baani nnahowelihu werana wihina nimunone pamadhene Bibiliya? Wamwilerigi Bibiliya baahi we podi onona dhithu dhokweya — ‘dhathima dhoweela dha Mulugu.’ (Heb. 5:12) Ni makalelo mamodhave wafuniwe woona nyumba wahinathi ogula, we onohowela ompwasedha pamadhene Bibiliya wihina wande omoonelamo pama. Makalelo apama oomuhudhera Bibiliya fuudhela woona makalelo kadda epaddi ya Bibiliya eniwananiwa ni emodha. Wilibihedhe woona ohiya baahi dhithu baani onarumedhiwe mbwenye mwahaya bwaddi ogarumedha.

3. Ethu baani murumiwi Pawulo aakogomendhiye makiristawu werana, ki mwahaya bwaddi? (Efésios 3:14-19)

³ Wihina nande wonelamo pamadhene ebaribari enafwanyeya mBibiliyani nnohowela ohudhera dhithu dhoviteya dhinafwanyeya mBibiliyani. Murumiwi Pawulo ahawerela makiristawu wihina emuhudherege Bibiliya nupwaseya wihina ‘Mukanne owedha wonona makwiveloya, malapeloya, mataameloya  ni  maddiiheloya’ ya ebaribari. Nimakalelo yala eneere okala ‘oolibeene ni nnere okala txithi’ munroromeloni. (Omwileri Efésios 3:14-19.) Ni iyoya nnohowela werana emodhave. Vano nnere woona makalelo owahudhera madhu a Mulugu pamadhene wihina nande opurelamo dhoorela dhatedhene dhinafwanyeya mBibiliyani.

4. Nnere ddi wihina ninfiyedhe Yehova? Owoge dhotajhiha

⁴ Ninga makiristawu, iyo kannafuna wonelamo baahi dhithu dhokweya dhinafwanyeya mBibiliyani. Ni nikavihero na muzimu wotxena wa Yehova iyo nihikanna ethakwithakwi yohudhera ‘dhithu dhoviteya wodhela Mulugu.’ (1 Cor. 2:9, 10) Ononamo aavi ompandda porogarama oomuhudhera Bibiliya yeka wihina onfiyedhe pamadhene Yehova? Motajhiha, we podi osayela makalelo Yehova awonihiliye odhivela adhaari aye akale ni makalelo eyo enonihiwa wi Oliye onowudhivela. Teto we podi osayela onona makalelo wegeredhiwe webedha webaribari mudhidhi wamwaana Izarayeli ni makalelo Yehova anafuniye wihina nimwebedhege peeno. Obe wafuna, we podi ohudhera dhovuhulela Yesu aakwanihedheyi mudhidhi agaali elabo yavati.

5. Ohukalawo muselu wafuniwe wonelamo pamadhene?

⁵ Addibila dhaala enadhiveliwa omuhudhera Bibiliya ehiwoga dhithu dhinaakavihera omuhudhera pamadhene Bibiliya. We podi osugwa dhithu aliwa ewogiliwa va kwaduru enna musolo “ Makalelo owerana ohudhera wawo wavayeka.” We podi omulabihedha Índice das Publicações da Torre de Vigia obe Guia de Pesquisa para Testemunhas de Jeová wihina werena osayela wawo wahudheraga. We onere woona wi olabihedha dhipano ndha, winere wukavihera werana ohudhera wawo wavayeka. Omuhudhera Bibiliya ni makalelo yala podi wukavihera we olibiha nroromelo nawo ni ofwanya ‘enonelo ya Mulugu.’ (Pro. 2:4, 5) Kabeni noone dhithu dhoviteya dhinafwanyeya mBibiliyani onahoweliwe ohudhera.

6. (a) Efunelo ni palano vihikala ohiyana? (b) Mwahaya bwaddi nigawoga wihina efunelo ya Yehova ni elabo yavati vamodha ni athu ‘sa mukalakala?’ (Efésios 3:11)

⁶ Motajhiha, kasugwa ethu Bibiliya anawogiye wodheela efunelo ya Mulugu. Vihikala ohiyana wodhela palano ni efunelo. Kubuwela wihina  onafuna werena olenddo. Iyo podi omuliganiha palano ni dila onathomiwe wihina olabihedhe wi ofiye mburo onadhowiwe. Mbwenye palano awo podi ohakwanela mwaha wa dilaya ofugiwa. Mbwenye iyo podi oliganiha efunelo ni mburoya onafuniwe ofiyawo. We ohunona pamadhene mburoya onafuniwe ofiyawo, bumwahaya we podi olabihedha dila dhohiyanahiyana wihina ofiye mburo yole. We podi osaddula ethu-sithu mowiwanana ni ele onafuniwe wihina ofiye mburoya. Iyo nnomutamalela vanlubale Yehova mwaha ononiha vang’ono vang’ono ‘efunelo yaye yamukalakala’ enafwanyeya mBibiliyani. (Osugwe nota nohudherana nnafwanyeya va Efésios 3:11.) Yehova anowalabihedha makalelo oohiyanahiyana wihina akwanelihe efunelo yaye mwaha wihina Oliye ‘podi olabihedha ethu-sithu wihina akwanihedhe efunelo yaye.’ (Pro. 16:4) Teto dhithu dhatedhene Yehova aneriyena samukalakala. Mbwenye efunelo ya Yehova sivi? Ki masadduwo baani Oliye aweriliyena wihina efunelo eyo yakwanele?

7. Adawu ni Eva nuuthega masadduwo baani Yehova aweriliyena wihina akwanihedhe efunelo yaye? (Mateus 25:34)

⁷ Mulugu ahawaddela anamatelana oobajha efunelo yaye anniyena naaliwa. Mulugu wawaddela egi: ‘Mwaabale ahima mwinjhivane; mudhaale elabo yatene yavati mwing’anelege; musugwerege . . . dhopaddusiwa dhinavava odhulu ni dhopaddusiwa dhatedhene dhovuma dhineedda elabo yavati.’ (Gén. 1:28) Mwaha wohiwelela wa Adawu ni Eva athu aatene ehivala yothega, mbwenye eyo kisaddunle efunelo ya Yehova. Oliye asaddunle baahi makalelo efuneloya enafuniwa wakwanela. Kale Yehova ahithoma otikitera Omwene odhulu wihina akwanelihe efunelo yaye yobajha ni athu vamodha ni elabo ela yavati. (Omwileri Matewuji 25:34.) Mwaha wa odhivela waye, Yehova ohimuruma mwanaye oobajha wihina adhe velaboni yavati mudhidhi Oliye aathomiliye kale. Ni makalelo yala Yesu eere wanda wahudhiha athu wodhela Omwene ni ovaha egumaye wihina anobole mutheegani ni muukwani. Numala, Yehova onvenyiha Yesu wihina ahogolowele odhulu ni athongege ninga Mwene a Omwene wa Mulugu. Mbwenye dhihikalawo dhithu dhowinjhiva onahoweliwe opendda wodhela efunelo ya Mulugu.

8. (a) Muselu wathimaya onafwanyeya mBibiliyani buuvi? (b) Mowiwanana ni Efésios 1:8-11, efunelo yinlubale ya Yehova siivi? (Osugwe fotu ya vakapani.)

⁸ Mutoma wathimaya onafwanyeya mBibiliyani futxenihiwa wa ndina na Yehova. Eyo eneere opadduwa mudhidhi aakwanelihaga efunelo yaye ni elabo yavati wodhela Omwene waye onathongiwege ni Yesu Kiristu. Efunelo ya Yehova kinadha esadduliwaga. Yehova ohupaganya wi dhatedhene dhinere opadduwa mwamakalelo apaganyiliye. (Isa. 46:10, 11, nota; Heb. 6:17, 18) Mudhidhi waviraga, elabo eneere osadduliwa wihina ekale parayizu vano odhulu wologomana ni wowogowa wa Adawu ni Eva onerege okalawo ni mukalakala. (Sal. 22:26) Teto Yehova onofuna onerela dhithu dhowinjhiva. Efunelo yaye yinlubale sowihina adhaari aye aatene odhulu ni elabo yavati emwebedhege Oliye mowiwanana. Nimakalelo yala, athu aatene enere okala oororomeleya ni enerege omwiwelela Yehova ali Namathonga Munlubale. (Omwileri Efésios 1:8-11) Kunatikina woonaga makalelo Yehova anakwanelihiye efunelo yaye?

9. Dhithu baani dhinapadduwe osogolo nnonnihu mwaha omuhudhera Bibiliya?

⁹ Kasugwa yovuhulela Yehova aawogiliye omundda wo Ideni ninga munawogela Génesis 3:15. b Yawoga wodhela dhopadduwa  dhaakwanihedhe efunelo ya Mulugu, mbwenye dhaakwanele yaka dhowinjhivadhene osogolo. Motajhiha Yehova ahiwoga ni Abarawu wihina wavira mudhidhi wowinjhivene muwari mwa odhuulu waye anere obaliwa muthu mmodha aakale Mesiya. (Gén. 22:15-18) Vano yaka 33 M.W, Yesu oporosiwa ddoddobwa ninga mwawoga yovuhulela. (At. 3:13-15) Epaddi yogomihedha ya yovuhulela ela obe nere onyenyiwa wa musolo wa Saddana onereye omakuthulo wa onamathonga txikwi wa Yesu. (Apo. 20:7-10) Bibiliya anowoga wodhela dhithu dhaapadduwege mwaha widdana wa onamathonga wa Saddana ni nlogo na Yehova.

10. (a) Dhithu baani dhinapadduwe mohilegela? (b) Nnande aavi wegeredha mubuwelo wehu ni murima wehu? (Osugwe nota.)

¹⁰ Kubuwela wodhela dhopadduwa ndha dhotikiniha dhinafwanyeya mBibiliyani dhinereye osogolo. Ethu yobajha, malogo enere ovuwiha ‘murenddele ni obareleya!’ (1 Tes. 5:2, 3) Vano ‘morurumusa’ ohoseya winlubale winere obajha, mudhidhi malogo yambela ogujhula gereja dhatedhene dhowoota. (Apo. 17:16) Vasogolova podi wera nnerege woona dhintelelo dhinapadduwege dhinonihege eyo ‘Mwaana Muthu adhaaga mmuraboni ni kopolo ni nthithimiho ninlubale.’ (Mat. 24:30) Vano Yesu anere watoriha athu wodhela wahiyaniha mambila ni mbuzi. (Mat. 25:31-33, 46) Naarive dhigali ndo Saddana kanaselele, vano mwaha otakaleliwa vanlubale oliye anere weeriha wihina wiwanana wa malogo, Bibiliya anithaniye Gogi a Magogi arijhe nlogo na Mulugu. (Eze. 38:2, 10, 11) Muwari mwa mudhidhi yola makiristawu oothikitheliwa enakale elabo yela yavati enere othukuleliwa odhulu, vano yafiya odhulu aliwa vamodha ni Yesu ni anyakoddo aye enere owana koddo ya Armajedo, koddo ela enakale epaddi yokuthula wa ohoseya winlubale. c (Mat. 24:31; Apo. 16:14, 16) Voharela onamathonga wa yaka txikwi onere obajha olamula elabo yavati. — Apo. 20:6.

11. Murima wawo onakala aavi wubuwelaga wihina onere okalawo ni mukalakala? (Osugwe fotu.)

¹¹ Vano kubuwela makalelo dhinaakale dhithudha onamathonga wa yaka txikwi wavira. Bibiliya anowoga wihina Mpaddusi ehu ‘Ohuhela mmurimani mwaathu efunelo yokalawo  malabo amatene.’ (Ecl. 3:11) Kubuwela makalelo enakale egumawo ni wandana wawo ni Yehova. Livuru Achegue-se a Jeová epaddi 319 nnonikavihera wubuwela makalelo enakale egumihu negihina: “Dhavira yaka dhowinjhiva, matxikwi ni matxikwi nikalagawo nnere onona dhithu dhowinjhiva wodhela Yehova okwaranya ndhe nnonihu peeno, mbwenye naarive dhigali ndo dhinere okalawo dhithu dhowinjhiva nnahowelihu ohudhera. . . . Mwebaribarene egumi mwilaboni exa enere okala yohagalasa vanlubale ni nnere wanda werana dhithu dhowinjhiva, teto yathimaya sowihina nnerege odhowagave ninfiyedhaga Yehova.” Mudhidhi yoyo ohunafiye dhithu baani dhimodha nnahowelihu ohudhera ni opurelamo mBibiliyani?

12. Nisugwege odhulu ni makalelo baani? Owoge yotajhiha.

¹² Bibiliya anowoga vang’no wodhela makalelo wili odhulu obe mburo wili Yehova. (Isa. 33:5) Teto Bibiliya anowoga dhithu dhotikiniha wodhela Yehova ni wodhela epaddi yodhulu ya nikuuru naye. (Isa. 6:1-4; Dan. 7:9, 10; Apo. 4:1-6) Motajhiha iyo podi wileri wodhela dhithu dhotikiniha namavuhulela Ezekiyeli ooniliye odhulu nufuguwawo ni obajha okanna dhowoona dhadhela epaddi ya Mulugu. — Eze 1:1.

13. Onakala aavi mwaha onona dhithu Yesu aneriyena agaali odhulu? (Hebreus 4:14-16)

¹³ Kubuwela wodhela dhithu dhinerana Yesu odhulu ninga Namathonga ehu ni Namakutha Munlubale Yesu anowonelamo pamadhene dhithu dhinanipadduwela. Wodhela Yesu iyo podi waddamela ‘vampaddoni vomwene va Mulugu ni oneti ninihuna wohunifwanelela’ wodhela nlobelo ni oloba wi needdeliwe thagaraga ni nikavihero ‘mudhidhiya wakwana.’ (Omwileri Hebreus 4:14-16.) Openddege malabo amatene wodhela dhithu Yehova vamodha ni Yesu yeriliwana ni enanereliwa wula egaali odhulu. Nnohowela weenya wihina odhivela winanoniha Yehova vamodha ni Yesu onidahinye murima  ni onthukulele werana dhatedhene nnandihu mmabasani nnamparelihu Yehova. — 2 Cor. 5:14, 15.

14. Makalelo apama owooniha wi nnotamalela dhithu Yehova ni mwanaye Yesu enanereliwa baavi? (Osugwe fotu.)

¹⁴ Makalelo apama owoniha wi nnotamalela dhithu Yehova ni mwanaye Yesu enanereliwa fuudhela werana dhatedhene nnandihu wihina naakavihere athu okala Anamoona a Yehova ni anamahara a Yesu. (Mat. 28:19, 20) Siyeyo murumiwi Pawulo eriliyena wihina oonihe wi ootamalela ele Yehova ni mwanaye Yesu yaamwereliwa. Oliye ahinona wi efunelo ya Yehova yaali ‘athu aatene evuluwe ni enone ebaribari.’ (1 Tim. 2:3, 4) Oliye ahilaba mmabasani oolaleya wihina aakavihere athu owinjhiva, ofiyedha owoga wihina dhandeyaga gaakavire athu angasi-angasi ovuluwa.’ — 1 Cor. 9:22, 23.

15. Mowiwanana ni Salmo 1:2, ethu baani enafuna onihagalasa?

¹⁵ Salmista dhaala ohuwoga makalelo anakala muthu anaahudhera madhu a Mulugu oliye ohuwoga egi ‘anowawileri malamulo Aye ni madhu a vati-vati, mutana ni mahiyu.’ (Sal. 1:1-3; nota.) Awogaga wodhela yolebela ela namatapulela dhaala a Bibiliya anithaniwa Joseph Rotherham ohuleba mulivuruni mwaaye Estudos dos Salmos ni Engeleji egihina: “Muthu anahowela odhiveliwa dhoholela dha Mulugu ofiyedha osayela ohudhera ni ojha mudhidhi apenddaga wodhela dhoholela ndha.” Oliye ohuwogave wi “muthu di muthu avireliwa nlabo ahimwilerile Bibiliya ni ahipurenlemo thotho dha madhu a Mulugu ohuyelela vanlubale nlabo naye.” We podi odhiveliwa vanlubale omwilerigi Bibiliya wodhela othuwathuwela onona dhithu dhing’ono mbwenye dhathima dha mBibiliyani ni woona makalelo dhiniwananiwa. Opurelamo dhithu dhatedhene dha mBibiliyani ethu yohagalasa vanlubale.

16. Ohudhera winaharela dhithu baani nnahudherihu?

¹⁶ Ebaribari yoriya Yehova ananihudhihiye mBibiliyania, kadhinathabwa orusa wonelamo. Ohudhera winaharela nnere ohudhera wodhela ebaribari emodha yathima vanlubale, tempulu yinlubale ya Yehova murumiwi Pawulo aalebenliye makiristawu yaali mEberewu. Onere odhiveliwa vanlubale ohudhera wodhela muselu ola.