1, 2. ¿Kenijkatsa moneki tijpouasej uan timomachtisej Biblia? Xikijto se neskayotl.

 XIMOILJUI tijneki tijkouas se kali. ¿Tlake tijchiuaskia? ¿Tikitaskia san se tlaixkopinkayotl tlen nopa kali? ¿O tiaskia tikitati? Uelis tijnekis kuali tikitas kenijkatsa eltok nochi nopa kali. O uelis tijnekis tikitas nopa amatl kampa nesi kenijkatsa kichijchijkej. Uajka, amo tijkouaskia san kej ueli.

² Nojkia moneki kiampa tijchiuasej kema tijpouaj uan timomachtiaj Biblia. Se amochtli kiijtoua Biblia “eli kej se uejkapantik kali uan tlen tlauel uejkatla kitsinpeualtijtokej”. ¿Tlake uelis tijchiuasej tlaj tijnekij kuali tijmatisej tlen Biblia tlamachtia? Tlaj isijkapa o san kej ueli tijpouaj tijmatisej san “tlen axmás ouij” (Heb. 5:12). Tlauel techpaleuis tlaj “kuali tijtlachiliaj” tlen eltok ipan Biblia, sanse kej tijchiuaskiaj kema tijkouaskiaj se kali. Kema timomachtiaj Biblia, moneki tikitasej kenijkatsa mouika ika nopa sekinok tlapoualistli tlen eltok. Amo moneki san tijneltokasej se tlamantli, moneki timoiljuisej kenke tijneltokaj.

3. ¿Tlake kiniljuik Pablo ma kichiuakaj Cristo itokilijkauaj, uan kenke kiampa kiijtok? (Efesios 3:14-19).

³ Tlaj tijnekij kuali tijkuamachilisej tlen Biblia kiijtoua,  moneki timomachtisej tlamachtili tlen ouij. Apóstol Pablo kiniljuik Cristo itokilijkauaj monekiyaya kichiuasej kampeka kuali momachtisej, pampa toTeotsij iTlajtol eltok kejuak “kampa más uejkapa uan kampa más tlatsintla uan asi tlen kampa kisa tonati hasta kampa kalaki”. Tlaj kuali momachtiskiaj, kinpaleuiskia kuali ma tlaneltokakaj sanse kej “se [xiui]tsontli kiselia chikaualistli tlen ineljuayo” (xijpoua Efesios 3:14-19). Tojuantij nojkia moneki kiampa tijchiuasej. Ma tikitakaj kenijkatsa uelis kuali timomachtisej tlen Biblia kiijtoua uan kiampa uelis tijkuamachilisej miak tlamantli.

4. ¿Tlake uelis tijchiuasej tlaj tijnekij timouampojchiuasej iuaya Jehová? Xikijto tlen uelis tijchiuas.

⁴ Katli tijtekipanouaj Jehová amo moneki tijmatisej san se keski tlamantli tlen Biblia tlamachtia. Tijnekij tijmatisej “tlen más ueyi tlen moiljuia Toteko” uan Jehová techpaleuis ika ichikaualis (1 Cor. 2:9, 10). Uajka uelis timosentlalis timomachtis se keski tlamachtili tlen mitspaleuis ximouampojchiua iuaya Jehová. Uelis timomachtis nopa tlapoualistli kampa kiijtoua kenijkatsa Jehová kinextik kiniknelik itekipanojkauaj uejkajkia, pampa nopa mitspaleuis ximotemachi nojkia mitsiknelia. Nojkia, uelis tikitas kenijkatsa Jehová kinekiyaya ma kiueyichiuakaj israeleuanij uan kenijkatsa tijueyichiuaj ipan ni tonali. O uelis timomachtis nopa tlajtolpanextili tlen Jesús kiaxitik kema itstoya ipan Tlaltipaktli.

5. ¿Tlake tlamachtili mitspaktiskia timomachtis?

⁵ Kintlajtlanijkej se keskij toikniuaj tlake tlamachtili tlen tlauel ouij kinpaktiskia momachtisej. Nopa recuadro “ Tlen uelis timomachtis”, kiijtoua se keski tlamantli tlen kiijtojkej. Tlauel mitspaktis tlaj timomachtis nopa tlamachtili tlen uala ipan nopa recuadro uan tlaj tijtekiuis Índice de las publicaciones Watch Tower uan Tlen ika momachtiaj Jehová itlajtoltemakauaj. Tlen timomachtis mitspaleuis kuali xitlaneltoka uan nojkia tijmatis kenijkatsa moiljuia toTeotsij  (Prov. 2:4, 5). Nama, ma tikitakaj tlake tlamachtili tlen ouij uelis timomachtisej.

6. 1) Xikijto ika se neskayotl kenijkatsa Jehová nelia kichiua tlen mosentlalia. 2) ¿Kenke timotemachiaj Jehová nelia kichiuas mosentlalijtok? (Efesios 3:11).

⁶ Jehová nochipa kichiua tlen mosentlalia. Ximoiljui ipan ni tlamantli. Ximoiljui tijneki tias ipan seyok rancho, uan ipan ojtli uetstok se kuauitl, yeka amo uelis tipanos nopaya. Tlaj tijneki tiasiti kampa tia, moneki tias ipan seyok ojtli. Jehová nojkia mosentlalijtok kichiuas se tlamantli. Uan tlauel tijtlaskamatiliaj pampa ipan Biblia techiljuia tlen kichiuas (Efes. 3:11). Uan nelia kichiuas tlen mosentlalijtok pampa kichijchijtok “nochi tlamantli para ma kitlamilti ipakilis” (Prov. 16:4). Uan tlen kichiuas ipan Tlaltipaktli, amo kema tlamis. Uajka, ¿tlake mosentlalijtok Jehová uan tlake tlamantli kipatlatok pampa kineki kichiuas tlen kiijtojtok?

7. ¿Tlake kichijki Jehová kema Adán uan Eva tlajtlakolchijkej? (Mateo 25:34).

⁷ ToTeotsij kiniljuik maseualmej tlake mosentlalijtoya kichiuas. Ya kiniljuik: “Xikinpiakaj miak inmokoneuaj para inijuantij itstosej kampa ueli ipan nochi tlaltipaktli para ma tlanauatikaj. Nojkia niinmechtlalia xikinnauatikaj nochi [ . . . ] tlen nemij ipan tlaltipaktli” (Gén. 1:28). Maske Adán uan Eva tlaijixnamijkej uan kichijkej maseualmej ma mikikaj, nopa tlamantli amo kitsakuilik tlen Jehová kinekiyaya kichiuas. Yeka Jehová kipatlak se keski tlamantli. Ya nima kiijtok kitlaliskia se tlanauatijketl ipan iluikak katli kichiuaskia tlen mosentlalijtoya kichiuas ipan Tlaltipaktli (xijpoua Mateo 25:34). Yeka Jehová kiualtitlanki ipan Tlaltipaktli iachtouiKone kema kiitak kinamikiyaya kiampa kichiuas. Jesús kinkamanaljuik maseualmej tlen toTeotsij iTlanauatijkayo uan motemaktilik pampa kinejki kinmakixtis tlen tlajtlakoli uan mikilistli. Teipa kema moyolkuik, tlejkok iluikak uan pejki tlanauatia ipan toTeotsij iTlanauatijkayo. Pero onka sekinok tlamantli tlen toTeotsij mosentlalijtok kichiuas uan uelis timoyoliljuisej ipan nopa tlamantli.

8. 1) ¿Ipan tlake mosentlalia Biblia? 2) Kej kiijtoua Efesios 1:8-11, ¿tlake sekinok tlamantli kichiuas Jehová? (Xikita tlaixkopinkayotl ipan ipantsajka).

⁸ Biblia miakpa kiijtoua kenijkatsa Jehová kitekimakas Jesús ipan iTlanauatijkayo uan kiampa kichiuas tlen mosentlalijtok ipan Tlaltipaktli uan kiuejkapantlalis itoka. Amo aka uelis kitsakuilis tlen Jehová mosentlalijtok kichiuas. Ya kiijtojtok nelia kichiuas (Is. 46:10, 11; Heb. 6:17, 18). Tlaltipaktli mochiuas se xochimili kej panotias tonali, uan nopaya katli kuali monejnemiltijkej elisej xitlauakej uan itstosej nochipa (Sal. 22:26). Jehová kichiuas nochi maseualmej uan ángeles ma mosentikapaleuikaj uan nochi kiitasej san ya kinamiki tlanauatis (xijpoua Efesios 1:8-11). ¡Nelia tlauel timosentlachiliaj kema tikitaj Jehová kena kichiua tlen mosentlalijtok!

9. ¿Kenijkatsa Biblia techpaleuia ma tijmatikaj tlen panos teipa?

⁹ Ma timoiljuikaj tlen Jehová kiijtok ipan xochimili Edén, tlen kiijtok nesi ipan Génesis 3:15. b Ipan ni texto kiijtoua tlen panoskia uan kiampa kema panoskia miak xiuitl, moaxitiskia tlen Jehová mosentlalijtok kichiuas. Nopa tlajtolpanextili kiijtoua ikone  nopa siuatl, katli eliskia nopa Mesías, eliskia se iteipaixui Abraham (Gén. 22:15-18). Teipa ipan xiuitl 33 y.u.J., kejuak kikostsakanijkej Jesús kej kiijtojtoya nopa tlajtolpanextili (Hech. 3:13-15). Uan nojua poliui se mil xiuitl para ma motlamiaxiti ni tlajtolpanextili uan ma kitsonxamanikaj Satanás (Apoc. 20:7-10). Biblia kiijtoua tlake sekinok tlamantli panos kema Jehová nechka kitsontlamiltis Satanás uan katli kipaleuiaj.

10. 1) ¿Tlake tlamantli nechka panos? 2) ¿Kenijkatsa uelis timokualchijchiuasej? (Xikita nota).

¹⁰ Ma tikitakaj tlake tlamantli kiijtoua Biblia panos teipa. Maseualmej kiijtosej “ya onka tlaseuilistli uan ya itstokej ika kuali” (1 Tes. 5:2, 3). Uan nopa ueyi tlaijiyouilistli “tlalochtli” peuas kema tekichiuanij peuasej kikualankaitasej nochi religiones tlen amo melauak (Apoc. 17:16). Teipa kema ualas Jesús ika iueyichikaualis, uelis panos miak tlamantli tlen amo kema tikitstoyaj (Mat. 24:30). Jesús kintlajtolsenkauas maseualmej, uan kinxelos katli kualmej uan katli amo kualmej (Mat. 25:31-33, 46). Uan Satanás tlauel kualanis, yeka kichiuas miakej altepemej, katli Biblia kintokaxtiaj Gog tlen tlali Magog, ma kinteuikaj toTeotsij itekipanojkauaj (Ezeq. 38:2, 10, 11). Teipa tlapejpenilmej katli nojua itstokej ipan Tlaltipaktli kinsentilisej iluikak, mosentilisej iuaya Jesucristo uan iángeles para tlateuisej ipan Armagedón uan kiampa kitlamiltisej nopa ueyi tlaijiyouilistli (Mat. 24:31; Apoc. 16:14, 16). c Kema ya panotos ni tlamantli, peuas nopa Mil Xiuitl kema Jesús tlanauatis ipan Tlaltipaktli (Apoc. 20:6).

11. ¿Kenijkatsa tijyolmati pampa teipa uelis tiitstos nochipa? (Xikita tlaixkopinkayomej).

¹¹ Ma timoiljuikaj tlen panos teipa. Biblia kiijtoua toTeotsij “kitlalijtok ipan iyolo sejse tlakatl para ma kimati tlen nelia ya axkema mikis” (Ecl. 3:11). Nopa tlauel techpaleuis uan nojkia techpaleuis kuali ma timouikakaj iuaya Jehová. Nopa amochtli Acerquémonos a Jehová iamayo 319, kiijtoua ni tlamantli:  “Kema ya tiitstosej tlauel miak xiuitl nojua más kuali tikixmatisej Jehová. Pero nojua monekis tijmatisej sekinok tlamantli tlen ya [ . . . ]. Ipan nopa tonali tlauel kuali tiitstosej uan uelis tijchiuasej miak tlamantli ipan Xochimili. Maske uelis tijchiuasej miak tlamantli nojua más techpaktis pampa más kuali timouampojchiuasej iuaya Jehová kej panotias tonali”. Uan ipan ni tonali, ¿tlake sekinok tlamantli uelis timomachtis ipan Biblia?

12. ¿Tlake uelis tijchiuasej tlaj tijnekij tijmatisej kenijkatsa itstokej Jehová uan ángeles? Xikijto se neskayotl.

¹² Biblia techiljuia kenijkatsa eli Jehová katli “itstok nepa iluikak” (Is. 33:5). Nopaya kiijtoua kenijkatsa eli, kenijkatsa elij ángeles uan tlake tekitl kichiuaj (Is. 6:1-4; Dan. 7:9, 10; Apoc. 4:1-6). Uelis tijpouasej tlen Ezequiel kiitak kema kejuak ipan se temiktli kiitak “se tlanextili tlen Toteko Dios” (Ezeq. 1:1).

13. ¿Tlake tijyolmati kema timoiljuia ipan tlen Jesús kichiua iluikak? (Hebreos 4:14-16).

¹³ Ma timoiljuikaj tlake tekitl kichiua Jesús ipan iluikak, pampa eli Tlanauatijketl uan Sumo Sacerdote. Kema timomaijtouaj, Jesús uelis techpaleuis ma timonechkauikaj “kampa moseuijtok Toteko” uan kiampa uelis tijtlajtlanisej ma techpaleui “kema más moneki” (xijpoua Hebreos 4:14-16). Mojmostla ma timoyoliljuikaj kenijkatsa Jehová uan Jesús techpaleuiaj maske itstokej iluikak. Tlen kichiuaj pampa tlauel techikneliaj, moneki techyololinis ma tijtekipanokaj Jehová ika nochi toyolo (2 Cor. 5:14, 15).

14. ¿Kenijkatsa uelis tijnextisej tikintlaskamatiliaj Jehová uan Jesús? (Nojkia xikita tlaixkopinkayomej).

¹⁴ Tijnextisej tikintlaskamatiliaj Jehová uan Jesús, tlaj tikinpaleuiaj sekinok ma kinixmatikaj uan ma kitekipanokaj Jehová  (Mat. 28:19, 20, TNM). Apóstol Pablo kiampa kichijki, pampa tlauel kipatiitayaya tlen kichijtoyaj Jehová uan Jesús. Ya kimatiyaya toTeotsij kineki nochi maseualmej ma kimatikaj tlen melauak uan ma momakixtikaj (1 Tim. 2:3, 4). Yeka tlauel tlajtolmoyajki uan tlamachtik pampa kinekiyaya miakej ma momanauikaj (1 Cor. 9:22, 23).

15. Kej kiijtoua Salmo 1:2, ¿tlake techpaleuis ma tiyolpakikaj?

¹⁵ Se katli kiijkuilok se Salmo kiijtok tlauel yolpaki uan kuali itstok katli “kichijtinemi tlen kiijtoua itlanauatiljuaj TOTEKO” uan “moyoliljuitinemi tonaya uan tlayoua” (Sal. 1:1-3). Se katli kitlajtolkuepa Biblia kiijtoua katli kipoua Biblia “moneki kipaktis tlen nopaya tetlajtolmaka, kitemos tlamachtili uan moneki kiyekos miak tlamantli”. Nojkia “moneki kiitas kejuak motonalpolok kema amo kiyekok yon se tlamantli” (Studies in the Psalms, Joseph Rotherham). Ta nojkia uelis tlauel mitspaleuis tlaj timomachtis Biblia, tlaj tikitas sejse tlamantli tlen nopaya kiijtoua uan kenijkatsa mouika sejse tlapoualistli. Nelia tlauel kuali tijyolmatis kema timomachtis nochi nopa tlamantli tlen Biblia kiijtoua.

16. ¿Tlake tikitasej ipan tlamachtili 45?

¹⁶ Nochi uelis timomachtisej tlen Biblia kiijtoua. Ipan tlamachtili 45 tikitasej tlake eli nopa teokali tlen tlatsejtseloltik, tlen Pablo kiijtok ipan nopa amatlajkuiloli tlen kintitlanilik hebreos. Tlauel techpaleuis kema timomachtisej ni tlamantli.