1, 2. ¿Keniuj moneki tikixtajtoltiskej uan timomachtiskej Biblia? Xikonijto se neskayot.

 XIKONNEMILI ke tikonneki tionmokouilis se motocicleta. ¿Niman tikonixtauaskia komo tikonkakiskia ke aksa kinamakatok se, oso tionyaskia uan tikonitaskia ox kualtia? Xa ipa tionyaskia uan achto ke tikonixtauaskia kuali tikonitaskia ox amo uejueliujtok.

² No ijkon moneki tikchiuaskej keman tikixtajtoltiaj uan timomachtiaj Biblia. Se motelmachtijkej kijtoj ke tein ika tajtoua Biblia tamati kemej “se uejkapan kali tein uejkatan toktok”. ¿Uan keniuj uelis tikmatiskej tein kijtoua Biblia? Komo ijsiujka tikixtajtoltiaj sayoj timomachtiskej tein amo ouij, ‘tein yekinika timomachtijkej itech itajtol Dios’ (Heb. 5:12). Ijkon kemej kuali tikonita maj kualtia motor uan nochi tein kipia motocicleta, no ijkon moneki kuali tionmomachtis tein kijtoua Biblia para tikonajsikamatis keniuj nochi tein kijtoua sayoj ika tajtoua se taman. Amo moneki sayoj tikmatiskej toni tikneltokaj, ta no moneki tikmatiskej keyej.

3. ¿Toni Pablo kinyolchikauak tokniuan maj kichiuakan, uan keyej? (Efesios 3:​14-19).

³ Para tikajsikamatiskej nochin tein ika tajtoua Biblia, seki taman moneki okachi kuali timomachtiskej. Tatitanil Pablo kinyolchikauak nochi tokniuan maj kuali momachtikan iTajtol Dios para kiajsikamatiskej “keniuj patauak, ueyak,  uejkapan uan uejkatan tamachtilis tein melauak”. Nejon kinpaleuiskia maj takuaujtamatikan uan maj kuali ‘motakitskilijtokan itech tatsineualoni, ijkon kemej inaluayo se kouit tein kuali toktok’ (xikonixtajtolti Efesios 3:​14-19). Tejuan no moneki ijkon tikchiuaskej. Maj tikitakan keniuj uelis kuali timomachtiskej iTajtol Dios para tikmatiskej toni ika tajtoua uan kuali tikajsikamatiskej.

4. ¿Toni uelis tikchiuaskej para okachi timotokiskej iuan Jehová? Xikonijto seki taman.

⁴ Tiitekitikauan Dios amo tiknekij sayoj tikajsikamatiskej tamachtilis tein amo ouij tein kipia Biblia. Ta tiknekij timomachtiskej “hasta itanemililuan Dios tein amo ueli se kitamiajsikamati” uan ichikaualis Dios techpaleuis maj ijkon tikchiuakan (1 Cor. 2:​9, 10). ¿Uelis tikonixtalis okachi tionmomachtis se taman tein mitsonpaleuis okachi xionmotoki iuan Jehová? Onkak miak taman tein uelis tionmomachtis. Xa ueliskia tikontemos keniuj Jehová kinextij ke kintasojtak itekitikauan ne uejkauj uan keniuj nejon no kinextia ke mitsontasojta tejuatsin. No ueliskia tionmomachtis keniuj Jehová kinekia maj kiueyichiuanij israelitas uan keniuj kineki maj tikueyichiuakan axkan. No uelis tionmomachtis keniuj keman Jesús nemik nikan taltikpak uan keman tanojnotsak, itech mochiuak tein achto moijtojka.

5. Keman tionmomachtis moselti, ¿toni tamachtilismej tikonuelitaskia okachi kuali tionmomachtis?

⁵ Seki tokniuan akin kuali momachtiaj Biblia kintajtanijkej toni seki taman tein ouij kiuelitaskiaj okachi kuali momachtiskej. Itech recuadro “ Tamachtilismej tein uelis tionmomachtis moselti”, kipia seki taman tein yejuan kijtojkej. Xa semi tikonuelitas tionmomachtis seki taman de nejin itech amaix Nepaleuil tein ika momachtiaj itaixpantijkauan Jiova. Tein tionmomachtis mitsonpaleuis okachi xiontakuaujtamati uan okachi ‘xikonixmati Dios’ (Prov. 2:​4, 5). Axkan ika titajtoskej seki tamachtilismej tein ouijkej tein uelis okachi timomachtiskej.

6. 1) Xikonijto ika se neskayot keyej nochipa mochiua tein Jehová kiixtalia. 2) ¿Keyej uelis tikijtoskej ke tein Jehová kiixtalijtok kichiuas amo keman tami? (Efesios 3:11).

⁶ Itech xiontanemili tein Dios kiixtalijtok kichiuas, tein moijtoua itech Biblia. Jehová amo kemej tejuan keman tikixpejpenaj se ojti para tiajsiskej kampa tikixtalijtokej, porin amo uelis tiajsiskej komo teisa tatsakuilijtok itech ojti. Sayoj ke tein Jehová kiixtalijtok kichiuas kemej yeskia kampa tiknekij tiajsiskej. Yejuatsin kiixtalijya toni kichiuas uan ueli kipata miak taman para kichiuas tein kineki. Tein Jehová kiixtalijtok maj mochiua “amo keman tami” uan semi tiktasojkamatiliaj maj yolik techmatiltijtiuj itech Biblia (Efes. 3:11). Jehová kichiua miak taman para kichiuas tein kiixtalijtok, nochi ‘kichijchiuani para kichiuas itanejnekilis’ (Prov. 16:4). Uan tein Jehová kichiuas amo keman ixpoliuis. Sayoj ke, ¿toni kiixtalijtok kichiuas Jehová? Uan, ¿toni kipatani para ijkon kichiuas?

7. Keman Adán uan Eva kiixnamikkej Dios, ¿keniuj Jehová kipatak tein kichiuaskia para maj mochiua tein kiixtalijtoya? (Mateo 25:34).

⁷ Dios kiniluij Adán uan Eva toni kinekia maj kichiuakan keman kinnauatij: “Xikinpiakan miakej namokoneuan, ximomiakilikan, ximomoyauakan itech nochi taltikpak uan […] xikinyekpiakan […] nochin tapialmej” (Gén. 1:28). Adán uan Eva amo kitakamatkej Jehová uan yejua ika tinochin titajtakolejkej, sayoj ke nejon amo kitsakuilij maj kichiua tein kiixtalijtok, ta yejuatsin sayoj kipatak kemej kichiuas. Niman kiixtalij maj sekin tekiuajtikan ompa iluikak para maj mochiuani tein kiixtalijtoya nikan taltikpak (xikonixtajtolti Mateo 25:34). Jehová kiualtitanik iKonetsin nikan taltikpak keman kiixtalijka. Jesús ika tanojnotsako iTaixyekanalis Dios uan toka momikiliko para techmakixtis den tajtakol uan mikilis. Satepan, Jehová kichiuak maj oksepa nemi uan yajki iluikak para taixyekanas kemej Tekiuaj itech iTaixyekanalis Dios. Sayoj ke Biblia okachi ika tajtoua tein Dios kiixtalijtok kichiuas tein moneki itech titanemiliskej.

8. 1) ¿Toni ika tajtoua Biblia? 2) Kemej kijtoua Efesios 1:​8-11, ¿toni kiixtalijtok kichiuas Jehová? (Xikonita taixkopin ipeujyan amaix).

⁸ Itech nochi Biblia ika motajtoua keniuj Jehová kiueyitalis itokay, uan nejin kichiuas keman Jesús tekiuajtitos ompa iluikak uan kichiuasya tein kiixtalijtok nikan taltikpak. Amo akin uelis kitsakuilis tein yejuatsin kiixtalijtok kichiuas. Jehová motenkaua ke kichiuas nochi tein kineki (Is. 46:​10, 11, notas; Heb. 6:​17, 18). Ijkon kemej panos tiempo, taltikpak mochiuas se xochital kampa ikoneuan Adán uan Eva amo tajtakolejkejok yeskij uan nemiskej nochipaya (Sal. 22:26). Jehová amo sayoj kichiuas nejon. Yejuatsin no kichiuas maj kualtsin mouikakan kemej kalyetonij nochin akin nemiskej ompa iluikak uan nikan taltikpak, uan maj nochipa kitakamatikan kemej ininUeyi Teko (xikonixtajtolti Efesios 1:​8-11). ¿Melauj ke semi kualtsin kemej Jehová kichiua tein kiixtalijtok?

9. ¿Toni tein panos amo uejkaua uelis tikmatiskej komo tikixtajtoltiaj Biblia?

⁹ Maj itech titanemilikan tein Jehová kijtoj itech xochital Edén ke mochiuaskia, tein moajsi itech Génesis 3:15. b Ompa kijtoua toni panoskia para mochiuaskia tein Dios kiixtalijtok, sayoj ke nejon mochiuaskia miak xiujmej satepan. Dios kiluijka  Abrahán ke satepan ke nemiskiaj tel miakej ichankauan, semej mochiuaskia Mesías (Gén. 22:​15-18). Seki xiujmej satepan, itech xiuit 33 Jesús kemej yeskia kikotskejtsonkej ijkon kemej moijtojka (Hech. 3:​13-15). Uan poliuiok panoua mil xiujmejok para motamichiuas keman moijtojka ke Satanás kikuaxamaniskej (Apoc. 20:​7-10). Biblia no kijtoua toni mochiuas tepitsin achto ke Jehová kinixpolos akin kiixnamikij.

10. 1) ¿Toni mochiuas amo uejkaua? 2) ¿Toni moneki tikchiujtoskej para tikchixtoskej nejon tonal? (Xikonita nota).

¹⁰ Maj tikitakan toni kijtoua Biblia ke mochiuas tein se kimojkaita. Yekinika, akin taixyekanaj itech nochi taltikpak kitematiltiskej ke “tiyolseujkanemijya uan amo timouijok” (1 Tes. 5:​2, 3). Tetsaujkatajyouilis ejkotiuetsis keman akin taixyekanaj nikan taltikpak kiixpoloskej taneltokalismej tein amo melaujkej (Apoc. 17:16). Satepan, xa mochiuaskej tetsaujmej keman kiitaskej “akin yolik kemej takat [...] ualajtok itech mixti ne ejekaixko ika chikaualis uan ueyi kualtsinyot” (Mat. 24:30). Jesús kiixtalis tein kinnamiki kiseliskej nochin uan kinxelos akin kemej yeskiaj ichkamej uan chivos (Mat. 25:​31-33, 46). Itech nejon tiempo, Satanás kisentokas kiixnamikis Jehová. Kemej semi kualantos, kichiuas maj Gog tein ualeua Magog oso nochin akin taixyekanaj nikan taltikpak kinixnamikikan nochin itekitikauan Jehová (Ezeq. 38:​2, 10, 11). Keman mochiujtos tetsaujkatajyouilis, nochin taijitalmej akin yetoskejok nikan taltikpak mosentiliskej ompa iluikak iuan Jesús uan miakej ángeles para tateuiskej itech Armagedón, tein ika tamis tetsaujkatajyouilis (Mat. 24:31; Apoc. 16:​14, 16). c Ompa, Cristo peuas taixyekanas nikan taltikpak mil xiujmej (Apoc. 20:6).

11. ¿Keniuj tikonita maj ueli tinemikan nochipaya? (No xikonita taixkopimej).

¹¹ Axkan xikonnemili tein panos satepan ke tamis mil xiujmej. Biblia kijtoj ke Dios akin tachijchiuak ‘kitalij itech toyolo’ maj tiknekikan tinemiskej nochipaya  (Ecl. 3: 11). ¿Keniuj nejin mitsonpaleuis okachi kuali xionmouika iuan Jehová? Amaix Acerquémonos a Jehová, itech página 319, kijtoua ke keman tinemiskejya tel miak xiujmej, okachi kuali tikixmatiskejya Jehová ke axkan. Maski ijkon ipa tikmachiliskejok ke moneki okachiok tikixmatiskej. No kijtoj ke semi kualtsin yeski keman tinemiskej itech xochital. Sayoj ke okachi kualtsin yeski maj ueli okachi timotokikan iuan Jehová. Uan, ¿toni okse taman uelis timomachtiskej axkan ke tikchixtokej maj ejko nejon tonal?

12. ¿Keniuj kemej yeskia moneki tiajkotachiaskej? Xikonijto se taman.

¹² ITajtol Dios techpaleuia maj tikajsikamatikan tepitsin keniuj tamati kampa moajsi Jehová “porin yejua nemi iluikak” (Is. 33:5). Biblia kinextia keniuj semi kualtsin kampa nemi Jehová uan ángeles ompa iluikak (Is. 6:​1-4; Dan. 7:​9, 10; Apoc. 4:​1-6). Uelis tikixtajtoltiskej keman “iluikak motapoj” uan Ezequiel kiitak seki taman tein kualtsitsin (Ezeq. 1:1).

13. ¿Keniuj tionmomachilia keman itech tiontanemilia tein Jesús kichiujtok ompa iluikak? (Hebreos 4:​14-16).

¹³ Maj ika titanemilikan tekit tein kichiua Jesús ompa iluikak kemej Tekiuaj uan Tayekankatiopixkat akin teyoliknelia. Itokaykopa Jesús uelis timotokiskej “kampa tokotsyetok Dios akin kitemaka itatiochiualis tein amo technamiki”, uan tiktajtaniskej maj techikneli “itech hora keman okachi monekis maj techpaleuikan” (xikonixtajtolti Hebreos 4:​14-16). Mojmostaj maj ika titanemilikan tein Jehová uan Jesús toka kichiuaj desde ne iluikak. Kemej techtasojtaj tiknejnekij okachi tiktekitiliskej Jehová (2 Cor. 5:​14, 15).

14. ¿Keniuj uelis tiknextiskej ke tikintasojkamatiliaj Jehová uan Jesús? (No xikonita taixkopimej).

¹⁴ No tiknextiaj ke tiktasojkamatiliaj  Dios uan iKonetsin keman timochikauaj tikinpaleuiskej oksekin maj mochiuakan itekitikauan Jehová uan imomachtijkauan Jesús (Mat. 28:​19, 20). No ijkon kichiuak tatitanil Pablo uan ijkon kinextij ke kitasojkamatiliaya Dios uan Cristo. Pablo kimatia ke Jehová kineki “maj akin yeski momakixti uan maj kuali kiixmati tein melauak” (1 Tim. 2:​3, 4). Yejua ika semi mochikauak kinpaleuis miakej maj kiixmatikan iTajtol Dios uan ijkon ueliskia ‘kinmakixtis maski sayoj sekin’ (1 Cor. 9:​22, 23).

15. Kemej kijtoua Salmo 1:​2, ¿toni kichiuas maj tiyolpakikan?

¹⁵ Yekmelauj panoua tein salmista kijkuiloj, porin yejua kijtoj ke akin “kiyolpaktia itanauatil Jehová” uan “tonayan uan youak kiixtajtoltia itanauatil uan itech tanemilia”, yolpaki uan kuali kikisa tein kichiua (Sal. 1:​1-3). Keman se takat akin kitajtolkepa Biblia ika tajtoj nejin versículo, kijtoj itech se amatajkuilol ke akin kiixtajtoltia Biblia monekiskia kiuelitas maj Dios kiixyekana, yejua ika kitemoskia tein tayolmajxitia, momachtiskia uan nochipa itech tanemiliskia. No kijtoj ke komo se tonal amo kiixtajtoltiskia Biblia, tein kichiuaskia nejon tonal sayoj nenkaj. Tejuatsin no tionyolpakis komo tionmochikaua tikonajsikamatis tein Biblia ika tajtoua uan tikonitas keniuj nochi tein kijtoua ika tajtoua sayoj se taman. ¡Techyolpaktia timomachtiskej iTajtol Dios uan tikajsikamatiskej tein ika tajtoua!

16. ¿Toni tikitaskej itech okse tamachtilis?

¹⁶ Tinochin uelis tikajsikamatiskej kualtsitsin tamachtilismej tein Jehová techmachtia itech iTajtol. Itech okse tamachtilis tikitaskej semej tein okachi ouijkej. Yejua iueyi templo Jehová tein Pablo ika tajtoj keman kintajkuilouilij tokniuan hebreos. Tinochin semi tikuelitaskej keman okachi timomachtiskej nejin taman.