1, 2. ¿Kenon noneki tikamapouaskej niman tomachtiskej Biblia para matechpaleui? Xkijto se neskayotl.

 XKONNEMILI ika tikneki tikmokouilis se motocicleta. ¿Tijkouaskia san pampa otiktekakili ika yakaj kinemakatika niman nion xtikita? ¿Noso tikonitaskia niman ijkon tikitas tla nochi kuajli kipiya? Kuajli tikmatstokej ika tikonitaskia yejon motocicleta achto tijkouas.

² Noijki uelis ijkon tikchiuaskej ijkuak tikamapouaskej niman tomachtiskej Biblia. ¿Niman kenon uelis tikasikamatiskej nochi tlen kijtoua Biblia? Tla tejuamej san isiujkan tikamapouaj, san tiueliskej “on tlen semi xouijtikaj de itemachtiluan Dios” (Heb. 5:12). Niman, ijkon ken tikonitaskiaj tla motocicleta tlen tijkouaskej nochi kuajli kipiya, noijki noneki kuajli tomachtiskej nochi Biblia niman ijkon tikasikamatiskej. Tla tiknekij kuajli tomachtiskej Biblia, noneki tikitaskej kenon notlajtolnamiki nochi tlen kijtoua. Xsan noneki tikmatiskej tlenon tikneltokaj, noijki noneki tikmatiskej tleka tikneltokaj.

3. ¿Tlenon okimijli apóstol Pablo makichiuakan tokniuan, niman tleka? (Efesios 3:​14-19).

³ Tla tiknekij kuajli tikasikamatiskej nochi tlen temachtia Biblia, noneki tomachtiskej hasta tlen más ouijtika. Apóstol Pablo okimijli nochimej tokniuan manokojtilikan kuajli nomachtiskej  iTlajtol toTajtsin niman ijkon ueliskia kasikamatiskej “kech sanoyej patlauak, niman ueyak, niman uejkatlan, niman tlakpak” tlen temachtia iTlajtol toTajtsin. Yejuin kinpaleuiskia machikaujto intlaneltokil (xpoua Efesios 3:​14-19). Tejuamej noijki noneki ijkon tikchiuaskej. Matikitakan kenon uelis kuajli tomachtiskej Biblia niman ijkon tikmatiskej tlenon kijtosneki nochi tlen temachtia.

4. Xkijto tlenon más uelis tikchiuaskej niman ijkon más tiknisiuiskej Jehová.

⁴ Akin tikchiuaj ken Cristo noneki tokojtiliskej kuajli tikasikamatiskej “hasta on tlajtlamach yejuan más ueyi kijtosnekij itech Dios”. Niman espíritu santo techpaleuis ijkon matikchiuakan (1 Cor. 2:​9, 10). ¿Tleka xtikchiua itlaj tlen más mamitsnisiui itech Jehová ijkuak moselti timomachtis? Miyek tlen uelis tikchiuas. Uelis tiktejtemos kenon Jehová yeuejkaui okimititi itekipanojkauan ika kintlasojtla niman kenon yejon kiteititia ika noijki techtlasojtla. Noijki, uelis timomachtis itech kenon okinnauati israelitas ika nonekiya kiueyichiuaskej niman kenon aman tejuamej tikueyichiuaj. Noso uelis timomachtis teotlajtoltin tlen tlajtouaj itech tlen okichiuj Jesús niman itech kenon otenojnots ijkuak nemiya nikan ipan tlaltikpaktli.

5. ¿Tlenon tikuelitaskia moselti timomachtis?

⁵ Otikintlajtoltijkej sekimej tokniuan akin kuajli nomachtiaj Biblia, tlenon más kuelitaskiaj nomachtiskej. Ipan recuadro “ ¿Tlenon uelis tikitas ijkuak moselti timomachtis?”, uajlauj seki tlen okiteneujkej. Tikmatstokej ika melak tikuelitas timomachtis yejuin ika Índice de las publicaciones Watch Tower niman amatlajkuilojli Tlen kinpaleuiya ika nomachtiaj iteixpantijkauan Jehová. Yejuin tlen timomachtis mitspaleuis machikaujto motlaneltokil “niman tikmatis kenijki tikixmatis Dios” (Prov. 2:​4, 5). Aman, matikitakan seki tlen kemantika ouijtika tikitaj tikasikamatiskej itech Biblia.

6. a) Xkijto itlaj tlen makiteititi ika nochipa nochiua tlen Jehová kijtoua. b) ¿Tleka tikijtouaj ika tlen Jehová yokijto kichiuas inpampa tlaltikpakchanejkej niman ipampa tlaltikpaktli xkeman nopatla? (Efesios 3:11).

⁶ Jehová nochipa kichiua tlen kijtoua. Xkonnemili ika tikneki tajsis ipan se kalpan, san ika, ipan ojtli tlajkaltok se kojtli tlen xmitskauilia tipanos. Pampa tejua yotikijto ika tajsis, oksekan tontlamelaua. Noijki ijkon, tlen Jehová yokijto kichiuas xkeman kipatla. Niman melak tiktlasojkamachiliaj pampa ika yolik yotechuajijlitia ipan Biblia tlenon kineki kichiuas (Efes. 3:11). Tlen yejua kineki, nochipa nochiua pampa nochi tlen “okichijchiu kipiya kanon kitekitiltis” (Prov. 16:4). Niman nochi tlen Jehová kichiua xkeman popoliui. Kuakon, ¿tlenon kineki kichiuas Jehová? ¿Niman tlenon yononek kipatlas para kichiuas?

7. Ijkuak Adán niman Eva xokitlakamatkej toTajtsin, ¿tlenon ononek kipatlas Jehová para manochiua tlen yokijto? (Mateo 25:34).

⁷ Ipan Génesis 1:​28, Jehová okimijli tlaltikpakchanejkej tlenon kinekiya para yejuamej. Yejua okimijli: “Xtlaxinachokan niman xkimpiyakan miyekej nemokoneuan. Xtemiltikan in tlaltikpaktli, niman xkinmomaktikan [ . . . ] on yolkej”. Yemelak ika ijkuak Adán niman Eva xotetlakamatkej, okichiujkej matikpiyakan tlajtlakojli, san ika, yejon xokijtosnek tla Jehová xok kichiuaskia tlen yokijtojka. Yejua, san okipatlak ken kichiuas tlen yokijto. Nimantsin, okijto ika kitlaliskia se Tekiuajyotl ne iluikak tlen kichiuaskia manochiua tlen yokijto inpampa tlaltikpakchanejkej niman ipampa tlaltikpaktli (xpoua Mateo 25:34). Sakin, Jehová okiteititi ika techtlasojtla pampa okuajtitlan isenteKonetsin nikan ipan tlaltikpaktli. Jesús okinnojnots nochimej itech yejon Tekiuajyotl niman okitemakak inemilis topampa para techmakixtis itech tlajtlakojli niman mikilistli. Sakin, Jehová okiyoliti Jesús ne iluikak niman opeuj tekiuajti ipan iTekiuajyo toTajtsin. San ika, onka okseki tlemach tlen uelis tomachtiskej niman tiknemiliskej itech tlen toTajtsin yokijto kichiuas.

8. a) ¿Itech tlenon tlajtoua Biblia? b) Ken kijtoua Efesios 1:​8-11, ¿tlenon más kichiuas Jehová? (Xkita tlaixkopinajli tlen nesi ixpan yejuin revista).

⁸ Biblia tlajtoua itech yejuin: Jehová kichipauas itokayo ijkuak nochiuas tlen yokijto para yejuin tlaltikpaktli itech iTekiuajyo tlen kiyekana Cristo. ¡Xtlaj onka tlen uelis kiteltis! Yejua yokijto ika kichiuas nochi tlen yotechijli (Is. 46:​10, 11; Heb. 6:​17, 18). Sakin, yejuin tlaltikpaktli nokuepas se xochitlalpan kampa iuejkakoneuan Adán niman Eva, akin yolmelajkej, xok kipiyaskej tlajtlakojli niman xok keman mikiskej (Sal. 22:26). Niman xsan yejon, yejua kichiuas ika nochimej ikoneuan, akin nemij iluikak niman akin nemij nikan ipan tlaltikpaktli, manokuepakan san se familia niman nochimej san yejua makitekichiuilikan (xpoua Efesios 1:​8-11). ¡Melak kualtsin ken Jehová kichiua tlen yokijto!

9. ¿Tlenon tikmatij ika nochiuas ika tlayekapan pampa tikamapouaj Biblia?

⁹ Matitlanemilikan itech teotlajtojli tlen uajlauj ipan Génesis 3:​15, b tlen Jehová okijto ipan xochitlalpan Edén. Ompa noijtoua kenon nochiuaskia tlen toTajtsin yokijto.  San ika, yejuin melak uejkauiskia para nochiuas. Ompa noijtoua kenon Cristo ualeuaskia itech iuejkachanejkauan Abrahán (Gén. 22:​15-18). Ipan xiuitl 33, okikxikokojkej Jesús, ijkon ken yonoijtoka (Hech. 3:​13-15). Niman ok poliui más de 1,000 xiuitl para manochiua tlen kijtoua itlamiyan yejuin teotlajtojli niman makipaxouilikan itsontekon Satanás (Apoc. 20:​7-10). San ika, Biblia kijtoua okseki tlen nochiuaskia achto ika akin kinyekana Satanás niman akin kinyekana Jehová tlamis ika noixnamikiskej.

10. a) ¿Tlenon sa achijtsin poliui nochiuas? b) ¿Kenon uelis toyektlaliskej ipampa tlen nochiuas? (Xkita nota).

¹⁰ Matikilnamikikan tlenon kijtoua Biblia ika nochiuas. Kachtopa, kalpamej kijtoskej: “Onkaj yolseuilistli niman xakaj nion itlaj uelis techmiktis” (1 Tes. 5:​2, 3). Ueyi tlajyouilistli san isiujkan peuas ijkuak kalpamej kimixnamikiskej tlaneltokiltin tlen xmelajkej (Apoc. 17:16). Sakin, kanaj panos tlen temojkatlachialti ijkuak nochiuas tlen kijtoua Mateo 24:​30, kampa Jesús okijto: “Niuajlas ikan noueyi poder niman noueyilis. Niuajlas ipan on moxtli yejuan onkaj ipan cielo”. Jesús kintlajtlakolmakas nochimej tlaltikpakchanejkej niman kinxelos akin okichiujkej ken borreguitos niman akin okichiujkej ken chivos (Mat. 25:​31-33, 46). San ika, Satanás noijki itlaj kichiuas. Yejua melak kualantos niman kichiuas ika miyekej kalpamej, akin Biblia kintokayotia ken Gog de Magog, makixnamikikan ikalpan Jehová (Ezeq. 38:​2, 10, 11). Sakin, ne iluikak kinsentlaliskej tlapejpeniltin akin ok nemiskej nikan ipan tlaltikpaktli. Ompa, yejuamej nosentlaliskej iuan Cristo niman iiluikaktekitkauan para tlaixnamikiskej ipan Armagedón, tlen kichiuas matlami ueyi tlajyouilistli (Mat. 24:31; Apoc. 16:​14, 16). c Sa ika tlami, Cristo peuas tekiuajtis Mil Xiuitl ipan nochi tlaltikpaktli (Apoc. 20:6).

11. ¿Tlenon tikmachilia pampa tikmati ika uelis nochipa tinemis? (Noijki xkita tlaixkopinajli).

¹¹ Aman matitlanemilikan itech tlen panos  más ika tlayekapan. Biblia kijtoua ika toTajtsin “okitlalilij ipan iyojlo nochi tlakatl ika xkaman mikiskej” (Ecl. 3:11). San xkonnemili kenon nochipa tinemis niman kenon yejuin mitspaleuis más kuajli xmouika iuan Jehová. Libro Acerquémonos a Jehová, página 319, kijtoua yejuin: “Ijkuak yotinenkej melak miyek xiuitl, kanaj miles, millones noso hasta billones, más tikmatiskej itech Jehová xijkon ken tlen aman tikmatij. Maski ijkon, ok onias miyek tlemach tlen nonekis tiueliskej itech toTajtsin. [ . . . ] Nion xueli tikonnemiliaj kenon melak tiyolpakiskej, niman noijki onias miyek tlen uelis tikchiuaskej ipan xochitlalpan. San ika, más tiyolpakiskej pampa mojmostla uelis más tiknisiuiskej Jehová”. Niman aman ika xiyejko yejon tonajli, ¿tlenon más uelis tomachtiskej itech iTlajtol toTajtsin?

12. ¿Kenon uelis tikitaskej tlen onka iluikak? Xkijto se neskayotl.

¹² Biblia techpaleuiya achijtsin matikasikamatikan kenon “ne iluikak” kampa nemi toTajtsin (Is. 33:5). Noijki, techijlia miyek itech Jehová niman iiluikaktekitkauan (Is. 6:​1-4; Dan. 7:​9, 10; Apoc. 4:​1-6). Niman ueli tikamapouaj nochi tlen okitak Ezequiel ijkuak “otlapou on cielo” niman toTajtsin okichiuj makinpiya “tlatlachalistin” (Ezeq. 1:1).

13. ¿Kenon timomachilia ijkuak titlanemilia itech tlen Jesús kichiujtika ne iluikak? (Hebreos 4:​14-16).

¹³ Noijki matitlanemilikan itech tlen Jesús kichiujtika ne iluikak ken Tekiuaj niman Ueyi Teopixki. Itechkopa yejua ueli tiknisiuiyaj toTajtsin ika teoyotl niman tiktlajtlaniliaj matechikneli niman matechpaleui “ijkuak itlaj techpolos” (xpoua Hebreos 4:​14-16). Nochipa matitlanemilikan itech tlen Jehová niman Jesús yokichiujkej niman  tlen kichiujtokej topampa desde ne iluikak. Tla tejuamej tikitaj ika melak techtlasojtlaj, techpaleuis matiktekichiuilikan Jehová ika nochi toyojlo (2 Cor. 5:​14, 15).

14. ¿Kenon uelis tikititiskej Jehová niman Jesús ika tiktlasojkamatij nochi tlen yokichiujkej topampa? (Noijki xkimita tlaixkopinaltin).

¹⁴ Uelis tikititiskej Jehová niman Jesús ika tiktlasojkamatij tlen yokichiujkej topampa tla tikinpaleuiyaj oksekimej manochiuakan iteixpantijkauan Jehová niman makichiuakan ken Cristo (Mat. 28:​19, 20). Yejon tlen apóstol Pablo okichiuj pampa melak kitlasojkamatiya tlen toTajtsin niman Jesús yokichiujkaj ipampa. Yejua kimatstoya ika Jehová “kineki nochi tlakatl ma makisa niman ma kimati on tlen melauak” (1 Tim. 2:​3, 4). Yejua ika, melak chikauak okinnojnots oksekimej “para ijkon maski sa kenijki uelis semej nomakixtiskej” (1 Cor. 9:​22, 23).

15. Ken kijtoua Salmo 1:​2, ¿tlenon kichiuas matiyolpakikan?

¹⁵ Xtechmojkatlachialtia tlen okijto salmista, ika yolpaki niman kuajli onkisa akin “kuelita itlanauatil toTEKO niman ipan tlanemilia ikan tonajli niman ikan yeuajli” (Sal. 1:​1-3). Ipan ilibro ixtlamatki Joseph Rotherham tlen itoka Studies in the Psalms, okijto ika akin kiamapoua Biblia “noneki kitejtemos, nomachtis niman tlanemilis itech tlen kijlia toTajtsin pampa kuelita Biblia. [ . . . ] Noijki, noneki kinemilis ika tla kemantika xmás itlaj kasikamati, xkipaleuis”. Tejua noijki uelis tikuelitas timomachtis Biblia tla timokojtilia kuajli tikasikamatis niman tikitas kenon notlajtolnamiki nochi tlen kijtoua. ¡Melak teyolpakti tikasikamatis nochi iTlajtol toTajtsin!

16. ¿Tlenon tikitaskej ipan okse tlamachtijli?

¹⁶ Tinochimej uelis kuajli tikasikamatiskej nochi tlen Jehová techmachtia ipan iTlajtol. Ipan okse tlamachtijli tikitaskej itlaj tlen melak noneki matikasikamatikan. Titlajtoskej itech teopan tlen apóstol Pablo okinteneuili tokniuan hebreos. Kuajli tikmatstokej ika melak tikuelitaskej titlajtoskej itech yejuin.