1-2. Ngiyiphi indlela ephuma phambili yokufunda iBhayibheli? Fanekisa.

 AKHUZICABANGE ufuna ukuthenga indlu. Khuyini ozokufuna ukuyibona ngaphambi kobana wenze isiqunto sakho? Kghani uzokufuna ukubona isithombe esitjengisa ingaphambili lendlu kwaphela? Akunakuzaza ukuthi uzokufuna ukuyoyibona indlu leyo, uzulazule ngaphandle kwayo, ungene ngaphakathi bona uhlole woke amakamura begodu uqalisise yoke into eyingcenye yendlu. Ungafuna nokuqala iplani yendlu leyo ukubona ukuthi yakhiwe njani. Kuliqiniso ukuthi uzokufuna yoke imininingwana yendlu ofuna ukuyithenga.

² Singenza okufanako lokha nasifunda iBhayibheli. Esinye isazi seBhayibheli sifanisa umlayezo weBhayibheli “nesakhiwo esikhulu, eside nesineensekelo eziqinileko.” Yeke, singakghona njani ukukwazi kuhle koke lokho okuseBhayibhelini? Nawulifunda ngokurhaba, ungafunda kwaphela amaqiniso asisekelo—‘okuzizinto ezisisekelo zomlayezo ocwengileko kaZimu.’ (Heb. 5:12) Njengombana kutlhogeka bona ungene ngaphakathi kwendlu nawuzakufumana imininingwana ngayo, kufuze ufunde iBhayibheli ngokungeneleleko nawuzalizwisisa kuhle. Indlela ephuma phambili yokufunda iBhayibheli kuqala ukuthi iingcenye ezithileko zeBhayibheli zihlobana njani. Lwela godu nokuzwisisa ukuthi khuyini oyikholelwako nokuthi kubayini uyikholelwa.

3. Khuyini umpostoli uPowula akhuthaza amaKrestu bona ayenze begodu kubayini? (Efesu 3:14-19)

³ Nasizakuzwisisa zoke iingcenye zeliZwi lakaZimu, kufuze sifunde amaqiniso weBhayibheli angeneleleko. Umpostoli uPowula wakhuthaza abafowabo nabodadwabo abamaKrestu  bona bafunde iliZwi lakaZimu ngokuzimisela bona bakghone “ukuzwisisa ngokuzeleko ububanzi, ubude, ukuphakama nokutjhinga” kweqiniso. Nabenza njalo, bebazokuba “nemirabhu eqinileko” ekukholweni kwabo. (Funda kwebe-Efesu 3:14-19.) Nathi kufuze senze okufanako. Akhesibone ukuthi singalifundisisa njani iliZwi lakaZimu bona sithole amaqiniso angeneleleko.

4. Khuyini ekufuze siyenze nasizakutjhidela kuJehova? Nikela iimbonelo.

⁴ Njengombana simaKrestu, asifuni ukuzwisisa kwaphela amaqiniso asisekelo weBhayibheli. Ngesizo lomoya kaZimu ocwengileko, sizimisela ukufunda “ngitjho nezinto ezidephileko zakaZimu.” (1 Kor. 2:9, 10) Kubayini ungathomi ukwenza iprojekthi yesifundo somuntu mathupha ezokwenza utjhidele eduze noJehova? Ngokwesibonelo, ungahlolisisa ukuthi watjengisa njani bona uyabathanda abantu bakhe esikhathini esidlulileko nokuthi lokho kutjengisa njani ukuthi nawe uyakuthanda. Ungafunda nangokuthi uJehova bekafuna ama-Israyeli amlotjhe njani begodu umadanise nendlela afuna simlotjhe ngayo namhlanjesi. Namkha ungafunda ngemininingwana engeneleleko yeemphorofido uJesu azizalisa ekuphileni kwakhe nemsebenzinakhe wokutjhumayela.

5. Kghani kunephrojekthi ongathanda ukurhubhulula ngayo esifundweni sakho somuntu mathupha?

⁵ Abanye abafundi beBhayibheli abakhutheleko babuzwa ukuthi ngiziphi izinto ezingeneleleko abangafuna ukuzihlolisisa eliZwini lakaZimu. Ezinye iimpendulo abazinikelako zisebhoksini elithi “ Iinhloko Zamaphrojekthi Womuntu Mathupha.” Kungakuthabisa khulu ukufunda ngeenhloko ezinjengalezi usizwa yi-Watch Tower Publications Index namkha Ithulusi Lokurhubhulula LaboFakazi BakaJehova. Ukufunda iBhayibheli ngokungeneleleko kungakuqinisa bekukusize ‘ufumane ilwazi ngoZimu.’ (IzA. 2:4, 5) Sizokucoca ngamanye amaqiniso weBhayibheli angeneleleko esingawahlolisisa.

6. (a) Ngimuphi umehluko okhona phakathi kweplani nomnqopho? (b) Kubayini singathi umnqopho kaJehova ngabantu nangephasi “uhlala ngokungapheliko”? (Efesu 3:11)

⁶ Ngokwesibonelo, cabanga ngalokho iBhayibheli elikutjhoko ngomnqopho kaZimu. Kunomehluko omkhulu hlangana kweplani nomnqopho. Iplani ifana nokukhetha indlela ekusa lapha ufuna ukufika khona. Kodwana nakuba nento evimba indlela leyo, kungenzeka ungafiki. Ngakwelinye ihlangothi, umnqopho udzimelele endaweni ofuna ukufika kiyo. Siyayazi indawo esifuna ukuya kiyo kodwana singathatha iindlela ezingafaniko ukuya lapho. Nange indlela ivaliwe, singasebenzisa enye. Sithokoza khulu ukuthi kancanikancani uJehova uveze ‘umnqophwakhe ongapheliko’ eBhayibhelini. UJehova angakhetha iindlela ezingafaniko ukuzalisa umnqophwakhe begodu zingaphumelela ngombana “wenze koke bona afeze umnqophwakhe.” (IzA. 16:4) Imiphumela yalokho uJehova akwenzako izokuhlala ngokungapheliko. Uyini umnqopho kaJehova begodu ngimaphi amatjhuguluko awenzileko bona awuzalise?

7. Ngemva kokuthi abantu bokuthoma bahlubukile, uJehova wayitjhugulula njani indlela yokuzalisa umnqophwakhe? (Matewu 25:34)

⁷ UZimu watjela abantu bokuthoma ukuthi uyini umnqophwakhe ngabo. Bekufuze ‘babelethe bande, bazalise iphasi balibuse, babuse . . . nazo zoke iinlwana’ ephasini. (Gen. 1:28) Lokha u-Adamu no-Eva nabahlubukako, babangela ukuthi isono singene emndenini wabantu, lokho akhange kujamise ukuzaliseka komnqopho kaJehova. Walungisa indlela ebewuzokuzaliseka ngayo. Khonokho, wabeka umBuso wezulwini ozokuzalisa umnqophwakhe wekuthomeni ngabantu nangephasi. (Funda uMatewu 25:34.) Ngesikhathi sakhe, uJehova wathumela iNdodanakhe yokuthoma bona ifundise abantu ngomBuso beyinikele ngokuphila kwayo kusihlenge esonweni nekufeni. Ngemva kwalokho, uJehova wavusela uJesu ezulwini bona abuse njengeKosi yomBuso kaZimu. Kodwana kunengi khulu esingakufunda ngomnqopho kaZimu.

8. (a) Sithini isihloko seBhayibheli? (b) Njengombana kuhlathululwe kwebe-Efesu 1:8-11, ngiwuphi umnqopho kaJehova omkhulu? (Qala isithombe esingaphandle.)

⁸ Isihloko seBhayibheli kukobana kucwengiswe igama lakaJehova njengombana azalisa umnqophwakhe ngephasi ngomBuswakhe iKosayo enguKrestu. Umnqopho kaJehova angeze watjhugululwa. Wathembisa ukuthi koke kuzokwenzeka njengombana atjhwile. (Isa. 46:10, 11; Heb. 6:17, 18) Ingasikade, iphasi lizokuba yipharadesi lapho iinzukulwana ezinganasono nezilungileko zaka-Adamu no-Eva ‘zizokuthabela ukuphila ngokungapheliko.’ (Rhu. 22:26) Kodwana lokho akusingikho kwaphela lokho uJehova azokwenza. Umnqophwakhe omkhulu kuhlanganisa boke abantu bakhe ezulwini nephasini. Boke abantu bazokulalela uJehova ngokuthembeka njengomBusabo. (Funda kwebe-Efesu 1:8-11.) Kghani ayikurari indlela ehle uJehova azalisa ngayo umnqophwakhe?

9. Ngokufunda iBhayibheli, khuyini esikghona ukuyibona ngengomuso?

⁹ Cabanga ngesiphorofido uJehova akhuluma ngaso esimini ye-Edeni njengombana sitlolwe kuGenesisi 3:15. b Besiqalisele ezenzakalweni ebezizokuzalisa umnqophwakhe kodwana izenzakalwezo bengekhe zenzeke bekube minyaka eziinkulungwana  ezako. Izenzakalwezi bezihlanganisa iinzukulwana zaka-Abrahama ebeziserhelweni lokubelethwa kwakaKrestu. (Gen. 22:15-18) Ngo-33 C.E., uJesu walinyazwa esithendeni njengombana kwabikezelwa. (IzE. 3:13-15) Isenzakalo samaswaphela sesiphorofidweso, okukutshidlhwa kwehloko kaSathana, sizokwenzeka eminyakeni eyikulungwana esikhathini esizako. (IsAm. 20:7-10) IBhayibheli liveza okhunye okunengi malungana nalokho okuzokwenzeka njengombana ukuba manaba kwehlangano kaJehova noSathana kufikela esiqongolweni.

10. (a) Ngiziphi izenzakalo ezizokwenzeka ingasikade? (b) Singawulungiselela njani umkhumbulwethu nehliziywethu? (Qala umtlolo waphasi.)

¹⁰ Cabanga ngezenzakalo ezirarako iBhayibheli ebikezela ngazo. Kokuthoma, iintjhaba zizokuthi “ukuthula nokuvikeleka!” (1 Thes. 5:2, 3) ‘Kungakalindeleki,’ isizi elikhulu lizokuthoma lokha iintjhaba zisahlela zoke iinkolo zamala. (IsAm. 17:16) Ngemva kwalokho, kungenzeka kube nombono ongakajayeleki ‘weNdodana yomuntu iza ngelifu inamandla nephazimulo ekulu.’ (Mat. 24:30) UJesu uzokwahlulela abantu ngokuthi ahlukanise izimvu neembuzi. (Mat. 25:31-33, 46) Ngesikhatheso, uSathana uzokuragela phambili alwa noJehova. Ngebanga lokuhloya kwakhe abantu bakaZimu, uzokubangela bona iintjhaba zihlangane zisahlele abantu bakaJehova, lokho iBhayibheli elikubiza ngokuthi nguGogi wakwaMagogi. (Hez. 38:2, 10, 11) Ngesikhatheso, abaseleko babazesiweko bazokuhlangana noKrestu ezulwini nebutho lakhe lezulwini bona balwe e-Arimagedoni, lokho kuzabe kutjho ukuphela kwesizi elikhulu. c (Mat. 24:31; IsAm. 16:14, 16) Ngemva kwalokho, kuzokuthoma ukuBusa kwakaKrestu kwemiNyaka eyiKulungwana ephasini.—IsAm. 20:6.

11. Kutjho ukuthini ukuphila ngokungapheliko kuwe? (Qala nesithombe.)

¹¹ Nje, cabanga ngale kweminyaka eyikulungwana. IBhayibheli lithi uMdalethu “wafaka ukuphila okungapheliko eenhliziyweni zethu.” (UMtj. 3:11) Cabanga ukuthi lokho  kutjho ukuthini ngawe nobuhlobo bakho noJehova. Incwadi ethi, Sondela KuJehova, ikhasi 319, iveza amezwi akarisako naka: “Nasele siphile amakhulu, iinkulungwana, iingidi ngitjho neengidigidi zeminyaka sizokwazi okunengi ngoJehova uZimu kunendlela esimazi ngayo nje. Kodwana sizokubona ngasuthi kusesenezinto ezinengi ezihle ekusafuze sizifunde ngaye. . . . Angekhe sakghona ukucabanga indlela ukuphila okuzokuthabisa bekube kuhle ngayo ePharadesi—okuthabisa khulu kukuthi sizokuhlala sitjhidela kuJehova.” Alo, njengombana siragela phambili sifunda iliZwi lakaZimu, khuyini enye esingayifunda ngokungeneleleko?

12. Singaqala njani phezulu ezulwini? Nikela isibonelo.

¹² IliZwi lakaZimu lisembulela kancani ukuthi kunjani ukuba khona kwakaJehova “endaweni ephakemeko.” (Isa. 33:5) IBhayibheli liveza izinto ezihle ngoJehova nengcenye yehlanganwakhe yezulwini. (Isa. 6:1-4; Dan. 7:9, 10; IsAm. 4:1-6) Ngokwesibonelo, singafunda ngezinto ezisabekako uHezekiyeli azibonako lokha ‘izulu nalivulekako bese athoma ukubona imibono kaZimu.’—Hez. 1:1.

13. Uzizwa njani ngalokho uJesu akwenzako ezulwini njengombana kuhlathululwe kumaHebheru 4:14-16?

¹³ Godu cabanga nangalokho uJesu asenzela khona ezulwini njengeKosethu nanjengomPhristi oPhakemeko onesirhawu. Ngaye sikghona ukutjhidela ‘esihlalweni sakaZimu somusa omkhulu’ ngomthandazo, simbawe asirhawukele bekasisize “ngesikhathi esifaneleko.” (Funda amaHebheru 4:14-16.) Qobe langa kufuze sicabange ngalokho uJehova noJesu abasenzele khona nalokho abasenzela khona basezulwini. Indlela abasithanda ngayo kufuze ithinte iinhliziyo zethu beyisenze sikhuthale khulu emsebenzinethu  njengombana simlotjha.—2 Kor. 5:14, 15.

14. Ngiyiphi indlela ephuma phambili esingatjengisa ngayo ukuthi siyamthokoza uJehova noJesu? (Qala neenthombe.)

¹⁴ Enye indlela ehle yokutjengisa ukuthi simthokoza kangangani uZimethu neNdodanakhe, kuzimisela ukusiza abanye babe boFakazi bakaJehova nabafundi bakaJesu. (Mat. 28:19, 20) Ngilokho umpostoli uPowula akwenzako ukutjengisa ukuthi uyamthokoza uZimu noKrestu. Bekazi ukuthi intando kaJehova kukuthi “yoke imihlobo yabantu isindiswe begodu ifikelele elwazini elinembileko leqiniso.” (1 Thim. 2:3, 4) Wasebenza budisi emsebenzinakhe wokutjhumayela ukusiza abantu abanengi ngendlela angakghona ngayo ukwenzela bona ‘ngazo zoke iindlela asindise abanye.’—1 Kor. 9:22, 23.

15. NgokweRhubo 1:2, khuyini engasenza sithabe?

¹⁵ Umtloli weRhubo lokuthoma uhlathulula umuntu othabileko nophumelelako njengomuntu “othatjiswa mthetho kaJehova” begodu ‘ozindla ngomthethwakhe imini nobusuku.’ (Rhu. 1:1-3) Omunye umtjhugululi weBhayibheli nakakhuluma ngamavesi la uthi umuntu kufuze “afune isinqophiso sakaZimu khulu, arhubhulule ngaso, asifunde bekaziphe isikhathi eside sokucabanga ngaso.” Ungezelela uthi, “nange kudlula ilanga umuntu angakafundi iBhayibheli, ilangelo uzabe adlale ngalo.” Ungathaba ngokufunda iBhayibheli nemininingwanalo eqakathekileko nokubona ukuthi ihlangana njani. Kulithabo elikhulu ukuhlolisisa zoke iingcenye zeliZwi lakaZimu!

16. Sizokucoca ngani esihlokweni esilandelako?

¹⁶ Amaqiniso aligugu uJehova asifundisa wona aseliZwini lakhe akasibudisi ukuthi singawazwisisa. Esihlokweni esilandelako, sizokucoca ngelinye lamaqiniso angeneleleko—ithempeli elikhulu elingokomfanekiso lakaJehova elahlathululwa nguPowula encwadini ayitlolela amaKrestu amaHebheru. Ukuhlolisisa isihlokweso kungakulethela ithabo.