1–2. Kansi njila iweme ngako yatingakatishile ntchito pophunzila Baibolo niyotyani? Pelekani chisanzo.

 YELEKEZELANI kuti mufuna kugula ng’anda. Kansi mungakonde kuchita chinji mukaliyeigula? Kansi mungakonde kuwona mwayuwonekela tyala kusogolo? Mosakaikila, mwewo mungakonde kuiziŵa luweme ng’anda yamene iyo mwa kuizenguluka, kuwona vipinda vake vonse, komasoti kuziŵa mbali zonse za ng’anda yamene iyo. N’voziŵikilatu kuti mwewo mungafune kuziŵa chilichonse chokhuza ng’anda yamene iyo.

² Sewo nase tingachite chimozi-mozi tikoŵelenga komasoti kuphunzila Baibolo. Buku iyakine iyelekezela uthenga wa m’Baibolo na “ng’anda ya mmululu, komasoti ya maziko otang’a.” Lomba kansi tingachite tyani kuti tiziziŵe luweme mfundo za m’Baibolo? Keno mungoiŵelenga moutuka, mwewo mungaphunzile tyala mfundo—“zoyambilila za m’Mawu opatulika a Mulungu.” (Ahe. 5:12) Koma molingana na mwavilili na kuloŵa ng’anda kuti muiziŵe luweme, mwewo mufunikilasoti kuphunzila Baibolo mosamala kuti muimvwishe luweme ngako. Njila imozi yophunzilila Baibolo, nikuwona mwamene mbali zake zosiyana-siyana za uthenga wake mwazukatijilana. Tikoyeja-yeja kumvwisha luweme osati tyala choonadi cha m’Baibolo cheka, komasoti chifukwa chake mwewo muchikhulupilila.

3. Kansi Paulo elimbikisa Akhilisitu ayake kuchita chinji, ndipo ndaŵa yanji? (Aefeso 3:14-19)

³ Kuti timvwishe luweme mbali zonse za m’Mawu a Mulungu, sewo tufunikila kuphunzila mfundo zikulu-zikulu za chonadi cha  m’Baibolo. Ntumwi Paulo elangiza abale na alongo ŵake Achikhilisitu kuti okophunzila Mawu a Mulungu mwakhama na cholinga chakuti ‘akwanishe kuziŵa luweme muluvumo mwake, ntali-ntali, kukwela kwake, komasoti kunoka’ kwa chonadi. Mwakuchita tetyo, ove sembe ekwanisha ‘kuzika miju na kunkhala onkhazikika’ m’chikhulupililo chawo. (Ŵelengani Aefeso 3:14-19.) Sewo nase tufunikilasoti kuchita chimozi-mozi. Lomba, tiyeni tiwone mwatingaŵaphunzilile mosamala Mawu a Mulungu kuti timvwishe luweme tanthauzo yake.

4. Kansi tingachite tyani kuti tivwendele kwa Mulungu? Pelekani chisanzo.

⁴ Sewo monga Akhilisitu tukhutilalini nophunzila tyala mfundo zoyambilila za m’Baibolo. Moyavyiwa na mzimu utuŵa wa Mulungu, tunkhala ofunishisha kuphunzila “olo vinthu vikulu-vikulu va m’Mawu a Mulungu.” (1 Akor. 2:9, 10) Tyani kunkhazikishako pulogilamu yophunzila pamweka yamene ingakuyavyeni kuvwendela ngako kwa Yehova? Mwachisanzo, mungafufuze kuti muwone mwamene Mulungu mwechiwoneshela chikondi kuli atumiki ŵake akale, komasoti mwakukuwoneshelani chikondi mwewo pamweka. Mungaphunzilesoti njila zenzefuna Yehova kuti Aisiraeli akozikatishila ntchito pomulambila, nozilinganija na njila zolambilila za Chikhilisitu. Olo payakine mungasankhe kuti muphunzile vinyinji vokhuza maulosi amene ŵechikwanilisha Yesu pa moyo wake komasoti pa utumiki wake pano pachalo.

5. Kansi pali nkhani iyakine yamungakonde kufufuza papulogilamu yanu yophunzila pamweka?

⁵ Ayakine mwa ophunzila Baibolo akhama, esengewa kuti afotokoze vinthu viyakine vikulu-vikulu vangakonde kufufuza m’Mawu a Mulungu. Ayakine mwa mayankho ŵawo andandalikiwa m’bokosi yakuti “ Nkhani zamungaphunzile pa phunzilo ya pamweka.” Mungafwane chisangalalo chikulu pophunzila nkhani zamene izi pokatishila ntchito Índice das Publicações da Torre de Vigia kapena Buku Lofufuzila Nkhani la Mboni za Yehova. Kuphunzila Baibolo mosamala, kungatang’ishe chikhulupililo chanu komasoti kungakuyavyeni kuti ‘mumuziŵe chendi Mulungu.’ (Miy. 2:4, 5) Lomba tiyeni tikambilane mfundo zikulu-zikulu za chonadi cha m’Baibolo zamene zatingaphunzile.

6. (a) Kansi pali kusiyana kotyani pakati pa pulani na cholinga? (b) Kansi ndaŵa yanji tinganene kuti cholinga cha Yehova chokhuza ŵanthu komasoti chino chalo ‘n’chosasila’? (Aefeso 3:11)

⁶ Mwachisanzo, ganizilani vayunena Baibolo vokhuza cholinga cha Mulungu. Pali kusiyana kukulu pakati pa pulani na cholinga. Tingayelekezele pulani na kusankha nsewu wamene ungatifwikishe kumalo ŵatufuna. Koma keno chinthu chiyakine chingavale nsewu wamene uyo, mwewo mungakwanishe lini kufwika kumalo ŵamufuna. Koma cholinga, tingachilinganije na malo ŵatufuna kuyafwika. Sewo tuŵaziŵa malo ngawo-ngawo ŵatufuna kuluta, koma njila tyala niye yamene isafwika. Tetyo, tingakatishile ntchito njila iyakine kuti tikafwike kwatikuya. Sewo tutembeja ngako kuti Yehova mwapatontho na patontho wankhala otiulululila za “cholinga chosasila” chali nacho kupitila m’Baibolo. (Aef. 3:11) Yehova angasankhe njila iliyonse kuti akwanilishe cholinga chake, ndipo nthawe zonse vinthu vumuyendela luweme chifukwa chakuti yove “epanga chilichonse na cholinga.” (Miy. 16:4) Ndipo vokonkhapo va ntchito za Yehova, vizankhalepo mpaka kale-kale. Kansi cholinga cha Yehova n’chotyani, ndipo ni makonzedwe otyani awapanga kuti achikwanilishe?

7. Ŵanthu oyambilila pechipanduka, kansi Yehova echita chinji kuti akwanilishe cholinga chake? (Mateyu 25:34)

⁷ Mulungu euja ŵanthu oyambilila za cholinga chenze nacho kuli ove. Yove eŵauja kuti “muvyalane, mupake, muzuje chalo, soti muchilolele. Mulolelesoti . . . cholengewa chilichonse chuyenda pachalo.” (Gen. 1:28) Adamu na Hava pechipanduka, echitisha kuti ŵanthu onse ankhale ochimwa, koma vamene ivi viliyechitishe kuti cholinga cha Yehova chichinje. Pakaliye pita nthawe itali, Mulungu echinja njila yangakwanilishile cholinga chake. Kale-kale ngako kuvuli, Yove elinganija zonkhazikisha Ufumu wa kululu wamene ukuti uzakwanilishe cholinga chake choyambilila chokhuza ŵanthu komasoti chalo. (Ŵelengani Mateyu 25:34.) Panthawe yake yoikika, Yehova mwachikondi etumija mwana wake woyamba kuvyalika pano pachalo, kuti azaphunzise ŵanthu ponena za Ufumu komasoti kupeleka moyo wake kuti atiwombole kuuchimo na infwa. Pavuli pake, Yesu eushiwa noluta kululu kuyayamba kulamulila monga Mfumu ya Ufumu wa Mulungu. Koma pali viyakinesoti vinyinji vatufunikila kuganizila ponena za cholinga cha Mulungu.

8. (a) Kansi nkhani ikulu ya m’Baibolo niyotyani? (b) Monga mwayufotokozela lemba ya Aefeso 1:8-11, kansi cholinga chikulu cha Yehova n’chinji? (Onanisoti chithunzi chapachikuto.)

⁸ Nkhani ikulu m’Baibolo ni yakuti zina ya Yehova izatuŵishiwe akazayamba kukwanilisha cholinga chake chokhuza chalo pokatishila ntchito Ufumu wake wamene uli mmanja mwa Khilisitu. Cholinga cha Yehova chingachinjelini. Yove walonjeza kuti chilichonse chizachitike mokatijana na Mawu ŵake. (Yes. 46:10, 11; Ahe. 6:17, 18) M’kupita kwa nthawe, chino chalo chizankhale paladaiso muweme, ndipo ŵana olungama ŵa Adamu na Hava ‘azasangalale na moyo kosasila.’ (Sal. 22:26) Koma ni vamene ivilini veka vakuti azachite Yehova. Cholinga chake chikulu n’kunkhazikisha nkatijano pakati pa volengewa vake vanzelu vonse vakululu na vapano pachalo. Pavuli pake, vamoyo vonse vikogonjela Mulungu mokhulupilika monga Wolamulila wachilengedwe chonse. (Ŵelengani Aefeso 1:8-11.) Kansi n’vosadabwisa kuwona kuwama kwanjila yakukatishila ntchito Yehova pokwanilisha cholinga chake?

9. Kansi kuŵelenga Baibolo kungatiyavye kuganizila chinji ponena zakusogolo?

⁹ Ganizilani za ulosi wechinena Yehova m’munda wa Edeni wilembewa pa Genesis 3:15. b Ulosi wamene uyu winena za vochitika vamene vikuti  vizakwanilishe cholinga cha Mulungu, koma vamene ivi venzefunikila kuchitika pavuli pa vyaka masauzande anyinji. Mwachisanzo, Yehova euja Aburahamu kuti pavuli pamibadwo inyinji, mmozi mwa mbewu zake azankhale Khilisitu. (Gen. 22:15-18) Pavuli pake, mu 33 C.E., Yesu ewonongewa katende monga nimweunenela ulosi. (Mac. 3:13-15) Chochitika chosilijila cha ulosi wamene uyo chamene ni kufwaiwa kwa mutu wa Satana, chizachitike pavuli pa vyaka 1.000. (Chiv. 20:7-10) Ndipo Baibolo yunena vinyinji ponena za vikuti vizachitike udani wapakati pa chalo chiipa cha Satana na gulu ya Yehova ukazafwika paipa.

10. (a) Kansi n’vochitika votyani vakusogolo vamene vikuti vichitike kwalombapano? (b) Kansi tingakonzekeleshe tyani maganizo na ntima wasu? (Onani mawu amnyansi.)

¹⁰ Ganizilani za vochitika vochitisha wowa monga nivamene ivi veilosela Baibolo. Poyamba, mitundu izalengeze za “ntendele na chitetezo!” (1 Ates. 5:2, 3) “Nthawe yamene iyo,” chisauso chikulu chizayambe mitundu ya ŵanthu ikazayamba kuukila vipembezo vonse vawenye. (Chiv. 17:16) Pavuli pake, “Mwana wa munthu azawele pa mikumbi ya kululu na mphamvu komasoti ulemelelo ukulu.” (Mt. 24:30) Yesu azapeleke chiweluzo pakati pamitundu ya ŵanthu mwa kulekanisha mbelele na mbuzi. (Mt. 25:31-33, 46) Koma olo n’tetyo, Satana azapitilije kuchita vinthu voshushana na Mulungu. Chifukwa chakuti yove ozondana ngako na ŵanthu a Mulungu, Satana azalimbikise nkatijano wamitundu wayunena Baibolo kuti Gogi wakuchalo cha magogi kuti aukile kulambila kutuŵa kwa Yehova. (Eze. 38:2, 10, 11) Panthawe yamene iyo, akwake osalila a Khilisitu azasonkhanishiwe kululu kuti akakate ntchito na Khilisitu pamozi na gulu yake yankhondo ya kululu kuti aniyate nkhondo ya Aramagedo, amene aŵa azankhale mapeto achisauso chikulu. c (Mt. 24:31; Chiv. 16:14, 16) Pavuli pake, Ulamulilo wa Khilisitu wa vyaka 1.000 uzayambe kulamulila pano pachalo.—Chiv. 20:6.

11. Kansi chiyembekezo cha moyo wosasila chutanthauza chinji pa moyo wanu? (Onanisoti chithunzi.)

¹¹ Mukoganizila ngako za sogolo yanu palipano. Baibolo yunena kuti Nyamalenga wasu “epasa ŵanthu ntima wofuna kunkhala na moyo mpaka kale-kale.” (Mlal. 3:11) Mukoganizila  mwayukukhuzilani nkhani yamene iyi komasoti mwayukhuzila ushamwali wanu na Yehova. Buku yakuti Yandikirani kwa Yehova, pedji 319, yutiuja vinthu viyakine vochitisha chidwi ponena kuti: “Pavuli ponkhala na moyo vyaka mahandiledi, masauzande, mamiliyoni, komasoti mabiliyoni anyinji, sewo tizaziŵe vinthu vinyinji vokhuza Yehova Mulungu kupambana mwatuviziŵila palipano. Koma tizawone mphela kuti pali vinthu viyakine vodabwisa vinyinji vosaŵelengeka vatingaphuzile vokhuza yove. . . . Moyo wosasila uzankhale watanthauzo ngako na wavochita vosiyana-siyana, ndipo nthawe zonse kuvwendela kwa Yehova kuzankhale mbali yopindulisha ngako ya moyo wamene uyo.” Patupitilija kuphunzila Mawu a Mulungu, kansi n’chinjisoti chatingaphunzile palipano?

12. Kansi tingaike tyani menso ŵasu pa vinthu vakululu? Pelekani chisanzo.

¹² Mawu a Mulungu otiuja kuti Yehova “onkhala pamalo apalulu.” (Yes. 33:5) Baibolo yutiuja vinthu vodabwisa vokhuza Yehova, komasoti mbali ya gulu yake yakululu. (Yes. 6:1–4; Dan. 7:9, 10; Chiv. 4:1–6) Mwachisanzo, tuŵelenga vokhuza vinthu vochitisha wowa vechiwona Ezekieli pechiwona, ‘kululu koseguka ndipo eyamba kuwona mensomphenya a Mulungu.’—Eze. 1:1.

13. Kansi mungawoneshe tyani kutembeja ponena za udindo wali nawo Yesu kululu wamene ufotokozewa pa Aheberi 4:14-16?

¹³ Mukoganizila soti za udindo wali nawo Yesu kululu monga Mfumu yasu yolamulila komasoti Nkulu wa ansembe wachifundo. Kupitila muli yove, sewo tingavwendele ku “mpando wachifumu wa kuwama ntima kukulu” wa Mulungu m’pemphelo, posenga chifundo komasoti thandizo kwa yove “panthawe yatufunikila thandizo.” (Ŵelengani Aheberi 4:14-16.) Tufunikilalini kulola kuti nsiku ipite tikaliyeganizila vinthu vawatichitila Yehova na Yesu, komasoti vakutichitila pali pano kufumila kululu. Chikondi chawo kuli sewo chufunikila kutikhuza ntima notilimbikisa  kunkhala akhama potumikila komasoti kulambila Mulungu.—2 Akor. 5:14, 15.

14. Kansi chimozi mwa vinthu viweme ngako vatingachite potembeja Yehova na Yesu n’chinji? (Onanisoti chithunzi.)

¹⁴ Njila iweme ngako yatingatembejele Mulungu wasu na mwana wake, nikuyeja-yeja kuyavya ŵanthu ayakine kuti ankhale Amboni za Yehova komasoti ophunzila a Yesu. (Mt. 28:19, 20) Vamane ivi niye vechichita ntumwi Paulo powonesha kutembeja Mulungu na Khilisitu. Yove enzeziŵa kuti cholinga cha Yehova n’chakuti “ŵanthu, olo ankhale antundu wotyani, azapulumuke, nochiziŵa luweme chonadi.” (1 Tim. 2:3, 4) Paulo ekata ntchito mwakhama ngako pa utumiki wake kuti ayavye ŵanthu anyinji, ndipo echita vonse vangakwanishe na cholinga chakuti ‘mulimonse mwavingankhalile apulumusheko ŵanthu ayakine.’—1 Akor. 9:22, 23.

15. Mokatijana na Salimo 1:2, kansi n’chinji chingatiyavye kunkhala osangalala?

¹⁵ Wamasalimo elaŵila momvwika luweme kuti munthu wosangalala komasoti wamene vinthu vumuyendela luweme, ni wala wamene “okondwela na chilamulo cha Yehova”, ndipo “oŵelenga na kuganizila chilamulo chake usiku na nzuŵa.” (Sal. 1:1–3) Popelekela ndemanga palemba yamene iyi, womasulila Baibolo muyakine zina yake Joseph Rotherham, elemba m’buku yake yakuti Studies in the Psalms kuti munthu ofunikila “kuŵakonda ngako malangizo a m’Mawu a Mulungu noŵafufuza, kuŵaphunzila, komasoti kupatula nthawe yokwanila yoŵaganizila.” Yove enenasoti kuti “nsiku ikatendesha munthu akaliyeŵelenga Baibolo, nsiku yamene iyo yunkhala kuti yaluzika.” Mwewo mungafwane chisangalalo pophunzila Baibolo, mwakuchita chidwi na nkhani zake nowona mwazukatijilana. N’chinthu chosangalasa ngako kufufuza kuti tiziŵe mbali iliyonse ya Mawu a Mulungu!

16. Kansi munkhani ikuza tizakambilane chinji?

¹⁶ Mfundo ziweme za chonadi zakutiphunzisa Yehova m’Mawu ŵake, n’zosavuta kuli sewo kuzimvwisha. Munkhani ikuza, tizakambilane imozi mwa mfundo zikulu-zikulu za chonadi—kachisi nkulu wauzimu wa Yehova, wamene wechifotokoza Paulo mukalata yake yoluta kuli Akhilisitu Achiheberi. Tufuna kuti mwewo muzasangalale ngako pophunzila nkhani yamene iyi.