1-2. Kodi ni njira iponi yabwino yakupfunzira Bibliya? Fotokozani.

 TIYEZEZERE kuti imwepo mukufuna kugula nyumba. N’ciyani comwe imwepo mungafune kuwona pomwe mukanati kugula nyumbayo? Kodi mungandofune kuwona foto yakutsogolo kwa nyumbayo? Ne. Imwepo mungafune kuyenda kukaiwona nyumbayo, mucikazungulira, kuwona bzomwe bziri kunja, mkati na kunyang’ana m’mbali mwa nyumbayo kuti muwone penu bzentse bziri bwino. Ndipo bzingakhale bzakuthandiza kwene-kwene kuceza na munthu omwe ambadziwa momwe nyumbayo idamangidwira. Mwakusaya kupenukira, imwepo mungafune kuwona cinthu ciri-centse ca nyumba yomwe mukufuna kugulayo.

² Tingacitembo bzibodzi-bodzibzi pomwe tikuwerenga na kupfunza Bibliya. Mdziwi munango wa nkhani za m’Bibliya adalewa kuti Bibliya “liri ninga nyumba ikulu yomwe idamangidwa pa aliserse yakuzika.” N’ciyani comwe cingatithandize kudziwa bzinthu bzakuzika bza m’Bibliya? Imwepo mukambandowerenga mwakuthamanga mun’dzandobvesesa bzinthu bzakucepa, ayai “bzinthu bzakuyambirira bza m’mafala yakupambulika ya Mulungu.” (Ahebereu 5:12) Tsono, kuti imwepo mulibvesese bwino Bibliya, mun’funika kumbalipfunza mwa kamderekho ninga momwe imwepo mumbafunikira kupita “mkati” mwa nyumba kuti muidziwe bwino nyumbayo. Njira ibodzi yakupfunzirira Bibliya ndiyo kumbawona momwe mbali zizinji za m’Bibliyamo zikubveranira. Mbayezerani kubvesesa bzomwe mumbakhulupira ndipo mbayezeranimbo kubvesesa mathangwe yomwe yambakucitisani kuti mukhulupire kuti mpsacadidi.

3. N’ciyani comwe mpostolo Paulo adauza abale wace wacikristau kuti acite, ndipo n’thangwe ranyi? (Aefezo 3:14-19)

³ Kuti tibvesese bwino-bwino Fala la Mulungu, tin’funika kubvesesa bwino bzinthu bzentse ndipo tin’funikambo kumbabvesesa  bzinthu bzakuzika bza m’Bibliya. Mpostolo Paulo adauza abale wace wacikristau kuti akhafunika kucita nyongo yakubvesesa Fala la Mulungu kuti akwanise “kudziwa kufupika, kutalimpha, kukula, [na] kuzika” kwa cadidi. Mwa kucita tenepoyo, iwo angadakhala “wakuzika na wakulimba” mu cikhulupiro. (Werengani Aefezo 3:14-19.) Bzimwebzi ndibzo bzomwe tin’funikambo kucita. Mbatiwoneni momwe tingapfunzirire Fala la Mulungu kuti tikwanise kubvesesa thandauzo la bzinthu bzentse.

4. N’ciyani comwe tingacite kuti tikhale pa uxamwali na Yahova? Fotokozani.

⁴ Ninga Akristau, tin’funika lini kundobvesesa cipfunziso cakuyambirira ca m’Bibliya. Na thandizo la mzimu wakucena wa Mulungu, tikufunisisa kubvesesa “napo cintsintsi cakubisika ca Mulungu.” (1 Akolinto 2:9, 10) Imwepo mungacite pfunziro lakuzika kuti mukhale pa uxamwali bwakulimba na Yahova. Mwa ciratizo, imwepo mungafufudze momwe iye adalatizira lufoyi atumiki wace wakale-kale na momwe bzimwebzi bzimbalatizira kuti ambakufunani. Imwepo mungapfunze momwe Yahova akhafunira kuti Ajirayeri amunamate mucindendemezera na momwe iye ambafunira kuti timunamate ntsiku zino. Ayai imwepo mungapfunze mwatceru mapolofesiya yomwe Jezu adakwanirisa pomwe akhali pano pa dziko la pantsi na utumiki bomwe iye adacita.

5. Kodi pana nkhani yomwe imwepo mukufuna kuifufudza pa pfunziro lanu la pamwekha?

⁵ Wanthu winango omwe ambapfunza Bibliya adabvunzidwa kuti ni bzinthu bziponi bzakuzika bzomwe iwo angafune kubzifufudza pawokha m’Fala la Mulungu. Imwepo mungawone bzinthu bzinango bzomwe iwo adatawira pa kwadru yakuti “ Nfundo Zomwe Mungazipfunze pa Pfunziro Lanu la Pamwekha.” Imwepo mungakhale wakukondwa mukambapfunza nkhani zimwezi mwakuthandizidwa na Índice das Publicações da Torre de Vigia na Bukhu la Kufufudzira Nkhani la Mboni za Yahova. Kucita pfunziro la Bibliya lakuzika kun’dzalimbisa cikhulupiro canu ndipo kun’dzakuthandizani “kumudziwadi Mulungu.” (Mimwani 2:4, 5) Mbaticezeraneni cadidi cibodzi ca m’Bibliya comwe tingambacipfunze mwakuzika.

6. (a) Kodi n’kusiyana kuponi komwe kulipo pakati pa plano na cakulinga? (b) Thangwe ranyi tingalewe kuti cakulinga ca Yahova kwa wanthu pa dziko la pantsi ni “cakusaya kumala”? (Aefezo 3:11)

⁶ Mwa ciratizo, kumbukirani bzomwe Bibliya limbalewa bza cakulinga ca Mulungu. Kukhala na plano yakuti ticite cinthu n’kwakusiyana na kukhala na cakulinga. Kukhala na plano tingakundendemezere na mseu omwe ungakuyendeseni komwe imwepo mukufuna. Tsono cinthu cikafunga mseuyo, plano yanuyo ingafambe lini, ndipo mungakwanise lini kuyenda komwe mukufunako. Tsono kukhala na cakulinga tingakundendemezere na mbuto yomwe tikufuna kuyendayo. Tikadziwa komwe tikufuna kuyenda, tingaphatise basa njira zinango kuti tifike komwe tikufuna kuyendako. Penu njira ibodzi idafungidwa, tingapite na inango yomwe iribe kufungidwa. Bzakukondwesa mpsakuti Yahova pang’ono na pang’ono adazimbula “cakulinga [cace] cakusaya kumala” m’Bibliya. (Aefezo 3:11) Napo kuti cakulinga ca Yahova ciribe kukwanisika, iye angaphatise basa njira zakusiyana-siyana kuti akwanirise cakulinga caceco. Ndipo bzentse bzimbamufambira bwino thangwe “adakonza cinthu ciri-centse na cakulinga cace.” (Mimwani 16:4) Bzinthu bzentse bzomwe Yahova ambacita bzimbakhala mpaka kale-kale. Kodi cakulinga ca Yahova n’ciponi, ndipo ni bzinthu bziponi bzomwe iye adacinja kuti acikwanirise?

7. Pomwe wanthu wakuyamba adapanduka, kodi Yahova adacinja tani bzinthu kuti akwanirise cakulinga cace? (Mateu 25:34)

⁷ Mulungu adauza banja lakuyamba bza cakulinga cace kuna iwo. Iye adawauza kuti: “Balanani, muwande, mudzaze dziko la pantsi, mucirinyang’anira. Munyang’anire . . . bzamoyo bzentse bzomwe bzimbafamba-famba” pa dziko la pantsi. (Genesesi 1:28) Pomwe Adamu na Eva adapanduka acicitisa kuti pikado ipite m’dziko, bzimwebzi bziribe kutazisa kuti cakulinga ca Mulungu cikwanisike. Iye adacinja momwe cakulingaco cingadakwanisikira. Pa nthawe ibodzi-bodziyo, iye adacita makonzedwe ya kuti adzakhazikise Umambo kudzulu bomwe bungadadzakwanirisa cakulinga cace kwa wanthu pa dziko la pantsi. (Werengani Mateu 25:34.) Kuti bzimwebzi bzikwanisike, Yahova adatumiza Mwana wace pa dziko la pantsi kuti adzapfunzise wanthu bza Umambo bwa Mulungu na kupereka moyo wace kuti alombole wanthu ku pikado na infa. Patsogolo pace, Jezu adalamusidwa aciyenda kudzulu kuti akatonge ninga Mambo wa Umambo bwa Mulungu. Tsono pana bzizinji bzomwe tingapfunze bza cakulinga ca Mulungu.

8. (a) Kodi nkhani yakufunika kwene-kwene ya m’Bibliya njiponi? (b) Ninga momwe Aefezo 1:8-11 ambafotokozera, kodi cakulinga cakumalizira ca Yahova n’ciponi? (Onani cithunzi-thunzi pa tsamba lakuyamba.)

⁸ Nkhani yakufunika kwene-kwene ya m’Bibliya njakuti dzina la Yahova lin’dzacenesedwa pomwe cakulinga cace cin’dzakwanisika pa dziko la pantsi mwakuphatisa basa Umambo bwace bomwe bun’dzatongedwa na Jezu Kristu. Cakulinga ca Mulungu cingatazike lini. Iye adapicira kuti bzentse bzin’dzacitika ninga momwe adalewera. (Zaiya 46:10, 11; Ahebereu 6:17, 18) Na kupita kwa nthawe, dziko lin’dzasanduka paraizo, ndipo wana wa Adamu na Eva “an’dzakhala na moyo [m’mwemo] mpaka kale-kale.” (Salimo 22:26) Tsono mpsimwebzi lini bzokha bzomwe Yahova akufuna. Cakulinga cakumalizira ca Yahova n’cakuti bzakulengedwa bzace bza kudzulu na bza pa dziko la pantsi bzikhale bzakuphatana. Na tenepo, wentse an’dzabvera Yahova mwakukhulupirika ninga Mtongi wawo. (Werengani Aefezo 1:8-11.) Kodi imwepo mumbadabwa lini mukambawona momwe Yahova akukwanirisira cakulinga cace?

9. Pomwe tikuwerenga Bibliya, kodi ni bzinthu bziponi bza kutsogolo bzomwe tingakwanise kubzidziwa?

⁹ Mbatiwoneni polofesiya yomwe Yahova adailewa mu zunde la Edeni yomwe iri pa Genesesi 3:15. b Polofesiyayi imbalewa bza bzinthu bzomwe bzingadakwanirisa cakulinga cace. Bzinthu bzimwebzi bzingadadzacitika pomwe pangadapita magole mazinji. Mwa ciratizo, Mulungu adauza Abalahamu kuti pambuyo pa mibadwo mizinji, m’bodzi mwa mbeu yace angadadzakhala Kristu. (Genesesi 22:15-18) Patsogolo pace, mu 33 EC, Jezu adalumidwa katende, ninga momwe bzikhadanembedwera. (Mabasa 3:13-15) Polofesiya yakulewa bza mbeu yomwe in’dzatsotola msolo wa Sathani, in’dzakwanisika kuphampha kwa magole 1000 ya utongi bwa Jezu. (Apokalipse 20:7-10) Bibliya limbafotokoza bwino bzomwe bzin’dzacitika pomwe ciwengo ca dziko la Sathaniri kuna gulu la Yahova cin’dzawonekera padeca.

10. (a) Kodi ni bzinthu bziponi bzomwe bzin’citika tsapanopali? (b) Kodi mungakonzekerese tani nzeru zanu na mtima wanu? (Onani mafala ya m’nyantsi.)

¹⁰ Mbakumbukirani bzinthu bzakufunikabzi bzomwe Bibliya limbalewa. Cakuyamba, mitundu ya wanthu in’dzalewa kuti “mtendere na mkhomeko!” (1 Atesalonika 5:2, 3) “Pa nthawe imweyoletu,” citsautso cikulu cin’dzayamba pomwe mitundu ya wanthu in’dzaphindukira magereja yakunama. (Apokalipse 17:16) Patsogolo pace, pan’dzakhala cizindikiro cakudabwisa ca “Mwana wa munthu akubwera m’mitambo kudzulu na mphanvu pabodzi na ulemerero bukulu.” (Mateu 24:30) Jezu an’dzatonga wanthu wa pa dziko la pantsi acilekanisa mabira na mbuzi. (Mateu 25:31-33, 46) Pa nthawe imweyo, Sathani an’dzapitiriza kutsutsa Yahova. Thangwe ra ciwengo cimweci, iye an’dzatsonkhanisa mbverano wa mitundu ya wanthu, omwe Bibliya limbaucemera kuti Gogi wa dziko la ku Magogi kuti adzapfudze wanthu wa Mulungu. (Ezekiyeli 38:2, 10, 11) Pa nthawe imweyo, anyakudzozedwa omwe an’dzakhala akali pa dziko la pantsi an’dzatsonkhanisidwa aciyenda kudzulu kuti akagumane na Jezu pabodzi na anjo kuti amenye nkhondo ya Armagedo, kuphampha  kwa citsautso cikulu. c (Mateu 24:31; Apokalipse 16:14, 16) Nkhondoyo ikadzamala, bun’dzayamba Utongi bwa Magole 1000 bwa Jezu Kristu pa dziko la pantsi pano. — Apokalipse 20:6.

11. Kodi kukhala na moyo wakusaya kumala kun’dzakhala kwakudekeza? Fotokozani. (Onani cithunzi-thunzi.)

¹¹ Tsapano, kumbukirani bza tsogolo lanu kuphampha kwa magole 1000. Bibliya limbalewa kuti Mulengi wathu “adatipasa cikhumbo cakufuna kukhala na moyo wamuyaya.” (Mpalizi 3:11) Ndokumbukirani kuti bzimwebzi bzikuthandauza ciyani kwa imwepo na uxamwali bwanu na Yahova. Bukhu lakuti Yandikirani kwa Yehova, pa tsamba 319, pana mafala yakudekeza kwene-kwene. Mafalayo yambati: “Pambuyo pakukhala na moyo magole mazinji, tin’dzadziwa bzizinji pakulewa bza Yahova kuposa tsapano. Napo bziri tenepo, tin’dzawona kuti pana bzinthu bzizinji bzakudabwisa bzomwe tin’dzafunikira kupfunza pakulewa bza iye. . . . Tingakwanise lini ne kukumbukira bwino-bwino momwe moyo un’dzakhalira wakudekeza na wabwino m’Paraizo. Cinthu cakufunika kwene-kwene cin’dzakhala kulimbisa uxamwali bwathu na Yahova.” Pomwe bzimwebzi bzikanati kucitika, kodi n’ciponi cinthu cinango comwe tingapfunze mwakuzika m’Fala la Mulungu?

12. Kodi n’ciyani comwe tingacite kuti tiyezere kudziwa momwe kudzulu kuliri? Fotokozani.

¹² Fala la Mulungu limbalewa pang’ono “momwe kudzulu kuliri.” (Zaiya 33:5) Bibliya limbafotokoza bzinthu bzakudabwisa pakulewa bza Yahova na mbali ya kudzulu ya gulu lace. (Zaiya 6:1-4; Daniyeli 7:9, 10; Apokalipse 4:1-6) Mwa ciratizo, tingawerenge bzomwe Ezekiyeli adawona pomwe “kudzulu kudafunguka, ndipo iye adayamba kuwona masomphenya ya Mulungu.” — Ezekiyeli 1:1.

13. Ninga momwe Ahebereu 4:14-16 ambafotokozera, kodi imwepo mumbabzibva tani pa bzomwe Jezu akucita kucokera kudzulu?

 ¹³ Kumbukiranimbo bzomwe Jezu akuticitira kudzulu pomwe akutonga ninga Mambo na Mkulu wa Antsembe wa ntsisi. Thangwe ra iye “[tingafenderere] ku mpando wa Umambo wa Mulungu omwe ambatilatiza kudeka mtima kukulu” mu mpembo ticikumbira ntsisi na thandizo “pa nthawe yomwe tikufunikira [thandizolo].” (Werengani Ahebereu 4:14-16.) Ntsiku zentse bwerani timbakumbukire bzomwe Yahova na Jezu adaticitira na bzomwe akuticitira kucokera kudzulu. Lufoyi lawo kwa ife liticitise kubzibva bwino mu mtima na kuticitisambo kuti ticite bzizinji pa kutumikira Yahova. — 2 Akolinto 5:14, 15.

14. N’ciyani comwe tingacite kuti tilatize kuti timbatenda Yahova na Jezu? (Onani cithunzi-thunzi.)

¹⁴ Njira ibodzi ya momwe tingalatizire kutenda Mulungu wathu na Mwana wace ndiyo kuthandiza wanthu winango kuti akhale Mboni za Yahova na ateweri wa Jezu. (Mateu 28:19, 20) Bzimwebzi ndibzo bzomwe mpostolo Paulo adacita pakulatiza kutenda Mulungu na Kristu. Iye akhadziwa kuti cakulinga ca Mulungu n’cakuti “wanthu wa mtundu uli-wentse apulumuke acifika pakukhala na cidziwiso caico cacadidi.” (1 Timotio 2:3, 4) Iye adaphata basa na nyongo pa utumiki bwace kuti athandize wanthu azinji kuti “mwa njira iri-yentse [apulumuse] winango.” — 1 Akolinto 9:22, 23.

15. Mwakubverana na Salimo 1:2, n’ciyani comwe cin’dzatikondwesa?

¹⁵ Nyakunemba salimo adalewa kuti munthu wakukondwa na omwe bzinthu bzimbamufambira bwino ngule omwe “ambakondwa na malamulo ya Yahova” na ule omwe “ambayakumbukira usiku na masikati.” (Salimo 1:1-3) Nyakusandulizira Bibliya munango wakucemeredwa Joseph Rotherham adalewa kuti cinembo cimweci cimbalatiza kuti munthu an’funika “kutsogoleredwa na Mulungu, kupfunza na kumbamala nthawe ikulu akukumbukira bzomwe apfunzabzo.” Iye adalewa pomwe kuti penu munthu “an’pita ntsiku ne kuwerenga Bibliya, ndiye kuti ntsiku imweyo yandoyenda papezi.” Kuti imwepo mumbakomedwe pakuwerenga Bibliya, mun’funika kumbapfunza bzinthu bzakufunika na kuwona momwe bzinthubzo bzimbabveranirana. Ifepano tin’dzakhala wakukondwa tikambapfunza bzinthu bzakuzika bza m’Fala la Mulungu!

16. Kodi tin’dzacezerana ciyani mu nkhani ikubwerayi?

¹⁶ Cadidi ca m’Bibliya comwe Yahova ambatipfunzisa kucokera m’Fala lace n’cakunesa lini kucibvesesa. Mu nkhani ikubwerayi, tin’dzacezerana cadidi cibodzi cakuzika comwe cimbalewa bza templo yakuzika ya Yahova yomwe mpostolo Paulo adanembera Akristau wacihebereu. Kupfunza nkhani imweyi, kun’dzakucitisani kukhala wakukondwa.