1-2. Me yẹ izede rọ mai rhomu re ne se ji yono i Baibol na? Dje udje yi.

 HA ẸHẸN rorie taghene wa guọlọ dẹ oghwa. Me wu guọlọ mẹrẹn bọmọke wu ne ki brorhiẹn sẹ wu na dẹ ye? Ifoto obaro oghwa na ọvo o teri? O vwo ẹfro-o, wu guọlọ ha ukẹruọ mẹrẹn uvuẹn oghwa na, nya kinhariẹ ye, ni ọsoso ibuvun ri havwiẹ so, ji mẹrẹn oborẹ ọ do te ji keri te. Wu na ji sabu vwo ẹhẹn wu ne ni ẹkwaphiẹrhotọre oborẹ a bọn oghwa na lele so. Itiọrurhomẹmro, wu guọlọ mẹrẹn oborẹ oghwa wu ne rhirhiẹ ọ havwọ ephian.

² Ana ji sabu ru aruẹ emru omaran ọke re se ji yono i Baibol na. Ọgba irherhe i Baibol owu ọ tare taghene i Baibol na “oghwa ọduado omamọ ro rhiri, ra bọn rhẹ oberun isimo ọgbogbanhon.” Omarana, marhẹ ene ru riẹnrioma rhẹ ọsoso iyẹnrẹn ri ha i Baibol na? Wu rhe brokpakpa seyi, wu na sabu yono ihwẹnmro ezẹko, nọyẹ “iyono erukaro sekpahen ẹmro Osolobrugwẹ.” (Heb. 5:12) Omarana, jerẹ oborẹ ene ruo rhẹ oghwa na, ofori na “ruẹ uvuẹn” i Baibol na, ji dabu ni iyẹnrẹn eghoghanren ri havwiẹ so. Izede rọ mai ghanren re ne yono i Baibol na, yẹ ọrẹ ana djokarhọ oborẹ eghọn sansan i ru surhobọmwu oborẹ a ya rhẹ eghwẹmro erọrọ. Damoma wu ne vwẹruọ irhomẹmro wu vwo imwẹro kpahen ọrhẹ oborẹ ọsoriẹ we vwo imwẹro kpahen aye.

3. Me yẹ ọnyikọ Paul ọ ha urhebro rẹn Ilele Kristi nẹ aye i ru, mesoriẹ? (Ephesians 3:14-19)

³ Na dabu vwẹruọ ọsoso iyẹnrẹn ri ha i Baibol na, ene vi gbẹro rhotọre yono irhomẹmro i Baibol na. Ọnyikọ Paul ọ ta rẹn Ilele Kristi erukaro na nẹ aye i dabu yono Ẹmro Osolobrugwẹ, neneyo aye i sabu “vwẹruọ oborẹ o keri te ọrhẹ oborẹ o seri te kugbe oborẹ o rhi te ọrhẹ oborẹ o kodo te fiotọre.” Ọke ọrana, aye ni na sabu vwo “esiri ọrhẹ emevigbanhon” ọgbogbanhon uvuẹn esegburhomẹmro  na. (Se Ephesians 3:14-19.) O ji fo ne ru te omaran. Jene yono kpahen oborẹ ene ru gbẹro rhotọre yono i Baibol na, ji vwẹruọ ye.

4. Me ya na sabu ru ne tikẹrẹ i Jehova rhọ? Dje idje ezẹko.

⁴ Fọkime ọwan Ilele Kristi, o vwo te rẹn ọwan ra na ghwai vwẹruọ irhomẹmro ezẹko uvuẹn i Baibol na-a. Nyoma userhumu ẹhẹn ọfuanfon na, e vwo omwemẹ re ne yono kpahen “ekwakwa ikokodo Osolobrugwẹ.” (1 Cor. 2:9, 10) Ono rhomu wu rha tuẹn ẹkwaphiẹrhotọre uyono omobọ ro no tio kẹrẹ i Jehova rhọ. Jerẹ udje, wu na sabu gbẹro rhotọre yono kpahen oborẹ o dje ẹguọlọ ye phia rẹn idibo yi ọke ahwanren, ọrhẹ oborẹ o ru djephia taghene o ji vwo ẹguọlọ kpahuọn. Wu na sabu ni ẹkwaphiẹrhotọre ogame i Jehova uvuẹn Israel so, ọrhẹ oborẹ o ru họhọ ẹkwaphiẹrhotọre ogame Ilele Kristi inyenana. Yanghene wu na sabu yono kpahen aruẹmẹrẹn sansan ri Jesu ọ ha te orugba ọke ro nyerẹn uvuẹn otọrakpọ na.

5. O vwo urhomu-ẹmro owu wu guọlọ gbẹro rhotọre yono kpahen uvuẹn uyono omobọ?

⁵ A nọ imizu ezẹko ra dabu gbẹro rhotọre yono i Baibol na, oborẹ aye i guọlọ yono rhọ uvuẹn i Baibol na. Ẹkpahenrhọ aye ezẹko ọ ha uvuẹn ekpeti na “ Irhomu-ẹmro ra na Sabu ha Ruẹ Uyono Omobọ.” Wu na sabu riamerhen uyono rhọ ọke we rhe yono kpahen aruẹ irhomẹmro erana, nyoma userhumu ọbe na Watch Tower Publications Index yanghene Research Guide for Jehovah’s Witnesses. We rhe yono kodorhọ wu na sabu ruẹ esegburhomẹmrọ gbanhon, rọ nọ ha userhumu wẹn “vwo irherhe Osolobrugwẹ.” (Prov. 2:4, 5) Vwana, jena tẹnrovi irhomẹmro ikokodo ezẹko ri ha i Baibol na, ra na sabu gbẹro rhotọre yono.

6. (a) Me yẹ ovẹnẹ rọ ha uvwre ẹkwaphiẹrhotọre ọrhẹ ọhọre? (b) Mesoriẹ ana sabu ta taghene ọhọre i Jehova rẹn ituakpọ ọrhẹ otọrakpọ na ọrẹ “bẹmẹdẹ”? (Ephesians 3:11)

⁶ Jerẹ udje, jene roro kpahen oborẹ i Baibol na ọ ta kpahen ọhọre i Jehova.  Ovẹnẹ ọ ha ọrẹ ene vwo ẹkwaphiẹrhotọre ọrhẹ ọhọre. Ẹkwaphiẹrhotọre ọ họhọ izede kirighwo re vwo rhẹ ẹhẹn ro no sun ọwan riẹ ekete ra djẹre ra guọlọ nya. Ọrẹn, ẹkwaphiẹrhotọre ọnọ sabu sefughwẹ orhianẹ o vwo ọgbanrhọ uvuẹn izede na. Ọhọre ọ họhọ ekete ra vi guọlọ nya na. E rhe ekete onya ọwan ọnọ ba, ọrẹn ana sabu nya izede sansan te oboran. Ana sabu ruẹ ewene rhọ ye arha guọlọ. Ọrẹ omamerhomẹ, Jehova o dje rẹn ọwan bibiesuọn “ọhọre i bẹmẹdẹ” ọnẹyen ne uvuẹn i Baibol na. (Se ẹmro re dje fiotọre ọrẹ Ephesians 3:11.) Nyoma izede owu yanghene ọrọrọ, Jehova o ruẹ ọhọriẹ gba ọke ephian fọkime o “ruẹ ekwakwa ephian nẹ aye i wian fọkiẹ ọhọre ọnẹyen.” (Prov. 16:4) Oborẹ ono nerhumu irueruo i Jehova rhe, ono rhirhiẹ ye bẹmẹdẹ. Me yẹ ọhọre i Jehova, ewene ego yo ruru neneyo ọ sabu ruie gba?

7. Ọke ituakpọ erukaro na a tiẹn uvwele hin, marhẹ i Jehova o ru wene izede ro no ruẹ ọhọriẹ gba? (Matthew 25:34)

⁷ Jehova ọ ta rẹn ituakpọ erukaro oborẹ ọhọriẹ kpahen aye o surhobọmwu. Aye ine ‘vwiẹ nẹ aye i bunrhọ, nẹ aye i vuọn otọrakpọ na jeghwai hẹrote yi, nẹ aye i jeghwai vwo omẹgbanhon aye ine suẹn . . . kemru kemru ra nya” uvuẹn otọrakpọ na. (Gen. 1:28) Ọke Adam ọrhẹ Eve a tiẹn uvwele hin, rọ lẹrhẹ ekrun ituakpọ rhiẹ iruedandan, ọhọre i Jehova o sefughwẹ-ẹ. Jehova no wene izede ro no ruie gba. Ogege, no mwuegbe rọ nọ ha Uvie owu mwu obẹ odjuwu, rọ nọ sabu ruẹ ọhọriẹ ọrukaro rẹn ituakpọ ọrhẹ otọrakpọ na gba. (Se Matthew 25:34.) Uvuẹn ọke ro serhọ riẹn, Jehova no dje Ọmọyen ọrukaro rhiẹ otọrakpọ na no yono ihworho kpahen Uvie na, ji ha arhọ ye ruẹ otan no simi ọwan nẹ ọdandan ọrhẹ uhwu. Ọke oru, na rhọmọ i Jesu nuhwu riẹ odjuwu no sun ẹrhẹ Orodje ọrẹ Uvie Osolobrugwẹ. Ọrẹn, o ji vwo ekwakwa buebun re ne roro kpahen sekpahen ọhọre i Jehova.

8. (a) Me yẹ urhomu-ẹmro ro suẹn i Baibol na? (b) Jerẹ oborẹ e dje rhẹ Ephesians 1:8-11, me yẹ emru ọrọrọ ri Jehova ono rugba? (Ni ifoto obaro ọbe na.)

⁸ Urhomu-ẹmro kirighwo ro suẹn i Baibol na yẹ erufon odẹ i Jehova, ọke ro no ruẹ ọhọriẹ rẹn ituakpọ gba nyoma Uvie Ọnẹyen uvuẹn otọre usuon i Kristi. Ọhọre i Jehova ọ sabu wene-e. O veri taghene ono ruie gba rhẹ efikparobọ. (Isa. 46:10, 11, ekete ra djokarhọ; Heb. 6:17, 18) Orho ru, otọrakpọ na no no rhiẹ paradais, ekete emọ Adam ọrhẹ Eve ri rhiẹ ihworho ri gbare ọrhẹ evwata, ina “riamerhen akpenyerẹn bẹmẹdẹ.” (Ps. 22:26) Ọrẹn, orhiẹ ọrana ọvo yẹ ọhọre i Jehova-a. Ọhọriẹ rọ mai ghanren, ọrẹ ono kuẹ ituakpọ ọrhẹ emakashe kugbe rhiẹ ekrun owu. Uvwrọke ọrana, kohworho kohworho ro nyerẹn, ọnọ homariotọre rẹn Jehova no rhiẹ Osuinsuensun aye. (Se Ephesians 1:8-11.) Oma ọ vwọ merhuọn kpahen izede ri Jehova o ru ruẹ ọhọriẹ gba?

9. Me ya na sabu mẹrẹn kpahen obaro akpọ ọwan ọke re se i Baibol na?

⁹ Roro kpahen aruẹmẹrẹn ri Jehova ọ tare uvuẹn ogba Eden, ra ya rhẹ Genesis 3:15. b Ọ rionbọrhọ irueruo ri na ha ọhọriẹ te orugba, ọrẹn ọnọ ha ẹgbukpe uriusionrin buebun bọmọke ono ki rugba. Ekwakwa enana i sekpahen uvwiẹ ọmọ Abraham, ro rhiẹ unuoghwa ro no lele fiẹ uvwiẹ Kristi na. (Gen. 22:15-18) Ọke oru, uvuẹn ẹgbukpe 33 C.E., na ghwiẹ i  Jesu uvuẹn esiri aghwẹ jerẹ oborẹ a ta kpahen. (Acts 3:13-15) Irueruo rọ kẹta uvuẹn aruẹmẹrẹn ọrana, ro rhiẹ ọrẹ ana ghwọghọ urhomu Echu, ọ ji ha obaro, ọnọ ha ẹgbukpe rọ vrẹn 1,000 no ki rugba. (Rev. 20:7-10) Baibol na o dje kpahen ekwakwa buebun ri na phia ọke erhirhiẹ eghrẹn rọ ha uvwre akpọ Echu ọrhẹ ukoko i Jehova, o riẹ ehion ne.

10. (a) Ekwakwa ego yi na phia obaro na phẹrẹkpẹ? (b) Marhẹ ene ru mwuegbe ọmudu ọrhẹ ẹhẹn ọwan? (Se ekete ra djokarhọ.)

¹⁰ Roro kpahen ekwakwa oghẹnrensan ri Baibol na ọ ta kpahen. Ọrukaro, egbamwa na ine ghwoghwo “ufuoma ọrhẹ omefuon!” (1 Thess. 5:2, 3) “Kpregede,” ukpokpogho rode na nọ nọ tonrhọ ọke egbamwa na i rha kparehaso ẹga efian. (Rev. 17:16) Ọrana orho nie, ọkezẹko ono vwo irueruo igbevwunu ri na homaphia ọke ‘Ọmọ onyakpọ na ọnọ rhe uvuẹn avwre odjuwu na rhẹ omẹgbanhon ọrhẹ odidi rode.’ (Matt. 24:30) Jesu ọnọ ha ituakpọ guẹnzọn, ji tiẹ igegede na nẹ uvwre ẹvwe na. (Matt. 25:31-33, 46) Uvwrọke ọrana, Echu ọnọ ji rha kparahasuẹ i Jehova. Fọkiẹ utuoma Echu o vwori, no no ghweri okugbe egbamwa na ri Baibol na o seri, Gog rọ ha otọre i Magog, nọ kparehaso ihworho i Jehova ra ga ogame urhomẹmro. (Ezek. 38:2, 10, 11) Orho ru, imizu ra djẹha ri hẹrhẹre ina homaba Kristi ọrhẹ emakashe ri ha odjuwu fiuvweri Armageddon, ro rhiẹ irueruo rọ kẹta uvuẹn ukpokpogho rode na. c (Matt. 24:31; Rev. 16:14, 16) Ọrana ọrhọ vrẹn, Usun Ẹgbukpe Uriusionrin Kristi nọ nọ tonrhọ uvuẹn otọrakpọ na.—Rev. 20:6.

11. Me yẹ arhọ i bẹmẹdẹ o mevirhọ wẹn? (Ni ifoto na.)

¹¹ Vwana, gbe roro kodo kpahen obaro akpọ ọnọ. Baibol na ọ tare taghene Ọmemama ọwan “ọ tobọ fi bẹmẹdẹ rhẹ uvuẹn ọmudu [ọwan].” (Eccl. 3:11) Roro kpahen oborẹ ọrana o mevirhọ wẹn ọrhẹ onyerẹnkugbe ọnọ rhẹ Jehova. Ọbe na Draw Close to Jehovah, aruọbe 319, nọ tẹmro irhorhomu enana: “Erhe nyerẹn ẹgbukpe uzusionrin, uriusionrin,  iduduru uriusionrin yanghene tobọ te iduduru mani iduduru uriusionrin ẹgbukpe ne, ene rhe i Jehova ghwẹ oborẹ e rherie vwana. Ọrẹn, ene ji vwo ekwakwa igbevwunu buebun re ne yono kpahen. . . . A sabu roro kpahen ọsoso obọdẹn ekwakwa irhorhomu ra na riamerhiẹn uvuẹn i paradaisi-i—ne tikẹrẹ i Jehova rhọ yo no rhiẹ oborẹ ọ mai ghanren ọke ephian.” Ọrẹn, ọke re yono kpahen i Baibol na, ekwakwa erọrọ ego ye ne ji yono kodorhọ?

12. Marhẹ ene ru ni idjuwu na? Dje udje owu.

¹² Baibol na ọ ta ibiẹ ẹmro kpahen ekete i Jehova ọ havwọ “uvuẹn ekete ri rierun na.” (Isa. 33:5) Baibol na o dje kpahen ekwakwa igbevwunu ri sekpahen Jehova ọrhẹ ukoko yi obẹ odjuwu. (Isa. 6:1-4; Dan. 7:9, 10; Rev. 4:1-6) Jerẹ udje, ana sabu se kpahen ekwakwa igbevwunu rẹ Ezekiel ọ mẹrẹnren ọke “idjuwu na e rhie firhọ, [nọ] mẹrẹn emena arudo erẹ Osolobrugwẹ.”—Ezek. 1:1.

13. Lele oborẹ ọ ha Hebrews 4:14-16, me wu vwo ọdaremẹro kpahen sekpahen ẹrhẹ i Jesu uvuẹn idjuwu na?

¹³ Ji roro kpahen ẹrhẹ i Jesu obẹ odjuwu, ro rhiẹ Orodje ọrhẹ Orherẹn Ọduado ro vwo arodọmẹ. Nyoma i Jesu ana sabu tikẹrẹ “aga usun ẹghẹlẹ ọphẹ” Osolobrugwẹ ọrẹ ẹrhomo, ji nekpẹn arodọmẹ ọrhẹ userhumu mie yi uvuẹn “ọke ra guọliẹ.” (Se Hebrews 4:14-16.) Jene rhe roro kpahen oborẹ i Jesu ọrhẹ Jehova i ru rẹn ọwan ne, ọrhẹ oborẹ aye ruẹ vwana kẹdẹkẹdẹ. Ofori nẹ ẹguọlọ aye i vwo kpahen ọwan ọ hobọte ji mwu ọwan vwo oruru wian owian Uvie na, ji ga i Jehova.—2 Cor. 5:14, 15.

14. Me yẹ emru owu usuẹn ekwakwa eghoghanren ra na sabu ru ne dje ọdaremẹro re vwo kpahen Jehova ọrhẹ Jesu phia? (Ni ifoto na.)

¹⁴ Izede ọghoghanren owu ene ru dje ọdaremẹro okokodo ọwan phia rẹn Jehova  ọrhẹ Jesu, yẹ ọrẹ ana damoma ha userhumu rẹn awọrọ rhiẹ Iseri Jehova ọrhẹ idibo i Jesu. (Matt. 28:19, 20) Ọrana yẹ oborẹ ọnyikọ Paul o ruru fọkiẹ ọdaremẹro ro vwori rẹn Jehova ọrhẹ Kristi. O rheri taghene ọhọre i Jehova yẹ ọrẹ “aruẹ ihworho ephian ine vwo usimi jeghwai vwo irherhe ọgbagba ọrẹ urhomẹmro na.” (1 Tim. 2:3, 4) Ọ wian gbanhon uvuẹn owian aghwoghwo na, nọ sabu ha userhumu rẹn ihworho buebun, neneyo ọ sabu “simi ezẹko ọrẹ kizede kizede.”—1 Cor. 9:22, 23.

15. Lele oborẹ ọ ha Psalm 1:2, me yọ lẹrhẹ ọwan vwo omamerhomẹ?

¹⁵ Uvuẹn izede ro serhọ, ọbo ijoro na o dje ohworho oma ọ merhan rhiẹ ohworho ‘urhi Jehova ọ mai je yi,’ ro ji ‘roro kodo kpahen urhi Ọnẹyen ason ọrhẹ uvo.’ (Ps. 1:1-3; ekete ra djokarhọ) Ọrhienrhianrhian owu re se Joseph Rotherham ro vwo ọbe na, Studies in the Psalms, nọ ta kpahen oghwẹmro ọrana taghene, ofori nẹ ohworho “o vwo omamerhomẹ ọduado kpahen ọkpọvi ro nẹ obẹ Osolobrugwẹ rhe te erhirhiẹ rọ guọliẹ, yono kpahiẹn, ji ghwọghọ ọke jijiri roro kpahiẹn.” Nọ habaye taghene ofori nẹ ohworho ro se i Baibol na “o ni ẹdẹ ro vwo se i Baibol na rhiẹ ẹdẹ ra ghwọghọ fughwẹ.” Wu na sabu riamerhen uyono i Baibol na nyoma wu ne gbẹro rhotọre yono kpahen ọsoso ihwẹnmro eghoghanren ri havwiẹ, ji mẹrẹn oborẹ aye i ru surhobọmwu owuowọnwan. Ghini emru aghọghọ re ne gbẹro rhotọre yono i Baibol na!

16. Me ye ne yono kpahen uvuẹn urhomu-ẹmro rọ ha kpahen ọnana?

¹⁶ Ọ vwọ bẹn re ne vwẹruọ irhomẹmro irhorhomu ri Jehova o yono ọwan uvuẹn i Baibol na-a. Uvuẹn urhomu-ẹmro rọ ha kpahen ọnana, ene yono kpahen owu usuẹn irhomu-ẹmro ikokodo na—oghwa ẹga ọduado i Jehova, ri Paul o dje kpahen uvuẹn ileta rọ ya vwe Ilele Kristi ra djẹ edjadjẹ i Hebrew. Jenẹ uyono urhomu-ẹmro i Baibol ọrana, o rhiẹ oborẹ ọnọ yọ obọdẹn omamerhomẹ.