1, 2. Библи кӕсун ӕма ӕртасун хуӕздӕр куд ӕй? Ӕрхӕссӕ цӕветтон.

 ЗӔГЪӔН, хӕдзарӕ балхӕнунмӕ гъавис. Уой размӕ дӕ ци гъӕудзӕй бакӕнун? Хӕдзарӕн е ’ндаг цӕхуӕн ӕй, уой хузтӕ фӕууинун фагӕ уодзӕй? Нӕъ. Ӕвӕдзи дӕ бафӕнддзӕй хӕдзарӕмӕ медӕмӕ бацӕун ӕма имӕ дзӕбӕх ӕркӕститӕ кӕнун.

² Гъе уотӕ нӕ бон ӕй архайун, Библи ку фӕккӕсӕн ӕма ’й ку фертасӕн, уӕд дӕр. Еу библиртасӕг еци киунугӕ рабарста, ӕ бундор арф кӕмӕн ӕй ӕма хъӕбӕр бӕрзонд ка ӕй, уӕхӕн хӕдзари хӕццӕ. Цума уӕд уомӕн гӕнӕн ес, цӕмӕй Библий цидӕриддӕр финст ес, уой базонӕн? Тагъд-тагъдӕй ӕй ку кӕсай, уӕд Хуцауи Дзурдӕн ӕрмӕстдӕр ӕ сӕйраг ахурӕдтӕ базондзӕнӕ (Дзиуит. 5:12). Фал хӕдзарӕ ӕлхӕнгӕй куд фӕууй, уотӕ ами дӕр гъӕуй «медӕмӕ бацӕун», цӕмӕй листӕг хабӕрттӕ хуӕздӕр фӕууинай. Уомӕн хуарз мадзал ӕй Библи ӕртасун, гъома архайун, Библий хӕйттӕ кӕрӕдзей хӕццӕ куд баст ӕнцӕ, уой фӕууинун. Архайӕ, цӕмӕй цӕбӕл ӕууӕндис, айдагъ уой ма зонай, фал ма уобӕл цӕмӕн ӕууӕндис, уой дӕр.

3. Апостол Павел хуӕртӕ ӕма ӕнсувӕрти цӕмӕ разӕнгард кодта ӕма цӕмӕн? (Ефесӕгтӕмӕ 3:14–19).

³ Цӕмӕй Библи дзӕбӕх лӕдӕрӕн, уой туххӕй ӕй гъӕуама арф ӕртасӕн. Апостол Павел хуӕртӕ ӕма ӕнсувӕрти разӕнгард кодта, цӕмӕй Хуцауи Дзурд зӕрдиагӕй ӕртасонцӕ. Уотемӕй «рӕстдзийнадӕн ӕ уӕрхӕ ӕма ӕ дӕргъӕ, ӕ бӕрзӕндӕ ӕма ӕ ӕрфӕ» кӕронмӕ балӕдӕрдтайуонцӕ. Уой фӕрци ба сӕ бон адтайдӕ федар бундор искӕнун ӕма ӕууӕндундзийнади ӕрфедар ун. (Бакӕсӕ Ефесӕгтӕмӕ 3:14–19.) Ӕма мах дӕр гъӕуй уотӕ архайун. Гъӕйдӕ ӕркӕсӕн, ци  нин банхус кӕндзӕй Хуцауи Дзурд лӕмбунӕг ӕртасун, цӕмӕй ин ӕ гъуди хуӕздӕр лӕдӕрӕн.

4. Библи ке ’ртасис, е дин куд банхус кӕндзӕй, цӕмӕй Йеговӕмӕ хӕстӕгдӕр кӕнай? Ӕрхӕссӕ цӕветтонтӕ.

⁴ Мах киристӕнттӕ ан ӕма Библийӕн ӕ сӕйраг ахурӕдтӕ ке зонӕн, уой фагӕбӕл нӕ нимайӕн. Мах фӕндуй, цӕмӕй хуарз лӕдӕрӕн «Хуцауи арф зунд дӕр». Ӕма ’й зонӕн, Хуцауи сугъдӕг хъаури ӕнхуси фӕрци нин е ке бантӕсдзӕй (1 Кор. 2:9, 10). Дӕ бон ӕй, хъӕбӕрдӕр дӕ ка тухсун кӕнуй, уӕхӕн темӕ кенӕ фарста равзарун ӕма ’й лӕмбунӕгдӕр рартасун. Уотемӕй Йеговӕмӕ хӕстӕгдӕр кӕндзӕнӕ. Зӕгъӕн, дӕ бон ӕй рартасун, Йеговӕ рагидзаманти ӕ лӕггадгӕнгути ке уарзта, уой куд ӕвдиста ӕма уомӕй куд зиннуй, абони дӕу дӕр ке уарзуй. Кенӕ ба дӕ бон ӕй рабарун, израилӕгтӕ рагидзаманти Хуцауӕн куд лӕггадӕ кодтонцӕ ӕма ин абони мах куд лӕггадӕ кӕнӕн, е ӕмхузӕн цӕмӕй ӕй. Уомӕй уӕлдай ма дӕ бон ӕй ӕркӕсун, Киристей цард ӕма лӕггадӕбӕл ка исӕнхӕст ӕй, еци пахампарӕдтӕмӕ.

5. Библи ӕртасгӕй дӕ цӕхуӕн темитӕ фӕндадтайдӕ хуӕздӕр балӕдӕрун?

⁵ Библи берӕ ӕнзти дӕргъи ка ӕртасуй, уони бафарстонцӕ, цӕхуӕн темитӕ сӕ фӕндадтайдӕ хуӕздӕр балӕдӕрун. Сӕ дзуӕппитӕй еуӕй-еуетӕ финст ӕнцӕ рамки « Ци ес рартасӕн?», зӕгъгӕ. Е ӕцӕгӕйдӕр хъӕбӕр зӕрдӕмӕдзӕугӕ гъуддаг ӕй. Дӕ бон ӕй испайда кӕнун «Индекс публикаций Сторожевой башни» кенӕ «Путеводитель по публикациям Свидетелей Иеговы». Библи арф ку ӕртасай, уӕд иссердзӕнӕ «Хуцауи туххӕй зонундзийнӕдтӕ» ӕма де ’ууӕндундзийнадӕ бафедар уодзӕй (Ӕмб. 2:4, 5). Гъӕйдӕ ӕркӕсӕн Хуцауи Дзурди арф гъудитӕй еу цалдӕремӕ. Уой фӕсте сӕ дӕ бон уодзӕй никки лӕмбунӕгдӕр рартасун.

6. а) Фӕндонӕй ӕма пъланӕй ци уӕлдай ес? б) Йеговӕмӕ зӕнхӕ ӕма адӕни туххӕй ци фӕндон ес, уой ӕносон фӕндон исхонӕн цӕмӕн ес? (Ефесӕгтӕмӕ 3:11).

⁶ Зӕгъӕн, ӕркӕсӕн Библий Хуцауи фӕндони туххӕй ци финст ес, уомӕ. Ести исфӕндӕ кӕнун ӕма испълан кӕнун еу нӕй. Пълан рабарӕн ес, адӕймаг ӕ нисанмӕ бахъӕртунмӕ ци над равзаруй, уой хӕццӕ. Фал адӕймагӕн ӕ надбӕл ести къахкъуӕрӕнтӕ ку фӕззиннуй, уӕд идарддӕр еци пъланмӕ гӕсгӕ архайун ӕ бон нӕбал фӕууй. Фӕндон ба рабарӕн ес, кумӕ нӕ бахъӕртун фӕндуй, еци бунати хӕццӕ. Мах ӕй зонӕн, кумӕ  нин цӕугӕ ’й, уой, кӕбӕлти имӕ нихъхъӕртдзиан, е ба уотӕ ӕхсидзгӕ нӕбал ӕй. Ци надбӕл цӕуйнаг адтан, уобӕл цӕун нин ку нӕ рауайа, уӕд ӕндӕр надбӕл цӕудзиан. Мах Йеговӕй хъӕбӕр боз ан, е «’носон фӕндон» ин ке зонӕн, уой туххӕй (Еф. 3:11). Е нин ӕй Библий фӕрци сабургай ӕргом кодта. Йеговӕ цийфӕнди зиндзийнадӕбӕл ма исӕмбӕла, уӕддӕр алли уавӕр дӕр уотӕ рауайун кӕнуй, цӕмӕй ӕ фӕндон исӕнхӕст уа (Ӕмб. 16:4). Ци исфӕндӕ кодта, уой исӕнхӕст кӕнунмӕ ӕй неке ӕма неци бахъор кӕндзӕй. Мадта Хуцауи фӕндонмӕ ци хауй ӕма ’й цӕхуӕн ӕййивддзийнӕдтӕ багъудӕй искӕнун, цӕмӕй ӕ фӕндӕ исӕнхӕст уа?

7. Йеговӕ ци искодта, цӕмӕй ӕ фӕндон исӕнхӕст адтайдӕ, фиццаг силгоймаг ӕма нӕлгоймаг ӕ нихмӕ ку рацудӕнцӕ, уӕд? (Матфеййи 25:34).

⁷ Хуцау фиццаг нӕлгоймаг ӕма силгоймагӕн ӕ фӕндон раргом кодта. Е син загъта: «Цӕуӕт уадзетӕ, исберӕ уотӕ ӕма зӕнхӕ байдзаг кӕнтӕ ӕма ин хецау уотӕ... Уӕ барӕ цӕуӕд... зӕнхӕбӕл цӕрӕгоййӕй цидӕриддӕр ’змӕлуй, уонӕбӕл» (Райд. 1:28). Адам ӕма Евӕ Хуцауи нихмӕ ке рацудӕнцӕ, уой туххӕй сӕхуӕдтӕ дӕр тӕрегъӕдгун иссӕнцӕ ӕма сӕ цӕуӕт дӕр тӕрегъӕд сӕ тоги рахастонцӕ. Фал е Йегови ӕ фӕндон исӕнхӕст кӕнунмӕ нӕ бахъор кодта. Е ӕндӕр мадзӕлттӕ равзурста, цӕмӕй имӕ райдайӕни ци нисан адтӕй, уой исӕнхӕст кодтайдӕ. Хуцау еци фӕдбӕл исфӕндӕ кодта, цӕмӕй уӕлӕрвти фӕззинна Паддзахадӕ, ӕма имӕ зӕнхӕ, удта адӕни туххӕй ци фӕндон ес, уой исӕнхӕст кӕна. (Бакӕсӕ Матфеййи 25:34.) Ӕ рӕстӕги ба Йеговӕ ӕ фиццагигурд Фурти зӕнхӕмӕ рарвиста. Киристе адӕнӕн еци Паддзахади туххӕй дзурдта ӕма ӕ цард равардта, цӕмӕй нӕ тӕрегъӕд ӕма мӕлӕтӕй балхӕдтайдӕ. Уомӕй рабӕрӕг ӕй, Йеговӕ нӕ куд берӕ уарзуй, е. Уой фӕсте ба ’й Йеговӕ уӕларвон цардмӕ райгас кодта, цӕмӕй Хуцауи Паддзахади Паддзах исуа. Аци гъуддӕгтӕй уӕлдай ма нӕ бон берӕ цидӕртӕ ӕй Хуцауи фӕндони туххӕй базонун.

8. а) Библий сӕйраг гъуди цӕхуӕн ӕй? б) Хуцауи фӕндонмӕ ма никкидӕр ци хауй? (Ефесӕгтӕмӕ 1:8–11). (Кӕсӕ хузӕмӕ ӕндаг цъарӕбӕл.)

⁸ Библийӕн ӕ сӕйраг гъуди цӕхуӕн ӕй? Йеговӕ ӕ Паддзахади фӕрци, Киристе ӕ сӕргъи, уотемӕй, исӕнхӕст кӕндзӕй, зӕнхи туххӕй имӕ ци фӕндон адтӕй, уой. Ӕма уотемӕй ӕ ном искӕдзос кӕндзӕй. Ӕма Йеговӕ ӕ фӕндон нӕ раййивта. Е нин дзурд равардта, ӕ зӕрдӕвӕрдтӕ еугурейдӕр ке исӕнхӕст кӕндзӕй (Ис. 46:10, 11; Дзиуит. 6:17, 18). Еу афони зӕнхӕ дзенет исуодзӕй ӕма Адам ӕма Еви ӕнхӕст байзӕддӕгтӕ амондгунӕй цӕрдзӕнцӕ ӕносмӕ (Пс. 22:26). Фал Хуцауи фӕндонмӕ айдагъ е нӕ хауй. Йеговӕ байархайдзӕй, цӕмӕй ин е ’гас лӕггадгӕнгутӕ дӕр уӕлӕрвти дӕр ӕма зӕнхӕбӕл дӕр еумӕйагӕй лӕггадӕ кӕнонцӕ. Етӕ се ’гасдӕр Йеговӕбӕл еузӕрдон уодзӕнцӕ ӕма ’й сӕ Хецаубӕл нимайдзӕнцӕ. (Бакӕсӕ Ефесӕгтӕмӕ 1:8–11.) Йеговӕ ӕ фӕндон куд исӕнхӕст кӕндзӕй, е дӕмӕ дессаг нӕ кӕсуй?

9. Библи кӕсгӕй федӕни хабӕрттӕ нӕ бон цӕй уӕнгӕ ӕй базонун?

⁹ Ӕркӕсӕн, Йеговӕ Едеми дзӕхӕрадони ци пахампарадӕ загъта, уомӕ. Е финст ӕй Райдайӕни 3:15 b. Йеговӕ балӕдӕрун кодта, ӕ фӕндон куд исӕнхӕст кӕндзӕй, уой. Фал си ци хабӕртти туххӕй загъта, етӕ, еци фӕдбӕл ӕнхӕст кӕнун нӕ райдӕдтонцӕ, фал мингай ӕнзтӕ фӕстӕдӕр. Зӕгъӕн, Йеговӕ Авраамӕн зӕрдӕ байвардта, ӕ байзӕддӕгтӕй еу Киристе ке исуодзӕй (Райд. 22:15–18). Уой фӕсте ба нӕ эри 33 анзи, пахампаради куд финст адтӕй, уомӕ гӕсгӕ хелагӕ Киристейӕн ӕ къелӕбӕл фӕххуӕстӕй (Гъуд. 3:13–15). Ӕма кӕронмӕ аци пахампарадӕ исӕнхӕст уодзӕй Минанзон хецаудзийнади  фӕсте, байзӕддаг Сайтанӕн ӕ сӕр ку ниллицъӕ кӕна, уӕд (Рарг. 20:7–10). Библийӕй ма нӕ бон ӕй базонун ӕндӕр листӕг хабӕрттӕ, Сайтани дуйней ӕма Йегови организаций астӕу ци тох цӕуй, е ӕ тӕккӕ карзи ку бацӕуа, уӕд цӕхуӕн хабӕрттӕ цӕудзӕй, уой туххӕй.

10. а) Тагъд рӕстӕги цӕхуӕн хабӕрттӕ райдайдзӕнцӕ цӕун? б) Нӕ бон куд ӕй нӕ зӕрдӕ ӕма нӕ зунд федӕни хабӕрттӕмӕ бацӕттӕ кӕнун? (Кӕсӕ ма, феппайуйнаги ци киунуги туххӕй дзурд цӕуй, уомӕ.)

¹⁰ Расагъӕс кӕнӕн, Библий ци финст ес, федӕни ци дессаги хабӕрттӕ цӕудзӕй, уони туххӕй. Фиццагидӕр бал адӕн фегъосун кӕндзӕнцӕ «сабурдзийнадӕ ӕма ӕдасдзийнадӕ» (1 Фес. 5:2, 3). Уой фӕсте ба сӕхе еугур мӕнгӕ динтӕбӕл ниццӕвдзӕнцӕ (Рарг. 17:16). Уотемӕй райдайдзӕй устур бӕллӕх. Уой фӕсте адӕн «фӕууиндзӕнцӕ Адӕймаги Фурти уӕларвон мегътӕбӕл ӕрцӕйцӕугӕ хъаурӕ ӕма устур кади хӕццӕ». Е ба, ӕвӕдзи, уобӕл дзорӕг ӕй, ӕма цӕхуӕндӕр ӕнахур хабӕрттӕ цӕудзӕй (Матф. 24:30). Уой фӕсте Киристе адӕнӕн тӕрхон кӕнун райдайдзӕй ӕма «фусти» «сӕгътӕй» рахецӕн кӕндзӕй (Матф. 25:31–33, 46). Фал еци рӕстӕг Сайтан дӕр сабур нӕ баддзӕй. Ӕ фур мӕстӕй Магоги зӕнхӕй Гоги, гъома зӕнхон хецауӕдти цӕдес, баразӕнгард кӕндзӕй, цӕмӕй сӕхе Йегови лӕггадгӕнгутӕбӕл ниццӕвонцӕ (Йез. 38:2, 10, 11). Еу афони, зӕнхӕбӕл ма исӕрст киристӕнттӕй ка байзадӕй, етӕ уӕлӕрвтӕмӕ ист ӕрцӕудзӕнцӕ, цӕмӕй Киристей ӕма ӕ уӕларвон ӕфсади хӕццӕ Армагеддони тох кӕнонцӕ. Гъе уобӕл устур бӕллӕх фӕууодзӕй (Матф. 24:31; Рарг. 16:14, 16) c. Уой фӕсте ба райдайдзӕй Киристей Минанзон хецаудзийнадӕ (Рарг. 20:6).

11. Ӕносон царди фӕрци цӕхуӕн фадуӕттӕ фӕззиндзӕй? (Кӕсӕ ма хузӕмӕ.)

¹¹ Нӕ бон ма ӕй Минанзон хецаудзийнадӕ ку фӕууа, уӕд ци хабӕрттӕ цӕудзӕй, уомӕ дӕр ӕркӕсун. Библий финст ӕй, не Сфӕлдесӕг «адӕнӕн сӕ зӕрдити [ке] ниввардта ӕносон цард» (Еккл. 3:11). Расагъӕс кӕнӕ, е куд рабӕрӕг уодзӕй дӕубӕл ӕма дин Йегови хӕццӕ ци лимӕндзийнадӕ ес, уобӕл дӕр. Нӕ киунугутӕй еуеми финст ӕй: «Дӕ цӕститӕбӕл рауайун кӕнӕ, нӕуӕг дуйне нӕбӕл  сӕдӕ анзи, мин анзи, милиуан анзи кенӕ миллиард анзи ку рацӕуа, уӕд Йегови абони куд зонӕн, уомӕй цӕйбӕрцӕбӕл хуӕздӕр зондзиан. Фал ма уӕддӕр нӕ бон уодзӕй Йегови туххӕй нӕуӕг цидӕртӕ базонун. [...] Ӕносон цард дессаги цард уодзӕй. Алли бон дӕр нӕбӕл берӕ аллихузи зӕрдӕмӕдзӕугӕ хабӕрттӕ цӕудзӕй ӕма си ӕнкъард некӕд кӕндзиан. Тӕккӕ сӕйрагдӕр ба е ӕй, ӕма нӕ бон уодзӕй нӕ уӕларвон Фиди бонӕй-бонмӕ хуӕздӕр зонгӕ цӕун» d. Цума абони ба Библи ’ртасгӕй нӕ бон ӕй нӕуӕг еститӕ базонун?

12. Уӕлӕрвти ци хабӕрттӕ цӕуй, уони фӕууинунмӕ нин ци банхус кӕндзӕй? Ӕрхӕссӕ цӕветтон.

¹² Хуцауи Дзурди фӕрци нӕ бон ӕй нӕ цӕститӕбӕл рауайун кӕнун, «бӕрзонди» ка цӕруй, еци Хуцауи фарсмӕ лӕуун куд ӕй, уой (Ис. 33:5). Библи нин Йегови ӕма ӕ организаций уӕларвон хаййи туххӕй берӕ аллихузи листӕг хабӕрттӕ ӕргом кӕнуй (Ис. 6:1–4; Дан. 7:9, 10; Рарг. 4:1–6). «Арв [ку] райгон ӕй» уӕд Йезекил ци цӕстӕбӕлуайӕн фӕууидта, айдагъ е дӕр цӕй аргъ ӕй (Йез. 1:1).

13. Киристе уӕлӕрвти ци куст кӕнуй, уомӕн цӕмӕн аргъ кӕнис (Дзиуиттӕгтӕмӕ 4:14–16).

¹³ Гъӕйдӕ нур ба расагъӕс кӕнӕн, Киристе уӕлӕрвти цӕхуӕн бунат ахӕссуй, уобӕл. Е ӕй Паддзах ӕма фӕлмӕнзӕрдӕ Хестӕр саугин. Уой фӕрци нӕ бон ӕй, «устур хуарзӕнхӕ кӕмӕй цӕуй, уой паддзахбадӕнмӕ» хӕстӕг кӕнун. Ӕндӕр дзурдтӕй, нӕ бон ӕй Хуцаумӕ ковун ӕма ибӕл федарӕй ӕууӕндун, фӕлмӕнзӕрдӕ нӕмӕ ке уодзӕй ӕма нин «багъӕуагӕ сахат» ке банхус кӕндзӕй. (Бакӕсӕ Дзиуиттӕгтӕмӕ 4:14–16.) Гъӕйдӕ мадта нӕбӕл еунӕг бон дӕр ма райевгъуйӕд, цӕмӕй, Йеговӕ ӕма Киристе мах туххӕй ци искодтонцӕ ӕма ма абони дӕр ци кӕнунцӕ, уобӕл ма расагъӕс кӕнӕн. Етӕ нӕ куд берӕ уарзунцӕ, е гъӕуама мах дӕр разӕнгард  кӕна, цӕмӕй сӕ гъе уотӕ уарзӕн ӕма син ӕгас зӕрдӕй лӕггадӕ кӕнӕн (2 Кор. 5:14, 15).

14. Йеговӕ ӕма Киристейӕй хъӕбӕр боз ке ан, уой нӕ бон куд ӕй бавдесун? (Кӕсӕ ма хузӕмӕ.)

¹⁴ Хуцауи ӕма ӕ Фурти ке уарзӕн, уой бавдесунмӕ ма тӕккӕ хуӕздӕр фадуат ӕй, иннӕ адӕнӕн ӕнхус кӕнун, цӕмӕй исуонцӕ Йегови Ӕвдесӕнтӕ ӕма Киристей фӕдбӕлдзӕугутӕ (Матф. 28:19, 20). Апостол Павел дӕр уотӕ архайдта, уомӕн ӕма Хуцауӕй ӕма Киристейӕй хъӕбӕр боз адтӕй. Е ӕй зудта, Йегови ке фӕндуй, «цӕмӕй аллихузи адӕн, рӕстдзийнадӕ ци ӕй, уой базононцӕ ӕма фӕййервӕзонцӕ» (1 Тим. 2:3, 4). Павел е ’гас хъауритӕ дӕр лӕггадӕ кӕнунмӕ исаразта ӕма хуарз хабар игъосун кодта, ӕ бон кӕмӕндӕриддӕр адтӕй, уонӕн. Уомӕ гӕсгӕ ӕ бон адтӕй федарӕй зӕгъун: «Аллихузи адӕнӕн дӕр исдӕн алцидӕр, цӕмӕй ести хузи еуӕй-еуети уӕддӕр фӕййервӕзун кӕнон» (1 Кор. 9:22, 23).

15. Псалом 1:2 финст дзурдтӕмӕ гӕсгӕ адӕймаги амондгун ци кӕнуй?

¹⁵ Псаломзаргӕнӕг ниффинста, амондгун ӕма ӕнтӕстгун адӕймаг цӕхуӕн фӕууй, уой: «Еци адӕймагӕн цийнӕдзийнадӕ хӕссуй Йегови закъон, ӕма ин ӕ закъон ӕхсӕвӕй-бонӕй кӕсуй сабур гъӕлӕсӕй» (Пс. 1:1–3). Еу Библи тӕлмацгӕнӕг Джозеф Ротергам, аци стихи ци адӕймаги туххӕй дзурд цӕуй, уой туххӕй загъта: «Е Хуцауи амундтӕ гъе уотӕ берӕ уарзуй, ӕма сӕ агорун райдайуй, фертасуй сӕ ӕма сӕбӕл берӕ рӕстӕг фӕссагъӕс кӕнуй. [...] ...Бони кӕрон ӕ бон уотӕ зӕгъун ку нӕ уа, ӕма Библи хуӕздӕр лӕдӕруй, уӕд еци бон дзӕгъӕли рацудӕй». Библий берӕ аллихузи листӕг хабӕрттӕ финст ес, ӕма еци хабӕрттӕ кӕрӕдзей хӕццӕ куд баст ӕнцӕ, уой ӕртасун хъӕбӕр цӕмӕдесаг фӕууй. Ӕцӕгӕйдӕр, хъӕбӕр ӕхцӕуӕн фӕууй Хуцауи Дзурд лӕмбунӕг ӕртасун ӕма берӕ нӕуӕг цидӕртӕ базонун.

16. Иннӕ статьяй цӕмӕ ӕркӕсдзиан?

¹⁶ Йеговӕ нин ӕ Дзурди ӕргом кӕнуй берӕ арф гъудитӕ. Ӕма кӕмӕдӕр, ка ’й зонуй, уотӕ кӕсуй, ӕма сӕ ӕ бон балӕдӕрун некӕд исуодзӕй. Фал уотӕ гъуди кӕнун раст нӕ уодзӕй. Иннӕ статьяй ӕркӕсдзиан уӕхӕн арф гъудитӕй еуемӕ: Йегови устур ӕнӕуингӕ ковӕндонӕ. Уой туххӕй апостол Павел финста ӕ финстӕги Дзиуиттӕгтӕмӕ. Нифс нӕ ес, еци статья ӕртасун уин ӕхцӕуӕн ке уодзӕй.