1, 2. ¿Te di debe gä pe̱fihu̱ ora di nxadihu̱ rä Mäkä Tꞌofo? Mää nꞌa rä ejemplo.

 IMÄJINÄ ge gi ne gi tai nꞌa rä nguu. ¿Te di debe gi pe̱fi? ¿Mäntꞌä ma gi tai mu̱ ho̱nse̱ gä handi nꞌa rä foto de näꞌä nguu? Hinä. Zäi ge mꞌe̱tꞌo ma gi ma guä handi tenguꞌä näꞌä rä nguu, ꞌne ma gi hyandi hanja xä thoki tanto de thi, de mboo ꞌne asta ha yä tsꞌätꞌi näꞌä rä nguu.

² Geꞌä di debe gä pe̱fihu̱ ora di nxadihu̱ rä Mäkä Tꞌofo. Nꞌa rä pa, nꞌa rä jäꞌi bi ꞌñenä ge rä Mäkä Tꞌofo ꞌñenä ngu nꞌa rä to̱nꞌgu xi rä dängi näꞌä xä tꞌakuäbi yä däta simiento. ¿Pe hanja dä za gä pädihu̱ ꞌne gä ntiendehu̱ gatꞌho näꞌä udi rä Mäkä Tꞌofo? Ora di nxadihu̱ rä Mäkä Tꞌofo, mähyoni gä hudihu̱ ꞌne gä nxadihu̱ rꞌamätsꞌu̱u̱ pa gä handihu̱ te ne dä ꞌñutkägihu̱ Äjuä. Ngeꞌä mu̱ di nxadihu̱ de gä so̱ni rä Mäkä Tꞌofo, ho̱nse̱ ma gä logra gä ntiendehu̱ nuꞌu̱ yä tꞌo̱tꞌe «hingi hei» (Heb. 5:12). Ja ngu ora di ne gä taihu̱ nꞌa rä nguu, mꞌe̱tꞌo di handihu̱ xä ñho hanja xä thoki tanto po mboo, po thi ꞌne asta ha yä tsꞌätꞌi. Njabu̱ ꞌnehe ora di nxadihu̱ rä Mäkä Tꞌofo. Ora di hetihu̱ nꞌa rä testo, pe̱ꞌtsi te di debe gä handihu̱ hanja nuꞌu̱ yä testo di nthe̱e̱ ko märꞌaa ꞌne te ne dä ꞌñutkägihu̱ Äjuä. Hänge yꞌo̱tꞌe ntsꞌe̱di po gi ntiende te udi rä Mäkä Tꞌofo. Pe hingä ho̱nse̱ꞌä, ꞌnehe mähyoni gi yꞌo̱tꞌe ntsꞌe̱di po gi hyandi te mä raso gi pe̱ꞌtsi pa gi kamfri näꞌä udi rä Mäkä Tꞌofo.

3. ¿Te mä konseho bi umbäbi rä apostol Pablo nuꞌu̱ yä mu̱di kristianu, ꞌne por hanja? (Efesios 3:​14-19).

³ Pa gä ntiendehu̱ xä ñho näꞌä udi rä Noya Äjuä, mähyoni gä nxadihu̱ ꞌnehe nuꞌu̱ yä ntꞌudi xä ñhei. Rä apostol Pablo bi animäbi nuꞌu̱ yä mu̱di kristianu dä nxadi rä Mäkä Tꞌofo ko ngatꞌho yä ganä, pa njabu̱ nuꞌu̱ xä bädi «xä ñho ndaꞌä rä nxidi, rä maa, rä ñhetsꞌi ꞌne rä ñhee» de näꞌä udi rä Noya Äjuä. Toꞌo bi me̱fi njabu̱, bi zo̱ho̱ bi gamfri näꞌä bi ꞌñudi rä Kristo ꞌne yä komfiansa po Äjuä xa bi ze̱di ngu nꞌa rä simiento näꞌä hinto bi za bi ꞌñäni (hñeti Efesios 3:​14-19, TNM). Mäpaya, nuju̱ ꞌnehe di debe gä jamäsuhu̱ näꞌä rä tsꞌofo  bi umbäbi rä apostol Pablo nuꞌu̱ yä mu̱di kristianu. Ma gä handihu̱ hanja mu̱ gä nxadihu̱ rä Mäkä Tꞌofo ko ngatꞌho mä ganähu̱, ma gä lograhu̱ gä ntiendehu̱ näꞌä ne dä ꞌñutkägihu̱ Äjuä.

4. ¿Te dä hogi gi pe̱fi pa mänꞌa gi joni ko rä Zi Dada Jeoba? Mää rꞌa yä ejemplo.

⁴ Nuju̱ di pe̱päbihu̱ rä Zi Dada Jeoba, hindi komformähu̱ ko ho̱nse̱ gä pädihu̱ nꞌa tu̱i de rä Mäkä Tꞌofo. Ngeꞌä di pädihu̱ ge ko rä mfatsꞌi näꞌä rä mäkä tsꞌe̱di Äjuä, dä za gä ntiendehu̱ asta nuꞌu̱ yä ntꞌudi xä ñhei (1 Cor. 2:​9, 10). Hänge dä hogi gi ꞌueke rä tiempo pa gi nxadi rä Mäkä Tꞌofo ꞌne gi hyoni näꞌä rä imformäsio gi handi ge ma dä jaꞌi gi joni mä nꞌa tu̱i ko rä Zi Dada Jeoba. Por ejemplo, pa gi hyandi hanja rä Zi Dada Jeoba di mäꞌi, dä hogi gi imbestiga ha rä Mäkä Tꞌofo hanja bi ꞌñudi rä mhäte rä Zi Dada Jeoba pa ko nuꞌu̱ yä ꞌme̱go de mäyaꞌmu̱. ꞌNehe dä hogi gi imbestiga hanja mi ꞌmu̱i organisado rä hnini rä Zi Dada Jeoba de mäyaꞌmu̱ ꞌne gi kompara hanja ꞌmu̱i organisado mäpaya. O dä hogi gi imbestiga hanja näꞌä xki mängä rä Noya Äjuä dende mäyaꞌmu̱ de rä Mesías, geꞌä bi me̱fi ꞌne bi thogi ko rä Hesu mi mꞌu̱kua ha rä Xiꞌmhai.

5. Xi nuꞌi, ¿ngu te mä ntꞌudi dä za gi imbestiga ha rä Mäkä Tꞌofo näꞌä gi handi ge ma dä japi dä te ri ntsitsꞌi ko rä Zi Dada Jeoba?

⁵ Rꞌa yä ku nuꞌu̱ xa di ho dä nxadi rä Mäkä Tꞌofo bi tꞌambäbi te mä ntꞌudi de rä Mäkä Tꞌofo xä nxadi. Nuꞌu̱ yä ku bi no̱ni rꞌa de gehya ha rä rekuadro « Näꞌä imformäsio dä hogi gi imbestiga ha rä Mäkä Tꞌofo». Mu̱ nuꞌi gi huahni rꞌa de nuya yä ntꞌudi pa gi nxadi rä Mäkä Tꞌofo ko rä mfatsꞌi rä Índice de las publicaciones Watch Tower ꞌne rä Guía de estudio para los testigos de Jehová, gi nuhmä ge mänꞌa ma gi ntiende näꞌä udi rä Mäkä Tꞌofo ꞌne ri ntsitsꞌi ko rä Zi Dada Jeoba mänꞌa ma dä te (Prov. 2:​4, 5). Ma gä handihu̱ rꞌa yä ntꞌudi xä ñhei nuꞌu̱ dä za gä ntiendehu̱ ko rä mfatsꞌi rä Zi Dada Jeoba.

6. a) ¿Por hanja dä za gä eñhu̱ ge hingä mähye̱gi näꞌä di planea dä me̱fi yä jäꞌi ko näꞌä di promete dä me̱fi Äjuä? b) ¿Por hanja dä za gä eñhu̱ ge näꞌä xä promete dä me̱fi rä Zi Dada Jeoba pa yä jäꞌi ꞌne pa rä Xiꞌmhai ma dä dura pa nzäntho? (Efesios 3:11).

⁶ Ma gä handihu̱ te mää rä Mäkä Tꞌofo de nuꞌu̱ yä promesa Äjuä. Xa mähyoni gä dahu̱ ngue̱nda  ge hingä mähye̱gi näꞌä xä beni dä me̱fi yä jäꞌi ko näꞌä xä promete dä me̱fi Äjuä. Por ejemplo, nꞌa rä jäꞌi dä za dä planea o dä za dä beni dä ma ha nꞌa rä luga, pe mu̱ ja te bi thogi mä ꞌñuu, näꞌä jäꞌiꞌä ya hingä ma dä za dä tso̱ni ha näꞌä rä luga xki beni. ¡Pe hingi njabu̱ ko rä Zi Dada Jeoba! Ngeꞌä hindi mporta te thogi, Näꞌä di kumpli gatꞌho näꞌä di promete. Hängu di jamädibihu̱ rä Zi Dada Jeoba ngeꞌä po mäde de rä Mäkä Tꞌofo, xä xikägihu̱ rꞌamätsꞌu̱u̱ te ma dä me̱fi xudi ndämäni (Efes. 3:11). Rä Zi Dada Jeoba hinto häkuäbi dä me̱fi gatꞌho näꞌä di promete, ngeꞌä go geꞌä «xä hyoki gatꞌho yä tꞌo̱tꞌe» (Prov. 16:4). Pe hingä ho̱nse̱ꞌä, rä Zi Dada Jeoba dä za dä japäbi dä dura pa nzäntho näꞌä hoki. ¿Pe te xä promete rä Zi Dada Jeoba ꞌne te mä mpadi xä ja pa dä kumpli nuꞌu̱ yä promesa?

7. ¿Te bi desidi bi me̱fi rä Zi Dada Jeoba nuꞌmu̱ Adán ꞌne Eva bi ku̱ꞌti rä pekado nuua ha rä Xiꞌmhai? (Mateo 25:34).

⁷ Äjuä bi xipäbi näꞌä rä mu̱di ñꞌo̱ho̱ ꞌne näꞌä rä mu̱di ꞌme̱hñä pa te xki hyoki ꞌne xki ꞌñegiua ha rä Xiꞌmhai nuꞌmu̱ bi ꞌñembäbi: «Pe̱ꞌtsihu̱ yä bätsi ꞌne ndunthihu̱. Ñuꞌtsihu̱ rä xiꞌmhai ꞌne suhu̱, ꞌne dä yꞌo ha ri yꞌe̱hu̱ [ . . . ] gatꞌho nuꞌu̱ ꞌmu̱ ha rä xiꞌmhai ꞌne ja yä te» (Gén. 1:28). Mäjuäni ge nuꞌmu̱ Adán ꞌne Eva bi desidi hindä yꞌo̱te näꞌä rä mhända xki uni rä Zi Dada Jeoba, nuꞌu̱ bi ku̱ꞌti rä pekado ha rä xiꞌmhai. Pe mäske bi thogi njabu̱, rä Zi Dada Jeoba bi hyoni mä nꞌa rä modo de hanja dä kumpli näꞌä bi promete. Näꞌä mäntꞌä bi desidi dä hñutsꞌi nꞌa rä Gobiernu ha mähetsꞌi pa dä me̱fi näꞌä mi beni dende ri mu̱di ko yä jäꞌi ꞌne rä Xiꞌmhai (hñeti Mateo 25:34). Mi thogi rä tiempo, rä Zi Dada Jeoba bä pe̱hni rä Hmäkä Tꞌu̱ nuua ha rä Xiꞌmhai pa dä ꞌñuti yä jäꞌi de näꞌä rä Gobiernu, ꞌne pa bi uni rä bida ꞌne njabu̱ bi gutꞌi mä pekadohu̱ ꞌne bi ñängägihu̱ de rä du. Nuꞌmu̱ rä Zi Dada Jeoba bi gu̱tsꞌi de rä du rä Hesu pa bi mengi ha mähetsꞌi, bi hñutsꞌi ngu nꞌa rä Rey de näꞌä rä Gobiernu. Pe jabu̱ märꞌa yä däta tꞌo̱tꞌe näꞌä ma dä me̱fi rä Zi Dada Jeoba ꞌne di debe gä e̱ntꞌihu̱ ha mä mfenihu̱ ꞌne ha mä korasohu̱.

8. a) ¿Te ne dä ꞌñudi rä Biblia principalmente? b) Ja ngu di handihu̱ ha Efesios 1:​8-11, ¿te mä nꞌa ma dä me̱fi rä Zi Dada Jeoba aparte de näꞌä rä Paraiso ma dä hää nuua ha rä Xiꞌmhai? (Hyandi rä kꞌoi de rä mu̱di nxii).

⁸ Rä Mäkä Tꞌofo bi thoki principalmente pa dä ꞌñudi hanja rä Zi Dada Jeoba ma dä nsunda ꞌne ma dä japi dä tꞌaxki rä thuhu ora xti kumpli nuꞌu̱ yä promesa ha rä Xiꞌmhai po mäde de näꞌä rä Gobiernu o ha rä yꞌe̱ rä Kristo. Hinto ma dä hñäkuäbi rä Zi Dada Jeoba de dä me̱fi näꞌä bi mää dende ri mu̱di. Näꞌä ma dä kumpli gatꞌho näꞌä xä promete (Is. 46:​10, 11, ꞌne yä nota; Heb. 6:​17, 18). Ya hindi ꞌme̱di ndunthi habu̱ rä Gobiernu Äjuä, ma dä hyoki nꞌa rä Paraiso nuua ha rä Xiꞌmhai habu̱ ma dä mꞌu̱i nuꞌu̱ yä jäꞌi pe̱päbi rä Zi Dada Jeoba ꞌne ma dä me̱ꞌtsi nꞌa rä te pa nzäntho (Sal. 22:26). Pe hingä ja kꞌabu̱tho, rä Zi Dada Jeoba ma dä japäbi ge tanto nuꞌu̱ bi ꞌmu̱i ha mähetsꞌi ngu nuꞌu̱ ꞌmu̱i ha rä Xiꞌmhai dä zo̱ho̱ dä nja nꞌadä rä familia nuꞌu̱ ma dä mꞌu̱i unido, ꞌne gatꞌho ma dä rekonose ge ho̱nse̱ rä Zi Dada Jeoba go Geꞌä pe̱ꞌtsi gatꞌho rä autorida, ꞌne go Geꞌä ri ꞌñepäbi dä mändagihu̱ ꞌne dä xikägihu̱ te debe gä pe̱fihu̱ (hñeti Efesios 1:​8-11, TNM). ¿Hänge xi xä nsundatho ꞌne xi nꞌa rä däta jäpi gä pädihu̱ hanja rä Zi Dada Jeoba di kumpli näꞌä xä promete?

9. ¿Te gatꞌho ma gä pädihu̱ mu̱ gä nxadihu̱ rä Mäkä Tꞌofo?

⁹ Ha Génesis 3:15 b di handihu̱ hanja ha rä jardin de Edén, rä Zi Dada Jeoba bi mää näꞌä ma xä thogi mꞌe̱fa. Näꞌä bi no̱ni rꞌa yä tꞌo̱tꞌe nuꞌu̱ ma xä thogi pa xä kumpli nuꞌu̱ yä promesa. Nuya yä tꞌo̱tꞌe hingä ma xä thogi mäntꞌä, sino asta rꞌa yä mꞌo yä je̱ya mꞌe̱fa. Ko rä tiempo, nꞌa de nuya yä tꞌo̱tꞌe bi nheki; eske de rä familia Abrahán ja bä eheni rä Kristo o Mesías (Gén. 22:​15-18). Mi thogi ndunthi yä je̱ya —po rä je̱ya 33— rä Hesu bri u̱mbäbi rä du̱ngua ja ngu xki mängä rä Zi Dada Jeoba  ha Génesis 3:15 (Hech. 3:​13-15). Pe tobe kohi thogi de 1.000 yä je̱ya pa dä thogi näꞌä mänꞌa rä tꞌo̱tꞌe no̱ni ha Génesis 3:15. Hää, nubye̱ ma drä nheꞌtuäbi rä ñäxu rä Zithu (Apoc. 20:​7-10). Pe rä Mäkä Tꞌofo uni mä ndunthi yä detalle de te ma dä thogi änte de dä zo̱ho̱ näꞌä rä däta tuhni rä thuhu Armagedón habu̱ rä Zithu ko nuꞌu̱ yä u̱xjua ma dä nju̱tsꞌi kontra rä hnini rä Zi Dada Jeoba.

10. a) ¿Te ma dä thogi mänꞌitꞌho? b) ¿Hanja dä za gä ñhokihu̱ dende nubye̱ änte dä ꞌñepu̱ gatꞌho nuya yä tꞌo̱tꞌe? (Hyandi rä nota).

¹⁰ Ma gä benihu̱ näꞌä mängä rä Mäkä Tꞌofo ge ma dä thogi. Ma dä zo̱ho̱ rä pa habu̱ yä dähni o yä gobiernu ma dä ꞌñenä: «¡Por fin bi zo̱ho̱ nꞌa rä mꞌu̱i temäꞌentho!» (1 Tes. 5:​2, 3, TNM). Pe xti «dämfri» yä jäꞌi, ma dä xotꞌi nꞌa rä däta mbidi habu̱ yä gobiernu ma dä mu̱di dä huati nuꞌu̱ yä hyate relijion (Apoc. 17:16). ꞌNepu̱ rä Mäkä Tꞌofo enä: «Rä Tꞌu̱ rä Mexiꞌmhai ma dä ꞌñehe ha yä gui ko ndunthi rä tsꞌe̱di ꞌne rä nsunda». Hää, tal vez ma dä nheki rꞌa yä tꞌo̱tꞌe nuꞌu̱ nunka xä nheki tanto ha mähetsꞌi ngu ha rä Xiꞌmhai (Mat. 24:​30, TNM). Nubye̱ rä Hesu —ngu nꞌa rä nzaya— ma dä yꞌapäbi ngue̱nda gatꞌho yä jäꞌi ꞌne ma dä ꞌueke nꞌa lado tanto nuꞌu̱ xä porta ngu yä zi de̱ti, ꞌne mä nꞌa lado nuꞌu̱ xä porta ngu yä tꞌäxi (Mat. 25:​31-33, 46). Pe rä Zithu hingä ma dä pontꞌätho yä yꞌe̱. Ko ndunthi rä kue̱ ma dä japäpi Gog de la tierra de Magog (o sea yä gobiernu), pa nubye̱ dä ne dä huatuäbi rä hnini rä Zi Dada Jeoba (Ezeq. 38:​2, 10, 11). Durante näꞌä rä däta mbidi, nuꞌu̱ to̱ꞌmi dä mända ko rä Kristo —pe tobe di mꞌu̱kua ha rä Xiꞌmhai— ma dä tsꞌitsꞌi ha mähetsꞌi pa mähye̱gi ko rä Kristo dä ntuhni ha näꞌä rä gerra rä thuhu Armagedón. Rä Kristo ko ngatꞌho nuꞌu̱ di mfaxhui, ma dä ntäte ha nunä tuhni ꞌne ja gekua ma dä uadi näꞌä rä däta mbidi o tribulación (Mat. 24:31; Apoc. 16:​14, 16). c Nubye̱ hää, rä Kristo ma dä mu̱di dä mända nuua ha rä Xiꞌmhai po 1.000 yä je̱ya (Apoc. 20:6).

11. Xi nuꞌi, ¿dä za gi imäjinä hanja ma gi mꞌu̱i ha rä Paraiso durante nuꞌu̱ yä mꞌotho yä je̱ya xä ꞌñepu̱? (Hyandi ꞌnehe yä foto).

¹¹ Ja ngu ya dä handihu̱, rä Kristo ma dä mända po nꞌa mꞌo yä je̱ya nuua ha rä Xiꞌmhai. ¿Dä za gi imäjinä hanja ma gä ꞌmu̱ihu̱ durante nuꞌu̱ yä  je̱ya ma dä ꞌñepu̱ mꞌe̱fa? Rä Mäkä Tꞌofo enä ge Äjuä xä hñuꞌspäbi «ha yä koraso [yä jäꞌi] dä ne dä mꞌu̱i pa nzäntho» (Ecl. 3:11). ¿Dä za gi imäjinä hängu yä jäpi ma gi pe̱ꞌtsi ꞌne te mä ntsitsꞌi ma gi pe̱ꞌtsi ko rä Zi Dada Jeoba? Ha rä mfistꞌofo Acerquémonos a Jehová ha rä nxii 319 enä: «Koꞌmu̱ ma gä mꞌu̱ihu̱ yä mꞌotho ꞌne yä miyontho yä je̱ya, mänꞌa ma gä pädihu̱ xi ndunthi de rä Zi Dada Jeoba ke näꞌä di pädihu̱ mäpaya. Mäske njabu̱, nunka ma gä huadihu̱ gä pädihu̱ de Geꞌä. Hää, hingi tsa gä imäjinähu̱ gatꞌho näꞌä ma dä nja ha rä Paraiso ꞌne näꞌä rä mꞌu̱i ma gä pe̱ꞌtsihu̱. Otho rä duda ge de gatꞌho näꞌä ma gä pe̱fihu̱ ha rä Paraiso, näꞌä rä ntsitsꞌi ma gä pe̱ꞌtsihu̱ ko rä Zi Dada Jeoba geꞌä ma dä nja xi mähotho». Pe mientra di to̱ꞌmihu̱ dä zo̱ho̱ näꞌä rä pa, ¿ngu te mä nꞌa dä za gä imbestigahu̱ ha rä Noya Äjuä?

12. ¿Te mä nꞌa utkägihu̱ rä Mäkä Tꞌofo? Mää nꞌa rä ejemplo.

¹² Rä Mäkä Tꞌofo faxkägihu̱ pa gä imäjinähu̱ nꞌa tu̱i tenguꞌä rä nsunda rä Zi Dada Jeoba ha mähetsꞌi (Is. 33:5). Hää, rä Mäkä Tꞌofo utkägihu̱ hängu näꞌä rä däta nsu bi pe̱ꞌtsi ha mähetsꞌi rä Zi Dada Jeoba ꞌne nuꞌu̱ yä e̱nxe̱ (Is. 6:​1-4; Dan. 7:​9, 10; Apoc. 4:​1-6). Por ejemplo, ha rä Mäkä Tꞌofo di tinihu̱ näꞌä bi mängä rä profeta Ezequiel nuꞌmu̱ bi ꞌñenä ge nꞌa rä pa bi hyandi hanja bi xogi mähetsꞌi ꞌne bi hyandi tenguꞌä rä nsunda Äjuä (Ezeq. 1:1).

13. Ora di hetihu̱ te mää Hebreos 4:​14-16, ¿ndaꞌä mänꞌa gi ho de gatꞌho näꞌä bi pe̱fi rä Hesu ha mähetsꞌi?

¹³ Nubye̱ ma gä imäjinähu̱ näꞌä bi pe̱fi rä Hesu ha mähetsꞌi ngu nꞌa rä Rey ꞌne nꞌa rä Ndä gä Majhä. Po mäde de rä Hesu dä za gä xatuäbihu̱ Äjuä pa dä ꞌñudi rä huekäte kongekhu̱ ꞌne pa dä maxkägihu̱ (hñeti Hebreos 4:​14-16). Kada thogi nꞌa rä pa, mähyoni gä benihu̱ ꞌne gä balorahu̱ gatꞌho näꞌä pe̱fi rä Zi Dada Jeoba ꞌne rä Hesu po gekhu̱ dende mähetsꞌi. Näꞌä rä mhäte pe̱skägihu̱, geꞌä di debe dä jakägihu̱ gä pe̱päbihu̱ rä Zi Dada Jeoba ko ngatꞌho mä ganähu̱ ꞌne mä korasohu̱ (2 Cor. 5:​14, 15).

14. ¿Te dä za gä pe̱fihu̱ pa gä udihu̱ ge di jamädibihu̱ rä Zi Dada Jeoba ꞌne rä Hesu po gatꞌho näꞌä xä me̱fi po gekhu̱? (Hyandi ꞌnehe yä foto).

 ¹⁴ ¿Ngu te dä za gä pe̱fihu̱ pa gä udihu̱ ge di jamädibihu̱ rä Zi Dada Jeoba ꞌne rä Hesu po gatꞌho näꞌä pe̱fi po gekhu̱? Xa mähyoni gä fatsꞌihu̱ märꞌaa pa ꞌnehe dä me̱päbi rä Zi Dada Jeoba ꞌne dä de̱mbäbi yä paso rä Hesu (Mat. 28:​19, 20). Geꞌä bi me̱fi rä apostol Pablo pa bi ꞌñudi hängu mi jamädibi rä Zi Dada Jeoba ꞌne rä Kristo. Näꞌä mi pädi xä ñho ge rä bolunta rä Zi Dada Jeoba eske yä jäꞌi dä bädi näꞌä xa mäjuäni de Geꞌä ꞌne dä za dä salba yä bida (1 Tim. 2:​3, 4). Po geꞌä, rä apostol Pablo xa bi yꞌo̱tꞌe ntsꞌe̱di ꞌne bi usa de rä tiempo pa bi ꞌñuti de rä Noya Äjuä gatꞌho nuꞌu̱ yä jäꞌi mi nthe̱ui (1 Cor. 9:​22, 23).

15. Ja ngu di handihu̱ ha Salmo 1:​2, ¿habu̱ dä za gä tinihu̱ näꞌä xa mäjuäni rä johya?

¹⁵ Nꞌa de nuꞌu̱ yä yꞌofo de rä mfistꞌofo Salmo bi ꞌñenä ge nꞌa rä jäꞌi näꞌä «mä pa rä xui nxadi rä ley [Ajuä] ꞌne hudi ntso̱ꞌmi», geꞌä rä jäꞌi tini näꞌä xa mäjuäni rä johya (Sal. 1:​1-3). Nꞌa rä pa, nꞌa rä bämhñä bi ꞌñenä: «Nꞌa rä jäꞌi näꞌä di ho nuꞌu̱ yä konseho bi ehe de Äjuä, geꞌä di ho dä nxadi te udi rä Mäkä Tꞌofo, di mepye̱ ꞌne honi hanja dä me̱fi nuꞌu̱ yä konseho uni [ . . . ]. Mu̱ bi uadi nꞌa pa ꞌne hinto bi hñeti rä Mäkä Tꞌofo, ꞌñenä go bi ꞌme̱ditho rä pa» (Studies in the Psalms, Joseph Rotherham). Mu̱ nuꞌi gi ꞌueke rä tiempo pa gi nxadi rä Mäkä Tꞌofo, ma gi hyandi ge geꞌä ma dä rꞌaꞌi ndunthi rä johya. ꞌNehe, ma gi pädi gatꞌho näꞌä udi ꞌne ma gi hyandi hanja nuꞌu̱ yä ntꞌudi ꞌne yä testo di nthe̱ ko märꞌaa.

16. ¿Te ma gä nxadihu̱ ha näꞌä rä ntꞌudi xä ꞌñepu̱?

¹⁶ Gatꞌho yä jäꞌi dä za dä ntiende näꞌä udi rä Zi Dada Jeoba ha rä Mäkä Tꞌofo. Ha näꞌä rä ntꞌudi xä ꞌñepu̱ ma gä pädihu̱ te di signifika näꞌä rä mäkä templo bi no̱ni rä apostol Pablo ha rä mfistꞌofo Hebreos. Otho rä duda ge ma gä tinihu̱ ndunthi rä johya de gä nxadihu̱ nunä rä däta ntꞌudi.