1-2. Panon so dapat ya pambasa tan panaral na Biblia pian natalo-talosan tayon maong? Mangiter na ilustrasyon.

 IMADYIN mo pa ya planom ya saliwen so sakey ya abung. Antoy gawaen mo antis mon saliwen? Kasin kontento ka la ya nanengneng mo labat itan ed litrato? Siempre andi. Seguradon onla kan mismo ed samay abung, i-check moy amin ya kuarto, inspeksionen moy inkagawa to, tan nengnengen moy amin ya sukong. Ompan labay mo ni ingen ya nengnengen so blueprint o plano na satan ya abung. Anggad nayari et labay mon amtaen so amin ya detalye antis mon saliwen.

² Ontan met dapat so nepeg tayon gawaen no babasaen tan aaralen tayoy Biblia. Walay Bible scholar ya inkompara toy Biblia ed “atagtagey tan maawa-awang ya bilding ya aralem so pundasyon to.” No say Biblia et singa sakey ya bilding, anto sirin so gawaen mo pian nanengneng moy amin ya sukong to? No mapmaples mon basaen, ompan say naaralan mo labat et saray manunan bangat. (Heb. 5:12) Singa samay ilustrasyon tungkol ed abung, kailangan mo met ya amtaen so amin ya detalye ed Biblia pian natalosan mon maong. Legan mo sirin ya babasaen tan aaralen so Biblia, nengneng mo no panon ya mankokonektaan iray katuaan ya wadtan. Aliwan sapat ya antam no anto ray katuaan ya walad Biblia. Dapat natatalosan mo met no akin ya panisiaan mo iratan.

3. Antoy impaseseg nen apostol Pablo ed saray kapara ton Kristiano nen inmunan siglo, tan akin? (Efeso 3:14-19)

³ Pian natalosan tayoy amin ya detalye ed Biblia, kaukolan tayon aralen iray aralem ya katuaan ya wadtan. Pinaseseg nen apostol Pablo iray kapara ton Kristiano nen inmunan siglo ya makuli dan aralen so Salita na Dios pian “sigpot [dan] natalosan  so kaawang tan karukey tan kaatagey tan kaaralem” na katuaan. Imbaga to ya no ontan so gawaen da, “nilamot tan niletneg” so pananisia ra. (Basaen so Efeso 3:14-19.) Parad sikatayo met itan ya bilin. Nengnengen tayo sirin no panon tayon aralen so Salita na Dios pian natalo-talosan tayo.

4. Antoy gawaen tayo pian lalo tayon onapit ed si Jehova? Mangiter na alimbawa.

⁴ Agtayo labay ya ataptapew so pakatalos tayo ed Biblia. Pian lalo tayon onapit ed si Jehova, dapat aralen tayo iray “aralem a bengatlan nipaakar ed Dios.” Nagawaan tayo itan diad tulong na masanton espiritu. (1 Cor. 2:9, 10) Maabig sirin no walay study project mo. Singa bilang, manpili kay pigaran karakter na Biblia, insan i-research mo no panon ya impanengneng nen Jehova ya inar-aro to ra. Insan mo tepetay sarilim, ‘Akin et patunay iya ya inar-aro ak met nen Jehova?’ Sarag mo met ya i-personal study no antoy pamparehoan na panagdayew tayo natan ed panagdayew na saray Israelita nensaman. Tan ompan labay mo met ya aralen iray propesiya ya tinmua ed si Jesus nen sikatoy wadiad dalin.

5. Anton topic so labay mon i-research diad personal study’m?

⁵ Wala ray maaral ya agagi ya atepetan no anto ran aralem ya katuaan so labay dan i-personal study. Nanengneng so arum ya ebat da diad kahon ya “ Saray Topic ya Sarag Mon I-personal Study.” Seguradon na-enjoy mon aralen iratan ya topic no man-research kad Watch Tower Publications Index o diad Giya ed Pan-research na Saray Tasi nen Jehova. No aralen mo iray aralem ya katuaan ed Biblia, ombiskeg so pananisiam tan “naromog moy kakabatan nipaakar ed Dios.” (Pro. 2:4, 5) Pantongtongan tayo natan so pigaran alimbawa na aralem iran topic ed Biblia.

6. (a) Antoy pidumaan na plano ed gagala? (b) Akin et agmangangga so gagala nen Jehova parad dalin tan parad saray totoo?

⁶ Say sakey ya alimbawa na aralem ya katuaan ed Biblia et say gagala na Dios. Walay baleg  ya pidumaan na plano ed gagala. Say plano et singa espisipikon rota ya kailangan mon tumboken pian makasabi ka ed laen mo. Pero no legan kan manbiabiahe et wala manayay asaraan ya karsada, ompalpak so planom. Duma balet so gagala ta akapokus itan ed mismon destinasyon, tan nanduruman rota so sarag mon dalanen pian makaonla ka ditan. Kanian no asaraan so sakey ya karsada, sarag moy ondalan ed sananey ya rota. Say importante et makasabi ka ed laen mo. Ontan ya ontan so gagala nen Jehova. Maong labat ta impaisulat nen Jehova diad Biblia so “agmanganggan gagala to” tan no panon to itan ya kalkalnan susumpalen. (Efe. 3:11) “Pakukurangen [o gagawaen] nen Jehova so amin a bengatla pian nasumpal so gagala to.” (Pro. 16:4) Agmangangga so gagala nen Jehova ta say resulta na satan et mansiansia anggad angga. Anto so gagala nen Jehova, tan anto ran paraan so ginawa to pian nasumpal itan?

7. Nen nanrebelde si Adan tan Eva, antoy ginawa nen Jehova pian nasumpal nin siansia so gagala to? (Mateo 25:34)

⁷ Imbaga nen Jehova ed si Adan tan Eva no antoy gagala to parad sikara. Kuan to: “Manbunga kayo tan manparakel kayo, pano yoy dalin tan uleyan yo [so] amin a mabilay a pinalsa” diad dalin. (Gen. 1:28) Pero nanrebelde si Adan tan Eva tan impatawir dad ananak da so kasalanan. Kasin akahadlang itan ed gagala nen Jehova? Andi. Sikatoy nanggawan tampol na paraan pian nasumpal nin siansia so gagala to. Nandesisyon si Jehova ya mangiletneg na Panarian ed tawen. Atan ya gobierno so usaren to pian nasumpal so gagala to parad dalin tan parad saray totoo. (Basaen so Mateo 25:34.) Nen asabi lay inyeskedyul ton panaon, imbaki toy panguloan ya Anak to diad dalin pian ibangat iray totoo tungkol ed sayan Panarian tan iter toy bilay to pian nadondon so kasalanan tayo. Nen binilay nen Jehova si Jesus, pinmawil ed tawen ta sikato so apili ya Ari ed Panarian na Dios. Anto ni arum ya ibabaga na Biblia tungkol ed gagala nen Jehova?

8. (a) Anto so tema na interon Biblia? (b) Base ed Efeso 1:8-11, anto ni sankanonot nen Jehova ya gawaen to? (Nengnengen so litrato ed apis.)

⁸ Anto so manunan nalalanor ed gagala nen Jehova? Pasantosen to so ngaran to. Diad tua, atan so tema na interon Biblia. Pian nasumpal itan, usaren to so Panarian to ya say Ari et si Kristo. Agbalot manguman so gagala nen Jehova parad dalin. Ginarantiyaan to ya no antoy imbaga to et sumpalen to. (Isa. 46:10, 11, paimanod leksab; Heb. 6:17, 18) Kanian nagawan-nagawa so gagala to ya say dalin et magmaliw ya paraiso. Magmaliw ya perpekto iray matunong ya ananak nen Adan tan Eva. Tan ditan et “panliketan [da] so bilay ya anggad angga.” (Sal. 22:26) Pero wala ni sankanonot nen Jehova ya gawaen to​—pankasakeyen toy amin ya ananak to diad tawen tan diad dalin, tan matoor iran manpasakop ed sikato. (Basaen so Efeso 1:8-11.) No aralen mon maong so gagala nen Jehova tan no anto ray ginawa to pian nasumpal itan, seguradon pambiliban mo so Ama tayo ed tawen!

9. No basaen moy Biblia, anto ray singa nanenengneng mo la anggano agni iratan agawa?

⁹ Imanoen so propesiya ya imbaga nen Jehova diad hardin na Eden ya akarekord ed Genesis 3:15. b Imbaga to no anto ray nagawa pian nasumpal so gagala to. Pero linmabas ni libo-libon taon insan iratan agawa. Kaiba ed satan imay imbaga nen Jehova ed si Abraham  ya diad pamilya to so panlapuan na Mesias, say manunan ilalak na bii. (Gen. 22:15-18) Insan nen 33 C.E., nen inatey si Jesus, asumpal imay propesiya ya say ilalak et nasakitan o nasugatan ed mukor. (Gawa 3:13-15) Say panmekmek balet ed ulo nen Satanas et nagawa ni diad arapen​—palabasen tayo ni so masulok ya 1,000 ya taon. (Apo. 20:7-10) Pero antis to ’tan, dakel ni ibabaga na Biblia ya nagawa lapud busolan ed baetan na “uleg” tan “bii.”

10. (a) Anto ray asingsingger lan nagawa? (b) Antoy gawaen tayo pian niparaan tayo lay puso tan nonot tayo antis iratan ya nagawa? (Nengnengen so paimanod leksab.)

¹⁰ Seguradon nabigla so interon mundo no nagawa la ray impropesiya na Biblia. Unona, ideklara na saray bansa so “kareenan tan kaligenan!” (1 Tes. 5:2, 3) Atan so signal ya onggapo la so baleg ya kairapan. “Tampol” ya deralen na saray gobierno so amin ya palson relihyon. (Apo. 17:16) Kayari to ’tan, nayarin ditan la nagawa imay ibabaga na Biblia ya “nanengneng [so] Anak na too ya onsasabi diad saray lurem na tawen a walaay pakapanyari tan baleg a gloria.” (Mat. 24:30) Ukomen nen Jesus iray totoo tan ibiig to iray karnero ed saray kanding. (Mat. 25:31-33, 46) Si Satanas balet ey? Sikatoy onsanok kanian sugsogan toy alyansa na saray bansa pian atakien da iray lingkor nen Jehova. Sayan alyansa et tinawag ed Biblia ya “Gog ed dalin na Magog.” (Eze. 38:2, 10, 11) Legan na baleg a kairapan, tiponen nen Jesus ed tawen iray nakekeran alanaan diad dalin tan kaiba iran miguerra diad Armagedon. Say Armagedon so sampot na baleg ya kairapan! c (Mat. 24:31; Apo. 16:14, 16) Kayari to ’tan, uleyan la nen Jesus so interon dalin diad loob na Sanlibon Taon.​—Apo. 20:6.

11. Antoy sankarakepan ya bendisyon no andi-anggaan lay bilay mo? (Nengnengen met so litrato.)

¹¹ Imadyin mo pa ya asumpal lay Sanlibon Taon ya Uley nen Kristo. Ibabaga na Biblia ya “inyan [nen Jehova] so andi-anggaan ed puso [tayo].” (Ecl. 3:11) No andi-anggaan lay bilay mo, antoy epekto to ’tan ed relasyon mod si Jehova? Walay balibalin ipapa-imadyin ed  sikatayo na libron Onapit ed si Jehova, diad pahina 319. No nambilay tayo la kunoy nilasus, nilibo, minilyon, tan binilyon ni ingen ya taon, seguradon dakel so naamtaan tayon balo tungkol ed Dios ya Jehova no ikomparad amta tayo natan. Diad tua, agtayon balot naupotan na aralen tungkol ed sikato. Imbaga met na satan ya libro ya agtayo nin talaga naimadyin natan so karakep na bilay ed Paraiso. Pero say sankarakepan kunon bendisyon ed ami-amin, amay kada agew et lalo tayon onaapit ed si Aman Jehova. Legan tayo sirin ya aalagaren itan, itultuloy tayon aralen so Biblia. Anto ni wadtan ya balibalin aralen?

12. Antoy gawaen tayo pian naimadyin tayo iray nagagawa ed tawen? Mangiter na alimbawa.

¹² Wala ray detalye ya ipapaamta na Biblia tungkol ed “sankatageyan a pasen” ya panaayaman nen Jehova. (Isa. 33:5) No basaen tayo itan, naamtaan tayo ray makapabilib ya detalye tungkol ed si Jehova tan say walad tawen a kabiangan na organisasyon to. (Isa. 6:1-4; Dan. 7:9, 10; Apo. 4:1-6) Singa bilang, aral mo iray makapakelkelaw ya anengneng nen Ezequiel nen “alukasan so katawenan tan anengneng [to] ray pasingawey na Dios.”​—Eze. 1:1.

13. Antoy pisatsalamatan mon gagawaen nen Jesus diad tawen natan? (Hebreo 4:14-16)

¹³ Dalepdep mo met iray gagawaen nen Jesus diad tawen bilang makapanyarin Ari tan maar-aron Atagey ya Saserdote tayo. Sikato so dalan pian makaasingger tayo ed trono na “agnaparaan a kaabigan na Dios” tan makakerew tayoy panangasi tan tulong “diad dugan panaon.” (Basaen so Hebreo 4:14-16.) Komon ta kada agew et sankanonot tayo no anto la ray ginawa nen Jehova tan Jesus diad tawen tan no anto ni ray gagawaen da natan  parad sikatayo. No ontan so gawaen tayo, mas naar-aro tayo ra tan lalo tayon onseseg ed panaglingkor.​—2 Cor. 5:14, 15.

14. Antoy sankaabigan ya paraan pian naipanengneng tayo ya misatsalamat tayo ed si Jehova tan Jesus? (Nengnengen met so litrato.)

¹⁴ Say sankaabigan ya paraan pian naipanengneng tayon misatsalamat tayod Dios tan ed Anak to et no tulongan tayo ray totoo ya magmaliw ya disipulo nen Jesus tan Tasi nen Jehova. (Mat. 28:19, 20) Ontan so ginawa nen apostol Pablo ta misatsalamat ya maong ed Dios tan ed si Jesus. Amta to ya labay nen Jehova ya “niliktar so amin a klase na totoo tan nawalaan ira na suston kakabatan ed katuaan.” (1 Tim. 2:3, 4) Kanian makulikuli tan amaspasyan nampulong si Pablo pian “diad amin a posiblin paraan” et natulongan ton makaliktar iray totoo.​—1 Cor. 9:22, 23.

15. Base ed Salmo 1:2, antoy gawaen tayo pian magmaliw tayon maliket?

¹⁵ Ibabaga na Biblia ya maliket tan maong so pansumpalan na sakey ya too no “say panliliketan to et say ganggan nen Jehova” tan no “dadalepdepen toy ganggan To diad agew tan labi.” (Sal. 1:1-3; paimanod leksab) Oniay imbaga nen Joseph Rotherham, sakey ya Bible translator, diad libro ton Studies in the Psalms tungkol ed sayan teksto: “No labalabay na sakey ya too so manpaigiya ed Dios, dapat aralen to [ray bilin na Dios], anap-anapen to itan, tan sankanonot ton lanang.” Imbaga to met ya parad satan ya too, “sayang so sanagew no apalampas ton basaen tan aralen so Biblia.” Na-enjoy mon aralen so Biblia no amtaen mo anggan saray angkekelag ya detalye tan no pankokonektaen mon amin iratan. On, naliketan ka no aralen moy kada sukong na Biblia!

16. Antoy pantongtongan tayo ed ontumbok ya artikulo?

¹⁶ Impaisulat nen Jehova iray balibalin katuaan ed Biblia ta amta to ya sarasarag tayon talosan iratan. Say sakey ed saray aralem ya katuaan et say baleg ya espiritual ya templo nen Jehova, ya nabasa ed sulat nen Pablo ed saray Hebreon Kristiano. Atan so aralen tayo ed ontumbok ya artikulo. Komon ta na-enjoy mon aralen itan ya aralem a katuaan.