1-2. Kiko ta e mihó manera pa lesa i studia Beibel?

 IMAGINÁ ku bo ke kumpra un kas. Sigur ku lo bo tin gana di wak e kas promé. Pero lo bo no ke wak e riba potrèt so. Bo mes lo ke bai wak é, kana rònt di dje, bai paden wak den tur kamber i delaster un detaye. Anto lo ta mas mihó ainda si bo por wak e mapa mes di e kas pa wak kon a trah’é. Sin duda, bo ke wak kada detaye di e kas promé ku bo kumpr’é.

² Awèl, meskos nos por hasi ora nos ta lesa i studia Beibel. Un eskritor a kompará e mensahe di Beibel ku “un edifisio grandi i masha haltu ku tin un fundeshi hopi hundu.” Pero awor, ki nos por hasi pa konosé Beibel bon? Si bo djis lesa Beibel ariba-ariba, lo bo siña solamente “e kosnan básiko di e deklarashonnan sagrado di Dios.” (Heb. 5:12) Pa bo por komprondé Beibel bon, meskos ku e kas, bo tin ku bai “paden” pa studia kada detaye di dje. E mihó manera pa hasi esei ta di mira kon vários parti di su mensahe ta konektá ku otro. Hasi esfuerso pa no djis komprondé kiko ta e bèrdatnan ku bo ta kere aden, pero tambe dikon bo ta kere den nan.

3. Kiko Apòstel Pablo a animá su rumannan pa hasi, i dikon? (Efesionan 3:​14-19)

³ Pa nos por komprondé tur detaye di Beibel bon,  tin algun bèrdat profundo ku nos tin ku hasi esfuerso pa analisá. Apòstel Pablo a animá su rumannan kristian pa tuma tempu pa studia Skritura pa asina nan por “komprondé plenamente kiko ta e hanchura, largura, haltura i profundidat di e bèrdat.” E ora ei nan lo bira “ankrá i establesí” den nan kreensianan. (Lesa Efesionan 3:​14-19.) E konseho ei ta konta pa nos tambe. P’esei, laga nos wak kon nos por eksplorá Beibel pa nos por komprond’é bon.

4. Kiko por yuda nos hala mas serka Yehova?

⁴ Komo kristian, nos no ke djis sa e kosnan básiko di Beibel. Nos ke siña “asta e kosnan profundo di Dios.” Nos por hasi esei ku yudansa di spiritu santu. (1 Kor. 2:​9, 10) Bo tabata sa ku si bo kuminsá ku un proyekto di estudio, esei lo yuda bo hala mas serka Yehova? Por ehèmpel, bo por investigá kon el a mustra amor na su sirbidónan den pasado i asina lo bo deskubrí ku e ta stima abo tambe. Òf kisas bo por analisá tambe kon Yehova tabata ke pa e israelitanan ador’é i kompará esei ku kon e ke pa nos ador’é. Anto podisé bo por hasi un proyekto di estudio tokante e profesianan ku Hesus a kumpli kuné durante su bida i su sirbishi aki riba tera.

5. Ki tópiko abo lo ke eksplorá den bo siguiente estudio personal?

⁵ Algun ruman ku gusta studia Beibel a menshoná algun kos ku nan tin gana di sa mas di dje. Den e kuadro “ Algun Idea pa Estudio Personal” lo bo haña loke nan a bisa. Pa hasi investigashon, bo por usa Guia pa Buska Informashon den Publikashonnan di Testigunan di Yehova òf Índice de las publicaciones Watch Tower. Ora bo tuma tempu pa studia kosnan profundo di Beibel bo fe lo bira mas fuerte i lo bo “siña konosé Dios.” (Pro. 2:​4, 5) Ban eksplorá otro bèrdatnan profundo di Beibel.

6. (a) Splika dikon Yehova su propósito nunka por frakasá. (b) Dikon por bisa ku Yehova su propósito pa hende i tera ta “eterno”? (Efesionan 3:11)

⁶ Por ehèmpel, ban wak loke Beibel ta bisa tokante Dios su propósito. Dios su propósito nunka por frakasá. Dikon? Pasobra ora Yehova disidí di hasi algu, e no ta mara su mes na ún manera pa logra esei. Mas bien, e ta fleksibel i ta hasi ahustenan nesesario pa asina kumpli ku su propósito. Pues, di un manera òf otro, Yehova semper “ta sòru pa tur kos kontribuí na kumplimentu di su propósito.” (Pro. 16:4) Beibel ta bisa tambe ku Yehova su propósito ta eterno. (Efe. 3:11) E propósito ta eterno pasó Yehova a laga un periodo largu di tempu pasa promé ku e propósito ei ser realisá kompletamente. I di dos, e resultado di tur loke Yehova hasi ta dura pa semper. Pero den tur esei, kiko ta Yehova su propósito, i ki ahustenan e mester a hasi pa asina kumpli kuné?

7. Apesar ku Ádam i Eva a rebeldiá, kon Yehova a hasi sigur ku su propósito lo kumpli? (Mateo 25:34)

⁷ Dios a bisa Ádam i Eva pa kiko el a traha nan. Nan mester a “haña yu i bira hopi; yena tera i domin’é” i tene ‘outoridat riba tur bestia’ riba tera. (Gén. 1:28) Pero e promé hendenan ei a rebeldiá i debí na esei humanidat a kai den piká. Ma loke nan a hasi ei lo no a stroba Yehova di kumpli ku su propósito, esta, loke el a disidí. El a ahustá e manera ku lo e logra e meta ei. Mesora, el a disidí di hasi un areglo pa un Reino den shelu ku lo kumpli ku e meta original ku e tabatin pa humanidat i tera. (Lesa Mateo 25:34.) Na e tempu ku Yehova a stipulá, el a manda su Yu na tera pa siña hende tokante e Reino i pa duna su bida komo reskate pa piká i morto. Djei, Yehova a resusitá Hesus pa bai shelu i goberná komo Rei di Dios Su Reino. Pero tin mas kos ku nos por siña tokante Dios su propósito.

8. (a) Kiko e tema di Beibel ta? (b) Segun Efesionan 1:​8-11, kiko ta e propósito mas grandi ku Yehova tin na mente? (Wak plachi riba portada.)

⁸ E tema di Beibel ta: vindikashon di Yehova su nòmber segun ku e ta kumpli ku su propósito pa tera usando su Reino ku Kristu na kabes. Nada no por kambia Yehova su propósito. E ta primintí ku tur kos lo sosodé presis manera el a bisa. (Isa. 46:​10, 11, notanan; Heb. 6:​17, 18) Ku tempu, tera lo bira un paradeis i desendientenan hustu di Ádam i Eva lo “disfrutá di bida pa semper.” (Sal. 22:26) Pero Yehova tin un propósito mas grandi na mente. Esei ta pa uni tur su sirbidónan den shelu i riba tera. Anto e ora ei tur persona lo ta leal na Yehova i lo obedesé é komo nan Soberano. (Lesa Efesionan 1:​8-11.) Bo no ta haña ku e manera ku Yehova ta kumpli ku su propósito ta maravioso?

9. Te kon leu den futuro nos por wak si nos lesa Beibel?

⁹ Na Génesis 3:15 nos ta haña e profesia ku Yehova a duna den hòfi na Éden. b Den e profesia ei, Yehova a menshoná susesonan ku lo kumpli ku su propósito. Pero nan lo a sosodé míles di aña despues. Por ehèmpel, Dios a bisa Ábraham  ku, despues di hopi generashon, un di su desendientenan lo a bira e Kristu. (Gén. 22:​15-18) Anto na aña 33 di promé siglo, Hesus a ser heridá na su hilchi, mané e profesia a bisa. (Echo. 3:​13-15) I e último suseso di e profesia ei, e plèchamentu di Satanas su kabes, lo sosodé na fin di e Reinado di Mil Aña di Kristu. (Rev. 20:​7-10) Pero Beibel ta duna mas detaye di otro kosnan ku lo sosodé segun e enemistat entre e mundu di Satanas i e organisashon di Yehova ta yega na su fin.

10. (a) Kiko lo bai pasa un bes akí? (b) Kon nos por prepará pa nan? (Wak e nota.)

¹⁰ Pensa riba e siguiente susesonan ku Beibel ta profetisá ku lo bai sagudí mundu kompleto. Pa kuminsá, lo tin e gritu di “pas i siguridat!” (1 Tes. 5:​2, 3) “Instantáneamente,” tribulashon grandi lo kuminsá ora ku nashonnan ataká tur religion falsu. (Rev. 17:16) Despues di esei, “e Yu di hende [lo] bini riba e nubianan di shelu ku poder i gran gloria.” Kisas esei lo ta un suseso sobrenatural. (Mat. 24:30) Hesus lo husga humanidat, separando karné for di kabritu. (Mat. 25:​31-33, 46) Pero Satanas lo no sinta man krusá. Mas bien lo e instigá un koalishon di nashon, ku Beibel ta yama Gòg di tera di Magòg, pa ataká Yehova su sirbidónan. (Eze. 38:​2, 10, 11) Anto dado momento, e ungínan ku te ainda ta riba tera lo bai shelu. Nan lo djòin Kristu i su ehérsito selestial pa bringa den guera di Armagedon ku lo ta e parti final di tribulashon grandi. c (Mat. 24:31; Rev. 16:​14, 16) Ta e ora ei numa e Reinado di Mil Aña di Kristu lo kuminsá.—Rev. 20:6.

11. Kiko e speransa di bida eterno ta nifiká pa abo? (Wak e plachi.)

¹¹ Ban pensa kon bida lo ta despues di e Reinado di Mil Aña. Beibel ta bisa ku nos Kreador mes “a pone eternidat den [nos] kurason.” (Ekl. 3:11) Bo a yega di imaginá kon bo amistat ku Yehova lo  ta e tempu ei? E buki Hala Serka Yehova, página 319, ta bisa algu interesante: “Despues di a biba shen, mil, un mion, òf asta mil mion aña mas, nos lo sa hopi mas tokante Yehova Dios ku loke nos sa awor. Pero ainda nos lo sinti ku tin un sin fin di kos maravioso ku nos por siña. . . . Nos no por ni imaginá kon variá i yen di nifikashon bida eterno lo ta. I pa semper, loke lo duna nos mas satisfakshon den bida ta e echo ku nos lo sigui hala serka Yehova.” Turesten, kiko mas nos por eksplorá den Beibel?

12. Unda nos por haña un idea di Yehova su presensia den shelu? Duna un ehèmpel.

¹² Beibel ta duna nos un idea di Yehova su presensia “den shelu.” (Isa. 33:5) E ta revelá kosnan bunita tokante Yehova i e parti selestial di su organisashon. (Isa. 6:​1-4; Dán. 7:​9, 10; Rev. 4:​1-6) Por ehèmpel, nos por lesa tokante e kosnan impreshonante ku Ezekiel a mira ora ku “shelunan a habri” i Dios a lag’é “mira vishonnan.” —Eze. 1:1.

13. Kiko bo ta pensa di loke Hesus ta hasiendo pa nos for di shelu? (Hebreonan 4:​14-16)

¹³ Pensa tambe riba loke Hesus ta hasi pa nos for di shelu. E ta nos Rei i nos Sumo Saserdote ku ta tene kompashon ku nos. Pa medio di dje nos por hasi orashon i aserka Dios su “trono di bondat inmeresí” pa pidi pa miserikòrdia i pa haña yudansa “na e momento apropiá.” (Lesa Hebreonan 4:​14-16.) Sin falta ún dia, nos mester pensa tokante loke Yehova i Hesus a i ta hasi pa nos for di shelu. E amor ku nan ta mustra na nos mester tin asina un efekto riba nos ku e ta motivá nos pa sirbi Yehova ku smak.—2 Kor. 5:​14, 15.

14. Kon ta e mihó manera pa nos mustra nos gratitut na Yehova i Hesus? (Wak e plachi.)

 ¹⁴ Un di e mihó maneranan ku nos por mustra kon gradisidu nos ta na nos Dios i su Yu, ta di hasi tur loke nos por pa yuda otro hende bira Testigu di Yehova i disipel di Hesus. (Mat. 28:​19, 20) Bo sa kon Apòstel Pablo a hasi esei? E tabata sa ku Yehova su boluntat ta “pa tur sorto di hende ser salbá i yega na un konosementu eksakto di e bèrdat.” (1 Tim. 2:​3, 4) P’esei, el a traha hopi duru den sirbishi pa yuda mas tantu hende, ya asina “di tur manera posibel [e] por salba algun.”—1 Kor. 9:​22, 23.

15. Segun Salmo 1:​2, kiko lo hasi nos felis?

¹⁵ E eskritor di e promé salmo a bisa ku hende ku tin “goso . . . den lei di Yehova” i “ta les’é i meditá riba dje di dia i anochi” lo ta felis i lo tin éksito. (Sal. 1:​1-3) Joseph Rotherham, un traduktor di Beibel, a bisa algu tokante e versíkulonan akí den su buki Studies in the Psalms. El a bisa ku un hende mester “ke Dios su guia asina tantu ku lo e busk’é, studi’é i pasa hopi tempu ta pensa riba dje.” Tambe el a bisa ku “si e hende ei pasa un dia sin lesa Beibel, e por konsiderá e dia ei komo pèrdí.” Beibel ta yen di detaye fasinante, i ora bo eksplorá nan i mira kon nan ta konektá ku otro, bo tambe lo haña goso. Lo bo disfrutá di dje sigur!

16. Tokante di kiko e siguiente artíkulo ta bai?

¹⁶ E bunita bèrdatnan ku Yehova ta siña den su Palabra no ta muchu difísil pa komprondé. Den e siguiente artíkulo, nos lo eksplorá un di e bèrdatnan profundo ei—Yehova su tèmpel spiritual. Pablo a deskribí e tèmpel ei den su karta ku el a skirbi na e kristiannan hebreo. Nos ta konvensí ku ora bo studi’é lo bo sinti goso.