1-2. Ngera sel kot lungil rolel e kede menguiu e mesuub er a Biblia? Momekesiu.

 IMAGINE er kau el melatk omechar er a blai. Ngngera soam el lomes er ngii er uchei er a obo momechar? Ngdi siasing er a medal a blai? Ngulterekokl el soam el mesang er a medam me bo lsebechem el merael er a chelsel e omes a derta el room me a bek el merekelel. E locha lmuut lungil er kau omomes er a plan er a blai el mo medengelii a rolel e te ulemekedechor er ngii. Ngsoam el mo medengei a rokui el tekoi el kirel tia el blai el omolatk a mo kiei er ngii.

² Ngsebeched el meruul er a osisiu el tekoi sel donguiu e dosuub er a Biblia. Ta el chad er omeluches omekesiu er a klemechel a Biblia el mora “klou el building el kmal metongakl e dmolech okedecherul.” Me ngmekera sebeched el mo ungil medengei aike el rokui el ngar er a Biblia? A lsekum ke di mereched el menguiu e ke di mo suub a “uchelel a tekingel a Dios,” el diak el dmolech el tekoi er a Biblia. (Heb. 5:12) Engdi di uai sel blai, bo “msiseb” e morriter a bek el tekoi. A kot lungil rolel e ke mesuub er a Biblia, a momes el kmo ngmekera aike el lolekoi a tang e connect el mora tang. Molasem el diak di bo modengei el kmo ngngera el klemerang omoumerang e ngdirrek el ngera uchul me koumerang aika el klemerang.

3. A apostol Paulus ngmilengelechel er a rekldemel Kristiano el mo mekerang, e ngerang? (Efesus 3:​14-19, NW)

³ A bo dungil medengelii a bek el merekelel a Tekingel a Dios, e ngkired el mesuub a dmolech el klemerang er a Biblia. A apostol Paulus a milengelechel er a rudam me a rudos er ngii el Kristiano me bo lekerekikl el mesuub er a Tekingel a Dios me bo “lungil mtebengii a tengel, klemengetel, kldidiul, me a delechel,”  a klemerang. Seikid e te lmuut el “mourais e meteketek” a klaumerang er tir. (Monguiu er a Efesus 3:​14-19, NW. b) Kid me ngdirrek el kired el meruul el uaisei. Ka me dosaod er a rolel e ngsebeched el mo kerekikl el mesuub er a Tekingel a Dios me bo dodengelii a cherrungel el belkul.

4. Ngera sebeched el meruul lolekeed er kid er a Jehovah? Mouchais a bebil er a example.

⁴ Kid el Kristiano diak el soad el di mo medengei aike el beot el osisechakl er a Biblia. Ngoeak a ngelsuil a chedaol reng e ngkmal soad el mo medengei a “dmolech ra Dios.” (1 Ko. 2:​9, 10) Nglocha sebechem el mechelii a personal study project er kau el ngii a rullau el lmuut el mo kmeed er a Jehovah. El ua tiang, ngsebechem el research el kirel a rolel e ngulechotii a bltkil a rengul el mora remesiungel er a irechar me a rolel e ngochotii el kmo ngdirrek el kmal betik a rengul er kau. Ngsebechem el merriter er a rolel e a Jehovah mle soal a rechad er a Israel a longull er ngii, e omekesiu er ngii er a rolel e ngsoal a dongull er ngii er chelecha el taem. Me a lechub e ngsebechem el mesuub a bek el komakai el omesodel a ulaoch el Jesus ultaut er a klengar ngii me a omesiungel er tia el chutem.

5. Ngar ngii a soam el research el kirel el mo personal study project er kau?

⁵ A rebebil el kmal kerekikl el mesuub er a Biblia a luleker er tir el kmo ngngera el dmolech el tekoi a sorir el mo merriter er a Tekingel a Dios. Ngsebechem el mes a bebil er aike el lulemasech er a baks el “ Idea el Kirel a Personal Study Project.” Ngsebechem el mesuub el kirel aika el tekoi loeak a ngelsuil a Watch Tower Publications Index me a lechub e ng Research Guide for Jehovah’s Witnesses. Sel bom dmolech el mesuub er a Biblia e ngsebechel smisichii a klaumerang er kau e ngosukau el “metik er a klemedengei er a Dios.” (Osi. 2:​4, 5) Ka me dorriter a bebil el dmolech el klemerang er a Biblia.

6. (a) Ngera klekakerous er a plan me a moktek? (b) Ngera uchul me ngsebeched el melekoi el kmo a moktek er a Jehovah el kirir a rechad me a beluulechad a “diak a ulebengelel”? (Efesus 3:​11, NW)

⁶ Molatk aike el lolekoi a Biblia el kirel a moktek er a Dios. Ngngar ngii a klekakerous er a plan me a moktek. A plan a di ua sel omngiltii a rael el mora basio el soam el mo er ngii. Engdi tia el plan a sebechel metemall a lsekum e ngmo er ngii a block er a rael. A moktek a focus er a basio el obo er ngii el diak el rael. Kede medengelii a basio el soad el mo er ngii e sebeched el ousbech a kakerous el rael el mo er ngii. Kede oba omereng el saul e le Jehovah mla mekekokil lochotii a “a diak a ulebengelel el moktek er ngii” el ngar er a Biblia. (Efe. 3:​11, NW) Ngdi tmaut a rokui el loruul e le ng “mla remuul a rokui el tekoi el mo oltirakl er a moktek er ngii.” (Osi. 16:​4, NW) E a result er a aike el loruul a Jehovah a diak a ulebengelel. Ngera moktek er a Jehovah, e ngera el omelodech a bla leruul el mo oltaut er a moktek er ngii?

7. A kot lobekel er a bo lomtok, e ngmilekera Jehovah e ngodechii a rolel e ngotutii a moktek er ngii? (Mateus 25:34)

⁷ A Dios uluuchais er a kot el obekel er a moktek er ngii el kirir. Ngdilu er tir el kmo “bo le betok a re ngelekiu, ma ruldidellel a rsechiu bo le kiei er ker me ker er a beluulchad e bo [morreder] . . . a rokui el meklou ma mekekerel . . . el charm.” (Gen. 1:28) Me nguaisei, engdi Adam me a Eva er a lomtok e lerelleterir a rokui el chad el mora klengit, a moktek er a Jehovah dimlak el mengodech. Ngildechii a rolel e ngsebechel lotutii a moktek er ngii. Ngdi mle uchei e ngtibir el mo kutmeklii a Renged el ngar er a eanged el ngii a mo otutii a dimla moktek er ngii el kirir a rechad me a beluulechad. (Monguiu er a Mateus 25:34.) A Jehovah tiltkii a taem e ulderchii a Ngelekel el mei er tia el chutem el me olisechakl er a rechad el kirel a Renged e tongetengii a klengar ngii el melubet er kid er a klengit me a kodall. E sera lebekiis a Jesus e lluut el mora eanged, e ngmlo mengedereder el King er a Rengedel a Dios. Engdi ngdirk ngar ngii a kired el dmolech el melatk el kirel a moktek er a Dios.

8. (a) Ngera sel mera el sodel a belkul a Biblia? (b) Ngua losaod er ngii a Efesus 1:​8-11, ngera sel kmal moktek er a Jehovah? (Momes er a siasing er a medal tia el babier.)

⁸ Sel mera el sodel a belkul a Biblia a osebecheklel a ngklel a Jehovah loeak a otutel a moktek er ngii el kirel tia el chutem, el lousbech er a Renged el ngar cheungel a chederedellel a Kristus. A moktek er a Jehovah diak el sebechel mengodech. Me a rokui el tekoi el bla letib a mo tmaut loltirakl er a tekingel. (Isa. 46:​10, 11; Heb. 6:​17, 18) Tia el chutem a mo baradis e a remelemalt el ruldidellel a rsechel a Adam me a Eva a ‘mo kiei [er ngii] el mo cherechar.’ (Psa. 22:​26, NW) Engdi ngngar ngii a lmuut el ngaruchei el tekoi el lolatk er ngii a Jehovah. Ngmo oldak er a rokui el mellomes el blebelel er a eanged me a chutem. A rokui el ngar a mo kongei er a omengederederel. (Monguiu er a Efesus 1:​8-11.) Ngdiak el amazing a rolel e a Jehovah oltaut er a moktek er ngii?

9. Sel donguiu er a Biblia e ngsebeched el mesa ngar medad el mo kirel ker?

⁹ Molatk er a ulaoch el ledillii a Jehovah er a sers er a Eden el debetik er ngii er a Genesis 3:15. c Ngmesaod el kirel a tekoi el mo duubech el ngii a mo otutii a moktek er ngii, engdi ngmo duubech er a betok el telael el rak er uriul. El ua tiang, a Dios a dilu er a Abraham el kmo a ta er a ruldidellel a rsechel a mo Kristus. (Gen. 22:​15-18) E a 33 C.E., a Jesus a lebilengchii  a kotel ochil el ua lolekoi a ulaoch. (Rel. 3:​13-15) E a ulebongel el telengtengil a ulaoch el Satan a mo merukem a bdelul, a dirk betok er a 1,000 el rak a otutel. (Och. 20:​7-10) A Biblia dirrek el louchais a betok el mo duubech er chelecha lolekedang a ulebengelel a klaucheraro er a delongelel a cheldebechelel a Jehovah me a beluulechad er a Satan.

10. (a) Ngera el tekoi a di kmedung e ngmo duubech er a ngar medad? (b) Ngmekera sebeched el prepare er a uldesued me a rengud? (Momes er a footnote.)

¹⁰ Ka molatk aika el mengasireng el tekoi el lomlaoch a Biblia. A kot a renged er a beluulechad a mo melekoi el kmo “ng budech ma rokui el tekoi a di ungilbesul.” (1 Th. 5:​2, 3) Seikid e “ng di mereched” lomuchel a kloul ringel er sel taem el aika el renged a mo oldechelakl a rokui el klsuul el klechelid. (Och. 17:16) Uriul e nglocha mo er ngii a mengasireng lolechotel a “Ngelekel a Chad el mermang el ngar a eabed el oba klisiich ma klou el klebkall.” (Mt. 24:30) Me a Jesus a mo oukerrekeriil er a rechad e mo omii er a resib me a kaming. (Mt. 25:​31-33, 46) Satan el kmal ouketui er a rechedal a Dios a uchul me ngmo mengudel aika el renged er a beluulechad el rokui el lomekedong er ngii a Biblia el kmo Kok er a beluu er a Makok el mo oldechelakl er a rechedal a Dios. (Ese. 38:​2, 10, 11) Ngar ngii a taem e a rokui el ngellitel el ngar tia el chutem a mo obengkel a Kristus er a eanged e mo teloi er ngii me a rechanghel er ngii el mora mekemad er a Armakedon, el ngii a mo ulebengelel a kloul ringel. d (Mt. 24:31; Och. 16:​14, 16) E seikid e ngomuchel er tia el chutem a Ta el Telael el Rak el Omengederederel a Kristus.—Och. 20:6.

11. Ngera belkul a diak a ulebengelel klengar el kirem? (Dirrek el momes er a siasing.)

¹¹ Chelecha ka momes lengelakl er a ta el telael el rak. A Biblia kmo ‘ngmo lmuut er a urunguled el kiei el diak a ulebengelel me ngmla loia er a rengud’ a Dios. (Oli. 3:​11, NW) Molatk el kmo tiang ngera ngrullii el mo er kau me a deleuill er kau me a Jehovah. A 319 el llel a book el Draw Close to Jehovah, a melekoi el  kmo: “Uriul er a bla dekiei el betok el dart rak, betok el telael el rak, betok el miliol el rak, mo lmuut er a betok el biliol el rak e kede mo medengei a lmuut el betok el kirel a Jehovah el Dios er aike el dodengei er chelechang. Engdi kede dirk mo feel el kmo ngkmal dirk betok a sebeched el suub el kirel. . . . Ngkmal diak el sebeched el mtebengii el kmo ngkol mo uangerang a klebekelel me a klungiolel a klengar er a baradis. Sel kot el klebokel el tekoi el bo dolechesuar er ngii a sel deluut el menga el mo kmeed er a Jehovah.” Me nguaisei engdi chelecha el dosuub er a Tekingel a Dios e ngera dirrek el sebeched el dmolech el melatk?

12. Ngmekera sebeched lomes el mo er bab er a eanged? Mouchais er a ta er a example.

¹² A Tekingel a Dios meskid a siasing er a Jehovah el ngar er a “eanged.” (Isa. 33:​5, NW) Ngouchais er kid a mengasireng el tekoi el kirel a Jehovah me a rechanghel er ngii. (Isa. 6:​1-4; Dan. 7:​9, 10; Och. 4:​1-6) El ua tiang, ngsebeched el menguiu a mengasireng el tekoi el lules a Esekiel er a ‘eanged a lobkais e lesa Dios.’—Ese. 1:1.

13. Ngera uldesuem el kirel a loruul er ngii a Jesus er a eanged el ua losaod er ngii a Hebru 4:​14-16?

¹³ Ka mdirrek el melatk a loruul a Jesus er a eanged el King e Ngarbab el Prist. Ngoeak ngii e ngsebeched el mora Dios el ngar er a “kingall er a krasia,” e meluluuch e olengit a klechubechub me a ngeso “sel dousbech er ngii.” (Monguiu er a Hebru 4:​14-16.) Lak debecherei a ta el sils me lengelakl e lak dolatk aike el bla leruul me a loruul a Jehovah me a Jesus el kired. A bltkil a rengrir el mei er kid a kirel rutechii a rengud e odbechid el mo blak a rengud er a omesiunged me a omengull er kid.—2 Ko. 5:​14, 15.

14. Ngera ta er a kot lungil rolel e ngsebeched el lochotii omereng el saul er kid el kirel a Jehovah me a Jesus? (Dirrek el momes a siasing.)

¹⁴ A ta er a kot lungil rolel e kede ochotii  omereng el saul er kid el mora Dios me a Ngelekel a dolasem el olengeseu er a rechad el mo ta er a Sioning er a Jehovah e disaiplo er a Jesus. (Mt. 28:​19, 20) Tiakid a lurruul er ngii a apostol Paulus lolecholt er omereng el saul er ngii el mora Dios me a Kristus. Ngika mle medengei el kmo a Jehovah soal a “rokui el chad a bo le sobel e bo lodengelii a klemerang.” (1 Ti. 2:​3, 4) Me ngkmal mle meringel loureor el lomerk e olengeseu er a rechad me bo lsebechel el “osebelterir a re bebil er tir.”—1 Ko. 9:​22, 23.

15. A doltirakl er a Psalm 1:2 (NW), e ngera rullid el mo dmeu a rengud?

¹⁵ Ngike el milluches er a kot el bliongel er a Psalm a milsaod er a chad el dmeu a rengul e ungilbesul el kmo ngchad el “semeriar er a llechul a Jehovah” e “melebedebek er a llechul er a llomes me a klebesei.” (Psa. 1:​1-3, NW; ftn.) A Joseph Rotherham el ta er a oliuid a Biblia a mesaod er tia el bades el ngar er a book er ngii el Studies in the Psalms el kmo, a chad a kirel “kmal soal a ulekrael er a Dios me ngosiik er ngii, mesuub er ngii, e mengoit er a klou el taem el melatk er ngii.” Ngdirrek el dilu el kmo a chad el menguiu er a Biblia “lsekum engelakl a ta el sils el diak el longuiu er ngii e ngomes el kmo ngmle waste er tia el sils.” Ngsebechel mo dmeu a rengum el mesuub er a Biblia sel bo modengei a komakai el omesodel e momes el kmo ngmekera connect el rokui. Ngmera el ileakl el deurreng sel bo de dmolech el melatk a bek el merekelel a tekingel a Dios!

16. Ngera kede mo mesaod er a ongingil el suobel?

¹⁶ A klemerang el Jehovah olisechakl er kid a diak el meringel a bo dodengei. Ngar er a ongingil suobel e kede mo mesaod er a ta er a dmolech el klemerang, el ngii a templo er a Jehovah er a klereng el lulsaod er ngii a Paulus er a babilengel el mora Rekristiano el chad er a Hebru. Omesubel tiang bo luchul a klou el deuil a rengum.