1-2. Woont es de basta Wajch, woo eena de Bibel läsen un studieren kaun? Met waut jeit daut to vejlikjen?

 STAL die mol väa, du west een Hus kjeepen. Waut wurscht du jleichen to seenen, ea du daut Hus kjafst? Bloos een Bilt, woo daut von väaren lat? Secha wurscht du wellen doa hanfoaren un daut selfst seenen, un du wurscht jleichen rom daut Hus to gonen, en jieda Stow nenntogonen un die aules beseenen, waut doa bennen es. Daut wudd uk goot sennen, met wäm to räden, waut daut weet, woo daut Hus jemoakt es. Daut es kloa, daut du aules wurscht jleichen to seenen von daut Hus, waut du kjeepen west.

² Wie kjennen sea dautselwje doonen, wan wie de Bibel läsen un dee studieren. Een Bibeljelieeda vejlikjt de Norecht, waut en de Bibel es, “met een grootet huaget Hus, waut opp een stoakjet Ferment jebut es”. Soo, waut kaun ons halpen, met aules bekaunt to woaren, waut en de Bibel es? Wan wie dee bloos bosich äwaläsen, dan woa wie bloos de eefache Lieren vestonen, “dän Aunfank von Gott sien räden” (Heb. 5:12). Oba krakjt soo aus wie en daut Hus motten nenngonen, om aules to seenen, waut doa bennen es, mott wie uk de Bibel krakjt studieren, om dee bäta to vestonen. Eene feine Wajch toom de Bibel studieren es, doano to kjikjen, woo daut tooppaust, waut dee opp eene Städ sajcht, met daut, waut dee opp eene aundre Städ sajcht. Proow to vestonen, waut du jleefst oba uk, wuarom du die kaust secha sennen, daut et soo es.

3. Waut rod de Apostel Paulus siene Breeda un Sestren too, un wuarom? (Efeesa 3:14-19).

³ Om aul de Eenselheiten bäta to vestonen, waut en Gott sien Wuat bennen sent, mott wie de deepe Lieren ut de Bibel vestonen. De Apostel Paulus rod siene Breeda un Sestren  too, flietich to sennen un Gott sien Wuat deep to studieren, daut see bejriepen kunnen, “woo lank un breet, woo huach un deep” de Woarheit wia. Dan wudden see wieda em Gloowen “faust jewartelt sennen” (läs Efeesa 3:14-19). Wie motten uk dautselwje doonen. Well wie mol seenen, woo wie Gott sien Wuat deep studieren kjennen, om daut bäta to vestonen, om waut daut doa jeit.

4. Waut kjenn wie doonen, om Jehova noch noda to komen? Jeff eenje Biespels.

⁴ Aus Christen sent wie nich tofräd doamet, bloos de eefache Lieren ut de Bibel to vestonen. Met de Help von Gott sienen heiljen Jeist, well wie “soogoa Gott siene deepste Jeheemnisen” lieren (1. Kor. 2:9-10). Wuarom fang wie nich mol aun, fa ons perseenlich een Teema deep to studieren, waut ons Jehova noda brinjen kaun? Du wurscht biejlikj waut doaräwa nosieekjen kjennen, woo Jehova siene Deena ieeschtemma Leew wees un woo daut wiest, daut hee uk die leeft. Du wurscht uk kjennen waut doaräwa studieren, waut Jehova von de Israeliten velangd, woo dee am deenen sullen, un woo sikj daut met vondoag dän Dach likjent. Ooda du wurscht kjennen Eenselheiten doaräwa studieren, woo sikj de Profezeiungen äwa Jesus erfelden, aus hee en sienen Deenst oppe Ieed wia.

5. Woon Teema wurscht du jleichen, deep to studieren?

⁵ Eenje, waut deep de Bibel studieren, wort jefroacht, waut vonne Sachen dee noch wudden jleichen, enne Bibel deepa to studieren. Eenje Sachen, waut dee säden, stonen en dän Kausten “ Iedeeen toom deep de Bibel studieren”. Du kaust soone Teemasch studieren met de Help von dän Index der Wachtturm-Publikationen ooda de Help toom nosieekjen fa Jehova siene Zeijen un daut woat die scheen gonen. Doaderch woat dien Gloowen stoakja woaren, un daut woat die halpen, de “Gotteserkjantnis [to] finjen” (Spr. 2:4-5). Well wie nu mol von eenje deepe Lieren ut de Bibel räden, waut wie ons noch kloara unjastonen kjennen.

6. (a) Waut es de Unjascheet tweschen eenen Plon un een Väanämen? (b) Wuarom kjenn wie sajen, daut Jehova sien Väanämen fa de Menschen un de Ieed eewich es? (Efeesa 3:11).

⁶ See wie mol, waut de Bibel äwa Gott sien Väanämen sajcht. Waut plonen es gaunz  waut aundret, aus sikj waut väanämen. Wie kjennen eenen Plon met eenen Wajch vejlikjen, waut ons no eene Städ hanfieet. Wan doa irjentwaut es, waut dän Wajch toomoakt, dan kaun daut leicht sennen, daut wie doa nich hankomen kjennen. Un wie kjennen een Väanämen met eene Städ vejlikjen, wua wie wellen hankomen. Wie weeten krakjt, no waut vonne Städ wie hankomen wellen, oba wie kjennen veschiedne Wäaj nämen toom doa hankomen. Wan een Wajch too es, dan kjenn wie eenen aundren Wajch nämen. Wie sent Jehova dankboa, daut hee ons derch de Bibel soo bie sacht haft weeten jeloten, waut sien “eewjen Väanämen” es (Efs. 3:11, JHF). Jehova kaun sien Väanämen opp veschiedne Wäaj erfellen, wiels hee “haft aules soo jemoakt, daut daut fa sienen Zwakj deent” (Spr. 16:4, NW). Un waut Jehova deit, blift fa emma. Waut es Jehova sien Väanämen un waut haft hee jeendat toom daut erfellen?

7. Woo endad Jehova daut, woo hee sien Väanämen erfellen wudd, aus de ieeschte Menschen sikj jäajen am stalden? (Matäus 25:34).

⁷ Gott säd de ieeschte Menschen daut, waut hee sikj fa an väajenomen haud. Hee säd to dee: “Mucht jie Kjinja haben un junt äwa de gaunze Ieed vemieren, un äwa de Ieed rejieren. Jie sellen Macht haben äwa … aules waut doa oppe Ieed läft” (1. Mo. 1:28). Aus Adam un Eva sikj jäajen Gott stalden, kjeem de Sind en de Welt nenn. Bediet daut dan, daut Gott sien Väanämen sikj nich erfellen wudd? Nä. Hee neem bloos eenen aundren Wajch, daut sikj daut doawäajen erfeld. Jehova wort sikj fuaz eenich, em Himmel een Kjennichrikj opptostalen, waut daut erfellen wudd, waut hee sikj von Aunfank aun fa de Menschen un de Ieed väajenomen haud (läs Matäus 25:34). To siene Tiet schekjt Jehova sienen ieeschtjebuarnen Sän no de Welt, om de Menschen von dit Kjennichrikj to lieren un dee von Sind un Doot loostokjeepen. Jehova wuak dan Jesus vom Doot opp un muak am em Himmel toom Kjennich von sien Kjennichrikj. Oba doa es noch mea, waut wie von Gott sien Väanämen lieren kjennen.

8. (a) Om waut jeit daut en de Bibel? (b) Waut woat Jehova noch doonen, no Efeesa 1:8-11 no? (See daut Bilt oppe väaschte Sied.)

⁸ En de Bibel jeit daut doarom, daut Jehova sien Nomen saul jeheilicht woaren. Daut es doaderch mäajlich, daut Gott sien Kjennichrikj, wua Jesus de Kjennich es, Jehova sien Väanämen erfelt. Jehova sien Väanämen endat sikj nich. Hee haft vesproaken, daut aules soo romkomen woat, aus hee daut jesajcht haft (Jes. 46:10-11, NW, Footnooten; Heb. 6:17-18). Met de Tiet woat de Ieed to een Paradies woaren. Adam un Eva äare Nokomen woaren dan volkomen un jerajcht sennen un dee woaren dan “fa emma een scheenet Läwen haben” (Psa. 22:26, NW). Oba daut es noch nich aules, waut Jehova doonen woat. Jehova haft sikj daut von Aunfank aun väajenomen, daut aul siene Deena, em Himmel un oppe Ieed, veeent sent. Dan woat jieda eena von dee am tru sennen un am aus sienen Harscha jehorchen (läs Efeesa 1:8-11, NW). Es daut nich scheen, opp waut vonne Wajch Jehova daut erfelt, waut hee sikj väajenomen haft?

9. Woo wiet kjenn wie en de Tookunft nennkjikjen, wan wie de Bibel läsen?

⁹ Well wie ons mol de Profezeiunk unjastonen, waut Jehova em Goaden Eden säd, waut wie en 1. Mose 3:15 finjen. b De  Profezeiunk rät von eenje Sachen, woo sikj daut met Jehova sien Väanämen romnämen wudd, waut sikj oba ieescht dusende Joaren lota erfellen wudden. Jehova säd to Abraham, daut hee wudd Nokomen haben un daut doaderch wudd Christus jebuaren woaren (1. Mo. 22:15-18). Romme 33 n.Chr. erfeld sikj daut, daut Jesus de Hak vewunt wort (Apj. 3:13-15). Daut latste Poat von dise Profezeiunk, daut Soton woat dän Kopp vekjwatscht woaren, woat sikj ieescht noch om mea aus 1,000 Joa wieda erfellen (Opb. 20:7-10). De Bibel rät noch von mea Sachen, waut doa passieren woaren, je jrata de Fientschoft tweschen dän Soton siene Welt un Jehova siene Organisazion woat.

10. (a) Waut woat boolt passieren? (b) Woo kjenn wie ons doafäa reedmoaken? (See de Footnoot.)

¹⁰ Denkj mol äwa de butajeweenelje Sachen no, waut de Bibel verutsajcht. Ieeschtens, woaren de Velkja sajen: “Aules es ruich un secha” (1. Tess. 5:2-3). Dan woat de groote Liedenstiet “plazlich” aunfangen, wan de Velkja jäajen de faulsche Gloowes gonen woaren (Opb. 17:16). No daut woaren se, veleicht opp eene butajeweenelje Wajch, “dän Menschensän opp de Himmelswolkjen met Krauft un Harlichkjeit komen seenen” (Mat. 24:30). Jesus woat de Menschen rechten un de Schop von de Kosen uteneendeelen (Mat. 25:31-33, 46). En dise Tiet woat de Soton oba wieda jäajen Jehova schaufen. Wiels hee Gott sien Volkj soo sea haust, woat dee de Velkja bat doa brinjen, sikj tooptostonen un jäajen Gott sien Volkj to gonen. Dise Velkja nant de Bibel Gog von daut Launt Magog (Hes. 38:2, 10-11). Dan woaren de Jesaulwde, waut noch oppe Ieed läwen, irjentwanea nom Himmel jenomen woaren. Un dee woaren opp Enj von de groote Liedenstiet met Christus toop en dän Kjrich von Harmagedon kjamfen (Mat. 24:31; Opb. 16:14, 16). c Dan woat Jesus Christus sien dusentjoaschet Rikj aunfangen, wua hee äwa de Ieed rejieren woat (Opb. 20:6).

11. Waut bediet daut eewje Läwen fa die? (See uk daut Bilt.)

 ¹¹ Nu well wie mol en de Tookunft nennkjikjen. De Bibel sajcht von onsen Schepfa, daut hee ons “mau rajcht de Eewichkjeit en [ons] Hoat jelajcht” haft (Liera 3:11, NW). Denkj mol han, waut daut met die un dien Veheltnis met Jehova to doonen haft. En daut Buak Komm Jehova doch näher, opp de Sied 319, sajcht daut waut sea intressauntet: “Nodäm daut wie fa hundade, dusende, millionende ooda mau rajcht fa billionende Joaren jeläft haben, woa wie Jehova noch väl bäta kjanen aus nu. Oba wie woaren dan noch emma daut Jefeel haben, daut wie sea väl wundascheenet von am lieren kjennen. . . . Wie kjennen ons daut nich mol väastalen, woo butajeweenlich scheen un intressaunt daut Läwen em Paradies sennen woat. Un daut baste von aules woat sennen, daut wie Jehova emma noda komen woaren.” Oba waut kjenn wie nu aul lieren, wan wie Gott sien Wuat noch deepa studieren?

12. Woo kaust du em Himmel nennkjikjen? Jeff een Biespel.

¹² Gott sien Wuat lat ons een beskje weeten, woo daut wudd sennen, wan wie ver Jehova stonen wudden, waut “opp eene huage Städ” wont (Jes. 33:5). De Schreft lat ons uk besondret weeten äwa Jehova un äwa daut himlische Poat von siene Organisazion (Jes. 6:1-4; Dan. 7:9-10; Opb. 4:1-6). Biejlikj kjenn wie äwa daut butajeweenelje läsen, waut Hesekiel sach, aus “de Himmel sikj op[muak], un Gott [am] … eene Openboarunk” wees (Hes. 1:1).

13. Waut räakjenst du besonda aun daut, waut Jesus fa ons deit, soo aus Hebräa 4:14-16 wiest?

¹³ Denkj doaräwa no, waut Jesus aus Kjennich em Himmel un aus metfeelenda Huaga Priesta nu aul fa ons deit. Derch am kjenn wie em Jebäd ver Gott sienen  “Jnodentroon” komen un om Metleet froagen un daut hee ons “to de rajchte Tiet” halpen mucht (läs Hebräa 4:14-16). Wie sellen jieda Dach doaräwa nodenkjen, waut Jehova un Jesus aul aules fa ons jedonen haben un noch doonen. Dee äare Leew jeit ons to Hoaten un brinjt ons bat doa, am flietich to deenen (2. Kor. 5:14-15).

14. Woont es eene Wajch, woo wie daut baste wiesen kjennen, daut wie Jehova un Jesus dankboa sent? (See uk de Bilda.)

¹⁴ Woo kjenn wie wiesen, daut wie Gott un sienen Sän dankboa sent? Eent von de baste Wajch es, aundre proowen to halpen, Jehova siene Deena un Jesus siene Nofolja to woaren (Mat. 28:19-20). Daut es krakjt daut, waut de Apostel Paulus deed. Hee wist, daut et Jehova sien Wellen wia, “daut aule Menschen sellen jerat woaren un de Woarheit kjanen lieren” (1. Tim. 2:3-4). Hee prädijd flietich un proowd, soo väl Menschen aus mäajlich to halpen, “om opp aule Oat un Wies eenje to raden” (1. Kor. 9:22-23).

15. Waut moakt ons schaftich, no Psalm 1:2 no?

¹⁵ De Psalmenschriewa säd, daut een schaftja Mensch “siene Freid aun däm HARN sien Jesaz haft, un sikj Dach un Nacht doamet beschafticht”, ooda doaräwa nodenkjt (Psa. 1:1-3). Een Bibeläwasata säd äwa dise Varzhen, daut een Mensch sull “soo sea no Gott sienen Rot hinjaraun sennen, daut hee doano sieekjt, mea doavon lieet un lang doaräwa nojrebbelt”. Hee säd noch, daut “wan sikj wäa eenen Dach derchgonen lat un nich von Gott siene Weisheit lieet, daut et dan een vespälda Dach es”. De Bibel to studieren kaun die scheen gonen, wan du no de veschiedne Eenselheiten kjikjst, waut doabennen sent un uk doano, woo dee tooppaussen. Gott sien Wuat deep to studieren es werkjlich eene groote Freid!

16. Von waut woa wie en dän näakjsten Artikjel räden?

¹⁶ De scheene Lieren, waut Jehova en sien Wuat haft loten oppschriewen, sent nich soo schwoa, daut wie dee nich vestonen kjennen. En dän näakjsten Artikjel woa wie von eene deepe Lia räden: Jehova sien groota, jeistelja Tempel, wuavon de Apostel Paulus en sienen Breef aun de Hebräa schreef. Mucht die daut Freid jäwen, dit Teema to studieren.