1-2. Ko ni njira yabwino iponi yomwe tingaphatise basa pa kuwerenga na kupfunzira mawu ya Mulungu? Fotokozani.

 GANIZIRANI kuti imwepo munkufuna kugula nyumba. Ko imwepo mungakonde kuiwona nyumba mukanati mwagula? Ko mungabvume kundowona foto ya momwe nyumba mweyo iliri kutsogolo kwake? Mosakayika imwepo mungafune kuyenda pafupi kukaiwona nyumba mweyo, kuona momwe vinthu vose viliri. Panango imwepo mungafunepomwe kuona mapulano ya nyumba mweyo kuti mudziwe momwe idamangiriwa. Mosakayika imwepo mungafune kudziwa chilichose cha nyumba mweyo mukanati mwayigula.

² Tingachitembo vibodzibodzi tikambawerenga na kupfunzira Baibolo. Mpfunzisi munango adalinganiza mawu ya m’Baibolo na “nyumba itali ikulu maninge yomwe idamangiwa pa maziko yolimba maninge.” Manje, tingachite tani kuti tiyidziwe bwinobwino Baibolo? Imwepo mukambawerenga Baibolo padzuludzulu mungandodziwa mpfundo zikuluzikulu basi, ‘mpfundo zoyambirira za m’Mawu ya Mulungu.’ (Aheb. 5:12) Ninge momwe mungachitire imwepo kuyenda ‘kukayiwoneratu’ nyumba mukanati mwagula, imwepo muchadekanambo kupfunzira mosamala maninge Baibolo kuti mukwanise kuibvesa bwinobwino. Njira inango yomwe ingakuthandizeni kupfunzira Baibolo ni kuona momwe nkhani iliyose inkulinganirana na inango. Osati kundofuna kudziwa vinthu vomwe imwepo muchakhulupirira koma kudziwa chifukwa chomwe chikuchitisani kukhulupirira vimwevo.

3. Ko mtumi Paulo adanena chani kwa Akhrisitu, ndipo ndawa chani? (Aefeso 3:14-19)

³ Kuti tiyabvese bwinobwino mawu ya Mulungu tichadekana kupfunzira mozama maninge. Mtumi Paulo adauza Akhrisitu kuti achadekana kupfunzira Mawu ya Mulungu mosamala  kuti ‘akwanise kubvesesa kufupika, kutalika, kukula  na kuzama’ kwa chonadi. Kuchita vimwevi, iwo adakakwanisa kukhala ‘wokondwa na kulimbisa’ chikhulupiriro chawo. (Werengani Aefeso 3:14-19.) Isepano tichadekanambo kuchita chibodzibodzi. Manje naboni tione momwe tingapfunzirire mozama Mawu ya Mulungu kuti tiphindule mokwana na mphaso mweyi yomwe adatipasa.

4. Nchani chomwe tingachite kuti timufenderere maninge Yahova? Perekani vitsanzo.

⁴ Ninge Akhrisitu, isepano tichadekanalini kundodziwa mpfundo zoyambirira za m’Baibolo. Na thandizo ya mzimu uchena wa Mulungu isepano tikhala na chifuno chofuna kupfunzira ‘vinthu vozama va m’Mawu ya Mulungu.’ (1 Akor 2:9, 10) Tani kuyamba pfunziro ya pamwekha kuti mumufenderere maninge Yahova? Mwakulinganiza, imwepo mungaone momwe Yahova adawonesera chikondi chake kwa atumiki wake wokhulupirika wakumbuyo na momwe achaoneserapomwe kuti achakukondani. Mungapfunzirepomwe va momwe dongosolo ya kupemphera chaiko yenzere mu nthawe ya Aizirayeli na momwe iye ankufunira kuti timbamutumikirire manjeuno. Panango mungapfunzirepomwe va mapolomisi yomwe Yesu adakwanirisa pomwe wenze pano padziko yapasi.

5. Ko pa na nkhani zinango zomwe imwepo mungakonde kuzipfunzira mozama?

⁵ Abale anango omwe akonda kupfunzira Baibolo adafotokoza nkhani zomwe iwo achakonda kuzidziwa bwinobwino. Vinango vomwe adanena vigumanika mu bokosi yakuti “ vomwe mungachite pa pfunziro ya pamwekha.” Imwepo mungaphatise basa Índice das publicações da torre de vigia panango Bukhu yofagira ya Mboni za Yahova. Imwepo mudzaone kuti kuphatisa basa vinthu vimwevi, vidzachitise kuti pfunziro yanu ikhale yokomedza maninge. Kupfunzira mpfundo zozama zimwezi za m’Baibolo vidzakuthandizeni imwepo kulimbisa chikhulupiriro chanu na ‘kudziwa maganizo ya Mulungu.’ (Miy. 2:4, 5) Naboni tione nkhani zinango zozama za m’Baibolo zomwe imwepo mungafunikire kuzipfunzira.

6. (a) Ko pali kusiyana kuponi pakati pa mapulani na cholinga? (b) Ndawa chani tinganene kuti cholinga cha Yahova kwa wanthu na dziko chidzakhalepo ‘mpakana kalekale’? (Aefeso 3:11)

⁶ Mwakulinganiza, onani vomwe Baibolo  ichanena va cholinga cha Yahova. Pali kusiyana kukulu pakati pa mapulani na cholinga. Linganizani kuti imwepo munkufuna kuchita ulendo, tingalinganize mapulani ninge njira yomwe imwepo munkufuna kuphatisa basa kuti mukafike komwe munkuyenda. Pulani yanu mweyi ingasokonezeke ninge momwe njira ingakhalire yofungiwa. Pomwe cholinga tingachilinganize na komwe imwepo munkuyenda, imwepo mukhala munkudziwa bwinobwino komwe munkuyenda ndipo mungaphatise basa njira inango kuti mukafike komwe munkuyenda. Mungachinje vinthu vinango kuti mukafike komwe munkuyenda. Ni vabwino kuti Yahova pang’onopang’ono ankuulula va ‘cholinga chake’ m’Baibolo. Mu njira inango ‘Yahova adalenga chilichose na cholinga’ ndawa yakuti vose vichachitika mwa kufuna kwake. (Miy. 16:4) Vose vomwe Yahova achachita vichakhala mpakana kalekale. Koma ko cholinga cha Yahova ni chiponi ndipo adachinja vinthu viponi kuti akwanirise cholinga mwechi?

7. Pambuyo pakuti Adamu na Hava wachimwa, ko Yahova adachinja vinthu viponi? (Mateyu 25:34)

⁷ Mulungu adauza banja yoyambirira va cholinga chake kwa iwo. Mulungu adawauza kuti ‘Mubalane muwande mudzadze dziko . . . ndipo munyang’anirepomwe vamoyo vose’ va padziko yapasi. (Gen. 1:28) Kusabvera kwa Adamu na Hava wanthu wose adakhala wochimwa, koma vimwevi viribe kuchitisa kuti cholinga cha Yahova chichinje. Iye adachinja njira yomwe angakwanirisire cholinga chimwechi. Magole yazinji kumbuyo iye adakhazikisa Ufumu kudzulu womwe udzathandize kukwanirisa cholinga chake kwa wanthu pa dziko yapasi. (Werengani Mateyu 25:34.) Ndawa ya chikondi Yahova adatumiza mwana wake woyamba kubadwa pano padziko yapasi pa nthawe yomwe adayikhazikisiratu. Mwanjira mweyi Yesu adakwanisa kupfunzisa wanthu va Ufumu na kupereka moyo wake kupulumusa wanthu ku uchimo na impfa. Patsogolo pake Yahova adamukisa Yesu kuti abwerere kudzulu kuti akalamulire ninge Mpfumu ya Ufumu wa Mulungu. Koma pa na vinthu vizinji vomwe imwepo mungapfunzire va Ufumu wa Mulungu.

8. (a) Ko nkhani ikulu ya m’Baibolo ni iponi? (b) Mobverana na Aefeso 1:8-11, ko cholinga chikulu cha Yahova ni chiponi? (Onani foto ya pakhava.)

⁸ Nkhani ikulu ya m’Baibolo ni yakuti dzina ya Yahova idzachenesewe, vimwevi vidzakwanilisike iye akadzakwanilisa cholinga chake padziko yapasi pakuphatisa basa Ufumu wake wotongewa na Yesu Khrisitu. Cholinga cha Yahova chingachinjiwelini. Yahova adapolomisa kuti vose vidzakwanirisiwe ndendende ninge momwe iye adanenera. (Yes. 46:10, 11; Aheb. 6:17, 18) Nkuyenda kwa nthawe dziko idzakhale paradaiso ndipo wana waungwiro na wachilungamo wa Adamu na Hava ‘adzakondwe na moyo mpakana kalekale.’ (Sal. 22:26) Koma Yahova anavizinji vomwe ankufuna kutichitira. Cholinga chake chikulu ni chakuti, atumiki wake wa pa dziko yapasi na kudzulu ambamutumikire mobverana. Ose adzakhale okhulupirika, obvera Yahova ninge ntongi wa vinthu vose. (Werengani Aefeso 1:8-11.) Ko imwepo mukhala wodabwa mukambaona momwe Yahova ankukwanirisira cholinga chake?

9. Ko kupfunzira Baibolo, kungatithandize tani kudziwa vakutsogolo?

⁹ Onani ulosi wa Yahova wa m’munda wa Edeni womwe uli pa Genesis 3:15. b Lemba mweyi ifotokoza va kukwanirisiwa kwa ulosi wa Mulungu womwe umbadzakwanirisiwa pambuyo pa magole mamidyau yazinji. Iye adauza Abulahamu kuti mu mbewu yake ndimo mudzachoke Mesiya. (Gen. 22:15-18) Mu  33 Yesu ali pano pa dziko yapasi, iye adapwetekewa katendeni, ninge momwe vidaloselewera. (Mac. 3:13-15) Mbali yakumalizira ya ulosi moyu, panango kuti Satana adzaphwanyiwe nsolo, udzakwanirisiwe pambuyo pa magole 1000 ya utongi wa Yesu. (Chiv. 20:7-10) Baibolo ichafotokoza bwinobwino vomwe vidzachitike komasoti chidani chomwe chidzakhalepo pakati pa Satana na gulu ya Yahova.

10. (a) Ko nchani chichitike manjemanje? (b) Ko tingakonzekerese tani maganizo na nzeru zathu? (Onani mawu ya mnyantsi.)

¹⁰ Ganizirani vochitika vodabwisa vimwevi vomwe Baibolo ichanena. Chakuyamba, makhaindi ya wanthu yadzalengeze va ‘bata na ntendere!’ (1 Ates. 5:2, 3) ‘Pa nthawe mweyo,’ chisautso chikulu chidzayambe pomwe makhaindi ya wanthu yadzadzonge vipembedzo vose va bodza. (Chiv. 17:16) Patsogolo pake ‘mwana wa munthu adzabwere m’mitambo na mphanvu na ulemelero ukulu.’ (Mat. 24:30) Yesu adzaweruze makhaindi ya wanthu mwa kugawa nkhosa na mbuzi. (Mat. 25:31-33, 46) Olo viri tene Satana adzagonjelini, na chidani chikulu iye adzachitise kuti m’bverano wa maboma womwe Baibolo ichati Gogi wa kudziko ya Magogi, udzaukire wanthu wa Mulungu. (Ezek. 38:2, 10, 11) Ni pa nthawe mweyi, pomwe Akhrisitu wodzodzewa omwe adzakhale akali pano pa dziko yapasi adzatengewe nkuyenda kudzulu. Iwo pabodzi na Yesu na gulu yake ya nkhondo, adzamenye nkhondo ya Aramagedo yomwe ni mbali yomaliza ya chisautso chikulu. c (Mat. 24:31; Chiv. 16:14, 16) Pa mbuyo pa vimwevi utongi wa Yesu wa magole 1000 udzayambe pano padziko yapasi.—Chiv. 20:6.

11. Ko imwepo muchabva tani mukaganizira kuti mudzakhale na moyo mpakana kalekale? (Onani pomwe foto.)

¹¹ Manje, ndoganizaniko pang’ono momwe moyo udzakhalire pambuyo pa magole 1000. Baibolo ifotokoza kuti Mulengi wanthu ‘adayikha m’mitima [yathu] maganizo yofuna kukhala na moyo mpakana kalekale.’ (Mla. 3:11) Ganizirani momwe vimwevi vichakukhudzirani imwepo komasoti ganizirani va ushamwali wanu na Yahova. Bukhu yakuti Yandikirani kwa Yehova, pa tsamba 319, itichitisa chidwi ikambanena kuti: “Pambuyo pakuti takhala  na moyo kwa magole mamidyau yazinji, tidzadziwe vizinji va Yahova kuposha vomwe tinkudziwa manjeuno. Koma podiya vidzakhale tene tidzabve kuti pa na vinthu vizinji vomwe tichadekana kuvipfunzira. . . . Moyo wosapera chidzakhale chinthu chokomedza maninge komasoti chosalinganizika. Ndipo chinthu chikulu maninge chomwe Yahova adzatidalise nacho ni kufuna kuti nthawe zose timbamufenderere.” Pomwe tinkuchita vimwevi tipitiriza kupfunzira Mawu ya Mulungu.

12. Ko Baibolo ichanena chani vakudzulu? Perekani chitsanzo.

¹² Baibolo ifotokozalini vose va kufika kwa ntsiku ya Yahova, koma ichafotokoza momwe kudzulu kulili na momwe Yahova ‘alili wapadzulu maninge.’ (Yes. 33:5) Baibolo inena vinthu vodabwisa pakunena va Yahova na gulu yake ya kudzulu. (Yes. 6:1-4; Dan. 7:9, 10; Chiv. 4:1-6) Mwakulinganiza, isepano tingawerenge vinthu vodabwisa vomwe mneneri Ezekieli adaona pomwe ‘kudzulu kudafunguka ndipo [iye] adayamba kuona masomphenya ya Mulungu.’—Ezek. 1:1.

13. Ko imwepo muchabva tani mukadziwa vomwe Yesu ankutichitira kuchokera kudzulu? (Aheberi 4:14-16)

¹³ Ganizirani vomwe Yesu ankuchita kudzulu ninge Mpfumu yathu na nkulu wantsembe. Iye atidziwa bwino maninge. Ndawa ya iye isepano tikwanisa kufika ‘kumpando Wachifumu wa kukoma ntima kosapera’ kwa Mulungu mpemphero kukumbira kuti atikhululukire vophonya vathu nakuti atithandize pa nthawe yomwe ‘tinkudekana thandizo.’ (Werengani Aheberi 4:14-16.) Ayi kubvuma kuti ntsiku ipitiremo osaganizira vomwe Yahova na Yesu adatichitira na vomwe ankutichitira kuchokera kudzulu. Chikondi chawo chichadekana kutikhudza isepano na kutilimbikisa kuchita vomwe tingakwanise pa kutumikira Yahova.—2 Akor. 5:14, 15.

14. Ko ni njira yabwino iponi yomwe tingawonesere kuti tinkutembeja vomwe Yahova na Yesu ankutichitira? (Onani pomwe mafoto.)

 ¹⁴ Njira ibodzi yomwe tingawonesere kutembeja vomwe Yahova na Yesu adatichitira ni kuchita vomwe tingakwanise pa kuthandiza wanthu anango kuti akhale wa Mboni za Yahova na kuti akhale ateweri wa Yesu. (Mat. 28:19, 20) Ni vimweviretu vomwe mtumi Paulo adachita pakuonesa kutembeja Yahova na Yesu. Iye ambadziwa kuti Yahova ankufuna kuti ‘wanthu wa makhaindi yose apfunzire chonadi nakuti adzapulumuke.’ (1 Tim. 2:3, 4) Iye adayesesa kuchita khama pakuthandiza wanthu anango ndipo adayesesa kuchita vose vomwe angakwanise pa kulalikira, kuthandiza wanthu kuti ‘mulimose momwe vingakhalire apulumuse anango.’—1 Akor. 9:22, 23.

15. Mobverana na Salimo 1:2, Ko nchani chomwe chichatikondweresa?

¹⁵ Wamasalimo adafotokoza bwinobwino va munthu yemwe akonda kupfunzira Mawu ya Mulungu. Iye adanena kuti, munthu moyu akhala wokondwa ndawa ‘kukondwa kwake kuchokera pa chilamulo cha Yahova’ ndipo iye ‘aganizira va chilamulo chimwechi usiku na masikati.’ (Sal. 1:1-3) Pakufotokozera lemba mweyi, womasulira Baibolo munango dzina yake Joseph Rotherham adanemba mu bukhu yake ya Estudo dos salmos ya chingelezi kuti: “Munthu achadekana kumbakondwa na malangizo yaumulungu, kuyafagafaga, kupfunzira na kupatula nthawe kumbayaganizira.” Iye adapitiriza kunena kuti: “Munthu angawerengere ntsiku iliyose yomwe wamala osawerenga Baibolo ndipo achabvalini bwino mu ntima mwake.” Imwepo mungambakonde kuwerenga Baibolo mukambachita chidwi na nkhani zikuluzikulu na momwe zikumbveranirana na nkhani zinango. Kudziwa mpfundo iliyose ya m’Mawu ya Mulungu ni chinthu chomwe chitikondweresa maninge.

16. Ko munkhani inkubwera tidzapfunzire chani?

¹⁶ Mpfundo zabwino zomwe Yahova atipfunzisa m’Mawu yake ni zosashupa kuzibvesesa. Munkhani yomwe inkubwera, tidzapfunzire ibodzi mwa nkhani zozama mwezi yomwe ni kachisi nkulu wa Yahova yomwe mtumi Paulo adanemba mu kalata yake yoyenda kwa Aheberi. Imwepo mudzakondwe maninge kupfunzira va nkhani mweyi.