1-2. Ia ahl me keieu mwahu en wadek oh onopki Paipel? Menlau kihda ehu karasaras.

 MEDEWEHLA me ke pilahne en pwainda ihmw ehu. Dahme ke pahn men kilang mwohn omw pilada en wia met? Ia duwe, ke pahn men kilangete kilel en mwohn ihmwo? Ke uhdahn pahn men kohla oh pein kilang ihmwo pwe ken kak aluseli likin ihmwo, pedolongala loale oh kasawih pere ko koaros, oh kilang wasa koaros nan ihmwo. Ele ke pil men kilang pilahn en ihmwo ong ia duwen eh kokouda. Ei, ke uhdahn men kilang wasa koaros en ihmwo me ke men pwaindao.

² Kitail pil kak wia duwehte met ni atail wadek oh onopki Paipel. Emen me samanih Paipel koasoia me Paipel duwehte “ihmw laud ehu me inenen ileile oh me kokouda pohn poahsoan loal ehu.” Eri, ia duwen atail kak esehla mwahu Paipel? Ma ke sohte kin wadek Paipel ni wawai, ele ke pahn esehlahte ire mengei kan—“keieun padahk kan duwen sapwellimen Koht mahsen sarawi.” (Ipru 5:12) Ahpw duwehte omw pahn pedolongala nan ihmw ehu pwehn esehla mwahu duwen ihmwo, ke pil anahne onopki mwahu Paipel pwehn kalaudehla omw wehwehki. Ehu ahl me keieu mwahu en onopki Paipel iei en kilang ia duwen ire kan nan Paipel ar dokpene. Nantihong en wehwehkihla kaidehn ihte dahme ke kamehlele ahpw pil dahme kahrehda ke kamehlele.

3. Dahme wahnpoaron Pohl kangoangehki ienge Kristian ko ren wia, oh dahme kahrehda? (Episos 3:​14-19)

³ Pwehn wehwehkihla douluhl soahng koaros en Mahsen en Koht, kitail anahne sukuhlki padahk loal kan en Paipel. Wahnpoaron Pohl kangoange rie Kristian kan en pwerisekiong arail onopki Mahsen en Koht pwe irail en kak “wehwehkihla douluhl uwen tehlap oh uwen reirei oh uwen ile oh uwen loal” en padahk mehlel. Eri arail pwoson pahn kak “poadidi oh kokouda  teng.” (Wadek Episos 3:​14-19.) Kitail pil anahne wia duwehte. Kitail pahn kilang ia duwen atail kak onopki kanahieng Mahsen en Koht pwehn uhdahn wehwehkihla mwahu.

4. Dahme kitail kak wia pwehn kalaudehla atail karanihala Siohwa? Menlau kihda karasaras kan.

⁴ Nin duwen Kristian kei, kitail sohte men wehwehkilahte padahk mengei kan en Paipel. Pwehki sawas sang sapwellimen Koht manaman, kitail kin men sukuhlki “pil ire loal kan en Koht.” (1 Kor. 2:​9, 10) Ke sou wiahda omw koasoandi en pein onop de wia roporop me pahn kalaudehla omw karanihala Siohwa? Karasepe, ke kak onopki kanahieng duwen eh kin ketin kasalehda sapwellime limpoak ong sapwellime ladu kan mahso, oh ia duwen met eh kadehdehda me e pil kin ketin poakohng uhk. Ke pil kak onopki duwen sapwellimen Siohwa koasoandi ong kaudok nan Israel oh kapahrekiong koasoandi en kaudok en Kristian kan rahnwet. De ke kak onopki kanahieng soahng pisetik kan duwen kokohp kan me Sises ketin kapwaiada erein eh mour nin sampah.

5. Mie oaralap ehu me ke men onopki kanahieng?

⁵ Ekei irail kan me kin perenki wia roporop koasoiahda soahng kei me re men onopki ni mengihtik. Ke kak kilang ekei soahng kan me irail koasoia nan koakono “ Oaralap kan me Ke Kak Onopki.” Ke kak uhdahn perenki omw onopki oaralap pwukat sang ni omw doadoahngki Sawas ong Wia Roporop en Sounkadehdehn Siohwa kan de Watch Tower Publications Index. Omw onopki kanahieng Paipel kak kakehlakahla omw pwoson oh seweseiuk en “diar loalokong me pid duwen Koht.” (Lep. Pad. 2:​4, 5, NW) Met kitail pahn koasoiapene ekei padahk loal kan en Paipel me kitail kak onopki kanahieng.

6. (a) Ia wekpeseng en pilahn ehu oh koasoandi ehu? (b) Dahme kahrehda kitail kak nda me kupwuren Siohwa ong aramas akan oh sampah kin “poatopoat”? (Episos 3:11)

⁶ Karasepe, medewehla dahme Paipel mahsanihki duwen sapwellimen Koht koasoandi. Siohwa sohte ketin duwehte aramas me pilada ahl ehu en kahluwairaillahng wasa me re pahn  lel ie, ahpw ma mehkot perehla ahlo, irail sohte kak lella wasao. Weksang met, sapwellimen Siohwa koasoandi kin duwehte wasao me re pahn lella ie. E ketin koasoanedier wasa me e pahn ketila ie, ahpw e kak ketin doadoahngki ahl teikan pwehn lella wasao. Kalahngan ehu me Siohwa kin ketin ekisekis kasalehda sapwellime “koasoandi poatopoat” nan Paipel. (Ep. 3:11) Siohwa kak ketin pilada soangsoangen ahl akan pwehn kapwaiada sapwellime koasoandi, oh kin ahnsou koaros pweida. Met pwehki e kin ketin “doadoahngki soahng koaros pwe kupwure en pweida.” (Lep. Pad. 16:​4, NW) Oh imwilahn dahme Siohwa kin ketin wiahda pahn kin poatopoat kohkohlahte. Ia sapwellimen Siohwa koasoandi, oh wekidekla dah kan me e ketin wiahda pwehn kapwaiada kupwureo?

7. Mwurin tepin aramas ako pelianda Koht, ia duwen Siohwa eh ketin wekidala mwomwen eh pahn kapwaiada kupwureo? (Madiu 25:34)

⁷ Koht ketin mahsanihong tepin aramas ako dahme e ketin kupwurki ong ira. Ira pahn ‘kaparaparala pwe kadaudokara kan pahn kousoanla wasa koaros nin sampah oh kaunda menmour koaros’ nin sampah. (Sen. 1:28) Ni Adam oh Ihp ara pelianda Koht, me kahrehda dihp en lelohng aramas koaros, met sohte kak kauhdihsang Siohwa en ketin kapwaiada kupwureo. E ketin wekidala mwomwen eh pahn ketin kapwaiada kupwure. Mwurinte mwo, e ketin koasoanehdi teng en kauwada Wehi ehu nanleng me pahn kapwaiada dahme e ketin kupwurki nin tapio ong aramas oh sampah. (Wadek Madiu 25:34.) Ni ahnsou me e ketin koasoanehdi, Siohwa ketin ni limpoak poaronehdo sapwellime Meseniho nin sampah pwehn padahkihong aramas akan duwen Wehio oh toukihda moure pwehn doarehla kitail sang dihp oh mehla. Siohwa eri ketin kaiasada Sises ong nanleng pwehn kaunda nin duwen Nanmwarki en Wehin Koht. Ahpw pil miehte soahng teikan me kitail kak sukuhlki duwen sapwellimen Koht koasoandi.

8. (a) Ia oaralap en Paipel? (b) Nin duwen me Episos 1:​8-11 mahsanih, dahme Siohwa pil pahn ketin kapwaiada? (Menlau kilang kilel ni kilin Kahn Iroir wet.)

⁸ Oaralap en Paipel iei me pid uwen mwaren Siohwa eh pahn sarawihla ahnsou me Koht pahn ketin kapwaiada kupwure nin sampah ni eh ketin doadoahngki sapwellime Wehio me Krais ketin kakaun. Sapwellimen Koht koasoandi sohte kak wekila. E ketin inoukidahr me soahng koaros pahn pweida nin duwen me e ketin mahsanih. (Ais. 46:​10, 11; Ipru 6:​17, 18) Sampah pahn wiahla paradais ehu, wasa me kadaudok en Adam oh Ihp unsek oh pwung kan pahn kin “paiamwahu kohkohlahte.” (Mel. 22:26) Ahpw kaidehn ihte met me Siohwa pahn ketin wia. E pil pahn ketin kaminiminpene sapwellime ladu kan koaros nanleng oh nin sampah. Eri koaros nanleng oh nin sampah pahn peikiong Siohwa ni loalopwoat oh wiahki ih arail Kaun. (Wadek Episos 1:​8-11.) Ke seu pwuriamweiki uwen kaselel en Siohwa eh ketin kapwaiada kupwure?

9. Sang ni atail kin wadek Paipel, ia uwen laud en atail kak medewehla duwen ahnsou kohkohdo?

⁹ Medewehla kokohpo me Siohwa ketin wiahda nan mwetuwel en Ihden, me kileldi nan Senesis 3:15. b E dokedoke mwekid kan me pahn kapwaiada kupwure. Ahpw, met sohte pahn wiawi lao mwurin sounpar kid kid kei. Karasepe, Koht ketin mahsanihong Eipraam me, mwurin dih tohto, emen kadaudoke ko pahn wiahla Krais. (Sen. 22:​15-18) Mwuhr nan pahr 33, keimwen nehn Siseso ohla, nin duwen  me kokohpda. (Wiewia 3:​13-15) Kaimwiseklahn kokohpo, me pid kadaudoko eh pahn kamwutepene moangen Sehdan, pahn wiawi daulih sounpar 1,000 sang ahnsou wet. (Kaud. 20:​7-10) Paipel pil kasalehda soahng teikan duwen dahme pahn wiawi ni ahnsou me imwintihtipene en koasoandi en Sehdan oh sapwellimen Siohwa pwihn pahn imwisekla.

10. (a) Mwekid dah kan me pahn kereniong wiawi? (b) Ia duwen atail kak kaunopada atail madamadau oh mohngiong? (Menlau kilang nting tikitik kan me kileldi.)

¹⁰ Medemedewe duwen mwekid kapwuriamwei pwukat me Paipel kohpada. Keieu, wehi kan pahn pakairki “popohl oh sohte keper!” (1 Des. 5:​2, 3) Kahn kamakam kowahlapo pahn “mwadangete” tepida ni ahnsou me wehi kan pahn uhwongada pelien lamalam likamw koaros. (Kaud. 17:16) Mwurin mwo, ele pahn mie manaman kapwuriamwei ehu me pahn kasalehda “Nein-aramas eh pahn ketiket kohdo pohn depwek en pahnlahng ni manaman oh lingan lapalahpie.” (Mad. 24:30) Sises pahn ketin kadeikada aramas akan, oh katohrepeseng sihpw kan sang kuht kan. (Mad. 25:​31-33, 46) Erein ahnsowo, Sehdan pahn doulahte pelian Siohwa. Pwehki e uhdahn kailongki sapwellimen Koht aramas akan, e pahn kamwakid pwihn en wehi kan me Paipel kahdaneki Kok en sapwen Makok pwehn uhwongada sapwellimen Siohwa aramas akan. (Esek. 38:​2, 10, 11) Ahnsou ehu erein mepwukat ar wiewiawi, luhwen me keidi kan pahn pwekipwekdahla nanleng pwehn iang Krais oh sapwellime karis en nanleng kan en pei nan mahwen en Armakedon, me pahn kaimwisekala kahn kamakam kowahlapo. c (Mad. 24:31; Kaud. 16:​14, 16) Mwurin mwo, Kaundahn Krais Pahr Kido pahn tepida kaunda sampah pwon.—Kaud. 20:6.

11. Ia wehwehn koapworopwor en mour soutuk ong kowe? (Pil kilang kilel.)

¹¹ Pil medewehla ahnsou kohkohdo kan me daulih pahr kido. Paipel mahsanih me Sounkapikpatailo “ketikihong [kitail] ineng en mour kohkohlahte.” (Ekl. 3:​11, NW) Medewehla ia wehwehn met ong kowe oh omw nanpwungmwahu rehn Siohwa. Pwuhko  Draw Close to Jehovah, pali 319, koasoiahda mehkot kaperen ni eh koasoia: “Mwurin atail pahn mourki sounpar kid kei, rar kei, pil lik kei, atail esehla Siohwa Koht pahn uhdahn laudsang dahme kitail ese met. Ahpw kitail pahn ahnekihte pepehm me mie soahng tohto teikan me kitail kak sukuhlki duwen ih. . . . Kitail sohte kak uhdahn medewehda uwen kaselel oh kaperen en mour nan paradais ni ahnsowo. Oh atail karanihala Siohwa pahn kin ahnsou koaros wia mehkot me keieu kaselel.” Ahpw met ni atail pousehlahte onopki Mahsen en Koht, dahme kitail pil kak onopki kanahieng?

12. Ia duwen atail kak kilengdalahng nanleng? Menlau kihda ehu karasaras.

¹² Mahsen en Koht ekis kasalehda ia mwomwen “wasa ileile” me Siohwa kin ketiket ie. (Ais. 33:​5, NW) Paipel kasalehda soahng kapwuriamwei kan duwen Siohwa oh sapwellime pwihn nanleng. (Ais. 6:​1-4; Dan. 7:​9, 10; Kaud. 4:​1-6) Karasepe, kitail kak wadek duwen soahng kapwuriamwei kan me Esekiel kilangada ni ahnsou me “pahnlahng ahpw ritpeseng, [ih] eri kilangada Koht nan kaudiahl ehu.”—Esek. 1:1.

13. Dahme ke kalahnganki duwen pwukoa me Sises sapwellimanki nanleng, nin duwen me Ipru 4:​14-16 kawehwehda?

¹³ Pil medewehla duwen pwukoa me Sises sapwellimanki nin duwen atail Nanmwarki oh Samworo Lapalap me limpoak. Pwehki ih, kitail kak pato ni kapakap mwohn sapwellimen Koht “mwoalen kadek sapan” oh peki mahk kalahngan oh sawas “ni ahnsou me kitail anahne.” (Wadek Ipru 4:​14-16.) Rahn koaros kitail anahne medemedewe duwen dahme Siohwa oh Sises ketin wiadahr oh pil wiewia ong kitail sang nanleng. Sapwellimara limpoak ong kitail uhdahn anahne sair atail mohngiong oh kamwakid kitail en ngoangki kaudokiong Siohwa.—2 Kor. 5:​14, 15.

14. Ia ehu ahl me keieu mwahu me kitail kak wia pwehn kasalehda uwen atail kalahnganki Siohwa oh Sises? (Pil kilang kilel kan.)

 ¹⁴ Ehu ahl me keieu mwahu en kasalehda uwen atail kalahnganki atail Koht oh sapwellime Ohlo iei en nantihong en sewese meteikan wiahla sapwellimen Siohwa Sounkadehde kan oh tohnpadahk en Sises. (Mad. 28:​19, 20) Ih met me wahnpoaron Pohl wia pwehki e kalahnganki Koht oh Krais. E ese me kupwuren Siohwa iei me “soangen aramas koaros en komourla oh esehla loalokong pwung en me mehlel.” (1 Tim. 2:​3, 4) E uhdahn doadoahk laud nan eh doadoahk en kalohk pwehn sewese aramas tohto ni uwen me kak pwe en kak ‘doarehla ekei ni uwen eh kak koaros.’—1 Kor. 9:​22, 23.

15. Nin duwen me Melkahka 1:2 mahsanih, dahme pahn kaperenda kitail?

¹⁵ Sounnting en keieun melkahkao koasoia me aramas peren oh pweida mwahu men kin “perenki peikiong Kosonned en KAUN-O” oh kin “medemedewe nan kapehdihr nin rahn oh nipwong.” (Mel. 1:​1-3) Emen sounkawehwehn Paipel me adaneki Joseph Rotherham koasoiahki iretikitik pwukat me emen anahne “uhdahn men ale sapwellimen Koht kaweid me kahrehda e pahn rapahki, onopki, oh doadoahngki ahnsou laud en medemedewe.” E pil koasoia me “ma rahn ehu nekla oh emen sohte wadek Paipel, e pahn kauwehla mwahl rahno.” (Studies in the Psalms) Ke kak perenki omw onopki Paipel sang ni omw nsenohki esehla ire pisetik tohto loale oh kilang ia duwen arail dokpene. Ia uwen kaperen en wehwehkihla douluhl Mahsen en Koht!

16. Dahme kitail pahn koasoiapene nan iren onop en mwuhr?

¹⁶ Padahk mehlel kaselel kan me Siohwa ketin padahkihong kitail nan sapwellime Mahsen sohte uhdahn apwal ong kitail en wehwehki. Nan iren onop en mwuhr, kitail pahn koasoiapene duwen sapwellimen Siohwa tehnpas sarawi lapalapo, me Pohl kawehwehda nan nah kisinlikowo ong Kristian mehn Ipru ko. Met wia ehu padahk loal en Paipel. Se koapworopworki me ke pahn uhdahn perenki omw onopki met.