1-2. Kal ki minjor manera di lei i studa Biblia? Bu pudi da un isemplu.

 IMAẐINA kuma bu misti kumpra un kasa. Ke ku bu na misti jubi antis di kumpral? Sera ki so un foto di fora di kasa? Sin duvida, bu na misti bai la propi, entra dentru i jubi tudu kuartus, ku tudu partis di kasa. I te mesmu bu pudi misti jubi planta, pa sibi kuma ki kumpudu. Ku sertesa, bu na misti jubi diritu tudu partis di bu futuru kasa.   

² No pudi fasi mesmu kusa ora ku no na lei i studa Biblia. Un spesialista na asuntu di Biblia kompara mensaẑen di Biblia ku “un kasa garandi i altu, ku tene bon fundason.” Ma, kuma ku no pudi kunsi diritu tudu ke ku sta na Biblia? Si bu lei rapidu talves bu na aprindi so kusas simplis, ku sedu “purmeru nsinamentu di palabra di Deus.” (Eb 5:12) En ves di kila, suma na komparason di kasa, entra “dentru” pa jubi tudu kusas. Un bon manera di studa Biblia i jubi kal ligason ku si manga di parti tene ku n̈utru. Fasi sforsu pa ntindi ke ku bu fia nel i pabia ku bu fia nel.

3. Ke ku apostolu Paulu fala si ermons kristons pa e fasi, i pabia di ke? (Efésius 3:​14-19)

³ Pa ntindi diritu Palabra di Deus no dibi di aprindi bardadis fundu ku sta na Biblia. Apostolu Paulu fala si ermons ku irmas kristons pa e studa Palabra di Deus diritu, asin e na pudi “ntindi diritu kal ki largura, kumprimentu,  altura ku fundura” di bardadi. Si e fasi es, se fe na tene “rais ku alisersu fundu”. (Anos ku pui letras karegadu ku italiku, lei Efésius 3:​14-19.) Anos tambi no pirsisa di fasi mesmu kusa. Gosi, no jubi kuma ku no pudi studa diritu Palabra di Deus pa ntindi ben si mensaẑen.

4. Ke ku no pudi fasi pa pertusi mas di Jeova? Da isemplus.

⁴ Suma kristons, no ka ta kontenti so di ntindi bardadis simplis di Biblia. Ku ajuda di spiritu santu di Deus, no tene vontadi di aprindi “tudu kusas, te na fundura di Deus.” (1 Kor 2:​9, 10) Pabia ku bu ka na kumsa un projetu di studu pesual ku na judau pertusi mas di Jeova? Pur isemplu, sera ki bu pudi fasi piskisa di kuma ku Jeova mostra amor pa si servus di pasadu i kuma ku kila ta mostra di kuma i amau tambi. Bu pudi tambi studa kuma ku Jeova mistiba pa israelitas adoral, i kompara kila ku kuma ki misti pa no adoral aos. O talves bu pudi studa profesias ku Jesus kumpri duranti si ministeriu na Tera.

5. Sera ki i ten un asuntu ku bu misti piskisa na bu studu pesual?

⁵ Alguns ku gosta di fasi piskisa fundu, puntadu kal kusas mas fundu ke gostaba di studa na Palabra di Deus. Alguns di se resposta sta na kuadru “ Asuntus pa studu pesual.” Bu pudi tene kontentamentu di studa es asuntus ku ajuda di Índice das Publicações da Torre de Vigia o Gia di Piskisa pa Tustumuñas di Jeova. Fasi un studu fundu di Biblia pudi torna bu fe mas forti i judau “oca kunsimentu di Deus.” (Dit 2:​4, 5) No jubi gosi alguns bardadi fundu di Biblia ku no pudi studa.

6. (a) Kal diferensa ku ten entri planu ku intenson? (b) Pabia ku no pudi fala kuma intenson di Deus pa pekaduris ku Tera i “iternu”? (Efésius 3:11)

⁶ Pur isemplu, jubi ke ku Biblia fala aserka di intenson di Deus. I ten diferensa entri un planu ku un intenson. Un  planu i suma un kamiñu fiksu ku pudi lebau pa un kau ku bu disidi bai. Ma, planu pudi falia si un kusa taja kamiñu ku bu dibi di bai. Un intenson ta konsentra na kau ku bu na bai. No sibi diritu kal kau ku no misti bai, ma no pudi toma diferentis kamiñu pa ciga la. Si algun kusa taja un kamiñu no ta bai utru kamiñu. Na Biblia, Jeova konta puku puku si “planu [‘intenson’, TNM] iternu”. (Ef 3:11) Di kualker manera, Jeova ta sai sempri ben pabia i “kumpu tudu kusas pa se propi fin”. (Dit 16:4) Pa kila, rusultadu di tarbaju di Jeova ta fika pa sempri. Kal ki intenson di Jeova, i kal mudansas ki fasi pa pudi kumpril?   

7. Dipus ku purmeru pekaduris rebela, kal mudansa ku Jeova fasi pa pudi kumpri si intenson? (Mateus 25:34)

⁷ Deus konta purmeru pekaduris kal intenson ki tene pa relis. I fala elis: “Bo padi ciu, bo inci mundu, bo manda riba del. Bo manda riba di . . . tudu limarias” ku sta na Tera. (Kum 1:28) Intenson di Jeova ka maina, oca ku Adon ku Eva rebela, e tisi pekadu pa tudu se fijus. Jeova fasi mudansa pa pudi yangasa si objetivu. Logu-logu, i disidi firmanta un Renu na seu ku na bin kumpri intenson ki teneba pa pekaduris i pa Tera. (Lei Mateus 25:34.) Na tempu ki marka, ku amor, Jeova manda si uniku fiju pa nsina jintis aserka di ki Renu, i pa da si vida pa libranu di pekadu ku mortu. Dipus Jesus lantandadu i bai pa seu, i na manda suma Rei di Renu di Deus. Ma i ten inda manga di utru kusas ku no pudi aprindi aserka di intenson di Deus.   

8. (a) Kal ki tema di Biblia? (b) Di akordu ku Efésius 1:​8-11, ke mas ku Jeova na fasi? (Jubi diseñu ku sta na kapa.)

⁸ Tema prinsipal di Biblia i difindi nomi di Jeova, nkuantu i na kumpri si intenson pa pekaduris atraves di si Renu, ku tene suma Rei Jesus Kristu. Intenson di Jeova ka pudi mudadu. I purmiti di kuma i na kumpri tudu ke ki i fala. (Isa 46:​10, 11; Eb 6:​17, 18) Tera na bin torna un paraísu, nunde ku pekaduris justu i perfeitu na tene vida “pa sempri.” (Sal 22:26) Alen des, Jeova tene utru intenson mas garandi. I na uni tambi tudu si servus na seu ku Tera. Dipus, tudu jintis na obdisi Jeova suma se Guvernanti. (Lei Efésius 1:​8-11.) Sera ki bu ka fika dimiradu manera ku Jeova sta na kumpri si intenson?

9. Lei Biblia ta judanu sibi kal kusas aserka di futuru?

⁹ Pensa na profesia ku Jeova fasi na jardin di Eden ku sta na Kumsada 3:15. b Es profesias fala di kusas ku na bin kontisi pa kumpri intenson di Deus. Ma es kusas na bin kontisi so dipus di milyaris di anu. Pur isemplu, Deus fala Abraon di kuma, dipus di manga di ẑerason, un algin di si jorson na bin sedu Kristu. (Kum 22:​15-18) Dipus, na 33 EK, Jesus murdidu na kalkañada suma ki profetisadu. (At 3:​13-15) Ultimu kontisimentu des profesia, i di kuma Satanas na bin masadu na kabesa, es na kontisi li ku mas di 1.000 anu. (Apok 20:​7-10) Biblia konta ke ku na kontisi nkuantu inimisadi di mundu di Satanas ku organizason  di Jeova na pertusi di si mumentu mas importanti.

10. (a) Kal kusas ku na bin kontisi nin i ka na tarda? (b) Kuma ku no pudi purpara no menti ku no korson? (Jubi nota.)

¹⁰ Pensa nes kontisimentus garandi ku Biblia fala del. Purmeru, nason na fala tudu sta “susegadu, suguru”! (1 Tes 5:​2, 3) Garandi tribulason na kumsa “di repenti,” ora ku nasons ataka tudu riliẑions falsu. (Apok 17:16) Dipus des, i na kontisi un kusa milagrosu nunde ku “Fiju di omi na bin riba di nuvens di seu, ku puder ku garandi gloria.” (Mat 24:30) Jesus na bin julga pekaduris, i na separa karnelis ku kabras. (Mat 25:​31-33, 46) Duranti es tempu, Satanas ka na disisti. Pabia di odiu garandi ki tene kontra povu di Jeova, i na leba un grupu di nasons ku Biblia coma di Gogi di tera di Magogi pa ataka povu di Jeova. (Eze 38:​2, 10, 11) Na un sertu mumentu, kristons unjidu ku sobra na Tera na lebadu pa seu pa junta ku Kristu ku si tropas ku sta na seu pa gera di Armajedon. Kila na sedu fin di garandi tribulason. c (Mat 24:31; Apok 16:​14, 16) Dipus, Kristu na kumsa Rena pa mil anu. — Apok 20:6.

11. Ke ku pusibilidadi di tene vida ku ka ta kaba signifika pa bo? (Jubi tambi foto ku diseñus.)

¹¹ Gosi, tenta imaẑina kuma ku futuru na sedu. Biblia fala es aserka di no Kriadur: “I da omi sintidu di kil ku pasa ku kil ku na bin”. (Ekl 3:11) Pensa na ke ku es signifika pa bo i pa bu amisadi ku Jeova. Livru Achegue-se a Jeová, paẑina 319 fala un kusa interesanti: “Dipus di vivi sentenas, milyaris, milyons o te mesmu bilyons di anu, no na sibi manga di kusas aserka di Jeova Deus, mas di ki kil ku no sibi aos. Ma mesmu asin, no na sinti di kuma no tene inda manga di kusas pa aprindi. . . . No ka pudi imaẑina kuma ku paraísu na bin sedu bonitu i interesanti. I ka na ten utru kusa mas bonitu di ki pertusi kada bias mas di Jeova.”  Nkuantu ki tempu ka ciga, ke mas ku no pudi diskubri si no kontinua studa Palabra di Deus?

12. Kuma ku no pudi jubi pa seu? Bu pudi da un isemplu.

¹² Palabra di Deus kontanu ke ku ten “na kau mas altu na seu”, nunde ku Jeova sta. (Isa 33:5) Biblia kontanu kusas interesanti aserka di Jeova ku parti di si organizason ku sta na seu. (Isa 6:​1-4; Dan 7:​9, 10; Apok 4:​1-6) Pur isemplu, no pudi lei kusas dimiradu ku Ezekiel oja oca ku ‘seu yabri, i oja visons di Deus.’ — Eze 1:1.

13. Ke ku bu gosta del na ke ku Jesus sta na fasi na seu, suma ki sta na Ebreus 4:​14-16?

¹³ Pensa tambi na ke ku Jesus sta na fasi pa nos na seu suma Rei i Ŝef di Saserdoti ku ta sinti pena. Atraves del, no pudi pertusi “ku fiansa dianti di tronu di Deus” na orason, pa pidi si miserikordia ku ajuda “ora ku no pirsisa del.” (Lei Ebreus 4:​14-16.) Ka no disa nunka di pensa na ke ku Jeova ku Jesus fasi pa nos, ku ke ke sta na fasi desdi seu. Se amor pa nos dibi di toka no korson i lebanu pega tesu na sirbil. — 2 Kor 5:​14, 15.

14. Kal ki un di minjor kusa ku no pudi fasi pa mostra di kuma no da balur pa ke ku Jeova ku Jesus fasi? (Jubi tambi diseñus.)

¹⁴ Un di minjor kusa ku no pudi fasi pa mostra di kuma no da balur pa ke ku Deus ku si Fiju fasi pa nos, i sforsa pa juda utrus sedu Tustumuñas di Jeova i disipulus di Jesus. (Mat 28:​19, 20) I es ku apostolu Paulu fasi pa mostra si gardisimentu pa Deus ku Kristu. Paulu sibi di kuma vontadi di Jeova i “pa tudu jintis salba, pa e ciga di kunsi bardadi.” (1 Tim 2:​3, 4) I tarbaja ciu na pregason  pa juda maioria di jintis pa i pudi ‘salba utrus di kalker manera ki pudi.’ — 1 Kor 9:​22, 23.

15. Di akordu ku Salmu 1:​2, ke ku na fasinu tene kontentamentu?

¹⁵ Skirbidur di Salmu 1 konta di kuma, algin filis ku ta sai ben na tudu ki fasi i algin ku ta “kontenti ku lei di SIÑOR” i ku ta “pensa nel di dia ku di noti.” (Sal 1:​1-3) Oca ki na fala des versikulu, na si livru Studies in the Psalms (Studu di Salmus), tradutor di Biblia comadu Joseph Rotherham fala kuma algin dibi di “gosta ciu di orientason di Deus tok i ta piskisal, i studal i pasa manga di tempu na pensa nel.” I fala mas di kuma, pa un algin ku ta lei Biblia “si pasa un dia sin lei Biblia, kila i un dia pirdidu.” Bu pudi tene kontentamentu na studa Biblia ora ku bu studal fundu i bu buska ntindi ligason ku si partis tene ku n̈utru. I un kontentamentu ntindi diritu Palabra di Deus!

16. Ke ku no na bin fala del na studu ku na bin?

¹⁶ Bardadis bonitu ku sta na Biblia, i ka un kusa difisil ku no ka pudi ntindi. Na studu ku na bin, no na studa un bardadi fundu ku sedu, garandi templu spiritual di Jeova. Paulu fala del na si karta ki skirbi pa kristons ebreus. Pa studu des asuntu dau kontentamentu garandi.