1, 2. ¿Imaynatan Bibliata leena estudianapas? Juj ejemplota willay.

 KAYPI piensariy: Juj wasitas rantikuyta munashanki, ¿imatan ruwawaq manaraq rantikushaspa? ¿Chay wasimanta fotota qhawaspallachu chay wasita rantirukuwaq? Manan chaytaqa ruwawaqchu ¿riki? Aswanpas chay wasita qhawaqchá riwaq, chaypitaq ukhunta jawanta allinta qhawawaq. Chay wasimanta plano nisqata imachá qhawayta munawaq, imayna ruwasqachus kashan chayta imachá yachayta munawaq. Chhaynan ¿riki? Allinta qhawaspapunin juj wasitaqa rantikusunman.

² Chhaynatan ruwana Bibliata leespapas estudiaspapas. Juj libropin Bibliamanta rimaspa nin: “Bibliaqa jatunkaray wasi jinan, ukhu cimientasqa jatun torre jinan”, nispa. Chhaynaqa, ¿imatan ruwananchis Bibliapi imachus willasqanta allinta yachananchispaq? Chaypaqqa manan comuntachu jawan ukhunta leenanchis. Chayta ruwasunman chayqa wasitapas karullamanta qhawashasunman jinan kanman. Arí, Bibliapi kaq qallariy yachachikuykunallatapas yachashasunman jinan kanman (Heb. 5:12). Bibliaq willasqanta allinta entiendenapaqqa, imaynan wasi ukhuman jaykuspa lliuta allinta qhawasunman, chhaynatan ruwananchis. Allintan reparananchis imaynas juj texto juj kaq textowan tupan, juj willakuypas juj kaq willakuywan tupan chayta. Chaymantapas manan imapipas creeyllachu creenanchis, aswanmi allinta yachananchis imaraykus chaypi creenchis chayta.

3. ¿Imata ruwanankupaqmi apóstol Pablo kallpacharqan ñaupa tiempo iñiqkunata, imarayku? (Efesios 3:​14-19).

³ Diospa siminta allinta entiendenapaqqa, allintan chaypi willakuykunata t’aqwirinanchis. Apóstol Pablopas llapa iñiqkunatan kallpacharqan “cheqaq kaqpa anchonta, largonta, altonta, ukhuntapas allintapuni entiendenankupaq”. ¿Imaraykun chayta ruwanankupaq kallpachanman karqan? Paykuna iñiyninkupi  “allin saphichasqa allin teqsichasqa” kanankupaqmi (leey Efesios 3:​14-19). Noqanchispas chaytan ruwananchis, allintan Diospa simin qelqata t’aqwinanchis. Chaymi kaypi yachasun imaynatas chay qelqata t’aqwisunman chayta. Chayta ruwaspan allinta entiendesun Diospa munay willakuyninkunata.

4. ¿Imakunatan ruwasunman Jehová Diosta astawan munakunanchispaq? Willay ejemplokunata.

⁴ Jesusta qatikuqkunaqa manan imachus yachasqallanchiswanchu contentakunanchis. Aswanmi “Diospa pakasqa yachayninkunatawan” allinta t’aqwinanchis, chaypaqqa santo espiritun yanapawasun (1 Cor. 2:​9, 10). ¿Imakunatan t’aqwiriwaq, chhaynapi Jehová Diostapas astawan munakunaykipaq? Imaymanan yachanapaqqa kashan. Yaqapaschá estudiawaq imaynatas Jehová Dios ñaupa tiempopi kamachinkuna munakusqanta rikuchirqan chayta, chaypin reparanki imaynas noqanchistapas munakuwanchis chayta. Estudiawaqmi imaynata adoranankupaqsi Jehová Dios ñaupa tiempo Israel runakunata kamachirqan chayta, chaytataq tupanachiwaq imaynatas kunan tiempopi adorashanchis chaywan. Chaymantapas estudiawaqmi ima profeciakunas Señor Jesuspi junt’akurqan chayta.

5. ¿Ima yachachikuytan astawan t’aqwiriyta munawaq?

⁵ ¿Imakunamantawanmi yachayta munawaq? Wakin hermanokunatan tapukurqan Bibliapi imakunamantawansi yachayta munankuman chayta. Paykunaq imachus nisqankuman jinan kashan “ Estudianapaq yachachikuykuna” nisqa willakuypi lista. Wakillanña kashan chaypas chaykunaqa allintan yanapasunki Bibliapi pakasqa yachaykunata allinta entiendenaykipaq. Chaykunata maskhanaykipaqqa yaqapaschá yanapasunkiman Índice de las publicaciones Watch Tower nisqa, jinallataq Guía de estudio para los testigos de Jehová nisqa. Chaykunata estudianki chayqa fuerten iñiyniyki kanqa, allintataqmi Diostaqa reqsinkipas (Prov. 2:​4, 5). Kunanqa Bibliapi wakin yachachikuykunata allinta t’aqwirisun.

6. a) ¿Imaraykun nisunman “Diospa munayninqa junt’akunqapunin” nispa? Juj ejemplota willay. b) ¿Imaraykun nisunman “Diospa ima ruwaychus munasqanqa wiñaypaqmi” nispa? (Efesios 3:11).

⁶ Imatachus Biblia willashan Diospa munayninmanta chaypi piensasun. Chaypiqa Jehová  Diosqa manan runakuna jinachu, ¿imaynapi? Yaqapaschá runaqa maytaña riyta munaspapas mayqen carreteratapas ajllakunman chayninta rinanpaq. Ichaqa, ¿imatan ruwanqa chay carreterata wisq’asqata tarispa? Manapaschá maychus risqanmanqa chayayta atinqañachu. Jehová Dioswanmi ichaqa mana chayqa pasanmanchu, paypa munayninqa maychus rinanman chayanpunin; maynintaña rinan kanqa chaypas chaymanqa chayanqapunin. Otaq nisunman, imataña ruwanan kanqa chaypas munayninqa junt’akunqapunin. Chaypaqmi payqa pisi-pisimanta Bibliapi willarqan imaynatachus chay “wiñay munaynin” junt’akunqa chayta (Efes. 3:11). Paypa ima yuyaykusqanpas ima munasqanpas junt’akunpunin. Bibliapipunin nin: “Imaymanatan ruwan munayninta junt’ananpaq”, nispa (Prov. 16:4). Chaymantapas paypa ima ruwasqanpas wiñaypaqmi. Ichaqa, ¿imataq Diospa munayninri? ¿Imakunatan ruwarqan munaynin junt’akunanpaq?

7. Adanwan Evawanqa Dios contrataq jatarirqanku chayqa, ¿imakunatan Dios ruwarqan munaynin junt’akunanpaq? (Mateo 25:34).

⁷ Jehová Diosqa ñaupa tiempopin willarqan imatachus runakunapaq munasharqan chayta. Paymi Adanta Evatawan nirqan: “Askha wawakunayoq kaychis, askhaman tukuychis, pachantinman junt’aykuychis, chaypi munayniyoq kaychis. Kamachiychistaq […] tukuy kausaq animalkunatapas”, nispa (Gén. 1:28). Adanwan Evawanqa manan kasukurqankuchu Diosta, chhaynapin juchata paqarichirqanku. Ichaqa manan chaywanchu Jehová Diospa imachus munasqanqa qollupurqan, aswanmi imaymana cambiokunata ruwarqan chay munaynin junt’akunanpaq. Janaq pachapi juj gobierno kananpaqmi yuyaykurqan, chay gobiernon kay pachapi runakunapaq imakunachus munasqanta junt’anan karqan (leey Mateo 25:34). Chaykuna imaynachus aparikunanpaqmi Jehová Diosqa munakuq kayninpi wawanta kay pachaman kachamurqan. Jesusqa willarqanmi chay gobiernomantaqa, chaymantataq juchasapa runakunarayku wañurqan. Kausarimpuspataq janaq pachaman ripurqan, chaymantapacha kay pachata gobiernamunanpaq. Imaymanakunan kashan munaynin junt’akunanpaq Diospa imakunachus ruwasqanqa, chaykunapin allinta yuyaymanananchis.

8. a) ¿Imamantan Bibliapi rimashan? b) Efesios 1:​8-11 textopi nisqanman jina, ¿tukuy imapas imayna kanantan Jehová Diosqa munashan? (Qhaway tapanpi kaq dibujota).

⁸ Jehová Diosqa Cristoq gobiernonwanmi kay pachapi munayninta junt’achinqa, chaymantan Bibliaqa rimashan. Manan pipas ni imapas Jehová Diospa chay ruway munasqantaqa jark’anmanchu, payqa ñan rimanña chhayna kananta, chhaynapunitaqmi kanqapas (Isa. 46:​10, 11; Heb. 6:​17, 18). Tiempowanqa Adanmanta jamuq kasukuq runakunallan kay pachapi tiyanqaku, paykunaqa ch’uyan kapunqaku, wiñaypaqtaqmi kausanqaku (Sal. 22:26). Ichaqa manan chayllatachu Jehová Diosqa munashan, payqa llapa kamachinkuna kay pachapi kaqkunapas janaq pachapi kaqkunapas juj familialla kanankutan munashan, payllata tukuy munayniyoq autoridadta jina rikunankutan munashan (leey Efesios 1:​8-11). May munaymi Jehová Diospa imakunachus ruway munasqanmanta yachayqa ¿riki?

9. Bibliata leesun chayqa, ¿imakunatan jamuq tiempomanta yachasun?

⁹ Edén huertapi kashaspa Jehová Diospa imachus nisqanpi piensasun, chayqa Génesis 3:15 textopin kashan. b Chaypin rimashan munaynin junt’akunanpaq imakunachus pasanan karqan chaymanta, ichaqa unay watakunapiraqmi chaykunaqa junt’akunan karqan. Imakunachus pasananmanta  jujninmi karqan warmimanta paqarimuq Mesías, payqa Abrahanpa mirayninmantan jamunan karqan (Gén. 22:​15-18). 33 watapin Jesuspa jamusqan qhepaman, profeciapi willasqanman jina Jesusqa talonninpi kanisqa karqan (Hech. 3:​13-15). Ichaqa chay profeciapi wakin parte junt’akunanpaqqa waranqa wata masraqmi faltashan, chay junt’akuqtinmi Satanaspa uman ñut’usqa kanqa (Apo. 20:​7-10). Ichaqa manaraq chay jamushaqtinqa imaymanakunaraqmi pasanan karqan. Chaymantañan Satanaspa runankunawan Diospa llaqtanwan imayna apanakusqankuqa tukupunan karqan.

10. a) ¿Imakunan pasananña kashan? b) ¿Imaynatan alistakusunman chay p’unchaykunapaq? (Willakuyta qhaway).

¹⁰ Imakunachus pasanqa chaypi piensarisun. Ñaupaqtaqa nacionkunan ninqaku: “¡Thajmi kasunchis, allin waqaychasqan kasunchis!”, nispa (1 Tes. 5:​2, 3). Chayllamanmi “qonqaylla” manchay ñak’ariy qallarinqa, nacionkunan pantasqa religionkunaman phawaykunqaku (Apo. 17:16). Chayllamanmi runakunaqa rikunqaku “runaq Churinta [ . . . ] atiywan sinchi lliflli kaywan phuyupi jamushaqta”, yaqapaschá chay ratu cielopipas kay pachapipas imaymanakuna pasanqa (Mat. 24:30). Chaymantan Jesusqa runakunata juzganqa, jinaspa cabraman rijch’akuq runakuna ukhumanta ovejaman rijch’akuq runakunata t’aqanqa (Mat. 25:​31-33, 46). Chaykamaqa Satanasqa manan jinallachu kashanqa, coleranpa atipasqanmi payqa nacionkunata juñunqa Diospa llaqtanman phawaykunankupaq. Paykunatan Bibliaqa sutichan “Magogmanta kaq Gog” nispa (Ezeq. 38:​2, 10, 11). Chaykuna pasashaqtinmi kay pachallapiraq kashaq janaq pachapaq ajllasqa hermanokunaqa janaq pachaman ripunqaku. Chaypin Jesuswan angelkunawan ima juñukunqaku Armagedón guerrata aparinankupaq, chay guerrawanmi manchay ñak’ariy tiempoqa tukupunqa (Mat. 24:31; Apo. 16:​14, 16). c Chaykuna qhepamantaq Jesusqa kay pachata gobiernamuyta qallarinqa, waranqa watan payqa gobiernanqa (Apo. 20:6).

11. ¿Imaniwaqmi wiñaypaq kausaymanta? (Qhaway kay parrafopaq fotokunata dibujotawan).

¹¹ Kunanqa Jesuspa gobiernasqan waranqa wata qhepaman imakunachus kanqa chaypi piensariy. Bibliaq nisqan jina kamaqninchisqa “wiñay kausay munaytan runaq sonqonman  churarqan” (Ecl. 3:11). Chaypi piensarisun. ¿Imaynan sapankapas kasunchis chay tiempopi? ¿Imaynatan Jehová Dioswanpas apanakusunchis? Chaymanta rimashaspan Acerquémonos a Jehová nisqa libropi 319 paginapi khaynata nin: “Chay tiempoqa waranqa-waranqa watakunañataq unayñataq kausasun chayqa, allintañan yachasunchis Jehová Diosmanta. Chaywanpas may unaytaña kausasun chaypas yachashallasunmi paymantaqa. […] May munaypunichá mana piensay atiyraqchá chay paraisopi kausayqa kanqa. Imataña chay kausaypi ruwasun chaypas, p’unchaymanta p’unchayman astawan Jehová Diosta reqsispan kusisqaqa kasunchis”, nispa. Chhaynan kanqa. Ichaqa, ¿imatawanmi Bibliapi yachashasunman chay tiempo chayamunankama?

12. ¿Imaynatan janaq pachata qhawarisunman? Juj ejemplota willay.

¹² Bibliapiqa juj chhikantaqa willashanmi imaynas janaq pacha chayta, imaynas Jehová Diospa jatun kaynin chaytapas (Isa. 33:5). Arí, willashanmi imaynapunis Jehová Dios chayta, imaynas janaq pachapi llaqtan chaytapas (Isa. 6:​1-4; Dan. 7:​9, 10; Apo. 4:​1-6). Jujnin partepin willashan imaynas profeta Ezequielqa janaq pachata kicharikushaqta rikurqan chayta, chay kutin payqa “Diosmanta rijuriykunata rikusqa” (Ezeq. 1:1).

13. ¿Imaniwaqmi noqanchisrayku janaq pachapi Jesuspa imachus ruwashasqanmanta? (Hebreos 4:​14-16).

¹³ Piensallasuntaq imatas Jesús janaq pachapi ruwashan chaypi. Yachasqanchis jina payqa reyñan kashan, paymi uma sacerdotepas. Paypa yanapayninwanmi qayllaykuyta atisunman “ancha sumaq sonqowan qhawariq Diospa trononman”, chhaynapi necesitasqanchis ratu khuyapayasqa kananchispaq, “ancha sumaq sonqowan qhawarisqa” kananchispaqwan (leey Hebreos 4:​14-16). Sapa p’unchay piensasun imatas Jehová Diospas Jesuspas noqanchisrayku janaq pachapi ruwarqanku chaypi, piensallasuntaq imatas kunan ruwashanku  chaypipas. Paykunaqa tukuy sonqon munakuwanchis. Chhaynataq chayqa, noqanchispas tukuy sonqowanmi Jehová Diostaqa servinanchis (2 Cor. 5:​14, 15).

14. ¿Imaynatan rikuchisunman Jehová Dioswanpas Jesuswanpas agradecido kasqanchista? (Qhaway kay parrafopaq fotota dibujotawan).

¹⁴ ¿Imaynatan rikuchillasunmantaq agradecido kasqanchista? Astawanqa rikuchisunman runakunata Diosmanta Jesusmantawan yachachispan, chhaynapi paykunapas Jesusta qatikunankupaq (Mat. 28:​19, 20). Apóstol Pablopas chaytan ruwarqan, payqa may agradecesqan kasharqan Jehová Dioswan Jesuswan ima. Chaymantapas payqa allintan yacharqan imaynas Jehová Diosqa “llapa runapas salvasqa kananta [ . . . ], cheqaq kaqtapas allinta yachanankuta munan” chayta (1 Tim. 2:​3, 4). Chaymi payqa tukuy atisqanta kallpachakurqan runakunata yanapananpaq, chhaynapi “imaynallamantapas paykunata salvananpaq” (1 Cor. 9:​22, 23).

15. Salmos 1:2 nisqanman jinaqa, ¿imata ruwaspan kusisqa kausasun?

¹⁵ Salmos librota qelqaq runaq nisqanman jinaqa, kusisqa kausanapaqqa munayta kausanapaqqa “Jehová Diospa kamachikuyninkunawanmi kusikuna; tuta p’unchaymi chaykunata leena, chaykunapin piensana” (Sal. 1:​1-3). Chay textomanta rimashaspan Biblia t’ijraypi llank’aq juj runa nirqan: “Biblia leeqmanqa gustananmi Diospa consejonkuna, chaytan maskhanan”, nispa. Paymi nillantaq: “Chaykunatan t’aqwinan, chaypin yuyaymananan. Mayqen p’unchaypas mana chayta ruwanmanchu, mana chaykunata entiendenmanchu chayqa, yanqapaq jinan chay p’unchayta qhawarinan”, nispa. Noqanchispas chaytan ruwananchis. Allintan qhawarinanchis imamantas willashan, imaynatas juj texto juj kaq textowan tupan, juj willakuy juj kaq willakuywan tupan chayta. Chayta ruwasun chayqa misk’in Diospa siminta leeyqa kanqa. Kusisqataqmi chaykunata entiendespa kasunchis.

16. ¿Imamantan qatimuq estudiopi yachasunchis?

¹⁶ Llapanchispas atillasunmanmi Diospa simin qelqapi willakuykuna entiendeytaqa. Qatimuq estudiopin yachasunchis juj allin yachachikuyta, chaypin yachasun apóstol Pabloq qelqasqan Jehová Diospa espiritual templonmanta. Chaytan qelqarqan hebreo iñiqkunaman, llapanchispas may kusisqachá chaytaqa estudiasun.