1-2. Eaa te ravenga meitaki no te tatau e te apii i te Pipiria? Akatutu mai.

 AKAMANAKO ana e te iki ra koe i te oko i tetai are. Eaa taau ka inangaro i te kite i mua ake ka oko mai i te are? Ko te tutu i mua i te are ainei? Penei ka inangaro koe i te akara ia roto i te au pia e te katoaanga o te are. Penei ka akara koe i te parani o te are e akapeea te reira i te pātuia anga. Papu e ka inangaro koe i te akara i te au mea ravarai o toou are ou.

² Aite katoa me tatau e me apii tatou i te Pipiria. Kua akaaite tetai tataanga i te karere a te Pipiria ki “tetai are atea ma te teitei e te tango matutu.” Akapeea tatou me apii matatio i te Pipiria? Me tatau viviki i te reira, penei ka mou mai te au apiianga māmā ua—“te apiianga mua o te tuatua a te Atua.” (Ebe. 5:12) Mei te akatutuanga o te are, e aere “ki roto” i te reira na te apii matatio anga i te au apiianga puapinga. Tetai mataara meitaki no te apii i te Pipiria koia oki kia kite akapeea te rotai anga o te au karere ki te katoaanga o te Pipiria. E kimi eaa te au tuatua mou e no teaa ra i irinaki ei koe i te reira.

3. Eaa ta te apotetoro ko Paulo i akamaroiroi i te au taeake Kerititiano kia rave, no teaa ra? (Ephesia 3:​14-19)

³ Kia mārama pu tikai i ta te Atua Tuatua, ka kimi tatou i te au apiianga tumu a te Pipiria. Kua akamaroiroi te apotetoro ko Paulo i te au taeake e te au tuaine Kerititiano kia apii tamou i ta te Atua Tuatua “kia kite [ratou] i te tipoto, e te tiroa, e te oonu, e te teitei” o te tuatua mou. Tei tupu, ka ‘akaia ratou, e ka akatumuia’ to ratou akarongo. (E tatau ia Ephesia 3:​14-19.) Pera katoa tatou.  Ka akara katoa tatou akapeea me kimi matatio i ta te Atua Tuatua kia mārama pu tikai i tana karere.

4. Eaa ta tatou ka rave kia akavaitata atu kia Iehova? Oronga mai te akaraanga.

⁴ Ei au Kerititiano, kare tatou e mareka ua i te au apiianga māmā ua a te Pipiria. Ma te tauturu a te vaerua tapu o te Atua, ka inangaro tatou i te apii i “te au mea oonu rai o te Atua.” (1 Kori. 2:​9, 10) E rave i tetai apii puapinga te ka akavaitata ia koe kia Iehova. Ei akaraanga, penei ka apii koe akapeea a Iehova i te akaperepere anga i tona au tavini o mua ana, e te akapapu maira i tona inangaro ia koe. Penei ka apii koe i ta Iehova akanoonooanga i Iseraela e akapeea me akaaite i te reira ki ta te Kerititiano akamorianga i teia tuatau. Me kore penei ka apii matatio koe no runga i te au totou ta Iesu i akatupu i roto i tona oraanga e tana angaanga orometua i te enua nei.

5. E tumu manako ainei taau ka inangaro i te kimikimi ei apii naau uaorai?

⁵ Kua uiia ki tetai aronga apii Pipiria e eaa te au apiianga oonu ta ratou ka inangaro i te apii i roto i ta te Atua Tuatua. To ratou manako, kua papaia i roto i te pia “ Tumu Manako no te Apii Naau Uaorai.” Ka mataora koe i te apii i teia au tumu manako ma te tauturu a te Watch Tower Publications Index me kore te Research Guide for Jehovah’s Witnesses. Ka tauturu te apiianga oonu a te Pipiria i te akaketaketa i toou akarongo e ka “rauka ia koe te [mārama o] te Atua.” (Mase. 2:​4, 5) Teianei, e akamanako ana tatou i tetai au tuatua mou Pipiria ka kimikimi tatou.

6. (a) Eaa te tuke i rotopu i tetai parani e te akakoroanga? (e) Eaa i karangaia ai e “mei muatangana mai” to Iehova akakoroanga no te tangata e te enua nei? (Ephesia 3:11)

⁶ Tetai akaraanga, e akamanako ana i ta te Pipiria e tuatua ra no ta te Atua akakoroanga. E tuke te parani mei te akakoroanga. Ko te parani, ko te akairo meitaki anga i tetai mataara te ka arataki ia  koe ki te ngai taau e inangaro ra i te aere. Inara ka tamanataia taau parani e te au araianga mataara ia koe e aere ra na runga i te reira. Ko te akakoroanga, te akatinamou ra te reira ki te ngai taau ka inangaro i te aere. Kua kite tatou i te ngai ka akaoti i to tatou tere, kareka ra te aere anga ki reira, kare i akatinamouia. Ka rauka te reira i te akatanotanoia. Ma te akameitaki, kua akaari mai a Iehova i “te akakoroanga nana mei muatangana mai” i roto i te Pipiria. (Ephe. 3:11) Noatu ra, e puapinga ua ana aia no te mea “kua angā Iehova i te au mea katoa nei nona uaorai.” (Mase. 16:4) Ta Iehova ka rave, ka mou e tuatau ua atu. Eaa ta Iehova akakoroanga, e eaa tana akatanotanoanga i rave kia tupu te reira?

7. Muri ake i te meameaauanga te nga tangata mua, akapeea a Iehova i te akatanotano anga kia akatupuia tona akakoroanga? (Mataio 25:34)

⁷ Kua akakite te Atua ki te nga tangata mua i tana akakoroanga no raua. “Kia anau korua, e kia maata roa, e e akaki i te enua nei, e e akavi; e kia mana korua ki rungao . . . i te au mea ora katoa” i te enua nei. (Gene. 1:28) I te meameaau anga a Adamu raua ko Eva, te akatupu anga i te ara ki te tangata ravarai, kare ta Iehova akakoroanga i taui ana. Kua akatanotano aia akapeea te reira me akatupuia. I reira, kua akanoo a Iehova i tetai Patireia i te rangi te ka akatupu i tona akakoroanga no te tangata e te enua katoa. (E tatau ia Mataio 25:34.) I tona tuatau, kua tono aroa mai a Iehova i tana Tamaiti anau tai ki te enua nei kia apii i te tangata no runga i te Patireia e kia oronga i tona oraanga ei oko ia tatou mei te ara e te mate. Aru mai, kua akatuia a Iesu ki te rangi kia tutara ei Ariki no te Patireia o te Atua. Inara e maata atu te ka ō mai i te akatupu anga i ta te Atua akakoroanga.

8. (a) Eaa te tumu manako maata o te Pipiria? (e) Ia Ephesia 1:​8-11, eaa tikai to Iehova akakoroanga maata? (Akara i te tutu i te kapi mua.)

⁸ Ko te tumu manako maata o te Pipiria koia oki, kia akangateiteiia to Iehova ingoa iaia e akatupu ra i tana akakoroanga no te enua na roto i tona Patireia i raro ia Karaiti. Kare ta Iehova akakoroanga i taui. Kua akapapu mai aia e ka akatupu rai aia i tana i akakoro. (Isa. 46:​10, 11; Ebe. 6:​17, 18) Aere ua rai, ka akariroia te enua ei parataito ma te uanga tuatua tika e te apa kore a Adamu e Eva te ka rekareka i te oraanga mataora e tuatau ua atu. (Sala. 22:26) Inara e maata atu te ka kapiti mai ki ta Iehova akakoroanga. Ko tona akakoroanga maata koia oki, kia taokotai i tona au tavini katoa i te rangi e te enua nei. Ei reira te katoatoa e kauraro tiratiratu ei kiaia to ratou Tutara Ngateitei. (E tatau ia Ephesia 1:​8-11.) Umere ainei koe i te ravenga manea o ta Iehova akatupuanga i tona akakoroanga?

9. Na te tatau anga i te Pipiria, eaa ta tatou i kite atu no te tuatau ki mua?

⁹ Akamanako ana i te totou ta Iehova i tuatua i te aua o Edene i roto ia Genese 3:15. b Te akakite maira i te au tupuanga no tana akakoroanga e tauatini ua atu mataiti i muri mai. Ka kapiti mai i te uanga a Aberahama te ka arataki atu ki te Mesia. (Gene. 22:​15-18) I te 33 T.N., kua akaparuparuia te pooavae o  Iesu mei tei totouia. (Anga. 3:​13-15) Te tupuanga openga o teia totou, ko te akaparuparu anga i to Satani mimiti, ka akatupuia te reira e 1,000 tuma mataiti a te tuatau ki mua. (Apo. 20:​7-10) E maata atu ta te Pipiria e akaari maira te ka tupu i rotopu i ta Satani akatereanga e ta Iehova akaaerenga ei taopenga i te ke i rotopu ia raua.

10. (a) Eaa te au tupuanga i te tuatau ki mua e vaitata maira? (e) Akapeea tatou me akapapa i to tatou manako e te ngakau? (Akara i te tataanga rikiriki i raro.)

¹⁰ Akamanako i te au tupuanga umere ta te Pipiria i totou mai. Mea mua, ka kapiki te pa enua “e au, e kare e kino.” (1 Tesa. 5:​2, 3) “Ei reira” te mate maata e akamata ai me tamaki te pa enua i te au akonoanga pikikaa katoatoa. (Apo. 17:16) I muri ake i te reira, ka kite ratou i “te Tamaiti a te tangata i te aere anga mai na roto i te tiao rangi, ma te mana, e te kakā maata.” (Mata. 24:30) E akava ei a Iesu i te tangata ravarai na te akataka ke anga i te au mamoe mei te puakanio. (Mata. 25:​31-33, 46) Inara, kare a Satani e noonoo ua. Ma tona riri otooto, ka akakeu a Satani i te pupu o te pa enua ta te Pipiria e kapiki ra ko Goga i te enua o Magoga kia tamaki i te aronga akamori ia Iehova. (Eze. 38:​2, 10, 11) A te reira tuatau, ka akaputuia te toenga o te aronga akatainuia ki te rangi kia tamaki kapiti ma Iesu e tona nuku vaeau i te tamaki o Aramagido, ko te openga ïa o te mate maata. c (Mata. 24:31; Apo. 16:​14, 16) I reira e akamata ai ta Karaiti Tutaraanga Tauatini Mataiti i te enua nei.—Apo. 20:6.

11. Eaa te aiteanga o te ora mutu kore noou? (Akara katoa i te tutu.)

¹¹ Teianei e akara mamao atu ki te tuatau ki mua. Te karanga ra te Pipiria no Tei Anga ia tatou e “kua tuku aia i te manako [mutu kore] ki roto i to [tatou] ngakau.” (Kohe. 3:11) Akamanako ana i te aiteanga noou e toou pirianga kia  Iehova. Te akakite maira te puka Akavaitata Atu Kia Iehova, kapi 319 i teia au tuatua umere: “I muri mai i te ora anga no tetai au anere, au tauatini, au mirioni, e te au pirioni ua atu mataiti, ka maata ta tatou ka kite no runga i te Atua ko Iehova i ta tatou i kite i teianei. Inara ka manako rai tatou e te vaira te au mea e manganui kia apiiia. . . . Ka puapinga te ora anga mutu kore e te tukeke—e te akavaitata anga atu kia Iehova ka riro ia e ko te tuanga puapinga rava atu o te reira.” Ia tatou e apii ra i te Tuatua a te Atua, eaa atu ta tatou ka kimikimi?

12. Akapeea tatou me nana na i to tatou mata ki runga i te rangi? Oronga mai te akaraanga.

¹² Te akaari maira ta te Atua Tuatua i to Iehova nooanga i te rangi teitei. (Isa. 33:5) Te akakite maira te reira i te au mea umeremere no runga ia Iehova e tana akaaerenga i te rangi. (Isa. 6:​1-4; Dani. 7:​9, 10; Apo. 4:​1-6) Ei akaraanga, ka tatau tatou no te au mea umere ta Ezekiela i kite e kua “kiritiia akera te rangi, e kite atura [aia] i te orama a te Atua.”—Eze. 1:1.

13. Eaa taau e mareka ra no ta Iesu tuanga i te rangi i roto ia Ebera 4:​14-16?

¹³ Akamanako katoa i ta Iesu angaanga i te rangi ei Ariki e ei Taunga Maata no tatou. Na roto iaia, ka akavaitata atu tatou ki to te Atua “terono o te aroa ua” na roto i te pure e ka pati akatenga tatou i tana tauturu “i te tuatau e tau ei ra.” (E tatau ia Ebera 4:​14-16.) I te au rā ravarai, kia akamanako tatou i ta Iehova e ta Iesu i rave e te rave nei no tatou mei te rangi. Ka akakeu to raua inangaro ia tatou kia rave maroiroi i te angaanga e te akamorianga ma te ngakau katoa.—2 Kori. 5:​14, 15.

14. Eaa tetai mea meitaki rava atu ka rave tatou kia akaari e te akaperepere ra tatou ia Iehova e Iesu? (Akara katoa i te tutu.)

 ¹⁴ Tetai ravenga meitaki i te akaari i to tatou akameitakianga ki te Atua e tana Tamaiti, na te akariro anga i te tangata ei Kite no Iehova e ei pipi na Iesu. (Mata. 28:​19, 20) Ko teia ta te apotetoro ko Paulo i rave no tona inangaro i te Atua e Iesu. Kua kite aia i to Iehova anoano ko “tei inangaro i te tangata katoatoa kia ora, e kia rauka te kite i te tuatua-mou.” (1 Timo. 2:​3, 4) Kua rave maroiroi aia i tana angaanga tutu aere no te tauturu i te au tangata e manganui “kia ora [iaia] tetai papaki i taua au ravenga katoa nei.”—1 Kori. 9:​22, 23.

15. Ia Salamo 1:​2, eaa ta tatou ka mataora?

¹⁵ Kia tau ki te tata salamo tei akataka mai i tetai tangata mataora e te puapinga, ko “tei inangaro ra i te ture a Iehova; e tei tana ture tona manako anga i te po e te ao.” (Sala. 1:​1-3) No teia irava, kua karanga te tangata uri Pipiria ko Joseph Rotherham i roto i tana puka Studies in the Psalms, e “kia inangaro tikai tetai tangata i ta te Atua aratakianga, ka kimi aia i te reira, ka apii e ka akamanako marie i te reira.” Kua tuatua katoa aia no te tangata tatau Pipiria e “auraka kia topa tetai rā no tetai kia tatau i te Pipiria.” Ka mataora koe i te apii i te Pipiria na te akamanako anga i te au mea puapinga e to te reira pirianga ki te katoaanga o te Pipiria. E mea mataora i te apii matatio i ta te Atua Tuatua!

16. Eaa ta tatou ka uriuri i te atikara ka aru mai?

¹⁶ Ko te au tuatua mou manea ta Iehova i apii i roto i tana Tuatua, ka mārama ua tatou. I te atikara ka aru mai, ka uriuri tatou no runga i tetai tuatua mou oonu—ko te iero pae vaerua maata o Iehova, ta Paulo i akamārama mai i roto i tana reta ki te au Kerititiano Ebera. Ka rekareka tatou i te apii matatio i teia tumu manako.