1-2. Кова тано најшукар начин те читине хем те проучине и Библија? Вакер пример.

 ЗАМИСЛИН туке кај мангеа те кине јекх кхер. Со би мангеа те дикхе англедер те кине ле? Дали ка овел туке доволно те дикхе само јекх слика таро кхер? Веројатно на. Ту ка манге те џа те дикхе о кхер, те дикхе секова дело авријалдан, те кхуве ки секоја соба хем те проверине секова дело таро кхер. Шај чак ка манге те дикхе о плани е кхерескоро те шај те џане сар сине кердо. Сигурно ка манге те дикхе секова детали таро кхер кова со мангеа те кине ле.

² Нешто слично шај те кера кеда читинаја хем проучинаја и Библија. Јекх библиско изучувачи вакерѓа кај „и Библија тани сар јекх бари учи зграда кола со иси хор темелија“. Тегани сар шај шукар те џана са сој пишимо ки Библија? Ако читинеа ла сигате, тегани шај те сикљове само о основна буќа — „о основна света објаве е Девлескере“ (Евр. 5:12). Наместо адава, исто сар со би кереа сине е кхереа „кхув андре“ те шај те дикхе са о деталија. Јекх бут шукар начин сар шај те проучине и Библија тано аѓаар со ка дикхе сар о различна делија таро хабери тане поврзиме јекх јекхеа. Трудин тут те хаљове на само ко со верујнеа него хем соске верујнеа ко адава.

3. Со поттикнинѓа о апостол Павле е христијанен те керен хем соске? (Ефешања 3:14-19).

³ Те шај те хаљова секова дело таро е Девлескоро Лафи, амен ваљани те проучина о хор библиска чачипа. О апостол Павле поттикнинѓа е пхрален хем е пхењен редовно хем темелно те проучинен е Девлескоро Лафи те шај „целосно те хаљовен кобор тано бувло, дугачко, учо  хем хор“ о чачипе. Адава ка поможинел ленге сине ленгири вера те овел ла хор коренија хем те овел зорали. (Читин Ефешања 3:14-19.)  Амен да ваљани те кера о исто. Акана те дикха сар шај темелно те проучина е Девлескоро Лафи те шај те овел амен цело слика башо са о буќа со мангела о Јехова те вакерел аменге.

4. Со шај те кера те шај те ова паше е Јеховаја? Вакер примерија.

⁴ Сар христијања на мангаја те хаљова само о основна библиска сикљојба. Мангаја те сикљова „чак е Девлескере хор буќа“ хем адава шај те кера ле соске поможинела амен е Девлескири сила (1. Кор. 2:9, 10). Ко тло лично проучибе шај те проучине подетално несави тема те шај те ове паше е Јеховаја. На пример, шај те истражине сар о Јехова сикавѓа пло мангипе пле слугенге таро пурано време хем сар адава уверинела тут кај туте да мангела тут. Исто аѓаар шај те проучине башо адава сар о Јехова организиринѓа е Израелцон те обожавинен ле хем те споредине адалеа сар о Јехова авдиве мангела те обожавина ле. Или шај те проучине ко деталија секова пророштво со исполнинѓа ле о Исус џикоте сине теле ки пхув.

5. Баши која тема би мангеа те проучине ки тли лично студија?

⁵ Несаве пхраља хем пхења со мангена хор те проучинен и Библија сине пучле кола буќа таро е Девлескоро Лафи мангена подетално те проучинен. Несаве таро ленгере одговорија шај те аракхе ки рамка „ Теме башо лично проучибе“. Шај те уживине џикоте читинеа асавке теме ако користинеа о Прирачнико истражибаске е Јеховаскере сведоконгоро. Ако проучинеа хор и Библија адава шај те зојракерел тли вера хем те поможинел тут „шукар те пенџаре е Девле“ (Изр. 2:4, 5). Акана те дикха несаве хор библиска чачипа кола со шај темелно те проучина лен.

6. а) Која тани и разлика машкар о плани хем и намера? б) Соске шај те вакера кај е Јеховаскири намера е пхувјаја хем е манушенцар тани вечно? (Ефешања 3:11).

⁶ На пример, размислин со вакерела и Библија баши е Девлескири намера. Иси бари разлика машкар о плани хем и намера. Јекх плани шај те споредина ле конкретно друмоја кова со шај те ингарел амен џи ко тхан коте  со мангаја те реса. Ама, о плани шај те пропадинел ако о друмо тано блокиримо. А тари јавер страна, и намера шај те споредина ла е тханеа коте со мангаја те реса. Амен точно џанаја коте мангаја те џа, ама иси различна друмија сар шај те реса адари. Чак несаво друмо те овел блокиримо шај те кера промене аѓаар со ка џа таро јавер друмо. Благодарна сием е Јеховаске со хари похари ки Библија откринѓа пли вечно намера (Еф. 3:11). О Јехова шај те биринел различна начинија те шај те исполнинел пли намера хем ов секогаш успејнела ко адава соске „керѓа са те шај те служинел баши лескири намера“ (Изр. 16:4). Освен адава, са со керела о Јехова трајнела засекогаш. Која тани е Јеховаскири намера хем кола промене керѓа те шај те исполнинел ла?

7. Откеда бунинѓе пе о прва мануша сар о Јехова прилагодинѓа о начин те исполнинел пли намера? (Матеј 25:34).

⁷ О Девел вакерѓа е прво манушенге која тани лескири намера ленцар. Ола ваљанѓе те „пхерен и пхув манушенцар хем те владинен упро... са о суштествија ки пхув“ (1. Мој. 1:28). Кеда о Адам хем и Ева бунинѓе пе хем о мануша уле грешна, адава ни најхари на менинѓа е Јеховаскири намера. Ов само променинѓа о начин сар ка исполнинел пли намера. Ов одма одлучинѓа те керел Царство ко небо кова со ка исполнинел лескири намера со сине ле ко почеток е манушенцар хем е пхувјаја. (Читин Матеј 25:34.) Ко време кова со о Јехова одрединѓа ле, мангипаја бичхалѓа пле првобијаме Чхаве теле ки пхув те сикавел е манушен башо Царство хем те откупинел амен таро грево хем о мерибе. Пало адава о Јехова воскреснинѓа е Исусе ко небо те шај те владинел сар Цари ко е Девлескоро Царство. Ама иси бут повише деталија кола со шај те сикљова баши е Јеховаскири намера.

8. а) Која тани е Библијакири главно тема? б) Спрема Ефешања 1:8-11, со панда о Јехова ка исполнинел? (Дикх и слика тари насловно страна.)

⁸ И главно тема е Библијакири тани кај е Јеховаскоро анав ка овел посветимо џикоте исполнинела пли намера е пхувјаја преку пло Царство коте со владинела о Христос. Е Јеховаскири намера нашти те менинел пе. Ов дела амен лафи кај ка овел са аѓаар сар со вакерѓа (Ис. 46:10, 11 фус; Евр. 6:17, 18). Хари похари и пхув ка овел рај коте о совршена хем о праведна мануша со авена таро Адам хем тари Ева ка уживинен ко вечно живото (Пс. 22:26). Ама адава нане са, о Јехова ка керел бут повише. Лескири намера тани те анел ко јекхипе са пле слуген ко небо хем ки пхув. Тегани сарине сој џивде верно ка овен подложна пле Владетелеске е Јеховаске. (Читин Ефешања 1:8-11.) На сиан ли воодушевимо таро начин сар о Јехова исполнинела пли намера?

9. Кеда читинаја и Библија, кобор дур ки иднина шај те дикха?

⁹ Те размислина башо пророштво кова со вакерѓа ле о Јехова ки Еденско градина, а пишимо тано ки 1. Мојсеева 3:15. b Адава пророштво керела лафи башо настанија со ка исполнинен лескири намера. Ама адала настанија ка случинен пе пало некобор милје берша. Јекх таро акала настанија тано адава со о главно дело таро потомство е џувљакоро, о Месија, ваљанѓа те авел тари е Авраамескири лоза (1. Мој. 22:15-18). Пало адава, ко 33 берш а.е., о Исус сине кицимо ки пета, баш сар со сине пророкујмо (Апо. 3:13-15). А о последно настан таро адава пророштво коте со о потомство ка згмечинел е Сатанаскоро  шеро ка случинел пе ки иднина откеда ка накхен повише таро милја берша (Отк. 20:7-10). И Библија исто аѓаар бут откринела аменге башо адава со ка случинел пе ко крајо е Сатанаскере светоја кова со противинела пе е Девлескере народоске.

10. а) Саве настанија ка случинен пе панда хари? б) Сар шај те спремина амари годи хем амаро вило? (Дикх и фуснота.)

¹⁰ Те размислина башо бут важна настанија сој пророкујме ки Библија. Прво, о народија ка вакерен кај анѓе „мир хем сигурност!“ (1. Сол. 5:2, 3). Тегани ка нападинен е ховавне религија хем аѓаар одма ка почминел и бари неволја (Отк. 17:16). Пало адава, шај ка овел несаво натприродно знако кова со ка сикавел е „манушикане Чхаве сар авела ко облакија ко небо силаја хем баре славаја“ (Мат. 24:30). О Исус ка судинел е манушен аѓаар со ка одвојнел е бакхрен таро бузња (Мат. 25:31-33, 46). Ама џикоте трајнела адава време, о Сатана понадари да ка противинел пе е Јеховаске. Адалеске со мрзинела е Девлескере народо ка поттикнинел јекхе коалиција таро народија, кола со и Библија викинела ла Гог тари пхув Магог, те нападинел лен (Езек. 38:2, 10, 11). Ко јекх моменти, џикоте трајнела и бари неволја, о помазаникија кола со ка овен ки пхув ка овен ленде ко небо коте со заедно е Исусеа хем е небесно војскаја ка боринен пе ки војна Армагедон — о крајо е баре неволјакоро c (Мат. 24:31; Отк. 16:14, 16). Тегани ка почминен о милја берша теле ки пхув коте со ка владинел о Христос (Отк. 20:6).

11. Сави прилика ка овел тут ки цели вечност? (Дикх хем и слика.)

¹¹ Акана те дикха со ка случинел пе хари подур ки иднина. И Библија вакерела кај амаро Створители „чак и вечност чхивѓа ко амаро вило“ (Проп. 3:11). Размислин со значинела акава туке хем башо тло амалипе е Јеховаја. Ко лил Приближи му се на Јехова, ки страна 319 пишинела акаја интересно мисла: „Откеда ка овен амен повише таро шел, милје, милиоња хем чак милијарде берша ка џана бут повише башо Јехова него со џанаја  акана. Ама тегани да ка дикха кај иси бут шуже буќа баши коленде со шај те сикљова. Нашти ни те замислина аменге кобор шужо хем интересно ка овел о живото ко рај... А и најшужи бути ко рај ка овел со ки цели вечност понадари да ка шај те ова панда попаше е Јеховаја!“ Џикоте на авела адава време со шај јавер те открина кеда проучинаја е Девлескоро Лафи?

12. Сар шај те дикха упре ко небо? Вакер пример.

¹² Е Девлескоро Лафи откринела аменге нешто башо адава сар тано о живото коте сој о Јехова — „ко најуче тхана“ (Иса. 33:5). И Библија откринела аменге чудесна буќа башо Јехова хем башо небесно дело тари лескири организација (Иса. 6:1-4; Дан. 7:9, 10; Отк. 4:1-6). На пример, шај те читина башо чудесна буќа кола со дикхља о Езекиел кеда пхравдило о небо хем дикхља визие таро Девел (Езек. 1:1).

13. Спрема Евреија 4:14-16, кова дело посебно ценинеа тари е Исусескири улога?

¹³ Исто аѓаар, размислин баши е Исусескири улога сар Цари хем сар сочувствително Првосвештенико. Преку лесте молитваја шај те ава англо е Девлескоро престол „таро шукарипе со на заслужинаја ле“ хем те рода милост хем помош кеда ваљани. (Читин Евреија 4:14-16.) Те на мукха нијекх диве те накхел бизо те размислина башо адава со о Јехова хем о Исус керена аменге таро небо. Ленгоро мангипе ваљани бут те влијајнел упри аменде хем те поттикнинел амен ревносно те служина е Јеховаске (2. Кор. 5:14, 15).

14. Кова тано јекх таро најшукар начинија колеа со шај те сикава амари благодарност е Јеховаске хем е Исусеске? (Дикх хем и слика.)

¹⁴ Јекх таро најшукар начинија сар шај те сикава кобор ценинаја амаре Девле хем лескере  Чхаве тано аѓаар со ка трудина амен те поможина е јаверенге те овен е Јеховаскере сведокија хем ученикија е Исусескере (Мат. 28:19, 20). Баш адава керѓа о апостол Павле тари благодарност е Девлеске хем е Христосеске. Ов џанља кај о Јехова мангела „различна мануша те спасинен пе хем шукар те џанен о чачипе“ (1. Тим. 2:3, 4). Ов бут трудинѓа пе ки пли служба те поможинел со повише манушенге те шај „било сар те спасинел некас“ (1. Кор. 9:22, 23).

15. Спрема Псалм 1:2, со ка керел амен те ова радосна?

¹⁵ О псалмисти вакерѓа кај среќно хем успешно мануш тано окова со „уживинела ко е Јеховаскоро закони хем размислинела лескере законеске диве хем рат“ (Псалм 1:1-3). Јекх библиско преведувачи, о Џосеф Ротерхам, башо акала стихија вакерѓа кај јекх мануш ваљани „добором бут те мангел е Девлескоро водство со секогаш ка родел ле, ка проучинел баши лесте хем ка размислинел бут баши лесте“. Ов исто аѓаар вакерѓа: „Ако накхела јекх диве, а некој на читинела нешто тари Библија, адава диве леске нашавдо“. Шај те уживине ко читибе и Библија аѓаар со ка дикхе са о деталија хем сар тане поврзиме јекх јекхеа. Асавко хор проучибе ка анел туке бари радост.

16. Башо со ка кера лафи ки следно статија?

¹⁶ О бут шуже чачипа со сикавела амен о Јехова таро пло Лафи нане пхаре хаљојбаске. Ки следно статија ка дикха јекх таро похор чачипа — е Јеховаскоро баро духовно храми колеске со о Павле керела лафи ко пло писмо џи ко Евреија. Уживин џикоте проучинеа акаја тема.