1-2. Ndi njira ipi yadidi kakamwe toera kuleri na kupfundza Bhibhlya? Perekani citsandzo.

 NYEREZERANI kuti musafuna kugula nyumba. Mbamudacitanji pakutoma mbamudzati kusankhula kugula nyumba ineyi? Basi ene mbamudakomerwa kuona foto ya nyumba ineyi? Nkhabe. Mwakukhonda penula, imwe mbamudafuna kuenda kaona nyumba ineyi, kuona makwartu onsene na kukula kwayo. Panango mbamudafuna kucedza na munthu anaidziwa mwadidi toera akupangeni kuti nyumba ineyi yamangwa tani. Mwandimomwene imwe mbamudafuna kuona pinthu pyonsene pya nyumba ineyi.

² Ife tinakwanisambo kucita pibodzi pyene mu ndzidzi unapfundza ife Bhibhlya. Nyakudziwisa pya Bhibhlya unango alonga kuti “Bhibhlya ndi ninga nyumba ikulu na yakulapha kakamwe idakumbirwa mwadidi.” Mphapo tinakwanisa tani kudziwa pyonsene pinagumanika m’Bhibhlya? Mungaleri Bhibhlya mwakucimbiza, basi ene munadziwa “pipfundziso pyakutoma pya mafala a Mulungu.” (Aheb. 5:12) Mbwenye ninga nyumba yakuti musafunika kupita nkati toera kuiona mwadidi, imwe musafunikambo kupfundza Bhibhlya toera kuidziwa mwadidi. Njira ibodzi ya kupfundza mwadidi Bhibhlya ndi kuona kuti mphangwa zakusiyana-siyana za m’Bhibhlya zisabverana tani. Wangisirani toera kubvesesa pinakhulupira imwe na mathangwi anakucitisani kunyindira kuti pinthu pyenepi ndi pyandimomwene.

3. Mpostolo Paulu apanga Akristu toera acitenji, pontho thangwi yanji? (Aefesi 3:14-19)

³ Toera kubvesesa Mafala a Mulungu tisafunika kupfundza mwadidi undimomwene unagumanika m’Bhibhlya wakuti usaoneka ninga wakunentsa. Mpostolo Paulu apanga abale na alongo kuti apfundze mwadidi Mafala a Mulungu toera ‘abvesese  mwadidi ugugumi, ulaphi, cengo na kuzika’ kwa undimomwene. Mbadacita pyenepi, iwo ‘mbadakhala na mitcitci na akuwanga’ mu cikhulupiro. (Lerini Aefesi 3:14-19.) Ife tisafunikambo kucita pibodzi pyene. Tendeni tione kuti tinapfundza tani Mafala a Mulungu toera kubvesesa mwadidi mphangwa zinagumanika mwenemo.

4. Tisafunika kucitanji toera kukhala na uxamwali wakuwanga na Yahova? Perekani pitsandzo.

⁴ Ninga Akristu, ife nee tisakomerwa basi ene na kubvesesa pipfundziso pyakutoma pya m’Bhibhlya. Na ciphedzo ca nzimu wakucena wa Mulungu, ife tisafuna kupfundza “ngakhale udziwisi wakubisika wa Mulungu.” (1 Akor. 2:9, 10) Imwe munakwanisa kucita pfundziro ya munthu paekha toera kuwangisa uxamwali wanu na Yahova. Mwacitsandzo, imwe munakwanisa kupfundza kuti iye apangiza tani ufuni kuna atumiki ace a mu ndzidzi wakale, pontho pyenepi pisapangiza tani kuti iye asakufunanimbo. Imwe munakwanisambo kupfundza kuti Yahova akhafuna kuti Aizraeli amulambire tani, pontho lero asafunambo kuti timulambire tani. Peno munakwanisa kupfundza mwadidi maprofesiya analonga pya Yezu adakwanirisika mu umaso wace na mu utumiki wace pa dziko yapantsi.

5. Pana mphangwa zinafuna imwe kusaka mu ndzidzi wakucita pfundziro ya munthu paekha?

⁵ Anthu anango anapfundza mwadidi Bhibhlya abvundzwa kuti ndi pinthu pipi pinaoneka ninga ndi pyakunentsa pinafuna iwo kupfundza m’Bhibhlya. Mitawiro yawo inango yalembwa pa bokosi ya nsolo wakuti “ Mphangwa Toera Kuzipfundza pa Pfundziro ya Munthu Paekha.” Imwe munatsandzaya mungapfundza mphangwa zenezi na ciphedzo ca Índice das Publicações da Torre de Vigia peno Bukhu Inaphatisira Mboni za Yahova Pakufufudza. Kupfundza mwadidi Bhibhlya kunawangisa cikhulupiro canu, pontho kunakuphedzani toera ‘kugumana cidziwiso ca Mulungu.’ (Mis. 2:4, 5) Cincino tendeni tione undimomwene unaoneka ninga ndi wakunentsa kuubvesesa wakuti tinakwanisa kuupfundza.

6. (a) Kunyerezera kucita cinthu kwasiyana tani na cifuniro? (b) Thangwi yanji tinakwanisa kulonga kuti cifuniro ca Yahova kuna anthu na dziko yapantsi ndi “cakukhonda mala?” (Aefesi 3:11)

⁶ Mwacitsandzo, onani pinalonga Bhibhlya thangwi ya cifuniro ca Mulungu. Kunyerezera kucita cinthu na kukhala na cifuniro ndi pyakusiyana. Kunyerezera kucita cinthu ndi ninga kusankhula njira inafuna kutiphedza toera kufika kunaenda ife. Mbwenye pangaoneka cinthu cinafuna kupingiza njira, panango nee munakwanisa kufika kunafuna imwe kuenda. Cifuniro ndi ninga kunyerezera basi ene mbuto inafuna ife kuenda. Tingakhala na cifuniro tisadziwa mwadidi kunafuna ife kuenda, pontho tinakwanisa kuphatisira njira zakusiyana-siyana toera kufikako. Yahova mwapang’ono-pang’ono asapangiza ‘cifuniro cace cakukhonda mala’ m’Bhibhlya. Yahova ndzidzi onsene asakwanisa kukwanirisa cifuniro cace thangwi “asaphatisira pinthu pyonsene toera pinafuna iye picitike.” (Mis. 16:4) Pontho pinacita iye pinapitiriza kwenda na kwenda. Mphapo ndi cipi cifuniro ca Yahova, pontho ndi macinjo api adacita iye toera kucita pinafuna iye?

7. Pidadawa Adhamu na Eva, Yahova acinja tani pinthu toera kukwanirisa cifuniro cace? (Mateu 25:34)

⁷ Mulungu apanga Adhamu na Eva cifuniro cace kuna iwo. Iwo akhafunika ‘kubalana, toera anjipe mbatsalakana pinyama pyonsene piri na umaso pa dziko yapantsi.’ (Gen. 1:28) Adhamu na Eva pidadawa iwo abweresa madawo kuna anthu, mbwenye pyenepi nee pyapingiza cifuniro ca Mulungu kuna anthu. Iye acinja njira toera kukwanirisa cifuniro cace. Mwakucimbiza, iye akhazikisa Umambo kudzulu toera kukwanirisa cifuniro cakutoma cikhali na iye kuna anthu na dziko yapantsi. (Lerini Mateu 25:34.) Pa ndzidzi udakhazikisa iye, mwaufuni Yahova atuma Mwanace wakutoma pa dziko yapantsi toera kupfundzisa anthu thangwi ya Umambo na kupereka umaso wace toera kutiombola m’madawo na kufa. Buluka penepo, Yezu alamuswa muli kufa toera kukhala Mambo wa Umambo wa Mulungu kudzulu. Mbwenye pana pinthu pinango pinafunika ife kupfundza thangwi ya cifuniro ca Mulungu.

8. (a) Ndi mphangwa zipi zakufunika kakamwe za m’Bhibhlya? (b) Mwakubverana na Aefesi 1:8-11, ndi cipi cifuniro ca Yahova? (Onani foto iri patsamba yakutoma.)

⁸ Mphangwa zakufunika kakamwe za m’Bhibhlya ndi zakuti dzina ya Yahova inadzaceneswa mu ndzidzi unakwanirisa iye cifuniro cace pa dziko yapantsi. Toera kucita pyenepi, iye anaphatisira Umambo wace unatsogolerwa na Kristu. Nkhabepo munthu anakwanisa kucinja pinafuna Yahova. Iye atipasa cinyindiro cakuti anadzacita pyonsene pinafuna iye. (Iza. 46:10, 11; Aheb. 6:17, 18) Dziko yapantsi inadzacinjwa mbikhala paraizu. Pontho anthu akulungama anadzakhala “na umaso kwenda na kwenda.” (Mas. 22:26) Mbwenye nee ndi pyenepi basi pinafuna kudzacita Yahova. Cifuniro ca Yahova ndi cakuti atumiki ace onsene a kudzulu na a pa dziko yapantsi akhale akuphatana. Buluka penepo, anthu onsene anadzabvera Yahova mwakukhulupirika ninga ntongi wawo. (Lerini Aefesi 1:8-11.) Kodi imwe nee musadzumatirwa na njira yakutsandzayisa inafuna kukwanirisa Yahova cifuniro cace?

9. Ndi pinthu pipi pya ntsogolo pyakuti tinakwanisa kupidziwa tingaleri Bhibhlya?

⁹ Onani profesiya idalonga Yahova m’munda wa Edheni idalembwa pa Genesi 3:15. b  Profesiya ineyi isalonga pinthu pyakuti mbapidakwanirisa cifuniro cace. Mbwenye pinthu pyenepi mbapidacitika pakupita pyaka pizinji. Mwacitsandzo, Mulungu apanga Abhrahamu kuti pakupita madzindza mazinji, m’bodzi wa anthu a dzindza yace mbadabala Kristu. (Gen. 22:15-18) Buluka penepo mu caka 33, Yezu alumwa pa citende mwakubverana na profesiya. (Mabasa 3:13-15) Khundu yakumalisa ya profesiya ineyi, inalonga kuti nsolo wa Sathani unadzanyedzwa inadzakwanirisika pakupita pyaka pyakupiringana 1.000 ntsogolo. (Apok. 20:7-10) Pontho Bhibhlya isalonga pinthu pizinji thangwi ya pinafuna kucitika mu ndzidzi wakuti kuidana kwa dziko ya Sathani na gulu ya Yahova kuli kufika kunkhomo.

10. (a) Ndi pinthu pipi pinafuna kucitika mwakukhonda dembuka? (b) Tinakhunganya tani manyerezero athu na ntima wathu? (Onani cidzindikiro capantsi.)

¹⁰ Nyerezerani pinthu pyakudzumatirisa kakamwe pinalonga Bhibhlya kuti pinadzacitika ntsogolo. Cakutoma, anthu anadzalonga “ntendere na citsidzikizo!” (1 Ates. 5:2, 3) Nyatwa ikulu inadzatoma “mwakututumusa” mu ndzidzi wakuti mautongi anadzapomokera mauphemberi onsene authambi. (Apok. 17:16) Buluka penepo, cinadzaoneka cidzindikiro ca “mwana wa munthu mbakabwera m’makole kudzulu na mphambvu na mbiri ikulu.” (Mat. 24:30) Yezu anadzatonga anthu, anadzagawa mabira na mbuzi. (Mat. 25:31-33, 46) Mbwenye Sathani nee anakhala kwene tenepo. Iye anadzacitisa kuti nsoka wa mautongi wakuti m’Bhibhlya usacemerwa Goge wa dziko ya Magoge, upomokere atumiki a Yahova. (Ezek. 38:2, 10, 11) Kusiyapo pyenepi, Akristu akudzodzwa anafuna kusalikira anadzaenda kudzulu kuna Yezu na aanju mbagumanyikana toera kumenya nkhondo ya Armajedhoni yakuti ndi kumala kwa nyatwa ikulu. c (Mat. 24:31; Apok. 16:14, 16) Buluka penepo, Utongi wa Kristu wa Pyaka Cikwi unadzatoma kutonga dziko yapantsi.—Apok. 20:6.

11. Cidikhiro cakukhala na umaso wakukhonda mala cisabvekanji kuna imwe? (Onanimbo foto.)

¹¹ Cincino nyerezerani pinthu pinafuna kukucitikirani ntsogolo pa kumala kwa pyaka cikwi. Bhibhlya isalonga kuti Nciti wathu ‘aikha mu ntima mwathu cifuno cakukhala kwenda  na kwenda.’ (Ekle. 3:11) Pyenepi pisabvekanji kuna imwe na uxamwali wanu na Yahova. Bukhu ya Achege-se a Jeová, patsamba 319, yalonga tenepa: “Tingakhala m’maso mu pyaka pizinji kakamwe, ife tinadziwa kakamwe Yahova kupiringana cincino. Mbwenye tinaona kuti piripo basi pinthu pizinji kakamwe pyakudzumatirisa pyakuti tinakwanisa kupipfundza thangwi ya iye. . . . Kukhala na umaso kwenda na kwenda kunadzakhala kwakutsandzayisa kakamwe, pontho tinadzakhala akutsanzaya kakamwe thangwi ya kukhala na uxamwali wakuwanga na Yahova.” Mphapo cincino, mu ndzidzi unapitiriza ife kupfundza Mafala a Mulungu, ndi mphangwa zipi zakuti tisafunika kuwangisira toera kuzibvesesa mwadidi?

12. Tinakwanisa tani kuyang’ana kudzulu? Perekani citsandzo.

¹² Bhibhlya isapangiza pang’ono kuti Yahova ali tani “kudzulu kakamwe.” (Iza. 33:5) Iyo isapangiza pinthu pyakudzumatirisa kakamwe thangwi ya Yahova, pontho thangwi ya khundu yakudzulu ya gulu yace. (Iza. 6:1-4; Dan. 7:9, 10; Apok. 4:1-6) Mwacitsandzo, ife tinakwanisa kuleri thangwi ya pinthu pyakudzumatirisa pidaona Ezekiyeli mu ndzidzi ‘udafunguka kudzulu mbatoma kuona masomphenya a Mulungu.’—Ezek. 1:1.

13. Mwakubverana na Ahebheri 4:14-16 ninji cinakomerwa na imwe thangwi ya basa ya Yezu kudzulu?

¹³ Nyerezeranimbo pya basa ikulu iri na Yezu kudzulu ninga Mambo wathu na Nyantsembe Wankulu wakuti asabvera ntsisi. Thangwi ya Yezu, ife tinakwanisa kufendedzera “mpando waumambo wa Mulungu, wakuti asapangiza kukoma ntima kukulu” tingacita phembero mbatiphemba ciphedzo “pa ndzidzi wakuthema.” (Lerini Ahebheri 4:14-16.) Ntsiku zonsene tisafunika kunyerezera pinthu pidaticitira Yahova na Yezu, pontho pinaticitira iwo kubulukira kudzulu. Ufuni wawo kuna ife usatiwangisa kakamwe, pontho usatiphedza toera  kukhala aphinga mu utumiki wathu.—2 Akor. 5:14, 15.

14. Ndi cinthu cipi cadidi kakamwe cakuti tinakwanisa kucicita toera kupangiza kuti tisapereka takhuta kuna Yahova na Yezu? (Onanimbo mafoto.)

¹⁴ Njira ibodzi yakupangiza kwathu kupereka takhuta kakamwe thangwi ya Mulungu na Mwanace ndi kuwangisira toera kuphedza anango kuti akhale Mboni za Yahova na anyakupfundza a Yezu. (Mat. 28:19, 20) Ndi pyenepi pidacita mpostolo Paulu toera kupangiza kupereka kwace takhuta kuna Mulungu na Kristu. Iye akhadziwa kuti Mulungu asafuna “kuti anthu a mitundu yonsene apulumuswe, pontho adziwe mwadidi undimomwene.” (1 Tim. 2:3, 4) Iye aphata basa mwaphinga mu utumiki toera kuphedza anthu azinji kuti ‘munjira zonsene akwanise kupulumusa anango.’—1 Akor. 9:22, 23.

15. Mwakubverana na Masalmo 1:2, ninji cinafuna kutitsandzayisa?

¹⁵ Nyamasalmo alonga kuti munthu wakutsandzaya na anafambirwa mwadidi na pinthu ndi ule ‘anakomerwa na mwambo wa Yahova,’ pontho “asaleri mwambo Wace mwakukhonda galuza masiku na masikati.” (Mas. 1:1-3) Nthumburuzi unango alonga thangwi ya mavesi anewa kuti: “Munthu unoyu asafuna kakamwe citsogolero ca Mulungu mbacisaka, asapfundza Mafala a Mulungu, pontho asamala ndzidzi uzinji mbakanyerezera pidapfundza iye.” Iye athimiza: “Munthu unoyu nee anakwanisa kumala ntsiku nee kuleri Bhibhlya.” Imwe munakwanisa kutsandzaya kakamwe na kupfundza Bhibhlya mungabvesesa, pontho mungaona kuti mphangwa za m’Bhibhlya zisabverana tani. Ndi pyakutsandzayisa kakamwe kusaka kubvesesa Mafala a Mulungu!

16. Tinapfundzanji mu nsolo unatowera?

¹⁶ Undimomwene unatipfundzisa Yahova m’Mafalace nee ndi wakunentsa kakamwe toera kuubvesesa. Mu nsolo unatowera tinaona undimomwene unaoneka ninga ndi wakunentsa unalonga pya templo ikulu yauzimu ya Yahova idalonga Paulu mu tsamba idalembera iye Akristu Acihebheri. Tisadikhira kuti kupfundza mphangwa zenezi kunakutsandzayisani kakamwe.