1-2. Sɛ esũa Bible ne, na ɛpena kyɛ ɛte yebo yé a, atẽe pá beni yeɛ ɛkɔhora kɔfa so ɔ? Ma yenwo mvandoho.

 FA YE kyɛ ɛpena kyɛ ɛtɔ awuro bie. Sɛ bɛpɛ awuro nanwo foto na bɛfa bekyire wɔ a, ekogyina ɛhẽne ngome so kɔfa kɔtɔ awuro ne anaa? Daabi, ɛngɔyɛ sɔ, na mmom ɛkɔhɔ nekaa bɔ awuro ne wɔ ne. Sɛ ekodwu berɛ a, ɛkɔto wɔ boase kɔneanea awuro ne kunu ne yenwo mukoraati kɔnea kyɛ ɔte bɔ ekuro, kora né sɛ ɛkɔtɔ a na atɔ. Afei koso ebia ekobisa maa bɛkɔfa sua ne plan bekohyire wɔ, kyɛbɔ ɔkɔyɛ a ekonwu atẽe bɔ bɛfale so besili awuro ne ɔ. Na ebia ɛkɔmaa bɛkɔfa awuro nanwo ngrataa bekohyire wɔ kora na atɔ. Nahorɛ dwirɛ yeɛ ole kyɛ, ɔnate kyɛ ɔte awuro bɔ ɛbaatena nu nati, ɛkɔto wɔ boase kɔnea nikyeebiala bɔ ɔwɔ yenwo ɔ.

² Sɔ ala yeɛ yɛkɔhora yɛkɔyɛ ɔ, mmerɛ bɔ yɛkenga Bible ne. Ebie bɔ wasũa Bible nanwo dwirɛ wahɔ sĩɛ fale Bible ne totole “aborɔsaen pirikua bie bɔ ole fapem bɔ ɔyɛ se paa” nanwo. Yede edwirɛ bɔ ɔwɔ Bible nanu ne, yɛkɔyɛ sɛɛ né yahora yanwu ye yé? Sɛ ɛkenga Bible ne sɔ mbaen a, edwirɛ bɔ ɔwɔ nu ne, yenye so kãa bie yeɛ ekonwu ye ɔ. Sɛ ɛyɛ sɔ a, né wayɛ kyɛ ‘eté hia sona bɔ ɔkɔhyɛ ye bo kosa kohyirehyire wɔ Nyameɛ dwirɛ ne ɔ.’ (Heb. 5:12) Kyɛbɔ sɛ ebie kwaatɔ awuro a, onya yenwo alagyé nea yenwo dwirɛ mukoraati ne, sɔ ala yeɛ wɔ koso sɛ ɛkɔhora kɔte Bible nanu dwirɛ nabo a, odikyɛ ɛto wɔ boase sũa ye yé ɔ. Atẽe pá bɔ ɛkɔfa so kɔyɛ sɔ yeɛ ole kyɛ, sɛ esũa Bible ne a, fa bɔ ɛkenga ne toto Bible nu dwirɛ foforɛ nwo, na nea kyɛbɔ ɔne bɔ ɛkenga ne yia ɔ. Afei koso, sɛ ɛkenga Bible ne a, bɔ mmɔden kyɛ ekonwu bɔ yeti yeɛ edé di kyɛ bɔ ɛkenga ne te nahorɛ ɔ.

3. Nzu yeɛ somafoɛ Pɔɔlo hãhyirele oliemamɔ Kristofoɛ kyɛ bɛyɛ ɔ, na nzuati ɔ? (Ɛfesofoɛ 3:​14-19)

³ Bible nu dwirɛ biemɔ wɔ berɛ a, sɛ yɛpena kyɛ yɛte yebo yé paa a, sana yɛto yɛ boase yesũa ye yé. Somafoɛ Pɔɔlo hãhyirele  oliemamɔ Kristofoɛ kyɛ, bɛyere bɛnwo besũa Nyameɛ dwirɛ ne yé kyɛbɔ ɔkɔyɛ a bɛkɔte “kyɛbɔ osi trɛ, osi te tendenn, osi wale, ɔne kyɛbɔ osi te kuronn” nabo ɔ. Sɛ bɛyɛ sɔ a, né ɔkɔboka bɛ maa bɛkɔhora ‘bekotira ndii, na batindim’ wɔ gyidie nanu. (Kenga Ɛfesofoɛ 3:​14-19.) Odikyɛ yɛ koso yɛbɔ mmɔden kyɛ yɛkɔyɛ sɔ ala. Yede ɛmɔma yɛnea atẽe bɔ yɛkɔfa so yekosũa Nyameɛ Dwirɛ ne kyɛbɔ ɔkɔyɛ a yɛkɔhora yɛkɔte yebo yé ɔ.

4. Sɛ yɛkɔhora yekopingyé Yehowa paa a, nzu yeɛ odikyɛ yɛyɛ ɔ? Kã ebie nwo dwirɛ.

⁴ Yɛ bɔ yɛte Kristofoɛ ne, sɛ yesũa Bible ne a, nna enu dwirɛ bɔ ɔnyɛ se kyɛ yɛkɔte yebo ne ngome yeɛ odikyɛ yesũa ɔ. Na mmom odikyɛ yɛbɔ mmɔden yesũa “Nyameɛ mvealeɛ nu nhyehyɛleɛ” koso nwo nikye. Sɛ yɛyɛ sɔ a, Nyameɛ kɔfa ye honhom ne kɔboka yɛ maa yɛkɔte yebo. (1 Kor. 2:​9, 10) Sɛ esũa Bible ne a, ɛkɔhora kɔyɛ nhwehwɛmuɛ kɔhɔ sĩɛ. Sɛ ɛyɛ sɔ a, ɔkɔboka wɔ maa ekopingyé Yehowa paa. Ebie yeɛ ole kyɛ, nningyein bɔ Yehowa yɛ mane ye mmenia bɔ bɛtenane ase tete fahyirele kyɛ ɔdɔ bɛ ne, ɛkɔhora kosũa yenwo nikye. Sɛ ɛyɛ sɔ a, ɔkɔmaa ekonwu kyɛ wɔ koso Yehowa dɔ wɔ. Afei koso, atẽe bɔ né Yehowa pena kyɛ tete Yisraelfoɛ nemɔ fa so sõ ye ne, ɛkɔhora kɔyɛ yenwo nhwehwɛmuɛ. Mmerɛ bɔ ɛyɛ sɔ nhwehwɛmuɛ ne, fa toto atẽe bɔ Yehowa pena kyɛ Kristofoɛ fa so sõ ye ɛnnɛ nanwo. Ebiekũ koso, ngɔmhyɛ ahoroɛ bɔ Yesu maa ɔwale nu mmerɛ bɔ né ɔwɔ aseɛ he aso ne, ɛkɔhora kosũa yenwo nikyee kɔhɔ sĩɛ.

5. Edwirɛ benimɔ yeɛ ɛpena kyɛ ɛyɛ nu nhwehwɛmuɛ kɔ sĩɛ mmerɛ bɔ esũa nikyee ne?

⁵ Aliemaa biemɔ wɔ berɛ a, sɛ besũa Bible ne a, bɛto bɛ boase bɛyɛ nu nhwehwɛmuɛ bɛkɔ sĩɛ. Bɛhãne nningyein biemɔ bɔ bɛnye gye yenwo kyɛ bɛkɔyɛ nu nhwehwɛmuɛ wɔ Bible nanu nanwo dwirɛ. Bɔ bɛhãne ne, ekonwu yenwo dwirɛ wɔ alaka bɔ yenwa, “ Bible Nanu Dwirɛ Biemɔ Bɔ Ɛkɔhora Kɔyɛ Nu Nhwehwɛmuɛ Ɔ” nanu. Sɛ ɛpena kyɛ ɛte sɔ dwirɛ nemɔ bo yé a, ɛkɔhora kɔfa Nhoma a Yehowa Adansefo De Yɛ Nhwehwɛmu ne kɔyɛ sɔ, na ɛhẽne kɔmaa wɔnye kɔgye paa. Sɛ esũa Bible ne, na ɛto wɔ boase yɛ nhwehwɛmuɛ kɔ sĩɛ a, ɔkɔmaa wɔ gyidie kɔyɛ se, na “ekonya Nyameɛ nwo nimdeɛ.” (Any. 2:​4, 5) Yede ɛmɔma yɛnea  Bible nu dwirɛ biemɔ bɔ yɛkɔhora yɛkɔyɛ nu nhwehwɛmuɛ yɛkɔhɔ sĩɛ ne bie.

6. (a) Nzuati yeɛ nikyeebiala bɔ Yehowa abɔ ye tianu kyɛ ɔkɔyɛ ne, ɔba nu mmerɛ biala ɔ? (b) Bɔ Yehowa abɔ ye tianu kyɛ ɔkɔyɛ kɔma kuro sona, ɔne bɔ ɔkɔyɛ ye wɔ aseɛ so ne, nzuati yeɛ ɔkɔtena berɛ “afebɔɔ”? (Ɛfesofoɛ 3:11)

⁶ Bɔ Nyameɛ abɔ ye tianu kyɛ ɔkɔyɛ ne, ɛmɔma yɛnea bɔ Bible ne kã fa yenwo ɔ. Yehowa de ɔtte kyɛ sona, ofikyɛ sɛ sona bɔ ye tianu kyɛ ɔkɔyɛ nikyeebie, na edwirɛ bie si a, ɔmaa bɔ ɔpena kyɛ ɔyɛ ne mukoraati yɛ mbaen. Nakoso Yehowa de, sɛ ɔbɔ ye tianu kyɛ ɔkɔyɛ nikyeebie, na sɛ edwirɛ bie si po a, ɔkora fa atẽe foforɛ so yɛ bɔ wabɔ ye tianu kyɛ ɔkɔyɛ ne. Bɔ ɔyɛ yɛ fɛ yeɛ ole kyɛ, Yehowa ‘nhyehyɛleɛ bɔ ɔwɔ berɛ afebɔɔ’ anaa bɔ wabɔ yetianu kyɛ ɔkɔyɛ ne, waye y’ali ngakãngakã wahyire yɛ wɔ Bible nanu. (Ɛfe. 3:11) Nikyeebiala bɔ Yehowa abɔ ye tianu kyɛ ɔkɔyɛ ne kɔwa nu, ɔnate kyɛ ole “botaeɛ bɔ yiti yeɛ wayɔ nikyee biala ɔ.” (Any. 16:4) Afei koso, bɔ Yehowa abɔ ye tianu kyɛ ɔkɔyɛ ne, sɛ ɔba nu a ɔkɔtena berɛ daa. Yede nzu yeɛ Yehowa abɔ ye tianu kyɛ ɔkɔyɛ ɔ, na nhyehyɛɛ beni yeɛ wayɛ kyɛbɔ ɔkɔyɛ a, bɔ wabɔ ye tianu kyɛ ɔkɔyɛ ne kɔwa nu ɔ?

7. Mmerɛ bɔ Adam ne Hawa yɛle asoserɛ ne, nzu yeɛ Yehowa yɛle kyɛbɔ ɔkɔyɛ a bɔ wabɔ ye tianu kyɛ ɔkɔyɛ ne kɔwa nu ɔ? (Mateo 25:34)

⁷ Bɔ né Yehowa abɔ ye tianu kyɛ ɔkɔyɛ kɔma Adam ne Hawa ne, ɔhãne yenwo dwirɛ hyirele bɛ. Ɔhãhyirele bɛ kyɛ, ‘bɛwo na bɛta, beyi aseɛ so tɛkyɛ ná beli . . kaka biala bɔ ɔwɔ aseɛ so ɔ so.’ (Gye. 1:28) Mmerɛ bɔ Adam ne Hawa yɛle asoserɛ ne, ɔmaa bɔne hãne mmenia mukoraati. Nakoso ɛhẽne amma bɔ Yehowa abɔ ye tianu kyɛ ɔkɔyɛ ne anzesã. Ɔfale atẽe foforɛ so kyɛbɔ ɔkɔyɛ a, bɔ wabɔ ye tianu kyɛ ɔkɔyɛ ne kɔwa nu ɔ. Bɔ Yehowa yɛle yeɛ ole kyɛ, Adam ne Hawa yɛle asoserɛ ne sĩ ne, ɔhyehyɛle Ahennie bie wɔ anwuro. Ɔnate sɔ Ahennie naso kɔmaa bɔ wabɔ ye tianu kyɛ ɔkɔyɛ kɔma kuro sona, ɔne bɔ ɔkɔyɛ ye wɔ aseɛ so ne kɔwa nu. (Kenga Mateo 25:34.) Yehowa mmerɛ bɔ wahyɛ ne sõne ne, ɔsomane ye bamuɛ baa ne wale aseɛ so maa ɔɔhãne sɔ Ahennie nanwo dwirɛ hyirele mmenia. Afei koso, Yehowa maa ɔwa ne wu mane yɛ kyɛbɔ ɔkɔyɛ a okole yɛ kofi bɔne ne ewue nu ɔ. Ɛhe maa yenwu kyɛ, Yehowa kuro yɛ dwirɛ paa. Ɛhẽne sĩ ne, Yehowa tingyele Yesu maa ɔhɔle anwuro kyɛ ɔɔyɛ Nyameɛ Ahennie naso hene. Nakoso bɔ Nyameɛ abɔ ye tianu kyɛ ɔkɔyɛ ne, yenwo dwirɛ pẽe wɔ berɛ bɔ odikyɛ yenwu ye ɔ.

8. (a) Edwirɛti beni yeɛ Bible ne gyi so ɔ? (b) Kyɛbɔ Ɛfesofoɛ 1:​8-11 kã ne, nikyee foforɛ beni yeɛ Yehowa kosa kɔyɛ ɔ? (Nea foto bɔ ɔwɔ Ɛwɛnelɛ Waen ne nyunu ne.)

⁸ Edwirɛti bɔ Bible ne gyi so paa yeɛ ole kyɛ, Yehowa nate ye ahennie bɔ wafa wawura Kristo sa kyɛ oli so hene naso kɔmaa bɔ wabɔ ye tianu kyɛ ɔkɔyɛ ye wɔ aseɛ so ne kɔwa nu. Ɛhẽne kɔmaa ye dumaa nanwo kɔte. Bɔ Yehowa abɔ ye tianu kyɛ ɔkɔyɛ ne, nikyefee ngɔhora ngɔsesã ye, na mmom ye mukoraati kɔwa nu. (Yes. 46:​10, 11; Heb. 6:​17, 18) Ɔngɔhyɛ Nyameɛ kɔmaa aseɛ ne kɔkakyi Paradise, na mmenia bɔ bɔne biala nne bɛnwo bɔ bɛte Adam ne Hawa bɛ bosofoɛ ne, bɛkɔtena so daa, na ‘bekonya anika afebɔɔ.’ (Edw. 22:26) Nná ɛhẽne ngome yeɛ Yehowa kɔyɛ ɔ, na mmom ɔkɔyɛ nningyein pẽe kɔboka so. Ebie yeɛ ole kyɛ ɔkɔhã abɔfo bɔ bɛwɔ anwuro, ɔne mmenia bɔ bɛwɔ aseɛ so ne mukoraati kɔbɔ nu kyɛ abusũa kõ. Sɛ ɔba sɔ a, ebiala kɔbrɛ yenwo ase kɔma Yehowa na bekole bɛkɔto nu kyɛ, ye ngome yeɛ ɔfata kyɛ odi nikyeebiala so ɔ. (Kenga Ɛfesofoɛ 1:​8-11.) Nhyehyɛɛ ahoroɛ bɔ Yehowa ayɛ, kyɛbɔ ɔkɔyɛ a bɔ ɔpena kyɛ ɔyɛ ne kɔwa nu ne, sɛ esusu yenwo a, aso ɔnyɛ wɔ nwanwa?

9. Sɛ yɛkenga Bible ne a, sɛɛ yeɛ ɔboka yɛ maa yenwu nningyein bɔ okosisi kyẽabie ɔ?

⁹ Gyenesise 3:15 ne maa yenwu ngɔm bie bɔ Yehowa hyɛle wɔ Eden turo nu berɛ ɔ. b Wɔ sɔ ngɔmhyɛ  nanu ne, Yehowa hãne edwirɛ biemɔ bɔ né okosisi kora né bɔ wabɔ ye tianu kyɛ ɔkɔyɛ ne awa nu ɔ. Nakoso né okoli afoɛ pẽe kora né sɔ dwirɛ nemɔ asisi. Ebie yeɛ ole kyɛ, Yehowa hãhyirele Abraham kyɛ, Kristo ne kofi ye bosofoɛ nu yeɛ ɔkɔwa ɔ. (Gye. 22:​15-18) Afei wɔ afoɛ 33 Y.B. (Yɛ Aberɛ So) ne, behũni Yesu kyɛbɔ né bahyɛ yenwo ngɔm ne. (Aso. 3:​13-15) Ngɔmhyɛ ne bue bɔ ɔpɛ yebo ne kɔwa nu wɔ Yesu Afoɛ Apee Ahennie ne sĩ, mmerɛ bɔ wasɛkye Satan koraa ne. (Nye. 20:​7-10) Afei koso Bible ne maa yenwu kyɛ, ɔngɔhyɛ mmenia bɔ beli Satan sĩ ne, bɛkɔfa ɛpɔen bɔ enu yɛ se paa bɛkɔwa bɛbɔ bɛwɔ Yehowa ahyehyɛdeɛ nanu naso. Sɔ ɛpɔen ne, ebie silli llé.

10. (a) Edwirɛ benimɔ yeɛ okosisi ɛlɛsaen ala ɔ? (b) Yɛkɔyɛ sɛɛ né yasiesie yɛnwo yama sɔ mmerɛ ne? (Nea yebo berɛ dwirɛ ne.)

¹⁰ Bible ne hyɛ ngɔm kyɛ, edwirɛ biemɔ bɔ ɔyɛ nwanwa ɔbaasisi ɛlɛsaen ala. Bɔ olimoa, maen ahoroɛ bɔ bɛwɔ ewiase ne kɔhã kyɛ, banya “asomdwee ne anwotɔ!” (1 Tɛs. 5:​2, 3) Nakoso, “mvum nu,” awaen ahoroɛ nemɔ kɔsɛkye ngondombo sõen mukoraati. Ɛhẽne yeɛ ɔkɔmaa amaneɛnwunɛ piri ne kɔhyɛ yebo ɔ. (Nye. 17:16) Ɛhẽne sĩ ne, “bekonwu Sona Awa ne kyɛ ɔ́ba wɔ nyameɛso munungum nu wɔ tumi ne animnyam kandinga nu ɔ,” na ebia yekonwu yenwo nzɛngyerɛneɛ wɔ ewienu. (Mat. 24:30) Afei Yesu kobua mmenia ndɛen, na ɔkɔye bɛbɔ bɛte kyɛ mmoaen ne kofi bɛbɔ bɛte kyɛ mmɔngye nanu. (Mat. 25:​31-33, 46) Nakoso Satan ngɔtena berɛ mbaen, na mmom ɔnate kyɛ onguro mmenia bɔ bɛsõ Yehowa ne dwirɛ nati, okopiapia maen biemɔ bɔ bahã bɛnwo babɔ nu maa bɛkɔto bekowura Yehowa mmenia so. Bible ne frɛ bɛ Gɔgo bɔ ɔwɔ Magɔgo aseɛ so. (Hes. 38:​2, 10, 11) Sɔ mmerɛ nanu ne, Yesu kɔfa bɛbɔ Yehowa afa ye honhom apopa bɛ bɔ beté wɔ aseɛ so ne kɔhɔ anwuro. Afei, bɛkɔboka Kristo ne ye abɔfo nemɔ aso maa bɛkɔfa Amagedon kõɛ ne bɛkɔwa. Ɛhẽne yeɛ ɔkɔfa amaneɛnwunɛ piri ne kɔwa ayieleɛ ɔ. c (Mat. 24:31; Nye. 16:​14, 16) Afei Kristo Afoɛ Apee Ahennie ne kɔhyɛ yebo.—Nye. 20:6.

11. Daa ngõa bɔ ekonya ye kyẽabie ne, nzuati yeɛ ɔkɔmaa wɔnye kɔgye paa ɔ? (Nea foto ne koso.)

¹¹ Yede fa ye kyɛ Kristo Afoɛ Apee Ahennie ne awa ayieleɛ. Sɛɛ yeɛ asetena kɔyɛ wɔ ɛhẽne sĩ ɔ?  Bible ne maa yenwu ye kyɛ Yehowa afa ‘mmerɛ bɔ olle ayieleɛ nwo adwene wawura y’adwene nu.’ (Nwo. 3:11) Yede, sɔ mmerɛ ne, Yehowa nwo nikyee beni yeɛ ekosũa na wamaa ahora apingyé ye paa ɔ? Nwomaa bɔ yeɛ ole Draw Close to Jehovah ne, ɔhãne dwirɛ bie bɔ ɔkã ahõne fale sɔ dwirɛ he anwo wɔ krataa bɔ ɔtɔ so 319 ne. Ɔhãne kyɛ: “Wɔ ewiase foforɛ nanu ne, yɛkɔtena ngõa nu afoɛ pẽe mbaen, na ɛhẽne kɔmaa yekonya yenwo atẽe yekosũa Yehowa nwo nikyee yɛkɔhɔ sĩɛ yɛkɔtra kyɛbɔ yɛyɛ ye ɛnnɛ ne. Nakoso, yɛngɔhora yengosũa Yehowa nwo nikyee yengoyie llé, ofikyɛ daa yekonya nningyein foforɛ bɔ ɔyɛ nyemene bɔ yekosũa yɛkɔfa Yehowa nwo ɔ.  . . Sɔ mmerɛ ne, asetena ngɔfono yɛ, ofikyɛ daa yekonya nningyein pẽe bɔ ɔkɔmaa yɛkɔhora yekopingyé Yehowa, na wamaa yɛnye agye ɔ.” Mmerɛ bɔ yɛnwondɛ kyɛ sɔ mmerɛ ne kɔwa ne, sɛ yɛto yɛ boase yesũa Bible ne a, nningyein foforɛ beni biekũ yeɛ yɛkɔhora yekonwu ye ɔ?

12. Nningyein bɔ ɔkɔ so wɔ anwuro dɔ ne, yɛkɔyɛ sɛɛ né yahora yanwu ye? Kã ebie nwo dwirɛ.

¹² Ɔwɔ nu kyɛ Yehowa te “anwuro anwuro dɔ paa,” nakoso Bible ne maa yenwu bɔ ɔkɔ so wɔ dɔ nanwo dwirɛ kãa. (Yes. 33:5) Bible ne kã nningyein bɔ ɔyɛ nwanwa pẽe fa Yehowa ɔne ye ahyehyɛdeɛ ne bue bɔ ɔwɔ anwuro dɔ nanwo. (Yes. 6:​1-4; Dan. 7:​9, 10; Nye. 4:​1-6) Ebie yeɛ ole kyɛ, Hesekiel hãne sɔ nningyein bɔ ɔyɛ nwanwa bɔ onwuni ne bie nwo dwirɛ wɔ ye nwomaa nanu. Ɔhãne kyɛ, “nyameɛso bukyele, na nyane nyekyire nwuni Nyameɛ.”—Hes. 1:1.

13. Bɔ Yesu yɛ ma yɛ wɔ anwuro dɔ bɔ Hebrifoɛ 4:​14-16 kã yenwo dwirɛ ne, nzuati yeɛ wɔnye gye yenwo ɔ?

¹³ Nikyee foforɛ koso kɔ so wɔ anwuro dɔ bɔ yɛkɔhora yɛkɔdwene yenwo ɔ. Yeɛ ole bɔ yɛ Hene ne yɛ sɔfo panyi bɔ ole anwumvoin Yesu Kristo ɔyɛ ma yɛ wɔ dɔ ne. Ɔnate ɛhẽne ati Bible ne kã kyɛ, yɛkɔhora yɛkɔfa Yesu Kristo so yɛkɔwa “adom ahennie bia” ne nyunu, amaa ɔnate so yahora  yabɔ Nyameɛ mbaeɛ yasrɛ ye kyɛ onwu yɛ anwumvoin, na ɔboka yɛ “wɔ mmerɛ bɔ ɔsɛ ɔ nu.” (Kenga Hebrifoɛ 4:​14-16.) Sɔ nhyehyɛɛ bɔ Yehowa nate Yesu so ayɛ ama yɛ wɔ anwuro dɔ ne, odikyɛ yɛdwene yenwo kyẽa biala. Sɔ nikyee bɔ Yehowa ne Yesu bɛyɛ bɛma yɛ ne, ɔmaa yenwu kyɛ bekuro yɛ dwirɛ paa. Ɛhẽne ati odikyɛ yɛyere yɛnwo yɛkã nzɛmba ne, na yɛyɛ bɔ Yehowa kuro ɔ.—2 Kor. 5:​14, 15.

14. Nikyee kõ beni yeɛ yɛkɔhora yɛkɔyɛ yɛkɔfa yɛkɔla Yehowa ne Yesu ase, wɔ bɔ bayɛ bama yɛ nanwo ɔ? (Nea foto ne koso.)

¹⁴ Nikyee kõ bɔ yɛkɔhora yɛkɔyɛ yɛkɔfa yɛkɔla Nyameɛ ne Ɔwa ne ase yeɛ ole kyɛ, yɛkɔboka mmenia maa bɛkɔɔsõ Yehowa na baayɛ Yesu asũafoɛ ɔ. (Mat. 28:​19, 20) Sɔ yeɛ somafoɛ Pɔɔlo yɛle ɔ. Ɔlale Nyameɛ ne Kristo ase wɔ bɔ bayɛ bama ye ne mukoraati nwo. Né Pɔɔlo se kyɛ bɔ Yehowa kuro yeɛ ole kyɛ, ‘mmenia amukoraa bekonya daa ngoa ná bawa nahorɛ nimdeɛ ne anu.’ (1 Tim. 2:​3, 4) Ɔnate ɛhẽne ati, somafoɛ Pɔɔlo yerele yenwo yɛle asɛnga adwuma ne fa bokale mmeni pẽe kyɛbɔ ɔkɔyɛ ná atee biala so, ‘wamaa bɛ nu biemɔ banya daa ngoa ɔ.’—1 Kor. 9:​22, 23.

15. Kyɛbɔ edwirɛ bɔ ɔwɔ Edwein 1:2 kã ne, nzu yeɛ ɔkɔmaa yɛnye kɔgye ɔ?

¹⁵ Sona bɔ ɔhworɔle edwirɛ bɔ olimoa wɔ Edwein nwomaa nanu ne, ɔhãne kyɛ sɛ bɛkã ebie bɔ yenye gye anaa wasi ye yé a, yeɛ ole sona bɔ “ye nye gye AWURADE mmeraa ne anwo, na ye mmeraa ne yeɛ ɔdwene ye nwo eyia ne kɔngɔen ɔ.” (Edw. 1:​1-3) Ebie bɔ bɛfrɛ ye Joseph Rotherham bɔ okyire Bible nabo kɔ dwudwolɛ foforɛ nu hãne sɔ tworɔnzɛm he anwo dwirɛ wɔ ye nwomaa bɔ bɛfrɛ ye Studies in the Psalms nanu. Ɔhãne kyɛ, “Sona biala bɔ osũa Nyameɛ dwirɛ ne, odikyɛ ɔmaa yenye gye afutue bɔ ɔwɔ nu nanwo. Afei koso odikyɛ ɔyere yenwo sũa, ɔyɛ nu nhwehwɛmuɛ, na ɔdwene yenwo kɔ sĩɛ kyɛbɔ ɔkɔyɛ a, ɔkɔhora kɔfa bɔ osũa ne kɔbɔ ye bra ɔ.” Osa hãne kyɛ, “Sɛ aleɛ kyẽ na ebie angora angenga Bible ne a, ɔte kyɛbɔ wamaa sɔ kyẽa ne asẽ ahɔ mbaen ne.” Yeti sɛ Bible ne kengalɛ kɔhora kɔyɛ wɔ fɛ a, yede sɛ ɛkenga a bɔ mmɔden kyɛ ɛkɔyɛ enu nhwehwɛmuɛ kɔhɔ sĩɛ. Afei fa bɔ ɛkenga ne toto tworɔnzɛm foforɛ nwo, na nea kyɛbɔ enu dwirɛ ne yia ɔ. Nahorɛ dwirɛ yeɛ ole kyɛ sɛ ɛto wɔ boase kenga Nyameɛ dwirɛ ne, na ɛyɛ nu nhwehwɛmuɛ kɔ sĩɛ a, ɔkɔmaa wɔnye kɔgye paa.

16. Nzu yeɛ yekosusu yenwo wɔ adesũa bɔ oliberɛ nanu ɔ?

¹⁶ Bɔ ɔyɛ yɛ fɛ paa yeɛ ole kyɛ, nahorɛ bɔ Yehowa nate Bible naso ɔmaa yenwu ye ne, ɔnyɛ se kyɛ yɛkɔte yebo ɔ. Sɔ nahorɛ bɔ ɔwɔ Bible nanu ne, enu kõ yeɛ ole Yehowa honhom nu asɔre awuro pirikua, bɔ Pɔɔlo hãne yenwo dwirɛ wɔ ye krataa bɔ ɔhwerɔ ɔɔmane Hebrifoɛ bɔ né baayɛ Kristofoɛ nanu ne. Yedé yedi paa kyɛ wɔnye kɔgye sɔ dwirɛ nanwo, mmerɛ bɔ yesusu yenwo yɛkɔ sĩɛ wɔ adesũa bɔ oliberɛ nanu ne.