1-2. Qullaawa Maxaafa nabbawatenna xiinxallate kaaˈlitannonketi kaajja doogo hiittenneeti? Lawishsha kuli.

 HANNI mine hidha hasiˈrootto yine hendo. Konne mine hidhattora albaanni maa buuxa hasiˈratto? Konni miniha albiido calla leellishshanno foto? Konni miniwa marte gobbayidono giddoyidono hattono kifilla seekkite laˈˈa hasiˈrattoti dihuluullissannote. Wole agurina konne mine minnoonni gara seekke afino mancho xaˈma hasiˈrattoha ikkara dandaanno. Qoleno konni hidha hasiˈrootto miniha mitto mittonka coye seekkite laˈˈa hasiˈrattoti egennantinote.

² Qullaawa Maxaafa nabbambeemmonna xiinxallineemmo woyiteno hatto assa dandiineemmo. Mittu Qullaawu Maxaafi fullahaanchi Qullaawu Maxaafi sokka, “mittu seekkine umme minnoonnihu hojjaameessu mini gedeeti” yiino. Ikkina Qullaawu Maxaafi giddo borreessinoonnire baala seekkine huwata dandiineemmohu hiittoonniiti? Qullaawa Maxaafa iimi iimi adda calla nabbambeemmoha ikkiro, “Maganu qaaliha umi roso” calla wodanchineemmo. (Ibi. 5:12) Hidha hasiˈnoommo miniha mitto mittonka coye laˈneemmonte gede, Maganu Qaaleno woˈmunni woˈma huwatate hatto assa hasiissannonke. Qullaawa Maxaafa seekke xiinxallate kaaˈlitannoti kaajja doogo, Qullaawu Maxaafi giddo noo sokka tiˈi teˈenne ledo xaaddanno gara hedate. Ammanneemmo halaale calla ikkikkinni konne halaale ammanneemmohu mayiraatirono huwatate sharrama hasiisannonke.

3. Soqqamaasinchu Phaawuloosi ammanate roduuwisi ma assitanno gede jawaachishino? Mayira? (Efesooni Sokka 3:14-19)

³ Maganu Qaaliha mitto mittonka coye huwatate, hawa gede huwantannikkiha Qullaawu Maxaafi halaale seekkine xiinxalla hasiissannonke. Soqqamaasinchu Phaawuloosi ammanate roduuwisi  Maganu Qaali halaali “mageeshshi geeshsha halaˈladonna hojjaameessa, seedanna diime ikkinoro” buuxate diinaggaabbe xiinxallitanno gede jawaachishinonsa. Hatto assituro insa ammanansanni ‘rumuxxitenna kaajjite’ heeˈra dandiitanno. (Efesooni Sokka 3:14-19 nabbawi.) Ninkeno hatto assa hasiissannonke. Hanni Maganu Qaale woˈmunni woˈma huwatate seekkine xiinxalla dandiineemmohu hiittoonniitiro laˈno.

4. Yihowawa shiqate maa assa dandiineemmo? Lawishsha kuli.

⁴ Kiristaana ikkinoommo daafira Qullaawu Maxaafihu xinta ikkino rosinni calla kassi yaa dihasiˈneemmo. Maganunnihu qullaawu ayyaani kaaˈlannonke daafira, “Maganunniha hawa gede huwantannikki coye” nafa xiinxallate quqquxammeemmo. (1 Qor. 2:9, 10, NW) Yihowawa albinni roore shiqate hojju xiinxallokki yannara seekke xiinxallate pirogiraame fushshiˈra dandaatto. Lawishshaho isi hunda heedhino soqqamaanosi baxannota leellishinohu hiittoonniitironna tini isi ateno baxannoheta leellishshannohu hiittoonniitiro xiinxalla dandaatto. Qoleno Yihowa Israeele iso magarinni magansidhara hasiˈrannoronna xaa yannarano magarinni magansiˈnammosira hasiˈrannoro heewisiissanni xiinxalla dandaatto. Woy Yesuusi uullate aana soqqami yannara woˈmitanno gede assino masaalo daafira seekkite xiinxalla dandaatto.

5. Hojju xiinxallokki yannara xiinxallate hedootto birxichi no?

⁵ Qullaawa Maxaafa diinaggaabbe xiinxallitannore mito roduuwa Maganu Qaali giddonni mayi daafira xiinxalla baxxannoro xaˈminoonni. Insa kultino hedo giddo gama, “ Hojju Xiinxallora Kaaˈlitanno Birxichuwa” yitanno saaxinera no. Yihowa Farciˈraasineta Xiinxallote Kaaˈlitanno Borro horoonsidhe kuri birxichuwa xiinxallittoro lowo hagiirre afiˈra dandaatto. Qullaawa Maxaafa seekkite xiinxallakki ammanakki kaajjishiˈratto gedenna “Maganu coyeno seekkite buuxatto” gede kaaˈlitannohe. (Law. 2:4, 5) Hanni xa seekkine xiinxalla dandiineemmoha hawa gede huwantannikkiha mito Qullaawu Maxaafi halaale laˈno.

6. (a) Mitto coye assate mixo fushshiˈratenna hakko coye assate mereero noo badooshshi maati? (b) Yihowa mannu oosoranna uullate assara hedinori disoorramanno woy ‘hegereho’ yineemmohu mayiraati? (Efesooni Sokka 3:11)

⁶ Hanni lawishshaho Qullaawu Maxaafi Maganu assara hedinori daafira mayyaannoro laˈno. Mitto coye assate mixo fushshiˈratenna hakko coye assate mereero lowo badooshshi no. Mixo fushshiˈra mitto bayicho massitanno doogo doodhate gedeeti yaa dandiinanni. Kayinni doogote guficho ikkannori tuncu yiiro hendoonnire assinikki gantara dandiinanni. Assinara hendoonni coyi kayinni marre iillinanni bayichi gedeeti. Marre iilla hasiˈneemmo bayicho anfoommo; haˈneemmo doogo kayinni didoodhinoommo. Hasiisannoha ikkiro hendoommo doogo agurre wole haˈnammora dandiineemmo. Yihowa “hegere hedosi” Qullaawu Maxaafi widoonni sunu sununni xawisinonke daafira galanteemmosi. (Efe. 3:11) Yihowa baalanka coye “hajasira yee assino” daafira isi hedinori horonta woˈmikki digatanno. (Law. 16:4) Hakko daafira Yihowa assannori hegerera kaajje heeˈranno. Ikkina Yihowa hedinorinna isi hedinore wonshate biddi assinori maati?

7. Umi minaanninna minaama finqilihu gedensaanni Yihowa hedinore wonshanno gara soorrinohu hiittoonniiti? (Maatewoosi 25:34)

⁷ Maganu umi minaanniranna minaamara insara hedinori maatiro kulinonsa. Yihowa insa “Ille ilamme, sirchiˈne baatto woˈmo; baattono kiˈne gashshitinannita ikkito; . . . baattote aana milli yaanno kalaqami lubbo afiˈrinohu baalu aana roorre afidhe” yiinonsa. (Kal. 1:28) Addaaminna Heewani finqile mannu baalu cubbo ragiˈranno gede assinoha ikkirono, Yihowa assara hedinore disoorrino. Hedinore wonshanno doogo kayinni soorrino. Isi umo mannu oosoranna uullate hedinore wonshate iima Gashshoote xintate bayichonkonni murciˈrino. (Maatewoosi 25:34 nabbawi.) Yihowa hedino yanna iillituta mannaho Gashshootisi daafira rosiisanno gedenna heeshshosi sayise oye cubbunninna reyotenni woxxannonsa gede baxillunni mitto Beettosi uullara soyino. Hakkiinni Yesuusi reyotenni kae Maganu Gashshooti Moote ikke gashshate iimira haˈrino. Ikkirono Maganu assara hedinori daafira hiincineemmohu wolu coyino no.

8. (a) Qullaawu Maxaafi cuˈmo maati? (b) Efesooni Sokka 1:8-11 kultanno garinni Yihowa jeefote assara hedinori maati? (Aaniidi qoolira noo misile lai.)

⁸ Qullaawu Maxaafiti qara cuˈmo, Yihowa Gashshootisi widoonni uullate hedinore wonshe suˈmisi qullaawanno gede assate. Yihowa assara hedinori disoorramanno. Isi hedinore baala wonshannota kule qaale eino. (Isa. 46:10, 11; Ibi. 6:17, 18) Hatte yannara uulla gannate ikkitanno; hakkiicho guutanna keeraancho ikkinohu Addaaminna Heewani sirchi hegerera hagiidhanni heeˈranno. (Far. 22:26) Kayinni Yihowa assara hedinori konne calla diˈˈikkino. Isiti jeefote hedosi iimano uullano heeˈrannohu hedate dandoo noonsa kalaqami baalu mitto ikkanno gede assate. Hakkiinni kalqete noo kalaqami baalu iso Gashshaanchonsa assiˈre isira ammaname heeˈranno. (Efesooni Sokka 1:8-11 nabbawi.) Yihowa hedinore wonshanno gari dhagge diˈˈikkinohe?

9. Qullaawa Maxaafa xiinxalline albillittete yanna daafira mageeshshire afa dandiineemmo?

⁹ Hanni Yihowa Edenete kaashshu basera coyiˈrinota Kalaqama 3:15 kulloonni masaalo laˈno. b Tini masaalo Yihowa hedinori woˈmanno gede assitanno ikkito daafira kultannote; kayinni woˈmitannohu lowo kumi diri gedensaanniiti. Tenne ikkito giddo gama Abirihaami  sirchi wido ikkinohu Kiristoosi ilamannota kultannote. (Kal. 22:15-18) Hakkiinni 33 M.D. masaalote kulloonni garinni Yesuusi ginde madiissinoonni. Sheexaanu umi cancanamannota kultannoti masaalonniti jeefote ikkito woˈmitannohu albillitte kumu diri gedensaanniiti. (Aju. 20:7-10) Qoleno Qullaawu Maxaafi Sheexaanu alamenna Yihowa dirijjite mereero noo diinoomi jeefora ikkannore lowore kulanno.

10. (a) Muli yanna giddo ikkanno coyi maati? (b) Surrenkenna wodananke qixxeessiˈra dandiineemmohu hiittoonniiti? (Lekkaalliidi qaagiishsha lai.)

¹⁰ Hanni Qullaawu Maxaafi giddo balanxe masaalloonninte, hattee dhagge ikkitanno yannara ikkannore hedi. Umo daga “Keereho, qarru dino” yaanno duduwo dudubbanno. (1 Tes. 5:2, 3) Hakkiinni “hedeweelcho” daga kaphu ammaˈno baala siˈanno woyite, bayiru qarri hanafanno. (Aju. 17:16) Hakkunni gedensaanni, ‘Manchi Beetti wolqatenninna lowo ayirrinyinni gomichu aana daanna’ leellishannori mannu wolqara aleenni ikkinori kalaqamara dandaanno. (Mat. 24:30) Yesuusi geˈreewo meuwiinni bade mannu oosora yoo yaanno. (Mat. 25:31-33, 46) Ikkirono hatte yannara Sheexaanu sammi yee diofollanno. Sheexaanu Yihowa manna effiˈre giwanno daafira buusantino daga yaano Qullaawu Maxaafi Maagoogi baattora noori yee kulanno daga Yihowa manna siˈanno gede assanno. (Hiz. 38:2, 10, 11) Uullate aana gattinori buurantinori Kiristoosinna iimi olantosi ledo mittooˈmite Armagedooni ola olamate iimira hadhanno; kuni oli bayiru qarri gumulamanno gede assanno. c (Mat. 24:31; Aju. 16:14, 16) Hakkiinni uullate aana Kiristoosihu Kumu Diri Gashshooti hanafanno.—Aju. 20:6.

11. Ati hegere heeshsho hexxo ma garinni laˈˈatto? (Misileno lai.)

¹¹ Hanni xa Kiristoosihu Kumu Diri Gashshooti gedensaanni ikkannore hendo. Qullaawu Maxaafi Kalaqaanchinke “Mannu wodanira hegerimmate hedo worino” yaanno. (Ros. 3:11) Hanni hakka woyite Yihowa ledo noohe jaaloomi hiittooha ikkannoro hedi. Yihowawa Shiqi (Amaaru Afoo) yaanno maxaafira qoola 319 dhagge ikkitanno hedo no: “Lowo  xibbe diro, lowo kume diro, lowo miliyoone diro wole agurina lowo biliyoone diro heeˈnummohu gedensaanni nafa Maganu Yihowa daafira ronseemmori xa ronseemmoha lowo geya rooranno. Ikkirono hatte yannara Yihowa daafira ronseemmohu kiire tunqannikkihu dhagge ikkanno coyi noota huwanteemmo . . . Hegere heeshsho hendeemmohura aleenni hagiirsiissannotenna kassi assitannote; hatte yannara roore hagiirsiisanno coyi kayinni woˈmanka woyite albinni roore Yihowawa shinqanni haˈrankeeti.” Hakka geeshsha kayinni woˈmanka woyite Maganu Qaale xiinxallineemmoha ikkiro wolere maa wodanchineemmo?

12. Iima hinge laˈˈa dandiineemmohu hiittoonniiti? Lawishsha kuli.

¹² Maganu Qaali ‘iima gordoho’ Yihowa heeˈrannowi maa lawannoro mito geeshshi mashalaqqe kulannonke. (Isa. 33:5) Qullaawu Maxaafi Yihowanna dirijjitesite iimiidi kifile daafira dhagge ikkannore kulannonke. (Isa. 6:1-4; Dan. 7:9, 10; Aju. 4:1-6) Lawishshaho Hiziqeeli ‘gordu faˈnameenna, Magano ajuujatenni afi’ woyite lainoha dhagge ikkanno coye nabbawa dandiineemmo.—Hiz. 1:1.

13. Ibiraawoota 4:14-16 kulloonni garinni Yesuusi iima heeˈre loosanno loosi giddo ati roore naadattohu hiikkonneeti?

¹³ Hanni Yesuusi iima Mootenkenna shaqqado Kakkalaanote Biilonke ikke loosanno loosi daafirano hendo. “Maaro adhatenna hasiissanno yannara kaaˈlitannonke elto afiˈrate . . . ayirradu Maganu barcimiwa” isi widoonni shiqa dandiineemmo. (Ibiraawoota 4:14-16 nabbawi.) Yihowanna Yesuusi iima heedhe assitinonkeriranna xaano assitanni noonkeri daafira hiincinummokki mittu barrino saˈˈara dihasiˈneemmo. Insa leellishshinonke baxilli loosoho kakkayisannonke hattono Yihowa diinaggaambe magansiˈneemmo gedenna soqqammeemmosi gede assannonke.—2 Qor. 5:14, 15.

14. Yihowanna Yesuusi assitinonkerira galatu noonketa leellishate assineemmohu kaajju coyi giddo mittu maati? (Misileno lai.)

 ¹⁴ Yihowanna Beettisi assitinonkerira galatu noonketa leellinsheemmote kaajja doogga giddo mitte mannu Yihowa Farciˈraasinenna Yesuusi rosaano ikkanno gede kaaˈlate. (Mat. 28:19, 20) Soqqamaasinchu Phaawuloosira Maganohonna Kiristoosira noosi baxilli hatto assanno gede kakkayisinosi. Isi, Yihowa fajjo “mannu baalunku gatannonna halaale afanno [gede]” ikkitinota afino. (1 Xim. 2:3, 4) Isi dandaamisi deerrinni ‘mito manna gatisate’ batinye manna kaaˈlate sharramino.—1 Qor. 9:22, 23.

15. Faarso 1:2 kultanno garinni hagiidhineemmo gede assannonkeri maati?

¹⁵ Faarsaanchu ‘Yihowa seera hashshanna barra buuxanni qaaganno’ manchi hagiirraamoho hattono assannori qinaannosi yee borreessasi garankolla. (Far. 1:1-3) Qullaawa Maxaafa tirannohu Jooseefi Roozerhaami yinanni manchi Isteedisi in ze Salmisi yinanni maxaafisira konni qummeeshshi daafira coyiˈranni togo yiino: “Mittu manchi Maganu biddishsha diinaggaawe hasiˈranni, xiinxallanni hattono hiincanni lowo yanna gudiro Maganu Qaalinni hagiidha hasiissannosi.” Qoleno isi Qullaawa Maxaafa nabbambikki saˈnannihu mittu mittunku barri mulla bainohu gede asse hedannota coyiˈrino. Atino Qullaawu Maxaafi giddo noota mitte mittenta hedo wodanchatenni xiinxallite, hattono mitte hedo wolete ledo xaaddannohu gara huwatte Qullaawa Maxaafa xiinxallakkinni hagiidha dandaatto. Maganu Qaale seekkine xiinxalla lowo geeshsha hagiirsiissannote!

16. Aananno birxichira maa ronseemmo?

¹⁶ Yihowa Qaalisi giddonni rosiisannonkehu muxxe ikkino halaali huwatate qarrisannoha diˈˈikkino. Aananno birxichira hawa gede huwantannikki halaali giddo mitto yaano Phaawuloosi Ibiraawootu Kiristaanira borreessino sokkara kulinohu bayiru Yihowahu ayyaanaamittennihu qullaawu mini daafira ronseemmo. Konne birxicho xiinxallanke lowo geeshsha hagiidheemmo gede assitannonketi dihuluullissannote!