1-2. Ino ty fomba tena soa azontsika atao lafa mamaky noho mianatsy Baiboly? Manomeza ohatsy.

 ERITSERETO hoe hivily moto iha. Avy le hivily va iha lafa maharè hoe misy olo mamarotsy moto? Sa handeha any mihintsy iha le hanenty ani-raha iny? Azo antoky fa ho any iha le hohenteanao laha tsy misy simba raha iny alohani-hivilianao azy.

² Afaky manao ho zay koa tsika lafa mamaky noho mianatsy Baiboly. Ka akory zany ty hahaizantsika soa ty raha anatini-Baiboly ao? Laha iha mamaky malakilaky avao, le ze raha tsotsotra avao ro mety ho hainao, zany hoe ‘ty raha fototsy nianaranao baka amy ty safà masi-Ndranahary’ ao. (Heb. 5:12) Ndao himpoliantsika ndraiky ohatsy mikasiky moto teroy iny. Alohani-hivilianao azy, le mila mandeha any iha sady henteanao soa tse ie. Manahaky ani-zay koa fa mila ianaranao soa zany ty Baiboly, amy zay ho azonao soa ty raha volaniny. Lafa mianatsy Baiboly, le henteo hoe ino ty ifandrambesani-raha iny amy ty raha hafa volanini-Baiboly. Anovo hay hoe ino ty fahamarina inoanao, le manino iha ro mino ani-raha rey. Zay ro fomba tena soa ianara Baiboly.

3. Nampirisihini-apostoly Paoly hanao ino ty Kristiana namany, le ino ty antony? (Efesianina 3:14-19)

³ Misy raha vitsivitsy mila dinihintsika soa laha teantsika ty hahazo soa ty raha volanini-Safà-Ndranahary. Nampirisiky ty rahalahy noho anabaviny kristiana apostoly Paoly mba hianatsy soa ty Safà-Ndranahary, amy zay ‘ho azon-drozy soa ty sakany noho halavany noho haabony voho ty halalikini-fahamarina.’ “Hamahatsy soa noho hiory soa” amy zay, ty finoan-drozy. (Vakio Efesianina 3:14-19.) Mila manao manahaky ani-zay koa tsika. Ndao moa hohenteantsika hoe akory  ty ahafahantsika mandiniky ty Safà-Ndranahary mba ho azontsika soa ty hevitsiny.

4. Ino ty azontsika atao mba hamonjea ani-Jehovah? Manomeza ohatsy.

⁴ Kristiana tsika ka tsy ampy ty hoe mahay ty fampianara fototsy amy Baiboly ao avao. Tsy mijano amy zay avao tsika. Ampeani-fanahy masi-Ndranahary tsika, ka mazoto mianatsy ndre ty “raha laliki-Ndranahary” aza. (1 Kor. 2:9, 10) Manino laha ataonao fianara am-bata ze raha hahavy anao hifandramby marìny amy Jehovah? Azonao atao, ohatsy, ty mikaroky ty fomba nampisehoany fitiava ty mpanompony taloha tany, le manino raha zay ro manaporofo fa tea anao koa ie. Azonao atao koa ty mandiniky ty fomba nitiavani-Jehovah hanompoani-Israelita reo azy, le bakeo ampitahao amy ty fomba itiavani-Jehovah hanompoantsika azy henanizao. Na azonao atao koa ty mianatsy amy an-tsipiriany ty faminania nitanteraky tamy fiainani-Jesosy noho ty fanompoany tan-tany etoa.

5. Misy foto-kevitsy teanao hanaova fikaroha va?

⁵ Nisy mpianatsy Baiboly mazoto vitsivitsy nanontanea hoe ino ty raha laliky tean-drozy hianara amy Safà-Ndranahary ao. Natao amy efajoro hoe “ Foto-kevitsy Teako Hanaova Fianara Am-bata” eo ty sisany amy raha nivolanin-drozy. Ho teanao ty mianatsy foto-kevitsy manahaky ani-reo satria manampy ty Fanondroana Bokin’ny Vavolombelon’i Jehovah na ty Fitaovana Fikarohana ho An’ny Vavolombelon’i Jehovah. Laha mianatsy laliky ty Baiboly iha, le hihamatanjaky ty finoanao sady “ho hitanao ty fahaiza a Ndranahary.” (Ohab. 2:4, 5) Ndao moa tsika handiniky ty sisany amy fahamarina laliky amy Baiboly ao, azontsika ianara soa.

6. a) Ino ty maha samby hafa ty plan noho ty fikasà? b) Manino ro azo volany hoe “mandrakizay” ty fikasàni-Jehovah mikasiky ty tany noho ty olombelo?

⁶ Eritsereto, ohatsy, ty raha volanini-Baiboly mikasiky ty fikasà-Ndranahary. Tsy mitovy ty plan noho ty fikasà. Manahaky lala mazava soa noho fa voafaritsy mialoha mba  hiavianao amy pilasy raiky ty plan. Fe tsy voatery ho mety ty plan lafa misy raha manaka an-dala eny. Fa ty fikasà le azo ampitovizy amy pilasy raiky teanao handehana. Haintsika soa hoe aia ty teantsika handehana, fe tsy voafaritsy ty lala handehanantsika any, satria afaky ovaovà raha zay lafa tena ilà. Soa avao fa nambarani-Jehovah tsikelikely amy Baiboly ao ty “fikasàny mandrakizay.” (Efes. 3:11, f.a.p.) Tozoro mety iaby ze ataony, satria ‘nataony hanatanteraha ty fikasàny ty raha iaby.’ (Ohab. 16:4) “Mandrakizay” zany ty fikasàni-Jehovah satria haharitsy mandrakizay ty vokatsini-raha ataony. Ino ty fikasàni-Jehovah, le ino iaby ty fanovà nataony mba hahatanteraky ani-raha zay?

7. Lafa nizizo ty olombelo voalohany, ino ty fanovà nataoni-Jehovah mba hahatanteraky ty fikasàny? (Matio 25:34)

⁷ Nivolani-Ndranahary tamin’olombelo voalohany rey hoe ino ty fikasàny ho an-drozy. Hoy ty asany: ‘Miteraha maro, le mihamaroa ka mamenoa ty tany. Anjakao ... ty rahamananay iaby an-tany etoy.’ (Gen. 1:28) Lafa nizizo Adama noho Eva, le lasa mpanota ty olombelo, fe tsy niova ty fikasàni-Jehovah. Novàny avao ty fomba hanatanterahany ani-fikasàny io. Avy le nanapa-kevitsy hanory Fanjakà an-danitsy any ie mba hanatanteraky ani-fikasàny tam-boalohany any mikasiky ani-tany toy noho ty olombelo iny. (Vakio Matio 25:34.) Lafa niavy amy zay ty fotoa voatondroni-Jehovah, le nirahiny tan-tany etoy Anakilahiny talanolo iny mba hampianatsy ty olo mikasiky ani-Fanjakà io noho hanome ty ainy hanavota antsika amy ota noho fahafatesa. Tafarani-zay, le nivelomini-Jehovah ho an-danitsy any ndraiky Jesosy mba ho Mpanjakani-Fanjakà-Ndranahary. Fe tsy zay avao fa mbo maro ty raha azontsika ianara mikasiky ty fikasà-Ndranahary.

8. a) Ino ty foto-kevitsini-Baiboly? b) Laha hentea ty Efesianina 1:8-11, ino koa ty fikasàni-Jehovah? (Henteo sary amy fononi-gazety toy.)

⁸ Zao ty foto-kevitsini-Baiboly: Hohamarìny ty anarani-Jehovah lafa ie manatanteraky ty fikasàny mikasiky tany toy amy alalani-Fanjakàny tarihini-Kristy. Tsy misy afaky manova ty fikasàni-Jehovah. Nampitamà ie fa tsy maintsy ho tanteraky raha zay. (Isaia 46:10, 11, f.a.p.; Heb. 6:17, 18) Kely sisa le ho lasa paradisa tany toy, ka “hahazo tavy ty fiaina mandrakizay” ty olo marina taranakini-Adama noho Eva sady ho lasa lavorary. (Sal. 22:26) Fe tsy zay avao fa mbo misy raha bevata teani-Jehovah hatao. Haharony raiky koa ty mpanompony iaby an-danitsy any noho an-tany etoy. Tsy hivaliky ty olo iaby amy zay fa haneky ani-Jehovah ho Mpanjaka. (Vakio Efesianina 1:8-11.) Tena soa ty fomba anatanterahani-Jehovah ty fikasàny. Tsy mahatseriky anao va raha zay?

9. Lafa tsika mamaky Baiboly, zisiky aia ty raha haintsika mikasiky ty hoavy?

⁹ Tiarovo faminania nivolanini-Jehovah amy Genesisy 3:15 tamy zaridainani-Edena tany iny. b Niresaky ty raha hiseho hanatanteraky ty fikasàny raha io, fe tsy hiseho raha reo laha tsy an’arivony tao afara atoy. Tafilitsy amy zay, ohatsy, ty hoe hana taranaky Abrahama, le baka amy ty taranakiny ro hiaviani-Kristy. (Gen. 22:15-18) Tamy tao 33 A.K. amy zay, le naràtsy ty tomitsini-Jesosy, araky ty fa nivolany tamy faminania iny. (Asa. 3:13-15) Ty raha hiseho farany amy faminania io, le ty hanorotoroa ty lohani-Satana. Mbo misy 1 000 tao mahery ty hisehoani-raha zay.  (Apok. 20:7-10) Maro biby ty raha resahini-Baiboly mikasiky ty raha hiseho, zisiky hahatampitsy ty fifandrafeani-tontoloni-Satana toy noho ty fandaminani-Jehovah.

10. a) Ino ty raha hiseho tsy ho ela? b) Akory ty hanomanantsika ty saintsika noho ty fontsika? (Henteo ty fanamariha ambany pejy.)

¹⁰ Diniho raha miavaky hiseho fa nivolanini-Baiboly retoa. Voalohany, hanao fanambarà hoe “fiadana noho filamina” firenena reo. (1 Tes. 5:2, 3) Vo vita zay, le hanomboky “tampoky” ty fijalea bevata lafa hanafiky ty fivavahan-diso iaby firenena reo. (Apok. 17:16) Afarani-zay, le mety hisy raha miavaky hiseho. “Ho avy amy rahoni-lanitsy eny ty Anak’olo, sady ho avy amin-kery noho voninahitsy bevata.” (Mat. 24:30) Hitsara ty olo Jesosy, le hanavaky ty aondry amy ty aosy. (Mat. 25:31-33, 46) Fe le mbo hanohitsy ani-Jehovah avao Satana amy fotoa zay. Tena halany ty vahoaki-Ndranahary, ka hisy firenena maromaro mitambatsy hampirisihiny mba hanafiky an-drozy. Goga baka amy tany Magoga moa ty ikaihani-Baiboly ani-firenena maromaro reo. (Ezek. 38:2, 10, 11) Mbo amy fijalea bevata io avao, le havory ho an-danitsy any ty voahosotsy sisa tavela an-tany etoy satria hiaraky amy Kristy noho tafikini-lanitsy rey rozy mba hialy amy aly Aramagedona. Aly io ro hanampitsy ty fijalea bevata. c (Mat. 24:31; Apok. 16:14, 16) Lafa vita zay le hanomboky ty Fanjakà Arivo Taoni-Kristy.​—Apok. 20:6.

11. Midika ino ho anao ty fitamana fiaina mandrakizay? (Henteo koa sary io.)

¹¹ Diniho amy zay henanizao ty hoavinao. Mivola ty Baiboly hoe fa ‘nataoni-Mpamoro antsika iny am-pontsika ao ty faniria hiay mandrakizay.’ (Mpito. 3:11) Eritsereto hoe midika ino ho anao raha zay le ino ty vokany amy ty fifandrambesanao amy Jehovah. Mahakinto ty raha volanini-boky Manatòna An’i Jehovah, pejy 319 mikasiky ani-zay. Ho zao ty voaresaky ao: “Maro biby mandilatsy ty raha haintsika amy zao ty raha ho haintsika mikasiky ani-Jehovah, lafa tsika ho velo zato tao, na arivo tao, na an-tapitrisa  tao, na an’arivo tapitrisa tao mihintsy aza. Fe mbo hahatsapa avao tsika hoe mbo misy raha maro mahatseriky azontsika ianara. ... Tena ho soasoa ty fiaina mandrakizay sady hisy raha maro sambihafa, ka ty tena soa marè amy raha reo le ty famonjeantsika ani-Jehovah.” Fe zisiky hiaviani-zay, le mbo misy raha azontsika dinihy lafa tsika manohy mianatsy ty Safà-Ndranahary. Ino zay?

12. Akory ty ahafahantsika mahita ty an-danitsy any? Manomeza ohatsy.

¹² Asehoni-Safà-Ndranahary antsika kelikely hoe manao akory ty misy ani-Jehovah “anabo eny.” (Isaia 33:5) Miresaky raha mahatseriky mikasiky ani-Jehovah noho ty tampany amy fandaminany an-danitsy any ty Baiboly. (Isaia 6:1-4; Dan. 7:9, 10; Apok. 4:1-6) Azontsika atao, ohatsy, ty mamaky mikasiky ty raha miavaky nihitani-Ezekiela lafa “nisokatsy ty lanitsy ka nahita fahità baka amy Ndranahary” ie.​—Ezek. 1:1.

13. Ino ty tsapanao lafa mandiniky ty raha ataoni-Jesosy baka an-danitsy any, voaresaky amy Hebreo 4:14-16 ao?

¹³ Eritsereto koa ty raha ataoni-Jesosy ho antsika baka an-danitsy any. Mpanjakantsika ie sady Mpisorobe mahay miferinay antsika. Amy alalany ro ahafahantsika mamonjy “ty sezi-mpanjakàni-azy Ndranahary mampiseho hasoam-panahy miavaky iny” amy vavaky noho ahafahantsika mahazo famindram-po noho fanampea “amy fotoa mety.” (Vakio Hebreo 4:14-16.) Soa tsika laha mieritseritsy ty raha fa nataoni-Jehovah noho Jesosy avao sanandro, sady mieritseritsy ty raha mbo ataon-drozy ho antsika baka an-danitsy any. Tena tea antsika rozy. Tokony hidosiky ty fontsika raha zay sady handrisiky antsika hazoto hanompo ani-Jehovah.​—2 Kor. 5:14, 15.

14. Ino ty raha tena soa azontsika atao mba hampisehoa hoe tena mankasitraky ani-Jehovah noho Jesosy tsika? (Henteo koa sary reo.)

 ¹⁴ Akory ty ampisehoantsika hoe tena ankasitrahantsika Ndranahary noho Anakilahiny iny? Toy misy fomba raiky tena soa: Miezaky manampy ty hafa ho lasa Vavolombeloni-Jehovah noho ho mpianatsini-Jesosy. (Mat. 28:19, 20) Zay mihintsy ty nataoni-apostoly Paoly mba hankasitraha a Ndranahary noho Kristy. Hainy hoe sitraponi-Jehovah “ty hanavota ty karazan’olo iaby noho hahaizan-drozy soa ty fahamarina.” (1 Tim. 2:3, 4) Niasa mafy tamy fanompoany ie mba hanampea olo maro araky ze azony atao, amy zay ‘mba hisy havotany ndre amy fomba akory ndre amy fomba akory.’​—1 Kor. 9:22, 23.

15. Laha hentea ty Salamo 1:2, ino ty hahasambatsy antsika?

¹⁵ Nivola ty mpanoratsy ty salamo voalohany fa sambatsy ze olo ‘tea ty lalànani-Jehovah’ noho ‘mametsivetsy ty lalànany ndre andro ndre haly.’ Mbo nivola koa ie fa ‘ho mety soa iaby ze raha ataon’olo zay.’ (Sal. 1:1-3; f.a.p.) Zao ty nivolanini-mpandika Baiboly raiky mana anara hoe Joseph Rotherham zay mikasiky ani-andinin-teny io: “Tokony haniry mafy hahazo ty tari-dala-Ndranahary ty olo raiky ka hila ani-raha io, hianatsy azy, sady hanoka fotoa hametsevetsea azy.” Nivola koa ie fa “laha misy andro nandalo fe tsy namakian’olo Baiboly, le nisera avao andro iny.” Afaky hahazo tavy ty fianara Baiboly iha laha mifantoky amy ty tsipiriany bevata sady manenty hoe ino ty ifandrambesani-raha rey. Tena soa ty mandiniky amy an-tsipiriany ty Safà-Ndranahary!

16. Ino ty hodinihintsika amy lahatsoratsy manaraky?

¹⁶ Maro ty fahamarina soasoa ampianarini-Jehovah antsika amy Safàny ao. Tsy sarotsy loatsy amintsika ty mahatakatsy ani-raha rey. Handiniky fahamarina laliky raiky mikasiky tempoly ara-panahini-Jehovah tsika amy lahatsoratsy manaraky ao, azy niresahini-Paoly tamy taratasy nisoratiny ho ani-Kristiana Hebreo rey iny. Enga ane ka ho teanao ty mandiniky ani-foto-kevitsy io.