1-2. O le ā le auala sili e faitau ma suʻesuʻe ai le Tusi Paia? Ia faataʻitaʻi.

 SEʻI faapea e te manaʻo e faatau se fale. O le ā e manaʻomia ona e iloiloina a o leʻi faia lau faaiʻuga? Pe e lava le na o le tilotilo i se ata o le pito i luma o le fale? E mautinoa e te manaʻo e vaaitino i le fale, savali faataamilo ai, alu i totonu, ma vaavaai i potu uma ma itu uma o le fale. Atonu foʻi e te manaʻo e vaai i le ata o le fale pe na faapefea ona fausia. O le mea moni, e te manaʻo e iloilo vaega uma o le fale o le a e faatauina.

² E tai faapena foʻi le mea e manaʻomia ona tatou faia pe a faitau ma suʻesuʻe le Tusi Paia. Ua faatusaina e se faitofā o le Tusi Paia le feʻau o le Tusi Paia, “i se fale e matuā telē lava ma maualuga ma e mauaa lona faavae.” E faapefea la ona tatou iloa lelei mea uma o loo i le Tusi Paia? Pe afai e faatopelau ona tatou faitauina, atonu o le a tatou aʻoaʻoina ai na o mea e masani ai po o “mataupu faavae o afioga paia a le Atua.” (Epe. 5:12) Peitaʻi, e pei o le faataʻitaʻiga i le fale, e manaʻomia ona tatou ō i totonu i se uiga faafaatusa ina ia iloilo vala uma o le Tusi Paia. O le auala sili e suʻesuʻe ai le Tusi Paia, o le iloa lea pe e faapefea ona fesootaʻi vaega uma o le feʻau o loo tusia ai. Ia maumauaʻi e malamalama po o ā upu moni e te talitonu i ai ma le māfuaaga e te talitonu ai i na upu moni.

3. O le ā na faalaeiauina e le aposetolo o Paulo ona uso ma tuafāfine Kerisiano e fai, ma aiseā? (Efeso 3:​14-19)

³ Ina ia malamalama lelei i vala uma o le Afioga a le Atua, e  tatau ona tatou malamalama i upu moni loloto o loo iai. Na faalaeiau e le aposetolo o Paulo ona uso ma tuafāfine Kerisiano e suʻesuʻe ma le filigā le Tusi Paia, ina ia “malamalama lelei i le lautele, ma le umi, ma le maualuga, ma le loloto” o le upu moni. O le faia faapea, o le a atili “mauaa ma faatumauina” ai lo latou faatuatua. (Faitau le Efeso 3:​14-19.) O le mea foʻi lenā e manaʻomia ona tatou faia. Seʻi o tatou talanoaina pe e faapefea ona suʻesuʻeina ma le māeʻaeʻa le Afioga a le Atua, ina ia malamalama lelei ai i upu moni loloto o loo iai.

4. O le ā e mafai ona tatou faia ina ia atili ai ona mafuta vavalalata atu iā Ieova? Aumai ni faataʻitaʻiga.

⁴ I le avea ai o i tatou o ni Kerisiano, e lē lava le tau ina malamalama i aʻoaʻoga faavae o le Tusi Paia. O le fesoasoani a le agaga paia o le Atua, e tatou te naunau ai e aʻoaʻoina “e oo lava i mea loloto a le Atua.” (1 Kori. 2:​9, 10) Aiseā e lē faia ai ni au lava suʻesuʻega ina ia atili ai ona e mafuta vavalalata iā Ieova? O se faataʻitaʻiga, e mafai ona e suʻesuʻe māeʻaeʻa pe na faapefea ona ia faaalia le alofa i ana auauna i aso anamua, ma pe e faapefea ona faamaonia ai e alofa o ia iā te oe. Atonu e te iloiloina le auala na faatulaga e Ieova e tapuaʻi atu ai tagata Isaraelu iā te ia, ma faatusatusa i le auala o loo tapuaʻi ai Kerisiano i aso nei. Pe atonu foʻi e te faia ni suʻesuʻega loloto i valoaga na faataunuu e Iesu i lona soifuaga ma lana faiva i le lalolagi.

5. Pe e iai se mataupu e te manaʻo e fai ai au lava suʻesuʻega?

⁵ Na fesiligia nisi o tagata e tinoū e suʻesuʻe le Tusi Paia po o ā mea loloto o le Tusi Paia e latou te mananaʻo e suʻesuʻeina. O loo lisiina atu nisi o a latou tali i le pusa “ Mataupu mo Suʻesuʻega a le Tagata Lava Ia.” E te matuā fiafia e suʻesuʻe na mataupu e faaaogā ai le Tusi Taʻiala mo Saʻiliʻiliga a Molimau a Ieova. O le suʻesuʻeina o mataupu loloto o le Tusi Paia, e mafai ona faamalosia ai lou faatuatua ma fesoasoani iā te oe e “maua ai le poto i le Atua.” (Faata. 2:​4, 5) Seʻi o tatou uaʻi atu i nisi o upu moni loloto o le Tusi Paia e mafai ona tatou suʻesuʻeina ma le māeʻaeʻa.

6. (a) O le ā le eseesega o le fuafuaga ma le finagalo? (e) Aiseā e tatou te faapea atu ai e tumau e “faavavau” le finagalo o Ieova mo tagata ma le lalolagi? (Efeso 3:11)

⁶ Seʻi manatu i le faamatalaga a le Tusi Paia e faatatau i le finagalo o le Atua. E matuā telē le eseesega o le fuafuaga ma le finagalo. O se fuafuaga, e faatusaina i se auala patino e te uia ina ia taunuu ai i le nofoaga o loo e fia alu i ai. Peitaʻi, e lē mafai ona taunuu lenā fuafuaga pe a poloka le auala. Ae o le finagalo, e faatusaina i se nofoaga e te taunuu i ai. E tatou te iloa lelei le nofoaga e taunuu i ai la tatou malaga, ma e tele auala e mafai ona tatou uia ina ia taunuu ai i inā. Maʻeu lo tatou lotofaafetai ona o loo faasolosolo ona faailoa mai e Ieova lona “finagalo e faavavau” i le Tusi Paia! (Efe. 3:11) Po o le ā lava le tulaga, ae e taulau pea Ieova ona ua ia ʻsaunia mea uma ina ia faataunuu ai lona finagalo.’ (Faata. 16:4) E tumau e faavavau mea e faia e Ieova. O le ā le finagalo o Ieova ma o ā fetuunaʻiga ua ia faia ina ia faataunuu ai?

7. Ina ua fouvale le uluaʻi ulugalii, o ā fetuunaʻiga na faia e Ieova e faataunuu ai lona finagalo? (Mataio 25:34)

⁷ Na faailoa atu e le Atua i le uluaʻi ulugalii lona finagalo mo i laʻua. Na ia fetalai atu ina “ia fanafanau ma ia faatoʻateleina, ia tumu ai le lalolagi ma ia galueaʻiina, ia pule i . . . meaola uma” i le laueleele. (Kene. 1:28) Ina ua fouvale Atamu ma Eva ona oo mai ai lea o le agasala i tagata uma lava, ae e leʻi taofia ai le faataunuuina o le finagalo o Ieova. Na ia faia fetuunaʻiga ina ia faataunuu ai lona finagalo. E leʻi umi ae saunia e Ieova le Malo i le lagi e faataunuu lona finagalo mo tagata ma le lalolagi. (Faitau le Mataio 25:34.) I le taimi atofaina a Ieova, na ia auina mai ai lona Alo ulumatua i le lalolagi e aʻoaʻo tagata e faatatau i le Malo, ma foaʻi lona ola ina ia togiola ai i tatou mai i le agasala ma le oti. Na faatūina Iesu i le lagi e avea ma Tupu o le Malo o le Atua. Peitaʻi, o loo tele pea isi mea e manatunatu loloto i ai e faatatau i le finagalo o le Atua.

8. (a) O le ā le feʻau autū o le Tusi Paia? (e) E pei ona taʻua i le Efeso 1:​8-11, o le ā le vala autū o le finagalo o Ieova? (Tagaʻi i le ata i le faavaa.)

⁸ O le feʻau autū o le Tusi Paia o le faasilisilia lea o le suafa o Ieova, a o ia faataunuu lona finagalo mo le lalolagi e ala i lona Malo o loo pule ai Keriso. E lē mafai ona suia le finagalo o Ieova. Ua ia faamautinoa mai o le a ia faataunuuina lava lona finagalo. (Isa. 46:​10, 11, fpl.; Epe. 6:​17, 18) E iai le taimi o le a suia ai le lalolagi e avea ma parataiso, lea o le a “fiafia [ai] i le olaga e faavavau” tagata lelei atoatoa ma amiotonu o ē e tupuga mai iā Atamu ma Eva. (Sala. 22:26) Ae o le vala autū o le finagalo o Ieova, ia autasia ana foafoaga atamamai uma i le lagi ma le lalolagi. I lenā taimi, o le a gauaʻi faamaoni foafoaga uma iā te ia o le Pule Silisili Ese. (Faitau le Efeso 1:​8-11.) Maʻeu le mataʻina o le auala o loo faataunuu ai e Ieova lona finagalo!

9. Pe a tatou faitau i le Tusi Paia, o ā mea ua tatou iloa e faatatau i le lumanaʻi?

⁹ Seʻi o tatou iloiloina le valoaga na fetalai ai Ieova i le faatoʻaga o Etena o loo taʻua i le Kenese 3:15. b E faasino atu lenā valoaga i mea o le a tutupu e faataunuu ai lona finagalo i le faitau afe o tausaga mulimuli ane ai. O na mea e aofia ai le fanauina e Aperaamo o se fanau lea o le a tupuga mai ai le Keriso. (Kene. 22:​15- 18) O lea, i le 33 T.A., na faamanuʻalia ai le mulivae o Iesu e pei ona valoia. (Galu. 3:​13-15) Peitaʻi, o le vaega faaiʻu o lenā valoaga, o le tuʻimomomoina o le ulu o Satani. E faatoʻā faataunuu lenā mea i le sili atu ma le 1,000 tausaga i le lumanaʻi. (Faaa. 20:​7-10) Ua faailoa mai foʻi i le Tusi Paia, le tele o faamatalaga e faatatau i le mea o le a tupu i le vā o le faiga o mea a Satani ma le faalapotopotoga a Ieova.

10. (a) O ā mea ua toeitiiti ona tutupu lea? (e) E faapefea ona sauniunia o tatou mafaufau ma loto? (Tagaʻi i le faamatalaga pito i lalo.)

¹⁰ Seʻi mafaufau i mea mataʻutia o le a tutupu o loo valoia i le Tusi Paia. Muamua, o le a faalauiloa e malo ua “filemu ma saogalemu!” (1 Tesa. 5:​2, 3) Ona “faafuaseʻi” lea ona gāpā o le puapuaga tele pe a osofaʻia e malo o lotu sesē uma. (Faaa. 17:16) Pe a mavae lenā, atonu o le a iai se faaaliga ofoofogia o “le Atalii o le tagata ua sau i ao o le lagi ma le mana ma le mamalu tele.” (Mata. 24:30) O le a faia ai e Iesu le faamasinoga o tagata lea e tuueseeseina ai mamoe ma ʻoti. (Mata. 25:​31-33, 46) Peitaʻi e lē nofoaʻi ai Satani. O le a matuā ita o ia ma ia faapogaia ai le tuufaatasiga o malo lea e taʻua i le Tusi Paia o Koku mai i Makoku e osofaʻia tagata tapuaʻi o Ieova. (Eseki. 38:​2, 10, 11) E iai le taimi o le a aoaoina ai le vaega totoe o le ʻaufaauuina, ma latou faatasi atu i le lagi iā Keriso ma ana ʻautau faalelagi e tau le taua o Amaketo, o le faaiʻuga lea o le puapuaga tele. c (Mata. 24:31; Faaa. 16:​14, 16) Pe a māeʻa lenā, ona amata loa lea o le Pulega a Keriso mo le Afe Tausaga i le lalolagi.—Faaa. 20:6.

11. O le ā le uiga o le ola e faavavau iā te oe? (Tagaʻi foʻi i le ata.)

¹¹ Seʻi o tatou mafaufau i mea o le a tutupu i le lumanaʻi pe a mavae le 1,000 tausaga. Ua faapea mai le Tusi Paia ua “tuu foʻi” e Lē na foafoaina i tatou “le faavavau i o [tatou] loto.” (Fai. 3:11) Ia mafaufau i aafiaga lelei o na mea iā te oe ma lau faiā ma Ieova. E faaosofia lo tatou naunau i le faamatalaga o loo i le tusi Faalatalata Atu iā Ieova, itulau 319: “Pe  afai o le a tatou ola mo le faitau selau, faitau afe, faitau miliona, e oo atu lava i le faitau piliona tausaga, o lona uiga, o le a faateleina pea mea tatou te aʻoaʻoina e uiga iā Ieova le Atua, na i lo le taimi nei. Peitaʻi, o le a tatou lagona pea le lē mafaitaulia o isi mea ofoofogia e tatau ona aʻoaʻoina foʻi. . . . O le a matuā uigā ma matalasi le ola e faavavau, ae o le faamanuiaga sili o le a iai o le faalatalata atili atu lea iā Ieova.” I le taimi lenei, a o faaauau ona tatou suʻesuʻeina le Afioga a le Atua, o ā nisi mea e mafai ona tatou suʻesuʻeina ma le māeʻaeʻa?

12. E faapefea ona tatou vaavaai totoʻa atu i le lagi? Aumai se faataʻitaʻiga.

¹² Ua faailoa mai i le Tusi Paia se faaataga o le afioaga o Ieova “i le mea maualuga.” (Isa. 33:5) Ua faailoa mai ai foʻi mea mataʻina e faatatau iā Ieova ma le vaega faalelagi o lana faalapotopotoga. (Isa. 6:​1-4; Tani. 7:​9, 10; Faaa. 4:​1-6) O se faataʻitaʻiga, e mafai ona tatou faitau e faatatau i mea ofoofogia na vaaia e Esekielu ina ua ʻmatala le lagi ma ia vaaia ai faaaliga mai i le Atua.’—Eseki. 1:1.

13. Aiseā e te talisapaia ai le matafaioi a Iesu i le lagi e pei ona taʻua i le Eperu 4:​14-16?

¹³ Seʻi mafaufau foʻi i le matafaioi a Iesu i le lagi a o avea ai ma o tatou Tupu ma Ositaulaga Sili e tigā alofa. O Iesu ua mafai ai ona tatou faalatalata atu i le “nofoālii o le agalelei faifua” o le Atua, e ala i le tatalo ma talosaga atu mo lona alofa mutimutivale ma le fesoasoani “i le taimi e tatau.” (Faitau le Eperu 4:​14-16.) Seʻi o tatou manatunatu loloto i aso taʻitasi i mea ua faia e Ieova ma Iesu ma mea o loo la faia mo i tatou mai i le lagi. E tatau ona matuā pāʻia o tatou loto ona o lo la alofa mo i tatou, ma uunaʻia ai i tatou e maelega i le auaunaga ma le tapuaʻiga iā Ieova.—2 Kori. 5:​14, 15.

14. O le ā se tasi o auala sili e faailoa atu ai lo tatou matuā talisapaia o Ieova ma Iesu? (Tagaʻi foʻi i ata.)

 ¹⁴ O se tasi o auala sili e faailoa atu ai lo tatou matuā talisapaia o lo tatou Atua ma lona Alo, o le taumafai malosi lea e fesoasoani i isi e avea ma Molimau a Ieova ma soo o Iesu. (Mata. 28:​19, 20) O le mea lenā na faia e le aposetolo o Paulo ona o lona lotofaafetai iā Ieova ma Iesu. Na ia iloa o le finagalo o Ieova “ia faaolaina ituaiga uma o tagata, ma ia maua le poto saʻo i le upu moni.” (1 Timo. 2:​3, 4) Na matuā maelega Paulo i lana faiva e fesoasoani i le toʻatele o tagata e mafai ai ʻina ia iʻu lava ina faaolaina nisi.’—1 Kori. 9:​22, 23.

15. E tusa ai ma le Salamo 1:​2, e faapefea ona tatou maua le fiafia?

¹⁵ Ua talafeagai ona faamatalaina e le faisalamo se tagata e fiafia ma taulau manuia i sē ʻe naunau i le tulafono a Ieova,’ ma ʻe manatunatu loloto i Lana tulafono i le ao ma le pō.’ (Sala. 1:​1-3; fpl.) Na faamatalaina e Joseph Rotherham, o se tagata faaliliu o le Tusi Paia i lana tusi Studies in the Psalms, e tatau i se tasi “e naunau i le taʻitaʻiga a le Atua ona saʻili i ai, aʻoaʻoina, ma faaalu le tele o le taimi e manatunatu loloto i ai.” Na ia faapea atili mai, “pe afai e uma se aso e leʻi faitauina e se tasi le Tusi Paia, ua lē aogā lenā aso.” E mafai ona e maua le fiafia e suʻesuʻe ai le Tusi Paia, e ala i le taumafai e malamalama i faamatalaga tāua o loo e faitau i ai ma le fesootaʻiga o na manatu. Maʻeu lo tatou olioli pe a suʻesuʻe māeʻaeʻa vala uma o le Afioga a le Atua!

16. O le ā o le a tatou talanoaina i le mataupu o loo sosoo mai?

¹⁶ E lē faigatā ona tatou malamalama i upu moni matagofie o loo aʻoaʻoina ai i tatou e Ieova i lana Afioga. I le mataupu o loo sosoo mai, o le a tatou iloiloina ai se tasi o upu moni loloto e faatatau i le malumalu sili faaleagaga o Ieova, lea na faamatalaina e Paulo i lana tusi i Kerisiano Eperu. Tau ina ia e matuā fiafia e suʻesuʻe ma le māeʻaeʻa lenā mataupu!