1-2. Andi da di möön bunu fasi fa u sa lesi di Bëibel, söseei unfa u sa öndösuku soni nëën? Konda wan woto.

 BOO taa i kë bai wan wosu. Andi i bi o kë si ufö i bai ën? Wan footoo di ta lei fesi pisi u di wosu nöö i bi o kë si ö? Na seei. A musu u dë sö taa iseei bi o kë go si di wosu, fii sa waka luku ën, fii sa si dee kamba, söseei fii sa si unfa a bigi tjika. A bi o möön bunu da i seei ee i bi o sa fan ku wan sëmbë di sabi unfa de mbei di wosu. Fuu taki ën, nöö i bi o kë sabi soni u di wosu finifini ufö i bai ën.

² U sa du sö wan pei soni tu te u ta lesi di Bëibel, söseei te u ta öndösuku soni nëën. Wan womi di ta öndösuku soni u Bëibel bi taki taa di Bëibel dë kuma „wan gaan hei wosu di abi wan gaan bumbuu goonsei”. Wë nöö unfa u sa ko sabi hii dee soni dee dë a di Bëibel? Ee u ta lesi ën valavala, nöö a kan taa wantu fanöudu soni nöö woo sabi. Dee soni dë da „dee goonsei pisi” u di Wöutu u Gadu (Heb. 5:12). Leti kumafa a dë fanöudu fii go a di wosu fii sa ko sabi möön soni fëën, sö nöö a dë fanöudu fii tei ten öndösuku di Bëibel fii sa ko fusutëën bumbuu. Wan bunu fasi fa u sa öndösuku soni a di Bëibel, hën da te u ta mbei möiti fuu ko fusutan unfa hii dee pisipisi fëën nama ku deseei. Pooba fii ko fusutan dee soni dee i ta biibi, söseei pooba fii ko fusutan faandi mbei i ta biibi de.

3. Andi apösutu Paulosu bi da dee baaa ku dee sisa fëën taanga u de du, nöö faandi mbei a bi da de taanga u de du ën? (Efeise 3:14-19)

³ Fuu sa fusutan di Wöutu u Gadu te dou, nöö a dë fanöudu  fuu öndösuku so soni finifini. Apösutu Paulosu bi da dee baaa ku dee sisa fëën taanga u de öndösuku di Wöutu u Gadu finifini, sö taa de bi sa „ko fusutan fa dee soni u Gadu baai, fa de langa, fa de hei ku fa de fundu tjika.” A sö wan fasi de bi o sa ko dë gingin a di biibi. (Lesi Efeise 3:14-19.) Di soni dë useei musu du tu. Boo luku unfa u sa öndösuku di Wöutu u Gadu, fuu sa ko ta fusutëën möön bunu.

4. Andi u sa du fuu ku Jehovah sa ko dë möön gaan mati? Konda unfa u sa du di soni dë.

⁴ U di u dë Keesitu sëmbë, mbei wa kë fusutan dee goonsei lei u Bëibel nöö a kaba. U kë ko sabi „dee tjubitjubi soni” u Gadu, dee di santa jeje fëën sa heepi u fuu ko sabi (1 Kol. 2:9, 10). I sa öndösuku soni di sa heepi i fii i ku Jehovah sa ko dë möön gaan mati. Kandë i sa öndösuku luku unfa a bi lei dee dinima fëën u fesiten taa a lobi de, nöö i pooba u si unfa di soni dë ta lei taa a lobi i tu. I sa öndösuku tu unfa Jehovah bi seti soni u dee Isaëli sëmbë bi sa dini ën, söseei unfa a seti soni fuu sa dini ën a di ten aki. Nasö kandë i sa tei ten öndösuku dee tjabukama woto dee Jesosi bi mbei taa pasa tuutuu di a bi dë a goonliba aki.

5. Wan soni dë di i bi o kë öndösuku finifini ö?

⁵ De bi hakisi so sëmbë di lo’ u öndösuku di Bëibel finifini ee andi de bi o kë ko sabi möön bunu. So u dee soni di de bi taki, dë a di pisi „ Soni di i sa öndösuku”. Joo dë waiwai seei ee i öndösuku dee soni dë a di Index van Wachttoren-publicaties nasö di Ondrosuku Bijbel moro fini​—Gi Yehovah Kotoigi. Te i ta öndösuku soni a di Bëibel finifini, nöö di biibi fii sa ko möön taanga, söseei joo „ko sabi dee soni u Gadu” (Nöng. 2:4, 5). Boo taki u wantu soni u Bëibel di u sa öndösuku finifini.

6. (a) Konda faandi mbei dee soni dee Jehovah abi a pakisei u du ta pasa hii juu. (b) Faandi mbei u sa taki taa dee soni dee Jehovah abi a pakisei u du da libisëmbë ta dë u nöömö? (Efeise 3:11)

⁶ Boo luku andi di Bëibel ta taki u dee soni dee Jehovah abi a pakisei u du. Hii juu Jehovah  ta du dee soni dee a abi a pakisei. Faandi mbei u taki sö? Wë u di te Jehovah buta taa a o du wan soni, nöö an ta hoi taa a wan kodo fasi nöö a sa du di soni dë. Ma a ta dë kabakaba u bia du soni woto fasi, sö taa soni waka kumafa a abi pakisei. U wai taa Jehovah tei di Bëibel u heepi u pikipiki fuu ko sabi andi a abi a ’pakisei’ u du (Ef. 3:11). Peipei fasi dë fa Jehovah sa du di soni di a kë du. A „seeka hii soni sö taa a sa du di soni di a abi a pakisei u du” (Nöng. 16:4). Nöö dee soni dee a ta du o dë u nöömö. Andi Jehovah abi a pakisei u du, nöö andi a bi du woto fasi sö taa soni sa pasa kumafa a kë?

7. Unfa Jehovah bia du soni u soni bi sa waka kumafa a kë, baka di dee fosu sëmbë hopo fia ku ën? (Mateosi 25:34.)

⁷ Gadu bi piki dee fosu sëmbë dee a mbei andi a bi abi a pakisei da de. A bi kë u de ’pai miii be de ko hia, be de fuu di goonliba, nöö de musu dë basi fëën. De musu dë basi u . . . hii libilibi soni di ta hai ku bëë a goon’ (Ken. 1:28). Di Adam ku Eva hopo fia ku Gadu, hën de mbei taa libisëmbë ko abi zöndu. Ma di soni dë an bi tooka di soni di Gadu bi abi a pakisei u du. A bi bia du soni woto fasi, sö taa soni sa pasa kumafa a kë. Wantewante a bi buta taa a o seti wan Könuköndë a liba ala di o mbei soni waka da libisëmbë ku di goonliba aki, kumafa a bi abi a pakisei. (Lesi Mateosi 25:34.) Di di ten fëën bi dou, hën a bi manda di fosu Womi Mii fëën ko a goonliba aki u lei sëmbë soni u di Könuköndë fëën, söseei faa bi sa dëdë paka paima u puu u a zöndu ku dëdë basu. Baka di dë, hën a toona weki Jesosi faa bi sa dë Könu ta tii a di Könuköndë fëën. Ma möön soni u di Könuköndë u Gadu dë di u musu ko sabi jeti.

8. (a) Andi da di bosikopu u di Bëibel? (b) Andi Jehovah kë taa musu pasa te u kaba fëën, te u luku Efeise 1:8-11? (Luku di peentje u di kafiti.)

⁸ U sa taki taa hii di bosikopu u Bëibel nama ku di limbo di di në u Jehovah musu ko limbo. A o mbei Jesosi Keesitu tii di Könuköndë fëën, u mbei soni waka kumafa a kë a goonliba aki. Soni an sa tooka di soni di Jehovah abi a pakisei u du. A paamusi u taa hii soni o waka kumafa a taki (Jes. 46:10, 11; Heb. 6:17, 18). Di goonliba o ko dë wan paladëisi ka sëmbë an o abi zöndu möön. Dee bakamii u Adam ku Eva dee ta du soni a wan leti fasi, o „dë waiwai u teego” (Ps. 22:26). Ma na di dë nöö. Jehovah kë taa woto soni musu pasa jeti. A kë taa te u kaba fëën, hii dee dinima fëën dee dë a liba ala ku goonliba aki tuu ko ta dini ën makandi kuma wan famii. Baka di dë, nöö Jehovah o dë di Tiima u hii dee sëmbë dee dë a libi tuu, nöö de o ta saka deseei nëën basu. (Lesi Efeise 1:8-11.) An ta bigi da i te i si fa Jehovah seti soni u du andi a abi a pakisei ö?

9. Un soni u ta ko sabi taa o pasa, te u ta lesi di Bëibel?

⁹ Buta pakisei a di tjabukama woto di Jehovah bi taki a di djai u Eden, di sikifi a Kenesesi 3:15. b Di tjabukama woto dë ta taki u soni di bi o pasa, di bi o mbei soni waka kumafa Jehovah abi a pakisei. Ma a bi o tei dusudusu jaa ufö dee soni dë pasa. Wan u dee soni dë, hën da Gadu bi piki Abahamu taa wan u dee bakamii fëën bi o ko dë di Mësiasi (Ken. 22:15-18). Baka di dë, hën Jesosi bi kisi makei nëën bakafutu, kumafa di tjabukama woto bi taki (Tjab. 3:13-15). Di lasiti pisi u di tjabukama  woto dë, da di makisa di de o makisa Saatan booko hedi. Nöö di soni dë o tei möön leki 1000 jaa ufö a pasa (Ako. 20:7-10). Ma di Bëibel ta lei u taa möön soni o pasa jeti, te di ten dou ka di goonliba u Saatan ku di ölganisaasi u Jehovah an o sa si deseei a wojo seepiseepi.

10. (a) Andi o pasa abiti möön? (b) Unfa u sa seeka u hati ku u fusutan? (Luku di pisi di ta taki u woto fanöudu soni.)

¹⁰ Pakisei dee gaangaan soni di di Bëibel ta taki taa o pasa. Di fosu soni, hën da sëmbë o taki taa „hii soni dë bunu kaa. An dë fuu fëëë möön”(1 Tes. 5:2, 3). Ma „te u de kë mëni”, nöö di gaan fuka o bigi, u di dee nasiönnasiön sëmbë o hopo go feti ku hii dee poipoi keiki (Ako. 17:16). Baka di dë, nöö a kan taa foombofoombo soni o pasa, u di di Bëibel ta taki taa „[sëmbë] o si [Jesosi] ta koti faja ta ko a dee bundji dendu ala ku gaan kaakiti” (Mat. 24:30). Jesosi o kuutu libisëmbë, nöö a o paati de a tu kulupu. Dee sëmbë dee o dë kuma sikapu o dë a wan së, nöö dee o dë kuma kaabita o dë a di woto së (Mat. 25:31-33, 46). A di ten dë, Saatan o ta fia ku Jehovah jeti. Nöö a o mbei dee nasiönnasiön sëmbë fiti buka ko feti ku dee tuutuu dinima u Jehovah. Dee nasiönnasiön sëmbë dë di Bëibel ta kai Gögi u Magögi (Eze. 38:2, 10, 11). Baka wan pisiten, nöö dee salufuwan dee o dë a goonliba jeti o go miti Keesitu ku dee ëngëli fëën a liba ala, u de ko feti di feti u Amagedon a di kaba pisi u di gaan fuka c (Mat. 24:31; Ako. 16:14, 16). Baka di dë, nöö di Dusu Jaa Tii u Keesitu o bigi.​—Ako. 20:6.

11. Unfa i ta fii u di i sabi taa i sa libi u teego? (Luku di peentje tu.)

¹¹ Nöunöu pakisei luku fa soni o dë da i baka di Dusu Jaa Tii. Di Bëibel ta taki taa di Sëmbë di mbei u „buta di fii u libi u nöömö a [u] hati dendu” (Peleik. 3:11). Wë nöö pakisei luku fa joo feni gaan bunu, söseei fa i ku Jehovah o sa ko dë mati tjika. Di buku Kon krosibei na Yehovah ta taki fanöudu soni  a bladsëidë 319. A ta taki taa: „Te u libi dou wan höndö jaa, wan dusu jaa, wan milion jaa, nasö möön longi seei, nöö woo sabi möön hia soni u Jehovah möön fa u sabi nöunöu. Ma tökuseei wa o fëëkëtë taa te a hia soni fëën dë di u sa lei jeti. . . . Di libi u teego o suti seei. A o dë wan ten ka woo sa du sömëni peipei soni. Ma di möön suti pisi fëën, hën da möönmöön u ku Jehovah o ta ko dë möön gaan mati.” Ma andi u sa ko sabi nöunöu kaa, te u ta öndösuku di Wöutu u Gadu go dou?

12. Unfa u sa hopo wojo luku go a Gadu a liba ala? Konda wan woto.

¹² Di Wöutu u Gadu ta heepi u fuu ko fusutan pikisö unfa soni ta dë, te wan sëmbë dë ku Jehovah a wan kamian (Jes. 33:5). Di Bëibel ta piki u apaiti soni u Jehovah ku di pisi u di ölganisaasi fëën di dë a liba ala (Jes. 6:1-4; Dan. 7:9, 10; Ako. 4:1-6). A ta konda da u taa Ezekiëli bi si foombofoombo soni di „liba ala jabi, hën Gadu mbei [a] si wan wojolimbo sujan”.​—Eze. 1:1.

13. Andi i lobi u di wooko di Jesosi ta du a liba ala, te i luku andi Hebelejën 4:14-16 ta taki?

¹³ Pakisei tu andi Jesosi dë a liba ala ta du da u, u di a dë Könu ku Gaan Mindima fuu, söseei u di a abi tjalihati fuu. A jabi pasi da u fuu sa go a Gadu waiwai go begi ën „ka a dë nëën könubangi dë ta tii u ku ën bunuhati”. U sa hakisi ën faa abi tjali fuu, söseei faa heepi u „te u dë a wan fuka”. (Lesi Hebelejën 4:14-16.) A bunu fuu ta tei ten hiniwan daka, ta kai pakisei a dee soni dee Jehovah ku Jesosi du da u, söseei a dee soni di de dë a liba ala ta du da u nöunöu. Di lobi di de lobi u musu da u taanga fuu ta dini Jehovah fajafaja.​—2 Kol. 5:14, 15.

14. Andi da wan u dee möön bunu fasi fa u sa lei taa u ta tei dee soni dee Jehovah ku Jesosi ta du da u u bigi? (Luku dee peentje tu.)

 ¹⁴ Wan u dee möön bunu fasi fa u sa lei taa u ta tei dee soni dee Jehovah ku di Womi Mii fëën ta du da u u bigi, da te u ta mbei möiti u heepi woto sëmbë u de ko dë Kotoigi u Jehovah, ku bakama u Jesosi (Mat. 28:19, 20). Di soni dë apösutu Paulosu bi du, u di a bi ta tei dee soni dee Gadu ku Keesitu bi du dëën u bigi. A bi sabi taa Jehovah ’kë u hii sëmbë u goonliba tuu musu feni libi u teego nëën, söseei u de ko sabi dee soni fëën, biga de nöö da tuutuu soni a mundu’ (1 Tim. 2:3, 4). A bi ta peleiki fajafaja sö taa a bi sa heepi sëmbë ka a sa heepi dou, u de bi sa feni di libi u teego.​—1 Kol. 9:22, 23.

15. Andi o mbei u ta dë waiwai, kumafa Psalöm 1:2 ta taki?

¹⁵ Wan psalöm sikifima bi taki taa wan sëmbë di „lobi di wëti u Jehovah”, söseei di ta kai ’pakisei nëën ndeti ku didia’, ta dë waiwai (Ps. 1:1-3). Wan womi di ta puu di Bëibel ko a woto töngö, bi taki taa wan sëmbë musu „kë u Gadu tii ën sö tee taa a ta suku di tii fëën, ta öndösuku soni a di Wöutu fëën, ta kai pakisei nëën”. A bi taki tu taa „ee wan daka pasa nöö wan sëmbë an lesi di Bëibel, nöö hën da di sëmbë dë poi di ten fëën di daka dë”. Te i ta mbei möiti fii ta öndösuku di Bëibel finifini, söseei te i ta mbei möiti fii ko fusutan unfa dee soni dee sikifi nëën nama ku deseei, nöö di soni dë o mbei i ta dë waiwai. A ta dë wan suti soni seei u öndösuku di Wöutu u Gadu finifini!

16. Andi woo luku a di woto di ta ko?

¹⁶ Dee waiti soni dee Gadu ta lei u a di Wöutu fëën an taanga poi u fusutan. A di woto di ta ko, woo buta pakisei a wan u dee fundu soni u Gadu. Di soni dë da di Wosu u Gadu, di Paulosu bi taki soni fëën a di biifi di a bi manda da Keesitu sëmbë, de bi ta fan Hebelejëntöngö. Be i feni gaan bunu te joo öndösuku di soni dë.