1, 2. Jiti we aʼlá inámipo japi aní echi Biblia, ¿chúriká leéripo alí binepo? Ruyé bilé ejemplo.

 NATÁ japi mujé ko ralinali bilé kalí. ¿Piri mi bachá inénali kecho bijí ralayá echi kalí? ¿Achi mi ma kanílima bilé foto bi inesa? ¿Kechi ko mi a siminali echomí inesia? Mujé ko siminali inesia echi kalí, chúriká ju machí ayé, chu ikí cuartos olá alí mi we aʼlá inénali suwaba. Ayénachó a keʼré japi mi bilé yúa raʼichánali japi aʼlá machí chúriká niwárami nili echi kalí. A bichíwali ju japi mi bachá we aʼlá inénali suwaba echi kalí japi mi ralinali.

² Echi riká cho ti nokisáré japalí ti leeri alí biné echi Biblia. Bilé osáami anili japi aní echi Biblia ko ju japi riká “bilé waʼlú edificio we ripá wilíami alí japi we rilé olá echi cimientos”. ¿Alí chúriká ti machiboa suwaba japi aní echi Biblia? Ati we sapú leérisaká, ati binéporé pe kuabi namuti bi japi aní Onorúami jitra (Heb. 5:12). Jiti la, wabé aʼlá ju japi ta nokiboa japi riká ti noká echi kalí jitra: we aʼlá inea suwaba japi chúriká ju. Jiti we aʼlá binepo japi aní echi Biblia, we aʼlá ju japi ta inepo chúriká japi aní bilé texto, biléanachó echi riká cho ruyé. Ke bi ju japi ta machiboa piri ta bichiwi, nalí ayénachó chúsiá ti bichiwi.

3. ¿Piri aneli Pablo echi cristianos japi nokimea, alí chúsiá? (Efesios 3:14-19).

³ Jiti we aʼlá inámipo echi Onorúami Raʼicháala alí suwaba namuti japi ruyé, ati we aʼlá binésaré echi namuti japi jilí ju inámilia. Echi apóstol Pablo iʼwérili iyali echi cristianos  jiti iʼwérika nokimea aʼlá binea echi Onorúami Raʼicháala, jiti echi riká “aʼlá machimea chu yena wilé ju, chu kilipi, chu yena ripá alí chu yena rilé” ju echi bichíwali. A echi riká nokisáaká, japi bichiwi ko nima japi riká “wabé riʼlé nawéami” alí japi “ketasi waminá naʼmini” (leeri Efesios 3:14-19). Tamujé ayénachó echi riká nokisáré. Ma inepo piri ti omeri nokayá jiti aʼlá inámipo suwaba echi namuti japi aní echi Onorúami Raʼicháala.

4. ¿Piri ta omero nokayá jiti aminabi mulíwipo Jeobá? Ruyé jaré ejemplos.

⁴ Japi ta cristianos ju ke ti kanílisaré pe kuabi namuti bi machiyá japi aní echi Biblia. Ati we inili binénilia echi namuti we natéami Onorúami jitra, alí echi espíritu santo tamó iʼwírima (1 Cor. 2:9, 10). ¿Chúsiá mi ke chotasi we aʼlá binea bilé namuti japi mi iʼwírima aminabi muliwia Jeobá japalí mi bineli niraa biné echi Biblia? A nirú wiká namuti japi jitra binepo. Japi riká, ati omeri aminabi binea chúriká Jeobá néwariwélitili japi we galeli japi echi nijéwami nili chabé, alí chúriká echi néwariwéliti japi ayénachó we tamujé galé. Ayénachó mi omeri binea chúriká nakili Jeobá japi echi israelitas echi nijéwima alí chúriká nakí jipi japi ta echi nijéwipo. Alí, ami omeri aminabi binea chúriká ikili echi profecías japalí Jesús jenaʼí biteili alí nawesia iyénili.

5. ¿Chu iyiri temas ami kanílisa nili aminabi we aʼlá binea japalí mi bineli niraa biné echi Biblia?

⁵ Jaré hermanos japi we aʼlá binéami ju echi Biblia jitra, anili jaré namuti japi jilí ju inámilia japi kanílisa nili aminabi aʼlá binea. Echoná recuadro “ Jaré namuti japi mi omeri binea japalí mi bineli niraa biné”, nirú jaré namuti japi echi anili. We mi kanílima binea echi namuti jitra néeka echi Índice de las publicaciones Watch Tower alí echi Guía de estudio para los testigos de Jehová. Ami we aʼlá binésaká echi namuti jitra, mi iʼwírima jiti mi wabé bichíyami nima alí jiti mi machimea “echi Onorúami machíala” (Prov. 2:4, 5). Jipi ko ti ma inepo jaré namuti japi jilí ju inámilia alí japi ta omeri aminabi aʼlá binea.

6. a) Aní bilé ejemplo ruyemia japi Jeobá ko sinibí isimí japi echi aní. b) ¿Chúsiá ti aní japi Jeobá isínali jena Wichimoba alí echi pagótami jitra sinibí rojorá? (Efesios 3:11).

⁶ Jeobá ko sinibí isimí japi echi aní. Natá jepuná: mujé ko sibánali bilé pueblo. Nalí echoná buwichimi bilé waʼlú rojá wichí, japi isímaré japi mi ma ke omérima seaya japoná mi simí. Nalí mujé ko sibánali echoná pueblo, jiti la mi simí biléanachó buwechi jiti mi sibama. Echi riká cho, suwaba japi Jeobá aní sinibí echi riká ikí jiti echi ko suwinárika niraa isimí jiti “suwaba ikimea japi riká echi nakí” (Prov. 16:4). Echi Biblia ayénachó aní japi Jeobá isínali sinibí rojorá (Efes. 3:11). Echi riká aní jiti Jeobá riweli japi wiká bamíali simírima kecho bijí ikíachi suwaba japi echi anili. Ayénachó jiti echi namuti japi echi isimí ko, sinibí rojorama. Ati waʼlú matétarabá iyá Jeobá jiti echi ko kilipi niraa tamó ruyésimi echoná Biblia japi isima. Nalí be, ¿chu iyiri ju echi namuti japi Jeobá isínali, alí chu iyiri namuti sinúrika isili jiti echi riká ikimea?

7. Japalí echi bacháwala pagótami ke nijéwili, ¿chúriká isili Jeobá isimia japi echi nakili? (Mateo 25:34).

⁷ Onorúami ko aneli echi bacháwala pagótami piri nakili echi jitra japalí jéaneli: “Wiká kúuchisi jiti wiká pirélima echoná wichimóbachi, alí aʼlá tibusi echi weʼé alí aʼlá nulesi [...] suwaba japi ikí iwí” (Gén. 1:28). A bichíwali ju japalí Adán alí Eva ke nijéwili, echi ko ma ke sébali aʼlá nokáami nílili alí echi kúchuwala ayénachó, nalí jepuná ko ke isili japi Jeobá ke isima japi echi nakili. Echi ko sinúrika ku nátili isimia japi echi anili. Jiti la sapú wilali bilé Gobierno echoná ripá riwigachi jiti isima japi echi nakili echi pagótami jitra alí echi Wichimoba (leeri Mateo 25:34). Jiti we galeli echi pagótami, Jeobá ko júali echi bacháwala binoy ranala jenaʼí Wichimóbachi. Jesús ko raʼíchili echi pagótami yúa echi Onorúami Gobiérnowala jitra, alí mukuli sinéami tamujé jitra jiti ta ku sébali aʼlá nokáami nipo alí ma ke che suwiboa. Miná ko, echi ko ku owíntami nili jiti bitélima ripá riwigachi alí nuláami nima echoná Onorúami Gobiérnowala. Nalí nirú wiká jarecho si namuti japi isima Onorúami japi ti omeri aminabi aʼlá binea.

8. a) ¿Chu iyiri ju echi namuti wabé natéami japi ruyé echi Biblia? b) Japi riká ruyé Efesios 1:8-11, ¿chu iyiri ju bilecho namuti japi Jeobá isima? (Iné echi bachá dibujo japi chukú jena oselí).

⁸ Jepuná ko ju echi namuti wabé natéami japi ruyé echi Biblia: japi Jeobá ko isima japi ma ke cha riká raʼichárami nima binoy riwalá jitra japalí Jesús ma nulasa echoná Onorúami Gobiérnowala. Ke bilé namuti chéwima japi Jeobá isima japi nakili. Echi ko ma anili japi isima alí japi echi riká ikimea (Is. 46:10, 11, notas; Heb. 6:17, 18). Pe aminana, echi Wichimoba we baʼóami nima alí echoná sinibí pirélima echi Adán alí Eva kúchuwala japi wachía nokáami ju alí sébali aʼlá nokáami nima (Sal. 22:26). Nalí ke echi bi ju japi isima, echi ko napabuma japi ripá riwigachi piréami ju alí jenaʼí wichimóbachi, jiti napawika nima japi riká téemala alí jiti sinéami machimea japi echi bilepi bi ju japi nulásaré (leeri Efesios 1:8-11). ¿Kechi ko a we semati ju japi riká Jeobá isimí jiti ikimea japi echi nakí?

9. Japalí ti leeri echi Biblia, ¿piri ti machí japi ikimea pe aminana?

⁹ Natabo echi profecía jitra japi oserúa chukú echoná Génesis 3:15. b Echoná raʼicha echi namuti jitra japi ikimea jiti Jeobá isima japi  echi nakí, nalí japi ikimea riweili ma wiká bamíali simírisa. Bilé namuti japi ikimea riweili ko nili, japi Abrahán téemala jonsa nawama echi Mesías (Gén. 22:15-18). Pe aminana echalí bamíali 33, Jesús chiwárami nili echoná raníkalachi, japi riká ma aniiri (Hech. 3:13-15). Alí a bijí simírisaré aminá mili bamíali jiti ikimea japi aní echi profecía japi rikétami nima echi Satanás moʼola (Apoc. 20:7-10). Nalí echi Biblia ko ruyé wiká jarecho si namuti japi ikimea riweili kecho bijí ikíachi suwaba japi aní echi profecía japi sayérima anakupi niraa echi sinói kúchuwala alí echi mukí kúchuwala.

10. a) ¿Piri namuti ikimea ma mulipi? b) ¿Piri ta nokiboa jiti aʼlárika buwea mochibo? (Iné echi nota).

¹⁰ Ma inepo echi namuti we natéami japi aní echi Biblia japi ikimea. Bachá, echi gobiernos jéanimea: “Ma we galá kilí ologá piré” (1 Tes. 5:2, 3). Echalí “ke sayiná” echi gobiernos sayérima echi religiones japi ikaleka bineri alí echi riká chotásima echi gran tribulación (Apoc. 17:16). Pe aminana, a keʼré japi ikimea namuti japi ke siné ikili japalí Jesús inérami nisa “echoʼná ripá nolírali ku nolínachi, wabé omérami niráa [...] ne wabé Walubela ayena cho” (Mat. 24:30). Jesús ko oyérima sinéami echi pagótami alí rojanama japi ju japi riká boʼwá alí japi ju japi riká chiba (Mat. 25:31-33, 46). Echalí Satanás ko aminá sayérima Jeobá. Echi ko we iyoma alí isima japi wiká naciones, japi echi Biblia ko riwá Gog japi Magog ka jonsa nawá, sayérima echi Jeobá puéblowala (Ezeq. 38:2, 10, 11). Echalí kaachi, echi ungidos japi a bijí pirélisa jenaʼí Wichimóbachi, torúami nima echoná ripá riwigachi. Alí napawima Jesús yúa alí echi ángeles nakomia Armagedón kaachi, echi riká sunima echi gran tribulación (Mat. 24:31; Apoc. 16:14, 16). c Alí miná ko, ripá riwigachi jonsa Jesús chotásima nulayá jenaʼí Wichimóbachi bilé mili bamíali (Apoc. 20:6).

11. ¿Chumi nili machiyá japi mi sinibí bitélima echoná kulíwami Wichimóbachi? (Ayénachó iné echi imágenes).

¹¹ Jipi ko natabo japi ikimea pe aminana. Echi Biblia ko aní japi Onorúami “isili japi echi pagótami sinibí pirélinalima” (Ecl. 3:11).  Natá japi chúriká mi bitélima pe aminana alí japi mi aminabi we aʼlá amigo nima Jeobá yúa. Echoná libro Acerquémonos a Jehová, página 319, aní bilé namuti japi we tamó natari, jéaní: “Japalí ti ma pirélisa wiká mili bamíali o millones ma, ati aminabi we aʼlá machiboa Jeobá alí ke ko japi riká jipi. Nalí a bijí nílipo japi ti aminabi binésaré Jeobá jitra. [...] Natabo chúriká ti pirélipo japoná we baʼóami nima alí japoná nirúlima wiká sinúrika namuti. Nalí wabé natéami ko nima japi ta sinibí rawé aminabi mulíwipo Jeobá”. Kecho séachi echalí rawé, ¿piri jarecho si namuti ati omeri binea japi aní echoná Onorúami Raʼicháala?

12. ¿Chúriká ti oméripo machiyá japi nirú echoná ripá riwigachi? Ruyé bilé ejemplo.

¹² Echi Onorúami Raʼicháala tamó iʼwiri aʼlá machiyá chúriká ju echoná ripá riwigachi japoná Jeobá atí (Is. 33:5). Ayénachó tamó ruyé wiká namuti we natéami Jeobá jitra alí echi organización ripá riwigachi nirúami (Is. 6:1-4; Dan. 7:9, 10; Apoc. 4:1-6). Japi riká, ati omeri leeria echi weli namuti jitra japi ineli Ezequiel japalí ripá siyónachi irápitami nili alí chotásili inea echi namuti japi Onorúami riwírili (Ezeq. 1:1).

13. ¿Chumi nili machiyá japi Jesús isiá atí echoná ripá riwigachi? (Hebreos 4:14-16).

¹³ Ayénachó natabo piri nóchali isiá atí Jesús echoná ripá riwigachi japi riká Silíami alí Walubéala Sacerdote japi natimáami ju. Echi jitra ati omero raʼíchika muliwia echoná Onorúami níwala “walubela asibálachi” alí iʼwírili tánipo “mapalita newaléami ju” (leeri Hebreos 4:14-16). Ke riwepo natia japi Jeobá alí Jesús nokali alí japi noká jipi tamujé jitra echoná ripá riwigachi jonsa. Machiyá japi we tamó galé, tamó iʼwírima aminabi iʼwérili nokayá we kanílika nóchilia Jeobá (2 Cor. 5:14, 15).

14. ¿Chúriká ti néwariwélitipo Jeobá alí Jesús japi ta matétara iyá? (Ayénachó iné echi imágenes).

 ¹⁴ Bilé namuti japi ta nokisáré néwariwélitimia japi ta matétara iyá Jeobá alí Jesús, echi ko ju iʼwérili nokayá iʼwiria echi pagótami jiti testigo Jeobá nima alí Jesús discípulowala (Mat. 28:19, 20). Echi riká isili echi apóstol Pablo jiti matétara iyánali Jeobá alí Jesús. Echi ko machiyé japi Jeobá ko nakí japi “ne siʼnéami pagótami galá ku wikáwarami níima, ayénachó mapu ne siʼnéami galá machimea echi ne Bichíwali” (1 Tim. 2:3, 4). Jiti la, echi ko iʼwérili isili nawesia iʼwírimia wiká pagótami jiti niyúbitami nima (1 Cor. 9:22, 23).

15. Japi riká aní Salmo 1:2, ¿piri tamó kanílitima?

¹⁵ Japi riká anili echi salmista, echi pagótami japi we kaníliami ju ko “we kanila leeri Jeobá nuláala” alí “sinibí rawé alí rokó leeri echi nuláala alí we aʼlá nata japi leeri” (Sal. 1:1-3). Bilé rijoi japi traduciri echi Biblia, ruyé jepuná texto jitra, alí aní japi bilé pagótami “we galésaré echi busuréliami japi aní Onorúami, jiti sinibí aama, binema alí kilí natama japi biné echi jitra”. Alí anili: “Japalí bilé pagótami ke leérisa echi Biblia bilé rawé, echi ko ju japi riká ko ke natéami ka echalí rawe” (Studies in the Psalms, Joseph Rotherham). Tamujé ayénachó we kanílipo binea echi Biblia, ati iʼwérili nokisáaká aʼlá binea suwaba echi namuti we natéami japi aní echoná alí inea chúriká bilepi namuti jitra raʼicha. ¡We ti simá nili japalí ti aʼlá biné japi aní suwaba echi Onorúami Raʼicháala!

16. ¿Piri binepo biléala binelíwami?

¹⁶ Sinéami ti omeri we aʼlá binea japi aní echi Onorúami Raʼicháala. Echoná biléala binelíwami, ati binepo bilé echi namuti jitra japi jilí ju inámilia: echi waʼlú templo espiritual Jeobá níwala, japi Pablo osélili echi cristianos hebreos. We ti kanílipo binea jepuná jitra.