1, 2. Xú káʼnii rí itháán májánʼ dí matraxnuu ma̱ngaa dí matanigajma̱a̱ Biblia rá. Atagíʼ mbá xkri̱da.

 ATATSAʼWÁMINAʼ rí nandaaʼ maratsi̱ mbóoʼ guʼwá. Ndiéjunʼ gíʼmaa ma̱ta̱ya̱a̱ ginii nákha xóó tsératsi̱ rá. Lá maʼngo̱o̱ má káaʼ ma̱ta̱ya̱a̱ fotiu̱u̱ dí káaʼ mbájníí ráʼ. O maʼndaaʼ mi̱dxu̱ʼ gátayaa dxe̱ʼ. Mbáa maʼndaaʼ midxu̱ʼ gátayaa xóo káʼnii guʼwá, xóo kaʼnii cuarto dí rígá awúún. Mbáa asndu maʼndaaʼ ma̱ta̱ya̱a̱ xtiʼkhuu guʼwá rí nijmúún mu maguma, mu xúʼko̱ ma̱ta̱ya̱a̱ xóo ni̱jkha̱ rawajxi̱. Phú gajkhun dí maʼndaaʼ ma̱ta̱ya̱a̱ xúgíʼ xóo niguma guʼwá.

² Ikhaa má kayuuʼ ma̱ndoo muʼni índo̱ nuraxnuu ga̱jma̱a̱ índo̱ nuʼnigajmaa Biblia. Mbáa bi̱ niʼnirámáʼ Biblia niʼni mbríguíi ga̱jma̱a̱ xóo “mbóoʼ guʼwá dí ra̱ʼkhá tháán mba̱a̱, ma̱ja̱nʼ, torres ndrígóo mitsídánʼ ga̱jma̱a̱ mi̱jnu̱ʼ kiʼdu rajkhúu”. Xú kaʼnii gándoo guʼni mu magida̱ʼ edxu̱lúʼ dí naʼthí náa Biblia rá. A mu natraxnuu mbá nacha̱, i̱ndó majmañaaʼ dí ragákhíi, xóo má nákha “dí nigíʼdi̱i̱ nijmañala ga̱jma̱a̱ numuu ajngá rawuunʼ Dios” (Heb. 5:12). Itháán májánʼ rí muʼni xóo má niʼthá ga̱jma̱a̱ numuu xkridoo guʼwá: Rí mbuʼyáá májánʼ awúún mu mbuʼyáá májánʼ xóo niguma. Rí muʼnigajma̱a̱ májánʼ Biblia, xúʼko̱ mbuʼyáá xú kaʼnii embánii mixtiʼkhu versículo dí na̱ʼkha̱ náa Biblia. Raʼkháa i̱ndó ndayóoʼ mbuʼyáá ndiéjuunʼ eʼnimbulúʼ, ma̱ngaa ndayóoʼ mbuʼyáá náá numuu eʼnimbulúʼ.

3. Ndiéjunʼ niʼthúún Pablo muni̱ cristianos, ga̱jma̱a̱ náá numuu rá. (Efesios 3:​14-19.)

³ Mu makru̱ʼu̱lú itháán májánʼ Ajngá rawuunʼ Dios ga̱jma̱a̱ xúgíʼ rí na̱ʼkha̱ ikhí, gíʼmaa muʼnigajma̱a̱ mi̱jnu̱ʼ dí na̱ʼkha̱  náa Biblia. Apóstol Pablo niʼthúún xúgíinʼ cristianos rí munigajma̱a̱ májánʼ Ajngá rawuunʼ Dios mu xúʼko̱ “majmiin mikru̱ʼu̱u̱n, nguáthá ma̱ja̱nʼ, mbaʼ, mitsídánʼ ga̱jma̱a̱ mi̱jnu̱ʼ”, dí gajkhun. Xúʼko̱ maʼni ‹gújkhúʼ fe ndrígu̱ún ga̱jma̱a̱ maʼni xóo mbá ixi̱ mba̱a̱ rí na̱jkha̱ mi̱jnu̱ʼ ajmu̱u̱” (atraxnuu Efesios 3:​14-19). Xúʼko̱ má gáʼyoo muʼni mangáánʼ. Guʼyáá xú kaʼnii ma̱ndoo muʼnigajma̱a̱ májánʼ Ajngá rawuunʼ Dios mu makru̱ʼu̱lú májánʼ ga̱jma̱a̱ manigulúʼ xóo na̱ʼkha̱ raʼthí.

4. Ndiéjunʼ ma̱ndoo mu̱ʼni̱ mu mu̱ʼgua̱ kanuu itháán mijngii náa Jeobá rá. Aratá tikhuu xkri̱da.

⁴ Bi̱ nindxu̱lú cristianos tséʼnigajma̱a̱ káaʼ mbájníí rí naʼthí náa Biblia. Nanigulúʼ majmañulú “asndu rí itháan mi̱jnu̱ʼ dí nandxa̱ʼóo edxu̱u̱ Dios”, ga̱jma̱a̱ espíritu santo mambáyulú makru̱ʼu̱lú (1 Cor. 2:​9, 10). Náá numuu rí tsétagíminaʼ matríyáʼ awan mu matanigajma̱a̱ májánʼ mu xúʼko̱ maraxtaa itháán mijngii náa Jeobá rá. Rígá mbaʼa rí ma̱ndoo matani̱. Ma̱ndoo mataʼyáʼ ma̱ta̱ya̱a̱ xú kaʼnii Jeobá nindoo kaʼñúún xa̱bi̱i̱ nákha wajyúuʼ ga̱jma̱a̱ rúʼko̱ nasngájma rí nandoo kaʼyaaʼ mangáánʼ xúgi̱. Ma̱ngaa ma̱ndoo matanigajma̱a̱ xóo nindoo dí israelitas mbuyamajkuíí ikhaa ga̱jma̱a̱ xóo nandoo dí mbuʼyamajkuíí mangáánʼ xúgi̱. Asndu ma̱ndoo matanigajma̱a̱ itháán profecías dí Jesús niʼnimbánuu índo̱ nixtáa náa tsu̱du̱u̱ Ku̱ba̱ʼ.

5. Ndiéjuunʼ dí kayá edxu̱u̱ manigua̱a̱ʼ mataʼyáʼ índo̱ gátanigajma̱a̱ mbáwíín rá.

⁵ Tikhuun a̱ngiu̱lú bi̱ nuʼnigajma̱a̱ májánʼ Biblia nixtaxu̱u̱n ndiéjunʼ itháán nanigu̱u̱nʼ majmañún dí naʼthí náa Biblia. Náa recuadro “ Edxu̱u̱ rí ma̱ndoo matanigajma̱a̱” na̱ʼkha̱ tikhu ikha dí nithi̱ a̱ngiu̱lú bugi̱. Manigua̱a̱ʼ wéñuuʼ rí matanigajma̱a̱ rígi̱ ga̱jma̱a̱ dí mambáyáaʼ ikhaa nindxu̱u̱ i̱yi̱ʼ Índice de las publicaciones Watch Tower ma̱ngaa Ikha rí munigajmaa xa̱bi̱i̱ Jeobá. Rí matanigajma̱a̱ xígi̱ káʼnii mambáyáaʼ maʼni itháán gujkhuʼ fe ndrígáaʼ ga̱jma̱a̱ rí mambáyáaʼ mataxkamaa “ku̱ma̱ ndrígóo Dios” (Prov. 2:​4, 5). Atagíminaʼ majmañaaʼ itháán mi̱jnu̱ʼ rí na̱ʼkha̱ raʼthí náa Biblia.

6. (a) Xú kaʼnii mixtiʼkhu nindxu̱u̱ awan ga̱jma̱a̱ dí nandaaʼ marigá rá. (b) Náá numuu ma̱ndoo muʼthá dí ekudaminaʼ maʼni Jeobá ga̱jma̱a̱ numún xa̱bu̱ ma̱ngaa Ku̱ba̱ʼ nindxu̱u̱ kámuu rá. (Efesios 3:11.)

⁶ Gundxaʼwamíjna̱ rí naʼthí náa Biblia ga̱jma̱a̱ numuu rí nandoo Dios maʼni nda̱wa̱á. Mixtiʼkhu kayuuʼ nindxu̱u̱ rígi̱, awan ga̱jma̱a̱ rí nandaaʼ marigá. Mbá awan, ikhaa nindxu̱u̱ xóo mbá kamba̱a̱ rí maʼga kañáán náa rí nandaaʼ mi̱dxu̱ʼnú. Mú á mu rígá mbá dí marikhaaʼ náa kamba̱a̱, rúʼko̱ gáʼni dí xáʼngo̱o̱ gídxúʼnú náa rí nandaaʼ. Mú rí nandaaʼ marigá nindxu̱u̱ xóo náa rí nandaaʼ mi̱dxu̱ʼnú. Nduʼyáá májánʼ náá phú nandulúʼ muʼgua̱nú, ga̱jma̱a̱ ma̱ndoo murajthuun mixtiʼkhu kamba̱a̱ mu mu̱ʼgua̱nú. Jeobá rígá mbá “nandoo dí marigá asndu kámuu mbiʼi” ga̱jma̱a̱ nuxna̱a̱ wéñuuʼ núma̱aʼ rí na̱jkha̱ raʼthulú mañu mañúú náa Biblia (Efes. 3:11). Tséʼniuu má asndu kaʼnii, rí naʼthí ikhaa gajkhun mambanúu “niʼni xúgíʼ mu mambanúu rí nandoo” (Prov. 16:4). Dí nikudaminaʼ maʼni Jeobá marigá asndu kámuu mbiʼi. Ndiéjunʼ nindxu̱u̱ dí nakudaminaʼ maʼni Jeobá, ga̱jma̱a̱ ndiéjunʼ niʼni mu maʼnimbánuu xá.

7. Índo̱ Adán ga̱jma̱a̱ Eva nixudamíjna̱ aʼkhá, xú káʼnii niʼni Jeobá mu maʼnimbánuu rí nandoo rá. (Mateo 25:34.)

⁷ Jeobá niʼthúún timbíin xa̱bu̱ ndiéjunʼ nindxu̱u̱ rí nindoo maʼni ga̱jma̱a̱ nindxu̱ún: “Gaguaʼdiin mbaʼin e̱jñala, gaʼni mbaʼáanʼla, gakuwáanʼla náa xúgíʼ tsu̱du̱u̱ ku̱ba̱ʼ, ku̱ba̱ʼ gaʼni ndrígála ikháanʼ ma̱ngaa gutañájúúnʼ [...] xúgíinʼ xujkhúʼ” (Gén. 1:28). Gajkhun má dí índo̱ Adán ga̱jma̱a̱ Eva nixudamíjna̱ aʼkhá, ga̱jma̱a̱ aʼkhá rúʼko̱ nidaaʼ xa̱bu̱ numbaaʼ, maski ajndu xígi̱ kaʼnii nirígá, mú rígi̱ tárikhoo mu xámbánuu dí nikudaminaʼ maʼni Jeobá. Ikhaa ndiyáʼ i̱mba̱ xóo ma̱ndoo maʼnimbánuu. Mbá nacha̱ nigíiʼ mbáa Reino bi̱ matañájunʼ náa mekhuíí mu maʼnimbánuu rí nikudaminaʼ maʼni ga̱jma̱a̱ numún xa̱bu̱ náa numbaaʼ (atraxnuu Mateo 25:34). Mbiʼi nda̱wa̱á, Jeobá nisngájma rí nandoo kaʼñúún má xúʼko̱ xa̱bu̱ numbaaʼ ikha jngóo nikuʼmaa A̱ʼdióo bi̱ mbáwíí náa tsu̱du̱u̱ Numbaaʼ. Jesús niʼthúún xa̱bu̱ ga̱jma̱a̱ numuu Reino ma̱ngaa nixnájximinaʼ makhañúu mu maʼtsiwáanʼ náa aʼkhá ga̱jma̱a̱ náa rí nakháñulú. Nda̱wa̱á nigabi̱i̱ ga̱jma̱a̱ ni̱jkha̱a̱ mekhuíí mu matañájunʼ náa Reino ndrígóo Dios. Mu rígá xóó dí ma̱ndoo mundxaʼwamíjna náa rí nandoo Dios maʼni.

8. (a) Ndiéjunʼ rí kayá edxu̱u̱ dí na̱ʼkha̱ náa Biblia rá. (b) Xó má e̱ʼkha̱ raʼthí náa náa Efesios 1:​8-11, ndiéjunʼ xóó maʼngo̱o̱ maʼni Jeobá rá. (Atayáá xtiʼkhu rí nakha náa timbá ináa.)

⁸ Dí itháán naʼthí náa Biblia ikhaa rígi̱: Jeobá maʼni kaʼwii mbiʼyuu índo̱ gáʼnimbánuu náa tsu̱du̱ʼ Ku̱ba̱ʼ Reino bi̱ ikhaa nigíiʼ bi̱ nindxu̱u̱ Cristo. dí ikhaa nindoo. Nimbá o nimbáa xáʼngo̱o̱ gárikhoo rí Jeobá niʼthí maʼni. Mínaaʼ ma ikhaa naʼthí dí gajkhun maʼnimbánuu (Is. 46:​10, 11, nota; Heb. 6:​17, 18). Nda̱wa̱á, ku̱ba̱ʼ maʼni̱i̱ mitsaanʼ náa makuwíin kámuu e̱ji̱i̱n Adán ga̱jma̱a̱ nánguá maguaʼdáá aʼkhá (Sal. 22:26). Mu raʼkháa i̱ndó rígi̱: Jeobá rígá rí xóo nandoo maʼni. Ikhaa maʼni rí makuwá jnduʼ xa̱bi̱i̱, xó má náa mekhuíí ga̱jma̱a̱ náa tsu̱du̱u̱ Ku̱ba̱ʼ, ga̱jma̱a̱ rí xúgíinʼ mbuyáá rí xóo naʼtáñajunʼ ikhaa nindxu̱u̱ jmbu (atraxnuu Efesios 1:​8-11). Phú gajkhun dí mitsaanʼ nindxu̱u̱ xóo Jeobá maʼnimbánuu rí nandoo marigá nda̱wa̱á ánʼ.

9. Índo̱ nuraxnuu Biblia, nguáthá mba̱a̱ embáyulú mu mbuʼyáá dí marigá nda̱wa̱á.

⁹ Gundxaʼwamíjna̱ profecía dí niʼthí Jeobá náa jardín dí Edén dí naʼthí náa Génesis 3:15. b Ikhí na̱ʼkha̱ raʼthí xú kaʼnii gámbánúu rí ekudaminaʼ  maʼni Dios nda̱wa̱á, mú rígi̱ mambanúu mba̱yu̱u̱ʼ tsiguʼ nda̱wa̱á. Bi̱ gáguwáʼ náa a̱ʼgu̱, mbáa ikhaa mani̱ndxu̱u̱ Mesías, bi̱ ma̱ʼkha̱ náa Abrahán (Gén. 22:​15-18). Tsiguʼ nda̱wa̱á, tsiguʼ 33, Jesús nigawúunʼ nixtúu̱n rajkhúu, xóo ma nijuiʼtáriyaʼ (Hech. 3:​13-15). Ga̱jma̱a̱ ndayóoʼ xóo imbá mil tsiguʼ mu mambanúu rí naʼthí náa iwáá profecía ga̱jma̱a̱ muxujmbi̱i̱ edxu̱u̱ Gixa̱a̱ (Apoc. 20:​7-10). Náa Biblia na̱ʼkha̱ raʼthí kuduun ndiéjuunʼ gágíʼnuu numbaaʼ ndrígóo Gixa̱a̱ ga̱jma̱a̱ xuajñuu Jeobá, nákha xóó tséʼkha̱nú mbiʼi rí kaʼyoo.

10. (a) Ndiéjunʼ dí inu marigá rá. (b) Xú kaʼnii gándoo muʼniratháá ku̱ma̱ ndrígulú ga̱jma̱a̱ a̱jkiu̱lú rá. (Atayáá nota.)

¹⁰ Guʼyáá dí naʼthí marigá náa Biblia. Ginii, xa̱bu̱ magi̱ʼdu̱u̱ muthi: “¡Kuwáanʼlú tsímáá ga̱jma̱a̱ nándáa rí gúgíʼníí!” (1 Tes. 5:​2, 3). Gaʼkhu rí majphú mba̱a̱ magi̱ʼdu̱u̱ mbá nacha̱, índo̱ xa̱bu̱ ñajunʼ mugi̱ʼdi̱i̱ munigámbáa religión rí minduwaʼ (Apoc. 17:16). Nda̱wa̱á, marigá xóo dí nimbá miʼtsú tárígá náa mekhuíí, índo̱ gáʼkha̱ “A̱ʼdióo xa̱biya̱ bi̱ na̱ʼkha̱ náa du̱u̱n ga̱jma̱a̱ xúgíʼ tsiakii ndrígóo” (Mat. 24:30). Ikhú Jesús mandaʼíín cuenta xa̱bu̱ ga̱jma̱a̱ bi̱ xóo tsujthu̱nʼ markuájíinʼ náa bi̱ nindxu̱ún xóo mugu̱ (Mat. 25:​31-33, 46). Ikha jngóo, Gixa̱a̱ xáguanúu wíí. Ikhaa ra̱ʼkhá tháán nakiʼnáa, ikha jngóo maʼni dí xa̱bu̱ ñajunʼ murawamíjna, dí náa Biblia naxná mbiʼyuu Gog náa ku̱ba̱ʼ ndrígóo Magog, mu xúʼko̱ mu gínáa xuajñuu Jeobá (Ezeq. 38:​2, 10, 11). Ikhú bi̱ kaxtaʼwíin bi̱ xóo naguanún náa tsu̱du̱u̱ ku̱ba̱ʼ magúun mekhuíí ga̱jma̱a̱ ikhí magimbíin gajmiún Jesús mangiin ángeles mu muxmijná náa Armagedón, ikhú mambáa rí majphú mba̱a̱ gaʼkhu (Mat. 24:31; Apoc. 16:​14, 16). c Índo̱ gájngoo xúgíʼ rígi̱, ikhú magi̱ʼdu̱u̱ maʼtáñajunʼ Cristo mbá Mil tsiguʼ náa tsu̱du̱u̱ Ku̱ba̱ʼ (Apoc. 20:6).

11. Ndiéjunʼ eyoo gáʼthúu̱n tayáá ikháán dí maraxtaa kámuu mbiʼi rá. (Ma̱ngaa atayáá xtiʼkhu.)

¹¹ Dí xúgi̱ rá. Índo̱ gájngoo dí mbá Mil tsiguʼ. Náa Biblia naʼthí dí bi̱ Niʼniáanʼ “nigíwanʼ náa a̱jkiu̱ún xa̱bu̱ mu maʼndún makuwá kámuu mbiʼi” (Ecl. 3:11). Lá natatsaʼwáminaʼ xú kaʼnii gíʼdoo numuu rígi̱ náa ikháán ga̱jma̱a̱ rí nambájxa̱a̱ʼ ga̱jma̱a̱ Jeobá rá. Náa  libro Acerquémonos a Jehová, náa ináa 319, naʼthí xígi̱: “Índo̱ gakuwáanʼlú cien tsiguʼ, mil, millones o asndu billones tsiguʼ, majmañulú itháán ga̱jma̱a̱ numuu Jeobá ki xóo dí mbiʼi xúgi̱. Maski ajndu xúʼko̱ mu mbuʼyáá dí tígo̱o̱ xóo itháán rí mitsaanʼ majmañulú ga̱jma̱a̱ numuu ikhaa. Ra̱ʼkhá tháán mitsaanʼ wéñuuʼ gakuwáanʼ, rí asndu tséʼngo̱o̱ mundxaʼwamíjna̱. Mu, xúgíʼ dí guʼni ikhí, rí itháán magiʼdoo numuu mani̱ndxu̱u̱ dí muʼgua kanuu itháán mijngii náa Jeobá”. Mú nákha xóó tséjkha̱nú mbiʼi rúʼko̱. Ndiéjunʼ itháán ma̱ndoo majmañulú dí na̱ʼkha̱ náa ajngá rawuunʼ Dios rá.

12. Xú kaʼnii ma̱ndoo muyejxiráʼanʼ mekhuíí rá. Atagíʼ mbá xkri̱da.

¹² Ajngá rawuunʼ Dios nambáyulú mbuʼyáá mbá chíʼgíiʼ, xóo nindxu̱u̱ rí naʼtáñajunʼ Jeobá “bi̱ xtáa náa mitsídánʼ” (Is. 33:5). Náa Biblia naʼthí mitsaanʼ xóo nindxu̱u̱ Jeobá ga̱jma̱a̱ xuajñuu dí rígá mekhuíí (Is. 6:​1-4; Dan. 7:​9, 10; Apoc. 4:​1-6). Mbá xkri̱da, ma̱ndoo muraxnuu rí ndiʼyoo Ezequiel índo̱ “ndi̱yo̱o̱ dí nimbáʼtoo mekhu”, ga̱jma̱a̱ nigíʼdu̱u̱ “ndi̱yo̱o̱ visión ndrígóo Dios” (Ezeq. 1:1).

13. Xú kaʼnii ku̱ma̱a̱ʼ índo̱ natatsaʼwáminaʼ ga̱jma̱a̱ numuu ñajunʼ dí naʼni Jesús náa mekhuíí rá. (Hebreos 4: 14-16.)

¹³ Gundxaʼwamíjna̱ ga̱jma̱a̱ numuu ñajunʼ rí gíʼdoo Jesús náa mekhuíí dí nindxu̱u̱ Rey ma̱ngaa ndxajkun bi̱ nagáwíinʼ a̱jkiu̱u̱n. Índo̱ nuʼtájkáan, najmulú mbiʼyuu ikhaa mu “mu̱ʼgua̱ kanuu náa xíliúu Dios, náa rígá rí májánʼ wéñuuʼ a̱jkiu̱u̱n” Dios ga̱jma̱a̱ munda̱ʼa̱a̱ rí magáwíinʼ a̱jkiu̱u̱n kaʼyulú “índo̱ phú ndayóoʼ mixtámbáyulú” (atraxnuu Hebreos 4:​14-16). Gundxaʼwamíjna̱ xúgíʼ mbiʼi ga̱jma̱a̱ numuu Jeobá, ma̱ngaa Jesús rí nini ga̱jma̱a̱ dí kúwá runi ga̱jma̱á nindxu̱lú asndu mekhuíí. Ngajua rí ikhiin kuadáánʼlu nambáyulú mu muʼgua kanuu itháán mijngii náa Jeobá ga̱jma̱a̱ rí muʼni ñajuunʼ ga̱jma̱a̱ gagi (2 Cor. 5:​14, 15).

14. Xú káʼnii ma̱ndoo musngajmáá Jeobá ga̱jma̱a̱ Jesús dí nuxníin núma̱aʼ rá. (Ma̱ngaa atayáá xtiʼkhu.)

 ¹⁴ Mbá xóo ma̱ndoo musngajmáá Dios ga̱jma̱a̱ Jesús bi̱ nindxu̱u̱ a̱ʼdióo dí nuxníín núma̱aʼ, ikhaa nindxu̱u̱ dí mumbáñún xa̱bu̱ manindxu̱ún xa̱bi̱i̱ Jeobá ga̱jma̱a̱ muʼsngúún ga̱jma̱a̱ numuu Jesús (Mat. 28:​19, 20). Rígi̱ nindxu̱u̱ dí nini Apóstol Pablo ga̱jma̱a̱ numuu Dios ma̱ngaa Jesús. Ikhaa ndiʼyoo dí nandoo Jeobá dí “xúgíinʼ enii xa̱bu̱ makáwíin, ga̱jma̱a̱ rí maguánú muguaʼdáá mbá ku̱ma̱ kájxi̱ dí gajkhun” (1 Tim. 2:​3, 4). Ikha jngóo, niʼni asndu xó má niʼngo̱o̱ mu mambáñun, “xúgíinʼ enii xa̱bu̱, mu xúʼko̱ tikhuun makáwíin” (1 Cor. 9:​22, 23).

15. Xóo ma eʼthí náa Salmo 1:​2, ndiéjunʼ maʼni makuwáánʼ gagi rá.

¹⁵ Tséʼniulú tsiánguá dí niʼthí bi̱ niʼnirámáʼ Salmo dí mbáa xa̱bu̱ bi̱ xtáa gagi, ikhaa nindxu̱u̱ bi̱ “nanigu̱u̱ʼ maʼni xó má eʼthí náa xtángoo ndrígóo Jeobá”, ga̱jma̱a̱ “mbiʼí mbruʼun nandxaʼwáminaʼ rí niguxnuu” (Sal. 1:​1-3). Dí kuwáanʼ ruʼthá ga̱jma̱a̱ numuu rígi̱, Joseph Rotherham (Studies in the Psalms) bi̱ naʼtájui̱i̱ Biblia niʼthí, dí bi̱ naguxnuu Biblia, gíʼmaa “manigu̱u̱ consejo ndrígóo Dios ga̱jma̱a̱ rí gíʼmaa mbayaʼ, ma̱ngaa dí majmañuu ga̱jma̱a̱ rí mandxaʼwáminaʼ ga̱jma̱a̱ numuu ikhaa”. Ga̱jma̱a̱ niʼthí xóó: “Mbaʼyoo rí mbiʼi dí índo̱ tséʼngo̱o̱ gákroʼoo májánʼ dí naʼthí náa Biblia, rí nindxu̱u̱ asndu xóo nandátigo̱o̱ mbiʼi rúʼko̱”. Ikháán mangáán manigua̱a̱ʼ matraxnuu Biblia a mu natani̱ tsiakimínáʼ makrua̱ʼa̱a̱ʼ itháán ga̱jma̱a̱ xóo nambánii rí naʼthí ikhí. ¡Ra̱ʼkhá tháán mitsaanʼ dí majmañaaʼ xúgíʼ dí na̱ʼkha̱ náa Ajngá rawuunʼ Dios!

16. Ndiéjunʼ guʼyáá náa imbo̱ʼ artículo rá.

¹⁶ Xúgiáanʼ ma̱ndoo makru̱ʼu̱lú Ajngá rawuunʼ Jeobá dí ikhaa nandoo maʼsngulúʼ. Náa imbo̱ʼ artículo, mbuʼyáá itháán ga̱jma̱a̱ numuu rígi̱: Rí xóo nduʼyamajkuíí Jeobá, xóo ma niʼnirámáʼ Pablo náa carta rí ni̱jkha̱ inún bi̱ hebreos. Phú gajkhun dí xúgiáanʼ manigulúʼ, dí muʼnigajma̱a̱ rígi̱.