1-2. Kumbi nthowa yamampha yakuŵerenge kweniso kusambira Bayibolu ndi niyi? Kambani chakuyeruzgiyapu.

 TIYERUZGIYI kuti mukhumba kugula nyumba. Kumbi ndi vinthu wuli vo mukhumbika kuwona mwechendayiguli? Kumbi mungawona ŵaka chithuzi chakulongo kunthazi kwa nyumba yo? Tikayika cha kuti mungakhumba kuchiwona nyumba yo ndi masu nginu, kuyiwona kubwalu ndi mukati mosi kweniso kuwonenesa chechosi chakukwaskana ndi nyumba yo. Mungachita umampha kufumba munthu yo waziŵa mo nyumba yo yikuzengeke. Tikayika cha kuti mungakhumbisiska kuziŵa chechosi chakukwaskana ndi nyumba yo mugulengi.

² Tingachita so va nge venivi asani tiŵerenga kweniso kusambira Bayibolu. Kaswiri munyaki wa Bayibolu wanguyeruzgiya uthenga wa mu Bayibolu ndi “chinyumba chikulu kweniso chitali, cho chikuzengeka pa fawundeshoni yakusere ukongwa pasi.” Mwaviyo, kumbi tingachita wuli kuti tiwuziŵi umampha uthenga wo we mu Bayibolu? Asani mutiliŵerenga mwakuthaŵiriya mungaziŵa ŵaka fundu zapachanyapachanya, kung’anamuwa “fundu zipusu za mu mazu ngakupaturika ngaku Chiuta.” (Ahe. 5:12) Mumalu mwaki, nge mo tingachitiya ndi nyumba yo tikhumba kugula, kuti tiliziŵi umampha Bayibolu tikhumbika kusere “mukati” pamwenga kulisambira mwakuphwere. Nthowa yamampha ukongwa yakusambiriya Bayibolu nkhuwona mo vigaŵa vakupambanapambana va uthenga wa mu Bayibolu vilumikiziyana. Yesesani kuvwisa vo mugomezga kweniso kuziŵa vifukwa vo mugomezge, kuti vinthu vo musambira vauneneska.

3. Kumbi wakutumika Paulo wanguŵachiska kuchitanji Akhristu anyaki, ndipu ntchifukwa wuli? (Aefeso 3:​14-19)

 ³ Kuti tingavwisi umampha Mazu ngaku Chiuta tikhumbika kusambira mwakuphwere fundu za ndimba. Wakutumika Paulo wanguchiska Akhristu a mu nyengu yaki kuti asambirengi Mazu ngaku Chiuta ndi mtima wosi kuti “[avwisi] umampha ukongwa usani, utali, kukwera, ndi kusere” kwa uneneska. Kuchita viyo, kwaŵawovyanga kuti chivwanu chawu chime “misisi ndi kujalikiskika.” (Ŵerengani Aefeso 3:​14-19.) Nasi tikhumbika kuŵayezga. Tiyeni tiwoni mo tingasambiriya Mazu ngaku Chiuta mwakuphwere kuti tingavwisengi umampha.

4. Kumbi tingachita wuli kuti tije pa ubwezi wakukho ndi Yehova? Kambani vakuwoniyapu.

⁴ Nge Akhristu tikhumbika cha kukhorwa ŵaka ndi fundu zipusu za mu Bayibolu. Mzimu wakupaturika waku Chiuta ungatiwovya kuziŵa “vinthu vandimba vaku Chiuta.” (1 Akori. 2:​9, 10) Tingachita umampha kusambira pakutija mwakuphwere fundu za mu Bayibolu zo zingatiwovya kuja pa ubwezi wakukho ndi Yehova. Mwakuyeruzgiyapu, mungafufuza mo Yehova wangulongore kuti watanja ateŵeti ŵaki a mu nyengu yakali kweniso mo venivi visimikiziya kuti namwi watikuyanjani. Mungasambira so mo Yehova wakhumbiyanga kuti Ayisirayeli amusopiyengi ndipu mungaviyeruzgiya ndi mo Yehova wakhumbiya kuti Akhristu amusopiyengi mazuŵa nganu. Pamwenga mungasambira mwakuphwere mauchimi ngo Yesu wangufiska pa nyengu yo wateŵetiyanga pacharu chapasi.

5. Kumbi pe nkhani yinyaki yo mukhumbika kuyifufuza mwakukwana pa kusambira Bayibolu pakumwija?

⁵ Akhristu anyaki wo atanja kufufuza mwakukwana asani asambira Bayibolu, angukamba vinthu vinyaki vo akhumba kuviziŵa umampha ukongwa. Vinyaki mwa vinthu vo yiwu angukamba, ve mu kabokosi kakuti, “ Nkhani zo Mungazisambira Mwakuphwere Asani Musambira Pakumwija.” Mungakondwa ukongwa kusambira nkhani zenizi. Ndipu Watch Tower Publications Index pamwenga Kabuku Kakufufuziya Nkhani ka Akaboni aku Yehova, vingakuwovyani kusaniya nkhani zenizi. Kusambira vinthu vandimba va mu Bayibolu kungakholesa chivwanu chinu  ndipuso kungakuwovyani ‘kumuziŵa Chiuta.’ (Nthanthi 2:​4, 5) Sonu tiyeni tikambiskani vinthu vinyaki vandimba vo ve mu Bayibolu vo tingafufuza.

6. (a) Kumbi pulanu ndi khumbu vipambana wuli? (b) Ntchifukwa wuli tingakamba kuti khumbu laku Yehova lakukwaskana ndi ŵanthu kweniso charu chapasi ‘ndamuyaya’? (Aefeso 3:11)

⁶ Tiyeni tikambiskani vo Bayibolu likamba vakukwaskana ndi khumbu laku Chiuta. Pulanu njakupambana ndi khumbu. Pulanu ye nge nthowa yo munthu wasankha yo yingamuwovya kuti wakafiki ko waluta. Kweni asani chinthu chinyaki chajala nthowa yo wasankha kwendamu, munthu wangachifika cha ko waluta. Penipo khumbu tingaliyeruzgiya ndi kumalu ko tiluta. Tiziŵa umampha ko ulendu widu wamumaliya kweni tingayenda nthowa zakupambanapambana kuti tikafiki. Asani nthowa yinyaki ayijala tingayenda yinyaki. Vakukondwesa kuti kamana ndi kamana, Yehova wativumbuliya “khumbu lamuyaya” mu Bayibolu. (Aefe. 3:11) Yehova wangasankha nthowa zakupambanapambana kuti wafiski khumbu laki ndipu nyengu zosi watilifiska chifukwa chakuti “wachitiska kuti chechosi chichitiki mwakukoliyana ndi khumbu laki.” (Nthanthi 16:4) Ndipu vo Yehova wachita viŵengepu mpaka muyaya. Kumbi khumbu laku Yehova ndi vinthu wuli, nanga ndi vinthu wuli vo wasintha kuti walifiski?

7. Ŵanthu akwamba ŵati agaruka, kumbi Yehova wangusintha wuli mo watingi wafiskiyengi khumbu laki? (Mateyu 25:34)

⁷ Chiuta wangukambiya ŵanthu akwamba khumbu laki. Iyu wanguŵakambiya kuti, “mubalani, muyandani, muzazi charu chapasi ndipu muchithereski. Mulamuliyengi . . . chamoyu chechosi” cha pacharu chapasi. (Gene. 1:28) Adamu ndi Heva ŵati agaruka vo vinguchitiska kuti ŵanthu wosi aje akubuda, vingumutondekesa cha Yehova kufiska khumbu laki. Iyu wangusintha nthowa yakufiskiya khumbu lenili. Nyengu yeniyo, iyu wangusimikiza kujalikiska Ufumu kuchanya kuti uzifiski khumbu laki lapakwamba lakukwaskana ndi ŵanthu kweniso charu chapasi. (Ŵerengani Mateyu 25:34.) Pa nyengu yo Yehova wangusankha, wangutuma Mwana waki wakwamba kuza pacharu chapasi kuti wazisambizi vakukwaskana ndi Ufumu kweniso kupereka umoyu waki nge sembi ndi chilatu chakuti watiwombo ku ubudi ndi nyifwa. Pavuli paki, Yesu wanguyuskikiya kuchanya kuti wakalamuliyi nge Fumu ya Ufumu waku Chiuta. Kweni pe vinandi vo tikhumbika kuviziŵa umampha vakukwaskana ndi khumbu laku Chiuta.

8. (a) Kumbi fundu yikulu mu Bayibolu njakuti wuli? (b) Nge mo pakambiya pa Aefeso 1:​8-11, kumbi ntchinthu wuli chinyaki cho Yehova wazamufiska? (Wonani chithuzi cho che pachikonkhombi.)

⁸ Fundu yikulu mu Bayibolu njakuti zina laku Yehova lazamutoweseka. Ndipu iyu wazamufiska khumbu laki lakukwaskana ndi charu chapasi, kuziya mu Ufumu waki wakulamulika ndi Khristu. Khumbu laku Yehova lingasinthika cha. Iyu wasimikiza kuti khumbu laki lazamufiska nadi. (Yesa. 46:​10, 11, mazu ngamumphata; Ahe. 6:​17, 18) Charu chazamuja paradayisu mo ŵana aku Adamu ndi Heva ‘azamukondwa ndi umoyu kwamuyaya.’ Ndipu ŵana ŵenaŵa azamukuŵa arunji kweniso akufikapu. (Salimo 22:26) Kweni Yehova wazamufiska venivi pe cha. Iyu wazamuchitiska so kuti ateŵeti ŵaki akuchanya ndi a pacharu chapasi akoliyani. Pavuli paki, angelu kweniso ŵanthu azamuvwiya Yehova ndi mtima wosi nge Fumu yawu ya Chilengedu Chosi. (Ŵerengani Aefeso 1:​8-11.) Kumbi yimwi mukondwa cha ndi mo Yehova wafiskiya khumbu laki?

9. Kumbi tiziŵanji asani tiŵerenga Bayibolu?

⁹ Tiyeni tikambiskani uchimi wo Yehova wangukamba mumunda wa Edeni wo we pa Genezesi  3:15. b Uchimi wenuwu wakambanga za vinthu vo vazifiskanga khumbu laki. Kweni vatingi vizichitikengi vyaka masawuzandi nganandi kunthazi. Mwakuyeruzgiyapu, Chiuta wangukambiya Abrahamu kuti asani pazijumpha migonezi yinandi, yumoza mwa mphapu zaki wazamuja Khristu. (Gene. 22:​15-18) Nge mo uchimi ungukambiya limu, Yesu wangulumika chiphundulu mu 33 C.E. (Machi. 3:​13-15) Sonu kwaja vyaka vakujumpha 1,000 kuti chigaŵa chakumaliya cha uchimi uwu, chakuti mbewu yazamuphwanya mutu waku Satana, chizifiskiki. (Chivu. 20:​7-10) Ndipu Bayibolu livumbuwa vinandi vakukwaskana ndi vo vazamuchitika pa nyengu yo urwani wazamukuwa ukongwa pakati pa charu chaku Satana ndi gulu laku Yehova.

10. (a) Kumbi ndi vinthu nivi vo vichitikengi pambula kuswera yapa? (b) Kumbi tinganozgekereska wuli maŵanaŵanu ngidu kweniso mtima widu? (Wonani mazu nga mumphata.)

¹⁰ Ŵanaŵaniyani vinthu vinyaki vapade vo Bayibolu lingukambiya limu kuti vazamuchitika. Chakwamba, mitundu ya ŵanthu yazamudaniriza kuti: “Chimangu ndi kuvikilirika!” (1 Ate. 5:​2, 3) Nyengu yeniyo chisuzgu chikulu chazamukwamba po vyaru vazamuyukiya visopa vosi vaboza. (Chivu. 17:16) Pavuli paki, kwazamukuŵa vakuziziswa vakulongo “Mwana wa munthu wachiza mumitambu yakuchanya ndi nthazi kweniso unkhankhu ukulu.” (Mate. 24:30) Yesu wazamuyeruzga ŵanthu, kupatuwa mbereri ku mbuzi. (Mate. 25:​31-33, 46) Pa nyengu yeniyi Satana wazamujapu ŵaka cheti cha. Chifukwa chakuti watiŵatinkha ukongwa ŵanthu aku Chiuta, wazamuchitiska kuti vyaru vo vazamukoliyana viyukiyi ŵanthu aku Yehova. Ndipu Bayibolu lidana kukoliyana kwa vyaru kwenuku kuti Gogi wa mucharu cha Magogi. (Ezeki. 38:​2, 10, 11) Akhristu akusankhika wo ŵeche pacharu chapasi azamuwunganisikiya kuchanya kuti akaŵi limoza ndi Khristu kweniso asilikali ŵaki akuchanya kuti azichiti nkhondu ya Aramagedoni. Ndipu venivi vazamuchitika kukumaliya kwa chisuzgu chikulu. c (Mate. 24:31; Chivu. 16:​14, 16) Pavuli paki, Ulamuliru wa Vyaka 1,000 waku Khristu wazamukwamba pacharu chapasi.​—Chivu. 20:6.

11. Kumbi ndi vinthu wuli vo tazakuviziŵa chifukwa chakuja ndi umoyu kwamuyaya? (Wonani so chithuzi.)

 ¹¹ Ŵanaŵaniyani mo umoyu winu wazamuŵiya asani vyaka 1,000 vazijumphapu. Bayibolu lititikambiya kuti Mlengi widu ‘waŵika umuyaya mumitima yidu.’ (Waku. 3:11) Ŵanaŵaniyani mo venivi vikwaskiya ubwezi winu ndi Yehova. Buku lakuti Yandikirani kwa Yehova, peji 319, likamba fundu yakukondwesa yakuti: “Asani tazija kwa vyaka mahandiredi, masawuzandi, mamiliyoni pamwenga mabiliyoni, tazamuziŵa vinthu vinandi ukongwa vakukwaskana ndi Yehova Chiuta kuluska mo tiziŵiya sonu. Kweni tazamuwona kuti pe vinthu vinandi ukongwa vakuziziswa vo tingasambira vakukwaskana ndi Iyu. . . . Tingafiska cha kuyeruzgiya mo tazamujaliya ndi umoyu wakukondwesa mu paradayisu. Ndipu chakukondwesa ukongwa ntchakuti, nyengu zosi tazamujanga pa ubwezi wakukho ndi Yehova.” Pasonu panu po tilutirizga kusambira Mazu ngaku Chiuta, kumbi ndi vinthu wuli so vinyaki vo tingafufuza?

12. Kumbi tingalereska wuli kuchanya? Kambani chakuyeruzgiyapu.

¹² Mazu ngaku Chiuta ngavumbuwa vinthu vimanavi vakukwaskana ndi “kuchanya” ko Yehova waja. (Yesa. 33:5) Bayibolu livumbuwa vinthu vakukondwesa vakukwaskana ndi Yehova kweniso chigaŵa cha gulu laki lakuchanya. (Yesa. 6:​1-4; Dani. 7:​9, 10; Chivu. 4:​1-6) Mwakuyeruzgiyapu, tingaŵerenga vinthu vakofya vo Ezekiyeli wanguwona pa nyengu yo “kuchanya kungujulika ndipu [wangwamba] kuwona viwona vaku Chiuta.”​—Ezeki. 1:1.

13. Nge mo pakonkhoske pa Aheberi 4:​14-16, kumbi mutuvwa wuli chifukwa cha vo Yesu wachita kutuliya kuchanya?

¹³ Ŵanaŵaniyani so vo Yesu watitichitiya kutuliya kuchanya nge Fumu yidu kweniso Wasembi Mura walisungu. Kuziya mwaku iyu tingafika “kumpandu waufumu wa wezi ukulu” waku Chiuta mupempheru, kumupempha kuti watichitiyi lisungu kweniso watiwovyi “pa nyengu yakwenere.” (Ŵerengani Aheberi 4:​14-16.) Tingazomerezanga  cha kuti zuŵa lijumphengepu ŵaka kwambula kuŵanaŵaniya vo Yehova ndi Yesu akutichitiya kweniso vo atitichitiya kutuliya kuchanya. Chanju cho atitilogo chitichiskengi kuteŵete Yehova ndi mtima wosi.​—2 Akori. 5:​14, 15.

14. Kumbi ntchinthu wuli cho tingachita kuti tilongo kuti tiwonga Yehova ndi Yesu? (Wonani so vithuzi.)

¹⁴ Nthowa yimoza yo tingalongore kuti tiwonga Chiuta kweniso Mwana waki, nkhuyesesa kuwovya ŵanthu kuti aje Akaboni aku Yehova kweniso akusambira aku Yesu. (Mate. 28:​19, 20) Venivi ndivu wakutumika Paulo wanguchita kulongo kuti wawonga Chiuta kweniso Khristu. Iyu waziŵanga kuti khumbu laku Yehova ndakuti “ŵanthu amitundu yosi ataskiki kweniso awuziŵi umampha uneneska.” (1 Timo. 2:3, 4) Paulo wachitanga uteŵeti waki mwaphamphu kuti ‘wayesesi kutaskaku ŵanthu anyaki.’​—1 Akori. 9:​22, 23.

15. Mwakukoliyana ndi Salimo 1:​2, ntchinthu wuli cho tingakondwa nachu?

¹⁵ Yo wangulembaku buku la masalimo wangukamba kuti munthu yo “wakondwa ndi dangu laku Yehova” ndipuso ‘kulunguruka dangu Laki msana ndi usiku,’ vinthu vitimuyende umampha ndipuso waja walikondwa. (Salimo 1:​1-3) Pakukamba za mavesi ngenanga, wakufwatuliya Bayibolu munyaki Joseph Rotherham wangukamba kuti, “munthu wakhumbisiskengi ulongozgi waku Chiuta kuti wawusambirengi, wawufufuzengi kweniso waŵanaŵaniyengepu kwa nyengu yitali.” (Studies in the Psalms) Iyu wangukamba so kuti “asani zuŵa lajumphapu ŵaka kwambula kuŵerenga Bayibolu, ndikuti zuŵa lo latayika ŵaka.” Mungakondwa pakusambira Bayibolu asani mukhumbisiska kuziŵa vinthu vinandi vakukondwesa kweniso kuwona mo vinthu vo musambira vikoliyana. Mukondwengi ukongwa asani mufufuza Mazu ngaku Chiuta mwakukwana!

16. Kumbi tazamukambiskananji mu nkhani yakulondopu?

¹⁶ Uneneska wakuzirwa wo Yehova watitisambiza mu Mazu ngaki ngwakusuzga cha kuwuvwisa. Mu nkhani yakulondopu tikambiskanengi vakukwaskana ndi nyumba yakusopiyamu yikulu yauzimu yaku Yehova, yo njimoza mwa fundu zandimba yo Paulo wanguyikonkhoska mu kalata yaki yakuluta kwa Akhristu Achiheberi. Kusambira mwakukwana nkhani yeniyi kukuwovyeningi kuti mukondwi ukongwa.