1-2. Khu yevbini ndziya nya yadi nya gu hevbule Bhibhiliya? Ninga giyeyedzo.

 NGA DUNDRUGEYA na wu gu vbweta gu renga nyumba nyo khaguri. Ginani u nga hadzi gu gira na wu si rengi nyumba yoyo? Ina u di hadzi dzumeya gu wona fotu yakone basi? Nya mba kanakana u di hadzi guya wona nyumba yoyo khu vbafuvbi, gasi gu wona edzi yi khadego khidzo ndrani gwakona ni gu wona gu khuwe yikhongolo mwendro ne. Khu lisine, u di hadzi gu yi khedziseya gwadi na wu si yi rengi.

² Hi nga gira sasimweso tepo hi lerigo Bhibhiliya. Mulovi nyo khaguri fananiside Bhibhiliya “ni nyumba nya yikhongolo, nyo laphe ngudzu yi giridwego fundhasawu nya yadi.” Khu kharato, ginani u nga girago gasi guti gwadi Bhibhiliya? Wa gu leri Bhibhiliya khu gu vbiredza, adzina saye u nga hevbula silo nyo khaguri nya litshina, a gu “silo nyo pheye [u nga si hevbula] umo nya Lito la Nungungulu.” (Hebh. 5:12) Kha nga olu u beyago ndrani nya nyumba u vbwetago gu renga gasi gu yi wona gwadi, khu ndziya nyo fane u yede gu hevbula Bhibhiliya gasi u yi pwisisa gwadi. U nga gira isoso khu gu wona edzi mambe mahungu ma pwananago khidzo ni mambe. Dzi garadzeye gu pwisisa esi u si khodwago ni gighelo gi gu girago u si khodwa.

3. Mupostoli Pawulo a di kutsa Makristo gu gira ginani nigu khu ginani? (Vaefeso 3:14-19)

³ Gasi gu pwisisa Lito la Nungungulu, u yede gu hevbula mahungu nya guete ma gomogo umo nya Bhibhiliya. Mupostoli Pawulo a di kutsa vandriyaye gu hevbula Lito la Nungungulu gasi va si kodza gu “pwisisa gugula, gulapha, gukhugega ni gueta” nya silo nya lisine. Khu kharato, va di hadzi si kodza gu “tiya” gukhodwani gwawe. (Leri Vaefeso 3:14-19.) Anethu hi yede gu gira sasimweso. Olu hongoleni hi wona edzi hi nga golago khidzo Lito la Nungungulu gasi hi pwisisa gwadi satshavbo nya sadi li hi ningago.

4. Ginani hi nga girago gasi gu engedzeya gu hidzimeya ga Jehovha? Ninga siyeyedzo.

⁴ Kha nga Makristo kha hi vbweti basi gu pwisisa silo nya litshina nya Bhibhiliya. Khu gu phaswa khu liphuvbo nya guage la Nungungulu, ethu hi na ni gudogoreya nya gu hevbule “silo si etidego ngudzu sa Nungungulu.” (1 Kor. 2:9, 10) Wa gu si wona kharini gu pheya gu gira gihevbulo nya muthu enga gasi u engedzeya gu hidzimeya ga Jehovha? Khu giyeyedzo, u nga gevesisa silo nya singi khedzi Jehovha a yeyedzidego khidzo lihaladzo laye sithumi saye sa gale ni edzi isoso si yeyedzago gu khiso Jehovha a ngu gu haladza. U nga gevevisa gambe edzi wukhozeyi wa Jehovha wu nga ba wu sasamedzidwe khidzo dziteponi dza Israyeli ni edzi Jehovha a vbwetago gu khuye u mu khozeya khidzo muhuno. Mwendro u nga hevbula siprofeto si nga tadzisega tepo Jesu a nga ba a romo mafuni.

5. Avbo nya gihevbulo gyago nya muthu enga, ina momo mahungu nyo khaguri u vbwetago gu ma gevisisa?

⁵ Vandriyathu nyo khaguri va ngu ganeya khu dzindziya va dzi thumisago gasi gu hevbula nya singi umo nya Lito la Nungungulu. U nga wona esi va ganedego umo nya kwadru yi gu khiyo: “ Mawonelo nya edzi hi nga girago khidzo gihevbulo nya muthu enga.” Gasi u gevisisa mambe mahungu, u nga thumisa Índice das publicações da torre de vigia ni Libhuku nyo peskizari khilo nya Dzifakazi dza Jehovha. Wa gu gira gwadi gihevbulo nya Bhibhiliya, u na tiyisa gukhodwa gwago nigu si na gu phasa gu “mana guti ga Nungungulu.” (Mav. 2:4, 5, NM) Olu hi na bhula khu mahungu nyo khaguri nya guete ma gomogo umo nya Bhibhiliya.

6. a) Khu gwevbini gu hambana gu gomogo avbo nya gu hunge gilo nyo gire ni makungo? b) Khu ginani hi ganeyago gu khethu makungo ya Jehovha maningano khu vathu ni mafu makungo nya “gupindruge?” (Vaefeso 3:11)

⁶ Wona esi Bhibhiliya yi ganeyago khu makungo ya Nungungulu. Gomo gu hambana avba  nya gu hunge gilo nyo gire ni makungo yakone. Dzi dundrugeye na wu gu vbweta gu gira liendro nyo khaguri. Gu hunga gilo nyo gire hi nga gu fananisa ni estradha u yi thumisago gasi gu vboha avbo u hongolago. Ganiolu, esi u hungidego si nga thindreka, khu gu ba estradha yi segidwe khu gighelo nyo khaguri. Khu yimbe ndziya, makungo ma nga fananiswa ni wulanga u vbwetago gu vboha. Wa gu ba u guti avbo u vbwetago gu hongola u nga thumisa ni yevbini estradha gasi gu vboha ga wulanga wowo. U nga gira esi si vbwetegago guya khu giemo gyago. Hi ngu bonga Jehovha khu gu ba a lovide “makungo nya gupindruge” umo nya Bhibhiliya. (Vaefeso 3:11.) Jehovha tepo yatshavbo a ngu si kodza gu gira esi a si vbwetago, kholu uye a gu girisa gu “satshavbo silo si phasedzeya gasi gu tadzisa makungo yaye.” (Mav. 16:4, NM) Nigu satshavbo esi Jehovha a girago si ngu simama kala gupindruga. Ganiolu, khu yavbini makungo ya Jehovha nigu silo muni a giridego gasi gu makungo yaye ma tadzisega?

7. Hwane nya gu ba Adhamu ni Evha va digide gu engisa, ginani Jehovha a giridego gasi gu tadzisa makungo yaye? (Matewu 25:34)

⁷ Nungungulu embede patwa nyo pheye makungo yaye. Uye a di va embeya gu khuye: “Velegelanani, mu andra, mu tadza mafu, mu ma fumela. Fumelani . . . satshavbo si vbanyago mafuni.” (Gen. 1:28) Khu kotani nya olu Adhamu ni Evha va nga mba engisa, vathu vatshavbo va di thapedwa khu gighoho, ambari ulolo Jehovha kha vbindrugedza makungo yaye. Uye a di dzegeya gu vbindrugedza edzi makungo yaye ma nga hadzi tadzisega khidzo. Gukhugeya gale a di hungide gu vega Mufumo ndzadzini gasi gu tadzisa makungo yaye maningano khu vathu ni mafu. (Leri Matewu 25:34.) Khu lihaladzo, Jehovha a di rumeya gyanana gaye gyagimwegyo mafuni khu tepo a nga ba yi vegiside. Khu ndziya yeyi, Jesu a di hadzi si kodza gu hevbudza vathu maningano khu Mufumo ni gu ningeya womi waye gasi gu hi tshudzisa ga gighoho ni gufa. Khavbovbo, Jesu a di wuswa a hongola ndzadzini gasi guya khala Pfhumu nya Mufumo wa Nungungulu. Ganiolu, somo silo nya singi u nga si dundrugeyago maningano khu makungo ya Nungungulu.

8. a) Khu wevbini hungo nya mahungu nya Bhibhiliya? b) Guya khu Vaefeso 1:8-11, khu yavbini makungo nyo hegise ya Jehovha? (Wona fotu avba nya kapa.)

⁸ Hungo nya mahungu nya litshina nya Bhibhiliya, khuwo wu ganeyago khu gu agiswa nya lina la Jehovha. Isoso si na girega tepo a na tadzisago makungo yaye mafuni khu gu thumisa Mufumo waye wu fumedwago khu Kristo. Makungo ya Jehovha kha ma vbindrugedzi. Uye a tumbiside gu khuye satshavbo si na girega nga edzi a ganedego khidzo. (Isa. 46:10, 11; Hebh. 6:17, 18) Khu gu gimbiya nya tepo, mafu ma na vbindrugedza ma khala paradhesi nigu situgulwana nyo lulame ni gu vbeleya sa Adhamu ni Evha si na vbanya “kala gupindruga.” (Ndzi. 22:26) Ganiolu, somo silo nya singi esi Jehovha a na si tadzisago. Makungo yaye nyo hegise khu gu sithumi saye satshavbo sa ndzadzini ni mafuni si mu khozeya khu wumowo. Khu ndziya yeyi, vatshavbo va na tumbega ni gu engisa Jehovha kha nga Pfhumu nya Tshivba Yatshavbo. (Leri Vaefeso 1:8-11.) Ina kha wu hlamadziswe khedzi Jehovha a tadzisago khidzo makungo yaye?

9. Gu hevbula Bhibhiliya sa gu hi phasa kharini guti esi si na giregago mindru watshigu?

⁹ Wona giprofeto egi Jehovha a gi giridego thembweni ga Edheni, gi gomogo umo ga Genesi 3:15. b Igyo gya gu ganeya khu silo si nga hadzi tadzisa makungo ya Nungungulu, ganiolu si na giregago hwane nya myaga nya yingi. Khu giyeyedzo, Nungungulu a di embeya Abrahama  gu khuye, hwane nya myaga nya yingi, gimwegyo nya gitugulwana gyaye gi di hadzi gu khala Kristo. (Gen. 22:15-18) Khavbovbo, khu mwaga nya 33 matshigoni yathu, Jesu a di hodzwa gitshinandru kha nga edzi giprofeto gi ganedego khidzo. (Mith. 3:13-15) Gipandre nyo hegise nya giprofeto gegi, a gu tepo Sathane a na pfharwago hungo, gi na tadzisega basi gu hegisani nya 1000 myaga nya Mufumo wa Kristo. (Gutu. 20:7-10) Nigu Bhibhiliya ya gu ganeya khu silo nya singi si na giregago tepo litigo la Sathane li na wugeyago hengeledzano ya Jehovha khu tshivba ni tshivba.

10. a) Nya mba hweya ginani gi na giregago? b) Hi nga dzi dongiseya kharini? (Wona tshamuselo wa vbavbatshi.)

¹⁰ Dundrungeya khu sigiro nyo hlamadzise Bhibhiliya yi si ganedego. Gupheya, mifumo yi na huweleya gu khiyo: “Ho vbanya gurulani.” (1 Tes. 5:2, 3) Khavbovbo, tshanisa nya yikhongolo yi nata “khavba ni avba,” tepo mifumo yi na wugeyago wukhongeyi nya malipha. (Gutu. 17:16) Hwane nya isoso, tepo “Gyanana nya muthu [gi natago] khu mapfhini ya ndzadzini ni tshivba ni wudhumo nya wukhongolo,” adzina saye hi na wona silo nya mba olovelega. (Mat. 24:30) Khu kharato, Jesu a na lamula vathu, a hambanisa dzinvuta ni dziphongo. (Mat. 25:31-33, 46) Ambari ulolo, Sathane kha na nga tsukula. Khu gu ba tade gisakwana ni metadi, a na tshanganisa mifumo eyi Bhibhiliya yi yi ranago gu khiyo I Gogi wa Magogi, gasi gu wugeya vathu va Nungungulu. (Ezek. 38:2, 10, 11) Khu tepo nyo khaguri, ava va todzidwego va na ba va ngo romo mafuni, va na dzegwa va hongola ndzadzini gasi guya patana ni Jesu ni libuthu laye gu dwana nyimbi ya Harimagedhoni yi na giregago gu hegisani nya tshanisa nya yikhongolo. c (Mat. 24:31; Gutu. 16:14, 16) Khu gu landreya, Mufumo wa Kristo nya 1000 myaga wu na pheya gufuma mafuni. — Gutu. 20:6.

11. Wa gu dzipwa kharini khu gu dziti gu khuwe u na vbanya kala gupindruga? (Wona fotu.)

¹¹ Olu dundrugeya khedzi gu na ba guri idzo hwane nya mufumo nya 1000 myaga. Bhibhiliya yari khiyo Muvangi wathu “vegide gambe myonyoni [gwathu] gu alakanya dzinango nyamba vbela.” (Muh. 3:11) Dundrugeya gu khuwe  isoso sa gu thula ginani gwago ni wupari wago ni Jehovha. Libhuku li gu khilo Achegue-se a Jeová, pajina 319, li ngu ganeya malito yaya nyo hlamadzise: “Hwane nya gu ba hi vbanyide myaga nya yingi ngudzu, hi nati nya singi maningano khu Jehovha guvbindra olu. Ganiolu, gu na ba guri ni silo nya singi nyo mbure ngudzu gasi gu hevbula khiso . . . Kha si kanakanisi gu khiso womi paradhesini wu na tsakisa, nigu egi gi tsakisago ngudzu khu gu hi na engedzeya gu manega ni wupari nyo tiye ni Jehovha.” Na yi si vbohi tepo yoyo, hi na hevbula nya singi omu nya Bhibhiliya.

12. Hi nga khedza kharini ndzadzini khu ndziya nyo fananise? Ninga giyeyedzo.

¹² Lito la Nungungulu li ngu ganeya khu gu ba Jehovha a “vbanya vbatshani ngudzu.”(Isa. 33:5) Bhibhiliya ya gu ganeya silo nya sadi maningano khu Jehovha ni hengeledzano yaye ya ndzadzini. (Isa. 6:1-4; Dhan. 7:9, 10; Gutu. 4:1-6) Khu giyeyedzo, hi nga hevbula silo nyo khaguri Ezekiyeli a si wonidego tepo gu nga ‘tulega ndzadzini, a wona siwoniso khu ga Nungungulu.’ — Ezek. 1:1.

13. Wa gu dzipwa kharini khu guti esi Jesu a girago na gu romo khu ndzadzini? (Vahebheru 4:14-16)

¹³ Dundrugeya khesi Jesu a girago ndzadzini, kha nga Pfhumu yathu ni Muprista nya Khongolo. Khu kotani yaye, hi ngu si kodza gu hidzimeya “avba nya gikhalo nya wufumu gya Nungungulu” khu nombelo, hi lomba divalelo khu sighoho sathu ni gu hi phasa “khu tepo yakone.” (Leri Vahebheru 4:14-16.) Tshigu ni tshigu, dundrugeya khu satshavbo esi Jehovha ni Jesu va hi giredego ni esi va hi gireyago na va gu romo khu ndzadzini. Lihaladzo lawe khethu, li yede gu kuha myonyo yathu li bwe li hi kutsa gu gira satshavbo hi si kodzago thumoni wa Jehovha. — 2 Kor. 5:14, 15.

14. Khu yevbini mweyo nya dzindziya hi nga yi thumisago gasi gu yeyedza gu khethu hi ngu bonga Jehovha ni Jesu khu satshavbo va hi gireyago? (Wona dzifotu.)

 ¹⁴ Mweyo nya dzindziya hi nga yi thumisago gasi gu yeyedza gu khethu hi ngu bonga Jehovha gumogo ni Gyanana gyaye, khu gu zama gu phasa vambe gu khala Dzifakazi dza Jehovha ni gu khala vapizane va Jesu. (Mat. 28:19, 20) Khiso a giridego mupostoli Pawulo gasi gu yeyedza gu khuye a ngu bonga Jehovha ni Kristo. Uye a di gu dziti gu khuye gugola ga Jehovha khu gu “vathu vatshavbo va vbulugiswa va bwe vati lisine.” (1 Thim. 2:3, 4) Uye a giride satshavbo a nga si kodza thumoni nyo tshumayele gasi gu phasa vathu nya vangi khu gu “zama gu vbulugisa vambe vakone khavba si kodzegago khavbo.” — 1 Kor. 9:22, 23.

15. Guya khu Ndzimo 1:2, ginani gi na hi girago hi tsaka?

¹⁵ Mulovi nya ndzimo a tshamusede gwadi muthu a hevbulago gwadi Lito la Nungungulu, uye a di khuye a ngu mana “gutsaka nayoni wa [Jehovha]” a bwe “a wu alakanyela wutshigu ni mihani.” (Ndzi. 1:1-3) Muvbindrugedzeyi moyo nya Bhibhiliya nyo pwani khu Joseph Rotherham, lovide umo nya libhuku laye Estudos dos Salmos gu khuye muthu a yede “gu vbwetedzeya Lito la Nungungulu, a li hevbula ni gu vbedza tepo na gu dundrugeya khilo.” A di ganeya gambe gu khuye: “La gu tshuka li vbindra litshigu muthu nyo khaguri nya mba leri Bhibhiliya, a na ba luzide ngudzu.” U nga tsaka khu gu hevbula Bhibhiliya, khu gu manega ni gudogoreya nya gu gevesisi silo nya sidugwana, ganiolu si gu na ni lisima ni gu wona edzi satshavbo si pwananago khidzo. Khu lisine, u na tsaka ngudzu khu gu hevbula gwadi Lito la Nungungulu!

16. Ginani hi na bhulago khigyo avba nya ndrima yi landreyago?

¹⁶ Lisine Jehovha a hi hevbudzago, li gomogo umo nya Lito laye kha li garadze gu li pwisisa. Ga ndrima yi landreyago, hi na hevbula khu lisine nya guete, a gu tempele nya liphuvbo ya Jehovha, mupostoli Pawulo a yi tshamusedego umo nya lidangaliya a lovedego Vahebheru. Si na gu tsakisa ngudzu gu hevbula khu mahungu yaya.