1-2. Ninzila nzi mbotu yakubala akwiiya Bbaibbele? Amupe cikozyanyo.

 AMWEEZEEZYE kuti muyanda kuula ŋanda. Ino ncinzi ncomunga mwayanda kubona kamutanasala kuyuula? Sena inga mwayanda kubona buyo cifwoto citondezya mboiboneka kumbele? Tacidoonekwi buya kuti, inga mwayanda kuunka kuyakwiibona ŋanda eeyo cacigaminina akunjila mumaluumu woonse kutegwa musinizye naa zyoonse zili kabotu. Ambweni inga mwayanda akubuzya muntu uumwi uuzyi mboyakayakwa. Masimpe, inga mwayanda kububona bumpiyompiyo boonse bwaŋanda eeyo njomuyanda kuula.

² Tulakonzya kucita mbubwenya oobu ciindi notubala akwiiya Bbaibbele. Mulembi umwi wakakozyanisya mulumbe wamu Bbaibbele “kuŋanda mpati kapati alimwi ndamfwu iijisi ntalisyo njumu.” Aboobo, mbuti mbotukonzya kwaazyiba kabotu makani oonse aali mu Bbaibbele? Ikuti katulibala cakubinda, inga twaile kuzyiba buyo makani aantalisyo, nkokuti “injiisyo zyantalisyo zijatikizya makani aasetekene aa Leza.” (Heb. 5:12) Pele muciindi cakucita boobo, amunjile buya “mukati” kutegwa mubone bumpiyompiyo boonse mbubonya mbomukonzya kucita kuŋanda njomuyanda kuula. Nzila yiinda kubota njomukonzya kubelesya kwiiya Bbaibbele, nkubona zibeela ziindene-indene zyamulumbe uuli mumo mbozyeendelana. Amusolekesye kuzimvwisya zintu nzyomusyoma alimwi akumvwisya twaambo tumupa kuti kamuzisyoma.

3. Ino mwaapostolo Paulo wakabakulwaizya kucita nzi Banakristonyina? Alimwi nkaambo nzi? (Baefeso 3:​14-19)

³ Kutegwa tuzimvwisye kabotu zibeela zyoonse zyamu Jwi lya  Leza, kuli twaambo tumwi ntotweelede kumvwisya kapati. Mwaapostolo Paulo wakakulwaizya Banakristonyina kwiiya Jwi lya Leza cabusungu kutegwa ‘babuzyibe cakumaninina bwamba, bulamfwu, bulamfwu bwakuya mujulu alimwi abulamfwu bwakuyaansi’ bwakasimpe. Kwiinda mukucita boobu, bakali kukonzya ‘kusimpa miyanda akuzyata’ mulusyomo. (Amubale Baefeso 3:​14-19.) Andiswe oobo mbotweelede kucita. Lino amuleke tubone mbotukonzya kulizyiba kabotu Jwi lya Leza kutegwa katugwasyigwa kapati atwaambo toonse tuli mumo.

4. Ncinzi ncotweelede kucita kutegwa tube aacilongwe a Jehova? Amupe zikozyanyo.

⁴ Mbotuli Banakristo, tatweelede kugolela buyo akuzyiba njiisyo zyantalisyo zyamu Bbaibbele. Pele kwiinda mukugwasyigwa amuuya uusalala wa Leza, tweelede kusolekesya kuzyiba “noziba zintu zisisidwe zya Leza.” (1Kor. 2:​9, 10) Aboobo, mbuti kuti mwalibikkila bubambe bwakwiiya zintu zimwi cakulomya izikonzya kumupa kuba acilongwe ciyumu a Jehova? Mucikozyanyo, mulakonzya kusola kuvwuntauzya kutegwa mubone Jehova mbwaakatondezya luyando kubabelesi bakwe bakaindi, mpoonya akubona makani aayo mbwaasinizya kuti andinywe ulamuyanda. Mulakonzya kulanga-langa makani aajatikizya Jehova mbwaakali kuyanda kuti bana Israyeli kabamukomba, mpoonya akweezyanisya mbwayanda kuti katumukomba mazuba aano. Naa ambweni mulakonzya kubwiiya cakulomya businsimi mbwaakazuzikizya Jesu ciindi naakali kupona aano anyika akucita mulimo wakwe.

5. Sena kuli makani ngomunga mwayanda kulanga-langa lyaciiyo canu nobeni?

⁵ Basikwiiya Bbaibbele bamwi basungu bakabuzyigwa kujatikizya makani ngobakali kuyanda kuvwuntauzya cakulomya mu Jwi lya Leza. Makani aamwi ngobakaamba alajanika mukabbokesi kakuti “ Twaambo Ntotukonzya Kulanga-langa Lyaciiyo Cesu Tobeni.” Mulakonzya kukukkomanina kapati kwiiya makani aali boobu kwiinda mukubelesya Watch Tower Publications Index naa Bbuku Ligwasya kuvwuntauzya lya Bakamboni ba Jehova. Kwiiya makani aamu Bbaibbele aali boobu kulakonzya kuyumya lusyomo lwanu alimwi akumugwasya ‘kujana luzyibo lwa Leza.’ (Tus. 2:​4, 5) Lino atubandike makani amwi aamu Bbaibbele ngotukonzya kuvwuntauzya cakulomya.

6. (a) Ino pulani yiindene buti amakanze? (b) Nkaambo nzi ncotukonzya kwaamba kuti makanze aa Jehova kujatikizya bantu ‘taamani’? (Baefeso 3:11)

⁶ Mucikozyanyo, amubone ncolyaamba Bbaibbele kujatikizya makanze aa Leza. Kuli lwiindano lupati akati kapulani alimwi amakanze. Pulani ili mbuli nzila iigaminide iikonzya kumutola kubusena nkomuyanda. Nokuba boobo, mulakonzya kwaalilwa kusika kubusena ooko nkomuyanda kuti naa kwaba cintu cimwi cajala nzila eeyo. Pele makanze alakonzya kukozyanisyigwa kubusena bwini ooko nkotuyanda kuunka. Mbwaanga tulikuzyi kubusena nkotuyanda kuunka, tulakonzya kubelesya nzila ziindene-indene kutegwa tukasike. Aboobo kuti naa nzila imwi yajalwa, tulakonzya kubelesya iimbi. Cikkomanisya ncakuti, asyoonto-syoonto Jehova wali kwaayubununa ‘makanze aakwe aatamani’ kwiinda mukubelesya Bbaibbele. Jehova ulakonzya kusala kubelesya nzila zimbi kuzuzikizya makanze aakwe alimwi “wakabamba zintu zyoonse kuti azuzikizye makanze aakwe.” (Tus. 16:4) Aboobo zintu nzyacita Jehova zinooliko lyoonse mane kukabe kutamani. Pele ino Jehova ujisi makanze nzi, alimwi nkucinca nzi nkwaakacita kutegwa aazuzikizye?

7. Ciindi nobakazanga bantu bakusaanguna, mbuti Jehova mbwaakacinca nzila njaakali kuyoobelesya kuzuzikizya makanze aakwe? (Matayo 25:34)

⁷ Leza wakabaambila bantu bakusaanguna makanze ngaakajisi kujatikizya mbabo. Wakabaambila kuti “amuzyalane muvwule, muzuzye nyika akuyeendelezya, alimwi amweendelezye . . . zilenge zyoonse” zyeenda anyika. (Matl. 1:28) Ciindi Adamu a Eva nobakazanga akubaletela cibi bantu, Jehova tanaakaaleka makanze aakwe. Muciindi caboobo, wakacinca buyo nzila yakubelesya kutegwa aazuzikizye. Aboobo mpoonya-mpoonya wakasala kupanga Bwami kujulu, ibwakali kuyoozuzikizya makanze aakwe aakusaanguna aajatikizya nyika abantu. (Amubale Matayo 25:34.) Mpoonya aciindi cakwe ceelede, caluyando Jehova wakatuma Mwanaakwe mutaanzi anyika kuti azikuyiisye bantu kujatikizya Bwami, akwaaba buumi bwakwe kuti atununune kucibi alufwu. Kumane Jesu wakabusyigwa akujokela kujulu kuyoolela kali Mwami wa Bwami bwa Leza. Pele kuli azimbi nzyotweelede kuzinzibala kuyeeya kujatikizya makanze aa Leza.

8. (a) Ino Bbaibbele lijisi mutwe wamakani nzi? (b) Kweelana alugwalo lwa Baefeso 1:​8-11, nzintu nzi zimbi nzyayoocita Jehova? (Amubone cifwanikiso cili aacivwumbyo.)

⁸ Mutwe wamakani aamu Bbaibbele uuyandika kapati ngwakuti, zina lya Jehova liyoosalazigwa aakuzuzikizya makanze aakwe kujatikizya nyika kwiinda mukubelesya Bwami bwakwe bweendelezyegwa a Kristo. Aboobo makanze aa Jehova taakonzyi kucincwa pe. Wakasyomezya kuti uyakwaazuzikizya ncobeni. (Is. 46:​10, 11; Heb. 6:​17, 18) Mukuya kwaciindi, nyika iyoosanduka akuba paradaiso mwalo mobayookkala bana ba Adamu a Eva balondokede alimwi balulami “mane kukabe kutamani.” (Int. 22:26) Pele kuli azimbi nzyayanda kuyoocita Jehova. Uyanda kuyookamantanya babelesi bakwe boonse bakujulu alimwi aayika. Mpoonya boonse banoolibombya kulinguwe kali Mweendelezi wabo. (Amubale Baefeso 1:​8-11.) Sena tamugambwi kubona Jehova mbwali mukuzuzikizya makanze aakwe munzila mbotu kapati?

9. Kwiinda mukubala Bbaibbele, nzintu nzi zyakumbele nzyotukonzya kuzyiba?

⁹ Amubone businsimi mbwaakaamba Jehova mumuunda wa Edeni, ibulembedwe kulugwalo lwa Matalikilo 3:15. b Businsimi oobu bwakaamba zintu izyakali kuyoozuzikizya makanze aakwe. Pele zintu eezyi zyakali kuyoocitika kwaakwiinda myaka minji. Mucikozyanyo, Leza wakaambila Abrahamu kuti, kwaakwiinda mazyalani manji, muli umwi wabana bakwe momwakali  kuyoozwa Kristo. (Matl. 22:​15-18) Mpoonya mu 33 C.E., Jesu wakalumwa kukasinde kweelana ambokwakasinsimwa. (Mil. 3:​13-15) Cintu camamanino caambidwe mubusinsimi oobu, ikupwayaulwa kwa Saatani kumutwe, kuyoocitika kumbele. (Ciy. 20:​7-10) Alimwi kuli zinji nzyolyaamba Bbaibbele kujatikizya ciyoocitika ciindi yaakubbebba nkondo akati kabweende bwa Saatani aambunga ya Jehova.

10. (a) Ino nzintu nzi iziyoocitika kumbele ino-ino? (b) Mbuti mbotukonzya kulibambila mumoyo amumizeezo? (Amubone bupanduluzi buyungizyidwe.)

¹⁰ Amuyeeye buyo zintu eezyi zipati-pati izyakasinsimwa mu Bbaibbele kuti ziyoocitika. Cakusaanguna, zisi ziyakwaambilizya “luumuno akuliiba!” (1Tes. 5:​2, 3) Mpoonya “cakufwambaana,” mapenzi mapati ayootalika ciindi zisi zyaakulwana bukombi bwakubeja boonse. (Ciy. 17:16) Kuzwa waawo, ambweni kuyoolibonya citondezyo ca “Mwanaamuntu kaboola mumakumbi aakujulu kajisi nguzu abulemu bupati.” (Mt. 24:30) Jesu uyoobabeteka bantu, ikwaandaanya mbelele ampongo. (Mt. 25:​31-33, 46) Aciindi aawa, Saatani takakkali buyo taandabale, uyoozumanana kulwana. Akaambo kakuti ulibasulide kapati bantu ba Leza, uyookulwaizya nkamu yazisi yalo iyaambwa kuti Gogo wakucisi ca Magogo mu Bbaibbele, kutegwa ilwane bakombi ba Jehova. (Ezk. 38:​2, 10, 11) Mpoonya aciindi cimwi lyamapenzi mapati, bananike basyeede bayoobunganizyigwa kujulu kutegwa bakasangane Kristo antoomwe abasikalumamba bakwe bakujulu kulwana nkondo ya Amagedoni. Aaya ayooba mamanino aamapenzi mapati. c (Mt. 24:31; Ciy. 16:​14, 16) Kumane iyootalika Myaka Iili 1,000 ya Bulelo bwa Kristo anyika.—Ciy. 20:6.

11. Ino bulangizi bwakupona kukabe kutamani bwaamba nzi kulindinywe? (Amubone acifwanikiso.)

¹¹ Lino amusole kuyeeya mbozinoobede zintu yaakwiinda myaka iili 1,000. Bbaibbele lyaamba kuti Mulengi wesu “wabikka abuumi butamani mumyoyo [yesu].” (Muk. 3:11) Amweezeezye buyo eeci mbocimujatikizya nywebo alimwi acilongwe canu a Jehova. Bbuku lyakuti Amubaa Cilongwe a Jehova, apeeji 319, kuli kaambo aaka kakkomanisya nkolyaamba. Lyaamba kuti: “Twaakupona myaanda-myaanda, zyuulu-zyuulu, tuulunzuma notuba tuulunzuma twazyuulu zyamyaka, tunoozyi zintu zinji kapati kujatikizya  Jehova Leza kwiinda nzyotuzyi lino. Pele tucinoolimvwide kuti kuli zintu zinji zitaliboteli nzyotweelede kwiiya. . . . Ibuumi butamani bunooli ampindu munzila njotutakonzyi kuyeeyela mumbazu ziindene-indene kapati—alimwi ikuzumanana kubaa cilongwe ciyumu a Jehova cinooli cibeela ciyandika lyoonse cabuumi oobo butamani.” Pele calino, ciindi notuzumanana kwiiya Jwi lya Leza, ncinzi cimbi ncotunga twayanda kuzyiba kabotu?

12. Mbuti mbotukonzya kulungumana kulanga kujulu? Amupe cikozyanyo.

¹² Ijwi lya Leza lilatwaambila asyoonto kujatikizya kubako kwa Jehova “kujulu.” (Is. 33:5) Bbaibbele lilaamba zintu zikkomanisya kujatikizya Jehova alimwi acibeela cambunga yakwe yakujulu. (Is. 6:​1-4; Dan. 7:​9, 10; Ciy. 4:​1-6) Mucikozyanyo, tulakonzya kubala kujatikizya zintu zigambya nzyaakabona Ezekieli ciindi ‘majulu naakajaluka akutalika kubona zilengaano zya Leza.’—Ezk. 1:1.

13. Kweelana ancolwaamba lugwalo lwa Bahebrayo 4:​14-16, ncinzi cimupa kulumba kujatikizya mulimo ngwacita Jesu kujulu?

¹³ Alimwi amuyeeye buyo kujatikizya mulimo ngwacita Jesu kujulu mbwali Mwami wesu alimwi Mupaizi Mupati silweetelelo. Kwiinda mulinguwe, tulakonzya kuswena “kucuuno cabwami caluzyalo lwa Leza” mumupailo akulomba kuti atufwide luse alimwi akutugwasya “aciindi ceelede.” (Amubale Bahebrayo 4:​14-16.) Aboobo, buzuba abuzuba atusolekesye kuzinzibala kuyeeya zintu Jehova a Jesu nzyobatucitila kale alimwi anzyobali mukutucitila kujulu. Luyando ndobajisi kulindiswe lweelede kutukulwaizya kuba basungu mukubelekela Jehova.—2Kor. 5:​14, 15.

14. Ncintu nzi ciinda kubota ncotukonzya kucita ikutondezya kuti tulamulumba kapati Jehova a Jesu? (Amubone azifwanikiso.)

¹⁴ Nzila imwi yiinda kubota mbotukonzya kutondezya kuti tulamulumba kapati Leza a Mwanaakwe, nkwiinda mukusolekesya kugwasya bamwi kuti babe Bakamboni ba Jehova alimwi abasikwiiya ba Jesu. (Mt. 28:​19, 20) Eeci ncaakacita  mwaapostolo Paulo ikutondezya kulumba kuli Leza a Kristo. Wakalizyi kuti Jehova uyanda kuti “bantu boonse bafwutulwe akuba aluzyibo lwini-lwini lwakasimpe.” (1Tim. 2:​3, 4) Aboobo wakabeleka canguzu kusikila mpagolela mumulimo wakwe ikugwasya bantu kutegwa ‘ziyume zitete abafwutule bamwi.’—1Kor. 9:​22, 23.

15. Kweelana alugwalo lwa Intembauzyo 1:​2, ncinzi cikonzya kutupa kukkomana?

¹⁵ Sintembauzyo wakaamba kuti muntu uukkomene alimwi uukonzya kuzwidilila, ngooyo ‘ukkomanina mulawo wa Jehova’ alimwi ‘akuzinzibala kuyeeya mulawo wakwe syikati amasiku.’ (Int. 1:​1-3; bupanduluzi buyungizyidwe) Kaamba kujatikizya lugwalo oolu mubbuku lyakwe litegwa Studies in the Psalms, sikusandulula Bbaibbele wazina lya Joseph Rotherham wakaamba kuti muntu weelede “kubuyanda kapati busolozi bwa Leza cakuti mane ulabuyandaula, kubwiiya alimwi akuzinzibala kubuyeeya.” Wakayungizya kwaamba kuti sikubala Bbaibbele “weelede kulimvwa kuti buzuba bwanyonyooka ikuti naa bwaile kwiinda kakunyina kulibala.” Mulakonzya kukukkomanina kwiiya Bbaibbele kwiinda mukubikkila maano kutwaambo toonse tuli mumo alimwi akubona mbotweendelana. Eelo kaka cilakkomanisya kulizyiba kabotu Jwi lya Leza!

16. Ncinzi ncotuyoolanga-langa mucibalo citobela?

¹⁶ Makani ngatuyiisya Jehova mu Jwi lyakwe taakatazyi kapati cakuti inga twaalilwa kwaamvwisya. Aboobo mucibalo citobela, tuyoolanga-langa makani aajatikizya tempele lya Jehova lipati lyakumuuya, ndyaakaamba Paulo mulugwalo ndwaakalembela Banakristo Bahebrayo. Amukakukkomanine kulanga-langa makani aaya.