1, 2. ¿Tuku tlan natlawayaw xlakata tlakg tlan nalikgalhtawakgayaw chu nalakputsananiyaw Biblia? Kalichuwinanti akgtum liʼakxilhtit.

 KALILAKPUWANTI pi tamawaputuna akgtum chiki. ¿Tuku milikatsit akxni nina tamawaya nawan? ¿Xmakgtayan komo kajwatiya xmasiyanika maktum foto xlakata la tasiya chiki? ¿Ni xlikana pi tlakg tlan xwa komo xpit akxilha? Max asta xpit akxilha la tasiya kxkilhtin chu la tasiya kxpulakni. Asta max xkgalhskimputu tiku tlawalh uma chiki xlakata nakatsiya la tlawakanit. Xlikana pi pulana xlakgapasputu uma chiki.

² Na tlan chuna natlawayaw akxni nalikgalhtawakgayaw chu nalakputsananiyaw Biblia. Maktum libro wan xlakata Biblia: «Akgtum lanka edificio nema kgalhi laklanka torres chu pulhman niku tijukgo». ¿Chu la tlan nakatsiyaw putum tuku lichuwinan Biblia? Komo kaj lakapala nalikgalhtawakgayaw, kajwatiya nakatsiyaw «tuku pulana» masiya «xtachuwin Dios» (Heb. 5:12). Tlakg tlan nawan komo natlawayaw chuna la akxni tamawaputunaw akgtum chiki: pulana liwana naʼakxilhaw putum tuku kgalhi. Xlakata liwana nalakputsananiyaw Biblia, tlakg tlan nawan komo nalakputsananiyaw pulakatunu pulakatunu tuku lichuwinan chu naʼakxilhaw la latatalakxtumikgo. Ni kajwatiya kilikatsitkan tuku kanajlayaw, wata xlakaskinka nakatsiyaw tuku xlakata chuna kanajlayaw.

3. ¿Tuku kamakgpuwantinilh apóstol Pablo natlawakgo kstalaninanin Cristo, chu tuku xlakata? (Efesios 3:​14-19).

³ Xlakata liwana naʼakgatekgsaw xTachuwin Dios, kililakputsananitkan tuku tlakg tuwa. Apóstol Pablo kamakgpuwantinilh kstalaninanin Cristo pi liwana xlikgalhtawakgakgolh xTachuwin  Dios xlakata xʼakgatekgskgolh «la xlitilanka, xlilhman, xlitalhman chu xlipulhman» tuku xaxlikana. Komo chuna xtlawakgolh «tliwakglh» xkgalhikgolh xtakanajlakan (kalikgalhtawakga Efesios 3:​14-19). Akinin nachuna kilitlawatkan. Kaʼakxilhwi la tlan nalakputsananiyaw xTachuwin Dios xlakata tlan naʼakgatekgsaw putum tuku masiya.

4. ¿Tuku tlan natlawayaw xlakata tlakg tlan natalalinaw Jehová? Kalichuwinanti makgapitsi liʼakxilhtit.

⁴ Akinin kstalaninanin Cristo ni kaj tsinu talakaskin nakatsiniyaw tuku masiya Biblia. Wata tlakg katsiniputunaw xlakata «xtakatsin Dios nema tsekg wi», chu espíritu santo nakinkamakgtayayan chuna natlawayaw (1 Cor. 2:​9, 10). ¿Tlan xlakkaxwili wi tuku miʼakstu xlakputsanani nema namakgtayayan tlakg tlan natalalipina Jehová? Lhuwa tuku tlan natlawaya. Tlan xlakputsanani la kalimasiyanilh Jehová xtapaxkit xlakskujnin xalamakgasa chu la limasiyaniyan uma pi na paxkiyan. Tlan xlakputsanani la xlakkaxwilinit Jehová pi xkakninanikgolh israelitas xalamakgasa chu xtamalakxtupi la lakkaxwilinit nakakninanikan la uku. O tlan tlakg xlakputsanani tuku xlichuwinanit Tatsokgni pi xʼama la nema Jesús makgantaxtilh akxni latamalh kKatiyatni chu akxni lichuwinalh Dios.

5. ¿Tuku tema tlakg lakputsananiputuna akxni miʼakstu nakgalhtawakgaya?

⁵ Makgapitsi natalan tiku lu lakgatikgo likgalhtawakgakgo xTachuwin Dios kakgalhskinka tuku tlakg xlakputsananiputunkgo nema tlakg tuwa masiya Biblia. Recuadro « Tuku tlan kiʼakstukan nalakputsananiyaw» lichuwinan makgapitsi tuku xlakan lichuwinankgolh. Wix na lu napaxuwaya komo tlakg nalakputsananiya umakgolh temas chu namaklakaskina Índice de las publicaciones Watch Tower chu Liputsan xla xtatayananin Jehová. Komo chuna natlawaya, namatliwakglha mintakanajla chu namakgtayayan natekgsa «xtakatsin Dios» (Prov. 2:​4, 5). La uku, kalichuwinaw makgapitsi tuku tlakg tuwa masiya Biblia nema tlan nalakputsananiyaw.

6. 1) Kalichuwinanti akgtum liʼakxilhtit nema limasiya pi Jehová ankgalhin makgantaxti tuku lakkaxwili natlawa. 2) ¿Tuku xlakata tlan nawanaw pi tuku lakkaxwilinit Jehová xlakata latamanin chu Katiyatni putum kilhtamaku namakgapala?

⁶ Jehová ankgalhin makgantaxti tuku lakkaxwilinit. Kalilakpuwanti uma: wix chipimputuna kʼakgtum aktsu kachikin, pero ktiji ma akgatum lanka kiwi chu tasiya pi nila katititaxtu. Wa xlakata putsaya atanu tiji xlakata tlan nachipina niku pimpat. Xtachuna la uma, Jehová «wi tuku lakkaxwilinit natlawa», chu lu paxtikatsiniyaw xlakata tsinu tsinu kinkamasiyanitilhanitan kBiblia la namakgantaxti tuku lakkaxwilinit (Efes. 3:11). Putum tuku xla lakkaxwilinit ankgalhin tlan kitaxtu xlakata «tlawanit pi putum namakgtayanan nakgantaxtu xtalakaskin» (Prov. 16:4). Chu tuku kitaxtu akxni wi tuku tlawa Jehová, ankgalhin makgapala. Wa xlakata, ¿tuku lakkaxwilinit Jehová natlawa chu tuku tlawanit xlakata namakgantaxti?

7. ¿Tuku tlawalh Jehová xlakata tlan xmakgantaxtilh xtalakaskin akxni Adán chu Eva nialh kgalhakgaxmatkgolh? (Mateo 25:34).

⁷ Dios kawanilh xapulana latamanin tuku xlakaskin pi xtlawakgolh: «Kakgalhitit lhuwa kamanan, kalhuwantit, kamalakgatsamatit katiyatni chu kakuentajtlawatit, kakakuentajtlawatit [...] putum tuku staknankgo» (Gén. 1:28). Xlikana pi akxni Adán chu Eva ni kgalhakgaxmatkgolh Dios, kamatitaxtinikgolh talakgalhin putum latamanin, pero uma ni tlawalh pi Jehová nialh xmakgantaxtilh xtalakaskin. Xla kajwatiya lakgpalilh la xʼama makgantaxti. Tunkun lakkaxwililh nawili akgtum Tamapakgsin kʼakgapun nema xʼama makgantaxti tuku xlakpuwanit xapulana xpalakata latamanin chu Katiyatni (kalikgalhtawakga Mateo 25:34). Akxni lakgchalh kilhtamaku, Jehová limasiyalh xtapaxkit chu makamilh xapuxku xKgawasa kKatiyatni. Jesús kalitachuwinalh latamanin xTamapakgsin Dios chu makamastalh xlatamat xlakata xkinkalakgmaxtun ktalakgalhin chu klinin. Alistalh malakastakwanika xlakata xlatamalh kʼakgapun chu xmapakgsinalh kxTamapakgsin Dios. Pero tlakg anan tuku tlan nalilakpuwanaw xlakata tuku lakkaxwilinit Dios natlawa.

8. 1) ¿Tuku tlakg xlakaskinka lichuwinan Biblia? 2) Chuna la wan Efesios 1:​8-11, ¿tuku atanu natlawa Jehová? (Kaʼakxilhti xmakni revista).

⁸ Wa uma tuku tlakg xlakaskinka lichuwinan Biblia: Jehová nalimasiya pi ni xlikana putum tuku limawakakanit akxni namakgantaxti tuku lakpuwanit xlakata Katiyatni chu nalimaklakaskin Tamapakgsin nema maxkinit Cristo. Ni anan tuku nalakxtlawa tuku Jehová lakkaxwilinit natlawa. Xla liwana kinkawaniyan pi namakgantaxti (Is. 46:​10, 11, notas; Heb. 6:​17, 18). Akxni titaxtunita nawan lhuwa kilhtamaku, Katiyatni akgtum paraíso nawan niku nalatamakgo xkamanankan Adán chu Eva tiku nalimasiyakgo pi xaʼakgstitum litaxtukgo. Xlakan nialh katikgalhikgolh talakgalhin chu nalatamakgo putum kilhtamaku (Sal. 22:26). Pero ni kajwatiya uma tuku Jehová lakpuwanit natlawa. Xla natlawa pi putum latamanin chu ángeles akgtum familia nalitaxtukgo chu kajwatiya xla xMapakgsinakan naliʼakxilhkgo chu nikxni katimakgxtakgkgolh (kalikgalhtawakga Efesios 1:​8-11). Lu kaks kinkamalakawaniyan chuna la Jehová namakgantaxti tuku lakkaxwilinit natlawa.

9. Akxni likgalhtawakgayaw Biblia, ¿tuku tlan katsiniyaw xlakata kilhtamaku nema aku mima?

⁹ Kalilakpuwaw tuku lichuwinalh Jehová kjardín xaʼEdén nema aku xʼama kgantaxtu chu tekgsaw kʼGénesis 3:15. b Anta lichuwinankan la xʼama kgantaxtu xtalakaskin Dios chu xʼama  kgantaxtu akglhuwa mil kata alistalh. Pulaktum tuku xʼama la, wa pi xkam puskat, Mesías, xʼama minacha kxfamilia Abrahán (Gén. 22:​15-18). Lhuwa kata alistalh, kkata 33 kkinkilhtamakujkan, Jesús makgnika chuna la xwankanit pi xʼama la (Hech. 3:​13-15). Chu tsankgajku liwaka 1,000 kata xlakata nakgantaxtukgo tuku lichuwinankanit pi nala chu namalakgsputukan Satanás (Apoc. 20:​7-10). Pero Biblia tlakg kinkawaniyan tuku nala akxni Jehová nina masputu nawan xkakilhtamaku Satanás.

10. 1) ¿Tuku nala nialh makgas kilhtamaku? 2) ¿Tuku kilitlawatkan xlakata nalakgtaxtuyaw? (Kaʼakxilhti nota).

¹⁰ Kalakapastakwi tuku lichuwinan Biblia pi nala nema kaks kinkamalakawaniyan. Pulana, kachikinin nawankgo: «¡Uku kgalhiyaw takaksni kkilatamatkan chu nitu kinkamakgapekuanan!» (1 Tes. 5:​2, 3). Lhuwa tapatin «kaj lakapala» natsuku, akxni kachikinin nakamasputukgo ni xaxlikana takanajla (Apoc. 17:16). Alistalh, max nala tuku latamanin nikxni akxilhkgonit kkakilhtamaku akxni «xKgawasa chixku» mima nawan «kxkgalhni puklhni chu nalimin xlitliwakga chu lhuwa lilanka» (Mat. 24:30). Jesús nakalakputsanani putum latamanin chu lakatanu nakawili tiku chuna la borregos likatsikgo chu alakatanu nakawili tiku chuna la cabras likatsikgo (Mat. 25:​31-33, 46). Ama kilhtamaku, Satanás wi tuku natlawa. Xlakata lu sitsinit nawan, nakamakgpuwantini lhuwa kachikinin nema Biblia kalimapakuwi Gog xalak xtiyat Magog, xlakata namasputuputunkgo xkachikin Jehová (Ezeq. 38:​2, 10, 11). Watiya uma kilhtamaku nakamamakxtumikan kʼakgapun tiku xatalaksakni. Anta akxtum natatawilakgo Cristo chu xʼángeles xlakata natalatlawanankgo kʼguerra xla Armagedón, chu chuna naʼakgasputa lhuwa tapatin (Mat. 24:31; Apoc. 16:​14, 16). c Chu alistalh, natsuku mapakgsinan Cristo Akgtum Mil Kata kxlikalanka Katiyatni (Apoc. 20:6).

11. ¿Tuku lakpuwana xlakata tlan nalatapaya putum kilhtamaku? (Na kaʼakxilhti dibujos).

¹¹ La uku kalilakpuwaw tuku nala tlakg alistalh. Biblia wan pi kiMalakatsukinakan kawilininit kxnakujkan latamanin pi «nalatamaputunkgo putum kilhtamaku» (Ecl. 3:11). Kalilakpuwanti la nawan milatamat chu la  tlakg tlan natalalipina Jehová. Libro Acerquémonos a Jehová, kpágina 319, wan: «Akxni latamanitaw nawan akglhuwa ciento kata, akglhuwa mil kata, akglhuwa millones kata o asta lhuwa mil millones kata, tlakg lhuwa tuku nakatsiniyaw xlakata Jehová nixawa tuku katsiyaw la uku. Pero maski chuna, naʼananku lhuwa tuku tlan nakatsiniyaw xpalakata Jehová. […] Max nila lilakpuwanaw la xlistlan nawan kilatamatkan kParaíso. Pero xliputum tuku natlawayaw anta, tuku tlakg tlan nawan wa pi chali chali tlakg natalakatsuwiniyaw Jehová». Chu xlakata nina chin uma kilhtamaku, ¿tuku atanu tema tlan nalakputsananiyaw kxTachuwin Dios?

12. ¿Tuku kilhchanima pi tlan laka’anaw kʼakgapun? Kalichuwinanti akgtum liʼakxilhtit.

¹² Xtachuwin Dios kinkamakgtayayan nalilakpuwanaw tsinu lilanka nema Jehová kgalhi «kʼakgapun anta kkatalhman» (Is. 33:5). Biblia lichuwinan tuku kaks malakawaninan xlakata Jehová chu xfamilia xalak akgapun (Is. 6:​1-4; Dan. 7:​9, 10; Apoc. 4:​1-6). Akgtum liʼakxilhtit, tlan likgalhtawakgayaw tuku akxilhli Ezequiel akxni «talakikgolh akgapun» chu Dios wi tuku tsukulh maʼakxilhni (Ezeq. 1:1).

13. ¿La makgkatsiya akxni lilakpuwana taskujut nema Jesús tlawama kʼakgapun? (Hebreos 4:​14-16).

¹³ Na kalilakpuwaw taskujut nema tlawama Jesús kʼakgapun chuna la Mapakgsina chu xalakgalhamana Sacerdote tiku tlakg kgalhi limapakgsin. Kalimaklakaskiw xtukuwani xlakata natlawaniyaw oración Jehová chu natalakatsuwiyaw «kxpumapakgsin Dios nema masta talakgalhaman nema ni anan xtachuna» chu kaskiniw xtalakgalhaman «kilhtamaku akxni xlilat» (kalikgalhtawakga Hebreos 4:​14-16). Chali chali kalilakpuwaw tuku tlawakgonit Jehová chu Jesús, chu tuku tlawakgo kimpalakatakan lata kʼakgapun. Tapaxkit nema kinkakgalhinikgoyan, xlitlawat pi xatapaxuwan naskujniyaw Jehová (2 Cor. 5:​14, 15).

14. ¿La tlan nalimasiyayaw pi kapaxtikatsiniyaw Jehová chu Jesús? (Na kaʼakxilhti dibujos).

 ¹⁴ Pulaktum la tlan nalimasiyayaw pi kapaxtikatsiniyaw Dios chu xKgawasa wa pi lu naliskujaw xlakata nakamakgtayayaw latamanin xtatayananin Jehová nalitaxtukgo chu nastalanikgo Jesús (Mat. 28:​19, 20). Wa uma tuku tlawalh apóstol Pablo xlakata xkapaxtikatsini Dios chu Cristo. Xla xkatsi pi xtalakaskin Jehová wa pi «putum latamanin liwana kalakgapaskgolh xaxlikana chu kalakgtaxtukgolh» (1 Tim. 2:​3, 4). Wa xlakata lu liskujli nalichuwinan Dios xlakata xkamakgtayalh lhuwa latamanin tlan xlakgtaxtukgolh (1 Cor. 9:​22, 23).

15. Chuna la wan Salmo 1:​2, ¿tuku nakinkamakgapaxuwayan?

¹⁵ Ni kaks kinkamalakawaniyan pi salmista wan pi chatum lataman tiku paxuwa chu tlan kitaxtuni wa tiku «lipaxuwa xlimapakgsin Jehová» chu «kakuwani chu katsisni likgalhtawakga xlimapakgsin chu lilakpuwan» (Sal. 1:​1-3). Chatum tiku matitaxti Biblia kʼatanu tachuwin, akxni xlichuwinama uma salmo, wa pi tiku likgalhtawakga Biblia «talakaskin lu nalakgati xtastakyaw Dios chu wa xlakata asta naputsa, naʼakgatekgsa chu ankgalhin wa nalilakpuwan». Chu wampara: «Lakpuwan pi akxni ni liwana akgatekgsa tuku lichuwinan Biblia, kaj paxkat tlawama xkilhtamaku» (Studies in the Psalms, Joseph Rotherham). Wix na lu nalipaxuwaya akxni nalikgalhtawakgaya Biblia komo lu naliskuja liwana naʼakgatekgsa putum tuku lichuwinan chu naʼakxilha la latatalakxtumi pulakatunu pulakatunu tuku masiya. ¡Lu nalipaxuwayaw komo liwana nalakputsananiyaw xTachuwin Dios!

16. ¿Tuku nalichuwinanaw kʼatanu artículo?

¹⁶ Kimputumkan tlan naʼakgatekgsaw tuku lu tlan kinkamasiyaniyan Jehová kxTachuwin. Kʼatanu artículo, nalichuwinanaw pulaktum tuku tlakg tuwa masiya Biblia: lanka xtemplo Jehová xaʼespiritual, nema Pablo lichuwinalh ktatsokgni nema kamalakgachanilh hebreos. Kimputumkan lu nalipaxuwayaw akxni tlakg nalakputsananiyaw uma.