1, 2. ¿Néna sánderu sési jarhaski arhintani ka estudiarini Bibliani? Uanda je ejemplu ma.

 ERANHASKA je eskajtsï uékaxaka kʼumanchikua ma piáni. ¿Ambejtsï jatsiski para úni ante dejtsï piáni? ¿Piápirintsï engajtsï nomasi fotu ma exepiringa? ¿A no eskajtsï sánderu tsitipirini nirani exeni? Jamberijtsï uékapiringa exeni na enga jáxeka uérakisï, kuartuecharhisï inchani ka sésesi exeni iápurisï. ¿A no eskajtsï uékapiringa planuechani jamberi exeani parajtsï míteni na enga úkata jaka? Seguruchi jarhaska eskajtsï uékapiringa méntku iámindu ambe míteni inde kʼumanchikueri.

² Uaakachi májkueni úni engachi arhintani jauaka ka estudiarini Bibliani. Acheeti ma enga Biblieri ambe mítekuka uandasïndi eska ambe enga Biblia uandajka ísïiska eska “k’éri edifisiu ma enga iauani inchatsekurhitini jatsiaka pítsekuechani”. ¿Ka ambechi uaa úni parachi sési míteni ambe enga uandajka Biblia? Engachi uiriakuarhu arhintaska, imani ambejkuchisï jorhenguarhiaka “enga ma orheta ueenajka jorhenguarhini ambe enga Tata Diosï uandajka” (Ebr. 5:12). Ísï eskachi na jánguarhintajka exeni kʼumanchikuani ma, ístu uétarhisïndi eskachi sési jorhenguarhiaka Bibliani. Ka parachi sési estudiarini Bibliani uétarhisïndi eskachi exeaka na enga iámindu Biblia terukuntajka. Ísï jimbo, no solu uétarhisïndi míteni ambe engachi jakajkujka, sino ístu jatsiskachi para míteni andichisï jakajkujki indeni ambe.

3. ¿Ambe arhiaspi apostoli Pablu kristianuechani eskaksï jatsispka para úni, ka andi? (Éfesu 3:​14-19).

³ Parachi sésimindu kurhanguni Tata Diosïiri Uandakuani jatsiskachi para jorhenguarhini ima ambe enga úkua jukaka. Apostoli Pablu arhiaspti iámindu kristianuechani eskaksï jánguarhintapiringa estudiarini Tata Diosïiri Uandakuani parakaksï úpiringa “sésimindu kurhanguni na enga xáni kóskaka, na enga xáni ióskaka, na enga xáni iótaka ka na enga xáni jauanhika jurhimbikua ambe”. Engaksï ísï úpiringa, ʻsési jupikuarhitinksï japirindi ka sési uaxastakataʼ (arhinta je  Éfesu 3:​14-19). Juchajtuchi jatsiska para májkueni úni. Ju je exeni ambe engachi uaaka úni parachi sésimindu kurhanguni Tata Diosïiri Uandakuani.

4. ¿Ambechi uaa úni parachi sánderu andarhierani Tata Diosï Jeobani? Uandaa je máru ejempluechani.

⁴ Kristianuechachi no jatsiska para konforme jarhani imani ambejku míteparini enga ma ueenakuarhu jorhenguarhijka Biblieri ambe. Uékasïngachi míteni imani ambe “enga Tata Diosïiriika ka enga jískakata jaka” ka espiritu santujtsïni jarhuataati ísï úni (1 Kor. 2:​9, 10). ¿Andijtsïsï no eratsejki imani ambe jorhenguarhini engaksïni jarhuataaka sánderu andarhierani Tata Diosï Jeobani? Uaakajtsï uánikua ambe jorhenguarhini. Pori ejemplu, uaakajtsï jirinhantani na enga Tata Diosï Jeoba ióntki xarhatakuapka imeeri jántspiriichani eska xénchasïreenga ka na enga inde ambe xarhatajka eskaksïni ístu xénchasïnga chánksïni. Ístujtsï úpiringa estudiarini ambe enga Tata Diosï Jeoba uaxastapka paraksï israeliteecha kómarhini ka terukutantani na engachi kómarhijkia iásï Tata Diosï Jeobani. O ístujtsï uaaka sési estudiariuani imani profesiechani enga Jesúsi kumpliriuaka jiáni enga ixú Echerirhu japka ka ístu enga aianhpini jámani japka.

5. ¿Náki temantsï tsitipirini inbestigarini engajtsï Biblieri ambe estudiarini jauaka?

⁵ Máru erachiicha engaksï tsitijka sési estudiarini Biblieri ambe uandasptiksï máru ambe engaksï tsitipiringa sánderu sési estudiarini. Rekuadrurhu “ Temeecha engajtsï uaaka estudiariuani”, uandasïndiksï máru ambe engaksï imeecha uandapka. Seguru eskajtsï chá kánikua tsitiaka estudiariuani indeni temeechani úraparini Índice de las publicaciones Watch Tower ka Jarhuajperata paraksï Jeobaeri testiguecha estudiarini. Engajtsï inbestigariiska, jarhuataatiksïni parajtsï sánderu mintsikani Tata Diosïni ka uaakajtsï exentani “Tata Diosïiri mímixekuani” (Prov. 2:​4, 5). Iásï ju je exeni máru ambe enga Biblia uandajka enga jurhimbikua ambeeka ka engachi uaaka sési estudiarini.

6. a) Uanda je ejemplu ma enga xarhatajka eska Tata Diosï Jeoba méntkisï kumplirisïnga ambe enga eratsekata jatsika. b) ¿Andichisï uandajki eska ambe enga Tata Diosï Jeoba eratsetini jatsika para kʼuiripuecha ka Echeri jindeeska para méntkisï? (Éfesu 3:11).

⁶ Pori ejemplu, ju je exeni ambe enga Biblia uandajka ima ambeeri enga Tata Diosï eratsetini  jaka úni. No májkueniisti uékani úni ambe ma ka eratsekata jatsini úni ambe ma. Ju je eratsentani ini ambe, eranhaska je eskajtsï chá uékasïnga niárani ireta ma jimbo, perujtsï exesïnga eska xanharurhu anhatapu ma uekorheska ka eskajtsï no uaaka jimeesïsï nitamani, perujtsï chá eratsekata jatsiskia imani lugari jimbo niárani, ísï jimbo máteru xanharu jimbojtsï nirasïnga parajtsï úni iretarhu niárani. Tata Diosï Jeoba ʻméntkisï ísï eratsekata jatsisptiaʼ ambe enga úpiringa, ka kánikuachi agradesidu jarhaska imani jingoni, jimboka Bibliarhu, imajtsïni sánhani arhiska aianguni ambe enga uaaka (Éfes. 3:11). Ka Tata Diosï Jeobani méntkisï sési uérakusïndi iámindu ambe jimboka “ima úska iámindu ambe paraka úkuarhiaka ambe enga ima eratsetini jaka” (Prov. 16:4). Ka ambe enga Tata Diosï Jeoba újka, jindeesti para méntkisï. Peru, ¿ambe eratsetixaki úni Tata Diosï Jeoba, ka ambe xáni mójtakuskia paraka úkuarhiaka inde ambe?

7. Engaksï Adáni ka Eba no kurhandirapka, ¿ambe ménderueni úspi Tata Diosï Jeoba para úni ambe enga eratsetini japka kʼuiripuecha jingoni? (Mateu 25:34).

⁷ Tata Diosï Jeoba arhispti orheta temungurhirini ambe enga eratsetini japka úni imeecha jingoni, arhiaspti: “Kánguarhia je sapiichani, ka uánikua úkuarhi je, ka uinira je echerini ka ánchita je, ka juramukua je […] iámindu animaliichani engaksï echerirhu jámajka” (Gén. 1:28). Ísïisti, Adáni ka Eba nóksï kurhajchaspti Tata Diosï Jeobani ka indeni ambe jimbo iámindu kʼuiripuechaksï pekadoriisti, peru inde ambe no ústi eska Tata Diosï Jeoba nóteru uaakia ambe enga eratsetini jaka úni. Ima uaati ambe enga eratsetini jaka, joperu iásï ménderuenia. Jiáni engaksï Adáni ka Eba no kurhandirapka, Tata Diosï jirejiresï uandaspti eska Reinu ma uaxastapiringa auandarhu paraka úkuarhipiringa ambe enga ima eratsetini japka ueenakuarhu kʼuiripuecha jingoni ka Echerini jingoni (arhinta je Mateu 25:34). Tiempu jingoni, Tata Diosï Jeoba xarhataspti na engajtsïni xáni xénchajka ka axaspti imeeri máechakua Uájpani ixú Echerirhu. Jesúsi aianguaspti kʼuiripuechani Tata Diosïiri Reinueri ambe ka íntspispti imeeri tsípikuani parajtsïni pʼímutantani pekadueri ka uarhikueri. Tátsekua tsíntaspti para auandarhu irekani ka juramuni komu Rei Tata Diosïiri Reinurhu. Joperu jarhasti sánderu ambe engachi uaaka eratsentani ima amberi enga Tata Diosï eratsetini jaka úni.

8. a) ¿Ambe sánderu amberi uandasïni Biblia? b) Eska na arhijka Éfesu 1:​8-11, ¿ambe máteru ambe uaa Tata Diosï Jeoba? (Exe je dibujuni enga ueenakuarhu jaka i rebistarhu).

⁸ I ambesï sánderu uandajti Biblia: Tata Diosï Jeoba pímbinhajkuntaati imeeri nombrini jiáni enga uaaka ambe enga eratsetini jaka úni echerirhu, úraparini imeeri Reinuni enga juramuti jindeeka tata Jesukristu. No ma ambe uaati úni eska no ísï úkuarhiaka. Ima mismu uandasïndi eska ísï uaaka (Is. 46:​10, 11, noteecha; Ebr. 6:​17, 18). Tiempu jingoni Echeri paraisu máeuati, nani engaksï Adáni ka Eba uájpeecha perfektueuaka, sésiksï jámaati ka irekaatiksï para méntkisï (Sal. 22:26). Ka no inde ambejkuesti ambe enga Tata Diosï Jeoba eratsetini jaka úni, ima uaati eskaksï iáminduecha engaksï auandarhu irekaka ka Echerirhu, familia máeuaka engaksï májku kʼéri jauaka ka jiáni iáminduechaksï jiókuarhiati eska Tata Diosï Jeoba jindeeska Sánderu Kʼéri Juramuti (arhinta je Éfesu 1:​8-11). ¿A no eskajtsïni ísku pakatasïnga na enga Tata Diosï Jeoba kumplirini jaka ambe enga ima eratsetini jaka?

9. Engachi arhintaska Bibliani, ¿ambe ka ambechi uaa míteni ima amberi enga sánderu orhepatini úkuarhiaka?

⁹ Ju je eratsentani imani profesiani enga Tata Diosï Jeoba uandapka jardini de Edénirhu ka enga Génesis 3:15 jimbo jaka. b Jimini uandasïndi ambe enga xáni úkuarhipiringa paraka niáraaka kumplirikuarhini ambe enga Tata Diosï Jeoba eratsekata jatsika, joperu inde ambe uánikua uéxurhini tátsekua úkuarhipirindi. Pori ejemplu, i profesia uandasïndi eska Mesíasi Abraániiri sïrukua jimbo jupiringa (Gén. 22:​15-18). Ka uéxurhini 33 jimbo, Jesúsinksï irandurakuarhu ataspti,  ísï eska na uandapkia profesia (Úku. 3:​13-15). Ka útasï jukari 1,000 uéxurhini kuerataxati paraka kumplirikuarhiaka últimu parti profesieri enga uandajka eska Satanási éjpurhu tʼauajtsïkunhaaka (Apok. 20:​7-10). Joperu Biblia útasï uandasïndi eska uánikua máteru ambe úkuarhiaka ante de Tata Diosï Jeoba kʼamajkuni Satanásiiri parhakpinini.

10. a) ¿Ambe úkuarhia no ióni jimbo? b) ¿Nénachi uaa prepararini juchaari eratsekuani ka juchaari mintsitani? (Exe je notani).

¹⁰ Ju je miántani ambe enga xáni Biblia uandajka eska úkuarhiaka. Ueenani jámani, nasionichaksï uandaati “¡Iásï kʼóru sési jánhaskuarhixatiia ka nóteruchi uandanhiaxakaia!” (1 Tes. 5:​2, 3). Ima tiempu enga kánikua no sési nitamakuarhinhaaka, “ma repentku” ueenakuarhiati jiáni engaksï nasionicha kʼamajkuauaka iámindu relijioni no jurhimbitiichani (Apok. 17:16). Tátsekua, enga ‘Uájpa acheetiiri auandarhu anapu nubeecharhisï jurhani jauaka iámu imeeri uinhapikua jingoni’, jamberi úkuarhiati ambe engachi no méni exeni jaka (Mat. 24:30). Jesúsi jusgariuauati iámindu kʼuiripuechani ka támu peerauati imeechani engaksï ísïika komueska karichicha ka imeechani engaksï ísïika komueska chibuecha támu peerauati (Mat. 25:​31-33, 46). Joperu Satanási no xántkisï pakaraati. Kánikua ikiaparini uaati eska grupu ma nasionicheeri, enga Biblia arhijka eska arhikuarhisïnga Gog enga Magog anapu echerirhu anapueka, ueenaka no sési kámani Tata Diosï Jeobaeri iretani (Ezeq. 38:​2, 10, 11). Ima tiempuni jimbo, ima erakukateecha engaksï Echerirhu pakarani jauaka pánhaatiksï auandarhu. Jimaksï májku kʼéri úkuarhintaati Jesúsini jingoni ka imeeri ejersituni jingoni paraksï Armajedonirhu uarhipeni ka jiáni kʼamakurhiati inde tiempu (Mat. 24:31; Apok. 16:​14, 16). c Tátsekua kʼória Kristu ueenaati juramuni Mili Uéxurhini Echerirhu (Apok. 20:6).

11. ¿Andisï ambakiti ambe para chá irekani para méntkisï? (Ístu exea je imajeniichani).

¹¹ Iásï ju je exeni ambe enga xáni úkuarhiaka enga na nitamaakia Mili Uéxurhini. Biblia uandasïndi eska juchaari Kuerajpiri ‘úska eska kʼuiripuecheri mintsita uékaaka irekani para méntkisï’ (Ecl. 3:11). ¿Eranhaskasïntsï na enga xáni ambakiti ambeuaka para chá ka na engaksïni xáni jarhuataaka parajtsï sánderu sési pájperani Tata Diosï Jeoba jingoni? Libru Acerquémonos a Jehová, pájina 319, i ambe uandasïndi engajtsïni ísku  pakatajka: “Jiáni engachi irekaakia sieni, mili, o sánderu uánikua uéxurhiniicha jimbo, sánderuchi uánikua ambe míteakia Tata Diosï Jeobaeri ambe ka eska iásï. Joperuchi útasï uánikua ambe kueratani jauaka míteni imeeri ambe. […] Nóchi úsïnga ni sikiera eranhaskani na enga xáni ambakiti ambeuaka irekani para méntkisï ka na engachi xáni mámaru ambe uaaka úni Paraisurhu. Joperu sánderu ambakiti ambe jindeuati eskachi pauani pauani uaaka sánderu andarhierani Tata Diosï Jeobani”. Enga jamberi niáraaka inde jurhiatikua, ¿ambe máteru ambechi uaa estudiarini Tata Diosïiri Uandakueri ambe?

12. ¿Nénachi uaa auandarhisï erancheni? Uanda je ejemplu ma.

¹² Tata Diosïiri Uandakua jarhuatasïndijtsïni parachi jucha úni jánhaskani sáni na enga xáni kʼéri ambeeka Tata Diosï Jeoba jini “karhakua auandarhu” (Is. 33:5). Biblia ambakiti ambejtsïni aiangusïndi Tata Diosï Jeobaeri ambe ka ístu imeeri organisasioniri ambe enga auandarhu jaka (Is. 6:​1-4; Dan. 7:​9, 10; Apok. 4:​1-6). Pori ejemplu, úsïngachi jorhenguarhini ima xáni ambakiti ambeeri enga Esekieli exepka jiáni “enga auanda mítakuarhepka” enga ima ueenapka “exeani bisioniichani Tata Diosïiri ambe” (Ezeq. 1:1).

13. ¿Nénajtsï pʼikuarherasïni engajtsï eratsentajka ambe enga xáni uaaka Jesúsi auandarhu? (Ebreu 4:​14-16).

¹³ Ju je ístu eranhaskani ambe enga xáni uaaka Jesúsi auandarhu komu Rei ka K’éri Saserdoti ma enga pʼamojpitiika. Jesúsini jimbo úsïngachi kómarhikua jimbo andarhierani “Tata Diosïiri kʼéri uaxantskuani [...] enga kánikua kóntpintajka” ka kurhakuni eskajtsïni pʼamojkuaka “jiáni engachi uétarhinchani jauaka eskajtsïni jarhuataaka” (arhinta je Ebreu 4:​14-16). Pauani pauanchi jatsiska para eratsentani imani ambe engaksï xáni úkia Tata Diosï Jeoba ka Jesúsi ka ambe engaksï útasï úni jaka juchantsïni jimbo auandarhu uératini. Na engajtsïni xáni xénchajka, jatsipirindi parajtsïni mintsitarhu niáracheni ka úni eskachi tsípikua jingoni marhuakuaka Tata Diosï Jeobani (2 Kor. 5:​14, 15).

14. ¿Nénachi uaa xarhatani eskachi kánikua agradesidu jarhaska Tata Diosï Jeobani jingoni ka ístu Jesúsini jingoni? (Ístu exea je imajeniichani).

 ¹⁴ Ma ambe engachi uaaka úni para xarhatakuni Tata Diosï Jeobani ka Jesúsini eskachi kánikua agradesidu jarhaska, jindeesti jánguarhintani para jarhuataani máteru kʼuiripuechani paraksï Jeobaeri testigu úkuarhini ka Jesúsiiri chúxapatiinksï (Mat. 28:​19, 20). Indeni ambesï úpti apostoli Pablu, jimboka ima kánikua agradesidu jarhaspka Tata Diosï ka Kristu jingoni. Ima mítespti eska Tata Diosï Jeoba uékasïnga eska “iámindu jásï kʼuiripuecha pʼímutanhantaaka ka eskaksï niáraaka sési míteni jurhimbikua ambe” (1 Tim. 2:​3, 4). Jimbosï apostoli Pablu kánikua jánguarhintapti aianhpini para jarhuatani xáni uáni kʼuiripuechani enga úpiringa ka ísï úni “pʼímutantani máru” (1 Kor. 9:​22, 23).

15. Eska na arhijka Salmo 1:​2, ¿ambe úsïni eskachi sési jimbo tsípiaka?

¹⁵ Nójtsïni ísku pakatasïndi enga salmista uandapka eska enga ma kʼuiripu tsípikua jingoni irekajka ka enga iámindu ambe sési uérakujka, jindeesti jimboka “tsípikuarhisïn[ga] Tata Diosï Jeobaeri leini jimbo ka “jurhiakua ka chúrikua arhintasïndi imeeri leini ka eratsentasïndi ambe enga arhintajka” (Sal. 1:​1-3). Biblieri traduktori ma uandaspti eska ima enga arhintajka Bibliani, jatsiska para “tsitiani Tata Diosïiri konsejuechani, jirinhantaani, jorhenguarhiani ka eratseantani”. Ka ístu uandaspti: “Enga ma jurhiatikua no arhintaska Tata Diosïiri Uandakuani ísku tiempu tsïtasti ima jurhiatikua” (Studies in the Psalms, Joseph Rotherham). Chájtujtsï uaaka tsitini Biblieri ambe jorhenguarhini engajtsï jánguarhintaska kurhanguni iámu ima ambe enga jukaparhakueka ka exeni na enga xáni sési terukuntajka iámu ambe Bibliarhu. ¡Kánikua ambakiti ambeesti sési estudiarini ambe enga xáni arhijka Tata Diosïiri Uandakua!

16. ¿Ambechi exeni jaua máteru jorhenguarhikua jimbo?

¹⁶ Iáminduechachi uaaka kurhanguni ima ambakiti ambe engajtsïni Tata Diosï Jeoba jorhendajka imeeri Uandakua jimbo. Máteru jorhenguarhikuani jimbo, exeni jauakachi ambe ma enga kánikua jukaparhakueka para kurhanguntani: Tata Diosï Jeobaeri kʼéri templueri ambe, enga Pablu uandapka imeeri kartarhu enga karakuapka kristianuechani engaksï ebreu uandeenga. Seguruchi jarhaska eskachi kánikua tsitiaka estudiarini i temeeri ambe.