1-2. Panganidzai kuti ngaupi mushobo wakanaka we kuerenga uye kufunda Bhaibheri?

 CIMBORANGARIDZAI kuti muri kuda kutenga nyumba, imwimwi maizopfarira kuona nyumbeyo musati maripa here kana kuti maizoda basi kuona foto yakabviswa ngece mberi ke nyumba? Zvezvirokwazvo imwimwi maizoenda panyumbepo moringira makwartu ese uye monyasa kuona magarire ayo. Pamweni maizopfarirazve kuona pranta yo nyumbeyo kuti muone kuti yakawakwa kudini. Apana mubvunzo kuti imwimwi maizopfarira kuona ciro cese ciri panyumbepo musati maitenga.

² Tingaitawo zvimwezvo patinonga tecierenga uye kufunda Bhaibheri. Mutari umweni wakaezanisa masoko e Bhaibheri “no predhiyo yakakura, yakareba maningi uye yakawakwa pa fundasau yakabamba.” Hino tingaitei kuti tinyase kuziya Bhaibheri? Kana tikaerenga Bhaibheri tisikakwarakwatisi, pamweni tingatokwanisa kuzwisisa zviro zvinganani—“zviro zvekutanga zvematarhwa macena a Mwari.” (Aheb. 5:12) Hingana zviya zvamaizoita, kuenda koona “mukati” me nyumba musati maitenga, imwimwi munodikana kufunda Bhaibheri makangwarira kuti munyase kurizwisisa zvakanaka. Umwe we mushobo wekufunda Bhaibheri, ngewe kuona kuti matii aro akabatana kudini no amweni. Petai masimba kuti musagume basi pakuzwisisa zvokwadi zvamunotenda, asi muziyewo kuti ngei imwimwi mecizvitenda.

3. Muphostori Pauro wakabvunzei Akristu uye ngei wakaabvunza izvona? (Aefeso 3:14-19)

³ Kuti tinyase kuzwisisa Soko ra Mwari no zvese zvatinogumira mariri, tinodikana kufunda zvokwadi zvakadzika zve Bhaibheri. Muphostori Pauro wakabvunza hama dzake kuti dzifunde Soko ra Mwari dzakangwarira kuti anyase kukwanisa “kuzwisisa zvinozwi kupamhama, kureba, kukura no kudzika” ke cokwadi. Nge kuita izvi, awona aizokwanisa kugara “akadzika midzi uye  akabamba” mu kutenda kawo. (Erengai Aefeso 3:14-19.) Uye isusu tinodikanawo kuita zvimwezvo. Zvino, ticaona kuti tinganyasa kudini kufunda Soko ra Mwari kuti tinyase kukhorovhera upfumi watinogumira mariri.

4. Tingaitei kuti tirumbwe tecikhwedera dhuze na Djehovha? Pasai muezaniso.

⁴ Hingana Akristu, isusu atidi basi kuzwisisa zviro zvekutanga zve Bhaibheri. No rubetso ra Djehovha, isusu tino cidaka-daka cekuda kufunda “kutobatanidzawo zviro zvakadzika zva Mwari.” (1 Ako. 2:9, 10) Munoona kudini ngezvekutanga urongwa we fundo ye munhu ega kuti murumbwe mecikhwedera dhuze na Djehovha? Ngo muezaniso, imwimwi mungakwarakwatisa zvakawanda ngezve mushobo wa Djehovha waakapangidza rudo rake ku aseenzi ake e kare uye kuti izvona zvinopangidza kudini kuti iyena anomudai. Uye imwimwi mungakwarakwatisawo kuti kunamata Djehovha mu nguwa ye Aisraeri kainga kakarongwa kudini uye kuti Djehovha anoda kuti timunamate kudini mazuwa ano. Kana kuti pamweni imwimwi mungafunda zviro zvakawanda zvakaringana no uphorofiti wakadzadziswa na Djesu paainga ari pa nyika pano.

5. Pano nyaya dzamunoda kufunda mecikwarakwatisa zvakadzika here?

⁵ Hama dzimweni dzinopfarira maningi kufunda Bhaibheri, dzakapanganidza zviro zvinganani zvaanopfarira kufunda ecikwarakwatisa zviro zvese. Imwimwi mungakwanisa kuona zviro zvinganani zvakhona zvaakabhuya pa kwadru yakazwi: “ Urongwa Wekuita Fundo ye Munhu Ega.” Imwimwi mungaseenzesa Índice das Publicações da Torre de Vigia kana kuti Bhuku Rinobatsira Zvapupu zvaJehovha Pakutsvakurudza. Mu maferamenta aya, imwimwi mucaona kuti awona anoita kuti fundo yenyu ipfadze. Kuita fundo ii yakadzika ye Bhaibheri, kungamubetsera kuti mubambise kutenda kenyu uye “mugumira ruziyo ra Mwari.” (Zvie. 2:4, 5) Zvino, ngatione zvokwadi zvinganani zvakadzika zve Bhaibheri zvamungaedza kukwarakwatisa.

6. (a) Musiyano upi uripo pakati pe urongwa no cinangwa? (b) Ngei tingabhuya kuti cinangwa ca Djehovha ku anhu uye ku nyika cinogara “nokusikaperi”? (Aefeso 3:11)

⁶ Ngo muezaniso, onai zvinorekethwa no Bhaibheri ngezve cinangwa ca Mwari. Pano musiyano wakadjeka pakati pe urongwa no cinangwa. Rangaridzai kuti imwimwi muri kuda  kuita rhwendo. Isusu tingaezanisa urongwa no gwanza ramucaseenzesa kuti mugume kamuri kuenda. Urongwa wenyu ungakwanisa kuposha ngekuti nge ndaa yecikonzero cimweni gwanza rinonga rakafungwa. Nge dii rimweni, cinangwa cingaezaniswa no mbuto yamuri kuda kuguma. Imwimwi munonyasa kuziya kamuri kuda kuenda, asi mungakwanisa kuseenzesa makwanza akasiyana-siyana kuti mugumeyo. Imwimwi mungakwanisa kucinja zviro maererano no zvinodiwa. Isusu tinotenda maningi Djehovha ngokutipanganidzira padoko no padoko “cinangwa cake cisikaperi” ciri mu Bhaibheri. (Onai masoko e pasi mu bhuku ra Aefeso 3:11.) Azvinei no mushobo waanoseenzesa, Djehovha nguwa dzese anokwanisa kuita zvaanoda ngekuti iyena “anoita zvese zvinobetsera pakudzadzisa cinangwa cake.” (Zvie. 16:4) Uye zvese zvinoizwa na Djehovha zvinogara nokusikaperi. Asi cinangwa ca Djehovha ngacipi uye zvinyi zvaakagadzirisa kuti adzadzise cinangwa ici?

7. Mumasure me kuti Adhamu na Evha apanduka, Djehovha akaita cinjo dzipi pa cinangwa cake? (Mateu 25:34)

⁷ Djehovha akabvunza kazado yekutanga kuti cinangwa cake cainga ciri cipi kaari. Iyena akaabvunza kuti: “Baranai muwande, mudzadze nyika uye muitonge . . . onererai zvinyama zvese zvinorarama zvinohamba panyika.” (Gen. 1:28) Nge ndaa yemusikazwa wa Adhamu na Evha, anhu ese akagara ashaishi. Asi izvona azvizi kuita kuti cinangwa ca Djehovha cicinje. Iyena akacinja basi mushobo wekudzadzisa cinangwa cake. Ciriporipoco, Djehovha akasanangura kugadza Umambo wekudenga kuti udzadzise cinangwa cake cekutanga ku anhu uye ku nyika. (Erengai Mateu 25:34.) Nge rudo, panguwa yakasisira, Djehovha akatumira Mwana wake akabarhwa ari umwe ega kuti auye pa nyika. Nge mushobo uu, Djesu aizofundisa anhu ngezve Umambo uye kupasa upenyu wake kuti aasudzunure pacitema no rufu. Pedzepo, Djehovha akamutsa Djesu kuti ahwirire kudenga kuti azotonge hingana Mambo we Umambo wa Mwari. Asi kunze ka izvi, kune zviro zvakawanda zvamunganyasa kurangarira ngezve cinangwa ca Mwari.

8. (a) Cinyi cinonyanya kurekethwa mu Bhaibheri? (b) Maererano na Aefeso 1:8-11, ngacipi cinangwa cikuru ca Djehovha? (Onai foto ye pa kapa.)

⁸ Ciro cinonyanya kurekethwa mu Bhaibheri, cakaringana no kuceneswa ke zina ra Djehovha. Izvi zvicaitika paanonga ecidzadzisa cinangwa cake pa nyika eciseenzesa Umambo wake wecitungamirirhwa na Kristu. Cinangwa ca Djehovha acicinjiki. Djehovha akagondesa kuti zviro zvese zvicaitika nge mushobo waakareketa. (Isa. 46:10, 11, masoko e pasi; Aheb. 6:17, 18) Nokuhamba ke nguwa, nyika icacinja kuti igare paraizo uye abarirhwana akakwana a Adhamu na Evha anonga ari anatsi “acararama nokusikaperi.” (Pis. 22:26) Asi Djehovha ano zviro zvakawanda zvaanoda kutiitira. Cinangwa cake cikuru ngece kuti aseenzi ake ese, kudenga no pa nyika amunamate akabatana. Nge mushobo uu, ese aizogara akagondeka uye aizozwira Djehovha hingana Mukuru-Mukuru we nyika yese. (Erengai Aefeso 1:8-11.) Imwimwi amushamisiki here pamunoona mushobo unoizwa na Djehovha kuti adzadzise cinangwa cake?

9. Fundo ye Bhaibheri, inotitora dakara papi mune ramangwana?

⁹ Onai uphorofiti wakarekethwa na Djehovha mu munda we Edheni hinga zvinopanganidzwa pana Genesi 3:15. b Iyena akareketa ngezve zviro zvaizoitika pakudzadzisa cinangwa cake. Asi zviro izvona zvaizotanga kuitika paa padarika mamirionji e makore. Ngo muezaniso, Djehovha akabvunza Abrahamu kuti mumasure me mibarirhwana yakawanda, umwe we mubarirhwana  wawo waizogara Kristu. (Gen. 22:15-18) Hino, mu gore ra 33 K.A. Djesu akakuwadzwa cisisino hinga zvakabhuiwa no uphorofiti. (Zvii. 3:13-15) Dii rekupedzesera re uphorofiti uu kana kuti musoro wa Sathani paucatsakatiswa, zvicaitika basi pakupera kekutonga ke makore 1000. (Zvak. 20:7-10) Uye Bhaibheri rinoreketa ngezve zviro zvicaitika kana pakaoneka uzondi pakati pe nyika ya Sathani uye pe sangano ra Djehovha.

10. (a) Cinyi cicaitika mbai-mbai pano? (b) Tingagadzirira kudini ndangariro dzedu uye mwoyo wedu? (Onai masoko e pasi.)

¹⁰ Rangaridzai ngezve zviitiko izvi zvinoshamisa zviri kurekethwa no Bhaibheri. Kutanga, madzinza acakhuwa eciti: “Runyararo no kucengeteka!” (1 Ate. 5:2, 3) Pedzepo, “asikakariri,” dambudziko guru ricatanga madzinza paacarhwisa magereja ekunyepa. (Zvak. 17:16) Mumasure mazvo, munguwa yekuti “mwana we munhu acauya mu makore e kudenga no simba uye no rukudzo rikuru,” pamweni ticaona zviro zvisati zvakamboitika pa nyika. (Mat. 24:30) Hino Djesu acatonga anhu eciparadzanisa mabira no mbudzi. (Mat. 25:31-33, 46) Kunyazi zvakadaro, Sathani aazohwiriri sure. No uzondi wakakura, iyena acaita kuti madzinza abatane kuti arhwise aseenzi a Mwari. Bhaibheri rinodainza kurhwisa uku hingana Gogi we nyika ye Magogi. (Ezek. 38:2, 10, 11) Panguwa imweni, akadzodzwa anonga aciri pa nyika, acatorhwa kuti aende kudenga. Ari ikona pamwepo na Djesu uye no cikwata cake ce anyahondo, acarhwa pa hondo ye Amagedhoni dii rekupedzesera re dambudziko guru. c (Mat. 24:31; Zvak. 16:14, 16) Mumasure me izvi, Kutonga ka Kristu ke Makore 1000 kucatanga pa nyika.—Zvak. 20:6.

11. Munozwa kudini pamunorangarira kuti mucararama nokusikaperi? (Onaiwo foto.)

¹¹ Cimborangaridzai padoko kuti zviro zvinonga zvakadini mumasure me makore 1000. Bhaibheri rinobhuya kuti Musiki wedu akatokanda “nguwa isikaperi mu mwoyo” medu. (Mup. 3:11) Makamborangaridza here kuti izvi zvinoreyei kamuri uye no ushamwari wenyu na Djehovha? Bhuku ra Swedera Pedyo naJehovha, pajina 319, rinoita kuti tigare nocidaka-daka cekuda kuziya, rinoenderera reciti: “Mumasure mekurarama  zana, zviuru, mamiriyonji, kutobatanidzawo mabhiriyonji e makore ticaziya zvakawanda ngezva Djehovha kudarika zvatinoziya zvino. Asi ticarumbwa tecindozwa kuti kuno zviro zvinoshamisa zvisikaerengeki zvinodikanwa kufundwa. . . . Upenyu usikaperi unonga wakapfuma no zviro zvisikarangaridziki uye no zviro zvakasiyana-siyana. Uye, kukhwedera dhuze na Djehovha kucarumbwa kecigara cikomborero cakakura kupinda zviro zvese mu upenyu.” Asi tecietsera kuti zviro izvi zviitike, ngazvipi zvimweni zvatingakwanisa kuona patinonga tecifunda Bhaibheri?

12. Tingaringira kudini kudenga? Pasai muezaniso.

¹² Bhaibheri rinotibvunza zviro zvinganani zvakaringana no kugara pa mberi pa Djehovha kana kuti “kumusoro-soro.” (Isa. 33:5) Bhaibheri rinopanganidza zviro zvinoshamisa ngezva Djehovha no zve dii rekudenga re sangano rake. (Isa. 6:1-4; Dha. 7:9, 10; Zvak. 4:1-6) Ngo muezaniso, isusu tingaerenga ngezve zviro zvinoshamisa zvakaoniwa ndi Ezekiyeri pa nguwa yekuti “matenga akafununguka uye [iyena] wakatanga kuona zviono zva Mwari.”—Ezek. 1:1.

13. Hinga zvinopanganidzwa pana Ahebheru 4:14-16, munozwa kudini pamunoziya zviro zviri kuizwa na Djesu ari kudenga?

¹³ Rangaridzaiwo ngezve zviro zviri kuizwa na Djesu ku denga hinga Mambo wedu uye Mupristi Mukuru. Iyena anonyasa kuziya mazwiro edu. Nge ndaa ya Djesu, isusu tinokwanisa kukhwedera “pacigaro ce Umambo ce nyasha dza Mwari” teciseenzesa munamato uye kukumbira rurekerero re zvishaishi zvedu uye rubetso pa “nguwa yakasisira.” (Erengai Ahebheru 4:14-16.) Musasiye kuti zuwa ridarike musikazi kurangaridza ngezve zviro zvese zvakaizwa na Djehovha uye na Djesu uye zviro zvaaciri kutiitira ari kudenga. Rudo rawo katiri rinodikana kutibaya mwoyo uye kutikohomedzesa kuti tipete masimba kuti tiite zvakawanda pa kuseenzera Djehovha.—2 Ako. 5:14, 15.

14. Ngaupi mushobo wakanaka wekupangidza kuti tinotenda zviya zvatiri kuizirhwa na Djehovha uye na Djesu? (Onaiwo mafoto.)

¹⁴ Umwe we mushobo wakanaka wekupangidza kuti tinotenda zviya zvatiri kuitirhwa na Djehovha uye na Djesu, nge we kupeta masimba kuti tibetsere amweni kuti agare Apupuri a Djehovha uye afundi. (Mat. 28:19, 20) Ndizvo kamare zvakaizwa no Muphostori Pauro kuti apangidze kuti unotenda Djehovha na Djesu. Iyena waiziya kuti cido ca Djehovha ngece kuti “anhu akasiyana-siyana aponeswe uye agume pa kugara no ruziyo re zvirokwazvo pamusoro pe cokwadi.” (1 Ti. 2:3, 4) Iyena wakapeta masimba akakura mubasa re kuparidzira kuti abetsere anhu akawanda aaikwanisa kuti ‘nge mishobo yese aponese anganani.’—1 Ako. 9:22, 23.

15. Maererano na Pisarema 1:2, cinyi cinoita kuti tipfare?

¹⁵ Mutari we Pisarema wakanyasa kupanganidza zvakanaka ngezve munhu unofunda soko ra Mwari. Iyena wakabhuya kuti: Munhuwo unopfara, ngekuti “mupfaro wake uri pa mutemo wa Djehovha” uye iyena “unorangaridza mutemo uu masikati no usiku.” (Pis. 1:1-3; masoko e pasi) Ecireketa ngezve tsamba ii, muturikiri umweni we Bhaibheri unozwi Joseph Rotherham wakatara mu bhuku rake rinozwi Estudos dos Salmos mu Cingezi, kuti munhu unodikana “kuzwa mupfaro kubva pa nhungamiriro dza Mwari zvekuti unodikana kudzipsvaka, kudzifunda uye kupedza nguwa ecidzirangarira.” Iyena wakabhuyazve kuti: “Kana munhu akapedza zuwa asikazi kuerenga Bhaibheri uye kupsvaka ungwaru waro zuwa irona unonga ariruza.” Imwimwi mungazwawo mupfaro we kufunda Bhaibheri nge kupfarira zviro zvakawanda uye zvinokosha zvamunogumira mariri uye kuedza kuona kuti izvona zvinobatana kudini. Kunyasa kukwarakwatisa kuti muziye ciro cimwe na cimwe ciri mu Soko ra Mwari, i ciro cinotipasa mupfaro wakakura!

16. Ticaonei mu fundo inoteera?

¹⁶ Zvokwadi zvakanaka zvatinofundiswa na Djehovha kubva mu Soko rake, azvishuphi kuzvizwisisa. Mu fundo inoteera, ticafunda ngezve zvokwadi izvi zvakadzika—tempro huru ya Djehovha ye kumwiya yakapanganidzwa no muphostori Pauro mutsamba yake yaakatarira Ahebheru. Imwimwi mucapfarira maningi kufunda ngezve nyaya ii.